Jóhann tapaði í fyrstu umferð

Stórmeistarinn Jóhann Hjartarson (2536) byrjaði ekki vel á alþjóðlega mótinu Graz í Ausurríki í gær. Hann tapaði fyrir Pólverjanum Stanislaw Praczukowski (2109). Önnur umferð fer fram í dag og þá teflir Jóhann við austurríska skákmanninn Johannes Pernerstorfer (2067). 

Þátt taka 135 skákmenn frá 22 löndum og þar af eru níu stórmeistarar. Jóhann er nr. 7 í stigaröð keppenda. 

 

• Heimasíða mótsins
• Chess-Results
• Beinar útsendingar

 

Kappteflið um Friðrikskónginn - Gunnar Freyr enn í forystu

Þriðja mótið af fjórum í mótaröðinni um Taflkóng Friðriks fór fram sl. mánudagskvöld í skáksal KR í Frostaskjóli.

Staðan er nú sú að Gunnar Fr. Rúnarsson leiðir með 26 stig eftir þrjú mót, en Örn Leó Jóhannsson kemur næstur með 18 stig eftir 2 mót og síðan Björgvin Víglundsson með 14 stig einnig eftir 2 mót.

Hinir tveir síðarnefndu geta bætt við sig 10 stigum með því að vinna lokamótið. Gunnar Freyr getur bætt stöðu sina um 4 stig, því aðeins þrjú bestu mót telja. Baráttan um fyrsta sætið stendur því á milli hans og Arnars Leós á mánudagskvöldið kemur. Reyndar er Guðfinnur R. Kjartansson með 17 stig eftir þrjú mót, gæti náð 23 stigum með því að vinna lokamótið og komist á pall.

Spennandi úrslitakeppni framundan ef Örn Leó mætir til slags. Öllum heimil þátttaka óháð þátttöku í mótaröðinni og því um gera að mæta,  velgja fastagestum undir uggum og hita upp fyrir Deildakeppnina um þar næstu helgi. 9 umferðir – 10 mínútna skákir. 

Skákmót KR eru öll mánudagskvöld árið um kring og hefjast kl. 19.30. Svo eru haldin Árdegismót alla laugardaga  jafnt sumar sem vetur kl. 10.30 -13.  Mótin eru öllum opin áháð aldri og félagsaðild.

Skákþáttur Morgunblaðsins: Stefán Bergsson er skákmeistari Reykjavíkur 2018

Stefán Bergsson er skákmeistari Reykjavíkur 2018 eftir sigur í lokaumferð mótsins sem fram fór sl. miðvikudagskvöld þegar hann tefldi við Dag Ragnarsson. Stefán hlaut átta vinninga af níu mögulegum, náði snemma forystunni með hverjum sigrinum á fætur öðrum, og það var ekki fyrr en í áttundu umferð að stigahæsti keppandi mótsins, Bragi Þorfinnsson, stöðvaði sigurgönguna en í lokaumferðinni var Stefán aftur kominn á ferð og vann örugglega.

Stefán er frá Akureyri og fékk sitt skákuppeldi nyrðra í góðum félagsskap Skákfélags Akureyrar ásamt jafnaldra sínum Halldóri Brynjari Halldórssyni. Hann á lögheimili í Reykjavík og þarf því ekki að sækja handhafa hinnar virðulega nafnbótar neðar í töfluna eins og stundum áður þegar „utanbæjarmenn“ hafa sigrað á þinginu. Stefán er ötull stjórnarmaður hjá Skáksambandi Íslands og veitti Skákakademíu Reykjavíkur forstöðu um margra ára skeið. Frammistaða hans undanfarin ár hefur verið nokkuð sveiflukennd en þetta er langbesti árangur hans á ferlinum.

Í 2. sæti varð Bragi Þorfinnsson með sjö vinninga eftir sigur á Hilmi Frey í lokaumferðinni. Í 3.-4. sæti urðu Sigurbjörn Björnsson og Einar Hjalti Jensson með 6½ vinning og þar á eftir í 5.-10. sæti Bragi Halldórsson, Dagur Ragnarsson, Hilmir Freyr Heimisson, Hrafn Loftsson, Lenka Ptacnikova og Júlíus Friðjónsson, öll með sex vinninga.

Í lokaumferðinni var mikið undir þegar Stefán settist við taflið andspænis Degi Ragnarssyni, sem með sigri gat náð honum að vinningum. Dagur varð í 3. sæti í keppni landsliðsflokks í fyrra og var til alls vís en brást þó bogalistin eftir lélega byrjunartaflmennsku:

Skákþing Reykjavíkur 2018; 9. umferð:

Stefán Bergsson – Dagur Ragnarsson

Frönsk vörn

1. e4 e6 2. d4 d5 3. Rd2 h6?!

