Færsluflokkur: Skákþættir Morgunblaðsins

2.2.2014 | 20:00

Skákþáttur Morgunblaðsins: Jan Timman aftur til Wijk aan Zee

Jan Timman og Max Euwe eru þeir stórmeistarar Hollendinga sem lengst hafa náð. Euwe varð heimsmeistari árið 1935 og eftir því sem árin liðu dró hann úr þátttöku á skákmótum og varð að lokum forseti FIDE á miklu umbrotatímabili frá 1970-´78. Um svipað leyti tók Timman við kyndlinum sem fremsti skákmaður Hollendinga. Hann er nú 62 ára gamall og hin síðari ár hefur hann stundum skort úthald á sterkum mótum og hvergi hefur það komið betur fram en í hinni hörðu keppni A-flokks Wijk aan Zee-mótanna. Fyrir tveim árum var Timman ákaft fagnað í Wijk þegar hann tók sæti í B-stórmeistaraflokki og í ár lét hann sig hafa það að tefla þar aftur. Eftir þrjár umferðir var hann með einn vinning en þá var eins og birti til og hann vann hverja skákina á fætur annarri með stórskemmtilegri taflmennsku. Þegar þetta er ritað er hann í 3. sæti með 7 vinninga af 10 mögulegum, aðeins ½ vinningi á eftir efstu mönnum. Þetta þykja ekki minni tíðindi í Hollandi en úrslitin í A-flokki þar sem flest hefur farið eftir bókinni og Levon Aronjan er efstur. Reynslumiklir skákmenn hafa það oft fram yfir þá yngri að getið gripið til gamalla og „gleymdra" leikja eins og í eftirfarandi skák sem tefld var í 10. umferð:

Etienne Goudriann - Jan Timman

Nimzoindversk vörn

1. d4 Rf6 2. c4 e6 3. Rc3 Bb4 4. e3 O-O 5. Bd3 d5 6. Rf3 c5 7. O-O b6

Leikur sem sést sjaldan nú orðið en var í vopnabúri Keres, Spasskí og Friðriks Ólafssonar.

8. cxd5 exd5 9. Re5 He8

Góð er einnig sú leið sem Friðrik valdi að leika 9. ... Bxc3 10. bxc3 Ba6 sbr. skák hans við Matera á Reykjavíkurskákmótinu 1976.

10. Re2 c4 11. Bc2 Bd6 12. b3 Dc7 13. Bb2 b5 14. Hc1 Rbd7 15. f4 Rb6

Svartur leitar færa á drottningarvængnum. Það kemur aldrei til álita að taka á e5.

16. De1 a5 17. Dh4 Be7 18. f5 b4 19. Hf3 c3 20. Hg3 Re4!

20. .. cxb2 leiðir til jafnteflis eftir 21. hxg7+ Kxg7 22, Dg5+ Kf8 23. Dh6+ o.s.frv. Timman vill meira.

21. Dh5

Hótar máti í tveim leikjum, 22. Dxf7+ og 23. Dxg7. Svartur getur varið f7-peði með ýmsum hætti, 21. ... Bf6 lítur vel út en þá kemur 22. Bxe4 dxe4 23. Rg4! og hvítur vinnur. Annar möguleiki er 21. ... Rd6 22. Hxg7+! Kxg7 23. f6+! Bxf6 24. Dxh7+ Kf8 25. Rg6+! fxg6 26. Dxc7 með vinningsstöðu. Timman hittir á besta leikinn.

21. ... Bh4! 22. Bxe4 Bxg3 23. f6 h6! 24. Rxg3 Hxe5!

Aftur besti leikurinn en 24. ... dxe4 kom einnig til greina.

25. dxe5 dxe4 26. Hf1 cxb2 27. fxg7 Kxg7!

Hótunin var 28. Dxh6. Þetta er besti varnarleikurinn.

28. Dh4 Rd5 29. Rh5 Kf8 30. Rf6 Rxf6 31. exf6 Ha6 32. Dxe4

Lítt stoðar 32. Dxh6+ Ke8 og kóngurinn sleppur.

32. ...Be6 33. Hd1 Ke8 34. Db1 De5 35. Dh7 Hd6 36. Hxd6 Dxe3+ 37. Kf1 Df4+

- og hvítur gafst upp.

Jón Viktor og Einar Hjalti efstir á Skákþingi Reykjavíkur

Þegar þrjár umferðir eru eftir af Skákþingi Reykjavíkur eru sigurstranglegustu keppendurnir þeir Jón Viktor Gunnarsson og Einar Hjalti Jensson í efsta sæti með 5 ½ vinning af sex mögulegum. Allt getur gerst á lokasprettinum því þrír ungir skákmenn sækja hart að þeim. Dagur Ragnarsson, Örn Leó Jóhannsson og Þorvarður Ólafsson eru í 3. - 5. sæti með 5 vinninga. Í 6. - 8. sæti koma svo Davíð Kjartansson, Loftur Baldvinsson og Júlíus Friðjónsson með 4 ½ v.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 26. janúar 2014.

Skákþættir Morgunblaðsins

Skákþættir Morgunblaðsins | Breytt 27.1.2014 kl. 11:01 | Slóð | Facebook | Athugasemdir (0)

26.1.2014 | 20:00

Skákþáttur Morgunblaðsins: Teflt í námunda við Næturvörðinn

Tata Steel-mótið í Wijk aan Zee hófst um síðustu helgi. Litli strandbærinn í grennd við Amsterdam hefur haldið þessu móti úti í næstum 80 ár og hollenskir skákáhugamenn flykkjast þangað bæði til að tefla og fylgjast með. Á mótinu í ár sakna menn hins nýbakaða heimsmeistara, Magnúsar Carlsen, sem sigraði með glæsibrag í fyrra og jafnaði í vinningum talið gamalt staðarmet Kasparovs frá 1999. Í efsta flokknum sem í eru 12 keppendur fór fram fjórða umferðin á Rikjsmuseum í Amsterdam.

