Gunnaslagur - Gunni Björns hrósaði sigri

Mánudagsmótið síðasta í KR  var helgað svonefndum Gunnaslag sem nú var háður i annað sinn,

Hinn önnum kafni Gunni Björns gaf sér tíma til að líta upp frá forsetastörfum til að vera með. Hann kom á óvart með því að verða efstur ásamt Óla B. en náði því að næla sér í fleiri mótsstig til viðbótar vinningum sínum en hinn síðarnefndi sem varð að sætta sig við annað sætið, hafandi tekið við Friðrikskóngnum rétt áður. Báðir hlutu þeir 10 vinninga af þrettán mögulegum. Aldursforsetinn Gunni Gunn varð þriðji sem teljast vel af sér vikið því við ramman reip var að draga og hart barist bæði í sókn og vörn og tímahrak mikið. Ungmennið efnilega Gauti Páll sýndi að hann er til alls líklegur á komandi mánuðum og árum með því að verða fjórði.

Fjórir „ gunnar“  voru meðal þátttakenda en flensa setti nokkuð mark á mótið með fjarveru Gunna Freys, sigurvegarans frá í fyrra og ófærð tálmaði þátttöku Gunna I. (hins digurbarkabassalega) Birgissonar, frá  snjóabælinu Siglufirði sem komst ekki suður. Gunni Nikuláss fyllti skarð hans. Gunni Skarpi stóð fyrir sinu en Gunni Finns var fjarri góðu gamni, vinningur sem margir höfðu bókað fyrirfram. Alls hefðu því 7 Gunnar getað verið með ef allir hefðu mætt, voru 6 í fyrra.

Sigurður Áss Grétarsson vann þó mesta afrek mótsins og sæmdarheitið "Gunnabani ársins" með því að leggja tvö Gunna af velli og gera jafntefli við hina tvo. Nældi sér þannig í þrjú „gunnaleður“ af fjórum mögulegum, en um það snerist keppnin innan mótsins.

Átökin á borðinu æstust mjög eftir því sem á mótið leið en pörun í lokin vakti undrun þegar neðstu menn lentu á móti þeim efstu, eitthvað skrítið við Sviss Perfect forritið sem treyst var á. Gæti hafa haft áhrif á stigareikninginn og heildarúrslitin þegar öllu er á botninn hvolft.  

Ýmsir minni spámenn komu á óvart en aðrir náðu ekki að uppfylla hólmgönguspár sínar en nutu þess samt að vera með og falla með sæmd.

Guðmundur Kjartansson sigraði á hraðskákmóti Nóa Síríus

Sigurvegari Nóa Síríus mótsins Guðmundur Kjartansson sló ekki slöku við á hraðskákmóti Nóa Síríus sem fram fór síðastliðið fimmtudagskvöld og vann það einnig. Guðmundur fékk 7½ vinning í 9 skákum og var það Benedikt Jónasson sem vann meistarann og Dawid Kolka náði jafntefli.

Í öðru sæti var Lenka Ptacnikova með 7 vinninga en Lenka var líka efsta konan á Nóa Síríus mótinu. Lenka og Guðmundur fóru því með góðar birgðir af góðgæti frá Nóa Síríus eftir kvöldið sem munu væntanleg duga lengi.

Í þriðja sæti var Benedikt Jónasson með 6½ vinning og fylgdu þeirri sæmd kassi frá Nóa Síríus. Að móti loknu var verðlaunaafhending fyrir Nóa Síríus mótið og fylgja hér með nokkrar myndir frá verðlaunaafhendingunni.

Lokastaðan á Chess-Results

Reykjavík Open Barna Blitz: Undanrásir að hefjast

Eins og síðustu ár stendur Skákakademía Reykjavíkur fyrir Reykjavík Open Barna Blitz. Mótið er unnið í samvinnu við taflfélög borgarinnar sem annast undanrásirnar fjórar. Í hverjum undanrásum komast tveir skákmenn áfram. Keppnisrétt í undanrásum eiga allir skákmenn fæddir 2003 og síðar óháð félagsaðild.

Fyrirkomulag undanrása er farið að skýrast:

Fyrstu undanrásirnar fara fram á sunnudaginn 28. febrúar í Taflfélagi Reykjavíkur að Faxafeni 12.

