Þrír á toppnum á Nóa Síríus mótinu

Það var hart barist í fjórðu umferð Nóa Síríus-mótsins sem fram fór gærkveldi. Þrír eru efstir og jafnir með 3½ vinning. Það eru Guðmundur Kjartansson (2468), Þröstur Þórhallsson (2414) og Daði Ómarsson (2197). Guðmundur vann Magnús Örn Úlfarsson (2375) nokkuð örugglega á efsta borðinu. Þröstur þurfti að hafa verulega fyrir sigrinum gegn Degi Ragnarssyni (2276) en það var síðasta skákin til að klárast í hróksendatafli þar sem Þröstur var peði yfir. Björn tefldi byrjunina bjartsýnislega og fórnaði tveimur peðum fyrir spil eða sprikl eins og sumir vildu meina! Daði nýtti sér það vel og vann skákina eftir að vera búinn að lægja öldurótið. Daði hefur verið í banastuði á mótinu. Hann hefur tekið eina yfirsetu, þar sem hann hlaut hálfan vinning, en svo unnið þrjá afar sterka skákmenn.

Benedikt Jónasson (2208) sýndi mikla yfirvegun þegar hann lagði Jóhann Hjartarson (2540) að velli í hörkuskák. Jóhann sem var með svart jafnaði taflið fljótt og virtist jafnvel vera með aðeins betra. Benedikt tefldi hins vegar vel og gaf sig hvergi. Jóhann teygði sig síðan of langt í vinningstilraunum sínum. Benedikt sýndi hér úr hverju "strákarnir í taflfélaginu" eru gerðir þegar hann á endanum dró stórlaxinn að landi með hárfínni tækni og þolinmæði í löngu endatafli.

Vignir Vatnar Stefánsson (2404) er á mikilli siglingu og vann góðan sigur á Halldóri Grétari Einarssyni (2242). Vignir hefur aðeins lotið í dúk gegn Daða.  Jón L. Árnason (2471) er að koma til baka eftir brösótta byrjun  og vann nú Örn Leó Jóhannsson (2212) í vel útfærðri skák.

Vignir Vatnar, Benedikt og Björgvin Jónsson (2340), sem vann Guðmund Halldórsson í fjörlegri skák (2204) eru í 4.-6. sæti með 3 vinninga.

Friðrik Ólafsson (2373)  og Lenka Ptácníková (2210) gerðu jafntefli í skák þar sem Friðrik fórnaði liði en kom ekki að tómum kofanum hjá Lenku sem varðist vel og hélt sínu.

Fimmta og næstsíðasta umferð fer fram nk. þriðjudagskvöld. Þá mætast meðal annars:

• Daði (3½) – Guðmundur G. (3½)
• Benedikt (3) – Þröstur (3½)
• Jóhann (2½) – Vignir (3)
• Jón L. (2½) – Björn (2½)
• Jón Viktor (2½) – Guðmundur G. (2½)
• Helgi Áss (2½) – Sigurbjörn (2½)
• Dagur (2½) – Friðrik (2)

Sjá nánar á Chess-Results.

B-flokkur

Hörður Aron Hauksson (1839) er efstur með fullt hús í b-flokki en Birkir Karl Sigurðsson (1851) þurfti að gefa skákina þar sem hann gat ekki teflt. Hann er farinn til Ástralíu til að taka við stöðu ungmennalandsliðsþjálfara. Birkir er engu að síður í 2.-6. sæti með 3 vinninga ásamt Óskari Víkingi Davíðssyni (1840), Agnari Tómasi Möller (1919), Jóni Trausta Harðarsyni (2157) og Alexander Oliver Mai (1837).

Í næstsíðustu umferð mætast meðal annars:

• Hörður Aron (4) – Jón Trausti (3)
• Agnar Tómas (3) – Alexander Oliver (3)
• Óskar Víkingur (3) – Stephan Briem (2½)

Sjá nánar á Chess-Results.

 

Kappteflið um Friðrikskónginn VI. - Björgvin vann fyrsta mótið

Góð þátttaka var í fyrsta mótinu af fjórum í mótaröðinni um Taflkóng Friðriks Ólafssonar sem hófst í sjötta sinn í fyrrkvöld vestur í KR.

Lausnamiðaðir andstæðingar í öllum áttum og háttum. Svo fór að Bjorgvin Viglundsson var allra vígfimastur og vann með 8.5 vinningi af 9 mögulegum og uppskar 10 GrandPrix stig í hatt sinn. Björgvin vann fyrr í vetur Kappteflið um Skákseglið sem Riddarinn stóð fyrir með því að vinna 3 mót í striklotu. Vera má að sú verði einnig raunin nú ef hann heldur dampi þó of snemmt sé um slíkt að spá. Hér fylgja einnig með úrslitin í Árdegismótinu í KR á laugardaginn var sem GRK fór létt með að öðrum ólöstuðum.

Gallerý Skák / ESE

 

Meistaramót Vinaskákfélagsins 2017

Meistaramót Vinaskákfélagsins í Atskák verður haldið 23 febrúar, 9 mars og 16. mars. Ákveðið er að hafa skákmótið á 3 stöðum ef húsrúm leyfir. Þetta verður árlegt skákmót.

• 23. febrúar verður það haldið í Vin Hverfisgötu 47.
• 9. mars verður það í Hlutverkasetrið Borgartúni 1.
• 16. mars er óstaðfest enn hvar við höldum það.

Skákmótið verður 8 umferðir. 3 skákir á kvöldi, nema síðasta kvöldið þá verða tefldar 2 skákir og verðlaunaafhending af því loknu.

Þetta verður opið skákmót fyrir alla.

Tímamörkin eru  15 mín + 10 sek uppbótartími á leik.

Mótið er reiknað til atskákstiga. Mótið hefst kl. 19:30. 

Verðlaun:

• 1. sætið eignarbikar + gullpeningur. Einnig verðum við með farandbikar en þetta skákmót verður síðan árlegt.
• 2. sætið silfurpeningur.
• 3. sætið bronspeningur.

Einnig ætlar einn félagi í Vinaskákfélaginu að gefa andlitsteikningar af frægum skákmönnum.

Þáttökugjald á mótið er að félagsmenn greiði 500 kr., en 2.000 kr. fyrir aðra. Ath. að Hollvinir Vinaskákfélagsins fá frítt á skákmótið.

Þið getið skráð ykkur á mótið á gula kassanum efst á síðunni. Upplýsingar um þegar skráða keppendur má finna hér.

Leikar æsast á N-S mótinu í kvöld!

Fjórða umferð hins bleksterka Nóa-Siríus móts (Gestamóts Hugins og Skákdeildar Breiðabliks) hefst kl. 19.00 í kvöld. Vænta má magnþrunginnar spennu þegar kapparnir hamast við að velta kóngi hver annars úr sessi með brakandi heilastarfsemi og bellibrögðum í öllum regnbogans litum. 

Eftirlæti þjóðarinnar, Friðrik Ólafsson keppir við fremstu skákkonu landsins Lenku Ptácníkovu. Þar getur orðið áhugaverð barátta á listrænum nótum fagurkera. Skákmennirnir geðþekku Benedikt Jónasson og Jóhann Hjartarson leiða saman hesta sína. Benedikt hefur áður sýnt að hann er höfðingjadjarfur og vís til þess að veita stórmeistaranum sterka verðugt viðnám. Ekki kæmi á óvart þó að upp kæmi spænski leikurinn með harðri stöðubaráttu. Guðmundur Kjartansson mætir Magnúsi Erni Úlfarssyni. Báðir eru þeir baráttujaxlar miklir með úthald á við veðurbarinn sjómann á frystitogara – alls ekki ósennilegt að skákin fari yfir 100 leiki. Þröstur Þórhallsson etur kappi við Dag Ragnarsson. Snarpir skákmenn báðir, stundum óþolinmóðir; stórmeistarinn svakalega útsjónarsamur og skeinuhættur í flóknum stöðum en Dagur vex með hverri raun. Gæti orði stutt senna en hörð. Ungstirnið efnilega Örn Leó Jóhannsson tekst á við Jón L. Árnason, fyrrum heimsmeistara unglinga. Þessi viðureign gæti orðið skemmtileg og víst að Örn Leó verður að eiga sinn allra besta dag til að ná að velgja stórmeistaranum sterka undir uggum. Daði Ómarsson mætir félaga sínum úr TR, Birni Þorfinnssyni. Þetta verður mjög áhugaverð skák, Daði sérfræðingur mikill í byrjunum, nánast gangandi skábókasafn, og Björn rammvilltur sóknarskákmaður sem stefnir almennt að því að máta andstæðinginn í sem allra fæstum leikjum, óháð öllum kennisetningum byrjanafræðanna – óháð mannafla sem hann skeytir lítt um. Hér er aðeins stiklað á stóru því að allar viðureignir kvöldsins lofa góðu um skemmtan mikla og góða. 

