Fimm efstir á GAMMA Reykjavíkurskákmótinu

Leikar eru farnir að æsast og það var ljóst á baráttunni á efstu borðum GAMMA Reykjavíkuskákmótsins. Aðeins Anish Giri og Gata Kamsky skildu jafnir á efsta borði en sjö næstu skákir voru allar sigurskákir. Fimm skákmenn eru nú efstir og jafnir. Baadur Jobava frá Georgíu var fyrstu að nýta sér jafnteflið á efsta borði og lagði sinn andstæðing laglega. Emre Can kom á óvart og lagði Gawain Jones og loks lagði Vidit Santosh Gujrati sinn andstæðing laglega. Þeir Nils Grandelius og Abhijeet Gupta bættust svo í hópinn eftir mjög langar og strangar skákir.

 

Jóhann Hjartarson er efstur Íslendinga eftir að hafa lagt sænska alþjóðlega meistarann Björn Ahlander. Jóhann er með 5,5 vinning og hálfum vinningi á eftir efstu mönnum. Næstur kemur Bragi Þorfinnsson með 5 vinninga.

 

Áttunda umferðin hefst á morgun klukkan 15:00 og má búast við mikilli baráttu. Nils Grandelius mætir Jobava á efsta borði og Indverjarnir Vidit og Gupta mætast. Jóhann fær hvítt á Erwin l‘Ami, stórmeistara frá Hollandi, en hann vann mótið 2015. Bragi mætir sjálfum Alexei Shirov. Áhorfendur eru velkomnir og skákskýringar hefjst um 17:00.

 

Heimasíða mótsins

Bein útsending með Fionu og Simon Williams

Úrslit og paranir

GAMMA Reykjavíkurskákmótið: Dagskrá dagsins - lykilumferð og skákskýringar Helga Áss

Sjöunda umferð GAMMA Reykjavíkurskákmótsins hefst kl. 17 í dag. Seinna en vanalega þar sem margir erlendu keppendanna fara gullna hringinn og heimsækja gröf Fischers í dag. Það er mikil spennan fyrir daginn. 14 skákmenn efstir og jafnir með 5 vinninga. Jóhann Hjartarson og Björn Þorfinnsson eru svo hálfum vinningi á eftir efstu mönnum.

Margar athyglisverðar skákir eru í dag. Á efsta borði teflir Anish Giri (2771) við Gata Kamsky (2668).

Vert er að benda á indversku skákkonuna R. Vaishaili (2259) sem er aðeins 16 ára. Hún er langstigalægst þeirra fjórtán sem eru á toppnum á mótinu. Vaishaili þessi hefur svolítið fallið í skuggann af bróður sínum Praggnanandhaa (2447) en er auðvitað geysisterk og er tvöfaldur heimsmeistari stúlkna. Í tveimur síðustu umferðum hefur hún lagt stórmeistara að velli.

 

Sigurlaug Friðþjófsdóttir hefur fylgst vel með henni og skrifaði svo á Facebook-vef skákmanna í gær

Í dag tefldi ég frekar stutta skák og náði loksins að horfa á aðrar skákir. Sá 16 ára stúlku (fædd 2001) frá Indlandi með 2259 vinna stórmeistara með 2509. Ekki nóg með það: hún byrjaði á að vinna einn með 1708, tapaði gegn stórmeistara 2607, vann síðan 1928 og 2067 og 2455 og í dag 2509. Á morgun fær hún stórmeistara með 2614! Hún er með alþjóðlegan meistaratitil kvenna með performance upp á 2511 og er þegar búin að hækka um 38 stig!

Þessi stúlka stendur fyllilega undir sínum stigum! Hefur verið að vinna stigalægri og vinna einnig stigahærri! Á morgun teflir hún við fjórða stórmeistarann og þar af stórmeistara nr. 2 með yfir 2600 stig! Þvílík fyrirmynd fyrir ungar skákstelpur og þvílíkt flottur skákmaður sem blómstrar á Reykjavík open. Ég segi: áfram Vaishali! Glæsilegur árangur hingað til!

Litli bróðir Vaishali, Praggnanandhaa, teflir í dag við goðsögnina Alexander Beliavsky (2597). Aldursmunurinn er 52 ár!

Hinn ungi og efnilegi akureyski skákmaður Jón Kristinn Þorgeirsson (2189) fær krefjandi verkefndi en hann teflir við bandaríska stórmeistarann James Tarjan (2414) sem var ólympíumeistari með sveit Bandaríkjanna árið 1976. Tarjan og Beliavsky eru þeir einu á mótinu sem eiga ólympíugull.

