Alexander Oliver efstur í U-2000 mótinu

Alexander Oliver Mai (1875) er einn efstur með fullt hús vinninga þegar þremur umferðum er lokið í U-2000 móti Taflfélags Reykjavíkur. Alexander, sem hefur verið á feykilegri siglingu að undanförnu, hafði betur í þriðju umferðinni gegn Kristjáni Geirssyni (1556) þar sem hann saumaði jafnt og þétt að þeim síðarnefnda með svörtu mönnunum eftir að hafa stillt upp hinni sívinsælu Sikileyjarvörn.

Sjö keppendur koma næstir með 2,5 vinning en jafnteflum fjölgaði snarlega í gærkveld enda stigamunur keppenda í milli orðinn minni en í upphafi móts. Á efsta borði gerðu Stephan Briem (1895) og Jóhann Arnar Finnsson (1732) jafntefli í tíðindalítilli viðureign og þá urðu sömu úrslit á þriðja borði hjá Agnari Darra Lárussyni (1750) og Ólafi Guðmarssyni (1724) í tvísýnni baráttu. Með drottningu og hrók gegn tveimur hrókum og biskupi Agnars reyndi Ólafur hvað hann gat til að knýja fram sigur en menn Agnars stóðu vel og voru vopnin að lokum slíðruð þegar hvor keppandi hafði látið hrók af hendi. Lítið var um óvænt úrslit en þó ber að geta góðs sigurs Björgvins Kristbergssonar (1054) gegn Ármanni Péturssyni (1270) þar sem Björgvin stýrði svarta hernum fram til sóknar eins og honum einum er lagið.

Fjórða umferð fer fram næstkomandi miðvikudagskvöld og hefst, eins og alþjóð veit, kl. 19.30. Þá fer að hitna verulega í kolunum en á efsta borði verður svakaleg viðureign á milli Alexanders og Stephans. U-2000 meistarinn, Haraldur Baldursson (1935), kemur ferskur inn eftir hvíld í síðustu umferð og stýrir hvítu gegn Agnari Darra á öðru borði og þá mætast Jóhann Arnar og Páll Andrason (1805) á því þriðja. Úrslit, stöðu og skákir mótsins má að vanda finna á Chess-Results, en það er Daði Ómarsson sem slær inn skákirnar hratt og örugglega.

Nánanar á heimasíðu TR.

Fyrri hluti Íslandsmóts skákfélaga – Pistlar frá TR

Taflfélag Reykjavíkur átti við ramman reip að draga í fyrri hluta Íslandsmóts skákfélaga sem fram fór í Rimaskóla síðastliðna helgi. Nokkra sterka skákmenn vantaði og hafði það nokkur áhrif á öll liðin. Hið jákvæða var þó að nokkrir ungir menn hlutu eldskírn sína með A-liði TR. Það voru þeir Hilmir Freyr Heimisson, sem er nýjasti Candidate meistari Íslands, Bárður Örn Birkisson, auk þess sem  Björn Hólm Birkisson tefldi tvær skákir með A-liðinu. Af þeim stóð Bárður sig best, en hann fékk fjóra vinninga af fimm, harla gott í efstu deild! Í náinni framtíð verða þeir eflaust lykilmenn í sterku liði félagsins í fyrstu deild.

Svona hefst pistill Gauta Pál Jónssonar um árangur TR í fyrri hluta Íslandsmóts skákfélaga. Pistilinn í heild sinni má finna á heimasíðu TR. 

Sigurlaug R. Friðþjósdóttir skrifar einnig pistil um árangur unglingasveita TR. Í honum segir meðal annars: 

Í fjórðu deild tefldi Taflfélag Reykjavík fram tveimur barnasveitum, TR unglingasveit A og TR unglingasveit B. Sveitirnar voru skipaðar áhugasömustu og virkustu skákkrökkum félagsins, stelpum og strákum, sem hafa hvað mest sótt skákæfingar TR undanfarin misseri. Alls tefldu 18 börn í þessum tveimur liðum, 7 stelpur og 11 strákar. Svo mikill var áhuginn að það munaði litlu að C- sveit liti dagsins ljós. En ákveðið var þó að hafa sveitirnar frekar tvær og hafa varamenn til taks, því reynslan sýnir að alltaf geta komið upp óvænt forföll, jafnvel með stuttum fyrirvara á mótsdegi.

Pistil Sigurlaugar má nálgast í heild sinni hér. 

Unglingameistaramóti Íslands (u22) frestað

Unglingameistaramóti Íslands (u22) sem átti að hefjast á morgun hefur verið frestað vegna þátttökuleysis. 

Vinaskákfélagið er með 3 sveitir á Íslandsmóti skákfélaga

Íslandsmót skákfélaga var haldið í Rimaskóla núna í ár og var Vinaskákfélagið með 3 sveitir á mótinu. Núna var fyrri hluti keppninnar frá 19 – 22 október. (Það var aðeins 1. Deild sem tefldi á fimmtudaginn 19 okt., aðrar sveitir byrjuðu taflið föstudaginn 20 október). Seinni hluti verður svo teflt 1 – 3 mars 2018.

Tefldi A sveitin í 2 deild, B sveitin í 3 deild og C sveitin í 4 deild. Undirbúningur hófst formlega 1 október, þegar varaforseti félagsins Hörður Jónasson startaði könnun á facebook síðu félagsins. Liðstjórar voru kosnir á stjórnarfundi snemma sumars og eru þeir þessir:

Fyrir A sveitina: Róbert Lagerman og Ingi Tandri Traustason

Fyrir B sveitina: Hörður Jónasson

Fyrir C sveitina: Héðinn Briem.

Utanumhald í tölvu og tölfræði upplýsingar hélt Hörður Jónasson, bæði á undirbúningstímanum og á meðan mótið var.

Svona hefst pistill Harðar Jónassonar, varaforseta Vinskákfélagsins um fyrra hluta Íslandsmót skákfélaga. Pistilinn má nálgast í heild sinni á heimasíðu félagsins.

Pistill ritstjóra um Íslandsmót skákfélaga

Pistil um fyrri hluta Íslandsmóts skákfélaga er aðgengilegur. Borinn er saman staða liðanna og spá ritstjóra.

Pistilinn má nálgast hér. 

Framsýnarmótið hefst 3. nóvember á Húsavík

Framsýnarmótið í skák 2017 verður haldið í Framsýnarsalnum að Garðarsbraut 26 á Húsavík helgina 3.-5. nóvember nk. Tefldar verða 7 umferðir alls. Fyrstu fjórar með atksákartímamörkum (25 mín á mann) en þrjár síðustu skákirnar með 90 mín + 30 sek/leik.

Þátttökugjald 2000 kr en 1000 kr fyrir 16 ára og yngri.

Dagskrá.

• Framsýnarhúsið á Húsavík

  Föstudagur 3. nóvember kl 20:00 1. umferð

• Föstudagur 3. nóvember kl 21:00 2. umferð
• Föstudagur 3. nóvember kl 22:00 3. umferð
• Föstudagur 3. nóvember kl 23:00 4. umferð
• Laugardagur 4. nóvember kl 11:00 5. umferð
• Laugardagur 4. nóvember kl 17:00 6. umferð
• Sunnudagur 5. nóvember kl  11:00 7. umferð

Mótið verður reiknað til Fide-skákstiga, Fide-atskákstiga og Íslenskra skákstiga.

Keppendum verður heimillt að taka bye (sjálfvalda yfirsetu) í tveimur umferðum og fá fyrir það hálfan vinning. Það verður þó ekki heimilt í fyrstu umferð né þeirri síðustu. Tilkynna verður skákstjóra um yfirsetu áður en parað er í viðkomandi umferð.

Verðlaun.

Veittir verða eignarbikarar í verðlaun handa þremur efstu af félagsmönnum Hugins og einnig fyrir þrjá efstu utanfélagsmenn. Einnig verða sérstök verðlaun veitt fyrir þrjá efstu í flokki 16 ára og yngri. Það er stéttarfélagið Framsýn í Þingeyjarsýslu sem gefur verðlaun á mótinu. Veitingar á mótsstað verða í boði Framsýnar stéttarfélags.

Fyrirtækið Eflir almannatengsl, hefur ákveðið að veita sérstök verðlaun á Framsýnarmótinu 2017 fyrir mestu stigabætinguna.

Skákstjóri verður Ingibjörg Edda Birgisdóttir.

Skráning.

Væntanlegir keppendur geta skráð sig til leiks á þar til gerðu skráningarformi sem er hér og einnig á skák.is Hægt verður að skrá sig til keppni fram til kl 19:30 á föstudag, eða 30 mín áður en mótið hefst. Hægt verður einnig að skrá sig í mótið á mótsstað til kl 19:55 föstudaginn 3. nóvember.

• Skráningarform
• Skráðir keppendur

 