Á efstu borðum í B-flokki mætast Birkir Karl Sigurðsson, Ástralíufari, og Hörður Aron Hauksson, báðir með fullt hús stiga. Jón Trausti Harðarson, stigahæsti keppandinn, tekst á við Stefán Orra Davíðsson, væntanlega af miklum þunga. Snillingarnir úr viðskiptalífinu, Jón Eggert Hallsson og Agnar Tómas Möller, fara í stífa hagkvæmniútreikninga einstakra afbrigða í huganum og ungstirnin Benedikt  Briem og Óskar Víkingur Davíðsson reyna með sér af fullum krafti. Á fimmta borði mætir skákmaðurinn knái Alexander Oliver Maí hinni bráðefnilegu skákkonu Svövu Þorsteinsdóttur, sem gerði sér lítið fyrir og hélt jöfnu við Jón Trausta Harðarson í umferðinni á undan. Ólafur Evert Úlfsson og Stephan Briem leiða saman hesta sína og þar verður án efa hart barist. Sömu sögu er að segja af viðureigninni á 7. borði þar sem ungstirnin Róbert Luu og Hrund Hauksdóttir geysast fram á köflótta borðið full sjálfstrausts og sigurvilja. Margt fleira verður skemmtilegt á sjá í þessum spennandi flokki! 

Gestir eru velkomnir í Stúkuna á Kópavogsvelli. Sjá pörun á Chess-Results.

SÞR 7.umferð: Guðmundur Kjartansson og Björn Þorfinnsson efstir og mætast í næstu umferð

Guðmundur Kjartansson vann peð snemma tafls gegn Degi Ragnarssyni en gaf drottningu fyrir hrók og mann og færi með valdað frípeð. Dagur þurfti síðan að gefa heilan hrók fyrir frípeðið og þar með var Dagur að kveldi kominn.

Hinn alþjóðameistarinn við toppinn, blaðamaðurinn og fyrrum forsetinn Björn Þorfinnsson vann Örn Leó Jóhannsson og deilir nú efsta sætinu með Guðmundi. Örn Leó virtist lengi vel vera með ágæta stöðu en notaði mikinn tíma og urðu að lokum á mistök sem kostuðu hann peð og síðan var ekki að sökum að spyrja.

Sama má raunar segja um skákir Lenku og Daða, Júlíusar og Þorvarðar Fannars og Gauta Páls og Björgvins; ómögulegt var að spá fyrir úrslit fyrr en nokkuð langt var liðið á keppnisdaginn. Svo fór að Lenka, Þorvarður Fannar og Björgvin höfðu betur og verða því öll á efstu borðum í næstu umferð, ásamt Benedikti Jónassyni sem lagði Jóhann Ingvason. Þar verða líka Jon Olav, sem vann Hrannar Arnarsson í tvísýnni skák og þeir Bárður Örn og Björn Hólm Birkissynir sem gerðu jafntefli í sinni innbyrðis viðureign.

Áttunda og næstsíðasta umferð verður tefld á miðvikudagskvöld, 1. febrúar og hefst kl. 19.30. Þá mætast stigahæstu menn mótsins, þeir Guðmundur Kjartansson og Björn Þorfinnsson en Dagur mætir Þorvarði Fannari og Lenka Björgvini Víglundssyni.

Það verður síðan á föstudaginn 3. febrúar sem ljóst verður hver hreppir titilinn Skákmeistari Reykjavíkur 2017, því þá fer níunda og síðasta umferðin fram.

Önnur úrslit 7. umferðar sem og pörun 8.umferð má sjá á Chess-results.

