Skákþáttur Morgunblaðsins: Guðmundur varð í 2.- 4. sæti í Hastings

Íslandsmeistarinn Guðmundur Kjartansson varð í 2.-4. sæti á áramótaskákmótinu í Hastings sem lauk 6. janúar. Guðmundur var aðeins hársbreidd frá því að ná lokaáfanga að stórmeistaratitli. Hastings-mótið er elsta alþjóðlega mótið og hefur aðeins fallið niður á tímum heimsstyrjaldanna. Það var haldið í fyrsta sinn árið 1895.

Of langt mál færi í að telja upp alla þá meistara sem teflt hafa í Hastings en fyrirkomulag mótsins hefur tekið ýmsum breytingum í tímans rás. Hin síðari ár hefur það farið fram í opnum flokki. Í ár dró það til sín 88 skákmenn og sigurvegari varð Kínverjinn Jun Zhao, hlaut 8 vinninga af níu mögulegum. Í 2.-4. sæti urðu Guðmundur Kjartansson, Pólverjinn Alexander Mista og Alexandr Fier frá Brasilíu, allir með 7 vinninga. Árangur Guðmundar reiknast upp á 2583 elo-stig. Hann var nýkominn úr Suður-Ameríkuferð ásamt Hannesi Hlífari Stefánssyni þar sem þeir tefldu með góðum árangri á nokkrum alþjóðlegum mótum og stigatalan er að taka kipp upp á við og verður hann með í kringum 2500 elo-stig á næsta stigalista.

Greinarhöfundur renndi yfir skákir Guðmundar frá Hastings og þar ber af sigurskák hans í lokaumferð mótsins:

Hastings 2014-2015; 9. umferð:

Mark Hebden – Guðmundur Kjartansson

Slavnesk vörn

1. d4 d5 2. Rf3 Rf6 3. c4 e6 4. Bg5 h6 5. Bxf6 Dxf6 6. Rc3 c6 7. Db3 De7

Athyglisverður leikur og sjaldséður en mælt er með 7. ... a5 með hugmyndinni 8. ... a4.

8. a3 Rd7 9. Hd1 g5!? 10. e4?!

Hvítur bregst hart við en traustara var 10. e3. Hætt er við að kraftar svartreita biskupsins leysist úr læðingi við þennan leik.

11. Be2 g4! 12. Rd2 e5!

Snarplega teflt. Svartur hefur náð að hrifsa til sín frumkvæðið.

13. cxd5 exd4 14. dxc6 bxc6 15. Ra4 Re5 16. O-O O-O 17. Rc4 Be6 18. Dc2 Rxc4 19. Bxc4 Bxc4 20. Dxc4 Dxe4 21. Hd3?

Þó svartur hafi unnið peð hefur hvítur nokkrar bætur og hefði gert best í því að skorða d4-peðið með riddara, 21. Rc5 og – Rd3 við tækifæri var betra.

21. ... Dg6 22. Rc5 Had8 23. Hfd1 Hfe8 24. H3d2 h5!

Svartur getur ekki bætt vígstöðu sína á betri hátt, í peðunum á kóngsvæng leynist dulinn kraftur.

25. He2 h4 26. Dd3 Dxd3

Einnig kom til greina að leika 26. ... Hxe2 27. Dxe2 h3. Guðmundur taldi möguleika sína ekki síðri án drottninganna.

27. Hxe8+ Hxe8 28. Rxd3 He2 29. Kf1 Hc2 30. Ke1?

Þar fór sú von. Hann gat haldið í horfinu með 30. Rb4!

30. ... c5! 31. Hd2 Hxd2 32. Kxd2 c4 33. Rb4 d3 34. Rc6 Bxb2 35. a4 

Hvítur vonast til að leika 36. Ra5 og sækja að c4 peðinu. Í svona stöðum þarf oft einn veikleika til viðbótar.

35. ... h3! 36. g3 a6 37. Re7+ Kf8 38. Rc6 f6 39. Ra5 Bd4 40. Rxc4 Bxf2 41. Re3 Bxe3+!

- og Hebden gafst upp. Framhaldið gæti orðið 42. Kxe3 f5! 43. Kxd3 f4! og svart peð kemst upp borð.

 

Góð þátttaka á Skákþingi Reykjavíkur

Á vel skipuðu Skákþingi Reykjavíkur þar sem 68 skákmenn eru skráðir til leiks hafa nokkrir valinkunnir meistarar unnið skákir sínar í fyrstu tveim umferðunum: Stefán Kristjánsson, Jón Viktor Gunnarsson, Dagur Arngrímsson, Björn Þorfinnsson, Guðmundur Gíslason og nokkrir til viðbótar. 

Á fimmtudaginn hófst svo Gestamót Hugins og Breiðabliks í Stúkunni á Breiðabliksvelli. Keppendalistinn liggur enn ekki fyrir en mótið mun vera vel skipað. Meira um það síðar.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 10. janúar 2015.

Skákþættir Morgunblaðsins

[Event "Hastings Chess Congress"] [Site "Hastings ENG"] [Date "2015.01.04"] [EventDate "2014.12.29"] [Round "9.4"] [Result "0-1"] [White "Mark Hebden"] [Black "Gudmundur Kjartansson"] [ECO "D30"] [WhiteElo "?"] [BlackElo "?"] [PlyCount "82"] 1. d4 d5 2. Nf3 Nf6 3. c4 e6 4. Bg5 h6 5. Bxf6 Qxf6 6. Nc3 c6 7. Qb3 Qe7 8. a3 Nd7 9. Rd1 g5 10. e4 Bg7 11. Be2 g4 12. Nd2 e5 13. cxd5 exd4 14. dxc6 bxc6 15. Na4 Ne5 16. O-O O-O 17. Nc4 Be6 18. Qc2 Nxc4 19. Bxc4 Bxc4 20. Qxc4 Qxe4 21. Rd3 Qg6 22. Nc5 Rad8 23. Rfd1 Rfe8 24. R3d2 h5 25. Re2 h4 26. Qd3 Qxd3 27. Rxe8+ Rxe8 28. Nxd3 Re2 29. Kf1 Rc2 30. Ke1 c5 31. Rd2 Rxd2 32. Kxd2 c4 33. Nb4 d3 34. Nc6 Bxb2 35. a4 h3 36. g3 a6 37. Ne7+ Kf8 38. Nc6 f6 39. Na5 Bd4 40. Nxc4 Bxf2 41. Ne3 Bxe3+ 0-1

Skákþáttur Morgunblaðsins: Stórafmæli Taflfélagsmanna

Skákþing Reykjavíkur sem hefst á morgun, hinn 4. janúar, er tileinkað Friðriki Ólafssyni, fyrsta stórmeistara Íslendinga, sem verður áttræður hinn 26. janúar næstkomandi. Friðrik hefur alla tíð verið félagsmaður í Taflfélagi Reykjavíkur, en hann tók þátt í sínu fyrsta opinbera móti fyrir tæplega 70 árum. Það hlýtur að gleðja Friðrik og aðra velunnara elsta taflfélags landsins hversu vel er haldið á málum hjá TR um þessar mundir. Félagið hefur auðvitað farið í gegnum hæðir og lægðir á langri ævi en félagsleg staða þess er sterk í dag. Það var stofnað aldamótaárið 1900 og hefur ávallt verið ein aðalkjölfestan í skáklífi Íslendinga. Núverandi Skákmeistari Reykjavíkur er Jón Viktor Gunnarsson, sem er skráður til leiks ásamt mörgum sterkum skákmönnum á borð við Björn Þorfinnsson, Omar Salama, Þorvarð Fannar Ólafsson og Sævar Bjarnason.

