Guðmundur vann í fjórðu umferð

FIDE-meistarinn Guðmundur Kjartansson (2365) vann Englendinginn Adri Pickersgill (2043) í fjórðu umferð Hastings-mótsins, sem fór í gær. Guðmundur hefur tvo vinninga.  Í fimmtu umferð, sem fram fer í dag, teflir Guðmundur við enska skákmanninn Richard Almond (2126).

Efstir með 3,5 vinning eru stórmeistararnir Gawain Jones (2540), Englandi, Igor Kurnosov (2602), Rússlandi, og Valeriy Neverov (2560), Úkraínu.

Rúmlega 100 skákmenn taka þátt í aðalmótinu og þar af 13 stórmeistarar.   Guðmundur er u.þ.b. nr. 60 í stigaröðinni.  

Heimasíða mótsins

Gleðilegt ár!

Ritstjóri óskar skák- og skákáhugamönnum gleðilegs árs.  Þakka samstarfið á árinu sem er líða og hlakka til skákársins 2009 sem vonandi verður skákinni gæfuríkt.

 

 

Jón Viktor sigraði í Reggio Emila

Jón Viktor Gunnarsson (2463) sigraði  ítalska FIDE-meistarann Luca Barillo (2202) í fimmtu umferð b-flokks Reggio Emila-mótsins, sem fram fór í dag á Ítalíu.  Björn Þorfinnsson (2408) gerði hins vegar stutt jafntefli við  ungverska alþjóðlega meistarann Miklos Galyas (2454).   Björn hefur 4 vinninga og er efstur í flokknum en Jón hefur 3 vinninga.

Ekki er enn öllum skákum lokið í a-flokki en þar var ungverski stórmeistarinn Zoltan Almasi (2663) efstur fyrir umferðina með fullt hús en situr enn að tafli gegn Rússanum Alexei Dreev (2670).  Kínverjinn Ni Hua (2710) hefur 4 vinninga að loknum fimm skákum og Þjóðverjinn Jan Gustafsson (2634) er þriðji með 3 vinninga.

Í sjöttu umferð, sem fram fer á morgun, teflir Björn við ítalska FIDE-meistarann Andrea Cocchi (2305) og Jón við ítalska FIDE-meistarann Marco Colvi (2343).

B-flokkurinn er áfangamót þar sem Björn er að gera atlögu að lokaáfanganum að alþjóðlegum meistaratitli en til þess þarf 6 vininninga í 9 skákum.  Jón Viktor er hins einn þriggja alþjóðlegra meistara. 

Skákirnar eru sýndar beint á netinu og skákir morgundagsins hefjast kl. 14:30.

• Heimasíða mótsins
• Skákirnar í beinni

Björn Ívar og Ólafur Freyr Tvískákmeistarar Vestmannaeyja

Í gærkvöldi fór fram Tvískákmeistaramót Vestmannaeyja 2008.  Sex lið mættu til leiks og snerist keppnin fljótlega upp í einvígi milli tveggja liða, annars vegar Björns Ívars Karlssonar/Ólafs Freys Ólafssonar og Daða Steins Jónssonar/Kristófers Gautasonar og eftir að mótinu lauk kom í ljós að bæði þessi lið stóðu uppi með 9 vinninga af 10 mögulegum.

Þá var tefldur bráðabani tvær skákir milli þessara liða og enn var jafnt 1-1 og var þá brugðið á það ráð að tefla eina skák milli liðanna og dregið um mótherja og lit.  Fóru þá leikar þannig að Björn Ívar og Ólafur Freyr sigruðu og urðu þar með Tvískákmeistarar Vestmannaeyja 2008.

 

Volcano skákmót í Eyjum

Á gamlársdag fer fram skákmót á Volcano Café í Vestmannaeyjum og hefst það kl. 13:00.  Allir eru velkomnir að taka þátt og verða fjölbreytt verðlaun. 

Verðlaun:
Fullorðinsflokkur
1 verðlaun 15.000 kr.
2 verðlaun gjafabréf frá Volcano Café kr. 2.500
3 verðlaun gjafabréf frá Volcano Café kr. 1.500

Yngri flokkar
Gjafabréf frá Volcano Café kr. 2.500, 1.500 og 1.000,-.

