Bent Larsen

Skák.is barst eftirfarandi minningargrein um Bent Larsen frá Gunnari Finnlaugssyni.

Skákkonungurinn og mannlífsriddarinn Bent Larsen er horfinn af skákborði lífsins. Auk þess að vera afburða skákmaður var hann einnig skemmtilegur fyrirlesari, ásamt því að vera afkastamikill og góður skákblaðamaður.

Eitt af því fyrsta sem ég man eftir var skákeinvígi Friðriks og Larsens í byrjun árs 1956. Þá var Larsen „vondi strákurinn" og tók Norðurlandatitilinn af skákgoði okkar Íslendinga, Friðrik Ólafssyni. Þeir voru góðir kunningjar, en friðsemi og vingjarnlegheit voru þeim fjarri þegar barist var á skákborðinu. Þessir tveir heiðursmenn hafa auðgað skákmenningu Norðurlanda í meira en hálfa öld!

Ég kynntist Larsen lítillega haustið 1989 í Holstebro í Danmörku. Þá fór fram aukakeppni um sæti í millisvæðamóti milli Margeirs, Yrjölä og Larsens. Sem nýbakaður formaður í Malmö Schacksällskap fékk ég þá hugmynd að fá Larsen til Málmeyjar. Hann tók vel í mína málaleitun og seinna um haustið kom hann, tefldi klukkufjöltefli, fjöltefli og hélt fyrirlestur við mikla hrifningu skákáhugamanna hér á Skáni. Mér er það sérstaklega minnisstætt hve auðvelt var að ná samkomulagi við hann um þóknun og annað varðandi heimsóknina.

Vinur minn Lars Grahn í Málmey gaf út Schacknytt í um það bil tvo áratugi. Draumur hans var að fá Larsen til að skrifa reglulega. Sá draumur rættist einfaldlega vegna þess að Larsen sætti sig við lág ritlaun. Lars hefur sagt mér að hann dansaði af gleði þegar svar Larsens kom. Larsen skrifaði mikið, og er án efa Norðurlandameistari skákblaðamanna. Fyrst og fremst skrifaði hann i Skakbladet, Schacknytt og dönsk dagblöð. Meðal annars skrifaði hann skákþátt daglega árum saman í Extra Bladet.

Upp úr 1970 flutti Larsen til Las Palmas. Hann var meira eða minna flæmdur úr landi af skattayfirvöldum.

Skatturinn taldi að maturinn sem hann fékk á skákmótum utan Danmerkur væru fríðindi sem borga ætti skatt af! Hann snéri aldrei aftur til Danmerkur og bjó síðustu árin í Argentínu.

Danir syrgja sína stærstu skákstjörnu fyrr og síðar. Á heimasíðu Danska Skáksambandsins er vitnað í forseta sambandsins. Hann segir þar að Larsen hafi á sínum bestu árum verið einn vesturlandabúa sem gat boðið Sovétmönnum byrginn. Hann gleymir illilega íslendingunum Friðrik Ólafssyni og Robert James Fischer!

Larsen var fróður og áhugasamur um margt. Hefði hann einblínt á skákborðið hefði hann trúlega náð enn lengra. En Larsen var ekki bara skákmaður, hann var heimsborgari og boðberi skákarinnar. Sagt er að sjaldan hafi honum orðið svarafátt. Einn vina minna í Danmörku sagði mér að eina svarið sem maður fékk aldrei frá Larsen væri;

Ég veit það ekki.

Heimur okkar skákmann verður fátæklegri eftir andlát Larsens en minningin um skákstjörnu Norðurlanda lifir!

Gunnar Finnlaugsson

Pistill ritstjóra um Íslandsmót skákfélaga

Ritstjóri Skák.is hefur venju samkvæmt skrifað pistil um Íslandsmót skákfélaga og má finna hann á bloggsíðu hans.