Sjaldséður leikur. Dagur var greinilega staðráðinn í að sneiða hjá troðnum slóðum.

4. Rgf3 Rf6 5. e5 Rfd7 6. Bd3 c5 7. c3 Rc6 8. a3 a5 9. Rf1 a4 10. h4 Da5 11. Bd2 Da7 12. Be3 Rb6 13. Rg3 Rc4?

Afleitur leikur sem leiðir til óteflandi stöðu. Betra var 13.... cxd4 þótt hvíta staðan sé alltaf vænleg eftir mislukkaða byrjun Dags.

14. Bxc4 dxc4 15. dxc5! Db8

Vandinn er sá að eftir 15.... bxc5 kemur 16. Bxc5 dxc5 17,. Re4 og síðan – Rd6+ með vinningsstöðu.

16. Bd4 Be7 17. Re4 0-0 18. Dd2 Ra5 19. Hd1 Bd7

Stefán var að bíða eftir þessum leik...

20. Rf6+!

Og nú er svartur algerlega varnarlaus.

20.... Bxf6 21. exf6 Rb3 22. De3 Rxd4 23. Hxd4 Bc6 24. Hg4

– og svartur gafst upp.

 

Jóhann og Björgvin efstir á skákhátíð MótX

Jóhann Hjartarson vann stigahæsta keppanda í fimmtu umferð skákhátíðar MótX, Hjörvar Stein Grétarsson, og komst við það í efsta sætið þegar tefldar hafa verið fimm umferðir af sjö. Hann deilir því með Björgvini Jónssyni sem tók sér ½ vinnings yfirsetu í fimmtu umferð.

 

Í næstu sætum koma svo Hannes Hlífar Stefánsson, Jón Viktor Gunnarsson og Helgi Áss Grétarsson, allir með 3½ vinning. Í næstu umferð tefla saman Hannes Hlífar og Jóhann Hjartarson og Björgvin mætir Helga Ás. Í B-flokki eru fjórir skákmenn efstir, Gauti Pall Jónsson, Birkir Ísak Jóhannsson, Agnar T. Möller og Siguringi Sigurjónsson. Bragi Halldórsson er efstur meðal Hvítra hrafna, með 2½ vinning af þremur mögulegu 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 10. febrúar 2018

Skákþættir Morgunblaðsins

Almar Máni og Martin kjördæmismeistarar Suðurlands

Kjördæmismót suðurlands í skólaskák fór fram í gær í Fischersetri á Selfossi. Í yngri flokk sigraði Martin Srichakham en Almar Máni Þorsteinsson í eldri.

Þeir verða því fulltrúar kjördæmisins á væntanlegu landsmóti. Myndir og nánar um úrslit má sjá á hlekknum hér fyrir neðan.

Myndaalbúm má finna hér.

Skákharpan 2018 - Gunni Gunn sigraði

Mótaröðinni um Skákhörpuna sem nú fór fram í 11. sinn á vegum Riddarans lauk í gær. Svo fór að elsti keppandinn Gunnar Kr. Gunnarsson, næstum hálfnýræður að aldri,  tryggði sér sigurinn  í kappteflinu glæsilega með því að vinna lokamótið með yfirburðum, 10.5 vinningi af 11 mögulegum - líkt og í fyrsta mótinu sem hann vann reyndar með fullu húsi. Þrjú bestu mót hvers keppanda af fjórum töldu til stiga og hann tefldi aðeins í þremur mótum. 

Gunnar hlaut alls 26 stig, Ingólfur Hjaltalín 24; Guðfinnur 20; Össur 17. Gunnar vann keppnina líka fyrir 2 árum og þeir Guðfinnur og Össur hafa báðir hrósað sigri í þessari keppni, Guðfinnur i fyrra og Össur 2015. Góð þátttaka var og alveg sérstaklega í lokamótinu þar sem 2 kunnir kappar af norðan þeir Haraldur Haraldsson og Karl Steingrímsson velgdu fastagestum og sunnanmönnum undir uggum. 

Skákharpan er nú helguð meisturum framtíðarinnar og keppni um hana hefst jafnan sem næst skákdeginum, sem haldin er hátíðlegur 26. janúar ár hvert, tileinkaður afreksferli Friðriks Ólafssonar.  

Teflt er í Riddaranum alla miðvikudaga árið um kring kl. 13-17. Allir velkomnir sem hafa aldur til. (60+).

Bikarsyrpa TR hefst í dag

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Fjórða mót Bikarsyrpunnar hefst föstudaginn 16. febrúar og stendur til sunnudagsins 18. febrúar. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 16. febrúar kl. 17.30 (fös)
2. umferð: 17. febrúar  kl. 10.00 (lau)
3. umferð: 17. febrúar  kl. 13.00 (lau)
4. umferð: 17. febrúar  kl. 16.00 (lau)
5. umferð: 18. febrúar  kl. 10.00 (sun)
6. umferð: 18. febrúar  kl. 13.00 (sun)
7. umferð: 18. febrúar  kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Skákstjórn: Þórir Benediktsson, s. 867 3109, [e-mail]

Hlynur Þór Magnússon allur

Enn er höggvið skarð í hóp skákunnenda, sérstaklega eldri skákmanna eins og vænta má. Segja má með sanni að líf mannlegt endar stundum skjótt og afskorið verður fljótt, eins og segir í sálminum. Nú er Hlynur Þór Magnússon, sagnfræðingur, blaðamaður og kennari skyndilega fallinn frá um aldur fram. Starfaði á Morgunblaðinu, síðar við héraðsfréttablöð á Ísafirði og loks á Reykhólum. Var um tíma fangavörður í Síðumúlafangelsi á dögum Geirfinnsmálsins og mjög ósáttur við margt sem þar gekk á þá.

Hlynur vissi vel að dagar hans væru senn taldir en tók þeim fréttum af miklu æðruleysi. Síðustu mánuðina tók hann upp skákþráðinn að nýju þegar hann var rólfær og það var mér mikil ánægja í að gefa honum far þegar svo bar til. Fyrst tók hann þátt í Íslandsmóti öldunga í nóvember og síðar mætti hann til tafls meðal Ása í Stangarhyl og eins á árdegismót í KR, síðast 2. desember, og hafði í fullu tré við marga keppninauta sína. Hann lést svo á Jóladag. Hlynur átti frumkvæði að Minningarmóti Birnu Norðdahl, sem fram fór að Reykhólum haustið 2016.

Blessuð sé hans góða minning.

  / ESE

Jóhann Hjartarson og Helgi Grétarsson efstir fyrir lokaumferð Skákhátíðar MótX

Sjötta og næstsíðasta umferð Skákhátíðar MótX var tefld þriðjudagskvöldið 13. febrúar. Keppendur seildust djúpt í nýjustu fræði skáklistarinnar og snjöll tilþrif í bland við dýrkeyptar yfirsjónir héldu áhorfendum vel við efnið.  

A flokkur

Jóhann Hjartarson og Björgvin Jónsson voru efstir og jafnir fyrir umferðina með fjóra vinninga hvor. Í humáttina komu Hannes Hlífar, Helgi Áss og Jón Viktor með 3½ vinning hver en sá síðastnefndi sat yfir í 6. umferð.

Á efsta borði skildu stórmeistararnir Hannes Hlífar og Jóhann Hjartarson jafnir eftir að Hannes hafði átt ögn vænlegri færi framan af að mati Jóhanns. Á öðru borði fórnaði Helgi Áss skiptamun fyrir peð og góð tök á miðborðinu nægðu til að leggja starfsbróður hans úr stétt lögfróðra, Björgvin Jónsson, að velli í afar vandtefldri skák. Á þriðja borði skellti Jón L. Ingvar Þór með skarpri taflmennsku og var sigurinn verðskuldaður að sögn veflýsandans vinsæla, Ingvars Þórs.

Reynsla og útsjónarsemi Þrastar Þórhallssonar var efnispiltinum Vigni Vatnari ofviða og Leó Örn kom nokkuð á óvart með því að leggja hinn eitilharða sigurvegara síðasta árs, Daða Ómarsson, með svörtu. Kristján Eðvarðsson sneri á Benedikt Jónasson og Lenka tapaði naumlega í endatafli fyrir Guðmundi Halldórssyni eftir að hafa komið sér upp vænlegri stöðu.

Þorsteinn Þorsteinsson og Halldór Grétar skildu jafnir í vel tefldri skák af beggja hálfu og Baldur Kristinsson undirstrikaði enn frekar vaxandi styrk sinn með góðu jafntefli við nýbakaðan Norðurlandameistara, Oliver Jóhannesson.

Æsispennandi viðureignir í lokaumferðinni

Jóhann Hjartarson og Helgi Grétarsson eru efstir að sex umferðum loknum með fjóra og hálfan vinninga hvor. Fast á á hæla þeirra með fjóra vinninga koma Hannes Hlífar, Björgvin Jónsson, Þröstur Þórhallsson, Jón Viktor og Jón L. Þrjá og hálfan vinning hafa Hjörvar Steinn, Örn Leó og Einar Hjalti. 

Þriðjudaginn 20. febrúar kl. 19.30 nær baráttan hámarki á þessu gríðarsterka móti. Þá stýrir Jóhann hvítu fylkingunni gegn svartstökkum Helga í skák sem ræður úrslitum í mótinu ef öðrum hvorum veitir betur. Björgvin hefur hvítt gegn Hannesi Hlífari, Þröstur hvítt gegn Jóni Viktori, Hjörvar Steinn hvítt gegn Jóni L. og Örn Leó leggur til Kristjáns undir merkjum hvítliða. Sjá aðrar viðureignir hér: 

A-flokkurinn á Chess-Results. 

Hvítir hrafnar

Tvær frestaðar skákir úr 4. umferð voru tefldar þriðjudaginn 13. febrúar. Björn Halldórsson og Júlíus Friðjónsson skildu jafnir eftir að Björn hafði staðið ögn betur. Jón Þorvaldson lagði Braga Halldórsson í hörkuskák þar sem allt var lagt undir. Bragi fékk ágæt færi framan af en varnir hans brustu í lokin undan sóknarþunga svarts  

Jón, Bragi og Júlíus eru efstir og jafnir fyrir síðustu umferð með tvo og hálfan vinning hver að lokum fjórum umferðum.

Fimmta og síðasta umferð Hvítra hrafna verður tefld þriðjudaginn 20. febrúar. Þá teflir Friðrik við Björn, Jón mætir Jónasi og Júlíus etur kappi við Braga.

Hvítir hrafnar á Chess-Results.

B-flokkurinn

Þeir Siguringi, Gauti Páll og Birkri Ísak voru jafnir og efstir fyrir umferðina. Þrjár efstu viðureignir flokksins voru á efri hæðinni. Á efsta borði náði Siguringi að knésetja Birki Ísak með svörtu. Og þar sem hinn efnilegi Alexander Oliver Mai náði örugglega jafntefli gegn Gauta Páli á öðru borði, þá er Siguringi efstur fyrir lokaumferðina. Á þriðja borði var Hilimir Freyr nýkominn frá Finnlandi sem Norðurlandameistari og vann sigur á Agnari Tómasi eftir að hafa staðið höllum fæti alla skákina. Aron Þór Mai blandar sér svo í toppbaráttuna með því að vinna Ólaf Evert. 

Í síðustu umferð eiga fjórir skákmenn möguleika á að standa uppi sem sigurvegarar. Spennandi þriðjudagskvöld er framundan.

B-flokkurinn á Chess-Results

 

• Skákhuginn
• Chess-Results

 

Barna- og unglingameistaramót Reykjavíkur verður haldið sunnudaginn 25. febrúar

Barna- og unglingameistaramót Reykjavíkur, sem jafnframt er Stúlknameistaramót Reykjavíkur, fer fram sunnudaginn 25. febrúar í félagsheimili T.R. að Faxafeni 12. Taflið hefst kl.13 og stendur til ca. kl. 17. Tefldar verða 7 umferðir eftir svissnesku kerfi með umhugsunartímanum 10 mínútur á skák, auk þess sem 5 sekúndur bætast við eftir hvern leik (10+5).

Mótið verður reiknað til alþjóðlegra atskákstiga.

Mótið er opið öllum börnum og unglingum, óháð taflfélagi eða búsetu, sem eru fædd árið 2002 eða síðar. Teflt verður í tveimur flokkum: opnum flokki og stúlknaflokki.

Verðlaun verða veitt fyrir þrjú efstu sætin í mótinu. Nafnbótina Unglingameistari Reykjavíkur 2018 hlýtur sá keppandi sem verður hlutskarpastur þeirra sem hafa lögheimili í Reykjavík eða eru meðlimir í reykvísku taflfélagi. Einnig verða veitt verðlaun fyrir þrjár efstu stúlkurnar. Nafnbótina Stúlknameistari Reykjavíkur 2018 hlýtur sú stúlka sem verður hlutskörpust þeirra stúlkna sem hafa lögheimili í Reykjavík eða eru meðlimir í reykvísku taflfélagi.

Til viðbótar verða veitt verðlaun fyrir efsta sætið í árgöngum 2002-2003, 2004-2005, 2006-2007, 2008-2009 sem og 2010 og yngri í báðum flokkum (opna flokknum og stúlknaflokknum).

Núverandi Reykjavíkurmeistarar eru Vignir Vatnar Stefánsson og Batel Goitom.

Skákmótið hefst kl. 13 og er aðgangur ókeypis. Skráning í mótið fer fram rafrænt og má nálgast skráningarformið hér. Einnig má finna skráningarformið í gula kassanum á skak.is. Upplýsingar um þegar skráða keppendur má nálgast hér

Hraðskákmót Reykjavíkur verður haldið miðvikudagskvöldið 21. febrúar

Hraðskákmót Reykjavíkur, sem fresta þurfti síðastliðinn sunnudag vegna veðurs, verður haldið í húsnæði Taflfélags Reykjavíkur að Faxafeni 12 miðvikudaginn 21.febrúar og hefst taflið kl.19:30.

Tefldar verða 9 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.19:20. Skákstjórar verða Ríkharður Sveinsson og Ólafur Ásgrímsson.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.