Reiknað er með að teflt verði í einum opnum flokki en verðlaunum skipt eftir aldri.

Í kvöld þriðjudag er svo hið geysiskemmtilega Tvískákmeistaramót Vestmannaeyja og hefst það kl. 19:30 í Skáksetrinu að Heiðarvegi 9.

Sveinn Ingi og Gunnar Freyr Víkingaskákmeistarar

Meistaramót Víkingaklúbbsins í skák og Víkingaskák, sem einnig var jólamót klúbbsins var haldið 30. desember í húsnæði Skáksambandi Íslands.  Mótin voru tvö, það er Meistaramótið í Víkingaskák og Meistaramót Víkingaklúbbsins í skák.

Meistaramótið í Víkingaskák.

1-2 Sveinn Ingi Sveinsson 4.5 af 5
1-2 Gunnar Fr. Rúnarsson 4.5
3. Halldór Ólafsson 3
4. Ólafur Guðmundsson 2
5. Stefán Þór Sigurjónsson 1
6. Víkingur Víkingsson (skotta) 0

Gunnar Fr. Rúnarsson og Sveinn Ingi skiptu á milli sín meistaratitlinum árið 2008.  Hvor keppandi hafði sjö mínútur á hverja skák.

Meistaramót Víkingaklúbbsins í skák

1.  Tómas Björnsson 8 vinn af 10
2. Gunnar Fr. Rúnarsson 7
3. Stefán Þór Sigurjónsson 6.5
4-5 Haraldur Baldursson 3
4-5 Sigurður Ingason 3
6. Sveinn Ingi Sveinsson 1.5

Tómas Björnsson sigraði eftir snarpa taflmennsku og er skákmeistari Víkingaklúbbsins árið 2008.  Gunnar Fr. Rúnarsson var hins vegar efstur í tvíkeppni klúbbsins, en þrír keppendur kepptu á báðum mótunum, þeir Gunnar Fr, Sveinn Ingi og Stefán Þór. Hvor keppandi hafði fimm mínútur á hverja skák.

Guðmundur tapaði í þriðju umferð

FIDE-meistarinn Guðmundur Kjartansson (2365) tapaði fyrir frönsku skákkonunni Christine Flear (2103) í þriðju umferð Hastings-mótsins, sem fram fór í dag.  Guðmundur hefur einn vinning.  Í fjórðu umferð, sem fram fer á morgun, teflir Guðmundur við Englendinginn Adri Pickersgill (2043).

Enski stórmeistarinn Gawain Jones (2543) er efstur með fullt hús en eins og öllum skákáhugamönnum er kunnugt um mátti hann þakka fyrir að ná jafntefli gegn Birni Þorfinnsson og Gunnari Björnssoni fyrr á árinu.

Rúmlega 100 skákmenn taka þátt í aðalmótinu og þar af 13 stórmeistarar.   Guðmundur er u.þ.b. nr. 60 í stigaröðinni.  

Heimasíða mótsins

Björn og Jón Viktor sigruðu í fjórðu umferð

Björn Þorfinnsson (2408) og Jón Viktor Gunnarsson (2463) sigruðu báðir í fjórðu umferð b-flokks Reggia Emilo-mótsins sem fram fór í dag. Björn er nú efstur með 3,5 vinning en Jón Viktor hefur 2 vinninga.    

Ungverski stórmeistarinn Zoltan Almasi (2663) er efstur í a-flokki með 4 vinninga og kínverski stórmeistarinn Ni Hua (2710) er annar með 3,5 vinning. Stórmeistararnir Alexei Dreev (2670), Rússlandi og Jan Gustafsson (2634), Þýskalandi, eru í 3.-4. sæti með 2,5 vinning. 

Í 5. umferð, sem fram fer á morgun, teflir Björn við, ungverska alþjóðlega meistarann Miklos Galyas (2454) og Jón Viktor við ítalska FIDE-meistarann Luca Barillo (2202).

B-flokkurinn er áfangamót þar sem Björn er að gera atlögu að lokaáfanganum að alþjóðlegum meistaratitli en til þess þarf 6 vininninga í 9 skákum.  Jón Viktor er hins einn þriggja alþjóðlegra meistara.  Skákirnar eru sýndar beint á netinu og skákir morgundagsins hefjast kl. 12:30.

