Reykjavíkurskákmót í 50 ár - síðara bindi

Með Sögu Reykjavíkurmótsins í 50 ár, seinna bindi, lýkur Helgi Ólafsson hálfrar aldar yfirreið yfir helsta skákmót Íslendinga frá upphafi.

Á þessum tíma hefur mótið breyst frá því að vera lokuð keppni fárra útvalinna meistara, árið 1964, í opið og fjölmennt skákmót, sannkallaða skákhátíð sem skreytt er alls kyns hliðarviðburðum. Hátíð sem stöðugt laðar breiðara og fjölmennara róf skákmanna að skákborðinu, allt frá erlendum ofurstórmeisturum til óreyndra íslenskra ungmenna.

Helgi Ólafsson, fæddur í Vestmannaeyjum 15. ágúst 1956, er þriðji stórmeistari Íslands í skák. Hann er margfaldur Íslandsmeistari í kappskák, at- og hraðskák og að góðu kunnur fyrir umfjöllun sína um skák í dagblöð og tímarit. Sjálfur stóð Helgi í eldlínunni um 30 ára skeið, er hafsjór fróðleiks um Reykjavíkurskákmótið og einkar lagið að miðla þessu efni af áhuga og ástríðu. Á 50 ára afmælismótinu tók Helgi aftur þátt eftir áralangt hlé. Þar sýndi hann enn styrk sinn og lauk keppni efstur Íslendinga meðal allra efstu manna.

Gefum Helga orðið:

„Í tveim bindum um 50 ára sögu Reykjavíkurskákmótanna hafa verið teknar til meðferðar yfir 200 skákir en í því síðara, sem hér liggur fyrir, er hægt að finna yfirlit yfir þær allar. Ég hef leitast við að spinna í kringum þessar skákir frásagnir af baráttunni um efstu sætin í hverju móti.“

"Það er auðvitað magnað að þeir skákmenn sem taldir eru fremstir í dag hafa allir verið með á Reykjavíkurskákmóti: heimsmeistarinn Magnús Carlsen og Fabiano Caruana hafa báðir tvisvar verið með. Fremsta skákkona heims, Hou Yifan, var með árið 2012 og einnig má nefna bestu kínversku skákmennina, Wei Yi og Liren Ding. Bandaríski stórmeistarinn Hikaru Nakamura tefldi hér 16 ára gamall árið 2004, Hollendingurinn Anish Giri tefldi hér árið 2013, einnig Filippseyingurinn Wesley So og Úkraínumaðurinn Pavel Eljanov." 

Útgáfan sætir miklum tíðindum, það er ekki á hverjum degi sem skákbók er gefin út á íslensku, hvað þá þegar um vandað stórvirki er að ræða eins og hér er raunin – nokkuð sem enginn skákáhugamaður ætti að láta fram hjá sér fara.

Bókin kemur út á meðan Reykjavíkurskákmótinu stendur og geta skráðir kaupendur nálgast bókina í Hörpu eftir 10. mars nk., eða fengið hana senda heim að öðrum kosti. Áhugasamir sem ekki hafa fest kaup á bókinni, eru hvattir til þess að skrá sig fyrir henni hér á síðunni (guli kassinn efst).

(Þeir sem skráðu fyrir fyrri bókinni og greiddu fá sjálfkrafa kröfu í netbankann. Þurfa ekki að skrá sig aftur).

Páskaeggjasyrpa Nóa Síríus og TR hefst á sunnudag

Nú styttist í eina af skemmtilegustu mótasyrpum ársins!  Páskaeggjasyrpa Nóa Síríus og Taflfélags Reykjavíkur hefur slegið rækilega í gegn en mikill fjöldi krakka hefur tekið þátt mótum syrpunnar.  Í ár endurtökum við leikinn og með þessu framtaki vill T.R. í samstarfi við Nóa Síríus þakka þeim gríðarlega fjölda sem sótt hefur barna- og unglingaæfingar félagsins í vetur.

