Mikael Jóhann efstur á Meistaramóti Skákskóla Íslands

Mikael Jóhann Karlsson (1990) er efstur með 4,5 vinning að loknum 5 umferðum á Meistaramóti Skákskóla Íslands en í dag fóru fram 4. og 5. umferð. Fimm skákmenn hafa 4 vinninga en það eru Nökkvi Sverrisson (1990), Oliver Aron Jóhannesson (1988), Dagur Kjartansson (1623), Dagur Andri Friðgeirsson (1782) og Hrund Hauksdóttir (1671) koma næst með 4 vinninga.

Sitthvað hefur verið um óvænt úrslit og má þar nefna að Heimir Páll Ragnarsson (1231) vann Vignir Vatnar Stefánsson (1640) í fjórðu umferð.

Það vakti mikla ánægju að Hannes Hlífar Stefánsson ellefufaldur Íslandsmeistari, fimmfaldur sigurvegari Reykjavíkurskákmótanna og skákkennari við Skákskóla Íslands skyldi skoða skákir nemenda með þeim af þeim loknum.

Mótstöflu má finna hér.

Röðun sjöttu umferðar, sem fram fer í fyrramálið og hefst kl. 10, má finna hér. Þá mætast meðal annars: Oliver-Mikael, Nökkvi-Hrund og Dagur K. og Dagur Andri.

Lokaumferðin hefst svo kl. 15.

Chess-Results

Arnar Íslandsmeistari í atskák

Arnar E. Gunnarsson (2441) varð í dag Íslandsmeistari í atskák eftir sigur á Davíð Kjartanssyni (2348) í æsispennandi og afar skemmtilegu einvígi sem var í beinni útsendingu á RÚV í dag. Fyrri skák einvígisins lauk með sigri Arnars með svörtu. Davíð kom hins vegar sterkur til baka og jafnaði metin með því að vinna einnig með svörtu. Því þurfti bráðabanaskák (Armageddon) og þar hafði Arnar betur.

Fjórði atskákmeistaratitilinn Arnars sem nú er sigursælastur allra á Íslandsmótinu í atskák ásamt Helga Ólafssyni. Arnar sagðist aðspurður í mótslok stefna á þann "stóra" með þátttöku á Opna Íslandsmótinu í skák sem fram fer í Turninum í Borgartúni og hefst á föstudag. Það verður gaman að fylgjast með Arnari þar.

Lýsendur einvígisins Ingvar Þór Jóhannesson og Stefán Steingrímur Bergsson fóru hreinlega á kostum í lýsingum sínum. Leikmynd og öll vinna að hálfu RÚV var til mikillar fyrirmyndar. Mikil fagmennska þar á ferð.

Skákirnar eru því miður ekki aðgengilegur eins og er. Hægt er að fylgjast með útsendingunni með því að velja tengilinn hér að neðan.

Útsending RÚV

Skákfélagið Hrókurinn undirbýr minningarmót um Jonathan Motzfeldt: Funduðu með forsætisráðherra Grænlands

Liðsmenn Skákfélagins Hróksins hafa undanfarna daga verið í Nuuk, höfuðborg Grænlands, til að undirbúa minningarskákmót um Jonathan Motzfeldt, fyrsta forsætisráðherra Grænlands. Jonathan Motzfeldt var sannkallaður landsfaðir á Grænlandi, mikill Íslandsvinur og ástríðufullur skákáhugamaður. Hann tók þátt í fyrsta skákmótinu í sögu Grænlands, sem haldið var í Qaqortoq sumarið 2003. Jonathan lést árið 2010, en minning hans er í hávegum höfð í norðrinu.
 
Hrafn Jökulsson og Róbert Lagerman áttu í vikunni afar ánægjulegan fund með nýjum forsætisráðherra Grænlands, Alequ Hammond, sem í vor vann stærsta kosningasigur í sögu landsins og er fyrsta konan til að gegna embætti forsætisráðherra á Grænlandi. Fundinn sat einnig Kristjana Guðmundsdóttir Motzfeldt, ekkja Jonathans, sem er gestgjafi Hróksliða í Nuuk.
 
Á fundinum með forsætisráðherra Grænlands var farið yfir fjölmörg mál. Hrókurinn hefur sl. áratug skipulagt um 25 skákheimsóknir til Grænlands, kennt þúsundum barna að tefla og staðið fyrir ótal viðburðum. Liðsmenn Hróksins lögðu áherslu á þá staðreynd, að mestu varðaði að efla og dýpka vináttu og samstöðu grannþjóðanna í norðri.
 
Aleqa Hammond forsætisráðherra tók vel á móti hinum íslensku gestum. Hún sagði að minning Jonathans Motzfeldts væri í hávegum höfð á Grænlandi, og lýsti innilegu þakklæti fyrir vinarþel Íslendinga í garð Grænlendinga. Forsætisráðherrann hét ennfremur fullum stuðningi við skák- og minningarhátíð um Jonathan Motzfeldt, og bað fyrir kærar kveðjur til Íslendinga.
 
Forsætisráðherra Grænlands fékk að gjöf taflsett, og fyrsta grænlenska skákkverið, sem Grænlandsvinurinn og skákfrömuðurinn Siguringi Sigurjónsson stóð að.
 
Hróksmenn hafa líka átt fund með borgarstjóranum í Nuuk, Asii Chemnitz Narup. Hún er afar áhugasöm um útbreiðslu skákíþróttarinnar og lýsti eindregnum vilja yfirvalda í Nuuk til að taka þátt í skák- og menningarhátíð í minningu um Jonathan Motzfeldt.
 
Á mánudag munu Hróksmenn funda með forseta grænlenska þingsins, Lars Emil Johansen, fv. forsætisráðherra og ræða undirbúning minningarhátíðarinnar um Jonathan Motzfeldt, og enn nánari samskipti þjóðanna í norðri.
 
Á fundinum með forsætisráðherra Grænlands bar Hrafn Jökulsson kveðju Íslendinga til Alequ Hammond, og sagði að Íslendingar væru allra þjóða heppnastir með nágranna. Það væru forréttindi Íslendinga að vera grannar og vinir í norðrinu.
 
Auk funda með ráðamönnum Grænlands hafa liðsmenn Hróksins efnt til viðburða með félögum í skákfélagi Nuuk, heimsótt fjölsmiðju fyrir unglinga, gefið ótal eintök af grænlenska skákkverinu, og á laugardag munu þeir Hrafn og Róbert tefla við gesti og gangandi í stærstu verslunarmiðstöðinni í Nuuk.
 
Hrafn Jökulsson sagði að Hróksmenn væru hrærðir og þakklátir yfir móttökum Grænlendinga.
 
,,Við Íslendingar erum lánsamir að eiga slíka vini og nágranna. Ég hvet alla til að kynnast töfraheimi Grænlands. Hér býr stórkostleg þjóð með ótrúlega menningarhefð, og landið er fagurt og frítt."

Myndaalbúm (HJ)