Færsluflokkur: Skákþættir Morgunblaðsins

20.4.2014 | 20:00

Skákþáttur Morgunblaðsins: Skrítin mynstur "Houdini"

Dagur Ragnarsson - Guðmundur Kjartansson

Svartur leikur og vinnur.

Þessi staða kom upp í 2. umferð „Wow air-mótsins" sem Taflfélag Reykjavíkur stendur fyrir. Greinarhöfundur fór yfir skákina með Degi sem vann eftir mistök Guðmundar í tímahraki. Eins og stundum þegar kappskák lýkur eiga forrit á borð við „Houdini" síðasta orðið um ýmsar erfiðar ákvarðanir sem skákmenn hafa tekið. Hið kalda mat forritanna er nákvæmt. Á svipstundu dæmdi „Houdini" þessa stöðu unna á svart og vinningsleiðin er einhvern veginn svo „ómannleg" að við skelltum upp úr:

Eftir 35. ... Hf2! vinnur svartur í öllum afbrigðum og það flóknasta lítur svona út: 36. hxg6 f5! 37. exf5 De3! 38. Hg2 Hf1+ 39. Hg1 Hf4 40. Dg3 De4+ 41. Hg2 Hh4+ 42. Kg1 Db1+ 43. Kf2 Dxf5+ 44. Kg1 Db1+ 45. Kf2 Dc2+ 46. Kf1 Dc1+ 47. Kf2 Hf4+

Og ef nú 48. Ke2 tilkynnir „Houdini" mát í 7 leikjum! Þekkt mynstur geta ekki hjálpað manni til að finna þessa vinningsleið og rökfræði á borð við þá sem Capablanca notaðist stundum við; að telja mennina sem voru í sókninni gegn þeim sem voru að verjast - að kónginum meðtöldum, gagnast lítið í þessari stöðu.

Dagur Ragnarsson er með sigrinum kominn með 2 vinninga á „Wow air-mótinu" og er í efsta sæti ásamt Hjörvari Steini Grétarssyni. Friðrik Ólafsson tók sér frí í tveimur fyrstu umferðunum en á að tefla við Sigurð Pál Steindórsson í 3. umferð.

Undirritaður spurði Daða Örn Jónsson tölvufræðing, okkar mesta sérfræðing í hugbúnaðarmálum skákarinnar, um framþróun forrita og hann tók dæmið um „Dimmblá" sem lagði Kasparov að velli vorið 1997. Þó að ofurtölva IBM, sem var með sérhannaðan vélbúnað, hafi getað reiknað 200 milljón stöður á sekúndu er hún, að mati Daða, lakari „skákvél" en „Houdini" og „Stockfish" sem reikna 10 sinnum færri leiki á sekúndu en vinsa strax úr vitlausu leikina og einbeita sér að þeim betri.

Gömul saga úr aðdraganda heimsmeistaraeinvígisins 1972 rifjaðist upp. Bobby Fischer kom hingað til lands í vetrarbyrjun það ár til að kanna aðstæður og mætti á 1. umferð Reykjavíkurmótsins í febrúar 1972. Þar sem hann hallaði sér upp við súlu í kjallara Glæsibæjar hékk þessi staða uppi:

Keene - Stein

„Stein er með koltapað tafl," sagði Bobby við Guðmund G. Þórarinsson, forseta SÍ, sem stóð við hlið hans. Ungur piltur sem annaðist sýningarborðið setti borða á sýningartaflið þar sem á stóð: jafntefli.

„Gaf Stein?" spurði Bobby Fischer en þegar Guðmundur kvað nei við gekk meistarinn úr salnum. Keene virtist líta á sovéska stórmeistara sem einhverskonar hálfguði og tók jafnteflistilboði Stein. Eftir stóð samt spurningin: Hvað sá Bobby Fischer? Fyrir 15 árum eða svo þegar ég lét forritið „Chess Genius" malla á þessari stöðu var ekki hægt að sanna að staða hvíts væri unnin. Um daginn skellti ég lokastöðunni aftur inn í tölvu. Nú tók „Houdini" við. Þá var niðurstaðan allt önnur:

17. Rxc6 bxc6 18. Bd6! Be6 19. Hb7 Dxd1 20. Hxd1 Bf8 21. Be5 Hg8 22. Bf6! Bg7

23. Be7!

Þessi furðulegi leikur sem varla byggist á nokkru þekktu „mynstri" vinnur. Eftir 23. ... Bf8 24. Bg5 á svartur enga haldgóða vörn gegn hótuninni. 25. Bf3.

Bobby Fischer hafði rétt fyrir sér í Glæsibæ forðum, hvíta staðan er unnin.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 13. apríl 2014

Skákþættir Morgunblaðsins

Skákþættir Morgunblaðsins | Breytt s.d. kl. 23:10 | Slóð | Facebook | Athugasemdir (0)

13.4.2014 | 20:00

Skákþáttur Morgunblaðsins: Ekki vanmeta reynsluboltana

Indverjinn Wisvanathan Anand, eini fulltrúi „gamla skólans" á áskorendamótinu í Khanty Manyisk í Síberíu vann þar svo sannfærandi sigur og áreynslulausan að ekki er hægt að draga af frammistöðu hans aðra ályktun en þessa: aldrei að vanmeta reynsluboltana! Anand tók út þekkingu sína og reynslu á tímum þegar skákir fóru fór í bið, upplýsingar „ferðuðust" hægt og og gagnagrunnar og tölvuforrit þekktust ekki. Kynslóð Magnúsar Carlsen býr á annarri plánetu, þar finnst mikil hæfni í því að safna og vinna úr upplýsingum úr ýmsum áttum. Samt tapaði þessi kynslóð í Khanty. Lokaniðurstaðan:

1. Anand 8 ½ v. 2. Karjakin 7 ½ v. 3.-5. Kramnik, Mamedyarov og Andreikin 7 v. 6.-7. Svidler og Aronjan 6 ½ v. 8 Topalov 6 v.

Sigur Anand var svo öruggur að í 12. umferð ákvað hann að þráleika í vinningsstöðu þar sem sigurleiðin virtist áhættusöm. Annað heimsmeistaraeinvígi Magnúsar Carlsen og Anand fer því fram væntanlega í nóvember nk. Anand verður hættulegri andstæðingur en síðast þar sem sigurinn í Khanty gefur honum byr undir báða vængi.