Fyrir umferðina stilltu keppendur sér upp til myndatöku við frægasta málverk safnsins, Næturvörðinn eftir Rembrandt. Undirrituðum fannst nú aðeins halla á skáklistina í samanburði við snilldarverk gömlu meistaranna, a.m.k. ef tekin er til meðferðar sigurskák Aronjans yfir Nakamura. Byrjunin tók þekkta stefnu og Aronjan hafði svo sem aldrei neitt nema örlítið betri stöðu þar sem riddarinn átti alls kostar við biskupinn. Samt gat Nakamura haldið jafntefli en hann kiknaði undan pressunni:

Levon Aronjan _ Hikaru Nakamura

Kóngsindversk vörn

1. d4 Rf6 2. Rf3 g6 3. c4 Bg7 4. Rc3 d6 5. e4 O-O 6. Be2 e5 7. Be3 Rg4 8. Bg5 f6 9. Bh4 g5 10. Bg3 Rh6 11. c5 g4 12. Rh4 Rc6 13. cxd6 cxd6 14. dxe5 dxe5 15. Bc4 Kh8 16. Dxd8+ Hxd8 17. O-O Rd4 18. Had1

Allt hefur þetta sést áður, 11. leikur hvíts er dálítið erfiður viðfangs og svartur situr uppi með lakara endatafl þar sem hann hefur enga vinningsmöguleika en jafnteflisfæri. Þannig gerast kaupin á eyrinni í dag; með góðri byrjunarþekkingu geta menn oft tryggt sér örlítið betri stöðu og teflt til sigurs án þess að taka áhættu.

18. ... Bxe6 Rxe6 20. f3 gxf3 21. gxf3 Hxd1 22. Hxd1 Hd8

Nakamura bauð jafntefli eftir þennan leik sem Aronjan hafnaði og taldi boðið klárt dæmi um vanmat á hættum stöðunnar. Það liggur í augum uppi að vinningsmöguleikar ef einhverjir eru liggja hjá Aronjan.

23. Hxd8 Rxd8 24. Bf2 a6 25. Kf1 Kg8 26. Ke2 Kf7 27. Be3 Ke6 28. Ra4 Bf8 29. Bxh6 Bxh6 30. Rc5+ Kf7 31. Kd3 Bf4 32. h3 Bg5 33. Rf5 Re6 34. Rxe6?

Enginn heimsmeistaraklassi yfir þessum leik, eftir 44. Rxb7! Rf4+ 45. Kc4 Rxh3 36. b4 Rf4 37. a4 h5 38. b5 axb5 39. axb5 á hvítur að vinna.

34. ... Kxe6 35. Kc4 b6 36. a4 Bd2 37. b3 h5 38. b4 a5 39. bxa5 bxa5 40. Kb5

Riddarinn stendur vel þar sem ekki verður sótt að honum. Nakamura var að ná tímamörkunum við 40. leik og stígur feilspor.

40. ... Kd7??

Eftir 40. ... Kf7 er erfitt að sýna fram á vinning, t.d. 41. Rd6+ Kg6 42. Rc4 Be1 43. Rxa5? Kg5! og hvítur getur hæglega tapað þessari stöðu!

41. Rg7! h4 42. Rf5 Be1 43. Re3 Ke6 44. Rc4

- og svartur gafst upp.

1. Aronjan 3 v. 2.-5. Harikrishna, Giri, Karjakin og So 2 ½ v. 6.-8. Dominguez, Caruana og Nakamura 2 v.

Þrír efstir á Skákþingi Reykjavíkur

Þrír skákmenn eru efstir að loknum fjórum umferðum á Skákþingi Reykjavíkur sem nú stendur yfir. Sá sigurstranglegasti meðal þeirra er tvímælalaust Jón Viktor Gunnarsson. Hann er með fullt hús ásamt Þorvarði Ólafssyni og Einari Hjalta Jenssyni. Davíð Kjartansson er enn í fjóra sæti eð 3 ½ vinning. Í fimmtu umferð sem fram fer í dag, 19. janúar, tefla saman Einar Hjalti og Jón Viktor, Davíð og Þorvarður. Tefldar verða níu umferðir og er teflt tvisvar í viku á sunnudögum og miðvikudögum.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 19. janúar 2014.

Skákþættir Morgunblaðsins

Skákþættir Morgunblaðsins | Breytt 20.1.2014 kl. 14:16 | Slóð | Facebook | Athugasemdir (0)

19.1.2014 | 20:00

Skákþáttur Morgunblaðsins: Metþátttaka á mótum í Reykjavík og Kópavogi

Skákárið 2014 byrjar vel hér á landi hvað þátttöku varðar. Á 83. Skákþingi Reykjavíkur sem Björn Jónsson, formaður Taflfélags Reykjavíkur, setti sl. sunnudag eru keppendur 75 talsins og er það mesta þátttaka í 15 ár. Tefldar verða níu umferðir og er teflt þrisvar í viku. Fyrstu umferðirnar hafa að mestu farið eftir bókinni en meðal þeirra sem hlotið hafa 2 vinninga eru Jón Viktor Gunnarsson, Sigurbjörn Björnsson, Einar Hjalti Jensson, Davíð Kjartansson, Lenka Ptacnikova og ungu ljónin Dagur Ragnarsson og Oliver Aron Jóhannesson.

Væntanlega fara línur að skýrast í næstu umferðum. Myndarlega er að málum staðið hvað varðar skrár tefldra skáka en þær hafa verið birtar degi eftir að umferð lýkur.

Teflt vikulega á Nóa Síríus-mótinu

Jón Þorvaldsson og félagar í GM Helli halda enn og aftur hið vinsæla vetrarmót sitt og er það að þessu sinni gert í samvinnu við Skákdeild Breiðabiks og aðalstyrktaraðilann, Nóa Síríus. Jón Þorvaldsson sem er aðalskipuleggjandi þessa móts komst að þeirri niðurstöðu að fjölmargir öflugir skákmenn geta hugsað sér að tefla eina kappskák á viku en eiga erfiðara með fleiri umferðir. Tefld verður ein umferð á viku og næstu sex fimmtudaga fer fram geysiöflugt mót í Stúkunni á Kópavogsvelli. Meðal tæplega 70 þátttakenda eru nokkrir sem einnig taka þátt í Skákþingi Reykjavíkur en stigahæstu keppendurnir eru Stefán Kristjánsson, Karl Þorsteins, Þröstur Þórhallsson, Bragi Þorfinnsson og Jón Viktor Gunnarsson. Þá eru þarna skákmenn sem lítið hafa teflt undanfarið og er þátttaka þeirra árangur af yfirlýstri stefnu GM Hellis að laða slíka skákmenn aftur til keppni. Kvennalandsliðið í skák er þarna líka og einnig margir af yngstu og efnilegustu skákmönnum þjóðarinnar. Full ástæða er til að óska þeim Birni Jónssyni, formanni TR, og Jóni Þorvaldssyni frá GM Helli til hamingju með þessi tvö glæsilegu skákmót.