Bloggsíða GB

Susan Polgar fjallar um skák á Íslandi

Susan Polgar fjallar um íslenskt skáklíf og þá sérstaklega reykvískt skáklíf í nýlegri færslu á bloggsíðu sinni.  Umfjöllunin er að mestu leyti byggð á á frásögn af heimasíðu TR.

Færsla Polgar

Stelpur tefla líka!

Mjög góð umfjöllun var um kvennaskák í Íslandi í dag í gær.  Þar var m.a. viðtal við Eddu Sveinsdóttir, skákmömmu og stjórnarmann í SÍ og Helli, Guðný Erlu Hannesdóttur, í skákfélaginu ÓSK og Hallgerði Helgu Þorsteinsdóttur skákdrottningu.

Innslagið í held sinni má finna á Vísi.

Fleiri pistlar um Íslandsmót skákfélaga

Fleiri pistlar hafa birst um Íslandsmót skákfélaga á heimasíðum félaganna.  Annar er eftir Þorstein Þorsteinsson, liðsstjóra a-liðs Eyjamanna, og hinn er eftir Þóri Benediktsson hjá TR.

• Pistill Þorsteins Þorsteinssonar
• Pistill Þóris Benediktssonar

Áður birtir pistlar

• Pistill Gunnars Björnssonar
• Pistill Magnúsar Pálma
• Pistill Hrannars Baldurssonar
• Pistill Hermanns Aðalsteinssonar

 

Íslandsmót skákfélaga gert upp

Pistill ritstjóra um síðara hluta Íslandsmóts skákfélaga er nú aðgengilegur á bloggsíðu ritstjóra.

Ritstjóri spáir Bolvíkingum sigri

Ritstjóri Skák.is hefur skrifað sinn hefðbundna pistil um spáð í spilin fyrir Íslandsmót skákfélaga.  Ritstjórinn spáir Bolvíkingum sigri, Eyjamönnum öðru sæti og Hellisbúum því þriðja.

Pistil ritstjóra má finna á bloggsíðu hans.

Nýr pistill frá Guðmundi

Guðmundur Kjartansson hefur skrifað pistil um skoska meistaramótið á heimasíðu TR en þar náði hann í stórmeistaraáfanga. 

Heimasíða TR

Pistill Guðmundar Kjartanssonar

Guðmundur Kjartansson hefur birt pistil á heimasíðu TR um skáksumarið 2009 þar sem hann segir frá mótinu í Búdapest þar sem hann náði sínum lokaáfanga að alþjóðlegum meistaratitli.

Heimasíða TR

Ævisaga Sverris Norðfjörð - Sýning þann 17. júní í Grófinni

Þann 17. júní næstkomandi heldur Óttar M. Norðfjörð sýningu á klippilistaverkum sem hann vann fyrir bók sína, Arkitektinn með alpahúfuna. Um er að ræða ævisögu Sverris Norðfjörð, föður Óttars, sem lést 17. júní í fyrra, 67 ára að aldri.

Ævisagan er unnin upp úr dánarbúi Sverris, svo sem ljósmyndum, bréfum og teikningum, auk ýmislegs annars. Hver opna í bókinni er sjálfstætt klippilistaverk sem sýnir brot úr lífi Sverris, en á sýningunni verða nokkrar vel valdar opnur úr bókinni til sýnis, ásamt bókinni sjálfri, en aðeins 18 eintök voru prentuð af henni.

Sýningin er haldin í Grófinni 1 í miðbæ Reykjavíkur (beint á móti Borgarbókasafninu) og stendur frá klukkan 15-18 aðeins þennan eina dag. Það er rithöfundaforlagið Nýhil sem gefur ævisöguna út. Hún er 285 síður á lengd og verður ekki til sölu.

Í fréttinni má sjá bókakápuna og eina opnu úr bókinni. Þeir sem hafa aðgang að Facebook geta nálgast fleiri opnur á eftirfarandi slóð:

http://www.facebook.com/profile.php?cropsuccess&id=687241185#/album.php?aid=102057&id=687241185