Friðrik Ólafsson meðal þátttakenda á WOW-air mótinu

Taflfélag Reykjavíkur er í stórsókn og er gaman að fylgjast með stjórnarmönnum og liðsmönnum þessa 114 ára félagsskapar. Nýtt mót á dagskrá TR, Wow air-mótið, hófst sl. mánudag og verður teflt einu sinni i viku - á mánudagskvöldum - fram í maí, sjö umferðir. Dagskráin gefur kost á ½ vinnings yfirsetu en teflt er í tveimur styrkleikaflokkum. Tíu stigahæstu keppendur mótsins eru Friðrik Ólafsson, Hannes Hlífar Stefánsson, Hjörvar Steinn Grétarsson, Þröstur Þórhallsson, Guðmundur Kjartansson, Stefán Kristjánsson, Dagur Arngrímsson, Guðmundur Gíslason, Ingvar Þ. Jóhannesson og Sigurbjörn Björnsson. Í B-flokknum eru margir öflugir skákmenn.

Guðmundur Gíslason þarf að taka flugið frá Ísafirði til að tefla á mótinu og kannski gætti einhverrar ferðaþreytu er hann mætti hinum 16 ára Degi Ragnarssyni í 1. umferð. En skákin var viðburðarík og fjörug:

Guðmundur Gíslason - Dagur Ragnarsson

Tarrasch - vörn

1.Rf3 e6-vörn 2.c4 Rf6 3.b3 d5 4.e3 c5 5.Bb2 Rc6 6.Be2 Be7 7.O-O

O-O 8.cxd5 exd5 9.d4 cxd4 10.Rxd4 Re8!?

Óvenjulegur leikur sem hvítur gat svarað með 11. Rxc6 bxc6 12. Rc3 ásamt Hc1 eða - Ra4 eftir því sem verkast vill.

11.Bf3 Bf6 12.Rc3

Betra er 12. Dd1 ásamt - Hd1. Nú jafnar Dagur taflið.

12. ... Rxd4 13.exd4 Rc7 14.He1 Bf5 15.Ba3 He8 16.Hxe8+ Dxe8 17.Bxd5?!

Hvítur hefur teygt sig fulllangt eftir d5-peðinu. Hér var öruggara að leika 17. Rxd5.

17. ... Hd8 18.Bxb7 Bxd4 19.Df3 De5 20.Hd1?

Hann varð að leika 20. Bb2 þó leppunin eftir hornalínunni sé erfið. Nú gat Dagur leikið 20. ...Bc2! sem vinnur.

20. ... He8? 21.g4 Bc2 22.Hc1 Bxc3 23.Hxc2 Rb5!?

Einhvern tímann hefði þetta verið kallað „sprikl" því hvítur gat bætt stöðu kóngsins með 24. Kg2! og á þá vinningsstöðu.

24.Bc6? Rd4! 25.Dxc3 Hc8!

Mögnuð staða. Hvítur er manni yfir en á engan frambærilegan leik.

26.Kf1 Hxc6 27. Db4 h6! 28.Hxc6 De2+!

Samvinna drottningar og riddara ræður úrslitum.

29.Kg2 De4+ 30.Kg1 Rf3+ 31.Kg2 Rh4+!

- og hvítur gafst upp. Hann fær ekki umflúið mátið, 32. Kf1 Dd3+ 33. Ke1 Rg2 mát eða 32. Kh3 Df3+ 33. Kxh4 g5+ og 34. ... Dh3 mát.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 6. apríl 2014

Skákþættir Morgunblaðsins

Skákþættir Morgunblaðsins | Breytt 14.4.2014 kl. 14:37 | Slóð | Facebook | Athugasemdir (0)

30.3.2014 | 23:09

Skákþáttur Morgunblaðsins: Endurkoma Anands - efstur í áskorendakeppninni

Þegar Wisvanathan Anand tapaði einvígi sínu um heimsmeistaratitilinn fyrir Magnúsi Carlsen var eins og skákskýrendur og sérfræðingar afskrifuðu hann og ekki að ástæðuausu. Á örlagastundum missti hann af besta leiðinni og lokaniðurstaðan, 3:6, benti eindregið til þess hann hefði sungið sitt síðasta. Anand muna hafa undirbúið sig vel fyrir einvígið en sá undibúningur komst aldrei til skila. Hann fékk ekki upp þær stöður sem hann hafði rannsakað sérstaklæga fyrir einvígið. Þar réði kom til skjalanna sá einstæði hæfileiki Norðmannsins að sneiða hjá alfaraleiðum komat samt á áfangastað. Að þessu leyti til minnir hann á einhvern vanmetnasta heimsmeistara allra tíma, Emanuel Lasker sem þó hélt heimsmeistaratitlinum í 27 ár.

Þessa dagana fer áskorendamótið fram á „slóðum loðfílanna" í Khanty Manyisk í Síberíu og margt bendir til hin mikla vinna sem Anand innti af hendi á síðasta ári sé nú farin að skila sér. Eftir sex umferðir af 14 er staðan þessi:

1. Anand 4 v. (af 6) 2. Aronjan 3 ½ v. 3. - 6. Topalov, Kramnik, Svidler og Mamedyarov 3 v. 7. Karjakin 2 ½ v. 8. Andreikin 2 v.

Það er svolítil rússnesk slagsíða á þessu áskorendamóti og loft er lævi blandið; minnugur einvígisins í Elista haustið 2006 náði Topalov náði fram hefndum er hann sigraði Kramnik í 6. umferð og getur með góðum endaspretti náð efsta sæti. Armeninn Aronjan og Aserinn Mamedyarov talast ekki við en skærur þjóða þeirra setja mark sitt á viðureignir þeirra. Anand hefur aldrei svo vitað blandast deilum af slíku tagi og gengur um sali í Khanty Manyisk æðrulaus og spakur. Magnús Carlsen hefur sent keppendum kveðjur sínar og óskað þeim öllum góðs gengis. Hvílíkt drenglyndi. Hvenær í skáksögunni hefur heimsmeistari sent keppinautum sínum slíkar kveðjur? Garri Kasparov lét svo um mælt þegar hann kom hingað til lands á dögunum að Kramnik og Aronjan væru báðir mun hættulegri mótstöðumenn en Anand. Er það nú alveg víst? Lítum á sigur Indverjans í 3. umferð:

Shakriyar Mamedyarov - Wisvanathan Anand

Slavnesk vörn

1. d4 d5 2. c4 c6 3. Rf3 Rf6 4. Dc2

( Róleg leið til þess fallin að sneiða hjá langri teóríu. )

4. ... dxc4 5. Dxc4 Bg4 6. Rbd2 Rbd7 7. g3 e6 8. Bg2 Be7 9. Re5 Bh5 10. Rxd7 Rxd7 11. O-O O-O 12. Rb3 a5 13. a4 Bb4!