Nánar hér: http://taflfelag.is/undanras-fyrir-barna-blitz-fer-fram-a-sunnudag/

Undanrásir tvö fara fram á mánudaginn 29. febrúar klukkan 17:15 hjá Skákfélaginu Huginn í Mjóddinni, Álfabakka 14 a.

Þriðju undanrásirnar fara fram miðvikudaginn 2. mars hjá Skákdeild Fjölnis í Rimaskóla.

Víkingaklúbburinn mun svo halda fjórðu undanrásirnar.

Hver þessara aðila fjögurra ákveður fyrirkomulag eigin undanrása. Þannig geta t.d. mismunandi reglur gilt um hvað sé gert séu skámenn jafnir í efstu sætum, tímamörk geta verið mismunandi o.s.frv.

Tveir skákmenn komast áfram úr hverjum undanrásum og tryggja sér þannig rétt í úrslitunum sem tefld verða á sviðinu í Hörpu með útsláttarfyrirkomulagi sunnudaginn þrettánda mars klukkan 11:00.

Undanrásir fyrir Barna-Blitz fer fram á sunnudag

Taflfélag Reykjavíkur heldur á sunnudaginn 28. febrúar eina af fjórum undanrásum fyrir Barna-Blitz.  Um er að ræða hraðskákmót sem mun fara fram meðfram Reykjavíkurskákmótinu og komast tveir efstu á hverju móti undanrásanna í úrslitin en hægt er að taka þátt í öllum undanrásunum.  Mótið á sunnudag verður reiknað til hraðskákstiga.

• Staðsetning: Taflfélag Reykjavíkur, Faxafeni 12
• Tímasetning: Sunnudagur 28. febrúar kl. 14
• Skráning: Á mótsstað og lýkur kl. 13:55
• Þátttökuréttur: Öll börn fædd 2003 og síðar
• Fjöldi umferða: 9
• Tímamörk: 4 mín + 2 sek á leik
• Þátttökugjald: Frítt
• Lokaröð: Stigaútreikningur ræður ef vinningafjöldi er jafn

Rúnar hraðskákmeistari Akureyrar

Níu keppendur mættu til leiks á hraðskákmóti Akureyrar sunnudaginn 21. febrúar, þrátt fyrir ófærð og snjóblindu. Tefld var tvöföld umferð (16 skákir) og skipuðu þrír keppendur sér í forystusveit framan af móti, meistarinn frá því í fyrra, Rúnar Sigurpálsson, hinn einfætti Áskell Örn Kárason og skákmeistari Akureyrar frá 1964, Ólafur Kristjánsson. Ólafur slakaði á klónni í seinni hluta mótsins, þannig að þegar þeir Rúnar og Áskell mættust í næstsíðustu umferð var um hreina úrslitaskák að ræða. Með sigri í þeirri skák tryggði Rúnar sér hraðskákmeistaratitilinn í 77. sinn og gat slakað á í síðustu skák sinni við fræðafákinn Sveinbjörn Sigurðsson, sem hann reyndar vann einnig. Því lítur lokastaðan svona út:

1. Rúnar Sigurpálsson     14,5

2. Áskell Örn Kárason     13

3. Ólafur Kristjánsson    10,5

4. Sigurður Eiríksson      8

5-6. Andri Freyr Björgvinsson og

Haraldur Haraldsson        7

7. Smári Ólafsson          6

8-9. Haki Jóhannesson og

Sveinbjörn Sigurðsson      3

Áskorendaflokkur hefst 22. mars – tvö efstu sætin gefa þátttökurétt í landsliðsflokki í ár!

Áskorendaflokkur Íslandsmóts fer fram um páskana, 22. mars – 2. apríl nk. Teflt er í Stúkunni í Kópavogi. Tefldar verða níu umferðir eftir svissneska kerfinu. Jafnframt verður teflt í opnum flokki sem verður opinn fyrir skákmenn með 1600 skákstig eða minna. Þar verða tímamörki styttri og umferðir færri.

Keppendur með minna en 1600 skákstig geta valið á milli flokka.

Verðlaun í áskorendaflokki eru sem hér segir: 

1. 75.000 kr.
2. 45.000 kr.
3. 30.000 kr. 

