Skákþáttur Morgunblaðsins: Heimsmeistarinn er ekki skaplaus maður

Þó að norski heimsmeistarinn Magnús Carlsen sé mikill keppnismaður er hann jafnframt prúðmenni og að flestu leyti góð fyrirmynd. Þess vegna kom það áhorfendum norsku sjónvarpsstöðvarinnar NRK, sem vanir eru löngum útsendingum frá þeim skákmótum sem Magnús tekur þátt í, á óvart þegar þeirra maður, þjóðarstoltið sjálft, missti stjórn á skapi sínu á heimsmeistaramótinu í Berlín, grýtti penna í gólfið og líkamstjáning hans gaf sterklega til kynna að úrslitin væru honum ekki að skapi. Kannski var gert heldur mikið úr þessu atriði; Magnús sá að sér og baðst afsökunar. Í þessu liggur munurinn á honum og golfhetjunni Tiger Woods sem sífellt staglast á því að hann sé að kljást við skapsmuni sína eftir að hafa fleygt járni eða driver út um víðan völl. Það er auðvitað gömul saga og ný að á keppnisvelli safnast stundum upp gríðarleg gremja sem allt í einu fær útrás og þá virðast engin takmörk fyrir því, hverju viðkomandi tekur uppá. Og upp úr því spinnast líka margar skemmtilegar sögur.

Hann var kominn með 9 vinninga af 10 mögulegum þegar hann mætti sigurvegara heimsbikarmótsins í Bakú, Sergei Karjakin, í elleftu og síðustu umferð fyrri keppnisdagsins. Í byrjun tafls sniðgekk heimsmeistarinn ítrekað troðnar slóðir og oftast gekk dæmið upp en hér var hann kominn í bullandi vandræði:

Carlsen – Karjakin

31. ... Kg7??

Hann gat leikið 31. ... Ha1! sem vinnur strax, 32. Dxa1 er svarað með 32. ... Dxf2+ 33. Kh1 Bf3+ og mátar. Karjakin missti af þessu þrisvar til viðbótar en vann þó skákina að lokum.

Áfram með frændur okkar Norðmenn; landi Magnúsar og vinur, Jon Ludwig Hammer, var að sögn miður sín eftir fimmtu umferð Íslandsmóts taflfélaga, en hann tefldi á 1. borði fyrir Skákfélagið Hugin. Hann þjarmaði lengi vel að 1. borðs manni Bolvíkinga í 5. umferð, Jóni L. Árnasyni, sem varðist af mikilli seiglu. Þegar Norðmaðurinn virtist vera að knýja fram sigur fórnaði Jón Loftur skiptamun til að ná upp þessari stöðu:

Jón L. Árnason – Jon Ludwig Hammer

Svartur leikur og vinnur.

Mikill fjöldi áhorfenda safnaðist í kringum borð skákmannanna en hvorki Jon Ludwig sem varð að sætta sig við jafntefli né nokkur annar sá að vinningur leyndist í stöðunni. Og því spyr ég þig, lesandi góður: Sérð þú vinningsleið fyrir svartan? Það er auðvitað hægt að fá „aðstoð“ hjá skákvélunum en fyrir þá sem kjósa að glíma við þetta sjálfir þá birtum við lausnina í næsta pistli. 

Einar Hjalti efstur á Haustmóti TR

Einar Hjalti Jensson sigraði á Haustmóti Taflfélags Reykjavíkur sem lauk í síðustu viku. Einar Hjalti hlaut 7 ½ vinning af níu mögulegum en í 2. sæti varð Bragi Þorfinnsson með 6 ½ vinning. Þar sem Einar Hjalti er ekki félagi í TR hlýtur Bragi sæmdarheitið Skákmeistari TR 2015. Í 3. sæti varð Oliver Aron Jóhannesson með 6 vinninga. Í B-riðli sigraði Guðlaug Þorsteinsdóttir örugglega með 7 vinninga af níu mögulegum, Vignir Vatnar Stefánsson varð í 2. sæti með 6 vinninga og í 3. sæti kom Tómas Agnar Möller með 5 ½ vinning. Í C-riðli gerðust þau tíðindi helst að Gauti Páll Jónsson vann allar skákir sínar, níu talsins, og í D-riðli, opna flokknum, varð hlutskarpastur Arnar Milutin Hreiðarsson með 7 vinninga af níu mögulegum.