Karpov ekki dauður úr öllum æðum

Þessa helgi hefst í Wijk aan Zee í Hollandi eitt vinsælasta og sterkasta mót ársins. Nýbakaður heimsmeistari Magnús Carlsen er ekki meðal þátttakenda og keppendur í A-flokknum verða 12 talsins. Annar bær í Hollandi, Groningen, getur líka státað af merkri skákhefð og um jólin var þar haldin mikil skákhátíð þar sem meðfram ýmsum öðrum viðburðum fór fram fjögurra skáka einvígi Anatolí Karpovs og Jan Timmans. Þessir tveir hafa auðvitað marga hildi háð á löngum tíma og eins og oftast áður hafði Karpov betur og vann 2 ½ : 1 ½ . Tilþrifin voru gamalkunn eins og lokaskák einvígisins ber með sér; Karpov eygði smá veikleika á c6-reitnum og eftir að hann var lentur þar þjarmaði hann að andstæðingi sínum eftir öllum kúnstarinnar reglum:

Anatolí Karpov - Jan Timman

Drottnigarindversk vörn

1. d4 Rf6 2. c4 e6 3. Rf3 b6 4. g3 Ba6 5. b3 b5 6. cxb5 Bxb5 7. Bg2 Bb4 8. Bd2 a5 9. a3 Bxd2 10. Dxd2 Bc6 11. O-O Dc8 12. Dc2 Db7 13. Rbd2 O-O 14. Hfc1 Ha7 15. Ha2 Bd5 16. Hb2 d6 17. Re1 Bxg2 18. Rxg2 Rbd7

19. Dc6 Hb8 20. Hbc2 h6 21. Dxc7 Da6 22. Dc4 Dxc4 23. Hxc4 Rb6 24. Hc6 Re8 25. e4 Kf8 26. Re3 Ke7 27. d5 Kd7 28. dxe6+ fxe6 29. e5 d5 30. H6c5 Kd8 31. f4 Rd7 32. Hc6 Rc7 33. a4 Hb6 34. Hxb6 Rxb6 35. Hc6 Rd7 36. Rf3 Rb8 37. Rd4 Kd7 38. Hb6 Rba6 39. f5 Rc5 40. fxe6+ R5xe6 41. Hd6+

- og svartur gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 12. janúar 2014.

Skákþættir Morgunblaðsins

Skákþættir Morgunblaðsins | Breytt 20.1.2014 kl. 09:58 | Slóð | Facebook | Athugasemdir (0)

12.1.2014 | 20:00

Skákþáttur Morgunblaðsins: 50 ár frá mögnuðu afreki

Fyrir sléttum 50 árum lauk á Henry Hudson-hótelinu í New York Skákþingi Bandaríkjanna, keppni sem hefur þá sérstöðu meðal átta sigra Bobby Fischers á bandaríska meistaramótinu 1957-´67 að hann hlaut 11 vinninga af 11 mögulegum - 100% vinningshlutfall. Gæði skáka Fischers, sem stóð á tvítugu, voru ótvíræð og mótherjarnir bestu skákmenn Bandaríkjanna, stórmeistarar á borð við Samuel Reshevsky, Pal Benkö, Robert Byrne og Larry Evans. Nokkrar skákir rötuðu í hina frægu bók „60 minnisverðar skákir" og við tökum tvö dæmi:

- Sjá stöðumynd 1 -

Fischer - Benkö

Benkö hafði vonast til að hrinda atlögu hvíts, hinum augljósa leik 19. e5 má nefnilega svara með 19. ...f5! en nú kom þrumuleikur:

19. Hf6!

Með hugmyndinni 19. ... Bxf6 20. e5 og mátar.

Kg8 20. e5 h6 21. Re2!

- svartur gafst upp.

- Sjá stöðumynd 2 -

Robert Byrne - Fischer

Fischer hafði fórnað manni fyrir það sem flestir áhorfendur töldu óljósar bætur. Sumir töldu jafnvel að svarta staðan væri töpuð. En Fischer hafði séð lengra:

19. ... d4! 20. Rxd4 Bb7+ 21. Kf1 Dd7!

- og öllum á óvart gafst Byrne upp. Hann sá meginafbrigði fléttunnar, 22. Df2 Dh3+ 23. Kg1 He1+!! 24. Hxe1 Bxd4 og vinnur.

Á þessu ári 1964 stóð Bobby Fischer á krossgötum á ferli sínum. Leiðirnar voru ekki allar greiðar. Hann hafði ekki tekið þátt í Piatigorski-mótinu í Santa Monica árinu áður, arfur deilna um einvígi sem hann háði við Reshevsky árið 1961 spratt þar upp, ekki heldur á millisvæðamótinu í Amsterdam þetta ár; áskorendamótið í Curacao ´62 hvíldi enn þungt á honum, fjöltefla-túr hans um gervöll Bandaríkin varð að fresta um nokkra mánuði vegna morðsins á Kennedy forseta og á 21 árs afmælinu sendi „Sámur frændi" honum herkvaðningu, en Fischer fór aldrei til Víetnam.

En sigurinn á meistaramótinu 1963-´64 hafði gríðarleg áhrif á stöðu Fischers í skákheiminum. Það er a.m.k. niðurstaða Kasparovs í bókaflokknum „Hinir miklu fyrirrennarar mínir". Gagnrýnendur áttu varla til orð. Þó skilaði Bent Larsen sératkvæði: „Fischer var að tefla við börn," sagði hann en sjö árum síðar tapaði hann 0:6 fyrir Fischer. Byrjanir Fischers á þessu fræga meistaramóti voru fjölbreyttari en áður, hann beitti meira að segja norska afbrigði spænska leiksins í eftirfarandi skák:

Bandaríska meistaramótið 1963-´64:

William Addison - Bobby Fischer

Spænskur leikur

1. e4 e5 2. Rf3 Rc6 3. Bb5 a6 4. Ba4 b5 5. Bb3 Ra5

Upphafsleikur norska afbrigðisins.

6. d4 exd4 7. Dxd4 Re7 8. c3 Rxb3 9. axb3 Bb7 10. Bf4 d5 11. e5 c5!

Snjall leikur sem leysir öll vandamál svarts, 12. Dxc5 er svarað með 12. ... Rf4 og drottningin á engan reit.

12. Dd3 Rg6 13. Bg3 Be7 14. Rbd2 Rf8 15. O-O Re6

Riddarinn er kjörinn til að skorða e5-peðið. Nimzowitsch hefði ekki gert þetta betur.

16. Had1 g5! 17. h3 h5 18. Hfe1 Db6 19. Rf1 d4 20. R3d2

Gefur fullmikið eftir en eftir 20. cxd4 g4 21. d4 kemur 21. ... Hd8 o.s.frv.

20. ... g4 21. h4 Dc6 22. De4 O-O-O

Uppskipti á eigin forsendum!

23. Dxc6 Bxc6 24. c4 Kd7 25. Ha1 Ha8 26. Re4 Bxe4 27. Hxe4 Rg7 28. Rd2 Rf5 29. Hf4 Ke6

Kóngurinn tekur sæti riddarans. Svarta staðan teflir sig sjálf.

30. Re4 bxc4 31. bxc4 Hhb8 32. Ha2 Hb4 33. Rd2 Rxh4 34. Bxh4 Bxh4 35. He4 Bg5 36. f4 gxf3 37. Rxf3 Be3 38. Kh2 Hxc4

- og Addison gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 5. janúar 2014.

Skákþættir Morgunblaðsins

Skákþættir Morgunblaðsins | Breytt 13.1.2014 kl. 13:38 | Slóð | Facebook | Athugasemdir (0)

5.1.2014 | 20:00

Skákþáttur Morgunblaðsins: Teflt á netinu

Mennirnir á bakvið velgegni einvígisins 72, Hilmar og Guðmundur G. ásamt Guðna

Talið er að nálega milljarður manns hafi fylgst með eða haft einhverja vitneskju um heimsmeistaraeinvígi Magnúsar Carlsens og Wisvanathans Anands í Indlandi á dögunum. Þetta er býsna stór hluti mannkyns en tölurnar eru m.a. fengnar með uppsöfnuðu áhorfi frá viðburðinum í Chennai. Norska þjóðin sat sem límd fyrir framan skjáinn og hafi einhverjir haft áhyggjur af hægu tempói skáklistarinnar er vert að minnast þess að þessi sama þjóð lét sér vel líka fremur tilbreytingasnauðar sjónvarpsútsendingar frá stafni skips sem sigldi á sex dögum um firði Noregs sumarið 2011. Ólíklegasta fólk fylgdist með útsendingum einvígisins sem voru matreiddar með snilldarlegum hætti þannig að allir gátu skilið hvar vinningsmöguleikar lágu, hversu öflugir leikirnir væru, hverjir væru helstu möguleikar o.s.frv.

Skákin hefur fyrir löngu markað sér ákveðna stöðu innan hugbúnaðargeirans og hefur þá sérstöðu fram yfir langflestar keppnisgreinar að hægt er að stunda hana á netinu. Í dag, sunnudaginn 29. desember, fer fram á ICC Íslandsmótið í netskák en þar hefur hinn nýráðni hótelstjóri á Nesjavöllum, Davíð Kjartansson, titil að verja. Mótið var haldið fyrst árið 1996. Tímamörk verða 4-2.

Skákklúbbarnir á netinu eru býsna margir en ég hygg að ICC, sem stendur fyrir Internet chess club, hljóti að teljast vinsælasta vefsvæðið. Þangað hafa annað veifið vanið komur sínar allir sterkustu skákmenn heims. Vinsælustu tímamörkin eru sennilega 3-0 og „bullet" sem er 1-0 sem þýðir ein mínúta og enginn aukatími. Það skemmtilega við taflmennsku á netinu er að heimskunnir stórmeistarar og afar öflugir skákmenn gefa oft kost á því að taka eina „bröndótta" við ýmsa aðra spámenn. Nýlega barst mér skák þar sem „skákmeistari Rússlands 2012", landsliðsmaður sem háði úrslitaeinvígið við Vladimir Kramnik í heimsbikarkeppni FIDE sl. sumar, tefldi við Hilmar Viggósson, kunnan skákmeistara sem átti fast sæti í sigursælli sveit Landsbanka Íslands þegar vinsældir Skákkeppni stofnana risu sem hæst.

ICC 2009:

Hilmar Viggósson - Dmitry Andreikin

Nimzo-indversk vörn

1. d4 Rf6 2. c4 e6 3. Rf3 b6 4. Rc3 Bb7 5. g3 Bb4 6. Bg2 Bxc3+ 7. bxc3 d6 8. 0-0 h6 9. d5 exd5 10. Rd4 c5 11. Rf5 Dd7 12. g4!

Vinnur h5-reitinn fyrir riddarann.

12.... Rxg4?!

Hæpið. Betra er 12.... O-O 13. cxd5 og ef 13.... Rxg4 þá kemur 14. e4 Rf6 15. Bf4 með góðum færum fyrir peðið.

13. Rxg7+ Kf8 14. Rh5 Hg8 15. Kh1 dxc4 16. e4 Rc6 17. h3 Rge5 18. Rf6 De6. 19. Rxg8 Kxg8 20. Hg1 Kh7 21. f4 Rd3 22. Be3 Hg8 23. Dh5 Re7 24. f5 Df6 25. Haf1 Hxg2?

Lítur ágætlega út en ýmsir rólegir leikir voru betri þar sem svarta staðan er býsna traust.

26. Kxg2 Bxe4+ 27. Kh2 Rxf5

- Stöðumynd -

Svartur hefur fjögur peð fyrir annan liðsmun. Kóngsstaðan er viðsjárverð og riddarar svarts eru hættulegir. Nú eru góð ráð dýr.

28. Bxh6!

Ekki eins dýr og þér haldið! Þessi biskupfórn splundrar kóngsstöðu svarts. En Hilmar varð að hafa séð fyrir 30. leikinn.

28.... Dxh6 29. Dxf7+ Rg7 30. Hxg7+! Dxg7 31. Dh5+ Dh6 32. Hf7+ Kg8 33. Dxh6 Kxf7 34. Dxd6 b5 35. Dd7+ Kf6 36. Dd8+ Ke5 37. Kg3 b4 38. Dh8+

- og svartur gafst upp. Eftir 38.... Kd5 kemur 39. Dg8+ og 40. Dxc4. Skemmtilega skák en tímamörk voru 3-0.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 29. desember 2013

Skákþættir Morgunblaðsins

Skákþættir Morgunblaðsins | Breytt 6.1.2014 kl. 11:09 | Slóð | Facebook | Athugasemdir (0)

29.12.2013 | 20:00

Skákþáttur Morgunblaðsins: Hannes Hlífar nýtti sér "leikbragð Kasparovs"

Eftir Evrópumót landsliða í Varsjá á dögunum héldu tveir liðsmenn Íslands, þeir Guðmundur Kjartansson og Hannes Hlífar Stefánsson, rakleiðis til Kosta Ríka með stuttri viðkomu í New York. Sá fyrrnefndi hefur tekið miklu ástfóstri við hinn latneska heim Suður-Ameríku og varla nema ár síðan hann sneri þaðan eftir góða frammistöðu á fjölmörgum opnum mótum. Þeir félagar hófu ferðalagið með því að taka sæti í sitt hvoru liðinu í úrvalsdeild Kosta Ríka og þar hlaut Hannes 8½ vinning úr 9 skákum á 2. borði fyrir klúbb sem ber nafnið Mega Super en Guðmundur tefldi fyrir Pashion Ajedrez og hlaut 5½ vinning af 9 mögulegum á 1. borði.

Strax á eftir tóku þeir svo þátt í opnu móti í Kosta Ríka með 62 þátttakendum. Hannes, sem var eini keppandinn yfir 2.500 elo-stigum, sigraði hlaut 7½ vinning af átta mögulegum. Hann náði að vinna helstu keppinauta sína og þá sem næstir komu að vinningum þ.e.a.s. Guðmund og Danann Allan Rasmussen sem urðu í 2.-3. sæti með 6½ vinning hvor. Þátttöku Hannesar og Guðmundar á skákmótum í þessum heimshluta er hvergi nærri lokið, Guðmundur hyggur á þátttöku á móti i Kólumbíu sem hefst fljótlega og Hannes mun væntanlega vera með á móti í Nikaragúa sem hefst hinn 26. desember nk.

Í eftirfarandi sigurskák Hannesar yfir danska stórmeistaranum Rasmussen frá opna mótinu kemur fyrir þema sem stundum sást í skákum Kasparovs; peði er skyndilega og óvænt leikið beint ofan í þrælvaldaðan reit. Þegar Kasparov skýrði vinningsskák sína við Jan Timman á heimsbikarmótinu í Borgarleikhúsinu haustið 1988 minntist hann á og nýtti sér þetta leikbragð:

Hannes Hlífar Stefánsson - Allan Rasmussen

Móttekið drottningarbragð

1. d4 d5 2. c4 dxc4 3. e4

Skarpasta leið hvíts til að mæta mótteknu drottningarbragði.

3.... Rf6 4. e5 Rd5 5. Bxc4 Rb6 6. Bd3 Rc6 7. Re2 Bg4 8. f3

Be6 9. Rbc3 Dd7 10. Re4 Bd5 11. Rc5 Dc8

Þekkt leikaðferð runnin undan rifjum Tigran Petrosjan. Hér er oftast leikið 12. a3 en Hannes velur annan leik.

12. Be3 e6 13. Dc1 Rb4 14. Bb1 Bc6 15. 0-0 R4d5 16. Bf2 Be7 17. He1 Rd7 18. Re4 0-0 19. Rg5 g6 20. Re4 Kg7 21. a3 a5 22. h4 h5 23. Rg5 Bb5 24. Rc3 Rxc3 25. bxc3 Rb6?

Hyggst skorða peðin en betri leið til þess var 26.... Bc4! sem opnar fyrir framrás c7-peðsins.

26. d5!

„Leikbragð Kasparovs" sem kemur af stað ákveðinni keðjuverkun, peðinu er leikið beint í dauðann og ekki má taka það með riddara vegna 27. c4 sem vinnur mann.

26.... Bxg5

26.... exd5 má svara með 27. e6! o.s.frv.

27. hxg5 exd5 28. e6! fxe6 29. Bd4+ Kh7 30. De3!

Ekki er minnsti vafi á því að Hannes sá fórnina 30. Bxg6+!? Kxg6 31. Db1+ t.d.. 31.... Kxg5 32. Dh7! o.s.frv. eða 31.... Hf5 32. g4 og vinnur. Hann hefur sennilega metið möguleika sína þannig að 30. De3 væri öruggari leikur og skjátlast varla í þeim efnum.

30.... De8 31. g4!

Peð eru líka sóknarmenn! Ekki má svara þessu með 31.... hxg4 vegna 32. fxg4 og síðan - Dh3.

31.... Rc4 32. Dxe6 Rd2 33. De7+ Hf7

34. Bxg6+! Kg8

34.... Kxg6 leiðir til máts eftir 35. He6+ Kh7 36. Hh6+ og 37. Hh8 mát.

35. Bxf7+ Dxf7 36. Dxf7+ Kxf7 37. g6+! Kxg6 38. He6+ Kh7 39. He7+ Kg8 40. Kf2

- og eftir þennan hógværa leik gafst Rasmussen upp. Snarplega teflt hjá Hannesi.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 22. desember 2013

Skákþættir Morgunblaðsins

Skákþættir Morgunblaðsins | Breytt 22.12.2013 kl. 13:48 | Slóð | Facebook | Athugasemdir (0)

22.12.2013 | 20:00

Skákþáttur Morgunblaðsins: Sextugur Áskell Örn og enn í framför

Ég hef tekið þetta dæmi áður: ímyndum okkar að Ingvar Ásmundsson hefði verið með á þriðja Reykjavíkurskákmótinu, hinu svonefnda á Fiske-móti vorið 1968. Ég er ansi hræddur um að hann hefði farið illa út úr samanburði við stjörnur þess móts, Mark Taimanov, Sovétmeistara 1956, Wolfgang Uhlmann eða Evgení Vasjúkov. En nokkrum áratugum síðar var Ingvar hinsvegar að keppa við þessa þekktu stórmeistara á heimsmeistaramóti öldunga og hafði í fullu tré við þá og hafði stundum betur. Sannar það sem Jón Þorvaldsson er alltaf að segja, að mönnum getur fleygt fram á öllum sviðum langt fram eftir aldri. Áskell Örn Kárason, sem varð sextugur fyrr á þessu ári, er manna líklegastur til að halda uppi merki Ingvars. Í gegnum tíðina hefur Áskell meðfram taflmennsku unnið ötullega að félagsmálum skákhreyfingarinnar bæði syðra og nyrðra og var forseti Skáksambands Íslands um nokkurra ára skeið. Áskell varð jafn Friðriki Ólafssyni í 2. sæti á Norðurlandamóti öldunga í Borgundarhólmi í september sl. Annað sætið gaf þátttökurétt á HM öldunga og Friðrik bauð sessunaut sínum að tefla fyrir Íslands hönd í Króatíu.

Aldursviðmið á heimsmeistaramótinu sem fram fór við góðar aðstæður dagana 11.-24. nóvember í Rijeka í Króatíu var 60 ár og þar yfir. Hafði Áskell orð á því hversu gott hefði verið að geta einbeitt sér að taflmennskunni og engu öðru. Hann hlaut 7 vinninga af 11 mögulegum og hafnaði í 18. sæti af 200. Árangur hans reiknast upp á 2388 stig, hann rétt missti af áfanga að alþjóðlegum meistaratitli en hækkaði um tæplega 40 stig fyrir frammistöðuna. Gunnar Finnlaugsson tefldi einnig í Rijeka og stóð sig vel, hlaut 5 ½ vinning og varð í 108. sæti. Lítum á bestu skák Áskels sem kom í 9. umferð:

Vladimir Karasev (Rússland) - Áskell Örn Kárason

Sikileyjarvörn

1. c4 c5 2. Rf3 g6 3. d4 cxd4 4. Rxd4 Bg7 5. e4 Rc6 6. Be3 Rf6 7. Rc3 O-O 8. Be2 d6 9. O-O Bd7 10. Dd2 Rxd4 11. Bxd4 Bc6 12. f3 a5 13. Kh1 Rd7 14. Bxg7 Kxg7 15. f4 a4

Margeir Pétursson lék 15. ... Rc5 gegn Chandler í Chicago 1983. Báðir leikirnir eru góðir.

16. Bg4 Rf6 17. Bf3 Da5 18. Dd4 Had8 19. Rd5 Dc5!

Besti leikurinn og hér hefði hvítur átt að víkja og leika 20. Dd3. Drottningauppskiptin styrkja stöðu svarts.

20. Dxc5 dxc5 21. Had1 e6 22. Rc3 e5 23. Hxd8 Hxd8 24. fxe5 Rd7 25. e6 fxe6 26. Hd1 Hf8 27. e5?

Mislukkuð atlaga. Sjálfsagt var 27. Kg1 Re5 28. Be2 þó svarta staðan sé örlítið betri.

27. ... Hxf3!

Þetta sást Karasev yfir. Endataflið sem nú kemur upp er talsvert betra á svart og Áskell leysir tæknilega þáttinn afar vel.

28. Hxd7 Bxd7 29. gxf3 Bc6 30. Kg2 g5 31. Kg3 Kg6 32. f4 Kf5 33. fxg5 Kxg5 34. Kf2 Kf4 35. Ke2 Kxe5 36. Ke3 Kf5 37. Re2 e5 38. Rc1 b6 39. a3 h5 40. Re2 h4! 41. Rc3

Þó að hvítur geti lokað fyrir innkomuleiðir kóngsins með 41. Rg1 lendir hann leikþröng fyrr eða síðar.

41. ... Kg4 42. Kf2 Kf4 43. Ke2 e4 44. Rd1 Bd7 45. Rc3 Bg4 46. Ke1 Kf3 47. Rxa4 Kg2 48. Rxb6 Kxh2 49. Kf2 e3+ 50. Kxe3 Kg3 51. Ra4 h3 52. Rxc5 Bf5!

Valdar „hálfhring" riddarans. Alls ekki 52. ... h2 vegna 53. Re4+ og 54. Rf2.

53. Rb3 h2 54. Rd4 Bg4

Aftur sama þema og síðast.

55. b4 h1=D 56. c5 Dc1 57. Ke4 Dxa3

- og Karasev gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 15. desember 2013

Skákþættir Morgunblaðsins

Skákþættir Morgunblaðsins | Breytt 17.12.2013 kl. 10:01 | Slóð | Facebook | Athugasemdir (1)

15.12.2013 | 20:00

Skákþáttur Morgunblaðsins: Tinna Kristín og Lenka stóðu sig best í Varsjá

Judit Polgar var eina konan sem tefldi í Opnum flokki Evrópumóts landsliða í Varsjá á dögunum en 25 ár eru síðan hún tefldi með ungversku kvennasveitinni á Ólympíumótinu í Saloniki í Grikklandi og hreppti gullverðlaun. Síðan hefur hún ekki tekið þátt í „kvennamótum". Þær konur sem tóku sæti í bestu liðum kvennaflokksins í Varsjá á dögunum standa Judit ekki langt að baki. En Judit hefur samt algjöra sérstöðu meðal kvenna og er réttnefnd skákdrottning heimsins. Af henni má margt læra og það vita stúlkurnar í íslensku sveitinni sem voru þær sömu og tefldu á OL í Istanbul í fyrra. Lenka Ptacnikova, Hallgerður Helga Þorsteinsdóttir, Jóhanna Björg Jóhannsdóttir, Tinna Kristín Finnbogadóttir og Elsa María Kristínardóttir hafa ekki áður fengist við jafnerfitt verkefni og taka áreiðanlega ýmislegt með sér frá mótinu. Sveitin hafnaði í 31.

sæti af 32 þátttökuþjóðum en ekki var langt á milli sveitanna sem lentu í neðri helmingi mótsins. Þó liggur fyrir að einungis Lenka Ptacnikova sem hlaut 4½ vinning úr 9 skákum og Tinna Kristín Finnbogadóttir, með 4 vinninga af 7 mögulegum geta verið sáttar með frammistöðu sína. Þannig náði Tinna Kristín árangri upp á 2151 elo stig og hækkaði um 35 elo-stig. Skákir hennar taka oft óvænta stefnu og hún á það til að láta liðsafla af hendi fyrir óljósar bætur. Fleyg orð Jóhanns Þóris um þankagang sinn þegar hann tefldi við Norðmanninn Leif Ögaard á Norðurlandamótinu sumarið 1973: „Grugga, grugga", eiga vel við sumar ákvarðanir hennar við skákborðið. Í Póllandi var þó meira öryggi yfir stílnum sem kom vel fram í bestu skák hennar sem tefld var í 1. umferð:

EM 2013, Varsjá 2013:

Tinna Kristín Finnbogadóttir - Giedre Vanagaite (Litháen)

Sikileyjarvörn

1. e4 c5 2. Rc3 Rc6 3. g3 g6 4. d3 Bg7 5. Be3 d6 6. Bg2

Lokaða-afbrigði sikileyjarvarnarinnar stendur býsna traustum fótum. Tinna velur hér leið sem kom býsna oft upp skákum Nigel Short í byrjun aldarinnar.