Myndskreytt frásögn á heimasíðu TR

• Chess-Results
• Skákirnar: 1 2 3 4 5 6 7

Tómas Veigar vann Skákdagsmót Akureyringa

Áður hefur verið gerð grein fyrir skólamótunum fjórum sem háð voru á skákdaginn á Akureyri. Um kvöldið var svo einnig efnt til móts á Skákheimilinu. Þar voru tefldar skákir með umhugsunartímanum 5-3 og lauk mótinu svo:

Tómas Veigar Sigurðarson 11 af 12

Haraldur Haraldsson       9

Sigurður Arnarson         8

Sigurður Eiríksson        6

Kristinn P. Magnússon     6

Ulker Gasanova            2

Heiðar Ólafsson           0

Teflt í Grunnskóla Vestmannaeyja á Skákdaginn og námskeið framundan

Í vetur hefur Grunnskóli Vestmannaeyja tekið þátt í verkefni Skáksambandsins Skák eflir skóla - kennari verður skákkennari. Allir nemendur fjórða bekkjar eru í skák í hverri viku hjá Sæfinnu Ásbjörnsdóttur sem tekur þátt í verkefninu fyrir hönd skólans. Krakkarnir tóku þátt í Skákdeginum og voru alltaf allavega tveir nemendur úr fjórða bekk sem sátu við taflborð á göngum skólans og tefldu við nemendur úr öðrum bekkjum, ekki síst yngri bekkjum.

Fyrstu helgina í febrúar bíður Taflfélag Vestmannaeyja þessum nemendum ásamt öðrum nemendum Grunnskólans á helgarnámskeið í skák. Stefán Bergsson sem hefur starfað með Sæfinnu og grunnskólanum í vetur mun kenna á námskeiðinu.

Á myndinni má sjá nemendur úr fjórða bekk við taflborðin á og ef smellt er á myndina má sjá skemmtilegan texta um Skákdaginn. 

 

 

Andri nær forystu á Skákþingi Akureyrar

Fjórða umferð Skákþingsins var tefld í gær. Þá áttust m.a. við forystusauðirnir Jón Kristinn og Andri. Eins og í haustmótinu var Andri erfiður við félaga Jokko; náði heljartaki á honum eftir byrjunina og leiddi taflið smám saman til sigurs. Þá vann Ulker góðan sigur á Heiðari og Ágúst Ívar lagði Gabríel Frey að velli í viðureign ungu mannanna. Haraldur fékk og vinning í skákinni við Alex, sem mætti ekki til leiks. Þá gerðu þeir Hreinn og Sveinbjörn sannkallað stóirmeistarajafntefli. Karl og Tómas munu tefla sína skák á mánudagskvöld og verður röðun fimmtu umferðar birt eftir að henni lýkur.

• Heimasíða SA
• Chess-Results

Toyotaskákmótið 2017

Föstudaginn, 3. febrúar, verður 10. TOYOTASKÁKMÓTIÐ haldið í höfuðstöðvum  Toyota í Kauptúni. Mótið hefst stundvíslega kl. 13.00. Tefldar verða 9 umferðir með 10 mínútna umhugsunartíma.

Æsir sjá um framkvæmdina en Toyota gefur öll verðlaun og veitingar.

Engin þátttökugjöld.

Það eru 22 búnir að skrá sig til leiks.

Þeir sem ætla að vera með en eru ekki búnir að skrá sig eru  vinsamlega beðnir að gera það í netfang  [e-mail] eða síma 8931238 og í netfang [e-mail] eða síma 8984805.

Stjórnin

 

 

 

 

 

Hraðkvöld Hugins í kvöld

Hraðkvöld Hugins í Mjóddinni verður mánudaginn 30. janúar nk.  og hefst taflið kl. 20:00. Tefldar verða 7-10 umferðir með umhugsunartímanum 4 mínútur + 2 sekúndur á hvern leik eða 5 mínútur + 2 sekúndur á hvern leik eftir fjölda umferða. Teflt er í félagsheimili Hugins í Álfabakka 14a í Mjóddinni. Hraðkvöldið verður reiknað til hraðskákstiga. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu. Í tilefni af skákdeginum 26. janúar þá verður skákbókin Við skákborðið í aldarfjórðung, 50 valdar sóknarskákir með Friðriki Ólafssyni í verðlaun fyrir sigurvegara mótsins og að auki annað eintak dregið út. Þó ekki sá sami og er dreginn í hinu happdrættinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).