• Heimasíða mótsins
• Skákirnar í beinni

Skákstyrktarsjóður stofnaður í Kópavogi

Gunnar I. Birgisson, bæjarstjóri í Kópavogi, og Ómar Stefánsson, formaður bæjarráðs, undirrituðu í morgun fyrir hönd Kópavogsbæjar stofnskjal Skákstyrktarsjóðs Kópavogs ásamt fulltrúum Taflfélags Kópavogs, þeim Hlíðari Þór Hreinssyni og Haraldi Baldurssyni.  

Tilgangur sjóðsins er að efla skákiðkun barna og unglinga í bænum og styrkja efnilega skákmenn 20 ára og yngri sem búsettir eru í Kópavogi.  

Stofnfélagar eru Kópavogsbær og Taflfélag Kópavogs. Sjóðsstjórn skipa einn fulltrúi frá Kópavogsbæ og tveir fulltrúar Taflfélagsins og skal annar þeirra vera formaður. Dagleg umsjón sjóðsins og fjárvarsla er í höndum BYR.  

Grunnstofnframlag sjóðsins er söluandvirði fasteignarinnar Hamraborg 5, 3. hæð, sem er eign Taflfélags Kópavogs og Kópavogsbæjar, að frádregnum kostnaði við söluna. Stofnfélögum og öðrum velunnurum er frjálst að styrkja sjóðinn með fjárframlögum. 

Allt að 20 verkefni geta hlotið styrk í hvert sinn og verða styrkupphæðir frá 10 þúsund að 500 þúsund krónum eftir eðli verkefna. Úthlutun fer fram tvisvar á ári, í mars og október, og verður skilafrestur umsókna til 1. febrúar og 1. september ár hvert. Fyrsta úthlutunin er ráðgerð í mars 2009.

Til úthlutunar á hverju ári koma 95% af tekjum sjóðsins árið á undan.

Lenka með fjöltefli við MH

Föstudaginn 19. desember sl. fór fram fjöltefli sex skákmanna við tékknesku skákdrottninguna Lenku Ptacnikova. Til leiks mættu sex skákmenn með styrkleika skákmanns á kennarstofu Menntaskólans við Hamrahlíð.

 

Grípum í frásögn Stefáns Eiríkssonar eins skákmannanna:

Eftir smásögu og inngang stjórnanda um ábyrgð og skákgetu gerðu menn sér ljóst að sex karlmenn voru mættir til leiks og spurði Lenka þá hvers vegna engin kona væri viðstödd. Þessi spurning kom stjórnanda í opna skjöldu og sagði hann að klúbbarnir, sem hann hefði haft samband hefðu ekki haft kvenmann í sínum röðum. Á kennarstofu MH er þó mjög frambærilegur skákmaður úr hópi kvenna.  Umræðan fór svolítið þá átt að ræða um það, hvers vegna kvenmenn tæku ekki þátt í hinu og þessu sem tengdist andlegum metnaði.

Stjórnandi hafði verið menntaskóla- og fjölbrautaskólakennari um tíma og vissi vel að hann hafði hitt fyrir kvenkyns nemendur sem hefðu auðveldlega getað orðið toppvísindamenn hefðu þær kosið að velja sér frama sem tengdist mikið andlegum metnaði.

Rebekka á kaffistofunni blandaði sér í umræðuna og minnti á að konur væru oft mikils megnugar. Hún sá um að kaffi og kökur fylgdu með fyrir þátttakendur.Skákirnar voru skemmtilegar og eftir u.þ.b. 90-100 mínútur höfðu fimm þátttakenda  tapað sinni skák gegn Lenku, en Jörundur Þórðarson náði jafntefli. Flestir gátu því farið ánægðir heim með þá tilfinningu, að þeir yrðu að gera betur í næsta skipti.

Skákir tapast sennilega oft vegna einbeitingarskorts, en baráttan í skákinni er yfirleitt um miðbik og miðborð og leikjaröð er því  kritísk.

Stjórnandi vill þakka Lenku fyrir að bregðast svo skjótt og jákvætt við beiðni hans um að halda fjöltefli og er þetta í þriðja sinn sem hann hefur sett fram þá beiðni.