Staða riddarans á b3 er heldur ólánleg og biskupar svarts eru til alls vísir.

14. e4 e5 15. Be3 exd4 16. Bxd4 Kh8 17. e5 He8 18. f4 f6 19. exf6 Rxf6

Svartur hefur gert meira en að jafna taflið og hótar nú 20. .. Be2.

20. Bf3 Bxf3 21. Hxf3 He4 22. He3?

Eftir þennan eðlilega leik fær hvítur ekki rönd við reist, nauðsynlegt var 22. Dd3 sem heldur í horfinu.

22. ... Hxe3 23. Bxe3 De8! 24. Bb6?

Valdar d8-reitinn en betra var 24. Bd4. Kannski hefur hann bDh5 25. Bd4 He8 26. Hf1 óttast leppunina 24. ... De4 sem á svara með 25. Rc5.

24. ... Dh5 25. Bd4 He8!

Hvítur er aðeins of seinn með -Bd4 leikinn. Nú strandar á 26. Bxf6 á 26. .. gxf6 27. Hf1 He2 o.s.frv.

26. Hf1

( STÖÐUMYND )

26... Rg4! 27. Dc2

Eða 27. h4 Re3! 28. Bxe3 Hxe3 29. Kh2 Dg4 30. Hg1 Be1! og vinnur.

27. ... c5! 28. Rxc5 Hc8! 29. Hd1 Bxc5 30. Bxc5 h6 31. Kh1

- og hvítur gafst upp um leið, svartur á tvo leiki sem vinna báðir, 31. ... Rf2+ eða 31. ... Re3

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 23. mars 2014

Skákþættir Morgunblaðsins

Skákþættir Morgunblaðsins | Breytt s.d. kl. 23:13 | Slóð | Facebook | Athugasemdir (0)

23.3.2014 | 20:00

Skákþáttur Morgunblaðsins: Ungu skákmennirnir bættu sig verulega á Reykjavíkurmótinu

Kínverjinn Li Chao er sigurvegari Reykjavíkurskákmótsins sem lauk í Hörpu á miðvikudaginn eftir spennandi lokaumferð. Li Chao hlaut 8 ½ vinning af 10 mögulegum. Kínverjar eru stórveldi í skákinni og að fulltrúi þeirra skuli vinna þetta mót kemur ekki á óvart. Sennilega hefur komið á óvart að greinarhöfundur sem lítið hefur teflt undanfarið skyldi eiga möguleika á efsta sætinu en í lokaumferðinni var efsta sætið undir í harðri baráttuskák við Kanadamanninn Eric Hansen. Taktík þeirrar viðureignar var að tefla frekar þurrt í þeirri von að andstæðingurinn myndi sprengja sig. En í skákinni var ákveðnu jafnvægi

ekki raskað og úr varð einhverskonar störukeppni sem endaði með því að keppendur slíðruðu sverðin eftir mikil uppskipti. Undirritaður var því fyrir vikið í 2.-5. sæti ásamt Hollendingnum Robin Van Kampen, Eric Hansen og Litháanum Eduardas Rosentalis, allir með 8 vinninga. Í humátt á eftir komu m.a. Hjörvar Steinn Grétarsson og Hannes Hlífar Stefánsson með 7 ½ vinning.

Lokaúrslitin að öðru leyti bera með sér að margir af okkar ungu skákmönnum bættu sig verulega. Hinn 11 ára gamli Vignir Vatnar Stefánsson hækkaði mest allra eða um 55 elo-stig. Félagar hans í sigurliði Íslands á NM í skólaskák hækkuðu flestir heilmikið, Jón Kristinn Þorgeirsson, Oliver Jóhannesson, Dagur Ragnarsson, Hilmir Freyr Heimisson og Nökkvi Sverrisson og einnig ungir skákmenn á hraðri uppleið, Gauti Páll Jónsson, Símon Þórhallsson, Dagur Andri Friðgeirsson og Birkir Karl Sigurðsson svo nokkrir séu nefndir. Þá stóð Lenka Ptacnikova sig frábærlega.

Nýjasti stórmeistari Íslendinga Hjörvar Steinn Grétarsson átti gott mót en lykilinn að árangrinum fann hann í 9. umferð er honum tókst að leggja að velli 2. borðs mann Englendinga frá síðasta Ólympíumóti:

Hjörvar Steinn Grétarsson - Gawain Jones

Pirc-vörn

1. d4 d6 2. e4 Rf6 3. Rc3 g6 4. Be3 a6 5. a4 Bg7 6. Dd2 O-O 7. Rf3 Bg4 8. Be2 Rc6 9. O-O e5 10. d5 Re7 11. g3

Sérstæður leikur en 11. a5 lá beinast við. Eftir 11. ... Rd7 á hvítur 12. Rg5.

11. ... Bd7 12. Dd3 h6 13. Rd2 Rg4 14. Bxg4 Bxg4 15. f4 Dd7 16. fxe5 dxe5 17. Rb3 Hab8 18. Rc5 Dd8 19. Rd1 Bh3 20. Hf3 Bg4 21. Hf1 Bh3 22. Hf3 a5

Jafntefli kemur ekki til greina.

23. Rf2 Bc8 24. Hd1 b6 25. Rb3 g5 26. h3 Rg6?!

Riddarinn er fremur óvirkur þarna. Mun betra var 26. ... f5 strax.

27. Rd2 Bd7 28. b3 h5 29. Rc4 Bh6 30. Bc1 Dc8 31. Re3!

Eftir að hvítur nær að hertaka f5-reitinn á svartur afar erfitt um vik. 31. ... Bxh3 strandar á 32. Rxh3 Dxh3 33. Rf5! Kh7 34. g4! Dxg4 Hg3 og drottningin á engan reit.