Verðlaun í opnum flokki: 

1. Þrjár skákbækur hjá bóksölu Sigurbjörns
2. Tvær skákbækur hjá bóksölu Sigurbjörns
3. Skákbók hjá bóksölu Sigurbjörns. 

Auk þess verði sérstök stigaverðlaun fyrir þá sem hafa minna en 1200 stig í opnum flokki.

Verðlaun skiptast eftir Hort-kerfi séu menn efstir í verðlaunasætum í áskorendaflokki. Tvö efstu sætin gefa keppnisrétt í landsliðsflokki í ár sem fram fer á Seltjarnarnesi 31. maí – 11. júní nk.

Séu menn jafnir ræður stigaútreikningur (nánar í mótsreglum hér að neðan). Í opnum flokki gildir stigaútreikningur um verðlaunsæti.  

Skráning

Þátttökugjöld eru 5.000 kr. Unglingar 15 ára og yngri (1999 og síðar) og F3-félagar fá 50% afslátt. 

Í opnum flokki (sem eingöngu fyrir opinn fyrir þá sem hafa 1600 skákstig eða minna) eru þátttökugjöld fyrir alla kr. 2.000. 

Skráning fer fram á Skák.is (guli kassinn efst). Þátttökugjöld greiðist inn á reikning 101-26-12763, kt. 580269-5409 fyrir mót.

Upplýsingar um þegar skráða keppendur má finna hér.

Tímamörk

Áskorendaflokkur: 90 mínútur + 30 mínútur eftir 40 leiki. 30 sekúnda viðbótartími eftir hvern leik.

Opinn flokkur: 30 mínútur auk 30 sekúnda viðbótartími eftir hvern leik.

Dagskrá: 

1. umferð, Þriðjudagurinn, 22. mars, kl. 18
2. umferð, miðvikudaginn, 23. mars, kl. 18
3. umferð, fimmtudagurinn (skírdagur), 24. mars, kl. 14
4. umferð, föstudagurinn (langi), 25. mars, kl. 14
5. umferð, laugardaginn, 26. mars, kl. 14
6. umferð, þriðjudaginn, 29. mars, kl. 18
7. umferð, fimmtudaginn, 31. mars, kl. 18
8. umferð, föstudaginn, 1. apríl, kl. 18
9. umferð, laugardaginn, 2. apríl, kl. 14

Dagskrá opna flokksins verður nánar kynnt síðar. 

Nánari mótreglur

Ef tveir eða fleiri eru jafnir í sæti mun stigaútreikningur ráða ferð.

Nánar um útreikninginn:

• Samanlagðir vinningar allra andstæðinga lagðir saman nema þess sem hefur fæsta vinninga.
• Samanlagðir vinningar allra andstæðinga lagðir saman.
• Samanlagðir vinningar allra andstæðinga lagðir saman nema þeirra tveggja sem hafa fæsta vinninga.
• Innbyrðis úrslit  þeirra sem eru jafnir
• Sonneborn-Berger
• Hraðskákeinvígi

Jafnteflisreglur 

Takmarkanir eru settar á jafnteflisboð. Hún gengur út á það að ekki er heimilt að bjóða jafntefli fyrr en báðir keppendur hafa leikið 30 leiki. Á því má gera undantekningar sé þráteflt en þá verður að stöðva klukku, kalla á skákstjóra og koma með jafntefliskröfu. 

Yfirseta

Hægt er að taka tvær yfirsetur í umferðum 1-6 og fá fyrir hana hálfan vinning. Óska þarf eftir yfirsetunni með góðum fyrirvara og fylla út eyðublað þess efnis hjá skákstjóra.

Bárður Örn Unglingameistari og Esther Lind Stúlknameistari Reykjavíkur

Barna-og unglingameistaramót Reykjavíkur sem og Stúlknameistaramót Reykjavíkur fór fram í skákhöll Taflfélags Reykjavíkur sunnudaginn 21. febrúar. Mótið var opið fyrir börn á grunnskólaaldri.

Þrenn verðlaun voru veitt fyrir þrjú efstu sætin í mótinu, þrenn verðlaun fyrir efstu stúlkur og svo aldursflokkaverðlaun í hvorum flokki fyrir sig (fædd 2000-2001, 2002-2003, 2004-2005, 2006-2007 og 2008 og síðar). Þau sem eru búsett í Reykjavík eða eru félagar í reykvískum taflfélögum tefldu um titilinn Unglingameistari Reykjavíkur 2016 og Stúlknameistari Reykjavíkur 2016. Tefldar voru 7 umferðir með 15 mín. umhugsunartíma á skák í hvorum flokki fyrir sig. Mótið var reiknað til atskákstiga.

Þátttakendur voru 52 og var mótið vel skipað. Mörg af efnilegustu börnum og unglingum landsins voru með á mótinu.

Í opnum flokki komu bræðurnir Bárður Örn og Björn Hólm Birkissynir hnífjafnir í mark með 6,5 vinning. Stigaútreikningur sýndi að Bárður Örn var hærri á stigum og því hlaut hann 1. sætið og er Unglingameistari Reykjavíkur 2016. Björn Hólm hreppti silfrið, en síðan komu sex drengir með 5 vinninga, þeir Dawid Kolka, Þorsteinn Magnússon, Aron Þór Mai, Mykhaylo Kravchuk, Kristján Dagur Jónsson og Bjarki Kjartansson. Stig réðu einnig úrslitum hér og varð Dawid Kolka í 3. sæti.

Í Stúlknameistaramótinu tóku 10 stelpur þátt. Esther Lind Valdimarsdóttir kom þar, sá og sigraði með fullu húsi! Esther Lind byrjaði að sækja stúlknaæfingar í Taflfélagi Reykjavíkur í haust og hefur einnig reglulega sótt skákæfingar í Salaskóla. Hún er því Stúlknameistari Reykjavíkur 2016. Í 2. sæti varð Freyja Birkisdóttir með 5,5 v. og í 3. sæti varð Ylfa Ýr Welding Hákonardóttir með 5 vinninga. Þess má geta að fjórar af þeim tíu stelpum sem tóku þátt eru fæddar 2008, þannig að þær eiga framtíðina fyrir sér!

Báðir titlarnir, Unglingameistari Reykjavíkur 2016 og Stúlknameistari Reykjavíkur 2016 fóru eins og í fyrra til Taflfélags Reykjavíkur.

Skákmótið fór mjög vel fram. Aldursbilið var eins breitt og hægt var, alveg frá 6 ára upp í 16 ára! Þarna voru krakkar að stíga sín fyrstu skref í skákmóti og aðrir með mikla keppnisreynslu. Þó nokkur fjöldi foreldra og systkina fylgdist með og skákmótið gekk samkvæmt tímaáætlun og allt með ró og spekt. Ýmislegt gekk á á reitunum 64 eins og við þekkjum! Allt fer þetta í reynslubankann góða – og verður notað í næsta skákmóti! Sjá heildarúrslit í opnum flokki hér og í stúlknaflokki hér. Aldursflokkaverðlaun eru listuð hér að neðan.

Taflfélag Reykjavíkur þakkar öllum þátttakendum og aðstandendum fyrir skemmtilegt skákmót í dag!

Aldursflokkaverðlaun opinn flokkur:

• U 8: Andri Hrannar Elvarsson
• U 10: Adam Omarsson
• U 12: Kristján Dagur Jónsson
• U 14: Mykhaylo Kravchuk
• U 16: Bárður Örn Birkisson

Aldursflokkaverðlaun stúlknaflokkur:

• U 8: Karen Ólöf Gísladóttir
• U 10: Freyja Birkisdóttir
• U 12: Esther Lind Valdimarsdóttir
• U 14: engin stúlka í þessum aldurshópi tók þátt
• U 16: engin stúlka í þessum aldurshópi tók þátt

Mótshaldari var Taflfélag Reykjavíkur. Skákstjórar voru Þórir Benediktsson og Sigurlaug Regína Friðþjófsdóttir. Birna Halldórsdóttir sá um veitingar á meðan mótinu stóð.

Pistill: Sigurlaug Regína Friðþjófsdóttir.

Myndskreytt frásögn á heimasíðu TR.

Óskar Víkingur Norðurlandameistari - fjórir verðlaunapeningar í hús

Norðurlandamótið í skólaskák fór fram um helgina í Vaxjö í Svíþjóð. Eins og áður hefur komið fram varð Óskar Víkingur Davíðsson Norðurlandameistari auk þess sem þrír aðrir verðlaunapeningar komu í hús. Róbert Luu hlaut silfur og Símon Þórhallsson og Vignir Vatnar Stefánsson fengu brons. 

A-flokkur (1996-98)

Oliver Aron Jóhannesson hlaut 6 vinninga og endaði í 6.-7. sæti. Dagur Ragnarsson hlaut 2½ vinning og endaði í 9. sæti.

B-flokkur (1999-2000)

 

Símon Þórhallsson og Jón Kristinn Þorgeirsson hlaut 3½ vinning og enduðu í 3.-4. sæti. Símon fékk hins vegar þriðja sætið og brons eftir stigaútreikning.

C-flokkur (2001-02)

Hilmir Freyr Heimsson hlaut 3 vinninga og endaði í 6.-7. sæti og Nansý Davíðsdóttir hlaut 2½ vinning og endaði í 8.-9. sæti. 

D-flokkur (2003-04)

 

Vignir Vatnar Stefánsson hlaut 4½ vinning og endaði í þriðja sæti. Alesander Oliver Mai sem var tefla í fyrsta skipti á erlendi grundu hlaut 2½ vinning og endaði í 7.-10. sæti.

E-flokkur (2005-)

Það gekk best hjá íslensku keppendunum í e-flokki en þar komu gull og silfur í hús. Óskar Víkingur Davíðsson varð efstur með 5 vinninga og Robert Luu varð annar með 4 vinninga. Sérdeilis glæsilegt hjá þeim.

Landskeppnin

Danir mörðu sigur í landskeppninni en þeir hlutu 36 vinninga. Norðmenn urðu aðrir með 35½ vinning og Íslendingar þriðju með 34 vinninga. 

Stiahækkanir

Fimm íslensku keppendanna hækkuðu um 20 alþjóðleg skáksteig eða meira. Það voru: Vignir Vatnar (30), Alexander (29), Nansý (27), Róbert (23) og Óskar (20). 

 

• Heimasíða mótsins
• Chess-Results

 

Gunnaslagur II - Verðlauna- og skemmtikvöld í KR í kvöld

Verðlaun fyrir Kappteflið um Friðrikskónginn, sem Ólafur B. Þórsson vann að þessu sinni, verða afhent í kvöld (mánudagskvöldið 22. febr.) í upphafi GUNNASLAGS, sérstaks skemmtiskákkvölds og móts þar sem keppnin snýst um að máta sem flesta sem bera hið herskáka skákmannsnafn GUNNAR.

Sem skv. nafnaskýringum og  Wikipediu þýðir: „The name Gunnar means fighter, soldier, and attacker, but mostly is referred to by the Viking saying which means Brave and Bold warrior”. Því skal engan undra þó skákmenn með því nafni séu harðsnúnir og slyngir andstæðingar sem selja sig dýrt og gefast ekki upp fyrr en í fulla hnefanna.   

Í fyrra var afar góð þátttaka, sex Gunnarar mættir og  yfir 30 keppendur alls. Þess er að vænta að keppendur verði ekki færri nú, enda góð verðlaun í boði, auk ánægjunnar af því að máta mann og annan eða vera mátaður sjálfur ella.

Ýtt verður  á klukkurnar upp úr kl. 19.30 að lokinni stuttri verðlaunaathöfn sem meistari Friðrik Ólafsson verður viðstaddur. Tefldar verða 13 umferðir í striklotu með 7 mín. uht. skákina svo það kemur til með að reyna vel á bæði andlegt og líkamlegt úthald keppenda. Allir taflfærir Gunnar sérstaklega hvattir til að mæta og svo allir aðrir skákgeggjarar sem vilja velgja þeim og öðrum skeinuhættum andstæðingum undir uggum.

Sjáumst og kljáumst.

Óskar Víkingur Norðurlandameistari í skólaskák!

Óskar Víkingur Davíðsson varð í dag Norðurlandameistari í skólaskák en hann vann e-flokkur (fæddir 2005 og síðar). Íslendingar fengu þrenn önnur verðlaun. Róbert Luu hlaut silfur í e-flokki og Símon Þórhallson (b-flokkur) og Vignir Vatnar Stefánsson (d-flokkur) fengu brons.

Nánari umfjöllun um mótið væntanleg. 

• Heimasíða mótsins
• Chess-Results