Umferð dagsins hefst kl. 17 eins og áður sagði. Skákskýringar Helga Áss Grétarssonar hefjast kl. 19.

• Heimasíða mótsins
• Bein útsending með Fionu og Simon Williams
• Úrslit og paranir

 

 

 

Aftur þéttist toppurinn á GAMMA Reykjavíkurskákmótinu

Jafntefli urðu á fjórum efstu borðum á GAMMA Reykjavíkurskákmótinu. Þau úrslit þýddu að allir með 4 vinninga gátu náð efstu mönnum að vinningum með því að vinna sínar skákir. Niðurstaðan er því að fjórtán skákmenn eru efstir og jafnir með 5 vinninga, þar á meðal allir stigahæstu menn mótsins, Giri, Andreikin, Almasi og Jobava.

 

Björn Þorfinnsson og Jóhann Hjartarson eru nú efstir Íslendinga með 4,5 vinning og stutt frá efstu mönnum. Björn lagði Guðmund Kjartansson og Jóhann lagði indverskan skákmann. Hinn ungi Vignir Vatnar náði ekki að fylgja á eftir góðum úrslitum í gær og tapaði gegn indverska stórmeistaranum Harika. Nokkur úrslit vöktu athygli en Akureyringurinn ungi Jón Kristinn Þorgeirsson vann t.a.m. góðan sigur á íranska alþjóðlega meistaranum Dorsa Derakhshani. Hannes Hlífar Stefánsson átti slæman dag, víxlaði leikjum í betri stöðu gegn Sopiko Guramishvili og hrókur fór í hafið.

 

Sjöunda umferð fer fram á morgun og hefst að þessu sinni klukkan 17:00. Nokkrar athyglisverðar viðureignir verða í boði. Jón Kristinn fær að reyna sig gegnum reyndum bandarískum stórmeistara, James Tarjan. Einnig verður gaman að sjá æskuna og ellina mætast þegar hinn ungi Praggnanandhaa mætir goðsögninni Beliavsky.

 

Heimasíða mótsins

Bein útsending með Fionu og Simon Williams

Úrslit og paranir

Grandelius og Kakulidis sigurvegarar á Pub Quiz

Sænska parið Nils Grandelius og Ellen Kakulidis unnu sigur á Pub Quizinu árlega sem fram fór á Hótel Plaza í gær.  Alls mættu rúmlega 40 keppendur til leiks og stemmningin var góð.

Nils og Ellen svöruðu rétt 25 spurningum af 30. Mjótt var þó á munum og stutt í næstu lið en tvö lið voru með 24 rétt svör og mörg þar stutt á eftir.

Spurningar voru af ýmsum toga og var m.a. spurt um nýlokið Heimsmeistaraenvígi, ýmsar sögulegar stöður, árangur á nýliðnu Ólympíuskákmóti og menn beðnir um að bera kennsl á skákmenn af myndum svo eitthvað sé nefnt.

 

Spurningarnar eru í viðhengi en þrjár spurningar voru vídeó spurningar. 

Skrár tengdar þessari bloggfærslu:

• RvkOpenQuiz2017

Sumarskákmót Fjölnis í Rimaskóla - stórviðburður á Barnamenningarhátíð

Rétt þegar Reykjavík Open er lokið þá verður blásið til næsta "stórmóts", Sumarskákmóts Fjölnis á Barnamenningarhátíð Reykjavíkurborgar 2017. Sumarskákmótið fer fram í hátíðarsal Rimaskóla laugardaginn 29. apríl og hefst kl. 11:00. Öllum áhugasömum skákkrökkum á grunnskólaaldri er boðið að taka þátt í glæsilegu móti. Rótarýklúbbur Grafrvogs gefur eignarbikara og að vanda er fjöldi verðlauna (20) og happadrættisvinninga (5) í boði, allir mjög eftirsóknarverðir - bíómiðar, pítsur og húfur frá 66°N. 

Þátttaka ókeypis en veitingar seldar í skákhléi á 250 kr, Prins póló og gos, safi eða kaffi. Heitt á könnunni fyrir foreldra sem eru að vanda velkomnir að fylgjast með skemmtilegu skákmóti. Skráning á staðnum og því gott fyrir keppendur að mæta 10 - 15 mínútum fyrir mót. Skákstjórar eru þeir Helgi Árnason og Björn Ívar Karlsson. Fögnum sumrinu við skákborðið og mætum næsta laugardag, 29. apríl í Rimaskóla. Skák er skemmtileg. 