Frábærar aðstæður eru hjá Taflfélagi Reykjavíkur, margir reyndir þjálfarar og félagið býður eitt félaga upp á ítarlegasta námsefni sem völ er á hér á landi. Allar æfingar og allt námsefni er frítt, það þarf bara að mæta og taka þátt í þessum stórskemmtilegu æfingum!

Mótin í ár verða reiknuð til alþjóðlegra hraðskákstiga og glæsileg verðlaun eru í öllum mótunum, sem og fyrir samanlagðan árangur úr þeim öllum.  Í hverju móti verður síðan dregin út glæsileg skákklukka handa einum heppnum þátttakanda.

Páskaeggjasyrpan mun samanstanda af þremur skákmótum sem haldin verða þrjá sunnudaga fyrir páska í skákhöll Taflfélags Reykjavíkur að Faxafeni 12:

1. NÓA KROPP PÁSKAEGGJAMÓTIÐ. Sunnudaginn 6. mars kl. 14

2. NIZZA LAKKRÍS PÁSKAEGGJAMÓTIÐ. Sunnudaginn 13. mars kl. 14

3. NIZZA HRÍSKÚLU PÁSKAEGGJAMÓTIÐ. Sunnudaginn 20. mars kl.14

Keppt verður í tveimur flokkum, 1-3 bekk (og yngri) og 4-10 bekk.
Sex umferðir verða tefldar í hverju móti með 10 mínútna umhugsunartíma á mann.
Glæsileg verðlaun eru í boði fyrir alla hressu skákkrakkana sem taka þátt í syrpunni!
Verðlaunapeningar fyrir þrjú efstu sætin í hvorum flokki á hverju páskaeggjamóti.
Stór páskaegg fyrir þrjú efstu sætin samanlagt úr mótunum í hvorum flokki (misstór eftir sætum)
Allir sem taka þátt í minnst tveimur af þremur mótum í syrpunni fá lítið páskaegg í verðlaun fyrir þátttökuna og verða þau veitt í lok þriðja mótsins í syrpunni.
Dregin verður út ein glæsileg skákklukka handa heppnum skákkrakka á hverju páskaeggjamóti!

Skráningarform

Skráðir keppendur

Taflfélag Reykjavíkur og Nói Síríus hlakka til að sjá ykkur á PÁSKAEGGJASYRPUNNI 2016!

Alexander og Stephan áfram í Barna-Blitz

Alexander Oliver Mai og Stephan Briem urðu hlutskarpastir í undanrás TR fyrir Barna-Blitz sem fer fram í Hörpu þann 13. mars.  Tíu keppendur mættu til leiks og tefldu allir við alla og var þó nokkuð um óvænt úrslit.  Svo fór að Alexander og Stephan komu jafnir í mark með 7,5 vinning en næstir með 6,5 vinning voru Kristján Dagur Jónsson og Róbert Luu.  

Heildarúrslit má skoða hér.

Undanrásir fyrir Reykjavík Barna-Blitz hjá Hugin í kvöld

Á næstu Huginsæfingu mánudaginn 29. febrúar verður forkeppni fyrir Reykjavik Barna-Blitz og gefa tvö efstu sætin þátttökurétt í úrslitum sem fram fara í Hörpu laugardaginn 12. mars samhliða Reykjavíkurskákmótinu. Flokkaskipting á æfingunni mun því miðast við það, þannig að þau sem eru fædd 2003 og síðar og eiga þar með þátttökurétt í barnablitzinu tefla saman í riðli og þau sem eru eldri og þau sem verða búin að vinna sér þáttttökurétt tefla saman í riðli. Æfingin verður reiknuð til hraðskákstiga.

