Jólamót Víkingaklúbbsins fer fram á föstudagskvöldið

Jólamót Víkingaklúbbsins verður haldið föstudaginn 29. des í húsnæði Skáksambands Íslands og hefst það kl 19.30. Teflt verður bæði skák og Víkingaskák. Fyrst 6. umferða skákmót með 5 mínútna umhugsunartíma, en eftir það verða 6. umferðir í Víkingaskák, þs 6 umferðir 7. mínútur. Verðlaun í boði fyrir þrjú efstu sæti og ókeypis veitingar, m.a Víkingamjöður. Ekki er nauðsynlegt að taka þátt í báðum mótunum og þeir sem ætla að tefla einungis Vîkingaskák mæta ekki seinna en kl 21.30.  Víkingaskákmótið er jafnframt Ìslandsmótið í Víkingahraðskák. Einnig eru veitt sérstök verðlaun fyrir besta árangur í báðum mótunum, en sá sem er með besta árangurinn úr báðum mótunum er jafnframt Íslandsmeistari í tvískák.  Í Víkingaskákinni er jafnframt veitt verðlaun fyrir besta liðið. Þrjú bestu skor gilda.

Sérstök aukaverðlaun fyrir Víkingaskák:  1. sæti:  8000, 2. sæti 6000, 3. sæti 4000, 1. sæti kvenna:  5000 (2. sætið 3000 og 3. sæti 2000)  1. sæti unglinga 5000 (2. sætið 3000 og 3. sæti 2000).

Skráning á mótið fer m.a fram á netfangið: vikingaklubburinn(hjá)gmail.com.

Mótið á sér orðið nokkra ára sögu eins og sjá má:

Mótið 2016 hér:

Mótið 2015 hér:

Mótið 2014 hér:
Mótið 2013 hér:
Mótið 2012 hér:
Mótið 2011 hér: 
Mótið 2010 hér:
Mótið 2009 hér:

Jólaskákmót Riddarans fer fram í dag

RIDDARINN - skákklúbbur eldri borgara á StórHafnarfjarðarsvæðinu - efnir til glæsilegs jólaskákmóts miðvikudaginn 27. desember – þann 3ja í Jólum, í herbúðum sínum og höfuðstöðvum í Vonarhöfn, Standbergi, safnaðarheimili Hafnarfjarðarkirkju, þar sem fjölmargir valinkunnir gamlingjar hittast til tafls allan ársins hring, sér til ómældrar ánægju og yndisauka. 

Tefldar verða 11 umferðir að venju með 10 mín. uht. og hefst mótið kl. 13 og lýkur um fimm leitið. Þátttökugjald er kr. 500 og innifelur kaffi, konfekt og ýmsar ræsingar meðan á tafli stendur. Veglegir jólapakkar í verðlaun og ýmis glaðningur fyrir aðra. 

Klúbburinn færir skákunnendum og landsmönnum öllum nær og fjær hugheilar hátíðarkveðjur, árs og friðar. 

Hér má sjá úrslitin frá í fyrra og hitteðfyrra til gamans: (Munið að tvíklikka)

Skrykkjót byrjun heimsmeistarans í Sádi Arabíu

Heimsmeistaramótið í atskák hófst í dag í Riyadh í Sádi Arabíu. Heimsmeistarinn, Magnus Carlsen, tapaði í fyrstu umferð fyrir Kínverjanum Bu Xiangzhi rétt eins og hann gerði í heimsbikarmótinu í Georgíu í haust. Heimmeistarinn hefur 3½ vinning eftir 5 umferðir og er vinningi á eftir efstu mönnum Baadur Jobava og Vladimir Fedoseev. Í kvennaflokki er kínverska skákkonan Ju Wenjun efst með fullt hús.

Umferðir 6-10 eru tefldar á morgun en alls eru tefldar 15 umferðir. Taflmennskan hefst kl. 11. Mótinu lýkur á fimmtudag. 