Tveir gamlir TR-ingar eiga einnig stórafmæli í þessum mánuði; Ólafur H. Ólafsson og Bragi Kristjánsson verða báðir 70 ára hinn 8. janúar næstkomandi. Ólafur og Bragi áttu stóran þátt í vexti og viðgangi TR á löngu tímabili, ekki síst eftir að TR eignaðist sitt eigið húsnæði við Grensásveg. Ólafur fór fyrir miklum breytingum á starfsemi TR, sem fólust í mögnuðu barna- og unglingastarfi frá því um miðjan áttunda áratuginn. Bragi beitti sér fyrir skákkennslu og þjálfun ungra skákmanna og kvenna og var um tíma skólastjóri Skákskóla Íslands. Ólafur var býsna sterkur skákmaður og átti t.d. sæti í liði Íslands á heimsmeistaramóti stúdenta ári 1971, en það ár varð hann í 2. sæti í meistaraflokki á Skákþingi Íslands. Hann dró mjög úr taflmennsku eftir að hann settist í stjórn TR. Bragi Kristjánsson var einn af fremstu skákmönnum Íslands á sjöunda áratugnum; átti sæti í ólympíuliði okkar árin 1964 og 1968, varð Skákmeistari Reykjavíkur árið 1968 og tefldi á nokkrum af fyrstu Reykjavíkurskákmótunum, Meðfram sat hann oft í stjórnum þessara móta. Skipulag Reykjavíkurmótsins 1968 var þannig til mikillar fyrirmyndar, en þar réðst TR í útgáfu vandaðs bæklings á ensku um mótshaldið. Bragi stóð sig vel á þessu Reykjavíkurmóti, sem haldið var vorið 1968 í minningu Willards Fiske, og var sérstaklega hættulegur þegar hann fékk að beita Sikileyjarvörn. Hann vann þennan ágæta fulltrúa Bandaríkjanna á sannfærandi hátt:

William Addison – Bragi Kristjánsson

Sikileyjarvörn

1. e4 c5 2. Rf3 d6 3. d4 cxd4 4. Rxd4 Rf6 5. Rc3 a6 6. Be2 e6 7. f4 Be7 8. Bf3 0-0 9. 0-0 Dc7 10. Kh1 Rc6 11. Rde2 b5 12. a3 Bb7 13. g4 d5!

Árás á væng skal svarað með árás á miðborði! Þó að Scheveningen-afbrigði Sikileyjarvarnarinnar hafi ekki verið mjög þróað á þessum tíma teflir Bragi óaðfinnanlega

14. exd5 Had8 15. g5 Rxd5 16. Rxd5 exd5 17. Rc3 Ra5 18. f5 Rc4!

Lætur sér fátt um finnast þó að f-peðið virki ógnandi.

19. f6 Bc5 20. fxg7 Hfe8!

Menn svarts standa allir vel til sóknar og hvítur er sérstaklega veikur fyrir á hornlínunni a8-h1.

21. Re2 d4 22. Bf4 Bxf3 23. Hxf3 Dc6 24. Rg1

24.... Re3!

Góður leikur en aðrir vænlegir kostir voru 24.... d3 og 24....Rxb2.

25. Dd3 Hd5 26. He1 Bb6 27. c3

Opnar stöðuna enn meira. Eitthvert hald var í 27. h4.

27.... dxc3 28. Dxc3 Hc5 29. Db3 Hf5!

– og hvítur gafst upp. Engin vörn fyrirfinnst við hótuninni 30. Hxf4 o.s.frv.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 3. janúar 2015.

Skákþættir Morgunblaðsins

[Event "It"] [Site "Reykjavik (Iceland)"] [Date "1968.??.??"] [Round "?"] [White "Addison Wiliam G (USA)"] [Black "Kristjansson Bragi (ISL)"] [Result "0-1"] [ECO "B84"] [WhiteElo "2490"] [BlackElo "2283"] [Annotator ""] [Source ""] [Remark ""] 1.e4 c5 2.Nf3 d6 3.d4 cxd4 4.Nxd4 Nf6 5.Nc3 a6 6.Be2 e6 7.f4 Be7 8.Bf3 O-O 9.O-O Qc7 10.Kh1 Nc6 11.Nde2 b5 12.a3 Bb7 13.g4 d5 14.exd5 Rad8 15.g5 Nxd5 16.Nxd5 exd5 17.Nc3 Na5 18.f5 Nc4 19.f6 Bc5 20.fxg7 Rfe8 21.Ne2 d4 22.Bf4 Bxf3+ 23.Rxf3 Qc6 24.Ng1 Ne3 25.Qd3 Rd5 26.Re1 Bb6 27.c3 dxc3 28.Qxc3 Rc5 29.Qb3 Rf5 0-1

Skákþáttur Morgunblaðsins: Skákblinda og snilldarleikir

Magnús Carlsen er skákmaður ársins 2014. Á því er ekki hinn minnsti vafi. Hann varði heimsmeistaratitil sinn við erfiðar aðstæður í Sochi við Svartahaf og heldur titlinum næstu tvö árin. Um þessar mundir er enginn skákmaður kominn fram á sjónarsviðið sem virðist geta ógnað honum. Þessum stærsta skákviðburði ársins sem er að líða verður að einhverju leyti minnst fyrir skákblindu beggja í 6. skák einvígisins þegar Anand missti af tækifæri til að ná fram vinningsstöðu og tapaði að lokum. En þrátt fyrir allt eru þessir snillingar mannlegir og það er alls ekki óþekkt í öðrum greinum að menn sjái alls ekki það sem blasir við öllum öðrum. Hliðstætt dæmi má finna úr frægu einvígi millistríðsáranna:

Euwe – Aljekín

16. einvígissskák, 1937:

Aljekín lék síðast 25. ... Dd5-e5 og nú gat Euwe leikið 26. Dh8+! Kxh8 27. Rxf7+ og 28. Rxe5 og endataflið er afar vænlegt. En hann kaus að leika 26. Bb2? sem Aljekín svaraði með 26. ... Bc6?? og enn gat Euwe leikið 27. Dh8+! og fengið auðunnið endatafl tveim peðum yfir. En hann valdi 27. a3??, fékk ekki annað tækifæri og skákinni lauk með jafntefli.

 

 

Saga heimsmeistaraeinvígjanna frá því fyrsta opinbera sem háð var árið 1886 sýnir hinsvegar fram á svo ekki verður um villst að afleikjum var yfirleitt refsað grimmilega:

Karpov – Kortsnoj

17. einvígisskák, 1978:

Kortsnoj var í miklu tímahraki, sá að hann yrði að hindra mát í borði og lék 39. Ha1?? og Karpov svaraði að bragði: 39. ... Rf3+! Eftir 40. gxf3 kemur 40. ... Hg6+ 41. Kh1 Rf2 mát! Kortsnoj gafst því upp.

 

 

 

 

Greinarhöfundur telur sig hafa nokkuð góða yfirsýn yfir opinberu heimsmeistaraeinvígin frá 1886-2014. Þau eru 40 talsins ef tímabilinu 1993-2005 er sleppt. Öll viðleitni til að velja besta leik þessara einvígja snýst auðvitað um persónulegan smekk. Þar sem einvígið 1972 stendur Íslendingum nálægt er ekki úr vegi að velja besta leik sigurvegarans í öllum 20 skákunum:

Fischer – Spasskí,

10. einvígisskák, 1972

Fischer lék nú 26. Bb3! Eftir 26. ... axb5 27. Df4! sáu menn að 27. ... c4 er svarað með 28. Bxc4! Eftir 27. ... Hd7 28. Re5! Dc7 29. Hbd1! átti Spasskí í vök að verjast og tapaði eftir 56. leiki.

 

 

 

 

Besti biðleikur heimsmeistaraeinvígjanna kom að mati greinarhöfundar í þessari stöðu:

Kasparov – Karpov

21. skák, 1986

Í stað þess að valda d4-peðið stakk Kasparov 41. Rd7! í umslagið. Í ljós kom að staða svarts var algerlega vonlaus eftir þennan óvænta leik og skákinni lauk snarlega: 41. ... Hxd4 42. Rf8+! Kh6 43. Hb4! Hc4 44. Hxc4 dxc4 45. Dd6! c3 46. Dd4 – og Karpov gafst upp.

 

 

 

Ég hallast að því að Armeninn Tigran Petrosjan hafi leikið besta leik allra heimsmeistaraeinvígjanna í þessari stöðu:

Petrosjan – Spasskí

12. einvígisskák, 1966:

Petrosjan lék nú 31. Rf3!! en eftir 31. ... exd3 (ekki 31. ... exf3 32. Bd2! og 33. Bc3) missti hann af 32. Dxd3! Bf5 33. Rxe5 Bxd3 34. Bd4! sem leiðir til vinningsstöðu með „svikamylluþema“ eftir 34. ... dxe5 35. Bxe5+ Kh7 36. Hg7+ Kh8 37. Hxc7+ Kg8 38. Hg7+ Kh8 39. Hxa7+ Kg8 40. Hg7+ Kh8 41. Hg3+ Kh7 42. Hxd3 Hxa2 43. Kg2! og vinnur. Síðar brast Petrosjan kjark til að tefla vænlega stöðu til vinnings og sætti sig við jafntefli.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 27. desember 2014

Skákþættir Morgunblaðsins

Skákþáttur Morgunblaðsins: Þrjú skemmtileg mót

Guðlaug Þorsteinsdóttir sigraði á vel sóttu Skákþingi Garðabæjar sem lauk um mánaðamótin nóv./des. Þetta mót dró til sín marga af yngstu og efnilegustu skákmönnum höfuðborgarsvæðisins. Þegar tími hefur gefist í annasömu læknisstarfi hefur Guðlaug stundum tekið góða spretti á skákborðinu og er aldrei að vita nema hún gefi kost á sér í verkefni kvennalandsliðsins á næsta ári. Hún hlaut 5 ½ vinning af sjö mögulegum, tapaði í fyrstu umferð fyrir Birni Hólm Birkissyni en var óstöðvandi eftir það. Bárður Örn Birkisson og Páll Sigurðsson urðu í 2.-3. sæti með 5 vinninga. Í b-flokki mótsins sigraði Þorsteinn Magnússon, hlaut 6 vinninga af sjö mögulegum en í 2.-3. sæti komu tveir ungir skákmenn, Guðmundur Agnar Bragason og Robert Luu með 5 ½ vinning hvor.

Vetrarmóti öðlinga, skemmtilegri keppni sem hinn kunni skákdómari Ólafur Ásgrímsson á mestan heiður af, lauk svo um svipað leyti í húsakynnum Taflfélags Reykjavíkur við Faxafen. Þar urðu jafnir og efstir þeir Magnús Pálmi Örnólfsson og Þorvarður Ólafsson, hlutu báðir 6 vinninga af sjö mögulegum en Magnúsi var dæmdur sigur á stigum. Keppendur voru 25 talsins og má geta þess að í 3.-4. sæti varð Guðmundur Aronsson, stigalaus skákmaður sem ekki hefur teflt á opinberu móti í meira en 40 ár. 

Óvæntur sigurvegari á Meistaramóti SSON

Sigurvegari Meistaramóts SSON, Skáksambands Selfoss og nágrennis, sem fram fór í Fischer-setrinu á Selfossi, kom úr óvænri átt. Þar voru keppendur átta talsins og tefldu allir við alla með klst. umhugsunartíma á skák. Ýmsum lék forvitni á að vita hvernig stæði á ferðum og þátttöku liðlega þrítugs Bandaríkjamanns, Noah Siegel, sem hafði nokkurra vikna dvöl í grennd við Selfoss í haust. Hann hélt sig þar að mestu til hlés, stundaði jóga hjá Dagmar Unu Ólafsdóttur og bar ýmis merki þess að hann væri að flýja skarkala New York-borgar en þaðan er hann. Við eftirgrennslan kom svo í ljós að hér var á ferðinni gömul vonarstjarna Bandaríkjamanna á skáksviðinu. Hann hafði fyrir u.þ.b. 20 árum teflt fyrir hönd Bandaríkjanna á heimsmeistaramótum barna og unglinga, 12 ára og yngri og 14 ára og yngri, og kljáðst þar við ungstirni á borð við Armenann Levon Aronjan og Rússann Alexander Grischuk; lagt síðar út á brautir veðmála og fjárhættuspila og við pókerborðið atti hann kappi við ýmsa nafntogaða einstaklinga og rakaði saman fé svo af hlutust blaðaskrif og réttarhöld – því að víða eru settar hömlur á fjárhættuspil í Bandaríkjunum. 

Í Fischer-setrinu kom Noah Siegel mönnum fyrir sjónir sem dagfarsprúður og þægilegur einstaklingur. Og ekki kunnu keppendur því illa þegar tvær vel klæddar vinkonur hans, starfandi fyrirsætur frá New York, skruppu yfir hafið til heilsa upp á vin sinn og sátu í mestu rólegheitum yfir skákum hans í Fischer-setrinu. Keppinautar hans stóðust honum ekki snúning að þessu sinni – kappinn hefur lofað að koma aftur – og voru þó á ferðinni býsna öflugir meistarar. Noah Siegel hlaut 6 ½ vinning af sjö mögulegum en í 2.- 3. sæti komu Sverrir Unnarsson og Ingimundur Sigurmundsson með 4 ½ vinning. Þeir tefldu svo tveggja skáka einvígi um sæmdarheitið Skákmeistari SSON og vann Sverrir, 1 ½ : ½.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 20. desember 2014

Skákþættir Morgunblaðsins

Skákþáttur Morgunblaðsins: Peðsfórnin

Pawn sacrifice“ er nafn á kvikmynd sem frumsýnd var á kvikmyndahátíðinni í Toronto í Kanada á dögunum. Myndin fjallar um einvígi Fischers og Spasskís í Reykjavík árið 1972 eða „einvígi aldarinnar“ eins og það hefur löngum verið kallað. Myndin var að hluta til tekin upp hér á landi og einnig í Montreal og Los Angeles. Hún skartar stjörnum á borð við Tobey Maguire (Spiderman, The Great Gatsby) sem leikur Bobby Fischer og Liv Schreiber (Ray Donavan ) sem leikur Boris Spasskí. Leikstjóri myndarinnar er Edward Zwick sem áður hefur leikstýrt myndum á borð við Legends of the Fall, The Last Samurai og Blood Diamonds.

Leikstjórinn stillir viðfangsefni sínu upp eins og hann væri að fjalla um kapphlaup Roalds Amundsen og Roberts Falcons Scotts á suðurpólinn 1911-'12; hinum harmræna þætti leiðangurs Scotts, sem fraus í hel í tjaldi á leiðinni til baka 20 kílómetra frá birgðastöð, svipar þannig til skipbrots Spasskís sem líkt og Scott var samkvæmt skýringu sagnfræðinnar fulltrúi hnignandi stórveldis.

Liv Schreiber hafði orð á því, að þegar hann var að undirbúa sig fyrir hlutverk Spasskís, hefði það augnablik einvígisins er Spasskí klappaði fyrir Fischer með áhorfendum eftir sjöttu einvígisskákina haft einna mest áhrif á sig. En ef velja á eina skák einvígisins þar sem allt dramað virðist koma saman þá hlýtur það að vera þrettánda skákin. Skákin hófst kl. 17 fimmtudaginn 10. ágúst, fór í bið um 5 klst. síðar og lauk seint að kveldi föstudaginn 11. ágúst. 

Spasskí – Fischer; 13. skák

Eftir að Spasskí, sem átti í vök að verjast, lék biðleik sinn, 42. Kg3, voru allir kraftar sovéska fylgdarliðsins þandir til hins ýtrasta við sundurgreiningu á biðstöðunni – og svipað var upp á teningnum í bandarísku herbúðunum. Lubomir Kavalek, landflótta Tékki búsettur í Bandaríkjunum, var í Reykjavík og mætti upp á herbergi 470 á Loftleiðahótelinu til að aðstoða Fischer. Þar var fyrir kvefaður séra Lombardy en Bobby rak hann út: „...Bill, þú veist að ég hef ekki efni því að fá kvef akkúrat núna.“

Þegar þeir tóku til við taflið aftur klukkan 17 föstudaginn 11. ágúst gerðust myndirnar á skákborðinu æ skrítnari og allt að því fjarstæðukenndar, a.m.k. hafði ekkert þessu líkt sést í heimsmeistareinvígi áður: 

Spasskí – Fischer; 13. einvígisskák

Staðan eftir 68 leiki – tímamörk við 72. leik.

69. Hd1+??

Spasskí hafði barist hetjulega en var tímanaumur og missti af jafntefli sem var að hafa með 69. Hc3+! Kd4 70. Hf3 Ke4 71. Hc3 os.frv.

Ke2 70. Hc1 f3 71. Bc5 Hxg7 72. Hxc4 Hd7 73. He4+ Kf1 74. Bd4 f2

- og Spasskí gafst upp.

Þegar skákinni lauk ríkti sérkennileg þögn í salnum. Það var eins og einhver hefði dáið. Fischer var fljótur að yfirgefa sviðið en Spasskí sat eftir dágóða stund og spurði dómarann Lothar Schmid í lágum hljóðum: „Hvernig getur maður tapað svona stöðu með hrókinn á g8 gersamlega lokaðan af?“

Það voru þung spor fyrir marga aðdáendur Spasskís út úr Laugardalshöllinni. Kannski væri hægt að „...skella bjargráðinu og sáluhjálpinni: Bach,“ skrifaði Thor Vilhjálmson sem hafði gengið fjaðurmögnuðum skrefum yfir dalinn til að sjá þessa „...menn skylmast með vopnum þekkingar, rökvísi og röktempraðrar dirfsku“

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 13. desember 2014

Skákþættir Morgunblaðsins

[Event "Reykjavik"] [Site "m"] [Date "1972.08.10"] [EventDate "?"] [Round "13"] [Result "0-1"] [White "Boris Spassky"] [Black "Robert James Fischer"] [ECO "B04"] [WhiteElo "?"] [BlackElo "?"] [PlyCount "148"] 1. e4 Nf6 2. e5 Nd5 3. d4 d6 4. Nf3 g6 5. Bc4 Nb6 6. Bb3 Bg7 7. Nbd2 O-O 8. h3 a5 9. a4 dxe5 10. dxe5 Na6 11. O-O Nc5 12. Qe2 Qe8 13. Ne4 Nbxa4 14. Bxa4 Nxa4 15. Re1 Nb6 16. Bd2 a4 17. Bg5 h6 18. Bh4 Bf5 19. g4 Be6 20. Nd4 Bc4 21. Qd2 Qd7 22. Rad1 Rfe8 23. f4 Bd5 24. Nc5 Qc8 25. Qc3 e6 26. Kh2 Nd7 27. Nd3 c5 28. Nb5 Qc6 29. Nd6 Qxd6 30. exd6 Bxc3 31. bxc3 f6 32. g5 hxg5 33. fxg5 f5 34. Bg3 Kf7 35. Ne5+ Nxe5 36. Bxe5 b5 37. Rf1 Rh8 38. Bf6 a3 39. Rf4 a2 40. c4 Bxc4 41. d7 Bd5 42. Kg3 Ra3+ 43. c3 Rha8 44. Rh4 e5 45. Rh7+ Ke6 46. Re7+ Kd6 47. Rxe5 Rxc3+ 48. Kf2 Rc2+ 49. Ke1 Kxd7 50. Rexd5+ Kc6 51. Rd6+ Kb7 52. Rd7+ Ka6 53. R7d2 Rxd2 54. Kxd2 b4 55. h4 Kb5 56. h5 c4 57. Ra1 gxh5 58. g6 h4 59. g7 h3 60. Be7 Rg8 61. Bf8 h2 62. Kc2 Kc6 63. Rd1 b3+ 64. Kc3 h1=Q 65. Rxh1 Kd5 66. Kb2 f4 67. Rd1+ Ke4 68. Rc1 Kd3 69. Rd1+ Ke2 70. Rc1 f3 71. Bc5 Rxg7 72. Rxc4 Rd7 73. Re4+ Kf1 74. Bd4 f2 0-1

Skákþáttur Morgunblaðsins: Leitin að áskoranda Magnúsar Carlsen er hafin

Heimsmeistaranum Magnúsi Carlsen var vel fagnað þegar hann sneri aftur til Noregs eftir að hafa tekið við sigurlaunum sínum að viðstöddum Vladimir Putin, forseta Rússlands. Þann 24. nóvember hélt hann svo upp á 24 ára afmælið og liður í afmælisfagnaðinum var þriggja tíma dagskrá hjá NRK, norska sjónvarpinu, en meðal efnis var skák hans við norsku þjóðina sem lauk með því að Magnús gerði landa sína mát í 33. leik. Með tilstilli „skák-apps“ gat þessi skák farið nokkurn veginn snurðulaust fram. Í stúdói NRK sátu foreldrar Magnúsar og systurnar þrjár: Signý, Ellen og Ingiríður en tvær þær síðastnefndu eru ágætar skákkonur.

Í miðri þessari fagnaðarbylgju frænda okkar stendur yfir leitin að næsta áskoranda Magnúsar – og er reyndar hafin fyrir nokkru. Fyrir liggur að Magnús mun freista þess að verja titilinn haustið 2016 og einvígið fer fram í Bandaríkjunum, ef marka má ummæli Kirsan, forseta FIDE.

Undanfarin ár hefur athyglin beinst mjög að Ítalanum Fabiano Caruana sem vann stórmótið í St. Louis með miklum yfirburðum.

En ýmsir aðrir hafa verið nefndir til sögunnar. Á geysiöflugu skákmóti sem stendur yfir í Qatar gerði Hollendingurinn Anish Giri sér lítið fyrir og vann sex fyrstu skákir sínar. Giri stendur á tvítugu en hefur þrátt fyrir ungan aldur verið öflugasti skákmaður Hollendinga um nokkurra ára skeið. Fæddur í Sankti Pétursborg, móðirin rússnesk og faðirinn frá Nepal en fjölskyldan flutti til Hollands frá Sapporo í Japan árið 2008. Giri þótti snemma efnilegt barn; hann talar reiprennandi sex tungumál þ. á m. rússnesku, japönsku og nepölsku og er líkt og Magnús sterkur í tæknilegum þætti skákarinnar. Tekið var eftir því er hann lagði Magnús að velli í aðeins 22 leikjum með svörtu í Wijk aan Zee árið 2011. En kannski vantar eitthvað uppá staðfestuna; eftir sigrana sex í Qatar tapaði hann fyrir Kramnik í sjöundu umferð og aftur í 8. umferð fyrir Kínverjanum Yangyi Yu. Það gerði Kramnik kleift að komast einn í efsta sætið.

Meðan á sigurhrinunni stóð héldu Giri engin bönd og hann vann skákir sínar án þess að hafa nokkuð fyrir því, sbr. viðureign hans við Azerann Mamedyarov:

Shkariyar Mamedyarov – Anish Giri

Enskur leikur

1. c4 Rf6 2. Rc3 e5 3. g3 Bb4 4. Bg2 O-O 5. e4 Bxc3 6. bxc3

Traustara er sennilega 6. dxc3. Afbrigðið sem Mamedyarov velur þykir ekki gefa mikla möguleika fyrir hvítan.

6. ... He8 7. d3 c6 8. Re2 d5 9. cxd5 cxd5 10. exd5 Rxd5 11. Hb1 Rc6 12. O-O Bg4!

Góður staður fyrir biskupinn er einnig á f5, svartur getur alltaf skilið b7-peðið eftir þar sem –Hxb7 má svara með – Rb6 og hrókurinn lokast úti á b7.

13. f3 Bf5 14. Hxb7?!

Fífldjarfur leikur sem virðist vera byggður á illa grunduðum útreikningum.

14. ...Rb6 15. f4 e4!

Mamedyarov hafði vonast eftir 15. ... Dc8 sem hægt er að svara með 16. fxe5! Dxb7 17. Hxf5 með rífandi spili fyrir skiptamun.

16. Db3?

Hér varð hann að leika 16. dxe4.

16. ... Be6! 17. Db5 exd3 18. Hxb6

Örvænting en 18. Bxc6 strandar á 18. ... Bc4! o.s.frv.

18. ... dxe2 19. He1

19.... Bc4! 20. Dxc6

Eða 20. Dxc4 Dxb6+ 21. Kh1 Df2! og vinnur.

20. ... Dd1! 21. Kf2 Had8

– og hvítur gafst upp. Það er engin vörn til gegn hótuninni 22. .... Dxd1+ 23. Kxd1 Hd1+ og 24. e1(D)+ með mátsókn.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 6. desember 2014

Skákþættir Morgunblaðsins

[Event "Qatar Masters"] [Site "Doha QAT"] [Date "2014.11.30"] [EventDate "2014.11.26"] [Round "5.1"] [Result "0-1"] [White "Shakhriyar Mamedyarov"] [Black "Anish Giri"] [ECO "A22"] [WhiteElo "2757"] [BlackElo "2776"] [PlyCount "42"] 1. c4 Nf6 2. Nc3 e5 3. g3 Bb4 4. Bg2 O-O 5. e4 Bxc3 6. bxc3 Re8 7. d3 c6 8. Ne2 d5 9. cxd5 cxd5 10. exd5 Nxd5 11. Rb1 Nc6 12. O-O Bg4 13. f3 Bf5 14. Rxb7 Nb6 15. f4 e4 16. Qb3 Be6 17. Qb5 exd3 18. Rxb6 dxe2 19. Re1 Bc4 20. Qxc6 Qd1 21. Kf2 Rad8 0-1

Skákþáttur Morgunblaðsins: Davíð Kjartansson sigraði á Haustmóti TR

Haustmót Taflfélags Reykjkavíkur hefur löngum verið eitt af best skipuðu reglulegu mótum hérlendis og er þá átt við mót með fullum umhugsunartíma en minna framboð er af slíkum mótum nú en oft áður. Gamla góða kappskákin stendur alltaf fyrir sínu og vonandi heldur TR áfram að halda haustmótið og Skákþing Reykjavíkur með hefðbundnum hætti. Haustmóti TR lauk ekki alls fyrir löngu með öruggum sigri Davíð Kjartanssonarsem hlaut 7 vinninga af níu mögulegum í vel skipuðum A-flokki mótsins. Þar sem Davíð er ekki félagsmaður í TR gengur sæmdarheitið „Skákmeistari TR 2014“ til Þorvarðar Ólafssonar sem varð í 2. – 3. sæti ásamt Þorsteini Þorsteinssyni, gömlum TR-ingi sem undanfarið hefur teflt fyrir Taflfélag Vestmannaeyja. Þeir hlutu báðir 6 vinninga af níu mögulegum.

Í B-flokki sigraði Spánverjinn Damia Benet Menet með 7 vinninga af níu mögulegum og í C-riðli var Bárður Örn Birkisson hlutskarpastur með 8 vinninga af níu mögulegum. Í D-riðli gerði Ólafur Evert Úlfsson sér lítið fyrir og vann allar skákir sínar níu talsins og varð langefstur.

Davíð Kjartansson hefur lengi verið í fremstu röð íslenskra skákmanna. Hann vann Skákþing Reykjavíkur 2009 fyrir ofan Henrik Danielssen og aftur þetta sama mót 2013 og hefur vart tölu á sigrum sínum á haustmóti TR eða á meistaramóti Hellis þar sem hann var lengstum félagi. Hann varð tvisvar Norðurlandameistari unglinga í sínum aldursflokki og Íslandsmeistari skáksveita með Víkingasveitinni og Helli. Þá hefur Davíð getið sér gott orð sem skákkennari en starfar nú sem hótelstjóri á ION luxury Adventury hotel að Nesjavöllum. Hann hefur býsna frumlega skákstíl og er ekki mikið fyrir að fara troðnar slóðir.

Um helstu keppinautar hans þá Þorvarð Ólafsson og Þorstein Þorsteinsson er það segja áttu báðir gott mót en þó var sigur Davíðs einhvern veginn aldrei í hættu. Í einni að lokaumferðunum mætti hann reynsluboltanum Sævari Bjarnasyni og hafði betur:

Haustmóti TR 2014; 7. umferð:

Sævar Bjarnason – Davíð Kjartansson

Kóngsindversk vörn

1. d4 d6 2. e4 Rf6 3. f3 g6 4. c4 Bg7 5. Rc3 O-O 6. Be3 a5!?

Frekar óvenjulegur leikur, svartur byggir taflið oftar upp með 6. .. a6, – Hb8 o.s.frv.

7. Dd2 Rc6 8. Rge2 e5 9. d5 Rb4 10. Rc1 Rd7 11. a3 Ra6 12. b4 f5 13. Bd3 Rf6 14. exf5?!

Ekkert lá á þessum uppskiptun. Eftir 14. Rb3, sem hótar 15. b5, á hvítur góða stöðu.

14. ... gxf5 15. Hb1 axb4 16. axb4 e4!

Setur af stað hrinu snarpra peðsleikja sem tryggja frumkvæði svarts.

17. Be2 exf3 18. gxf3 f4!19. Bf2 Bf5 20. Hb3 Rd7 21. Rb5 Re5 22. Rd4 Bd7 23. Re6?

Ótímabær innrás riddarans. Hvítur gat leikið 23. O-O en hefr sennilega óttast 23. ... Bh3 sem má svara með 24. Kh1 Bxf1 25. Bxf1 og þó hvítur sé skiptamun undir er staðan býsna vænleg, öflugur riddari á leið til e6.

23. ... Bxe6 24. dxe6 De7 25. O-O Kh8 26. Kh1 Dxe6 27. Dc2 Rb8 28. De4 c6 29. Bd3 Dh3 30. Bd4 Rbd7 31. De2 Hae8 32. Hg1 Rf6 33. Bb1 Rh5 34. Bf2 Bf6

Bætir sífellt við sóknarmáttinn kóngsmegin.

35. Dc2 Hf7 36. Hg2 Hg8 37. Hxg8 Kxg8 38. De2 Hg7 39. Be1

Þessi biskup reynir að fremsta megni að verja kógsstyðuna en með næsta leik sínum ryður svartur honum úr vegi.

39. ... Bh4! 40. Hb2 Bxe1

- og Sævar gafst upp enda staðan hrunin.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 29. nóvember 2014

Skákþættir Morgunblaðsins

Skákþáttur Morgunblaðsins: Magnús vann lokaskákina og heldur heimsmeistaratitlinum næstu tvö árin

Skákþáttur Morgunblaðsins frá 24. nóvember sl.

---------------------------------------------

Taugar hans stóðust álagið betur,“ sagði Wisvanathan Anand eftir að elleftu skák heimsmeistaraeinvígisins í Sochi lauk með sigri Magnúsar Carlsen í 45 leikjum sem þar með hafði hlotið 6½ vinning gegn 4½ og þarf því ekki að tefla 12. skák einvígisins. Þrátt fyrir ósigurinn í gær var Anand afar vel undir þessa skák búinn en í 27. leik lét hann skiptamun af hendi og reyndist það afar misráðin ákvörðun þó að á yfirborðinu liti fórnin vel út. Á því augnabliki skákarinnar höfðu áhangendur Magnúsar miklar áhyggjur af stöðu hans en hann greip tækifærið sem Anand rétti honum og tefldi framhaldið óaðfinnanlega og knúði fram sigur með hárnákvæmum leikjum. Hann getur nú andað léttar því að alþjóðaskáksambandið FIDE gerir ráð fyrir að næsta heimsmeistaraeinvígi fari fram eftir tvö ár. Hverfandi líkur eru taldar á því að Anand verði næsti áskorandi hans en Indverjinn svaraði þó spurningum fréttamanna eftir skákina í gær á þá leið að hann væri alls ekki hættur. Athyglin beinist nú að Ítalanum Fabiano Caruano sem fyrir nokkrum vikum vann öflugt skákmót í Saint Louis í Bandaríkjunum með fáheyrðum yfirburðum.

Í samanburði við sum önnur heimsmeistaraeinvígi telst þetta einvígi í besta falli miðlungi gott, kannski vegna þess hversu stutt það er. Það er einfaldlega söguleg staðreynd að þau heimsmeistaraeinvígi sem samanstóðu af 24 skákum að undangengnu skipulögðu ferli svæðamóta, millisvæðamóta og áskorendaeinvígja heppnuðust yfirleitt afar vel. Keppendur gátu tekið meiri áhættu í skákum sínum og svo dæmi sé tekið þá var einvígi Fischers og Spasskís í Reykjavík 1972 sneisafullt af nýjum hugmyndum og afar flóknum stöðum svo ekki sé minnst á óvænta atburði utan skákborðsins. Magnús og Anand virtust hins vegar á stundum vera fastir í viðjum kerfisbundinna byrjana sem gáfu hugmyndafluginu ekki mikið pláss.

Engum dylst að Magnús er verðugur heimsmeistari þótt hann hafi ekki náð sínu besta fram í einvíginu í Sochi. Og miklar breytingar hafa orðið á högum hans frá því hann kom hingað til Íslands í fyrsta sinn fyrir röskum tíu árum. Þá var hann tiltölulega lítt þekktur í heimalandi sínu en skákir sem hann tefldi við Anatolí Karpov og Garrí Kasparov á Reykjavík rapid-mótinu í mars 2004 breyttu því. Nú er hann þjóðhetja í Noregi og skákir hans eru í beinni útsendingu í sjónvarpi og á netmiðlum. Um það leyti ákváðu foreldrar hans að leggja niður störf, selja bæði hús og bíl og fjölskyldan ferðaðist síðan víða um lönd til að styðja Magnús á framabraut skákarinnar. Hann þótti lengi vel feiminn og óframfærinn og var af sumum talinn einhverfur en sá orðrómur var úr lausu lofti gripinn. Skákhæfni hans byggist á mögnuðu innsæi, bestu leikirnir virðast „koma til hans“ alveg áreynslulaust og lok elleftu skákarinnar í gær eru gott dæmi um það:

11. einvígisskák:

Magnús Carlsen – Wisvanathan Anand

Spænskur leikur

1. e4 e5 2. Rf3 Rc6 3. Bb5 Rf6 4. 0-0 Rxe4 5. d4 Rd6 6. Bxc6 dxc6 7. dxe5 Rf5 8. Dxd8+ Kxd8 9. h3 Bd7 10. Rc3 h6 11. b3 Kc8 12. Bb2 c5 13. Had1 b6 14. Hfe1 Be6 15. Rd5

Magnús eftir lét Anand að tefla Berlínarvörnina í þriðja sinn í einvíginu. Sú leið að leika riddaranum til d5 virðist ógnandi en veldur svarti engum sérstökum erfiðleikum.

15.... g5 16. c4 Kb7 17. Kh2 a5 18. a4 Re7 19. g4 Rg6 20. Kg3 Be7 21. Rd2 Hhd8 22. Re4 Bf8 23. Ref6 b5!

Magnaður leikur sem almennt var talinn uppfinning „tölvuheila“. Magnus vék sér undan því að taka þeirri áskorun sem í leiknum fólst, t.d. 24. axb5 a4! með sterkri gagnsókn.

24. Bc3 bxa4 25. bxa4 Kc6 26. Kf3 Hdb8

Undirbýr að fórna skiptamun. Svartur gat tryggt sér góða stöðu með 26.... Be7 eða 26.... Bg7.

27. Ke4

27.... Hb4?

Tapleikurinn. Magnús var greinilega undir þessa fórn búinn. Betra var 27.... b3 og staðan er í jafnvægi.

28. Bxb4 cxb4 29. Rh5 Kb7 30. f4 gxf4 31. Rhxf4 Rxf4 32. Rxf4!

Mun sterkara en 32. Kxf4 c6! 33. Re3 Kb6 og svartur má vel við una.

32.... Bxc4 33. Hd7!

Eftir þetta verður stöðu svarts ekki bjargað.

33.... Ha6 34. Rd5 Hc6 35. Hxf7 Bc5 36. Hxc7+! Hxc7 37. Rxc7 Kc6.

(Ekki gekk 37.... Kxc7 vegna 39. Hc1! t.d. 39.... b3 40. Hxc4 b3 41. Hxc5+ ásamt 42. Hb5 og vinnur b-peðið.

38. Rb5! Bxb5 39. axb5 Kxb5 40. e6 b3 41. Kd3 Be7 42. h4 a4 43. g5 hxg5 44. hxg5 a3 45. Kc3

– og þetta var síðasti leikur heimsmeistaraeinvígisins. Svörtu peðin komast ekki lengra og Anand gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 24. nóvember 2014

Skákþættir Morgunblaðsins

Skákþáttur Morgunblaðsins: Tvær skákir eftir - Magnús heldur enn vinningsforskoti

Skákþáttur Morgunblaðsins frá 22. nóvember sl.

---------------------------------------------

Eftir jafntefli í níundu og tíundu skák einvígis Magnúsar Carlsen og Wisvanathan Anand heldur Norðmaðurinn enn vinningsforskoti, 5½ : 4½ og gæti með sigri í elleftu skákinni sem tefld verður á morgun útkljáð einvígið. En þær tvær viðureignir sem eftir eru bjóða upp á magnþrungna spennu og sennilega liggur helsta von Anands í því að flækja taflið með svörtu á morgun og freista þess að ná sigri jafnvel þó slíkri hernaðartaktík fylgi áhætta. Komist hann hjá tapi eða vinni heldur hann enn í vonina um að endurheimta heimsmeistaratitilinn þar sem hann hefur hvítt í tólftu skákinni sem er á dagskrá nk. þriðjudag.

En hvorki Anand né Magnús virðast hafa náð áttum efir hina dramatísku viðureign sjöttu umferðar þar sem Anand missti af frábæru tækifæri í miðtaflinu og tapaði. Magnús lýsti því yfir í vikunni að hann væri ekki „í formi“ og áhangendur hans og aðdáendur í Noregi komust raunar að því fullkeyptu þegar höfgi seig á kappann í miðri áttundu skák og dottaði hann um skeið á meðan Anand hugsaði sinn gang í krítískri stöðu. Í níundu skák einvígisins féllu leikir þannig:

Magnús Carlsen – Wisvanathan Anand

Spænskur leikur

1. e4 e5 2. Rf3 Rc6 3. Bb5 Rf6 4. O-O Rxe4 5. d4 Rd6 6. Bxc6 dxc6 7. dxe5 Rf5 8. Dxd8+ Kxd8 9. h3 Ke8 10. Rc3 h5 11. Re2 b6 12. Hd1 Ba6 13. Rf4 Bb7

Allt frá því að Vladimir Kramnik datt það snjallræði í huga að tefla Berlínarvörnina sem kemur upp úr spænska leiknum gegn Kasparov i HM-einvígi þeirra árið 2000 hefur fremstu skákmönnum reynst erfitt að brjóta niður þennan múr. Magnús gerði enga tilraun til þess að þessu sinni og sætti sig við jafntefli með þráskák:

14. e6!?

Bd6! 15. exf7+ Kxf7 16. Rg5+ Kf6 17. Re4+ Kf7 18. Rg5+ Kf6 19. Re4+ Kf7 20. Rg5+

- Jafntefli.

Sagt er að eftir að níundu skákinni lauk hafi Magnús hóað á vini sína og þeir fóru beinustu leið út á körfuboltavöll og léku þar dágóða stund. Í gær fékk Anand svo aftur tækifæri með hvítu. Nú tóku þeir til við að „ræða“ byrjun sem ekki hefur sést síðan í fyrstu skák einvígsins:

10. einvígisskák:

Wisvanathan Anand – Magnús Carlsen

Grünfelds vörn

1. d4 Rf6 2. c4 g6 3. Rc3 d5 4. Rf3 Bg7 5. Db3 dxc4 6. Dxc4 O-O 7. e4 Ra6

Botvinnik-afbrigðið kom fyrst fyrir í heimsmeistaraeinvígi þegar „patríarkinn“ sem svo var nefndur tefldi einvígi sín þrjú við Smyslov á sjötta áratug síðustu aldar. Sjöundi leikur svarts er runninn unda rifjum Hollendingsins Prins en Kasparov lagði mest til þessa afbrigðis í einvígjum sínum við Karpov 1986 og '87.

8. Be2 c5 9. d5 e6 10. O-O exd5 11. exd5 He8

Kasparov lék oftast 11. ... Bf5 en þessi leikur er ekki síður frambærilegur.

12. Bg5 h6 13. Be3 Bf5 14. Had1 Re4!? 15. Rxe4 Bxe4 16. Dc1!

Hér virðist vera komin fram hugmynd Anands með því að fá fram 12. ... h6; að vinna tempó með því að setja á h6-peðið. En Magnús kann að svara fyrir sig.

16. ... Df6 17. Bxh6 Dxb2 18. Dxb2 Bxb2 19. Rg5 Bd4!

Snarplega leikið og eina leiðin til að halda stöðunni saman.

20. Rxe4 Hxe4 21. Bf3 He7 22. d6 Hd7 23. Bf4 Rb4 24. Hd2 He8 25. Hc1 He6

26. h4 Be5 27. Bxe5 Hxe5 28. Bxb7

Smá-gletta í lokin. Anand vissi að ekki væri eftir neinu að slægjast í þessari stöðu.

28. ... Hxb7 29. d7 Rc6 30. d8=D+ Rxd8 31. Hxd8+ Kg7 32. Hd2

Jafntefli.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 22. nóvember 2014

Skákþættir Morgunblaðsins

Skákþáttur Morgunblaðsins: Magnús þokast nær titilvörn

Skákþáttur Morgunblaðsins frá 19. nóvember sl.

---------------------------------------------

Þegar átta skákum er lokið í einvígi Magnúsar Carlsen og Indverjans Wisvanathans Anands heldur Norðmaðurinn vinningsforskoti, 4 ½ : 3 ½ og aðeins fjórar skákir eftir. Í gær fékk Anand fékk loks tækifæri til að stýra hvítu mönnunum en komst ekkert áleiðis gegn Magnúsi sem mætti vel undirbúinn til leiks og náði jafntefli án mikilla erfiðleika. Á mánudaginn sátu þeir að tafli í sex og hálfa klukkustund og allan tímann reyndi Magnús að knýja fram sigur úr örlítið betri stöðu. Í endatafli varð Anand að gefa mann fyrir tvö peð en varðist fimlega og hélt jöfnu eftir 122 leiki. Þetta telst næstlengsta skák heimsmeistaraeinvígja frá upphafi en Kortsnoj og Karpov tefldu þá lengstu; 5. einvígisskákin í Baguio á Filippseyjum sumarið 1978 endaði með því að Kortsnoj pattaði Karpov í 124. leik. Í sjöundu skákinni í Sochi á mánudaginn tefldi Anand hið trausta Berlínar-afbrigði spænska leiksins. Eftir 76. leiki kom þessi staða upp: 

Magnús – Anand

Magnús heldur enn í eitt peð en eftir 76.... Hc3! sá hann fram á að ekki gengi að leika 77. Hxc3 Kxc3 78. Ke3 vegna 78.... Kb4 79. Kd4 Kb5! sem heldur jöfnu. Hann lét því b3-peðið af hendi og lék 77. Rd3+ Kxb3 78. Ha1og sættist á jafntefli 44 leikjum síðar.

Magnús var gagnrýndur fyrir að tefla svo lengi áfram með kóng, hrók og riddara gegn kóngi og hrók en slíkar stöður eru taldar dautt jafntefli. Norski heimsmeistarinn upplýsti fyrir einvígið að undirbúningur hans hefði m.a. falist í athugun á ferli Bobbys Fischers og finna má dæmi úr skákum 11. heimsmeistarans sem tefldi svipaða stöðu lengi vel gegn Florin Gheorghiu frá Rúmeníu á skákmóti í Vinkovci í Júgóslavíu árið 1968.

Hafi það verið ætlan Magnúsar að „þreyta laxinn“ tókst það vel, taflmennska Anands í skákinni í gær var fremur þróttlaus og í fyrsta sinn í einvíginu mistókst honum að ná frumkvæðinu út úr byrjuninni með hvítu:

8. einvígisskák:

Wisvanathan Anand – Magnús Carlsen

Drottningarbragð

1. d4 Rf6 2. c4 e6 3. Rf3 d5 4. Rc3 Be7 5. Bf4 O-O 6. e3 c5 7. dxc5 Bxc5 8. a3 Rc6 9. Dc2 He8!?

Leynivopn Magnúsar. Hann vissi að Anand var vel undirbúinn fyrir 9.... Da5 sem er langoftast leikið en þá á hvítur ýmsa góða kosti, t.d. að hrókera langt.

10. Bg5 Be7 11. Hd1 Da5 12. Bd3 h6 13. Bh4 dxc4 14. Bxc4 a6 15. O-O b5 16. Ba2 Bb7 17. Bb1 Had8 18. Bxf6 Bxf6 19. Re4

Ekki er eftir neinu að slægjast með 19. Dh7+ Kf8 20. Re4, m.a. vegna 20.... Hxd1 21. Hxd1 Hd8 o.s.frv.

19.... Be7 20. Rc5 Bxc5 21. Dxc5

Í fljótu bragði virðist hvítur halda góðum færum en næsti leikur svarts jafnar taflið umsvifalaust. 

21. ... b4! 22. Hc1

Eftir 22. Dxa5 Rxa5 23. axb4 Bxf3! 24. gxf3 Rc6! vinnur svartur peðið til baka.

22.... bxa3 23. bxa3 Dxc5 24. Hxc5 Re7 25. Hfc1 Hc8 26. Bd3 Hed8 27. Hxc8 Hxc8 28. Hxc8 Rxc8

Nú blasir jafntefli við.

29. Rd2 Rb6 30. Rb3 Rd7 31. Ra5 Bc8 32. Kf1 Kf8 33. Ke1 Ke7 34. Kd2 Kd6 35. Kc3 Re5 36. Be2 Kc5 37. f4 Rc6 38. Rxc6 Kxc6 39. Kd4 f6 40. e4 Kd6 41. e5+.

- og Anand bauð jafntefli um leið sem Magnús vitanlega þáði.

Staðan: Magnús Carlsen 4 ½ : Wisvanathan Anand 3 ½.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 19. nóvember 2014

Skákþættir Morgunblaðsins