Dagskrá dagsins: Spenna umferð - Jón L. með skákskýringar og fótbolti í kvöld

Sjötta umferð GAMMA Reykjavíkurskákmótsins hefst í dag í kl. 15.  Níu skákmenn eru á toppnum með 4½ vinning. Bragi Þorfinnsson er efstur íslensku keppendanna með 4 vinninga. Skákskýringar Jóns L. Árnasonar hefjast kl. 17 og boðið er upp á fóbolta í kvöld sem hefst kl. 22:00 í Fífunni.

Spennandi viðureignir á efstu borðunum eins og sjá má.

 

 

 

 

Bragi Þorfinnsson (2457) er efstur íslensku keppendanna með 4 vinninga. Hann fær krefjandi að tefla við Konstantin Landa (2611). 

Sjö íslenskir skákmenn hafa 3½ vinning. Hannes Hlífar Stefánsson (2566) teflir við hina georísku Sopioko Goramsishvili (2323), Jóhann Hjartarson (2536) við Indverjann Aradhya Garg (2315), Vignir Vatnar Stefánsson (2341) við skákdrottninguna Hariku Dronvalli (2521). Halldór Grétar Einarsson (2257) er fastur í undversku undrabörnunum en hann mætir hinum 11 ára Praggaandandhaa (2447) sem talinn er möguleika á að verða yngsti stórmeistari skáksögunnar. Björn Þorfinnsson (2413) og Guðmundur Kjartansson (2468) mætast og Þröstur Þórhallsson (2413) teflir við Frank Buchenau (2275).

Skákskýringar Jóns L. Árnasonar hefjast kl. 17. 

Fótbolti verður í Fífunni sem á því hafa áhuga. Hægt er að skrá sig til leiks á heimasíðu GAMMA Reykjavíkurskákmótsins. 

 

• Heimasíða mótsins
• Bein útsending með Fionu og Simon Williams
• Úrslit og paranir

 

 

 

Toppurinn enn þéttur á GAMMA Reykjavíkurskákmótinu

Enginn skákmaður er lengur með fullt hús vinninga eftir umferð gærkvöldsins. Jafntefli varð niðurstaðan á þremur efstu borðunum og efstu menn því með 4,5 vinning af 5 mögulegum. Stigahæsti maður mótsins, Anish Giri, varð loks að sættast á skiptan hlut gegn Indverjanum Vidit sem ákvað að endurtaka leiki snemma tafls og úr varð stutt skák.

 

Hannes Hlífar Stefánsson átti ekki góðan dag gegn Georgíubúanum Baadur Jobava sem sá lengra í flækjunum í miðtaflinu. Mikla athygli vakti vösk vörn hins efnilega Vignis Vatnars Stefánssonar gegn Íslandsmeistaranum Jóhanni Hjartarsyni. Vignir náði jafntefli og klárlega með bestu úrslitum á hans unga ferli. Bragi Þorfinnsson vann sína skák og er nú orðinn efstur Íslendinga með fjóra vinninga. Vert er einnig að minnast á góð úrslit hjá Halldóri G. Einarssyni sem gerði jafntefli við indverska undabarnið Nishal Sarin sem er framtíðar stórstjarna.

 

Úrslit gærdagsins þýða að níu skákmenn eru nú efstir og jafnir. Ljóst má vera að hver skák skiptir miklu máli á toppnum núna og hart verður barist. Leikar hefjast aftur klukkan 15:00 og skákskýringar sem fyrr klukkan 17:00. 

 

Heimasíða mótsins

Bein útsending með Fionu og Simon Williams

Úrslit og paranir

Myndagallerí úr fimmtu umferðinni eftir Maria Emelianova og Lennart Ootes

 