Helgi Ólafsson [e-mail]

Grein þessi birtist í Morgunblaðinu 24. október

Skákþættir Morgunblaðsins

HM ungmenna: Átta vinningar í hús í dag

Átta vinningar í sautján skákum duttu í hús í sjöttu umferð HM ungmenna sem fram fór í dag í Porto Carras í Grikklandi. Oliver Aron Jóhannesson (u18), Jón Kristinn Þorgeirsson (u16), Bárður Örn Birkisson (u16), Heimir Páll Ragnarsson (u14), Vignir Vatnar Stefánsson (u12) og Óskar Víkingur Davíðsson (u10) unnu í dag. Fjórir krakkanna gerðu 

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Jón Kristinn (u16), Vignir Vatnar (u12) og Óskar Víkingur (u10) eru efstir íslensku krakkanna með 4 vinninga. Símon hefur 3,5 vinning.

Jón Kristinn og jafnvel Vignir Vatnar verða í beinni útsendingu á morgun sem hefst kl. 13:30.

Sautján fulltúar taka þátt fyrir hönds Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 6. pistill

Í gær var kærkominn frídagur. Síðustu dagar hafa farið í stúderingar og taflmennsku, frá morgni til kvölds, og það var gott fyrir krakkana og okkur þjálfarana að brjóta dagskrána aðeins upp. Við þjálfararnir, Helgi, Lenka og ég, höfum verið mjög ánægð með dugnað, vinnubrögð og eljusemi krakkanna við undirbúning fyrir skákirnar.

Morguninn hófst á fótbolta úti á íþróttasvæðinu við hótelið. Boltinn góði, frá skeggjuðu konunni við höfnina, var svo bara góður þegar allt kom til alls. Við spiluðum í röku grasinu í tæpar 2 klukkustundir (þar sem takkaskórnir hans Hilmis komu sér vel) og flestir krakkarnir tóku þátt í fótboltanum, ásamt nokkrum foreldrunum og skákmönnum frá Eistlandi og Noregi. Stefán Már, pabbi Vignis, og Jakob Luu, pabbi Róberts, sýndu hæfni sína í sitthvoru markinu. Eldri krakkarnir tóku áskorun frá skákmönnum frá Danmörku og Kanada og kepptu við þá seinna um daginn. Leikurinn endaði 20-5, Dönum og Kanadamönnum í vil, þrátt fyrir að Jón Trausti hafi verið yfirburðarmaður á vellinum (að eigin sögn). Helgi sýndi listir sínar með boltann í hótellobbýinu og hélt á lofti, íklæddur golfskóm, sem vakti talsverða lukku. Helgi var einnig svo heppinn að eigandi golfvallarins á svæðinu bauð honum að taka hring á vellinum með sér og mér skilst að spilamennskan hafi verið góð, tveir fuglar, þrátt fyrir lélegt ástand á flötunum!

 

Stór hluti hópsins fór í bátsferð, með lítilli ferju, yfir til bæjarins Neós Marmarás, sem tók einungis um 10 mínútur. Ég var heppinn að missa ekki af bátnum og kom hlaupandi niður að bryggju um kl. 14:00 þegar hann átti að fara að stað. Þegar ég ætlaði að ganga um borð hrópaði skipstjórinn "We are full!" og að ég kæmist því ekki með. Ég sagðist nú bara vera einn og auk þess hluti af íslenska hópnum sem þegar var kominn um borð. Skipstjórinn sættist á þessi rök mín og ég fékk að fara með. Sennilega hefur vaxtalagið mitt eitthvað hjálpað til því hann bætti við: "You are lightweight anyway!"

 

Í bænum gátum við loksins verslað eitthvað að ráði því þar var verðið mun hagstæðara en hér við hótelið. Við Símon rákumst á serbneska skák- og bóksölumenn frá Sahovsky Informator, sem voru að auglýsa og selja bækur og annan skákvarning. Menn eru greinilega orðnir spenntir fyrir EM á Íslandi í nóvember því þeir sáu á nafnspjaldinu mínu að við vorum frá Íslandi og spurðu strax: "Is everything ready in Reykjavik? I see the posts online from Gúnnar!"