6. ... Hb8 7. Dd2 b5 8. Rge2 Rd4 9. O-O Rxe2 10. Dxe2 b4 11. Rd1 Rf6 12. e5!?

Óvæntur leikur og ekki slæmur. Gott var einnig 12. a3 eða 12. f4.

12. ... Rg4 13. exd6 Dxd6 14. Bf4 e5 15. h3 O-O 16. Bc1 Rh6 17. Re3 Rf5 18. Rc4 Dc7 19. Hb1

Full hægfara. betra er 19. c3 má hvítur vel við sína stöðu una.

19. ...Rd4 20. Dd1 Bb7 21. Be3 Re6 22. Bxb7 Hxb7 23. Dd2 Hd8 24. f3 f5 25. Hbe1 f4 26. gxf4 exf4 27. Bf2 Rg5 28. Kg2 Dd7 29. Hh1 Dd5 30. De2 Bf6 31. h4

Það veitist létt verk að bægja atlögum svarts frá. Brátt nær hvítur yfirráðum eftir e-línunni.

31. ... He7 32. Dd1 Re6 33. He4 Df5 34. De2 Hdd7 35. Re5 Hc7 36. Rg4 Bg7 37. He1 Kf7

Litháíska stúlkan sem var í miklu tímahraki hefur stillt upp í vörn í kringum riddarann á e6.

- Sjá stöðumynd -

38. He5!

Óvæntur hnykkur. Er 38. ... Bxe5 þá 39. Rh6+ og drottningin fellur.

38. ... Rd4 39. Hxf5+

Einfaldara var 39. Hxe7+. Tinna var fegin a losna við svörtu drottninguna og valdi því þennan leik sem dugar auðveldlega til sigurs.

39. ... gxf5 40. Dd2 fxg4 41. Dxf4+ Kg8 42. fxg4 Hb7 43. Dd6 Hxe1 44. Bxe1 Rxc2 45. Dd8 Bf8 46. Bf2 Rd4 47. Bxd4 cxd4 48. Dxd4 h6 49. g5 Hg7 50. Dd5 Kh8 51. Df5 Be7 52. g6 Bxh4 53. Df8+

- og svartur gafst upp, 53. ... Hg8 er svarað með 54. Dxh6 mát.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 8. desember 2013

Skákþættir Morgunblaðsins

Skákþættir Morgunblaðsins | Breytt 8.12.2013 kl. 18:21 | Slóð | Facebook | Athugasemdir (0)

8.12.2013 | 20:00

Skákþáttur Morgunblaðsins: Alltaf gaman að leggja Dani að velli

Íslendingar sendu lið í opinn flokk og kvennaflokk á Evrópumót landsliða í Varsjá í Póllandi í byrjun mánaðarins. Þetta mót féll í skuggann af heimsmeistaraeinvíginu í Indlandi en var geysilega sterkt þar sem flestir bestu skákmenn Evrópu voru saman komnir. Tekin hefur verið upp stigakeppni í þessu móti og á Ólympíuskákmótum en deildar meiningar eru um það hvort þetta fyrirkomulag hafi bætt þessar keppnir.

Íslenska liðið í opna flokknum í borðaröð var skipað Héðni Steingrímssyni sem hlaut 3½ vinning af átta mögulegum, Hannesi Hlífari Stefánssyni sem hlaut 5 vinninga af níu, Hjörvari Steini Grétarssyni sem hlaut 3 vinninga af sjö, Henrik Danielsen sem hlaut 3½ vinning af sjö og Guðmundi Kjartansson sem hlaut 2½ vinning af fimm. Sveitin hafnaði í 29. sæti af 38 þátttökuþjóðum með 7 stig og 17½ vinning.

Aserbadsjan sigraði, hlaut 14 stig og 21 vinning, síðan komu Frakkar með 13 stig og Rússar þriðju, einnig með 13 stig. Konurnar urðu í 31. sæti af 32 þátttökuþjóðum en gerð verður betur grein fyrir frammistöðu sveitarinnar í næsta pistli.

Þótt fátt félli með með íslensku sveitinni í opna flokknum - pörun í síðustu umferð bauð t.d. uppá öfluga sveit Spánverja - stendur upp úr sigur yfir Dönum í 6. umferð. Þar kom í ljós hve miklu máli skiptir að vera vel undirbúinn. Héðinn Steingrímsson hafði verið seinn í gang og ófarsæll í viðureignum sínum við Tékka og Pólverja en í einu skák þessarar viðureignar sem ekki lauk með jafntefli hafði hann lært sína lexíu og skaut út fyrstu leikjunum með ógnarhraða og náði miklu tímaforskoti. Úrvinnsla hans í betra endatafli var góð:

Héðinn Steingrímsson - Sune Berg Hansen

Slavnesk vörn

1. d4 d5 2. c4 c6 3. Rc3 Rf6 4. e3 e6 5. Rf3 Rbd7 6. Dc2 b6 7. cxd5 exd5 8. Bd3 Bb7 9. O-O Be7 10. e4 dxe4 11. Rxe4 O-O 12. Re5 c5 13. Rg5 g6 14. Bc4 Rd5 15. Rgxf7!?

Að því er virðist fífldjarfur leikur en allt saman undirbúið fyrir skákina. Sune Berg var ekki eins vel að sér í þessum fræðum og notaði mikinn tíma.

15. ... Hxf7 16. Rxf7 Kxf7 17. Hd1 Dc7?

Slakur leikur, 17. ... cxd4, 17. ... Kg7 eða 17. ... R7f6 eru allt leikir sem halda jafnvægi í stöðunni.

18. dxc5 R7f6 19. cxb6 axb6 20. Bxd5 Rxd5 21. Dxc7 Rxc7 22. Hd7 Hd8 23. Hxe7+ Kxe7 24. Bg5 Kd7 25. Hd1+ Rd5 26. Bxd8 Kxd8 27. f3

Eftir meira og minna þvingaða atburðarás er komin upp staða þar sem hvítur hefur hrók og tvö peð fyrir tvo létta. Þekkt er að slíkar stöður er erfitt að verja og Héðinn vinnur vel úr yfirburðum sínum.