31. ... g4 32. hxg4 Bxe3 33. Dxe3 Bxg4

34. Dh6!

Þrumuleikur sem hótar 35. Bg5. Svartur er varnarlaus gagnvart þeirri hótun.

34. ... Bxf3 35. Bg5!

Sá kostur að láta drottninguna af hendi með 35. ... Dd8 var ekki fýsilegur.

35. ... f5 36. Dxg6+ Kh8 37. Dh6 Kg8 38. Dg6 Kh8 39. Bf6 Hxf6 40. Dxf6 Kg8 41. Hd3 fxe4 42. Dg6 Kf8 43. Hc3! c5 44. dxc6 Dc7 45. Rxe4 Bxe4 46. Dxe4 Hd8 47. Df3+ Ke7

Eða 47. ... Df7 48. Dxf7+ Kxf7 49. c7 Hc8 50. Kf2 og endataflið er auðunnið.

48. Dxh5 Dd6 49. Dh7+ Ke8 50. Dg8+ Ke7 51. Dg7+ Ke8 52. Hf3 Dc5+ 53. Kh2 Hd1 54. Dg8+ Ke7 55. Hf7+ Ke6 56. Dg6+ Kd5 57. Hd7+

- og loks gafst Gawain Jones upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 16. mars 2014

Skákþættir Morgunblaðsins

Skákþættir Morgunblaðsins | Breytt 16.3.2014 kl. 12:30 | Slóð | Facebook | Athugasemdir (0)

16.3.2014 | 20:00

Skákþáttur Morgunblaðsins: Funheitur Walter Browne mætir aftur á Reykjavíkurskákmót

Walter Shawn Browne sem er 65 ára gamall er sá eini meðal 155 erlendra þátttakenda á 50 ára afmæli Reykjavíkurskákmótanna sem sigrað hefur á þessu móti. Það gerðist á Hótel Loftleiðum á hinu geysisterka 8. Reykjavíkurmóti árið 1978 og keppinautar hans, sem tefldu allir við alla, voru ekki af verri endanum: Bent Larsen, Tony Miles, Lev Polugajevskí, Vlastimil Hort auk íslensku meistaranna með Friðrik Ólafsson fremstan í flokki. Bægslagangurinn í tímahraki í skák við Polugajevskí og almenn baráttugleði hans eru mönnum enn í fersku minni. Walter Browne vann bandaríska meistaratitilinn sex sinnum og fyllti að sumu leyti það pláss í bandarísku skáklífi sem Bobby Fischer skildi eftir. Eldmóðurinn er þarna ennþá og hann hefur unnið þrjár fyrstu skákir sínar á sannfærandi hátt.

Faðir hins nýbakaða heimsmeistara, Henrik Carlsen, er hingað kominn til að slaka aðeins á eftir fjölmiðlafárið í kringum einvígi sonarins á dögunum. Hann á góðar minningar frá því á Reykjavíkurmótinu 2004; samsetning keppenda þá með Magnús Carlsen, Lev Aronjan og Hikaru Nakamura á keppendalistanum sannar að framkvæmdaraðilar þessara móta hafi verið lagnir að fá til keppni menn framtíðarinnar. Hinn 10 ára gamli Awonder Liang er heimsmeistari barna í sínum aldursflokki en Hjörvar Steinn Grétarsson vann piltinn þó örugglega í 2. umferð.

Reykjavíkurmótin eru nú öllum opin með skemmtilegum hliðarviðburðum á borð við barna-blitz og pub quiz. En fyrst og síðast er mótið frábær vettvangur fyrir íslenska skákmenn, ekki síst þá yngstu. Keppendur eru alls 254 en erlendu gestirnir eru 155. Mótið er vel skipulagt og salurinn í Hörpu er stórglæsilegur. Hlutur kvenna er alltaf að aukast og margar öflugar skákkonur mæta til leiks, áhorfendur sópuðust að skjánum þegar indverska skákprinsessan Tania Sachdev sá um skákskýringar á heimasíðu heimsmeistaraeinvígis Anands og Magnúsar Carlsens í Indlandi. Af mörgum óvæntum úrslitum er að taka en hér birtist sigur Tinnu Kristínar Finnbogadóttur í 1. umferð en stigamunur var upp á næstum 500 elo-stig. Góð taflmennska Tinnu í endataflinu réð svo úrslitum:

Mate Bagi (Ungverjaland) - Tinna Kristín Finnbogadóttir

Sikileyjarvörn

1. e4 c5 2. Rf3 g6 3. Bc4 Rc6 4. c3 Bg7 5. d4 d6 6. O-O e6 7. Bf4 cxd4 8. cxd4 Rge7 9. Rc3 d5 10. Bb3 dxe4 11. Rxe4 O-O 12. Bg5 Da5

Eftir byrjun þar sem hvítur missti af ýmsum vænlegum leiðum, t.d. 7. d5, hefur svartur náð prýðilegri stöðu með þrýsting á staka peðið á d4.

13. Dc1 Rf5 14. Hd1 Rfxd4 15. Rxd4 Rxd4 16. De3 e5 17. Bf6 Db6 18. Bxg7 Kxg7 19. Hac1 Rxb3 20. Dxb3 Dxb3 21. axb3 Be6 22. Rc5 Hfe8!

23. Rxe6+ Hxe6 24. Hc7 Hc6 25. Hxb7 Hd8!

Notfærir sér valdleysið í borðinu, 26. Hxd8 strandar auðvitað á 26. ... Hc1+ og mátar.

26. Hf1 Hd2 27. Hxa7 Hxb2 28. Ha5 e4 29. Hb5 Hcc2

Hótar 29. ... e3. Lakara var 29. ... e3 vegna 30. fxe3 Hcc2 31. Hg5! og hvítur nær jafntefli.

30. He5 He2 31. h4 f6 32. He7+ Kh6 33. g3 Hxb3

Hvítur gat ekki varið b-peðið og átt við hótun svarts að leika e4-e3.

34. Kg2 Hbb2 35. Kg1 Ha2 36. He6 f5 37. He7 Hab2 38. He6

Hvítur er í leikþröng og nú brýst svarti kóngurinn fram.