Um kvöldið var svo haldið hraðskákmót fyrir keppendur frá Norðurlöndunum, sem Svíarnir stóðu fyrir. Aðalskipuleggjandinn, Helge Norgard að nafni, stælti sig ítrekað af því að heita sama nafni og íslenski stórmeistarinn Helgi Ólafsson. Ég held að hann hafi nefnt þetta við mig fjórum sinnum, svo ég næði því örugglega. Skipulagið á mótinu var með hægasta móti svo við Helgi og Lenka lentum í fullri vinnu við að aðstoða með skákstjórn. Árangur Íslendinganna var góður. Vignir Vatnar sigraði af öryggi í sínum aldursflokki, u12, og er því óopinber Norðurlandameistari í hraðskák! Dagur, Jón Kristinn og Hilmir Freyr enduðu í 2. sæti í sínum aldursflokkum.

Í dag er 6. umferð og mótið því hálfnað. Íslensku keppendurnir eru staðráðnir í því að gera sitt besta í dag eftir góðan frídag í gær.

Bestu kveðjur heim,
Björn Ívar

Íslandsmót eldri skákmanna 65+ - Strandbergsmótið í skák fer fram 7. nóvember

Íslandsmót eldri skákmanna 65+ (fædda 1950 eða fyrr) verður haldið laugardaginn 7. nóvember nk. í Strandbergi, safnaðarheimili Hafnarfjarðarkirkju í umsjá  RIDDARANS - skákklúbbs öldunga,  sem þar hefur aðsetur sitt. 

Þetta er í annað sinn sem slíkt mót með atskákarsniði fer fram í þessum aldursflokki. Tefldar verða 9 umferðir með 10 mínútna umhugsunartíma plús 3 sekúndur á leik. Fjórar umferðir fyrir hádegi en lokaumferðirnar fimm eftir hádegisverðarhlé. 

Mótið hefst kl. 10 árdegis og lýkur um kl. 16 með verðlaunaafhendingu og kaffisamsæti.  Teflt verður í hátíðarsalnum við kjöraðstæður. Boðið verður upp á kaffi, svaladrykki og snarl meðan á móti stendur.  Góð verðlaun og aldursflokkaviðurkenningar. 

Verðlaun

• 1. 10.000 kr.
• 2.  6.000 kr.
• 3.  4.000 kr.

Aldurflokkaverðlaun.

• 65-70
• 71-75
• 76 -80
• 81 og eldri

Jói Útherji gefur alla verðlaunagripi.

Sértök verðlaun fyrir 70+, 75+ og 80+. Jói Útherji gefur aukaverðlaunin.

Þátttökugjald er kr. 2.500.

Skráing fer fram á Skák.is. Upplýsingar um þegar skráða keppendur má finna hér. 

HM ungmenna: Pistill frá Birni Ívari

Þetta var kannski erfiðasta umferðin okkar til þessa, en við fengum 5,5 vinninga í heildina. Dagur vann sannfærandi sigur gegn Sandor Berta (2062) frá Ungverjalandi. Dagur tapaði illa í 4. umferð og ákvað að fara "back to basics" gegn Ungverjanum og tefla enska leikinn. Hann fékk hörkustöðu út úr byrjuninni og yfirspilaði andstæðinginn í miðtaflinu. Góður og öruggur sigur hjá Degi.

Oliver hafði svart gegn stigalægri andstæðingi frá Lúxemborg. Hvítur tefldi Alapin-afbrigðið gegn sikileyjarvörn Olivers og skipti upp á öllu sem hann gat. Oliver fékk aldrei tækifæri til þess að búa til nein færi og varð að sætta sig við jafntefli.

Jón Trausti hafði hvítt gegn Brazdzionis (2182) frá Litháen. Hann fékk mun betra tafl út úr byrjuninni en Brazdzionis varðist vel og Jón fann aldrei "killerinn" í stöðunni og tók jafntefli í tímahrakinu.

Jón Kristinn og Símon mættust innbyrðis en þetta er í annað skiptið sem slíkt gerist í mótinu hjá okkur. Strákarnir tefldu í botn, sem var ánægjulegt að sjá, enda ekki komnir alla leið til Grikklands til að semja stutt! Skákin náði þó aldrei að verða spennandi og jafntefli varð niðurstaðan eftir rúmlega 50 leiki.  

Bárður Örn og Hilmir Freyr gerðu jafntefli gegn Noori (1830) og Nydick (2160) í baráttuskákum. Sama var upp á tengingunum hjá Vigni, sem gerði jafntefli gegn Buonanno (1816).

Björn Hólm, Dawid Kolka, Heimir Páll, Óskar Víkingur, Stefán Orri, Róbert Luu, Veronika og Freyja töpuðu öll gegn stigahærri andstæðingum.  

Adam vann sína fyrstu skák þegar hann lagði Iraj Laturkar frá Finnlandi. Adam var að prófa nýja byrjunarleið og fékk fína stöðu. Í miðtaflinu tókst honum að plata mann af andstæðingnum og máta hann í framhaldinu. Mjög mikilvægur sigur fyrir Adam sem heldur vonandi áfram á sömu braut.  

Í dag var frídagur svo gærkvöldið var aðeins frjálslegra en venjulega. Wales-verjarnir, sem deila með okkur hæð á hótelinu, voru með fjöltefli og Hrekkjavökupartý á hæðinni og íslensku krakkarnir tóku margir þátt í því. 

Mótshaldarar stóðu líka fyrir gleðskap og danskeppni fyrir keppendur sem var auglýst með "all white dress code". Engar sögur fara af árangri Íslendinganna í þeirri keppni!

Ásamt Wales-verjunum deilir stórmeistarinn Vladimir Chuchelov með okkur hæð. Chuchelov er kannski best þekktur fyrir að hafa þjálfað ofurstórmeistarann Fabiano Caruana. Hann gistir í Royal Suite, hérna á endanum á ganginum, svakalegu hótelherbergi. Þangað inn bera hótelstarfsmenn ferska ávexti og annað góðgæti á hverjum degi. Það væsir ekki um menn hér í Porto Carras! Við rákumst einnig á Yussupow (2584) og Sakaev (2594) í lyftunni í dag en þeir virðast sætta sig við hefðbundin herbergi hér á neðri hæðum hótelsins. 

Í dag hópuðumst við öll saman úti í sundlaugargarði og tókum hópmynd sem fylgir með fréttinni. Frídagurinn í dag var ljúfur og það var ágætt að brjóta þetta aðeins upp og gera eitthvað annað en að stúdera og tefla. 

En meira um frídaginn síðar!  

Bestu kveðjur,
Björn Ívar

 

U-2000 mótið hafið

U-2000 mót Taflfélags Reykjavíkur hófst sl. miðvikudag en það er nú endurvakið eftir tíu ára hlé.  Mótið er opið öllum þeim sem hafa minna en 2000 Elo-stig og eru þátttakendur að mestu af yngri kynslóðinni en ásamt þeim taka þátt reyndir meistarar sem eru hvergi smeykir við að leggja stigin sín að veði gegn mörgum af efnilegustu skákmönnum landsins. Stigahæstur keppenda er Haraldur Baldursson (1969) en næstir koma Björn Hólm Birkisson (1852), Sigurjón Haraldsson (1799) og Gauti Páll Jónsson (1782).

Viðureignir fyrstu umferðar voru um margt athyglisverðar og óvænt úrslit litu strax dagsins ljós, þ.e. ef horft er til stigamunar keppenda. Á efsta borði stýrði hinn ungi og efnilegi piltur úr Breiðablik, Stephan Briem (1396), hvítu mönnunum gegn Haraldi í hörkuskák. Stephan hafði í fullu tré lengi vel gegn stigahæsta keppandanum en að lokum sagði reynslan til sín og Haraldur hafði sigur í lengstu skák umferðarinnar.