• Staðsetning: Skákfélagið Huginn, Álfabakka 14a, Mjódd
• Tímasetning: Mánudagur 29. febrúar kl. 17.15
• Fjöldi umferða: 7
• Tímamörk: 4 mínútur + 2 sekúndur á leik
• Lokaröð: Stigaútreikningur ræður ef vinningafjöldi er jafn

Hlaupárs-atkvöld í kvöld

Atkvöld verður hjá Huginn mánudaginn 29. febrúar 2016 og hefst mótið kl. 20:00. Þetta er í fyrsta sinn sem þessi skákkvöld ber upp á hlaupársdag síðan þau hófust og næst gefst ekki tækifæri til að tefla þegar hlaupársdag ber upp á mánudag fyrr 29. febrúar 2044. Fyrir einhverja er því nú eða aldrei.

Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hugins í Álfabakka 14a í Mjóddinni. Mótið verður reiknað til hraðskák- og atskákstiga.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Barna Blitz: Fyrstu undanrásir í TR í dag

Taflfélag Reykjavíkur heldur á sunnudaginn 28. febrúar eina af fjórum undanrásum fyrir Barna-Blitz.  Um er að ræða hraðskákmót sem mun fara fram meðfram Reykjavíkurskákmótinu og komast tveir efstu á hverju móti undanrásanna í úrslitin en hægt er að taka þátt í öllum undanrásunum.  Mótið á sunnudag verður reiknað til hraðskákstiga.

• Staðsetning: Taflfélag Reykjavíkur, Faxafeni 12
• Tímasetning: Sunnudagur 28. febrúar kl. 14
• Skráning: Á mótsstað og lýkur kl. 13:55
• Þátttökuréttur: Öll börn fædd 2003 og síðar
• Fjöldi umferða: 9
• Tímamörk: 4 mín + 2 sek á leik
• Þátttökugjald: Frítt
• Lokaröð: Stigaútreikningur ræður ef vinningafjöldi er jafn

Skákþáttur Morgunblaðsins: Heimsmeistaraeinvígi kvenna og áskorendamótið að hefjast

Heimsmeistaraeinvígi kvenna milli heimsmeistara kvenna María Muzychuk frá Úkraínu og kínversku skákdrottningarinnar Hou Yifan hefst í Lviv í Úkraínu þann 1. mars nk. Þær munu tefla 10 skákir en ekki er gert ráð fyrir að Hou Yifan muni eiga í miklum erfiðleikum með að endurheimta titilinn en hún er u.þ.b. 100 elo-stigum hærri en sú úkraínska. Heimamenn gera allt sem í þeirra valdi stendur til að undirbúa Maríu Muzychuk sem best fyrir einvígið og það vakti talsverða athygli þegar hún tók þátt í meistaramóti Úkraínu sl. vor að skákir hennar voru ekki birtar opinberlega. Leyndarhyggjan er enn við völd þar eystra.

Annar stórviðburður skákarinnar, áskorendamótið í Moskvu, hefst svo 10. mars mars og stendur til 30. mars en sigurvegarinn þar mun öðlast réttinn til að skora á heimsmeistarann Magnús Carlsen. Þegar hefur verið dregið um töfluröð og lítur hún svona út:

1. Sergei Karjakin 2. Hikaru Nakamura 3. Anish Giri 4. Wisvanathan Anand 5. Venselin Topalov 6. Levon Aronjan 7. Fabiano Caruana 8. Peter Svidler.

Tefld verður tvöföld umferð, sjöunda umferð fer fram á undan sjöttu umferð sem er gert til að forða því að Karjakin og Topalov hafi hvítt og svart þrisvar í röð.

Allir þessir stórmeistarar hafa verið iðnir við kolann undanfarið og er skemmst að minnast opna mótsins á Gíbraltar á dögunum þar sem Nakamura sigraði en nokkrum dögum síðar vann hann aftur, að þessu sinni sex manna skákmót í Zürich í Sviss sem fór fram eftir flóknu fyrirkomulagi hrað-at- og venjulegri kappskák. Aðrir þátttakendur þar voru Anand, Aronjan, Kramnik, Giri og Shirov.

Í ljósi frammistöðu Nakamura sem er ófeiminn við að lýsa því yfir að hann sé verðandi andstæðingur Magnus Carlsen í heimsmeistaraeinvígi geta Bandaríkjamenn verið bjartsýnir fyrir þetta áskorendamóti þar sem Fabiano Caruana hefur öðlast bandarískan ríkisborgarétt og mun tefla undir fána þeirra. 

Guðmundur Kjartansson vann Nóa Síríus mótið 2016

Eftir spennandi lokaumferð Nóa Síríus mótsins sem var samvinnuverkefni Skákfélagsins Hugins og Skákdeildar Breiðabliks stóð Guðmundur Kjartansson uppi sem sigurvegari eftir að hafa lagt Halldór Brynjar Halldórsson að velli í lokaumferðinni sem fram fór fimmtudaginn 11. febrúar. Efstu menn í A-flokki: 

1. Guðmundur Kjartansson 5 v. ( af 6) 2. – 3. Magnús Örn Úlfarsson og Halldór Grétar Einarsson 4 ½ v. 4. – 7. Guðmundur Gíslason, Stefán Kristjánsson, Halldór Brynjar Halldórsson og Örn Leó Jóhannsson 4 v.

Örn Leó Jóhannsson hækkaði mest allra keppenda á stigum eða um 45 elo stig.

Í B –riðli urðu jafnir í efsta sæti Snorri Þór Sigurðsson og Dawid Kolka með 5 vinninga af sex mögulegum. Í 3. – 4. sæti komu Bárður Örn Birkisson og Birkir Karl Sigurðsson með 4 ½ vinning. 

Lausnir á skákdæmum eftir Paul Keres

Pistlahöfundur fékk mikil viðbrögð við umfjöllun um Paul Keres og dæmin sem hann samdi kornungur og birtust hér í blaðinu fyrir viku síðan. Lausnirnar eru eftirfarandi: 

Dæmi 1:

1. Bc2! – og mát í næsta leik, hvítur hótar 2. Dxa2 mát, 1. ... Bxb1 er svarað með 2. Bxb3 mát og 1. ... Bxc2 er svarað með 2. Dxa2 mát.

 

 

 

 

Dæmi 2:

1. Dh8!

a) 1. ... e4 2. Hxg1+ Kxg1 3. Da1 mát.

b) 1. ... e2 2. Dxh2+ gxh2 3. Rf2 mát.

 

 

 

Grein þessi birtist í Morgunblaðinu 20. febrúar 2016

Skákþættir Morgunblaðsins

Gleðin allsráðandi á Polar Pelagic-hátíð Hróksins á Austur-Grænlandi

Gleðin er allsráðandi á Pelar Polagic-hátíð Hróksins sem nú stendur sem hæst á Austur-Grænlandi. Fimm liðsmenn skákfélagsins eru nú í heimsókn í Kulusuk og Tasiilaq, og hafa síðustu daga kennt skák í grunnskólunum og framundan eru meistaramót í báðum bæjum. Þá stendur Hrókurinn fyrir útskurðarnámskeiði fyrir börn og ungmenni í Kulusuk, undir handleiðslu Guðjóns Kristinssonar frá Dröngum í Árneshreppi. 

Polar Pelagic-hátíðin markar upphafið að fjórtánda starfsári Hróksins á Grænlandi, en alls hafa liðsmenn félagsins farið meira en 50 sinnum til Grænlands að útbreiða skák og efla vináttu og samvinnu nágrannaþjóðanna. 

Hátíðin hófst í báðum bæjunum á fimmtudag. Í Kulusuk eru þeir Hrafn Jökulsson forseti Hróksins, sem kennir skák, og Guðjón Kristinsson sem kennir útskurðarlist. Skólinn í Kulusuk fékk af þessu tilefni mjög veglega gjöf af útskurðarhnífum og verkfærum, frá íslenskri velgjörðarkonu grænlenskra barna sem ekki vill láta nafns síns getið. Börnin í Kulusuk, sem er næsta nágrannaþorp Íslands, hafa ýmist verið í skák eða útskurði síðustu daga og nú um helgina verður haldið stórmót og fjöltefli. 

Þrír liðsmenn Hróksins eru í Tasiilaq, sem er höfuðstaður Austur-Grænlands, stórmeistarinn Henrik Danielsen, Jón Grétar Magnússon og Jürgen Brandt. Þeir hafa haldið til í grunnskóla bæjarins og á mánudag verður haldið meistaramót skólans. Þá munu þeir heimsækja heimili fyrir börn, dvalarheimili aldraðra og fleiri staði, með skák og fleiri gjafir í farteskinu frá íslenskum fyrirtækjum og einstaklingum, og pjónahópum Gerðubergs og Rauða krossins í Reykjavík. 

Fjölmargir hafa lagt Hróknum lið við undirbúning og framkvæmd þessarar velheppnuðu hátíðar. Aðalbakhjarlar eru grænlensk-íslenska útgerðarfyrirtækið Polar Pelagic, sem er að þriðjungi í eigu Síldarvinnslunnar í Neskaupstað, og Flugfélag Íslands. Aðrir þátttakendur í hátíðinni eru  IKEA, Nói Síríus og BROS-bolir, Dines Tours, TOYOTA, veitingastaðurinn Einar Ben, ZO-ON og sveitarfélagið Sermersooq. 

Hróksmenn koma heim í næstu viku en fjölmargar hátíðir til viðbótar eru fyrirhugaðar á Grænlandi. Hróksmenn þakka öllum þeim sem lagt hafa félaginu lið í starfinu á Grænlandi í anda kjörorða Hróksins: Við erum ein fjölskylda.
 

Hlaupárs-atkvöld á mánudaginn

Atkvöld verður hjá Huginn mánudaginn 29. febrúar 2016 og hefst mótið kl. 20:00. Þetta er í fyrsta sinn sem þessi skákkvöld ber upp á hlaupársdag síðan þau hófust og næst gefst ekki tækifæri til að tefla þegar hlaupársdag ber upp á mánudag fyrr 29. febrúar 2044. Fyrir einhverja er því nú eða aldrei.

Fyrst eru tefldar 3 hraðskákir þar sem hvor keppandi hefur 5 mínútur til að ljúka skákinni og síðan þrjár atskákir, með fimmtán mínútna umhugsun. Teflt er í félagsheimili Hugins í Álfabakka 14a í Mjóddinni. Mótið verður reiknað til hraðskák- og atskákstiga.

Sigurvegarinn á atkvöldinu fær í verðlaun máltíð fyrir einn á Saffran eða pizzu frá Dominos. Einnig verður dreginn út af handahófi annar keppandi sem fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Íslandsmót barnaskólasveita 1.-3. bekk fer fram sunnudaginn 20.mars

Íslandsmót barnaskólasveita 1.-3.bekk 2016 fer fram í stúkunni við Kópavogsvöll sunnudaginn 20.mars nk. 

Tefldar verða sex umferðir eftir svissneska kerfinu. Umhugsunartími 8 mínútur á skák fyrir hvern keppenda. Mótið hefst kl. 13 og áætlað er að því ljúki með verðlaunaafhendingu kl 15:45.

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna)

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla.

Innifalið í þátttökugjaldinu er nesti í miðju móti.

Veitt verða verðlaun fyrir efstu þrjár sveitirnar og einnig efstu b-e sveitir.

Einnig borðaverðlaun fyrir bestan árangur á 1.-4. borði. 

Skráning fer fram á Skák.is (guli kassinn efst).

Skráningu skal lokið í í síðasta lagi 18.mars

Hægt er að fylgjast með þegar skráðum sveitum hér.

Ath. Áríðandi er að sveitirnar séu skráðar fyrirfram. 

Reglugerð um Íslandsmót barnaskólasveita: http://skaksamband.is/?c=webpage&id=251.