27. ... Ke7 28. Kf2 Bc6 29. Hd4 Kf6 30. a4 Ke5 31. He4 Kd6 32. Hh4 h5 33. Hc4 Bd7 34. Kg3 Bf5 35. b4 b5 36. axb5 Bd7 37. f4 Bxb5 38. Hd4 Kc6?

Betri möguleiki til að halda velli fólst í að leika 38. ... Bd7. Þarna er kóngurinn of langt frá peðum sínum.

39. Kh4 Rc7 40. f5!

Ryður kóngnum braut. Gott var einnig 40. Hd2.

40. ... gxf5 41. Kxh5 Bf1 42. Hd2 Re6 43. Kh6 Kb5 44. Hb2 Bd3 45. h4 f4 46. h5 Bf5 47. He2 Kxb4 48. He5 Bg4 49. Kg6 Rd4 50. Kg5 f3

Reynir að fórna manni fyrir h-peðið og skipta upp á f- og -peði. En hvítur á einfalt svar.

51. He4! Bxh5 52. Hxd4+ Kc3 53. Kxh5

- og svartur gafst upp. Hvítur nær andspæninu: 53. ... Kxd4 54. gxf3 Ke5 55. Kg5! Ke6 56. f4 Kf7 57. Kf5! o.s.frv.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 1. desember 2013

Skákþættir Morgunblaðsins

Skákþættir Morgunblaðsins | Breytt 2.12.2013 kl. 15:42 | Slóð | Facebook | Athugasemdir (0)

1.12.2013 | 20:00

Skákþáttur Morgunblaðsins: Magnus Carlsen er nýr heimsmeistari

Þá hefur það gerst. Norðmaður er orðinn heimsmeistari í skák! Við hljótum að óska frændum okkar til hamingju með Magnus og heimsmeistaratitilinn. Lokatölur í einvíginu, 6 ½ : 3 ½, eru mælikvarði á þá yfirburði sem Magnus Carlsen hafði yfir hinn geðþekka indverska heimsmeistara, Viswanathan Anand. Íslenskir skákunnendur hafa fylgst náið með frammistöðu norska undrabarnsins allt frá því að hann tefldi fyrst hér á landi 13 ára gamall í mars árið 2004 og vann Anatolí Karpov í hraðskákhluta Reykjavik rapid á NASA við Austurvöll og gerði síðan jafntefli við Garrí Kasparov í atskák-hluta mótsins. Þessar skákir vöktu á Magnusi gríðarlega athygli heima fyrir og nú tæplega 10 árum síðar berast þær fréttir að skákæði hafi gripið um sig með norsku þjóðinni. Minna fór fyrir Magnusi þegar hann tefldi á Reykjavíkurskákmótinu 2006; hann var þá orðinn magnaður baráttumaður sem var á fleygiferð upp styrkleikalistann.

Áhugi á þessu einvígi út um allan heim náði nýjum hæðum og tengdist einkum persónu Magnusar Carlsen sem verður 23 ára gamall eftir viku og er næstyngsti heimsmeistari skáksögunnar.

Hinn nýi heimsmeistari er góð fyrirmynd, kurteis, snyrtilega klæddur og á sér svipuð áhugamál og aðrir ungir menn, ágætur á skíðum, grimmur í fótbolta, „tístir" og bloggar. Hann hefur efnast vel á verðlaunafé og auglýsingasamningum, t.d. fyrir tískuvörur G-Star Raw. Er enn ólofaður og býr í foreldrahúsum í Bærum í grennd við Ósló. Lítill vafi leikur á því að góður stuðningur foreldra og systra hefur skipt miklu máli fyrir Magnus en þau ferðast með honum út um allar þorpagrundir. Við skákborðið er hann allajafna pollrólegur og virkar stundum dálítið syfjulegur. Hann virðist hafa hæfileika til þess að vinna úr gríðarlega magni upplýsinga - og kann einnig að forðast upplýsingar! Og þegar horft er yfir þessar tíu skákir einvígisins er vart hægt að benda á slakan leik hjá Magnusi. Anand náði sér aldrei á strik en í 9. skákinni vissi hann að einungis sigur kom til greina, hann lagði allt undir:

9. einvígisskák:

Viswanathan Anand - Magnus Carlsen

Nimzoindversk vörn

1. d4 Rf6 2. c4 e6 3. Rc3 Bb4 4. f3 d5 5. a3 Bxc3+ 6. bxc3 c5 7. cxd5 exd5

Algengara er 7. ... Rxd5 en að venju sniðgengur Magnus þekktustu leiðir.

8. e3 c4 9. Re2 Rc6 10. g4 O-O 11. Bg2 Ra5 12. O-O Rb3 13. Ha2 b5 14. Rg3 a5 15. g5 Re8 16. e4 Rxc1 17. Dxc1 Ha6 18. e5 Rc7 19. f4 b4 20. axb4 axb4 21. Hxa6 Rxa6 22. f5 b3

Spurningin var auðvitað sú hvort peðastormur hvíts á kóngsvæng væri meira en ógnandi en þetta frípeð. „Houdini" metur stöðuna aðeins betri á svart.

23. Df4 Rc7 24. f6 g6 25. Dh4 Re8 26. Dh6 b2

- Sjá stöðumynd -

27. Hf4!

Fífldjarfur leikur, að því er virðist ekki lakari en 27. Re2 sem einnig kemur til greina. Hótunin er 28. Hh4 og mátar.

27. ... b1(D)+ 28. Rf1??

Óskiljanleg mistök. Eftir 28. Bf1 verður svartur að gefa nýju drottninguna til baka og framhaldið gæti orðið: 28. ... Dd1 29. Hh4 Dh5 30. Rxh5 gxh5 31. Hxh5 Bf5 32. g6! Bxg6 33. Hg5 Da5 34. Hg3. Menn svarts er bundnir í báða skó og ýmsir möguleikar leynast í stöðunni. Þarna fór lokatækifæri Anands í einvíginu.

28. ... De1!

Með hugmyndinni 29. Hh4 Dxh4 30. Dxh4 Da5 og vinnur. Anand gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 24. nóvember 2013

Skákþættir Morgunblaðsins

Skákþættir Morgunblaðsins | Breytt s.d. kl. 20:45 | Slóð | Facebook | Athugasemdir (0)

Færsluflokkur: Skákþættir Morgunblaðsins

Jón Viktor og Einar Hjalti efstir á Skákþingi Reykjavíkur

Þrír efstir á Skákþingi Reykjavíkur

Teflt vikulega á Nóa Síríus-mótinu

Karpov ekki dauður úr öllum æðum

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: