Jón Kristinn jólasveinn SA annað árið í röð!

Jólahraðskákmót SA var háð í kvöld, 21. desember. Tólf keppendur mættu til leika og var toppbaráttan jöfn og spennandi. Sigurvegari síðsta árs, Jón Kristinn Þorgeirsson, tapaði fyrstu skák sinni á mótinu, en vann næstu 10 viðureignir og kom einum vinningi undan helstu keppinautum sínum í mark. Næstir komu í mark Áskell Örn Kárason og Símon Þórhallsson. 

Nánar á heimasíðu SA

 

Jólaskákmót Riddarans fer fram 27. desember.

RIDDARINN - skákklúbbur eldri borgara á StórHafnarfjarðarsvæðinu - efnir til glæsilegs jólaskákmóts miðvikudaginn 27. desember – þann 3ja í Jólum, í herbúðum sínum og höfuðstöðvum í Vonarhöfn, Standbergi, safnaðarheimili Hafnarfjarðarkirkju, þar sem fjölmargir valinkunnir gamlingjar hittast til tafls allan ársins hring, sér til ómældrar ánægju og yndisauka. 

Tefldar verða 11 umferðir að venju með 10 mín. uht. og hefst mótið kl. 13 og lýkur um fimm leitið. Þátttökugjald er kr. 500 og innifelur kaffi, konfekt og ýmsar ræsingar meðan á tafli stendur. Veglegir jólapakkar í verðlaun og ýmis glaðningur fyrir aðra. 

Klúbburinn færir skákunnendum og landsmönnum öllum nær og fjær hugheilar hátíðarkveðjur, árs og friðar. 

Hér má sjá úrslitin frá í fyrra og hitteðfyrra til gamans: (Munið að tvíklikka)

Unglingameistaramóti Íslands (u22) fer fram 27. og 28. desember - opið öllum ungmennum með skákstig

Unglingameistaramót Íslands í skák (u22) fer fram dagana 27. og 28. desember nk. Íslandsmeistarinn tryggir sér keppnisrétt í næsta landsliðsflokki Skákþings Íslands. Mótið verður að þessu sinni aðeins fimm umferðir. Þrjár atskákir og tvær kappskákir. Mótið verður reiknað til alþjóðlegra skákstiga.

Dagskrá:

• 1.-3. umferð,atskák (20+5), miðvikudaginn, 27. desember, kl. 13-16
• 4. umferð, kappskák (90+30), fimmtudaginn, 28. desember, kl. 10-14
• 5. umferð, kappskák (90+30), fimmtudaginn, 28. desember, kl. 15-19

Mótið er opið öllum skákmönnum fæddum 1995 og síðar sem hafa alþjóðleg skákstig.

Teflt verður um Íslandsmeistaratitilinn verði menn jafnir að vinningum. Stig eru látin gilda um önnur sæti. Íslandsmeistarinn fær 50.000 kr. ferðastyrk á skákmót erlendis auk keppnsirétts í næsta landsliðsflokki. 

Mótið fer fram í Skáksambandi Íslands Faxafeni 12. 

Skráning fer fram á Skák.is (guli kassinn). Skráningu lýkur á miðnætti annan dag jóla, 26. desember.

Upplýsingar um þegar skráða keppendur má finna hér.

Jólahraðskákmót TR fer fram 28. desember

ólahraðskákmót Taflfélags Reykjavíkur verður haldið fimmtudaginn 28. desember og hefst taflið klukkan 19:30. Tefldar verða 9 umferðir og verður umhugsunartíminn 4 mínútur á skák auk þess sem 2 sekúndur bætast við eftir hvern leik (4+2). Teflt verður í húsnæði TR að Faxafeni 12. Mótið verður reiknað til alþjóðlegra hraðskákstiga.

Þátttökugjald er 1.000kr (greiðist með reiðufé á staðnum). Frítt er fyrir félagsmenn TR sem eru 17 ára eða yngri. Verðlaun verða veitt fyrir þrjú efstu sætin.

Skráningarform

Skráðir keppendur

Jólahraðskákmeistarar síðustu ára:

2016: Páll Agnar Þórarinsson 2015: Vignir Vatnar Stefánsson 2014: Oliver Aron Jóhannesson 2013: Jóhann Ingvason 2012: Oliver Aron Jóhannesson 2011: Daði Ómarsson 2010: Jóhann Ingvason 2009: Sigurður Daði Sigfússon 2008:Gunnar Freyr Rúnarsson 2007: Davíð Kjartansson 2006: Stefán Kristjánsson 2005: Hrannar Baldursson 2004: Björn Þorfinnsson 2003: Arnar E. Gunnarsson 2002: Jón Viktor Gunnarsson 2001: Helgi Áss Grétarsson.

Jólamót KR: Vignir Vatnar fór með sigur af hólmi

Jólamót Skákdeild KR fór fram sl. mánudagskvöld og var fjölsótt. Hinn ungi og ört vaxandi meistari  Vignir Vatnar Stefánsson stóð uppi sem sigurvegari mótsins eftir harða baráttu við Dag Ragnarsson og  Örn Leo Jóhannsson, sem næstir komu. Tefldar voru 13 umferðir.

Allir gátu leyft sér að brosa breitt í kampinn í mótslok, enda við verðuga andstæðinga að etja í þessu velheppnaða móti.  Eins og sjá má á meðf. myndum og mótstöflu var létt yfir mannskapnum þó ýmsu gengi og ekkert væri gefið eftir í baráttunni á borðinu. 

Hlé verður nú á skákiðkun í KR-heimilinu til 6. janúar vegna hástíðarhalda og flugeldasölu.

Sprúðlandi frammistaða Tómasar á hraðskákmóti Hugins (N)

Hið árlega og alþjóðlega hraðskákmót Hugins (N) fór fram sunnudaginn 17. desember. Níu glæsileg ungmenni (hvað allir athugi!) frá allt að tveimur þjóðlöndum voru mætt til leiks og tefldu einfalda umferð, allir við alla.

Tveir keppendur tóku fljótt forystuna í mótinu og mátti vart á milli sjá hvor þeirra yrði hlutskarpari. Að endingu fór það svo að þeir mættust í innbyrðis viðureign, sem var talið harla óvenjulegt í “allir við alla” móti á Húsavík, en ungmennin glæsilegu létu það ekki á sig fá og voru engin álitamál send stjórnvöldum til úrlausnar vegna þessa. Hin meintu glæsilegu ungmenni voru eðli máls skv. þeir Smári Sigurðsson og Tómas Veigar. Skákinni lauk að lokum og urðu úrslit á þann veg að annar þeirra vann. Sprúðlandi frammistaða.

Tómas Veigar fór því með sigur af hólmi, enda þurftu allir átta andstæðingar hans að lúta í dúk að þessu sinni. Smári Sigurðsson var í öðru sæti með 7 vinninga.

Annað glæsilegt ungmenni, Sigurður G Daníelsson, sem búsettur er viljandi á Raufarhöfn, sýndi á köflum glæsilega takta, ekki síst á málflutningssviðinu, hreppti þriðja sætið með 5 vinninga.

Síðast en alls ekki síst var það Kristján Ingi Smárason sem stóð sig best í flokki yngri keppenda, en hann lagði að velli nokkra af reynsluboltum mótsins. Afar góð frammistaða hjá þessum efnilega skákmanni!

Sjá nánar á Skákhuganum. 

Brynleifur Sigurjónsson: 100 ára ástríðuskákmaður

BRYNLEIFUR SIGURJÓNSSON, bifreiðastjóri, fagnar í dag 100 ÁRA afmæli sínu. Þessi aldni höfðingi og bóndasonur frá Geldingaholti í Skagafirði er fæddur 20. desember 1917, á dögum fyrri heimstyrjaldarinnar, og hefur því marga fjöruna sopið á lífsleiðinni ef að líkum lætur.

Skákin hefur þó verið hans líf og yndi alla tíð. Enn í dag teflir hann reglulega við félaga sinn Jónas Kr. Jónsson, nokkrum árum yngri, sjálfum sér og honum til heilsubótar, enda engin spurning í hans huga að skákiðkun eflir andlegt atgervi. Fyrir utan það að vera góð afþreying og dægradvöl og hafa mikið félagslegt gildi, ekki síst fyrir þá sem eldri eru.  

Þar til fyrir þremur árum mætti hann nokkrum sinnum á vetri til tafls í skákklúbbi Félags eldri borgara í Reykjavík, að Ásgarði í Stangarhyl, kom þá jafnan keyrandi sjálfur. Stóð sig vel og vann yfirleitt helming skáka sinna. Enda hafði hann það orð á sér að vera afar yfirvegaður skákmaður og erfiður andstæðingur, en þó hvers manns hugljúfi.

Lengst af tefldi hann þó í hópi félaga sinni á Hreyfli eftir að gerðist leigubílstjóri upp úr miðri síðustu öld. Var í skáksveit HREYFILS sem fór til keppni í NSU - Norræna sporvagna sambandinu og tók þátt í fleiri sveita- og firmakeppnum. Þar áður var hann langferða- og vörubílstjóri, sjómaður og verkamaður.

Brynleifur var kvæntur Öldu Gísladóttur sem lést 2011. Þau bjuggu alla sína búskapartíð í henni Reykjavík. Hann er mjög vel ern og dvelst nú að hjúkrunarheimilinu Skjóli.  

Skákhreyfingin árnar honum heilla á 100 ára afmælinu.  /ESE

Skákdeild Breiðabliks og Bolungarvíkur og Taflfélag Reykjavíkur Íslandsmeistarar unglingasveita

Íslandsmót unglingasveita fór fram 10. desember sl. í Garðaskóla í Garðabæ. Mótshaldið var á vegum Taflfélags Garðabæjar. Mótið var æsispennandi og úrsltin réðust seint um síðir. Svo fór að sveitirnar komu jafnar í mark með 23½ vinning af 28 mögulegum. Var það sameiginleg niðurstaða Skáksambands Íslands og félaganna tveggja að félögin myndu deila með sér titlinum góða þetta árið. Lokaafhending verðlaunana fór fram á Friðriksmóti Landsbankans.

Lið Íslandsmeistara Breiðabliks og Bolungarvíkur skipuðu: 

1. Stefán Briem 6 af 7
2. Birkir Ísak Jóhannsson 4½ v.
3. Arnar Milutin heiðarsson 7 v.
4. Benedikt Briem 6 v.

Liðsstjóri var Birkir Karl Sigurðsson

Lið Íslandsmeistara Taflfélag Reykjavíkur skipuðu:

1. Vignir Vatnar Stefánsson 6½ v. af 7
2. Alexander Oliver Mai 6 v.
3. Róbert Luu 6 v.
4. Freyja Birkisdóttir 5 v.

Liðsstjóri var Daði Ómarsson

Á myndina hér að ofan vantar Róbert og Freyju. 

B-sveit Breiðabliks og Bolungarvíkur endaði í þriðja sæti. Þá sveit skipuðu:

1. Gunnar Erik Guðmundsson 5½ v.
2. Örn Alexandersson 6 v.
3. Ísak Orri Karlsson 4 v.
4. Tómas Möller 4 v.

Liðsstjóri var Kristófer Gautason

Borðaverðlaun hlutu:

1. Vignir Vatnar Stefánsson (TR) 6½
2. Örn Alexander (B&B-b), Alexander Oliver Mai (TR) og og Bjartur Þórisson (TR-d) 6 v.)
3. Arnar Milutin Heiðarsson (B&B) 7 v.
4. Benedikt Briem (B&B), Anton Breki Óskarsson (Fjölni) og Þorsteinn Jakob F. Þorsteinsson (SSON) 6 v.

 

TR-ingar fóru mikinn því þeir sveitar urðu efstar c-h liða. 

Ítarlega umfjöllun um mótið má finna á heimasíðu TR og einnig má finna umfjöllun á Facebook-síðu TG. 

Lokastöðuna má finna á Chess-Results. 

Hannes Hlífar Íslandsmeistari í hraðskák eftir sigur á Friðriksmóti Landsbankans

Friðriksmót Landsbankans - Íslandsmótið í hraðskák fór fram við frábærar aðstæður í útibúi bankans í Austurstræti í fyrradag. Fjórtánda árið í röð að mótið fari fram en heiðurinn af því í upphafi áttu Árni Emilsson, þáverandi útibússtjóri og Guðfríður Lilja Grétarsdóttir. Friðrik Ólafsson lék fyrsta leikinn 1. d2-d4 fyrir Hjörvar Stein Grétarsson langstigahæsta keppanda mótsins gegn Stefáni Arnalds. Nærri 100 keppendur tóku þátt.

 

Hjörvar byrjaði best allra og vann fimm fyrstu skákirnar og hafði 6½ vinning eftir 7 umferðir. Í áttundu og níundu umferð tapaði hann hins tveimur skákum. Eftir það náði Hannes Hlífar Stefánsson (2516) forystunni og lét hana aldrei af hendi. Hannes hlaut 11 vinninga í 13 skákum sem er afar góður árangur. Helgi Ólafsson (2354) og Hjörvar Steinn komu næstir með í mark með 10½ vinning. Árangur sem öllu jöfnu myndi duga til sigurs sem segir mikið um góðan árangur þremenninga. Sigurbjörn Björnsson (2387) og Guðmundur Kjartansson (2419) urðu í 4.-5. sæti með 9½ vinning. 

Þótt ótrúlega megi virðast er þetta fyrsti sigur Hannesar á Friðriksmóti Landsbankans. Hannes hefur hins vegar þrívegis áður orðið Íslandsmeistari í hraðskák: 1988, 1991 og 2005.

Aðrir verðlaunahafar urðu 

• 2001-2200: Dagur Ragnarsson
• U2000: Dagur Andri Friðgeirsson
• U16: Vignir Vatnar Stefánsson
• Y60: Bragi Halldórsson
• Útdreginn: Stephan Briem 

Lokastöðuna má nálgast á Chess-Results.

Auk þess voru afhend verðlaun fyrir Íslandsmót unglingasveita en þar hömpuðu Skákdeild Breiðabliks og Taflfélag Reykjavíkur Íslandsmeistaratitilinum.

 

Árni  Emilsson, upphafsmaður mótsins, afhendi verðlaunin í mótslok ásamt Gunnari Björnssyni, forseta SÍ.

 

Skáksambandið færir Landsbankanum miklar þakkir fyrir frábært samstarf við mótið ný sem endranær. Friðriksmót Landsbankans - Íslandsmótið í hraðskák fer fram laugardaginn 15. desember 2018.

Skákstjórar voru Gunnar Björnsson, Ingibjörg Edda Birgisdóttir og Ólafur S. Ásgrímsson.

Myndaalbúm mótsins. 

 

Úrslit á jólamóti Víkingaklúbbsins 2017

Jólaskákmót Víkingaklúbbsins var haldið miðvikdaginn 13. desember á æfingartíma. Alls tóku tuttugu keppendur þátt, en mótið var í sterkari kantinum. Benedikt Þórisson (2005) var í miklu stuði á mótinu og vann allar sínar skákir og endaði í efsta sæti. Næstir honum komu svo hinir bráðefnilegu Gunnar Erik (2007) og Árni Ólafsson (2006) en báðir hlutu þeir 4. vinninga, en Gunnar Erik varð örlítið hærri á stigum.  Efst stúlkna á mótinu varð Soffía Berndsen  Einar Dagur Brynjarsson varð efstur Víkinga á mótinu og Bergþóra Gunnarsdóttir varð efst Víkinga í stúlknaflokki.

Tefldar voru 5. umferðir með 7. mínútan umhugsunartíma. Skákstjóri á mótinu var Ingibjörg Edda, en henni til aðstoðar voru þeir Gunnar Fr Rúnarsson og Sigurður Ingason..

Úrslit

1. Benedikt Þórisson 5 af 5
2. Gunnar Erik Guðmundsson 4
3. Árni Ólafsson 4
4. Adam Omarsson 3.5
5. Óttar Örn Bergmann 3
6. Einar Dagur Brynjarsson 3

Stúlkur úrslit

1. Soffía Berndsen 3 af 5
2. Anna Katarína 2
3. Bergþóra Helga 2

Bestur 2005: Benedikt Þórisson
Bestur 2006: Árni Ólafsson
Bestur 2007:  Gunnar Erik
Bestu 2008:  Soffía Berndsen
Bestur 2009:  Einar Dagur Brynjarsson
Bestur 2010:  Gunnar Jóhannsson
Bestur 2011:  Jósep Omarsson

Nánari úrslit á chessresults hér:

Nánar á heimasíðu Víkingsklúbbsins.