Skákþáttur Morgunblaðsins: Hvar varst þú þegar MC lék 26. Kd2?

Möguleikar Magnúsar Carlsen á að verja heimsmeistaratitilinn stórjukust á laugardaginn þegar hann vann sjöttu skákina í einvíginu um heimsmeistaratitilinn. Skákin er þegar orðin fræg vegna ótrúlegrar yfirsjónar Magnúsar sem gaf Anand kost á að knýja fram auðunnið endatafl með sáraeinfaldri leikfléttu. Blaðamannafundur eftir skákina snerist eingöngu um þessa tvo afleiki og stórmeistararnir sátu fyrir svörum eins og sakborningar við réttarhöld – en gáfu báðir svipaða skýringu; Magnús kvaðst hafa séð mistökin undir eins og hann lék 26. Kd2 og Anand, sem lék 26.... a4 þegar í stað, sá einnig um leið að tækifæri til að vinna skákina og ná forystu í einvíginu hafði þá gengið honum úr greipum. Einn skákskýrandi, rússneski stórmeistarinn Peter Svidler, taldi líklegt að erfitt myndi reynast fyrir Anand að losa sig við stöðuna eftir 26. Kd2 úr kollinum og viðmælandi hans, Vladimir Kramnik, tók í sama streng.

Samfélagsmiðlar loguðu þegar Magnús var sleginn þessari skákblindu og eitt skemmtilegasta „tístið“ kom frá einum landa hans sem kvaðst ætla að panta nokkra boli með áletruninni : „Hvar varst þú þegar MC lék 26. Kd2?“

Garrí Kasparov taldi að þarna hefðu sést einhverjir mestu afleikir í sögu heimsmeistaraeinvígja og vissulega er hægt að rifja upp nokkra slíka, úr 11. skák hans við Karpov 1985, 14. skák Fischers og Spasskís 1992, 9. skák Tals og Botvinniks 1960, 6. skák Bronsteins og Botvinniks 1951, 57. Kc2 og þannig mætti lengi telja. En munurinn er þó sá að í þessum tilvikum lét refsingin ekki á sér standa, slagkraftur bestu skákmanna heims lét ekki að sér hæða en að Anand skuli hafa misst af 26.... Rxe5 er til vitnis um þá gríðarlegu taugaspennu sem fylgir einvíginu. Magnús kvaðst hafa verið undir áhrifum þessarar yfirsjónar lengi vel meðan á skákinni stóð og ekki teflt sem best. Anand taldi líklegt að vitneskjan um afleikinn hefði truflað sig mikið og hann tók nokkrar kolrangar ákvarðanir í teflanlegri stöðu og tapaði í aðeins 38 leikjum:

6. einvígisskák:

Magnús Carlsen – Wisvanathan Anand

Sikileyjarvörn

1. e4 c5 2. Rf3 e6 3. d4 cxd4 4. Rxd4 a6 5. c4 Rf6 6. Rc3 Bb4 7. Dd3!?

Leynivopn Magnúsar sem ákvað að láta reyna á hæfni sína í opnu Sikileyjarvörninni. Algengara er 7. e5 Re4 8. Dg4 með flókinni stöðu.

7. ... Rc6 8. Rxc6 dxc6 9. Dxd8+ Kxd8 10. e5 Rd7 11. Bf4 Bxc3+ 12. bxc3 Kc7 13. h4 b6 14. h5 h6 15. O-O-O Bb7 16. Hd3 c5 17. Hg3 Hag8 18. Bd3 Rf8 19. Be3 g6 20. hxg6 Rxg6 21. Hh5 Bc6 22. Bc2 Kb7 23. Hg4 a5 24. Bd1 Hd8 25. Bc2 Hdg8

Hvítur er búinn að byggja þunga pressu en góð áætlun til að þróa stöðuna liggur ekki á lausu, 26. Kd1 má svara með 26.... Re7 og Magnús þekkir manna best mikilvægi virkrar stöðu kóngsins í endatafli og lék:

26. Kd2??

Hér kemur afleikurinn. Magnús var skelfingu lostinn þegar hann sleppti kónginum en lét á engu bera.

26.... a4??

„Ég átti ekki von á neinum gjöfum,“ sagði Anand eftir skákina. En hann lék of hratt. Svarta staðan er auðunnin eftir 26.... Rxe5! 27. Hxg8 Rxc4+ 28. Kd3 Rb2+! 29. Ke2 Hxg8 o.s.frv.

27. Ke2 a3 28. f3 Hd8? 29. Ke1 Hd7 30. Bc1 Ha8 31. Ke2 Ba4 32. Be4+ Bc6

Það er erfitt að skýra þá ákvörðun Anands að láta liðsaflann á kóngsvæng lönd og leið með öðru en að vísa í bjánahrollinn sem hlýtur að hafa gripið hann eftir 26. leikinn.

33. Bxg6 fxg6 34. Hxg6 Ba4 35. Hxe6 Hd1 36. Bxa3 Ha1 37. Ke3 Bc2 38. He7+

- og Anand gafst upp, 38.... Kc8 39. Hxh6 hótar máti borðinu og 38.... Ka6 39. Hxh6 hótar 40. Bxc5.

Staðan: Magnús Carlsen 3 ½ : Wisvanathan Anand 2 ½. 

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 17. nóvember

Skákþættir Morgunblaðsins

Skákþáttur Morgunblaðsins: Magnús lætur sverfa til stáls í næstu tveim skákum

Magnúsar Carlsen beið erfitt verkefni í gær þegar hann stillti upp með svörtu í fimmtu skák heimsmeistaraeinvígisins í Sochi. Á undirbúningstímanum hefur Anand fundið góða hernaðaráætlun þegar hann hefur hvítt, hann hvílir kóngspeðið en hefur þaulkannað drottningarpeðsbyrjanirnar. Það lá fyrir að í fimmtu skákinni þýddi lítið fyrir Norðmanninn að byggja á einhvers konar „hálfþekkingu“ sem leiddi til afhroðs í þriðju skákinni. Og aðdáendur hans gátu varpað öndinni léttar: Magnús hafði notað frídaginn vel, tefldi byrjunina hratt og örugglega, náði umtalsverðu tímaforskoti og freistaði Anands með því að gefa kost á augljósum peðsleik. Í beinu útsendingunni á heimasíðu mótsins: http://www.sochi2014.fide.com/ sást hvernig hann yppti öxlum og yfirgaf sviðið og eftirlét Anand að taka býsna stóra ákvörðun og hefur sennilega giskað rétt á að Indverjinn myndi sneiða hjá óljósum flækjum.

Síðar í skákinni lét Magnús sig ekki muna um að drepa hið fræga „eitraða peð“ á b2 en lenti við það í smávegis basli með að halda stöðunni saman. Jafntefli var þó í höfn og góður dagur hjá Magnúsi Carlsen sem virðist hafa náð vopnum sínum:

Drottningarindversk vörn

1. d4 Rf6 2. c4 e6 3. Rf3 b6 4. g3 Bb4 5. Bd2 Be7 6. Rc3 Bb7 7. Bg2 c6 8. e4 d5 9. exd5 cxd5 10. Re5 0-0 11. 0-0 Rc6 12. cxd5 Rxe5

13. d6!?

Þetta leikbragð Anands byggist á því að eftir 13.... Bxg2 14. dxe7 14. dxe7 kemur 15. dxe5 og eftir 15.... Bxf1 á hvítur millileikinn exf6 og hefur þá tvo menn fyrir og góða vinningsmöguleika.

13.... Rc6 14. dxe7 Dxe7 15. Bg5 h6 16. d5 Ra5

Og nú blasir 17. d6 blasir við og eftir 17.... dxd8 18. Bxf6 dxf6 19. De2 ásamt 20. Had1 virðist hvítur ekki hafa tekið mikla áhættu en Anand lætur ekki freistast.

- Sjá stöðumynd 1-

17. Bxf6 Dxf6 18. dxe6 Dxe6 19. He1 Df6 20. Rd5 Bxd5 21. Bxd5 Had8 22. Df3 Dxb2!?

Hann hefur sennilega ekki viljað ana með riddarann inná d2 eftir 22.... Dxf3 23. Bxf3 Rc4 24. b3 Rd2. Sú staða á þó að halda.

23. Had1 Df6

Í fljótu bragði lítur vel út að leika 23.... Hd7 en það hefur kannski minnt of mikið á frægan afleik Karpovs í öðru HM-einvíginu við Kasparov 1985 þ.e.a.s. afbrigðið 24. Df5! Hfd8?? 25. Dxd7! Hxd7 26. He8+ Kh7 27. Be4+ ásamt 28. Hxd7 og vinnur. Betra er auðvitað 24. ... Hc7 en eftir 25. Be4 g6 26. Df4! Hc5 27. Bd5! heldur hvítur sterku frumkvæði.

24. Dxf6 gxf6 25. He7 Kg7 26. Hxa7 Rc6

27. Hb7?

Anand virtist ekki hafa mikla trú á sigurmöguleikum sínum en hann gat þó haldið taflinu gangandi um langa stund með því að leika 27. Ha4. Nú nær Magnús hinsvegar að skipta upp á peðunum á drottningarvæng og tryggir jafnteflið.

27.... Rb4! 28. Bb3 Hxd1 29. Bxd1 Rxa2 30. Hxb6 Rc3 31. Bf3 f5 32. Kg2 Hd8 33. Hc6 Re4 34. Bxe4 fxe4 35. Hc4 f5 36. g4 Hd2 37. gxf5 e3 38. He4 Hxf2 39. Kg3 Hxf5

- Jafntefli.

Staðan: Magnús Carlsen 2½ : Wisvanathan Anand 2½ .

Í dag verðu sjötta skákin tefld og hefur Magnús hvítt, sjöunda skákin verður svo tefld á mánudaginn.

Á blaðamannafundi eftir viðureignina gær lét Carlsen í veðri vaka að hann myndi láta sverfa til stáls í næstum tveimur skákum; reglur um einvígið gera ráð fyrir spilin séu stokkuð upp í hálfleik þ.e.a.s. eftir sjöttu skákina og Magnús fær aftur hvítt í þeirri sjöundu. Þó að fátt bendi til þess að eitthvað í vopnabúri hans muni reynast Anand erfitt eru þessir tvær skákir afar mikilvægar og reyna verulega á þolrif Indverjans.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 15. nóvember 2014

Skákþættir Morgunblaðsins

Skákþáttur Morgunblaðsins: Anand jafnaði metin og er til alls vís

Skákþáttur Morgunblaðsins frá 13. nóvember sl. en þeir birtast með vikuseinkun í Morgunblaðinu.

Anand jafnaði metin og er til alls vís

Það er varla hægt að halda því fram að Magnús Carlsen sé sigurstranglegri í einvígi sínu við Viswanathan Anand, a.m.k. ef tekið er mið af taflmennskunni í fjórum fyrstu skákum heimsmeistaraeinvígisins sem fram fer þessa dagana í Sochi við Svartahaf. Anand náði að jafna metin sl. þriðjudag og hélt jafntefli án mikilla erfiðleika í fjórðu skák einvígisins sem tefld var í gær. Hann virðist vera mun betur undir þetta einvígi búinn en það sem hann háði í fyrra í heimalandi sínu. Byrjanir hans með hvítu eru beittari og það gæti skipt sköpum þegar fram í sækir. Alls tefla þeir 12 skákir og nú er staðan jöfn, 2:2.

Taflmennska Magnúsar í þriðju skákinni var einhvern veginn alveg ólík því sem vant er. Hann hefur hingað til verið laginn við að sniðganga löng og þvinguð byrjunarafbrigði en á þeim vettvangi getur Anand verið afar skæður; hættulegur; gagnagrunnar upplýstu menn um að 16 fyrstu leikirnir hefðu allir komið fyrir áður en Magnús hafði ekkert nýtt fram að færa í stöðu þar sem framsækið c-peð hvíts var sérlega hættulegt. Eftir sigurinn upplýsti Anand að staðan eftir 24. leiki hefði komið upp í heimarannsóknum. Magnús taldi sig geta varið þrönga stöðu. 26. leikur hvíts, Hc6, reyndist honum erfiður viðfangs. Magnús batt greinilega vonir við biskupsleikinn 27. ... Bb4, vandinn var hinsvegar sá að hann gat aldrei með góðu móti hirt c7-peðið vegna leppunar. Eftir 29. Da6! var svarta staðan óverjandi. Þetta var fyrsti sigur Anands yfir Magnúsi Carlsen í meira en fjögur ár:

3. einvígisskák.

Viswanathan Anand – Magnús Carlsen

Drottningarbragð

1. d4 Rf6 2. c4 e6 3. Rf3 d5 4. Rc3 Be7 5. Bf4 O-O 6. e3 Rbd7 7. c5 c6 8. Bd3 b6 9. b4 a5 10. a3 Ba6 11. Bxa6 Hxa6 12. b5 cxb5 13. c6 Dc8 14. c7 b4 15. Rb5 a4 16. Hc1

16. ... Re4 17. Rg5 Rdf6 18. Rxe4 Rxe4 19. f3 Ha5 20. fxe4 Hxb5 21. Dxa4 Ha5 22. Dc6 bxa3 23. exd5 Hxd5 24. Dxb6 Dd7 25. O-O Hc8 26. Hc6 g5 27. Bg3 Bb4 28. Ha1 Ba5 29. Da6 Bxc7 30. Dc4 e5 31. Bxe5 Hxe5 32. dxe5 De7 33. e6 Kf8 34. Hc1

– og svartur gafst upp.

Nokkur orð varðandi umhugsunartímann: biðskákir eru úr sögunni en í einvíginu fá keppendur 2 klst. hvor á fyrstu 40 leikina, 1 klst. á næstu 20 leiki og þar eftir 15 mínútur að viðbættum 30 sekúndum eftir hvern leik til að ljúka skákinni. Í fjórðu skákinni virtist Magnús fá upp eina af þessum stöðum sem hann hefur sérhæft sig í en Anand sá við öllum brögðum hans og hélt auðveldlega jöfnu:

4. einvígisskák:

Magnús Carlsen – Viswanathan Anand

Sikileyjarvörn

1. e4 c5 2. Rf3 e6 3. g3 Rc6 4. Bg2 d5 5. exd5 exd5 6. O-O Rf6 7. d4 Be7 8. Be3 cxd4 9. Rxd4 Bg4 10. Dd3 Dd7 11. Rd2 O-O 12. R2f3 Hfe8 13. Hfe1 Bd6 14. c3 h6 15. Df1 Bh5 16. h3 Bg6 17. Had1 Had8 18. Rxc6 bxc6 19. c4 Be4 20. Bd4 Rh7 21. cxd5 Bxd5?!

Anand lék þessum leik en leikurinn gefur Magnúsi kost á að þróa stöðu sína áfram. Betra var 22. ... cxd5 og svarta staðan er ekki lakari.

22. Hxe8 Hxe8 23. Dd3!

Með þessum leik nær hvítur örlítið betri stöðu. Það eru einmitt stöður af þessu tagi sem henta Norðmanninum vel og það veit Anand.

23. .. Rf8 24. Rh4 Be5 25. Bxd5 Dxd5 26. Bxe5 Dxe5 27. b3 Re6 28. Rf3 Df6 29. Kg2 Hd8 30. De2 Hd5 31. Hxd5 cxd5 32. Re5!?

32. De5!? kom einnig til greina en svartur á 32. ... Dd8 og getur varist.

32. ... Df5 33. Rd3 Rd4

34. g4!

Óvæntur leikur, hvítur varð að gæta að því að leiki hann 34. De3 Rc2 35. Dd2?? kemur Dxd3! og svartur vinnur. Hann gat hinsvegar leikið 34. De8+ Kh7 35. De3 og þá gengur fyrrnefnt afbrigði ekki upp vegna þess að hvítur hirðir drottninguna með skák.

34. ...Dd7 35.De5 Re6 36. Kg3 Db5 37. Rf4 Rxf4 38. Kxf4 Db4+ 39. Kf3 d4 40. De8+ Kh7 41. Dxf7 Dd2 42. Df5+ Kh8 43. h4 Dxa2 44. De6

Hótar að leika 44. g5 með færum gegn kónginum. Anand setur fyrir lekann.

44. ... Dd2! 45. De8+ Kh7 46. De4+ Kh8 47. De8+Kh7

– Jafntefli.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Morgunblaðinu 13. nóvember 2014.

Skákþættir Morgunblaðsins

Skákþáttur Morgunblaðsins: Magnús Carlsen hefur tekið forystu í skákeinvíginu við Anand

Skákþáttir Morgunblaðsins hafa hingað til verið vikulega í blaðinu. Í kringum heimsmeistaraeinvígið hefur þeim verið fjölgað og eru nú þrisvar í viku. Þegar stærri skákviðburðir eru í gangi má búast við aukinni tíðni. Skák.is mun einnig birta þessa skákþætti sem og þá föstu á laugardögum. Sem fyrr þó með um viku seinkun. Í dag birtum við skákþátt Helga frá 11. nóvember sl. sem fjallar um fyrstu tvær skákirnar. 

Magnús Carlsen hefur tekið forystu í skákeinvíginu við Anand 

Magnús Carlsen var spurður að því, á blaðamannafundi sem haldinn var strax að lokinni 2. skák hans og Wiswanathans Anands í einvíginu um heimsmeistaratitilinn í Sochi við Svartahaf og lauk með sigri Norðmannsins, hvort það væri taktík hans í einvíginu að tefla langar og strangar skákir og reyna þannig að þreyta Anand. Hann svaraði því til að það skipti hann engu máli hver mótstöðumaðurinn væri: ef einhverjar forsendur væru fyrir vinningstilraunum myndi hann reyna að knýja fram sigur hversu langan tíma sem það tæki, og gilti einu hversu gamall andstæðingurinn væri.

Fyrstu einvígisskákinni lauk með jafntefli eftir tæplega sex klukkustunda baráttu og þar var Magnús nálægt því að vinna. Eftir auðveldan sigur í annarri skákinni er staðan 1½:½ Magnúsi í vil. Einvígið hefur þegar tekið sömu stefnu og það sem þessir tveir háðu í Chennai á Indlandi í fyrra: Magnús hefur náð að skauta framhjá yfirgripsmikilli þekkingu Anands á vinsælum byrjunum og þróttmikil taflmennska hans í byrjun bendir til þess að hann muni ekkert gefa eftir í baráttunni.

Spurður um hverjir væru aðstoðarmenn hans í einvíginu svaraði hann stutt og laggott: „Daninn og hamarinn“ – „The Dane and the hammer“, eins og hann orðaði það og átti við danska stórmeistarann Peter Heine Nielsen og landa sinn Jon Ludwig Hammer. Að Peter Heine skuli koma fram sem helsti aðstoðarmaður Magnúsar kemur á óvart því að hann hefur áður verið í liði Anands í fjölmörgum mótum og einvígjum. Ekki þótti lítið hneyksli á sínum tíma þegar Boris Spasskí mætti Karpov í áskorendaeinvígjunum 1974 og Efim Geller, sem hafði verið hjálparhella hans í einvíginu við Bobby Fischer tveimur árum fyrr, var genginn til liðs við Karpov. Spasskí var heiðursgestur við setningarathöfn einvígisins. Magnús kvaðst sannfærður um að tíundi heimsmeistarinn hefði kunnað vel að meta taflmennskuna í annarri skákinni og hann var býsna nálægt því að knýja fram sigur í fyrstu skákinni:

1. einvígisskák:

Wisvanathan Anand – Magnús Carlsen

Grünfelds-vörn

1. d4 Rf6 2. c4 g6 3. Rc3 d5 4. cxd5 Rxd5 5. Bd2 Bg7 6. e4 Rxc3 7. Bxc3 0-0 8. Dd2 Rc6 9. Rf3 Bg4 10. d5 Bxf3 11. Bxg7 Kxg7 12. gxf3 Re5 13. 0-0-0 c6 14. Dc3 f6 15. Bh3 cxd5 16. exd5 Rf7 17. f4 Dd6 18. Dd4 Had8 19. Be6 Db6 20. Dd2?

Eftir þennan leik nær svartur betri stöðu. Hagsmunum hvíts var best borgið í endataflinu sem kemur upp eftir 20. Dxb6. Anand virðist hafa ofmetið möguleika sína og talið að pressan eftir e-línunni hlyti að reynast Magnúsi erfið.

20.... Hd6 21. Hhe1 Rd8! 22. f5 Rxe6 23. Hxe6 Dc7+ 24. Kb1 Hc8 25. Hde1 Hxe6 26. Hxe6 Hd8 27. De3 Hd7 28. d6 exd6 29. Dd4 Hf7 30. fxg6 hxg6 31. Hxd6 a6 32. a3 Da5 33. f4 Dh5 34. Dd2 Dc5 35. Hd5 Dc4 36. Hd7 Dc6 37. Hd6 De4 38. Ka2 He7 39. Dc1 a5 40. Df1 a4 41. Hd1 Dc2 42. Hd4!

Anand var orðinn býsna aðþrengdur og fann þennan varnarleik sem hangir saman við 44. Dh1 eftir langa umhugsun.

42.... He2?!

Meiri vinningsvon var fólgin í 43.... He3! 44. Hd7+ Kh7 45. Hxb7 Hb3! 46. Hxb3 axb3+ 47. Ka1 Dxh2 og kóngsstaða hvíts er aðþrengd.

43. Hb4 b5 44. Dh1! He7 45. Dd5 He1 46. Dd7+ Kh6 47. Dh3 Kg7 48. Dd7+

– Jafntefli.

2. einvígisskák:

Magnús Carlsen – Wisvanathan Anand

Spænskur leikur

1. e4 e5 2. Rf3 Rc6 3. Bb5 Rf6 4. d3

Sneiðir hjá Berlínar-vörninni sem komst í tísku eftir einvígi Kasparovs og Kramniks árið 2000. Það kemur upp eftir 4. 0-0 Rxe4 5. d4 Rd6 6. Bxc6 dxc6 8. dxe5 Rf5 9. Dxd8+ Kxd8.

4.... Bc5 5. 0-0 d6 6. He1 0-0 7. Bxc6 bxc6 8. h3 He8 9. Rbd2 Rd7 10. Rc4 Bb6 11. a4 a5 12. Rxb6 cxb6 13. d4 Dc7

14. Ha3!

Þessi frumlegi hróksleikur virtist slá Anand út af laginu. Hrókurinn er á leiðinni í sóknarstöðu á g3.

14.... Rf8 15. dxe5 dxe5 16. Rh4 Hd8 17. Dh5 f6 18. Rf5 Be6 19. Hg3 Rg6 20. h4! Bxf5

Sóknaráætlun hvíts hefur alveg gengið upp og hér er Anand of fljótur á sér, traustara var 20.... Hd7.

21. exf5 Rf4 22. Bxf4 exf4 23. Hc3 c5 24. He6 Hab8 25. Hc4 Dd7 26. Kh2 Hf8 27. Hce4 Hb7 28. De2 b5 29. b3?!

Ónákvæmur leikur en betra var 29. He7! Dd6 30. f3! og svarta staðan stenst ekki álagið. Anand virðist ekki hafa gert sér grein fyrir að það er talsverður varnarmáttur í stöðunni.

29.... bxa4 30. bxa4 Hb4 31. He7 Dd6 32. Df3 Hxe4 33. Dxe4 f3+ 34. g3

34.... h5??

Anand átti nokkrar mínútur eftir og það bætast við 30 sekúndur eftir hvern leik. Afleikurinn bendir til þess að hann hafi verið búinn að gefa upp alla von en hann gat varist með 34.... Dd2! 35. Dxf3 Dxc2 36. Kg2! Kh8 þótt staðan sé vissulega erfið eftir 39. Dc6 því að ekki gengur 37.... Dxf5 vegna 38. He8+ Kg8 39. Da8! og vinnur.

35. Db7!

– Við hótuninni 36. Hxg7 er engin vörn. Anand gafst upp.

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í 11. nóvember 2014.

Skákþættir Morgunblaðsins

Skákþáttur Morgunblaðsins: Heimsmeistaraeinvígið hefst í dag - "Magnús ætti að vinna"

Norska þjóðin býr sig nú undir heimsmeistaraeinvígi þjóðhetjunnar Magnúsar Carlsen við áskorandann Wisvanathan Anand. Einvígið sem fram fer í Sochi við Svartahaf var sett í gær að viðstöddum Pútín Rússlandsforseta og öðrum tignum gestum.

Sochi var ekki á óskalista heimsmeistarans og hann skrifaði undir einvígisskilmálana með hangandi hendi. Hann var í liði Kasparovs fyrir forsetakjör FIDE í Tromsö á dögunum og ósigurinn þar, staðarvalið nú og dagsetningin sem upphaf einvígisins miðast við, 7. nóvember – þann sama dag árið 1917 komust bolsévikar til valda í Rússlandi – tákna Pútíns mekt. Saga heimsmeistaraeinvígja í Rússlandi á síðustu öld er full af duldum táknum þar sem hversdagslegir hlutir eins og kaffibrúsi eða svört jakkaföt gátu haft djúprætta merkingu. En það er ekki búist við neinum uppákomum varðandi þetta einvígi þar sem annáluð prúðmenni eigast við. Fyrsta skákin hefst í dag kl. 12 að íslenskum tíma. Hægt er að fylgjast með skákunum á fjölmörgum vefsvæðum en reikna má með því að beinar útsendingar norska sjónvarpsins, NRK, verði vinsælar meðal íslenskra skákáhugamanna. Undanfarið hefur NRK verið með beinar útsendingar frá þeim mótum þar sem Magnús hefur verið meðal þátttakenda og það hefur reynst vinsælt sjónvarpsefni í Noregi. Þá má einnig benda á slóð ICC, Chessbomb, chess24.com og heimasíðu einvígisins: sochi2014.fide.com/.

Þeir munu tefla 12 skákir, fyrst tvær skákir, þá frídagur, aftur tvær skákir, þá frídagur og svo koll af kolli. Einvíginu lýkur í síðasta lagi 28. nóvember nk. Nú er ár síðan einvígi þessara sömu aðila fór fram í Chennai í Indlandi og lauk með öruggum sigri Magnúsar, 6½:3½. Sigurinn staðfesti yfirburði Norðmannsins yfir keppinautum og flestir búast við því að hann nái að verja titilinn sinn án mikilla erfiðleika. Þeir sem veðja á Anand að þessu sinni geta gert það gott í veðbönkum – ef Indverjinn vinnur þar verður greitt út í hlutföllunum 1:6. Á þeim er meira en 20 ára aldursmunur og líkamlegt úthald getur skipt máli því skákir Magnúsar verða oft langar og strangar og tækni hans á því sviði þykir frábær. Anand vann áskorunarréttinn sl. vor og í því sambandi rifjast upp tvö einvígi sem Botvinnik háði eftir að hafa tapað heimsmeistaratitlinum og naut þar einvígisskilmála sem hann hafði átt stóran þátt í að setja inn, hið fyrra við Vasilí Smyslov árið 1958 sem hann vann 12½:10½, hið síðara árið 1961 við Mikhael Tal og aftur vann Botvinnik, 13:8. Smyslov og Tal ríktu því í eitt ár og það sama gæti hent Magnús Carlsen. Kringumstæðurnar eru aðrar og sálfræðistaðan líka. Garrí Kasparov hefur gert þetta að umtalsefni og telur að spurning sem brenni á vörum Magnúsar gæti verið: af hverju í fjáranum er ég aftur að tefla við þennan mann? Hann telur að það eina sem Magnús hafi fram yfir Anand sé sú einfalda staðreynd að hann sé betri skákmaður. Kasparov mætti til Chennai í fyrra og virtist setja Anand úr jafnvægi með stórkarlalegum yfirlýsingum í samtölum við fréttamenn. Ekki er von á honum til Sochi.

Vettvangur einvígisins í Sochi minnir á grískt útileikhús, skákborð á miðju sviði og áhorfendasæti allt um kring. Magnús lenti með fylgdarliði sínu Sochi sl. miðvikudag en Anand kom nokkrum dögum fyrr.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 8. nóvember 2014

Skákþættir Morgunblaðsins

Skákþáttur Morgunblaðsins: Stigahækkanir á Evrópumótinu í Batumi

Þótt skipulag Evrópumóts ungmenna í Batumi í Georgíu hafi mátt vera betra komast menn aldrei frá því að skákhefð þar í landi er stórmerk og lengi vel státuðu Georgíumenn af miklum valkyrjum, þ.ám. heimsmeisturum kvenna, Nonu Gaprindhavsvili og Maju Chiburdanidse. Nýr forseti evrópska skáksambandsins, Zurab Azmaparasvili, er Georgíumaður en hefur átt við nokkurn „ímyndarvanda" að stríða og þá aðallega vegna ofsafenginna skapsmuna.

Á Evrópumótinu var tekinn í notkun nýr stigastuðull sem þýddi að hækkanir og lækkanir skákmanna sem eru undir 18 ára aldri verða skarpari en áður. Í flestum tilvikum er betra að tefla „niður fyrir sig", eins og það er stundum orðað. Þess nutu Símon Þórhallsson, sem hlaut fjóra vinninga og hækkaði um 113 elo-stig, og Gauti Páll Jónsson, sem hlaut 3½ vinning og hækkaði um 77 elo-stig. Þeir fóru báðir vel fram úr ætluðum árangri. Dagur Ragnarsson, sem tefldi í 18 ára flokknum, byrjaði illa en var kominn á þokkalegan skrið undir lokin - en þá var mótið líka búið.

Þegar kemur að Oliver Jóhannessyni, sem tefldi í 16 ára flokknum með Símoni og Gauta Páli, þá tefldi hann allt mótið „niður fyrir sig" og lækkaði um 58 elo-stig. En hann hlaut fimm vinninga af níu mögulegum og að fá yfir 50% árangur í slíkum mótum, þar sem austurblokkin teflir fram einvalaliði, verður að teljast gott, einkum þegar litið er til þess að í flestum jafnteflisskákunum átti hann góða vinningsmöguleika - þar vantaði örlítið upp á slagkraftinn. Greinarhöfundur hefur tekið eftir því að margir þeir sem eru að henda á milli sín hugleiðingum um stig byggja mat sitt yfirleitt ekki á taflmennsku - heldur tölum á blaði. Því er þveröfugt farið með undirritaðan, sem með rýni í taflmennskuna þykist sjá fram á að Oliver standi á þröskuldi mikilla framfara. Eftir því sem leið á mótið áttaði hann sig á því að stundum er gott að breyta til. Í síðustu umferð vann hann sigur á albönskum skákmanni sem vissi ekki sitt rjúkandi ráð þegar Oliver hóf að tefla upp byrjun sem ekki hafði áður sést í skákum hans:

EM ungmenna, Batumi 2014:

Oliver Aron Jóhannesson - Mico Timoleo (Albanía)

Sikileyjarvörn

1. e4 c5 2. Rc3 Rc6 3. Bb5

Þennan leik hafði Oliver, sem sjaldan leikur kóngspeðinu, undirbúið sérstaklega.

3.... g6 4. Bxc6 dxc6 5. d3 Bg7 6. Be3 b6 7. Dd2 Rf6 8. Bh6 0-0 9. Bxg7 Kxg7 10. f4 Dc7 11. Rf3 Hd8 12 0-0 b5 13. e5 Rd5 14. Re4 c4 15. d4 Rb6 16. Df2

Þetta hefur allt gengið eins og í sögu, yfirburðir hvíts í rými eru umtalsverðir.

16.... f5 17. exf6+ exf6 18. f5!? He8?

Svartur var að taka peðið með 18.... Bxf5 eða leika 18.... Df4 sem hvítur getur svarað með 19. De1!

19. Rxf6! Hf8

19.... Kxf6 er svarað með 20. Dh4+ Kg7 21. Rg5 með myljandi sókn.

20. Rxh7! Hxf5

20.... Kxh7 kemur á svipaðan stað niður: 21. Dh4+ Kg8 22. fxg6 o.s.frv.

21. Rhg5 Bd7 22. Hae1 Rd5 23. Re6+ Bxe6 24. Hxe6 Rf4 25. He5

Með peði meira er eftirleikurinn auðveldur.

25.... Hf7 26. De3 Haf8 27. He1 Dd7 28. Rg5!

Nú má hrókurinn ekki hreyfa sig vegna - He7+. Svarta staðan er vonlaus.

28.... Dg4 29. Dg3 Dd7 30. Rxf7 Dxd4+ 31. De3 Dxe3+ 32. H1xe3 Hxf7 33. He7 Rd5 34. Hxf7+ kxf7 35. Hha3 Rb4 36. Hxa7+ Ke6 37. Hg7 Rxc2 38. Hxg6 Kd5 39. h4 b4 40. Kf1 Rd4 41. Ke1

- og svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 1. nóvember 2014

Skákþættir Morgunblaðsins

Skákþáttur Morgunblaðsins: Batumi-bragðið

Það er kunnara en frá þurfi að segja að skákbyrjanir draga oft nöfn sín af þjóðríkjum, borgum eða jafnvel bæjum: spænski leikurinn, ítalski leikurinn, frönsk vörn og íslenski gambíturinn. Og borgarnöfnin: Gautaborgar-afbrigðið, Sevilla-afbrigðið, Berlínarvörn og svo mætti lengi telja. Ég veit ekki til þess að nokkur skábyrjun sé nefnd eftir strandbænum Batumi í Georgíu sem liggur við landamæri Tyrklands en tilheyrði áður Óttóman-veldinu en þessa dagana fer þar fram Evrópumót ungmenna.

„Batumi-bragðið" mætti kannski kalla það háttalag mótshaldarans, sem er því miður ekki með öllu óþekkt í skákheiminum, að rukka fyrirfram fyrir fjögurra eða fimm stjörnu hótel en senda síðan keppendur á óupphitað gistiheimili að kljást þar við sagga, flóabit og kaldar kjötbollur. Helstu meðmælin með vistarverum íslenska hópsins voru þau, að hinn nýi forseti evrópska skáksambandsins, Georgíumaðurinn Zurab Azmaparashvili, hefði dvalist þar í nokkra daga fyrir fáeinum árum og líkað vel. Þeir eru svolítið að kenna hvor öðrum um hvernig þetta gat farið svona, framkvæmdastjórar mótsins, en svo dæmi sé tekið um mismununina þá rúlluðu rússnesku keppendurnir sem koma hingað í stórum hópum beint inn á bestu hótelin og mér er til efs að nokkur þeirra hafi greitt eitthvað svipað því sem íslensku keppendurnir þurftu að reiða fram. Ráfandi um í lobbíi Sheraton eru „utangarðsmennirnir" stöðugt minntir á að þarna hafi nú aldeilis gist höfðingjar á borð við Hillary Clinton, Sting og Pavarotti og fleiri stórlaxar.

Stundum er eins og ekkert hafi breyst hér í Georgíu þó að liðinn sé næstum aldarfjórðungur frá því að Sovétríkin leystust upp; þvergirðingsháttur, „njet" og margefld dyravarsla er gamalkunnur veruleiki. En hver veit nema Eyjólfur hressist.

Aftur að mótinu; eftir fjórar umferðir er Akureyringurinn Símon Þórhallsson sá keppandi sem mest hefur bætt sig miðað við ætlaðan árangur. Aðrir fulltrúar Íslands eru Dagur Ragnarsson, Oliver Aron Jóhannesson og Gauti Páll Jónsson. Í afbrigði hollenskrar varnar sem kennt er við Leningrad sló hann andstæðinginn út af laginu með leik sem ekki er minnst á í nýútkominni bók sem fjallar um refilstigu hollensku varnarinnar:

EM Batumi 2014; 4. umferð:

Símon Þórhallsson - Egor Filipets (Hvíta- Rússland)

Hollensk vörn

1.d4 Rf6 2. g3 Rf6 3. Bg2 g6 4. Rf3 Bg7 5. O-O O-O 6. c4 d6 7. Rc3 De8 8. e4!?

Óvæntur leikur sem Símon hafði áður beitt á Skákþingi Norðlendinga.

8. ... Rxe4?!

Sennilega er 8. ... fxe4 betra - til að eiga leið fyrir biskupinn niður á g4.

9. Rxe4 fxe4 10. Rg5 e5 11. Bxe4 h6 12. Rf3 Rc6

Eftir 12. ... exd4 13. He1! er svartur í vanda.

13. dxe5 Bg4?

Hyggst notfæra sér leppun riddarans en hugmyndin gengur ekki upp. Betra var 13. ... dxe5.

14. Dd5+! Be6 15. Db5!

Snarplega leikið og hótar 16. Dxb7.

15. ... Rxe5 16. Rxe5 Dxb5 17. cxb5 dxe5 18. Be3!

Fer sér að engu óðslega. Svartur getur ekki varið peðin á drottningarvæng.

18. ... Bc4 19. Hfc1 Bxb5 20. Bxb7 Had8 21. Hxc7 Hf7 22. Hac1 Hdd7 23. Hxd7 Hxd7 24. Bc6!

Uppskipti treysta oft yfirburði þess sem meiri hefur liðsafla.

24. ... Bxc6 25. Hxc6 Hd1+ 26. Kg2 Hb1 27. Hxg6 Kh7 28. Ha6 Hxb2 29. Hxa7

- og svartur gafst upp. Brátt brunar a2-peðið af stað.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 25. október 2014

Skákþættir Morgunblaðsins

Skákþáttur Morgunblaðsins: Gripinn úr vinnuferð

Þeir ungu skákmenn sem tefla á Evrópumóti ungmenna sem hefst í Batumi í Georgíu á morgun gætu margt lært af Karli Þorsteins sem varð fimmtugur þann 13. október sl. og er einn sigursælasti skákmaður Íslands á vettvangi barna- og unglingamóta. Karl vann óopinbert heimsmeistaramót barna í Puerto Rico árið 1978 og síðan barnamót Sameinuðu þjóðanna í Rio í ársbyrjun 1982. Hann varð svo í 3. sæti á HM unglinga í Finnlandi 20 ára og yngri. Áhrif Kasparovs á skákmenn af hans kynslóð voru mikil og komu fram hjá Karli í heilbrigðum metnaði og yfirgripsmikilli þekkingu á fræðunum; keppendur á Skákþingi Íslands 1981 komust að því að jafnvel smásmugulegustu fræðirit höfðu ekki skotist fram hjá hinum 16 ára gamla nýliða í landsliðsflokki. Karl varð Íslandsmeistari árin 1985 og 1989, átti fast sæti í landsliði Íslands og var í sveit Íslands sem varð í 2.-3. sæti á heimsmeistaramóti landsliða undir 27 ára í Chicago sumarið 1983.

Vegna sérstakra aðstæðna var íslenska íslenska landsliðið búið að keyra á fjórum mönnum í fyrstu umferðum HM landsliða í Luzern haustið 1993 og þrátt fyrir sigur yfir Rússum voru menn orðnir lúnir. Þá bættist Karl Þorsteins í liðið gripinn úr vinnuferð með Jakobi Ármannssyni á vegum Búnaðarbanka Íslands. Hann hlaut 4 vinninga af fimm mögulegum og átti stóran þátt í þeim árangri Íslands að verða í 5. sæti í keppni við bestu skákþjóðir heims. En þar setti hann líka að sumu leyti punktinn aftan við glæsilegt tímabil í skákinni. Þó hann hafi alltaf annað veifið síðan tekið þátt í mótum með góðum árangri voru markmiðin önnur; fjölskyldan og bankastörf voru sett framar á forgangslistanum.

Þegar rennt er yfir skákir Karls frá virkasta tímabilinu, níunda áratugnum, bregður oft fyrir nöfnum skákmanna sem létu mikið að sér kveða á næstu árum: Curt Hansen Kiril Georgiev, Lembit Oll, Ferdinand Hellers, Alexei Dreev. Á Reykjavíkurmótinu 1990 var Karl meðal efstu manna framan af og vann þá eftirfarandi skák af góðkunningja Reykjavíkurskákmótanna:

Karl Þorsteins - Walter Browne

Nimzo-indversk vörn

1. d4 Rf6 2. c4 e6 3. Rc3 Bb4 4. Rf3 c5 5. g3 cxd4 6. Rxd4 O-O 7. Bg2 d5 8. Db3 Bxc3 9. Dxc3

Afbrigðið sem Karl beitti hafði farið í gegnum mikla „umræðu" á þessum árum en talið var að 9. bxc3 væri vænlegra til árangurs.

9. ... e5 10. Rb3 dxc4

Einnig er hægt að leika 10. ... Rc6 eða 10. ... d4.

11. Ra5!

Karl hafði leikið 11. dxc4 gegn Polugajevskí í stórveldaslagnum 1990 sem var undanfari Reykjavíkurmótsins.

11. ... Rd5 12. Dd2 Rc6 13. Rxc4

Og hér kom til greina að leika 13. Dxd5 Dxd5 14. Bxd5 Rxa5 15. Bd2 og hvítur stendur aðeins betur að vígi.

13. ... Be6 14. O-O b5 15. Ra3 a6 16. Rc2 Hc8 17. e4 Rb6 18. b3!

Það er mikilvægt að valda c4-reitinn. Hvítur hefur sloppið út úr byrjuninni með aðeins betri stöðu.

18. ... a5 19. De2 b4 20. Be3 Dc7 21. Hac1 Rd7 22. Hfd1 Db7

23. Bf1!

Snjall leikur sem hótar bæði 24. Da6 og 24. Db5. Biskupar hvíts eru allsráðandi á borðinu.

23. ... a4? 24. Da6!

Þennan leik mátti svartur ekki leyfa.

24. ... Dxa6 25. Bxa6 axb3 26. Bxc8 bxc2 27. Hxd7!

Sennilega hefur Browne sem var í tímahraki sést yfir þennan leik.

27. ... Hxc8 28. Hd2! b3 29. axb3 Bxb3 30. Hd3 Ra5 31. Bb6

- og Browne gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 18. október 2014

Skákþættir Morgunblaðsins

[Event "It (open)"] [Site "Reykjavik (Iceland)"] [Date "1990.??.??"] [EventDate "?"] [Round "?"] [Result "1-0"] [White "Karl Thorsteins"] [Black "Walter Shawn Browne"] [ECO "E21"] [WhiteElo "?"] [BlackElo "?"] [PlyCount "61"] 1.d4 Nf6 2.c4 e6 3.Nc3 Bb4 4.Nf3 c5 5.g3 cxd4 6.Nxd4 O-O 7.Bg2 d5 8.Qb3 Bxc3+ 9.Qxc3 e5 10.Nb3 dxc4 11.Na5 Nd5 12.Qd2 Nc6 13.Nxc4 Be6 14.O-O b5 15.Na3 a6 16.Nc2 Rc8 17.e4 Nb6 18.b3 a5 19.Qe2 b4 20.Be3 Qc7 21.Rac1 Nd7 22.Rfd1 Qb7 23.Bf1 a4 24.Qa6 Qxa6 25.Bxa6 axb3 26.Bxc8 bxc2 27.Rxd7 Rxc8 28.Rd2 b3 29.axb3 Bxb3 30.Rd3 Na5 31.Bb6 1-0

Skákþáttur Morgunblaðsins: Huginn leiðir eftir fyrrihluta Íslandsmótsins

Eftir fyrri hluta Íslandsmóts skákfélaga sem fram fór í Rimaskóla um síðustu helgi er viðbúið að baráttan um Íslandsmeistaratitilinn verði hörð og muni standa á milli þriggja efstu liða, Hugins, Taflfélags Reykjavíkur og Taflfélags Vestmannaeyja. Tíu lið eru í efstu deild og staðan er þessi: 1. Skákfélagið Huginn 28½ v. 2. Taflfélag Reykjavíkur 28 v. 3. Taflfélag Vestmannaeyja v 27½ v. 4. Skákdeild Fjölnis 23 v. 5. Taflfélag Bolungarvíkur 21½ v. 6. Huginn (b-sveit) 18½ v. 7. Skákfélag Akureyrar 18 v. 8. Víkingaklúbburinn 12½ v. 9. Skákfélag Reykjanesbæjar 12 v. 10. Skákfélag Íslands 11 v.

Sveitir Taflfélag Reykjavíkur standa vel að vígi á öllum neðri deildunum, Í 2. deild er b-sveitin félagsins efst, í 3. deild er leiðir c-sveitin og í 4. deild er d-sveit TR í efsta sæti.

Efstu liðin í 1. deild eru búin að mætast innbyrðis í 1. deildinni þannig að úrslitin snúast um það hversu mörgum vinningum þau sanka að sér á lokasprettinum. Skákfélagið Huginn, sem tapaði fyrir Taflfélagi Vestmannaeyja í 3. umferð, nýtur þess að vera með b-lið í keppninni og góðan mannskap. Þegar a- og b-liðið mættust í 1. umferð voru meðalstig b-liðsmanna 1.854 elo-stig en hækkuðu svo snarlega í næstu umferð upp í 2.218 elo-stig. Hinn ungi og efnilegi Hilmir Freyr Heimisson vann raunar þrautreyndan Kristján Eðvarðsson á 6. borði en önnur úrslit voru eftir bókinni og niðurstaðan 7:1, A-liðinu í vil. Ungu skákmennirnir stóðu sig almennt vel á Íslandsmótinu og af eldri skákmönnum er það helst að segja að gömul kæti greip menn þegar Margeir Pétursson gekk í salinn til að tefla tvær skákir fyrir sitt gamla félag, Taflfélag Reykjavíkur, seiglaðist í erfðri vörn á móti „Shirov-bananum" Einar Hjalta og vann að lokum. Jóhann Hjartarson, tefldi vel gegn Kanadamanninum Eric Hansen og gaman var að sjá búlgarska stórmeistarann Ivan Cheparinov að tafli fyrir Hugin í Rimaskólanum. Alltaf dáist maður að þrautseigjunni og þeirri tryggð við heimahagana sem ríkir innan Skákfélags Akureyrar. Gylfi Þórhallsson hefur verið með í nánast hverri umferð frá fyrstu keppninni haustið 1974 og félagar hans og máttarstólpar í liðinu missa vart úr skák þessi misserin. Norðanmenn hafa líka innan sinna vébanda einn efnilegasta skákmann landsins sem hækkaði um tæplega 70 elo stig þessa helgi og vann kunnan skákmeistara í 5. umferð:

Árni Ármann Árnason (Bolungarvík) - Jón Kristinn Þorgeirsson (Akureyri )

Drottningarbragð

1. d4 Rf6 2. Rf3 e6 3. c4 d5 4. cxd5 exd5 5. Bg5 c6 6. Dc2 Be7 7. e3 Re4 8. Bxe7 dxe7 9. Bd3 f5 10. Rc3 0-0 11. 0-0 Be6 12. Re5 Rd7 13. f4 Hf6 14. Ra4 Rxe5 15. fxe5 Hg6 16. Hab1

Af hverju ekki 16. b4 strax, t.d. 16. ...Dxb4 17. Bxe4 dxe4 18. Rc5 sem hótar m.a. 19. Hab1.

16. ... Dg5 17. De2 h5 18. b4 h4 19. Bxe4

Opnar fyrir biskupinn á e6 en svartur hótaði 19.... Rg3.

19.... fxe4 20. Hf4 Bh3 21. Hf2 Bg4 22. Dd2 Bf3 23. Kh1?

Betra var sennilega 23. Rc3. Nú hristir Jón Kristinn fram úr erminni magnaða fléttu.

23.... Dxg2+! 24. Hxg2 h3!

Eftir þennan óvænta „millileik" sá Árni síma sæng uppreidda. Hann getur þó varist með 25. Kg1 sem má svara með 25.... Bxg2! 26. De1 Hf8 með áframhaldandi sókn, t.d. 27. Hb2 Hf5 o.s.frv.

25. De1? Hxg2 26. Rc5 Hg6 mát.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 11. október 2014

Skákþættir Morgunblaðsins

Skákþáttur Morgunblaðsins: Hörð barátta fram undan á Íslandsmóti skákfélaga

Fjölmennasta og sennilega vinsælasta keppni skákhreyfingarinnar, Íslandsmót skákfélaga hófst í Rimaskóla á fimmtudagskvöldið með keppni í 1. deild þar sem 10 skákfélög heyja baráttu um Íslandsmeistaratitilinn. Reikna má með að 400 skákmenn sitji að tafli í Rimaskóla um helgina í hinum ýmsu deildum en almennt er búist við harðri keppni um efstu sætin milli Taflfélags Reykjavíkur, Hugins, Taflfélags Vestmannaeyja og Skákfélags Bolungarvíkur. 40 ár eru liðin frá fyrsta Íslandsmótinu sem hófst á Akureyri haustið 1974 með viðureign Taflfélags Reykjavíkur og Skákfélags Akureyrar.

Vignir í 36. sæti á HM ungmenna í Durban

Vignir Vatnar Stefánsson varð í 36. sæti af 104 þátttakendum í flokki 12 ára og yngri á heimsmeistaramóti ungmenna sem lauk í Durban í Suður-Afríku á mánudaginn. Vignir hlaut 6 vinninga af 11 mögulegum en hann var á yngra ári í flokknum. Sigurvegarar dreifðust á fjölmargar þjóðir en einungis Indverjar fengu sigurvegara í fleiri en einum flokki. Vignir hefur ávallt verið með vinningshlutfall yfir 50% á stóru mótunum, EM og HM, og tekur þátt í Evrópumótinu sem hefst í Batumi í Georgíu í lok þessa mánaðar. Aðrir þátttakendur Íslands þar verða eru Oliver Aron Jóhannesson, Dagur Ragnarsson, Símon Þórhallsson og Gauti Páll Jónsson.

Anand til alls líklegur i Sotsj í

Þann 7. nóvember nk. hefst í Sotsjí við Svartahaf einvígi Magnúsar Carlsen og Viswanathan Anand um heimsmeistaratitilinn. Sömu keppendur og í fyrra - en breytt hlutverk. Tefldar verða 12 skákir og verði jafnt er gripið til styttri skáka. Þó að Magnús verði að teljast sigurstranglegri hefur Anand nánast gengið í endurnýjun lífdaga á þessu ári; hann vann áskorendakeppnina í mars og á fjögurra manna skákmóti í Bilbao á Spáni á dögunum varð hann efstur í keppni fjögurra manna. Gefin voru 3 stig fyrir sigur og eitt fyrir jafntefli. Anand, sem tapaði fyrir Aronjan í lokaumferðinni, hlaut 11 stig (4 vinninga), Aronjan kom næstur með 10 stig (einnig 4 vinninga) og Ponomariov og Spánverjinn Vallejo Pons hlutu báðir 5 vinninga. Það er miklu meiri kraftur og léttleiki í taflmennsku Anands en í mörg undanfarin ár og hann er því til alls líklegur í Sotsjí eftir mánuð:

Bilbao 2014; 4. umferð:

Viswanathan Anand - Vallejo Pons

Drottningarbragð

1. d4

Það er ekki ósennilegt að Anand velji drottningarpeðsbyrjanir sem sitt aðalvopn með hvítu gegn Magnúsi Carlsen.

1. ... d5 2. c4 dxc4 3. e4 Rc6 4. Rf3 Bg4 5. d5 Re5 6. Bf4 Rg6 7. Be3 e5 8. Bxc4 Rf6 9. Rc3 a6 10. Be2 Bd6 11. Rd2 Bxe2 12. Dxe2 O-O 13. O-O De7 14. Hfd1 Hac8 15. g3 h6 16. Hac1 c6 17. Rc4

Anand hefur gert lítið annað en að fylgja góðum reglum um liðsskipan og hefur náð traustu frumkvæði.

17. ... cxd5 18. Rxd5 Rxd5 19. Hxd5 Bc5 20. Hcd1 Bxe3 21. Rxe3 Db4 22. Rf5!

Ólíkt hafast þeir að riddararnir, sá á g6 á fárra kost vel á meðan þessi er stórhættulegur.

22. ... Hc4 23. Rd6 Hc6 24. a3 Db3 25. H5d3 Db6 26. Rf5 He8 27. Hd7!

Hindrar 27. ...Re7 og undirbýr framrás h-peðsins.

27. ... Hf6 28. Dg4 Dc6 29. h4 h5

Það er fátt sem annað svartur getur aðhafst.

30. Dxh5 Dxe4 31. Hd8! Dc6

32. Dg5!

Einfaldur leikur sem aftur hótar 33. h5. Svartur er varnarlaus.

32. ... De6 33. H1d6

- og svartur gafst upp.

Helgi Ólafsson [e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Laugardagsmogganum, 4. október 2014

Skákþættir Morgunblaðsins

[Event "Bilbao Masters"] [Site "Bilbao ESP"] [Date "2014.09.18"] [EventDate "2014.09.12"] [Round "4"] [Result "1-0"] [White "Viswanathan Anand"] [Black "Francisco Vallejo-Pons"] [ECO "D20"] [WhiteElo "2785"] [BlackElo "2712"] [PlyCount "65"] 1. d4 d5 2. c4 dxc4 3. e4 Nc6 4. Nf3 Bg4 5. d5 Ne5 6. Bf4 Ng6 7. Be3 e5 8. Bxc4 Nf6 9. Nc3 a6 10. Be2 Bd6 11. Nd2 Bxe2 12. Qxe2 O-O 13. O-O Qe7 14. Rfd1 Rac8 15. g3 h6 16. Rac1 c6 17. Nc4 cxd5 18. Nxd5 Nxd5 19. Rxd5 Bc5 20. Rcd1 Bxe3 21. Nxe3 Qb4 22. Nf5 Rc4 23. Nd6 Rc6 24. a3 Qb3 25. R5d3 Qb6 26. Nf5 Re8 27. Rd7 Rf6 28. Qg4 Qc6 29. h4 h5 30. Qxh5 Qxe4 31. Rd8 Qc6 32. Qg5 Qe6 33. R1d6 1-0