Á þriðja borði urðu líklega óvæntustu úrslit umferðarinnar þegar Jón Þór Lemery (1342) gerði jafntefli við Gauta Pál, en Gauti fór nýverið hamförum á Haustmóti TR þar sem hann vann C-flokkinn með fullu húsi vinninga. Í umræddri skák stýrði Jón Þór hvítu mönnunum og lenti í þekktri Kan-gildru Sikileyjarvarnar þar sem Gauti Páll vann mann snemma skákar fyrir tvö peð. Eitthvað fataðist svörtum þó flugið í framhaldinu sem leiddi til ágætra færa hvíts sem vann manninn til baka og stóð til vinnings að lokum. Jón Þór sá þó enga örugga vinningsleið og bauð jafntefli sem Gauti þáði með þökkum. Góð barátta hjá Jóni sem hefur verið í framför að undanförnu.

Af öðrum úrslitum má nefna að jafntefli gerðu þeir Arnaldur Bjarnason, sem er stigalaus, og Aron Þór Mai (1535) sem hefur farið mikinn undanfarið. Þá lagði Halldór Atli Kristjánsson (1413) nafna sinn Halldór Kristjánsson, sem einnig er stigalaus, með laglegri mátfléttu í lokin, en Halldór Atli hefur verið á góðu flugi eins og svo margir af okkar ungu skákmönnum.

Önnur umferð fer fram næstkomandi miðvikudagskvöld og hefst kl. 19.30. Þá mætast m.a. Haraldur og Ingvar Egill Vignisson (1549), Jóhann Arnar Finnsson (1580) og Sigurjón, sem og Eggert Ólafsson og Tjörvi.

Áhorfendur velkomnir – Alltaf heitt á könnunni.

Myndskreytt frásögn á heimasíðu TR.

• Heimasíða TR
• Chess-Results

 

 

Björgvin mættur aftur!

Þrjátíu og tveir höfðingjar mættu í Ásgarð sl. þriðjudag til þess að heyja tíu orrustur á reitunum 64. Þrjátíu og einn fékk að berjast, en einn tók að sér að sitja við stjórnvölinn og tók skrásetjari það að sér.

Björgvin Víglundsson mætti aftur leiks  í gær eftir nokkurt hlé, þar sem hann var að tefla í Haustmóti TR. Björgvin tefldi af krafti og öryggi eins og hann er vanur. 

Það var aðeins einn sem náði jafntefli við kappann, það gerði skákvinur okkar frá Akureyri Karl Steingrímsson.

Í öðru til þriðja sæti urðu jafnir þeir Gunnar Finnsson og Guðfinnur. Báðir með 7 vinninga Gunnar aðeins hærri á stigum.

Þetta var allt með hefðbundnum hætti í gær eins og venjulega. Þeir sterkustu raða sér í efstu sætin eins og eðlilegt er.

Síðan kemur mjög sterk miðja þar sem aðeins ½ vinningur skilur að níunda mann og þann tuttugasta og fyrsta. 

Sjá nánar í töflu og myndum frá ESE

 

 

HM ungmenna: Ekki gekk vel í fimmtu umferð

Ekki gekk vel í fimmtu umferð HM ungmenna sem fram fór í gær og aðeins kom 5½ vinningur í hús í 17 skákum. Dagur Ragnarsson (u18) og Adam Omarsson (u8) unnu en Oliver Aron Jóhannesson (u18), Jón Trausti Harðarson (u18), Jón Kristinn Þorgeirsson (u16), Símon Þórhallsson (u16), Bárður Örn Birkisson (u16), Hilmir Freyr Heimisson (u14) og Vignir Vatnarsson (u12) gerðu jaftefnli. Aðrar skákir töpuðust.

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Jón Kristinn, Símon, Hilmir Freyr, Vignir Vatnar og Óskar Víkingur Davíðsson (u8) eru efstir íslensku krakkanna með 3 vinninga.

Í dag er frídagur og ætla krakkarnir að nota daginn í það að spila fótbolta og fara út á strönd. 

Sautján fulltúar taka þátt fyrir hönds Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

Íslandsmót taflfélaga í Fischer Random í kvöld!

Annað skemmtikvöld starfsársins hjá TR fer fram næstkomandi föstudagskvöld.  Þá mun fara fram Íslandsmót taflfélaga í Fischer random hraðskák.  Þetta verður í annað sinn sem mótið fer fram en í fyrra sigraði A sveit Taflfélags Reykjavíkur.