38. ... Kh5! 39. He7 h6 40. He5 Kg4 41. He6 e3 42. Hxg6+ Kh3

- og hvítur gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 9. mars 2014

Skákþættir Morgunblaðsins

Skákþættir Morgunblaðsins | Breytt 15.3.2014 kl. 11:39 | Slóð | Facebook | Athugasemdir (0)

16.3.2014 | 19:00

Skákþáttur Morgunblaðsins: Víkingarnir í skákinni

Ég hef´ann," hrópaði markvörður Víkings í 2. flokki, Ögmundur Kristinsson, þegar hann kom askvaðandi út úr markteignum í leik Víkings og ÍBV á Hásteinsvellinum í Eyjum sumarið 1971, og uppskar mikinn hlátur áhorfenda þegar hann hugðist kýla bolta í burtu en hafði ekki meiri stjórn á atburðarásinni en svo að boltinn skrúfaðist einhvern veginn aftur fyrir hann og sleikti síðan markstöngina. En sá hlær best sem síðast hlær, segir einhversstaðar. Árin 1981 og 1982 var Ögmundur aðalmarkvörður í liði Íslandsmeistara Víkings og var valinn í A-landslið Íslands árið 1983.

Ögmundur var á þessu tíma einn öflugasti ungi skákmaðurinn í Taflfélagi Reykjavíkur, þekktur fyrir sóknartilþrif og varasama gambíta eins „Marshall-árásina" og „Búdapestar-bragð". Taflfélag Reykjavíkur hafði eignast húsnæði við Grensásveg - í miðju hverfi Víkinga og þar steig hann sín fyrstu skref í skákinni. Síðan eru liðin mörg ár en undanfarið hefur Ögmundur verið að auka þátttöku sína á mótum með styttri umhugsunartíma, og hann er líka að tefla kappskákirnar; var t.d. með á Reykjavíkurskákmótinu í fyrr a og sýndi klærnar á nýafstöðnu móti GM Hellis, Nóa Síríus-mótinu. Þar hlaut hann 4 vinninga af sjö mögulegum, náði árangri upp á 2300 elo-stig og hækkaði um meira en 30 stig.

Í skák sinni við Andra Áss Grétarsson úr því móti var það ekki byrjanakunnáttan sem réð úrslitum, heldur miklu fremur snemmbær og tvísýn atlaga á drottningarvæng, síðar beindust spjótin að f7-reitnum og loks brast á með innrás eftir c-línunni. Laglegur sigur:

Nóa Síríus-mótið; 1. umferð:

Ögmundur Kristinsson - Andri Áss Grétarsson

Kóngsindversk vörn

1. c4 Rf6 2. Rc3 g6 3. g3 Bg7 4. Bg2 O-O 5. d4 d6 6. Rf3 Rbd7 7. O-O e5 8. b3

He8 9. e3 c6 10. dxe5 dxe5 11. Bb2 Dc7 12. b4?!

Svartur á við enga erfiðleika að etja eftir bitlausa byrjun hvíts.

12. ... a5 13. a3 Bf8 14. c5 b6 15. cxb6

Dxb6 16. b5!?

Gefur peð fyrir spil og nær að rugla Andra í ríminu.

16. ... cxb5 17. Rg5 Hb8?

Hér lá beinast við að leika 17. ... Bb7 en þá þarf að taka með í reikninginn leikinn 18. Rd5 sem hægt er að svara með 18. .. Da7!

18. Db3 He7 19. Rd5 Rxd5 20. Bxd5

Skyndilega er hvítur kominn með óþægilegan þrýsting á f7-peðið.

18. ... Rc5?

Eftir þetta fer að halla undir fæti. Hér varð svartur að leika 20. ... Bb7 og eftir 21. Bxf7+ Kh8 er staðan í jafnvægi.

21. Bxf7+ Kh8 22. Dd5!

Öflugur leikur sem hótar 23. Bxe5+ o.s.frv.

22. ... Bg7 23. Hac1 Rd7 24. Hc6 Da7 25. Dd6 Bf6 26. Hfc1

Hvítur bætir stöðu sína í hverjum leik.

26. ...Bxg5 27. Hxc8+ Kg7 28. H8c7 Hb7 29. Bd5!

Og nú fær svartur ekki varist liðstapi.

29. ... Db6 30. H1c6 Da7 31. Hxb7 Dxb7 32. Hc7 Db6 33. Hxd7 Dxd6 34. Hxd6

- og svartur gafst upp.

Stefán Kristjánsson sigraði á Nóa Síríus-mótinu, hlaut 6 vinninga af sjö mögulegum, Björgvin Jónsson og Davíð Kjartansson komu næstir með 5 ½ vinning og í 4.-7. sæti urðu Bragi Þorfinnsson, Karl Þorsteins, Jón Viktor Gunnarsson og Magnús Örn Úlfarsson, allir með 5 vinninga.

Jón Þorvaldsson á allan heiður af framkvæmdinni en honum tókst að laða til keppni marga af bestu skákmönnum landsins sem tefldu eina umferð á viku í Stúkunni á Kópavogsvelli en keppendur voru 70 talsins.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 2. mars 2014

Skákþættir Morgunblaðsins

Skákþættir Morgunblaðsins | Breytt 15.3.2014 kl. 11:39 | Slóð | Facebook | Athugasemdir (0)

2.3.2014 | 20:00

Skákþáttur Morgunblaðsins: Ísland Norðurlandameistari í skólaskák

Norðurlandamóti barna og unglinga, sem fram fer ár hvert, er skipt upp í fimm aldursflokka og þjóðirnar eiga tvo keppendur í hverjum flokki þar sem tefldar eru sex umferðir eftir svissneska kerfinu. Samanlagðir vinningar ákvarða síðan lokaniðurstöðuna hvað varðar keppni milli þjóðanna. Við unnum þessa keppni í fyrra þegar hún fór fram í Bifröst í Borgarfirði og vörðum titilinn í ár. Danir settu mikinn metnað í að vinna keppnina í ár - en það tókst ekki. Við héldum forystunni frá upphafi en naumt var það í lokin. Lokaniðurstaðan varð þessi:

1. Ísland 35 ½ v. 2. Danmörk 34 v. 3. Svíþjóð 33 v. 4. Noregur 32 ½ v. 5. Finnland 30 v. 6. Færeyjar 15 v.

Íslenski hópurinn var að mestu skipaður þeim sömu og í fyrra: Mikhael Jóhann Karlsson og Nökkvi Sverrisson tefldu í A-flokki, Dagur Ragnarsson og Oliver Aron Jóhannesson í B-flokki, Jón Kristinn Þorgeirsson og Dawid Kolka í C-flokki, Hilmir Freyr Heimisson og Felix Steinþórsson í D-flokki og Vignir Vatnar Stefánsson og Mikhael Kravchuk í E-flokki.

Íslendingar unnu til verðlauna í öllum flokkum, Jón Kristinn og Vignir Vatnar fengu silfur, Hilmir Freyr, Dagur og Nökkvi brons. Við höfum yfirleitt tekið gull í a.m.k. einum flokki og lengi vel áttu Vignir Vatnar, Jón Kristinn og Mikhael Jóhann Karlsson möguleika á því að landa sigri í sínum flokkum en andstæðingar Vignis Vatnars tefldu stíft upp á jafntefli. Frammistaða Jóns Kristins, sem er 14 ára, er aldeilis frábær; á dögunum varð hann Skákmeistari Akureyrar, sá yngsti í sögunni.

Hilmir Freyr Heimisson hlaut 4 vinninga en sigur hans yfir dönskum andstæðingi í lokaumferðinni var afar mikilvægur, því eins og mál þróuðust hefðu Danir unnið flokkakeppnina með sigri í þeirri skák. Miklar sviptingar og óbilandi bjartsýni einkenndu skákir Hilmis:

Sjá stöðumynd 1

Hilmir Freyr - Arun Ananthan

Hilmir hafði ekki teflt byrjunina nægilega vel, tapaði peði, gaf síðan skiptamun fyrir „spil" en staðan er samt erfið og beinast liggur við að berjast áfram með 31. Rb5. Hann lék hinsvegar:

31. Rf5+?! gxf5 32. Bxf5

Nú vonaðist Hilmir eftir „traustum" varnarleik, 32. ... De7 sem hann hugðist svara með 33. Dh6+!! Kxh6 34. Rg4+ Kgf7 (eða 34. .. Kg5 35. f4 mát) 35. Hh7+ Kg8 36. Rh6 mát. En svartur fann bestu vörnina og lék ...

32. ... Rg6!

Hvíta staðan er töpuð en baráttan hélt áfram og Hilmir var ekkert á því að „kasta inn handklæðinu". Eftir 42 leiki kom þessi staða upp:

Ekki er ástandið björgulegt en mikil taugaspenna enda sigur Íslands eða Dannmerkur undir. Svartur lék...

42. ... Dd7??

og Hilmir kom samstundis með:

43. f6+!

Drottningin á d7 fellur og svartur gafst upp.

Keppnin fór fram við frábærar aðstæður í Legolandi í Billund. Danir eiga mikinn heiður skilið fyrir bestu aðstæður sem boðið hefur verið uppá í þessari keppni. Fyrir mótið gaf Tuborg 25 tölvusýningarborð og voru allar skákirnar sýndar í beinni útsendingu. Skólaskáksamband Danmerkur sá um framkvæmdina en lítið samband er milli þess og danska skáksambandsins. Athygli vakti að öflugustu stórmeistarar Dana, Curt Hansen og Peter Heine Nielsen, höfðu hlutverkum að gegna á skákstað en samband þeirra við danska skáksambandið hefur löngum verið stirt.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 23. febrúar 2014

Skákþættir Morgunblaðsins

Skákþættir Morgunblaðsins | Breytt 24.2.2014 kl. 10:28 | Slóð | Facebook | Athugasemdir (0)

23.2.2014 | 20:00

Skákþáttur Morgunblaðsins: Veronika í verðlaunasæti á Gíbraltar

Jón Viktor Gunnarsson er Skákmeistari Reykjavíkur eftir spennandi keppni á Skákþinginu, sem hófst í byrjun janúar og lauk í síðustu viku. Jón varð efstur ásamt Einari Hjalta Jenssyni. Þeir hlutu átta vinninga af níu mögulegum en Jón Viktor var sæmdur titlinum eftir stigaútreikning. Einar Hjalti varð einnig efstur á Haustmót TR og er á mikilli siglingu. Röð efstu manna á mótinu var að öðru leyti þessi:

3. Oliver Aron Jóhannesson 7 v. 4.-6. Mikhael Jóhann Karlsson, Loftur Baldvinsson og Haraldur Baldursson 6½ v. 7.-13. Davíð Kjartansson, Lenka Ptacnikova, Sigurbjörn Björnsson, Þorvarður Ólafsson, Jón Trausti Harðarson, Stefán Bergsson og Vignir Vatnar Stefánsson 6 v.

Ýmsar niðurstöður má lesa úr þessu móti en athygli vekur góð frammistaða piltanna úr Rimaskóla, Olivers Arons og Jóns Trausta, og hins tíu ára gamla Vignis Vatnars Stefánssonar. Af efstu mönnum hækkuðu Jón Trausti, Einar Hjalti, Loftur Baldvinsson og Vignir Vatnar myndarlega á stigum.

Af hálfu TR var vel staðið að mótinu í hvívetna, skákir voru aðgengilegar degi eftir að umferð lauk, svo dæmi sé tekið.

Frábær frammistaða Veroniku á Gíbraltar

Undanfarin ár hefur opna mótið á „Klettinum", þ.e. Gíbraltar, verið það vinsælasta meðal skákmanna og í ár flykktust þangað nafntogaðir kappar. Ivantsjúk, Cheparinov og Vitiugov deildu efsta sætinu, hlutu allir átta vinninga af tíu mögulegum í hópi meira en 250 keppenda; eftir aukakeppni var Cheparinov úrskurðaður sigurvegari.

Magnús Kristinsson bauð dóttur sinni, Veroniku Steinunni, í þetta ferðalag á framandi slóðir þar sem apar leika við hvern sinn fingur. Feðginin voru einu fulltrúar Íslands á Gíbraltar og Veronika náði eftirminnilegum árangri og vann til góðra verðlauna í flokki keppenda undir 2.050 elo-stigum. Hún fékk fjóra vinninga af tíu mögulegum, tefldi upp fyrir sig allt mótið og náði árangri sem reiknast upp á 2.010 elo-stig en hennar stig fyrir mótið voru 1.561 elo.

Veronika tók þátt í Evrópumóti barna og unglinga í Svartfjallalandi fyrir áramótin og undirbúningur hennar fyrir það mót er að skila sér núna. Eftirfarandi skák sem tefld var í 3. umferð er til vitnis um það:

Tim R. Spanton (England) - Veronika Magnúsdóttir

Reti byrjun.

1. c4 Rf6 2. g3 c6 3. Rf3 d5 4. b3 Bf5

Biskupinn er oft hafður á g4 en þetta er ágætt líka.

5. Bb2 Rbd7 6. Bg2 h6 7. 0-0 e6 8. d3 Be7 9. Rbd2 0-0 10. He1 Hc8 11. e4 Bh7 12. e5 Re8 13. d4 Rc7

Þótt svartur standi þröngt á hann góð færi náist að opna taflið með - c5. Hér hefði verið best að loka taflinu með 14. c5 en hvítur velur ómarkvissan leik.

14. Bh3? c5! 15. Hc1 cxd4 16. Rxd4 Rc5 17. Bf1 Rd3 18. Bxd3 Bxd3 19. He3 Bh7 20. c5 Ra6 21. c6 Db6 22. cxb7 Dxb7 23. a3 Hxc1 24. Dxc1 Rc5 25. Hc3 Db6 26. Df1

- Sjá stöðumynd -

26.... Ra4!

Skemmtileg vending, annar góður leikur var 26.... a5.

27. Hc6 Db8 28. Bc1 Rc5!

„Músagildru-þemað" er hér komið fram, riddarinn hleypir hróknum inn til c6 en lokar svo á hann aftur með því að stökkva til baka. Veikleikinn á d3 reynist erfiður.

29. f4 Rd3 30. R2f3 Hc8 31. f5 Hxc6 32. Rxc6 Bc5 33. Kg2 Dxb3 34. fxe6 fxe6 35. Rd2 Dc2 36. Rd8 Be4+ 37. Kh3 Rf2+ 38. Kh4 Be7+

- og hvítur gafst upp, 39. Kh5 er svarað með 39.... Bg6 mát.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 16 febrúar 2014

Skákþættir Morgunblaðsins

Skákþættir Morgunblaðsins | Breytt 17.2.2014 kl. 10:07 | Slóð | Facebook | Athugasemdir (0)

16.2.2014 | 20:00

Skákþáttur Morgunblaðsins: Magnús Carlsen stóðst fyrstu prófraunina

Fyrsta keppni nýs heimsmeistara í skák vekur alltaf athygli. Sá „nýbakaði" finnur yfirleitt hjá sér ríka þörf til að sanna að hann sé verðugur handhafi krúnunnar. Þannig var það með Aljekin eftir sigur í maraþoneinvíginu við Capablanca í Buenos Aires 1927, hann varði titilinn 1929 gegn óverðugum áskoranda, Efim Bogljubow, en síðan vann hann mótin í San Remo 1930 og Bled 1931 með fáheyrðum yfirburðum.

Á fyrsta móti sem Spasskí tók þátt í eftir að hafa velti Petrosjan úr sessi vann hann glæsilega. Það fór fram í San Juan í Púertó Ríkó sumarið 1969.

Anatolí Karpov varð heimsmeistari vorið 1975 án þess að tefla við Bobby Fischer. Hann var keyrður áfram af knýjandi þörf til að sanna sig og vann strax sigur á sterku móti sem skipt var á milli Portoroz og Ljubljana í Slóveníu.

Sem heimsmeistari byrjaði Kasparov á því að skrifa bók um einvígi nr. 2 við Karpov, nokkrum vikum síðar tefldi hann stutt einvígi við Jan Timman.

Ekki verður annað sagt en að Magnúsi Carlsen hafi tekist vel upp í sinni fyrstu prófraun sem lauk í Zürich í vikunni. Þetta sex manna skákmót hófst með stuttu hraðskákmóti sem ákvarðaði töfluröð, síðan var tekið til við umferð kappskáka og loks umferð atskáka. Kappskákirnar giltu tvöfalt en þar hlaut Magnús 4 vinninga af fimm og hafði nánast tryggt sér sigur er atskákirnar hófust. En á ýmsu gekk í kappskákahlutanum; hann var t.d. með tapað tafl gegn Nakamura í 3. umferð en slapp með skrekkinn og náði sigri. Nakamura hefur nýverið gefið út þá yfirlýsingu að á næstu árum verði hann hættulegasti andstæðingur Magnúsar. Betri færi fá menn varla gegn heimsmeistaranum og hann hlýtur að naga sig í handarbökin fyrir klúðrið.

Í atskákunum voru Magnúsi mislagðar hendur og fékk hann aðeins 2 vinninga en það dugði til sigurs. Lokaniðurstaðan varð þessi:

1. Magnús Carlsen 10 v. 2. - 3. Caruana og Aronjan 9 v. 4. Nakamura 7 ½ 5. Anand 5 v. 6. Gelfand 4 ½ v.

Skákin við Boris Gelfand var fyrsta kappskák Magnúsar Carlsen sem heimsmeistara og hann tefldi sem slíkur:

Magnús Carlsen - Boris Gelfand

Grünfelds-vörn

1. c4 g6 2. d4 Rf6 3. Rf3 Bg7 4. g3 c6 5. Bg2 d5 6. Da4

Enn eitt dæmið um sjaldséða leiki í byrjun tafls hjá Magnúsi. Hér er oftast leikið 6. cxd5.

6. ... O-O 7. O-O Rfd7 8. Dc2 Rf6 9. Bf4 Bf5 10. Db3 Db6

11. Rbd2 Re4 12. e3 Dxb3?!

Dálítið hæpið en erfitt er að finna góða leiki, t.d. 12. ... Da6 13. Hfc1 ásamt -Bf1 við tækifæri.

13. axb3 Ra6 14. cxd5 cxd5 15. g4!

Djarfur leikur sem hefur það að markmiði að opna fyrir biskupinn á g2.

15. ... Bxg4 16. Rxe4 dxe4 17. Rd2 f5 18. f3 e5!?

Geldur í sömu mynt en öruggara var 18.... exf3 19. Rxf3 Had8 með jöfnu tafli.

19. dxe5 exf3 20. Rxf3 Hae8 21. Ha5 Rb4 22. Rd4 b6 23. Hxa7 Bxe5 24. Bh6 Hf6 25. h3 Bh5

- Sjá stöðumynd -

26. Rc2!

Sannkallaður heimsmeistaraleikur. Ef nú 26. ... Rxc2 þá kemur 27. Bd5+ Hfe6 28. Hc1! og vinnur, t.d. 28. .. Rb4 29. Bxe6+ og 29. ... Hxe6 strandar á 30. Hc8+ og mátar.

26. ... g5 27. Bxg5 Hg6

28. Hxf5 h6

Enn hangir riddarinn á c2, 28. ... Rxc2 er svarað með 29. Bd5+ Kh8 30. Hxe5! Hxe5 31. Ha8+ Kg7 31. Hg8 mát.

29. Bxh6 Hxh6 30. Rxb4 Bxb2 31. Rd5 Kh8 32. Hb7 Bd1 33. b4 Hg8 34. Re7 Hd8 35. Be4 Bf6 36. Hxb6 Kg7 37. Hf2

- og Gelfand gafst upp.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 9. febrúar 2014

Skákþættir Morgunblaðsins

Skákþættir Morgunblaðsins | Breytt 9.2.2014 kl. 14:45 | Slóð | Facebook | Athugasemdir (0)

9.2.2014 | 20:00

Skákþáttur Morgunblaðsins: Fyrsta mót heimsmeistarans Magnúsar Carlsen

Nýbakaður heimsmeistari, Magnús Carlsen, er aftur sestur að tafli eftir að hafa baðað sig í sviðsljósinu um stund sem eðlilegt hlýtur að teljast; hann sparkaði af stað leik hjá uppáhaldsliði í spænsku deildinni, Real Madrid, heimsótti höfuðstöðvar Google í Kísildalnum og tefldi fjöltefli við toppana þar, var heiðraður í bak og fyrir í Noregi og sitthvað fleira hefur verið á dagskrá hjá norsku þjóðhetjunni.

En nú er hann aftur sestur að tafli í Zürich í Sviss, borg sem státar af ýmsum frægum mótum, t.d. hinu ofmetna áskorendamóti sem fram fór árið 1953. Kostnaðarmaður er rússneskur auðkýfingur, Oleg Skvortsov. Keppendur auk Magnúsar eru Lev Aronjan, sem sigraði með yfirburðum á Wijk aan Zee mótinu á dögunum, Anand fyrrverandi heimsmeistari, Nakamura, Caruana og Gelfand. Meðalstigatala keppenda er 2801 elo og í stigum telst þetta sterkasta skákmót allra tíma.

Á miðvikudaginn var töfluröðin ákveðin með hraðskákmóti, aðferð sem fyrst var notuð á Reykjavik rapid 2004 og hefur notið vaxandi vinsælda síðustu misserin. Skákmennirnir munu tefla eina umferð kappskáka og síðan aðra umferð atskák. Í hraðskákinni á fimmtudaginn varð Magnús efstur ásamt Aronjan; þeir hlutu 3 vinninga af 5 mögulegum.

Í 1. umferð kappskákanna á fimmtudaginn vann Magnús öruggan sigur yfir Gelfand og Aronjan vann Anand.

Mörgum lék forvitni á að vita hvernig Magnús reiddi af í viðureignum sínum við gamla heimsmeistarann Anand. Ekki verður betur séð en að Norðmaðurinn hafi áfram sterkt tak á Indverjanum. Hraðskákirnar hafa þann kost að skemmtileg afbrigði sjá oftar dagsins ljós m.a. vegna þess að mönnum gefst ekki kostur á því að rýna djúpt í stöðurnar. Taflmennska Magnúsar minnti á laufléttan stíl Paul Murphy sem hefði þó áreiðalega ekki sleppt því að leika riddaranum strax til e8.

Magnús Carlsen - Wisvanathan Anand

Vængtafl

1. Rf3 d5 2. b3 c5 3. e4!?

Magnús velur létt og leikandi afbrigði. Vitaskuld getur Anand hafnað áskoruninni og reynt að loka taflinu með 3. ... d4 en hann vill sjá hvað hvítur hefur fram að færa peði undir.

3. ... dxe4 4. Rg5 Rf6 5. Rc3 Rc6 6. Bc4 e6 7. Bb2 Be7 8. O-O O-O 9. Rcxe4 Rxe4 10. Rxe4 e5 11. f4 exf4 12. Dh5 Rd4 13. Hxf4 g6 14. De5!

Magnaður reitur fyrir drottninguna. Þaðan verður hún ekki hrakin í burtu og þessi staða er unnin á hvítt!

14. ... b6 15. Haf1 Bf5 16. g4 Be6 17. Bxe6 fxe6 18. Hxf8 Bxf8 19. Rf6 Kh8

20. c3

Frá fagurfræðilegum sjónarhól séð var 20. Re8+ fallegri leikur; svartur er óverjandi mát: 20. ... Kg8 21. Dh8+! Kxh8 22. Hxf8 mát.

20. ... Rc6

21. Re8+!

- og Anand gafst upp þar sem mátið blasir við.

Barátta Jóns Viktors og Einars Hjalta á Skákþingi Reykjavíkur

Fyrir lokaumferð Skákþings Reykjavíkur sem fram fer í dag stendur baráttan um efsta sætið milli Jóns Viktors Gunnarssonar og Einars Hjalta Jenssonar. Þeir eru með 7 vinninga af átta mögulegum. Í 3. - 7. sæti koma svo Davíð Kjartansson, Þorvarður Ólafsson, Lenka Ptacnikova, Jón Trausti Harðarson og Oliver Aron Jóhannesson, öll með með 6 vinninga. Af þessum hefur hinn ungi Jón Trausti Harðarson komið mest a óvart með stigahækkun uppá 34 stig.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 2. febrúar 2014

Skákþættir Morgunblaðsins

Skákþættir Morgunblaðsins | Breytt 3.2.2014 kl. 09:24 | Slóð | Facebook | Athugasemdir (0)

Færsluflokkur: Skákþættir Morgunblaðsins

Friðrik Ólafsson meðal þátttakenda á WOW-air mótinu

Frábær frammistaða Veroniku á Gíbraltar

Barátta Jóns Viktors og Einars Hjalta á Skákþingi Reykjavíkur

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: