Gunnar endurkjörinn forseti SÍ - Gylfi kjörinn heiðursfélagi

Gunnar Björnsson var endurkjörinn forseti Skáksambands Íslands á aðalfundi Skáksambandins sem fram fór í dag á átakalitlum fundi.  Gylfi Þórhallsson var kjörinn heiðursfélagi Skáksambands Íslands fyrir frábært starf í gegnum tíðina en Gylfi hefur verið 27 ár í stjórn Skákfélags Akureyrar, þar af 15 sem formaður, hefur verið kjördæmisstjóri Norðurlands eystra, stýrt ýmsum mótum fyrir norðan og má þar nefna m.a. alþjóðleg skákmót. Aðalfundarmenn stóðu upp fyrir Gylfa allir sem einn og gáfu honum verðskuldað lófaklapp.  

Í upphafi mótsins fór Gunnar yfir helstu þætti starfsemi sambandsins á liðnu ári.  Nefndi hann m.a. mjög vel heppnað Reykjavíkurskákmót, góða frammistöðu íslensku landsliðina á Ólympíuskákmótinu, Íslandsmeistaratitil Héðins og fjóra Norðurlandameistaratitla sem komu í hús á liðnu starfsári.  

Gunnar fór einnig yfir það sem er framundan á komandi starfsári.  Má þar nefna Reykjavíkurskákmótið en vinna í kringum það er þegar hafin, EM landsliða, EM ungmenna en stefnt er að senda fulltrúa á það í ár þótt það verði ekki í sama stíl og árin 2007-08.  

Farið var yfir reikninga félagsins en afkoman á liðnu ári var góð en félagið skilaði tæpri milljón í hagnað þrátt fyrir Ólympíuskákmót og Reykjavíkurskákmót.  

Gunnar var endurkjörinn forseti með lófaklappi.  Með honum í stjórn voru sjálfkjörin í aðalstjórn eftirtalin: Eiríkur Björnsson, Halldór Grétar Einarsson, Helgi Árnason, Ingibjörg Edda Birgisdóttir Róbert Lagerman og Stefán Bergsson.

Eiríkur og Róbert voru í varastjórn en Ingibjörg Edda er ný.  Úr stjórn gengu Guðný Erla Guðnadóttir, Kristján Örn Elíasson og Magnús Pálmi Örnólfsson.

Í varstjörn voru kjörin Pálmi R. Pétursson, Andrea Margrét Gunnarsdóttir, Þorsteinn Stefánsson og Haraldur Baldursson.  

Pálmi var fyrir í varastjórn en önnur koma ný inn.  Haraldur er gamall stjórnarjaxl og var um tíma varaforseti.  Andrea og Þorsteinn eru skákforeldrar.  Edda Sveinsdóttir gengur úr stjórn.

Af lagabreytingatillögum hlutu tvær tillögur frá Halldóri Grétar náð fyrir augun stjórnarmanna en aðrar tillögur voru felldar eða vísað til stjórnar SÍ.

Tillaga Gunnars um að stefna að því að endurvekja Tímaritið Skák var samþykkt og vísað til stjórnar til frekari vinnu. 

Björn vann Glek í lokaumferðinni

Alþjóðlegi meistarinn Björn Þorfinnsson (2415) vann þýska stórmeistarann Igor Glek (2424) í níundu og síðustu umferð alþjóðlega mótsins í Alimini sem fram fór í dag.  Björn hlaut 5½ vinning og endaði í 6.-13. sæti.  

Indverski alþjóðlegi meistarinn Luca Shytaj (2494) sigraði á mótinu en hann fékk 7 vinninga.  

Árangur Björns samsvarar um 2385 skákstigum og lækkar hann um 1,5 stig fyrir frammistöðu sína.   

42 skákmenn tóku þátt í efsta flokki og þar af 9 stórmeistarar.  Björn var nr. 15 í stigaröð keppenda.   Allir skákir hverrar umferðar voru sýndar beint. 

• Heimasíða mótsins 
• Beinar útsendingar

Víkingaklúbburinn sigraði á Íslandsmótinu í Víkingaskák

Annað Íslandsmót Víkingaskákfélaga var haldið í húsnæði Vinjar við Hverfisgötu fimmtudaginn 26. maí. Mótið heppnaðist vel, en alls mættu sjö sterkar sveitir til leiks. Tefldar voru sjö umferðir þar sem allar sveitir mættust innbyrgðis og umhugunartími á hverja skák var 12. mínútur. Fyrirfram var búist við að keppnin um efsta sætið yrði á milli Víkingaklubbsins, Hauka, Guttorms Tudda, Skákfélags Íslands og Forgjafarklúbbsins. En spútnik-sveitir Þróttar og Vinjar komu gífurlega á óvart með því að vera í toppbárattunni.

Víkingaklúbburinn sigraði á mótinu, en sigurinn var mjög tæpur í lokin, því Forgjafarklúbburinn sem byrjaði mótið mjög illa tók sig vel á lokasprettinum og þurfti að vinna Þrótt 3-0 í síðustu umferð til að vinna mótið, en Stefán Þór á öðru borði lék sig óvænt í mát í vænlegri stöðu og viðureignin endaði 2-1 fyrir Forgjafarklúbbinn. Sveit Víkingaklúbbsins var skipuð mjög þéttum Víkingaskákmönnum, þeim Tómasi Björnsyni, Sigurði Ingasyni og Þresti Þórssyni. Sveinn Ingi stigahæst Víkingaskákmaður heims komst ekki á mótið að þessu sinni. Gunnar Fr. formaður Víkingaklúbbsins leiddi svo sterka sveit Forgjafarklúbbsins, sem sumir vildu kalla Víkingaklúbburinn-b. Formaðurinn byrjaði mótið mjög illa, en tók sig á í lokin og var lið Forgjafarklúbbsins grátlega nálægt því að vinna mótið. Haukar náðu þriðja sæti, en þeir eru með mjög sterka sveit undir forustu Inga Tandra Traustasonar.

Veitt voru sérstök verðlaun fyrir besta árangur á hverju borði, en Ingi Tandri Traustason Haukum stóð sig mjög vel og vann borðaverðlaun fyrir 1. borð með 5.5 vinninga af sjö mögulegum. Sigurður Ingason Víkingaklúbbnum stóð sig best á öðru borði og fékk fjóra vinninga af fimm mögulegum ásamt Hrannari Jónssyni Vinjarmanni. Á þriðja borði stóð Þröstur Þórsson Víkingaklúbbnum og Halldór Ólafsson Forgjafarklúbbnum sig best með 5.5 af sjö mögulegum.

Keppendur á mótinu voru alls 21 skákmenn í sjö sveitum, en 23 skákmenn tóku þátt í mótinu í fyrra.

Lokastaðan:

1. Víkingaklúbburinn 14.5 vinningar
2. Forgjafarklúbburinn 14.0
3. Haukar 13.0
4. Vin 13
5. Skákfélag Íslands 11
6. Þróttur 10.5
7. Guttormur 9
8. Skotta 0.0

Sveitirnar skipuðu eftirfarandi skákmenn:

Víkingaklúbburinn: Tómas Björnsson, Sigurður Ingason & Þröstur Þórsson.
Guttormur: Þorgeir Einarsson, Bjarni Sæmundsson & Ingimundur Guðmundsson.
Haukar: Ingi Tandri, Jorge Foncega & Sverrir Þorgeirsson
Forgjafarklúbburinn: Gunnar Fr. Rúnarsson, Stefán Þ. Sigurjónsson & Halldór Ólafsson.
Þróttur: Arnar Valgeirsson, Jón Birgir Einarsson & Knútur.
Vin: Ólafur B. Þórsson, Hrannar Jónsson & Inga Birgisdóttir.
Skákfélag Ísland: Páll Andrason, Birkir Karl Sigurðsson & Örn Leó.

Nánar á heimasíðu Víkingaklúbbsins (fleiri myndir)