Öll taflfélög eru hvött til að taka þátt og er frjálst að senda eins margar sveitir til leiks og þau kjósa. Samkvæmt venju verður gert hlé á taflmennskunni til hægt sé að bregða sér á Billjardbarinn og væta kverkarnar.

Fyrirkomulagið verður eftirfarandi:

1. Tímamörk eru 3 mínútur auk 2 sekúndna viðbótartíma á hvern keppanda.
2. Fjöldi skákmanna í hverri sveit eru fjórir og skal styrkleikaraðað eftir bestu samvisku. Sveitir skulu merktar A, B etc eftir styrkleika. Leyfilegt er að vera með tvo varamenn fyrir hverja sveit, sem koma þá inn á borð samkvæmt styrkleika.
3. Swiss, round robin eða double round robin eftir fjölda sveita. Stefnt að því að tefla allavegana 12 umferðir.
4. Leyfilegt er að fá einn lánsmann úr öðru félagi í sína sveit. Það hefur þó afleiðingar. Lán á stórmeistara kostar 3 vinninga, alþjóðlegur meistari kostar 2 vinninga, Fide meistari kostar 1 vinning og aðrir skákmenn kosta 1/2 vinning. Þessir vinningar verða dregnir frá í lok móts. Samþykki viðkomandi félags þarf að liggja fyrir til að lánið teljist löglegt.
5. Sú sveit sem hlítur flesta vinninga sigrar og fær nafnbótina Íslandsmeistari taflfélaga í Fischer Random. Séu tvær eða fleiri sveitir jafnar að vinningum ber sú sveit sigur úr býtum sem hefur flesta “matchpoints”. Séu sveitir enn jafnar verður gripið til stigaútreiknings.
6. Gerð verður hlé til Billjardbarsferðar meðan á mótinu stendur. Verðlaunaafhending mun fara fram á Billjardbarnum.
7. Verðlaun:
   1.sæti Bikar og 5000 króna úttekt á billjardbarnum í formi veitinga.
   2.sæti Bikar og 3000 króna úttekt á Billjardbarnum í formi veitinga.
   3.sæti Bikar og 2000 króna úttekt á Billiardbarnum í formi veitinga.
8. Þátttökugjald eru 2000 kr á A sveit.  B og C sveitir fá helmingsafslátt á þátttökugjaldi

Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.

Björn Jónsson tekur við skráningu í síma 8999268, [e-mail] eða í formi facebook skilaboða.  Ekki er hægt að senda fax.  Skráningarfrestur rennur út á miðnætti fyrir mót, fimmtudagskvöldið 29. október

Bjór á stórlækkuðu verði á Billanum allt kvöldið! Hlökkum til að sjá ykkur!

HM ungmenna: 4. pistill

Dagur 5 - 4. umferð

Strákarnir í elsta flokknum, Dagur, Oliver og Jón Trausti, áttu erfiðan dag og töpuðu allir. Þeir voru mjög mótiveraðir fyrir umferðina í dag og við vonum það besta fyrir þeirra hönd. Jón Kristinn hafði svart á FM Shtembuliak (2416) á einum af efstu borðunum, en Jokkó var með 2,5 af 3 fyrir umferðina. Upp komu miklar flækjur út úr byrjuninni og mér fannst hann einhvern veginn aldrei ná að fá upp sína stöðu. Hvítur fékk snemma frumkvæðið og vann nokkuð örugglega.

Símon mætti Xavier Povill Claros (2271) frá Spáni með hvítu. Við vorum búnir að kortleggja Povill fyrir skákina og undirbúa ákveðna byrjunarleið en þegar allt kom til alls þá valdi Povill að tefla móttekið drottningarbragð, sem við höfðum ekki reiknað með. Símon tefldi byrjunina vel og af miklu öryggi. Hann uppskar mun þægilegra tafl og Povill var hálf planlaus, með stakt, veikt peð á c- línunni sem mennirnir hans voru bundnir við að valda. Símon var sniðugur og fór þá skyndilega í kóngssókn sem svartur réð ekkert við. Hann vann peð og fórnaði svo hrók á glæsilegan hátt. Povill gafst upp þegar hann sá fram á mát eða drottningartap. GM David Anton (2634) er þjálfari Spánverjanna og hann var ekki sáttur með sinn mann. Ég var aftur á móti mjög sáttur við minn mann! Skákin fylgir með sem viðhengi.

Hilmir Freyr mætti strák frá Georgíu, Nika Khvadagiani (1809), með hvítu. Svartur tefldi kæruleysislega og gaf Hilmi kost á kóngssókn snemma í miðtaflinu. Ef það er eitthvað sem Hilmir Freyr kann að meta er það að hafa frumkvæðið og hann var ekki lengi að hrista fram úr erminni mátsókn sem endaði með glæsilegri riddarafórn og drottningarvinningi. Andstæðingurinn hans entist ekki lengi eftir það. Öruggur sigur hjá Hilmi. Björn Hólm mætti Eivind Djurhuus (2240), með svörtu. Eivind er sonur norska stórmeistarans Rune Djurhuus sem menn kannast við frá fornu fari. Björn sýndi það og sannaði að skákstigin hans 1852 segja ekkert um styrkleikann hans. Hann tefldi eins og herforingi og Norðmaðurinn átti engin svör gegn sóknartilburðum Björns. Í rauninni er skemmst frá því að segja að hann pakkaði Djurhuus saman, svo einfalt var það mál.
Bárður Örn, Dawid og Heimir Páll töpuðu allir í erfiðum skákum. Krakkarnir hafa allir verið svakalega duglegir við byrjunarundirbúninginn og við reynum að líta á tapskákirnar þannig að það megi allavega læra mikið af þeim, það er jákvæði punkturinn.
Veronika hafði hvítt gegn Ellen Kakulidis (1930) frá Danmörku. Ég nefndi það í gær að Veronika hefur verið mjög dugleg að undirbúa sig vel fyrir skákirnar sínar og það skilaði sér heldur betur í gær. Hún fékk upp afbrigði gegn Sikileyjarvörn sem hún hafði skoðað vel og fékk yfirburðartafl út úr byrjuninni. Í rauninni komst Kakulidis aldrei inn í skákina og þegar það stefndi í mikla sókn Veroniku lék svartur af sér hrók og gaf stuttu síðar. Það má geta þess að eftir skákina fór Veronika beint að læra heima í latínu. Þetta kallar maður alvöru vinnubrögð!

Vignir gerði jafntefli gegn Sahak Petrosyan (1704). Hann fékk töluvert betra út úr byrjuninni en missti svo aðeins tökin á stöðunni og var í raun ansi góður að halda jafntefli.

Bræðurnir Óskar Víkingur og Stefán Orri unnu báðir sínar skákir í u10 flokknum. Svo virðist vera sem 8 ára stelpurnar frá því í fyrradag hafi bara haft góð áhrif á þá bræður. Óskar tefldi eins og engill með hvítu gegn Þjóðverjanum Ole Zeuner (1546). Hann fékk þægilegra tafl út úr byrjuninni og þrengdi smátt og smátt að svörtum eftir öllum kúnstarinnar reglum. Þegar svartur tapaði loks liði neyddist hann til að gefast upp. Stefán Orri hafði einnig hvítt, gegn Spánverjanum Pablo Lopez Varela (1434). Stefán vann peð eftir byrjunina en Varela varðist vel. Þegar Stefán sá ekki fram á að komast neitt áfram ákvað hann að fórna manni fyrir 2 peð sem var mjög góð praktísk ákvörðun. Vörnin var erfið fyrir svartan í framhaldinu með hrók og riddara gegn hrók og þremur peðum Stefáns. Varela ákvað loks að fórna riddaranum fyrir tvö peð en þá fékk Stebbi upp stöðu sem hann vissi nákvæmlega að hann myndi vinna, með hrók og peð gegn hrók. "Ég byggði brú!" hrópaði hann til mín strax eftir skákina og það var nákvæmlega það sem hann gerði. Fagmannleg úrvinnsla hjá þessum 9 ára strák.

Róbert Luu gerði jafntefli gegn Isara Banidu Dahanayke (1268) frá Sri Lanka. Ég held að Róbert eigi talsvert inni á mótinu. Hann mætti stundum vera aðeins grimmari í sínum skákum og ég er viss um að það skilar sér í næstu umferðum.

Adam tapaði gegn Rafaels Spiridovskis frá Lettlandi. Adam er á sínu fyrsta stórmóti og er að tileinka sér réttu vinnubrögðin á svona mótum. Hann á einnig mikið inni.

Freyja hafði svart gegn Mina Palamarevic frá Serbíu. Freyja var með sjálfstraustið í góðu lagi eftir sigurinn í 3. umferð og tefldi af mikilli hörku. Eftir nokkrar sviptingar, þar sem Freyja vann skiptamun en fórnaði honum til baka, tókst henni loks að plata andstæðinginn og vinna af henni drottninguna. Hún innbyrti sigurinn af öryggi. Góður sigur hjá Freyju.

Í 5. umferð, sem er nýhafin þegar þessi orð eru skrifuð, mætast m.a. Jón Kristinn og Símon. Þetta er í annað skiptið á mótinu sem Íslendingar, og herbergisfélagar, mætast innbyrðis. Það er því miður lítið við þessu að gera.
Krakkarnir hafa verið duglegir við að nýta þann litla frítíma sem hefur gefist hérna úti. Það er prýðilegur sundlaugargarður við hótelið og ströndin er c.a. 50 metra frá. Áhyggjufullur hótelstarfsmaður hljóp til í gær og bað Stefán Orra vinsamlega að passa sig þegar hann var að hoppa út í sundlaugina af stórum steini. "Til hvers er eiginlega þessi sundlaug ef það má ekki hoppa í hana?", spurði þá okkar maður. Sjórinn er mjög tær hérna á svæðinu og það má auðveldlega sjá fiska í sjónum ofan af svölunum á 6. hæð. Freyja, sem virðist vera heilmikill veiðimaður, lagði sig alla fram við að fanga nokkra fiska á ströndinni. Með kænsku tókst henni að koma marhnút alla leið upp í fjöru. Hún segist ætla taka með sér háf næst og ég er spenntur að sjá hvað henni tekst að þá að draga á land! 

Það er frídagur á morgun og krakkarnir eru spenntir fyrir honum. Við erum búin að skipuleggja að fara í fótbolta á einum af völlunum sem hérna við hótelið. Ég fór áðan og keypti afleitan fótbolta frá hálfskeggjaðri konu sem rekur litla búð við höfnina. Vonir mínar eru bundnar við að loftið haldist í boltanum til morguns. Hilmir Freyr tók nefnilega með sér takkaskó hingað til Grikklands og ég vil ekki valda honum vonbrigðum!

Bestu kveðjur heim,
Björn Ívar

[Event "World Chess Championship u16"] [Site "?"] [Date "2015.10.28"] [Round "4"] [White "Thorhallsson, Simon"] [Black "Povill Claros, Xavier"] [Result "1-0"] [ECO "D22"] [WhiteElo "2057"] [BlackElo "2271"] [PlyCount "73"] [SourceDate "2015.10.28"] 1. d4 d5 2. c4 dxc4 3. Nf3 Nf6 4. e3 Bg4 5. Bxc4 e6 6. O-O Nc6 7. Be2 Bd6 8. Nc3 a6 9. h3 Bh5 10. b3 O-O 11. Bb2 Qe7 12. Ne5 Bxe2 13. Nxc6 bxc6 14. Nxe2 c5 15. Qc2 cxd4 16. Nxd4 c5 17. Nf3 h6 18. Qc3 Rac8 19. Rac1 Rc7 20. Nd2 Rfc8 21. Rfd1 Qf8 22. Nc4 Rc6 23. Na5 Rb6 24. Nc4 Rbc6 25. Nxd6 Rxd6 26. Rxd6 Qxd6 27. Qc2 Qc6 28. Rd1 Nd5 29. Qc4 a5 30. Qg4 f6 31. e4 Nb6 32. Bxf6 Rc7 33. Qg6 Rd7 34. Bxg7 $3 Rxd1+ 35. Kh2 Qb7 36. Bd4+ $1 Kf8 37. Bxc5+ 1-0