Skákþáttur Morgunblaðsins: Dagur vann úrslitaskákina um sæti í landsliðsflokki

Þegar lokaumferðin í áskorendaflokki fór fram um síðustu helgi lá ljóst fyrir að enginn gat náð Guðmundi Gísalsyni að vinningum. Hann hafði hlotið 7 ½ vinning úr átta skákum og langt í næstu menn. Tvö sæti í landsliðsflokki voru í boði og ýmsir möguleikar í stöðunni. Jóhann Ingvason stóð vel að vígi ef kæmi til stigaútreiknings en varð þó að vinna skák sína gegn Tómasi Björnssyni til að vera öruggur með sæti í landsliðsflokknum. Þá áttust við Lenka Ptacnikova og Dagur Ragnarsson og gátu bæði með sigri unnið sæti í landsliðsflokknum ef önnur úrslit yrðu þeim hagfelld. Og eftir mikla baráttu vann Dagur sína skák, Jóhann varð að gera sér jafntefli að góðu og á toppborðinu dró til tíðinda þegar Bolvíkingurinn Halldór Grétar Einarsson vann sigurvegarann. Ekki í fyrsta sinn sem þeir heiðursmenn Halldór og Guðmundur Gíslason eigast við. En þessi úrslit breyttu þó litlu um lokaniðurstöðuna:

1. Guðmundur Gíslason 7 ½ v. (af 9) 2. Dagur Ragnarsson 6 ½ v. 3. Jóhann Ingvason 6 v. 4. – 7. Björgvin Víglundsson, Halldór Grétar Einarsson, Kristján Eðvarðsson og Lenka Ptacnikova 5 ½ v.

Keppendur voru 22 talsins.

Þrír ungir men taka nú sæti í landsliðsflokki, auk Dags, þeir Vignir Vatnar Stefánsson og Bárður Örn Birkisson. Verður skemmtilegt að fylgjast með taflmennsku þeirra. Dagur missti af lestinni í fyrra en mætir nú enn sterkari á þennan vettvang. Hann náði snemma frumkvæðinu í úrslitaskákinni og vann sannfærandi sigur:

Skákþing Íslands 2017; 9. umferð:

Lenka Ptacnikova – Dagur Ragnarsson

Vængtafl

1. c4 c6 2. Rf3 d5 3. b3 Bg4 4. Re5 Bh5 5. Bb2 f6 6. Rf3 e5 7. cxd5 exd5 8. g3 Bd6 9. Bg2 Re7 10. O-O O-O 11. d3 Rbc6 12. Rc3 Dd7 13. a3 a5 14. Rb5 Bb8 15. a4 Ra7 16. Rxa7 Bxa7 17. d4?

Þessi leikur er verri en enginn. Það er smá galli við vængtöflin að hvítur á stundum erfitt með að finna haldgóða áætlun eftir byrjunarleikina.

17. e4 18. Rd2 b5 19. f3? f5

Eðlilegur leikur en sterkara er 19. e3! 20. Rb1 b4! og riddarinn á b1 getur sig hvergi hrært.

20. e3 b4!

Þenur út áhrifasvæði sitt. Það kemur líka á daginn a biskupinn á b2 hefur ekkert svæði að vinna með.

21. Hc1 g5 22. De1 Hae8 23. f4 gxf4 24. gxf4 Rg6 25. Df2 Bb6 26. Hc2 Bd8 27. Hfc1 Rh4 28. Kh1 He6 29. Bf1 Hg6 30. Bb5 Df7 31. Hc6 Hg2 32. Hg1 Hxg1+ 33. Kxg1 Kh8 34. Hc8 Rf3 35. Rxf3 exf3!

Einnig kom til greina að tala við biskup. En úr þessu er ekki nokkur leið fyrir hvítan að verjast. 

36. Kf1 De6 37. Hxd8 Hxd8 38. Dh4 Hg8 39. Dxh5 Dxe3 

Hvítur getur varist máti með því að gefa drottninguna en það er vitaskuld algerlega vonlaust svo Lenka lagði niður vopnin.

 

Wesley So sigraði á bandaríska meistaramótinu

„Skytturnar þrjár“, Wesley So, Hikaru Nakamura og Fabiano Carurana, áttu ekki sjö dagana sæla á bandaríska meistaramótinu sem lauk í St. Louis um síðustu helgi. Eftir ellefu umferðir varð So að deila efsta sæti með Alexander Onischuk en þeir hlutu 7 vinninga af af ellefu mögulegum. Þeir þurftu að tefla tvær atskákir um sæmdarheitið Skákmeistari Bandaríkjanna 2017. So sigraði 1 ½ :½ og bætti þar með enn einni rósinni í hnappgatið. Nakamura og Caruana urðu í 3.-5. sæti ásamt Akobian en þeir fengu allir 6 ½ vinning.