Aðstæður á skákstað munu vera afar góðar og hefur Chess.com eftir Vishy Anand; "I really think they have done a very spectacular event".

Þátttökuleysi Ísraelmanna, sem ekki fengu vegabréfsáritun, setur hins slæman svip á mótshaldið. Skáksamband Ísrael hefur þegar sent frá sér harðort bréf til FIDE þar sem þeir mótmæla mótshaldinu og því að FIDE standi að móti þar sem ekki allir hafi þátttökurétt. Áður hafði FIDE sent frá sér óundirritaða yfirlýsingu þar sem fram hafði komið að skákmenn frá Íran og Katar fengju að taka þátt - en ekkert minnst á stöðu Ísraelsmanna. 

Yfirlýsingar FIDE og Skáksambands Ísrael fylgja með sem viðhengi. 

Nánar á Chess.com.

 

• Heimasíða mótsins
• Beinar útsendingar (Chess24)
• Chess-Results

Skrár tengdar þessari bloggfærslu:

• Yfirlýsing FIDE
• Bréf Ísrael til FIDE

Heimsmeistaramótið í atskák hefst kl. 11 í Sádi Arabíu

Heimsmeistaramótið í atskák hefst kl. 11 í Riyadh í Sádi Arabíu. Mótshaldið er vægast samt umdeilt enda hafa mannréttindi, sérstaklega réttindi kvenna, ekki verið í hávegum höfð í landinu. Mótið er þó sérstaklega umdeilt fyrir það að ísraelskir skákmenn fengu ekki vegabréfsáritun enda viðurkenna Sádar ekki tilveru landsins.

Þessar staðreyndir breyta því ekki að langflestir sterkustu skákmenn heims taka þátt með  Magnus Carlsen, fremstan í flokki. Á myndinni hér á ofan má sjá heimsmeistarann ásamt Georgios Makropoulus starfandi forseta FIDE við setningu mótsins. Karjakin (heimsmeistari í hraðskák) og Ivanchuk (heimsmeistari í atskák) freista þess báðir að verja titil sinn. 

Heimsmeistaramótið í atskák tekur þrjá daga (26.-28 mars). Tímamörk eru 15+10. Dagana 29. og 30. desember fer fram heimsmeistaramótið í hraðskák. Tímamörk eru 3+2.  

Keppendalista mótsins má finna hér. Meira en 100 stórmeistarar eru skráðir til leiks. Hjörvar Steinn Grétarsson hafði keppnisrétt í mótinu en afþakkaði boð um þátttöku. 

Keppendalista kvennaflokks má finna hér. FIDE fékk því framgengt að konur þyrftu ekki að tefla með slæður á mótinu. Það skref dugði þó ekki til fyrir Muzychuk-systurnar úkraínsku en þær tefla ekki á mótinu í mótmælaskyni við staðsetningu þess. Anna Muzychuk er núverandi heimsmeistari í bæði at- og hraðskák. 

Omar Salama er einn skákdómara mótsins (má sjá fyrir miðri mynd að ofan). 

 

• Heimasíða mótsins
• Beinar útsendingar (Chess24)
• Chess-Results

Unglingameistaramót Íslands (u22) - hefst á morgun - skráningarfrestur rennur út á miðnætti

Unglingameistaramót Íslands í skák (u22) fer fram dagana 27. og 28. desember nk. Íslandsmeistarinn tryggir sér keppnisrétt í næsta landsliðsflokki Skákþings Íslands. Mótið verður að þessu sinni aðeins fimm umferðir. Þrjár atskákir og tvær kappskákir. Mótið verður reiknað til alþjóðlegra skákstiga.

Dagskrá:

• 1.-3. umferð,atskák (20+5), miðvikudaginn, 27. desember, kl. 13-16
• 4. umferð, kappskák (90+30), fimmtudaginn, 28. desember, kl. 10-14
• 5. umferð, kappskák (90+30), fimmtudaginn, 28. desember, kl. 15-19

Mótið er opið öllum skákmönnum fæddum 1995 og síðar sem hafa alþjóðleg skákstig.

Teflt verður um Íslandsmeistaratitilinn verði menn jafnir að vinningum. Stig eru látin gilda um önnur sæti. Íslandsmeistarinn fær 50.000 kr. ferðastyrk á skákmót erlendis auk keppnsirétts í næsta landsliðsflokki. 

Mótið fer fram í Skáksambandi Íslands Faxafeni 12. 

Skráning fer fram á Skák.is (guli kassinn). Skráningu lýkur á miðnætti annan dag jóla, 26. desember.

Upplýsingar um þegar skráða keppendur má finna hér.

Gleðileg skákjól: HM í at- og hraðskák hefst annan í jólum

Skák.is óskar skák- og skákáhugamönnum nær og fjær gleðilegra jóla. Sem fyrr geta skákáhugamenn notið skákarinnar um jólin.

Helstu mót innanlands 

• Jólamót Riddarans, 27. desember (60 ára eldri)
• Unglingameistaramót Íslands, 27. og 28. desember (22 og yngri)
• Jólahraðskámót TR, 28. desember (opið öllum)
• Hverfakeppni SA, 28. desember (opið öllum)
• Jólamót Víkingaklúbbins, 29. desember (opið öllum)

Annan í jólum hefst heimsmeistaramótið í atskák og hraðskák í Riydh í Saudi Arabíu 26.-30. desember. Mótshaldið í Saudi Arabíu er afar umdeilt vegna mannréttindabrota í landinu og þegar þetta er ritað bendir flest til þess að keppendur frá Ísrael og Katar fái ekki vegabréfsáritun. Nánar á Chess.com. 

Meðal þeirra sem ekki taka þátt í mótmælaskyni eru Nakamura og úkraínsku Muzychuk-systurnar. Anna er núverandi heimsmeistari kvenna í atskák og hraðskák og sér fram á að tapa báðum titlunum á næstu dögum. Maria er fyrrverandi heimsmeistari kvenna. 

Það breytir þó ekki því að í Saudi Arabíu hefst mikil skákveisla á næstu dögum sem íslenskir skákáhugamenn munu án efa fylgjast vel með. Meðal keppenda er heimsmeistarinn í skák, Magnus Carlsen. Ísland á sinn fulltrúa en Omar Salama, varaforseti SÍ og einn virtasti skákdómari heims, verður meðal skákdómara mótsins. 

Skák.is verður með tengla á mótið á annan í jólum. 

Heimasíða mótsins.

Skákþáttur Morgunblaðsins: Tauganet AlphaZero og Monte Carlo-tréð

Það er athyglisvert að skoða tölur og ákveðin gildi þegar ofurforritið AlphaZero ber á góma. Hið skilgetna afkvæmi Google íhugaði skáklistina í fjóra klukkutíma og vann að því loknu forritið Stockfish með 64 vinningum gegn 36 án þess að tapa skák. AlphaZero mun ekki hafa haft „til hliðsjónar“ skákir helstu meistara sögunnar en í byrjun tafls komu þó margsinnis upp stöður sem oft hafa sést í viðureignum nafntogaðra meistara. Stockfish, sem er að styrkleika í kringum 3.400 Elo, reiknar út 70 milljón stöður á sekúndu en AlphaZero reiknar „einungis“ 80 þúsund stöður á sekúndu. Stockfish „sólundar“ orku sinni með því að reikna út alla möguleika en „tauganet“ AlphaZero vinsar úr þá möguleika sem álitlegastir eru í aðgerð sem kallast Monte Carlo-tréð; forritið teflir við sjálft sig í hvert sinn sem það á leik og veltir upp ótal möguleikum áður en það kemst að niðurstöðu. Daði Örn Jónsson tölvufræðingur segir að „tauganetin“ kanni nú áður óþekktar lendur og vænta megi stórkostlegra uppgötvana á næstu árum og áratugum.

Ein athyglisverðasta staðan úr þeim tíu viðureignum sem birst hafa opinberlega kallaði eiginlega strax á samanburð við önnur forrit. Tíu fyrstu leikir þessarar skákar féllu eins og í 2. einvígisskák Kasparovs og Karpovs frá fyrsta heimsmeistaraeinvígi þeirra haustið 1984:

AlphaZero – Stockfish

Drottningarindversk vörn

1. d4 Rf6 2. c4 e6 3. Rf3 b6 4. g3 Bb7 5. Bg2 Be7 6. O-O O-O 7. d5 exd5 8. Rh4 c6 9. cxd5 Rxd5 10. Rf5 Rc7 11. e4 Bf6 12. Rd6 Ba6 13. He1 Re8 14. e5 Rxd6 15. exf6 Dxf6 16. Rc3 Rb7 17. Re4 Dg6 18. h4 h6 19. h5 Dh7 20. Dg4 Kh8

Víða um heim voru menn duglegir að setja þessa stöðu upp til útreikninga. Nýjasta útgáfan af Houdini starfaði á stöðunni í meira en klukkutíma og fann ekki leikinn sem AlphaZero skellti nú á Stockfish.

21. Bg5!!

Hótunin er 22. Rf6 og ef 21. ... hxg5 þá kemur 22. Rxg5 Dg8 23. Dh4! ásamt 24. h6 og vinnur.

21. ... f5

22. Df4!

Houdini var lengi að átta sig á því að eðlilegasti leikurinn 22. ... hxg5 strandar á 23. Rxg5 Dxh5 og nú vinnur 24. g4!!

 

T.d. 24. ... Dh6 25. He8! eða 24. ... Dg6 25. gxf5 Rd6 26. fxg6! Hxf4 27. Had1! o.s.frv.

Stockfish kaus að leika 22. ... Rc5 en eftir 23. Be7! Rd3 24. Dd6 Rxe1 25. Hxe1 fxe4 27. Bxe4 Hf5 27. Bh4 Bc4 28. g4 Hd5 29. Bxd5 Bxd5 30. He8+ 31. Bg3 c5 32. Dd5 féll hrókurinn á a8 og AlphaZero vann í „aðeins“ 117 leikjum.

Friðsamir í London

Það bókstaflega rigndi jafnteflum í fyrstu umferðum „London classic“. Í fyrstu þrem umferðunum lauk öllum skákunum 15 með jafntefli. Það stefndi í eitt dauflegasta „elítuskákmót“ síðari ára. En svo fór að rofa til og eins og oft áður var heimsmeistarinn Magnús Carlsen þar í stóru hlutverki. Hann tapaði óvænt fyrir Jan Nepomniachtchi í næstsíðustu umferð en tók á sig rögg og vann Aronjan í lokaumferðinni. Mótið var hluti mótaraðar sem hófst í júní og þar varð Magnús Carlsen hlutskarpastur. Caruana vann hins vegar aukaeinvígi við Nepo um það hvor teldist sigurvegari Lundúnamótsins: 

1. Caruana og Nepomniachtchi 6 v. (af 9) 3.-5. Carlsen, Vachier-Lagrave og So 5 v. 6. Nakamura 4½ v. 7. Aronjan 4 v. 8. Karjakin 3½ v. 9.-10. Anand og Adams 3 v.

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 16. desember 2017.

Skákþættir Morgunblaðsins

Jólaskákmótið á Kleppi

Hið árlega jólaskákmót á Kleppi var haldið miðvikudaginn 20 desember 2017. Í þetta sinn mættu 5 sveitir, en það eru Vinaskákfélagið og Hrókurinn sem halda mótið.

Þetta mót er gert til gamans og er úrslit ekki alsráðandi, heldur að hafa gaman. Þeir sem keppa koma frá Athvörfum, Búsetukjörnum og Geðdeildum ásamt Vinaskákfélaginu.

Flottir vinningar og rjúkandi kaffi og kökur voru á boðstólum fyrir keppendur og skein gleði og bros á andlitum þeirra.

Skákstjóri var Róbert Lagerman og skipti hann mönnum í lið, en 3 voru í hverju liði. Tefldar voru 7 mínútur skákir.

2 lið voru frá Vinaskákfélaginu sem fengu nöfnin Vin X og Vin Z. Einnig voru 2 lið frá Flókagötu og voru þau skírð X og Z líka. 5. og síðasta liðið kom frá Klúbbnum Geysir. Þó það mundi vanta í lið, þá lánar Vinaskákfélagið sína menn til að fylla upp í þrjá í lið.

Þetta mót er skemmtilegasta mót ársins að mati undirritaða og líklega flestra sem tóku þátt. En að úrslitunum sjálfum.

1. sæti var Vin Z með 12 vinninga. Þeir sem tefldu fyrir þá voru:

Róbert, Hörður, Þórólfur og Hjálmar

1. Róbert Lagerman. 2. Hjálmar Sigurvaldason.  3. Hörður Jónasson. 4. Þórólfur kom svo inn síðar frá Bríetatúni og skipti Róbert út fyrir hann. Aðrir færðust upp en Þórólfur kom inn á borð 3.

2. sæti var lið frá Klúbbnum Geysir með 9,5 vinninga. Þeir sem tefldu fyrir þá voru:

Róbert (laumaði sér á myndina), Alexander og Jan Jakub. Á myndina vantar Jóhann Bernhard.

1. Jóhann Bernhard Jóhannsson (kom að láni frá Vinaskákf.) 2. Alexander. 3. Jan Jakub.

3. sæti var svo Vin X með 8,5 vinninga. Þeir sem tefldu fyrir þá voru:

Þorvaldur, Tómas og Orri. Á myndina vantar Hrafn Jökulsson

1. Hrafn Jökulsson. 2. Tómas Ponzi. 3. Þorvaldur Ingveldarson. 4. Orri Hilmarsson kom svo inn síðar frá Bríetatúni og skipti við Hrafn Jökulsson sem þurfti að fara vegna anna. Hann kom inn á 3 borð, en aðrir færðust upp.

4. sæti var svo Flókagata X með 8 vinninga og í 5. Sæti var Flókagata Z með 7 vinninga. Þeir sem tefldu fyrir Flókagötu X voru: Hrafn, Jón Gauti og Gunnar Gestsson. Fyrir Flókagötu Z tefldu á 1 borði Patrick Karcher (lánaður frá Vinaskákfélaginu), Magnús og Grétar.

Mótið allt tókst frábærlega vel og allir voru glaðir í mótslok, sérstaklega fyrir að geta unnið Skottu, en hún skellti sér í keppnina hjá okkur.

Kveðja, Hörður Jónasson varaforseti.

Sjá nánar á vefsíðu Vinaskákfélagsins.

Skák og jól í Álfhólsskóla

Jólapakkaskákmóti Hugins var haldið í 20 sinn í Álfhólsskóla þann 17. desember sl. Mótið var nú sem endranær eitt fjölmennasta krakkamót ársins. Þetta er annað árið í röð sem mótið fer fram í Álfhólsskóla og þátttakan var betri en árið áður en 133 tóku þátt að þessu sinni og má því segja að mótið hafi unnið sér sess á nýjum stað. Vissulega var það töluverð breyting að færa mótið úr Ráðhúsi Reykjavíkur þar sem það hafði verið í meira en áratug og nánast orðið rótfast en það hefur einnig ákveðinn sjarma að halda mótið á nýjum stað eins og Álfhólsskóla. Uppsetning mótsins er einnig mjög auðveld í Álfhólsskóla þar sem er rúmgóður matsalur sem tekur rúmlega 100 manns að tafli.

Við flutninginn í Álfhólsskóla var gerð sú breyting á mótshaldinu að hætt var að mestu að nota Monradspjöldin og flestir flokkar keyrðir á tölvu. Núna ætluðum við að sleppa monradspjöldunum alveg en forritið virkaði ekki í einni tölvunni og þurfti því að nota spjöldin í tveimur yngstu flokkunum. Það er ekki mikil eftirsjá af monradspjöldunum nema í happdrættinu þar sem það er tilþrifameira að veiða spjöldin úr kassa heldur en að láta tölvuna draga.

Búið var að forskrá alla keppendur í mótið en smá tilfæringar þurfti við að bæta nýjum keppendum inn og fella út þá sem ekki mættu og jafnvel bæta sumum inn aftur þegar þeir birtust móðir og másandi þannig að mótið byrjaði eins og alltaf rúmleg kl. 13 og fjörið hófst.

Teflt var í sex flokkum og voru keppendur allt frá 5 ára aldri og upp í 15 ára aldur. Margir sterkir skákmenn hófu sinn skákferil á Jólapakkamótinu og fyrstu mótunum má finna sigurvegara eins og Braga Þorfinnsson, Dag Arngrímsson, Davíð Kjartansson og Guðmund Kjartansson. Nú sem endranær tóku flest allir sterkustu skákmenn landsins af yngri kynslóðinni þátt. Þátttakendur komu úr 32 skólum og leikskólum sem eru töluvert fleiri skólar en í fyrra. Langflestir komu úr Álfhólsskóla eða 23 enda á heimavelli en yfirburðirnir voru samt mun minni en í fyrra. Næstir komu svo Rimaskóli með 14 þátttakendur, Háteigsskóli með 13 þátttakendur og Salaskóli með 11 þátttakendur.

Úrslitin eru ekki aðalatriðinu á Jólapakkamótinu heldur að taka þátt og gleðja sig og aðra.. Allir keppendur mótsins voru leystir út með nammi frá Góu-Lindu. Allir verðlaunahafar fengu jólapakka sem og heppnir keppendur.

Í pökkunum voru meðal annars: bækur af ýmsu tagi og þar á meðal skákbækur, húfur, dót af ýmsu tagi, púsluspil,  töfl, leikir og fleira. Meðal vinninga voru ýmsir vinningar frá Landsbankanum  og Bluetooth heyrnartól frá Tölvulistanum/Heimilistæki. Aðrir sem gáfu gjafir í pakka voru Ferillverkfræðistofa og Bókabeitan bókaútgáfa.

Eftirtaldir studdu við mótið og er þeim færðar miklar þakkir fyrir:

ALARK arkitektar, Arion banki, Álfhólsskóli, Body Shop, Dominos, Efling, Energia, Gámaþjónustan, Guðmundur Arason smíðajárn, Gullkistan, HBTB, Hjá Dóra matstofa, Íslandsspil, Íslenska lögfræðistofan, ÍTR, Kópavogsskóli, Lindaskóli, Mótx, Olís, Reykjavíkurborg, Salaskóli, Smáraskóli, Snælandsskóli, Suzuki bílar, Valitor og Vatnsendaskóli..

Mót eins og Jólapakkamótið fer ekki fram án öflugra starfsmanna. Eftirtaldir starfsmenn komu að mótinu:

Edda Sveinsdóttir, Elín Edda Jóhannsdóttir, Einar Birgir Steinþórsson, Anna Guðný Björnsdóttir, Davíð Ólafsson, Gunnar Björnsson, Vigfús Ó. Vigfússon, Jón Olaf Fivelstad, Alec Elías Sigurðarson, Hildur Berglind Jóhannsdóttir, Erla Hlín Hjálmarsdóttir, Rósa Margrét Hjálmarsdóttir, Óskar Víkingur Davíðsson, Stefán Orri Davíðsson, Lenka Ptacnikova, Adam Omarsson og Josef Omarsson. Auk þess aðstoðuðu fjöldi foreldra og keppenda við tiltekt að móti loknu sem gekk það vel að um kl. 17 voru öll áhöld komin niður í félagsheimili Hugins í Mjóddinni sem er vel að verki staðið.

Fá allir þessi aðilar bestu þakkir fyrir.

En þá eru það úrslitin.

A-flokkur (2002-04)

Gestur Andri Brodmann vann flokkinn með 4,5v af 5 mögulegum. Í öðru og þriðja sæti voru Snorri Esekíel Jóhannesson og Konráð  Óskar Kjartansson með 3,5v. Gestur, Snorri, Konráð og Vigfús Máni Ólafsson voru efstir strákanna.

Rakel Tinna Gunnarsdóttir varð efst stúlkna. Elín Edda Jóhannsdóttir varð önnur, Ásgerður Júlía Gunnarsdóttir þriðja og Wiktoria Momuntjuk fjórða.

11 tóku þátt.

Nánar á Chess-Results.

B-flokkur (2005-06):

Óskar Víkingur Davíðsson sigraði með 4,5 af 5 mögulegum, Joshua Davíðsson og Ótttar Örn Bergmann Sigfússon Orri Karlsson urðu í 2 og 3. sæti með 4v. Í næstu sætum voru Benedikt Þórisson (4v) og Baltasar Máni Wedholm Gunnarsson (3,5v).Ylfa Ýr Welding Hákonardóttir varð efst stúlkna, Ásthildur Helgadóttir önnur, Þórdís Agla Jóhannsdóttir þriðja og  Hólmríður Þrastardóttir fjórða.

26 tóku þátt.

Nánar á Chess-Results.

C-flokkur: (2007-08):

Gunnar Erik Guðmundsson varð efstur með fullt hús 5v af fimm mögulegum. Í öðru til þriðja sæti voru Rayan Sharifa og Anna Katarína Thoroddsen með 4v. Efstir af strákunum voru Gunnar Erik Guðmundsson, Rayan Sharifa, Einar Tryggvi Petersen (4v) og Adam Omarsson (4v).

Anna Katarína Thoroddsen var efsta stúlkna. Soffía Arndís Berndsen önnur, Katrín María Jónsdóttir þriðja og Sóley Kría Helgadóttir fjórða.

26 tóku þátt.

Nánar á Chess-Results:

D-flokkur (2009-10):

Eiríkur Emil Hákonarson og Einar Dagur Brynjarsson urðu efstir og jafnir með 5v af fimm mögulegum. Jóhann Helgi Hreinsson, Markús Flosi Blöndal og Bjartur Þórisson með 4v urðu næstir stráka.

Sól Lilja Sigurðardóttir var efst stúkna með 4v, næstar komu Elín Lára Jónsdóttir, Svandís María Gunnarsdóttir, Arna Rún Gunnarsdóttir og Heiðdís Diljá Hjartardóttir.

49 tóku þátt.

Nánar á Chess-Results:

E-flokkur (2011 og yngri):

Jósef Omarsson sigraði með full húsi 5v í jafn mörgum skákum. Annar var Dagur Jóhann Friðjónsson með 4. Næstir komu Róbert, Tómas Pétursson og Jökull Máni Ingvarsson með 3,5v.

Hafdís Karen Óskarsdótir og Hafdís Karen Óskarsdóttir voru efstar stúlkna.

19 tóku þátt

Peðaskák (2011 og yngri)

Aðeins þrjú voru með í peðaskákinni að þessu sinni. Sunneva Valey Valdimarsdóttir var efst, og næstir komu jafnir Nói Hrafn Sólar Arngrímsson og Ignat Leó.

Alls tóku 3 þátt.

Happdrættin

Í hverjum flokki voru dregnir út heppnir keppendur og var reynt að hafa fjölda vinninga í samræmi við fjölda keppenda í hverjum flokki miðað við skráninguna þegar pakkarnir voru útbúnir. Í lokin var svo happdrætti þar sem allir eiga möguleika og þar varu m.a. annars dregin út Bluetooth heyrartól frá Tölvulistanum/Heimilistækjum fyrir bæði stelpu og strák og þar duttu í lukkupottinn Agla Björk Egilsdóttir og Kiril Alexander Igorsson

Skákfélagið Huginn þakkar öllum krökkunum kærlega fyrir þátttökuna!

Nánar á heimasíðu Hugins

Skákþing Reykjavíkur hefst 10. janúar

Skákþing Reykjavíkur hefst miðvikudaginn 10. janúar kl. 19.30. Tefldar verða níu umferðir eftir svissnesku kerfi. Tímamörk eru 90 mínútur og bætast við 15 mínútur eftir 40 leiki. 30 sekúndur bætast við eftir hvern leik alla skákina. Teflt er í húsnæði Taflfélags Reykjavíkur að Faxafeni 12.

Keppendur geta tekið tvær yfirsetur (bye) í umferðum 1-6. Leggja skal inn ósk um yfirsetu til skákstjóra við upphaf umferðarinnar á undan. Hálfur vinningur fæst fyrir yfirsetu.

Athygli er vakin á því að umferðir á sunnudögum hefjast kl. 13:00.

Dagskrá

1. umferð miðvikudag 10. janúar kl. 19.30
2. umferð sunnudag 14. janúar kl. 13.00
3. umferð miðvikudag 17. janúar kl. 19.30
4. umferð sunnudag 21. janúar kl. 13.00
5. umferð miðvikudag 24. janúar kl. 19.30
6. umferð sunnudag 28. janúar kl. 13.00
7. umferð miðvikudag 31. janúar kl. 19.30
8. umferð sunnudag 04. febrúar kl. 13.00
9. umferð miðvikudag 07. febrúar kl. 19.30

Hraðskákmót Reykjavíkur fer fram sunnudaginn 11. febrúar kl. 13 og verður þá jafnframt verðlaunaafhending fyrir Skákþingið.

Tímamörk

90 mín á 40 leiki, síðan 15 mín, auk 30 sek eftir hvern leik alla skákina.

Skákstjórn

IA Ólafur Ásgrímsson og IA Ríkharður Sveinsson ([e-mail] / s.772 2990)

Aðalverðlaun

• 1. sæti kr. 80.000
• 2. sæti kr. 40.000
• 3. sæti kr. 20.000

Stigaverðlaun

• Besta frammistaða miðað við eigin stig (rating performance – eigin stig) – kr. 10.000.
• U2000 og U1800 – kr. 10.000.
• U1600, U1400, U1200, stigalausir – bókaverðlaun.

Fide stig gilda við úthlutun stigaverðlauna (íslensk stig til vara). Hver keppandi getur aðeins hlotið ein aukaverðlaun (ofangreind röð verðlauna gildir).

Þátttökugjöld (greiðist með reiðufé við upphaf móts).

kr. 5.000 fyrir 18 ára og eldri.
kr. 2.500 fyrir 17 ára og yngri.

Skráningarform

Skráðir keppendur

Keppt er um titilinn “Skákmeistari Reykjavíkur 2018” og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Guðmundur Kjartansson.

Verði keppendur jafnir að vinningum í þremur efstu sætunum, verður verðlaunum skipt (Hort-kerfi), en stigaútreikningur (tiebreaks) látinn skera úr um lokaröð. Í öðrum verðlaunaflokkum ganga verðlaun óskipt til þess sem hefur flest stig eftir stigaútreikning. Röð stigaútreiknings: 1. Innbyrðis úrslit 2. Buchholz (-1) 3. Buchholz (median) 4. Sonneborn-Berger.

Skákþing Reykjavíkur er reiknað til alþjóðlegra skákstiga. Skákir mótsins verða slegnar inn og birtar á pgn formi.

Vinsamlegast mætið tímanlega á skákstað til að staðfesta skráningu og greiða þátttökugjald. Skráningu lýkur 15 mínútum fyrir auglýst upphaf móts, þ.e. kl. 12.45.