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 15. apríl 2017

Skákþættir Morgunblaðsins

Dagskrá dagsins: Fimmta umferð, úrslit Barna Blitz og Pub Quiz - Hannes teflir við Jobava

Í gær og dag eru stærstu dagar á skákhátíðinni Reykjavíkurskákmótinu. Í gær fór fram fjölmennt hraðskákmót og tveir fyrilestar fyrir utan fjórðu umferð. Mikil stemming var í Hörpu og var skákskýringasalurinn þétt setinn í gær. Búast má við enn betri aðsókn um helgina. 

Í dag verður afar mikið um vera. Úrslit Barna Bltiz hefjast núna kl. 11:00. þar tefla átta íslenskir skákmenn til úrslita. Það eru: Óskar Víkingur Davíðsson, Stefán Orri Davíðsson, Róbert Luu, Ísak Orri Karlsson, Balthazar Máni Wedholm Gunnarsson, Kristján Dagur Jónsson, Arnór Gunnlaugsson og Benedikt Þórisson keppea eftir úsláttarfyrirkomulagi Krakkarnir tóku þátt í undankeppnum sem haldnar voru í TR, Hugin, Víkingaklúbbnum og Fjölni. Mótið stendur til u.þ.. 12:30 og eru áhorfendur velkomnir.

Umferð dagsins hefst kl. 15.  Hannes Hlífar Stefánsson (2566) fær krefjandi verkefni en hann teflir við georgíska ofurstórmeistarann Baadur Jobava (2712), Jóhann Hjartarson (2536) mætir Vigni Vagnari Stefánssyni (2341), Halldór Grétar Einarsson (2257) teflir við indverska undrabarnið Nihal Sarin (2424). 

RÚV fjallaði um indversku undradrengina í gær. Þá frétt má nálgast hér.

 

Skákskýringar Ingvars Þórs Jóhaannessar hefjast kl. 17.

Pub Quiz sem eru iðulega væusælasti sérviðburður mótsins fer fram Hótel Plaza í kvöld og hefst kl. 21:30. Nánar um vibðurinn hér.

Beinar útsendingar á vefnum hefjast kl. 15. Þær eru í umsjón Simon Williams og Fionu Steil-Antoni.

 

• Heimasíða mótsins
• Úrslit og paranir
• Beinar útsendingar á vefnum

Mustafa Yilmaz sigurvegari á Reykjavik Open Blitz

Tyrkneski stórmeistarinn Mustafa Yilmaz kom sá og sigraði á hraðskákmóti Reykjavík Open - Reykjavik Open Blitz.

Alls mættu til leiks 68 skákmenn tilbúnir að kljást á reitunum 64 þó nokkrir hafi helst úr lestinni snemma móts.

Eftir nokkra hnökra í byrjun rann mótið hratt í gegn en tefldar voru 9 umferðir með umhugsunartímanum 3+2 eða 3 mínútur á skákina plus 2 sekúndur í viðbótartíma á hvern leik.

Mustafa lét snemma til sín taka og vann allar sínar skákir snemma móts. Nokkrir fylgdu á eftir í humátt og sérstaklega byrjuðu Björn Þorfinnsson og Vignir Vatnar vel með fjóra vinninga af fjórum. Björn lagði að velli Luca Barillaro sem hafði farið skemmtilega af stað og lagt að velli stórmeistarana Helga Áss Grétarson og Simon Williams.

Yilmaz gaf lítið eftir og gaf í raun í og hafði lagt alla andstæðinga sína að velli eftir 8 umferðir. Tyrkinn átti sgurinn vísan fyrir síðustu umferð.

Baráttan um hin verðlaunasætin tvö var hinsvegar mjög hörð en þar hafði Svíinn Erik Blomqvist átt góðan endasprett og var kominn í annað sætið meðan Björn Þorfinnsson sat í því þriðja.

Björn átti erfiða skák gegn Aman Hambleton sem var hálfum vinningi á eftir honum ásamt fjölmörgum öðrum.

Blomqvist og Yilmaz tryggðu sín verðlaun með stuttu jafntefli í síðustu umferð en Björn sýndi úr hverju hann er gerður og lagði Aman Hambleton að velli og tryggði veru sína á verðlaunapalli.

Stemmning var almennt mjög góð og menn höfðu gaman að taflmennskunni. Vert er einnig að minnast á góðan árangur Arnljóts Sigurðssonar sem lagði hvern meistarann á fætur öðrum.

Úrslit má nálgast á Chess-results