Frískir Fjölnismenn í 1. og 3. deild - pistill Helga Árnasonar formanns

Skákdeild Fjölnis eflist með hverju ári, en deildin var stofnuð árið 2004 og kom sér upp í 1. deild á þremur árum. Þar hefur A sveitin átt fast sæti frá árinu 2007 ef frá er talið eitt ár í 2. deild. Deildin hefur haldið vel utan um sína skákmenn og notið þess að þurfa lítið sem ekkert að skipta inn á í A sveit. Metnaður þeirra 8 - 9 sem sveitina skipa liggur í því að fá að tefla allar umferðirnar. A sveitin var nýkomin úr velheppnaðri Tyrklandsferð þar sem lið á vegum Umf. Fjölnis var að taka þátt í 1. sinn á Evrópumóti. Evrópumótið fór fram í Antalya í Tyrklandi. Það var ekki að sjá neina ferða-eða keppnisþreytu í mannskapnum heldur þvert á móti baráttugleði og góð úrslit. Fjölnismenn unnu þrjár viðureignir í 1. deild, gerður eitt jafntefli og töpuðu einni viðureign. Sveitin hefur 3. vinninga forskot á næstu sveit sem er A sveit Taflfélags Reykjavíkur. Víkingasveitin leiðir í 1. deild en þar eru um borð 6 stórmeistarar innlendir og erlendir. Sveit Hugins er í 2. sæti. Fjölnismenn stefna að sjálfsögðu að því að halda dampi í síðari hluta mótsins, standa vel að vígi varðandi að verja 3. sætið. Fjölnisskákmenn eiga eftir að tefla við Ofur-Víkingana en hinar viðureignirnar þrjár eru gegn skáksveitum í neðri hluta 1. deildar. Stigahæsti skákmaður Íslands Héðinn Steingrímsson stóð sig best allra og fékk 3,5 vinninga af 4 á 1. borði. Nýliðinn og eini erlendi skákmaður Fjölnismanna í þessum fyrri hluta, Daninn Jesper Thybo, Evrópumeistari U18, stóð líka fyrir sínu og hlaut 3,5 vinninga eins og Héðinn en tefldi einni skák meira. Aðrir liðsmenn eru Dagur Ragnarsson (2), Oliver Aron Jóhannesson (3,5) og Jón Trausti Harðarson (2,5), allir fv. nemendur Rimaskóla, Davíð Kjartansson (3) hetja frá EM, Sigurbjörn Björnsson (2,5), Jón Árni Halldórsson (2) og hinn taplausi Tómas Björnsson (1,5/2) sem tefldi líka í 3. deild og að sjálfsögðu kom hann taplaus þar úr þremur skákum.

B sveit Fjölnis sem teflir í 3. deild virðist ætla að endurheimta sæti sitt í 2. deild. Sveitin kom taplaus frá fyrri hluta mótsins, vann tvær viðureignir og gerði tvö jafntefli. Í sveitinni eru 5 ungir og uppaldir skákmenn úr Fjölni ásamt traustum og reynslumiklum skákmönnum, þeim Tómasi Björnssyni, Erlingi Þorsteinssyni og Sveinbirni Jónssyni sem að þessu sinni tefldi í öllum umferðum og hlaut 75% árangur. Sveinbjörn hefur lítið teflt með Fjölnismönnum sl. ár vegna vinnu en reyndist B sveitinni góður liðsauki að þessu sinni. Þau Dagur Andri Friðgeirsson og landsliðskonan Hrund Hauksdóttir tefldu bæði tvær skákir og skiluðu 100% árangri. Efnileg, jöfn og skemmtileg skáksveit þarna á ferðinni.

Loks ber að geta þess að Skákdeild Fjölnis sendi ungmennasveit til leiks í 4. deild. Þarna eru á ferðinni nemendur í 5. - 8. bekk Rimaskóla og Foldaskóla sem eru ákaflega áhugasamir við æfingar innan deildarinnar. Það háði sveitinni nokkuð að þrír skákmenn í þeirra röðum lentu í svæsinni ælupest og gátu ekki teflt eins mikið og þeir vildu. Einn þeirra var 1. borðs maður sveitarinnar, Joshua Davíðsson, sem tefldi afar vel í 1. umferð og landaði glæsilegum sigri en síðan ekki söguna meir.

Það er mikil tilhlökkun meðal Fjölnismanna að takast á við síðari hluta mótsins, A sveitar að halda 3. sætinu og B sveitar að koma sér að nýju upp í 2. deild. Barna-og unglingastarfið i rúman áratug er að skila sér ef marka má skáksveitirnar þrjár sem taka þátt í Íslandsmótinu og framtíðin er sannarlega björt í Grafarvogshverfi innan skákdeildar Fjölnis.

Helgi Árnason formaður skákdeildar Fjölnis

Bikarsyrpa TR fer fram á föstudaginn

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Þriðja mót Bikarsyrpunnar hefst föstudaginn 27. október og stendur til sunnudagsins 29. október. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 27. október kl. 17.30 (fös)
2. umferð: 28. október kl. 10.00 (lau)
3. umferð: 28. október kl. 13.00 (lau)
4. umferð: 28. október kl. 16.00 (lau)
5. umferð: 29. október kl. 10.00 (sun)
6. umferð: 29. október kl. 13.00 (sun)
7. umferð: 29. október kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Evrópukeppni landsliða hefst á kosningadag - Ísland tekur þátt í opnum flokki

Evrópukeppni taflfélaga hefst á laugardaginn sjálfan kosningadaginn. Teflt er grísku eyjunni Krít. Sami keppnisstaður og sama mót var haldið á árið 2007. Þá gekk íslenska liðinu afskaplega vel og endaði í 20. sæti. Lið Íslands er það 27. sterkasta af 39 skráðum liðum (verða líklega 40) í opnum flokki. 

Lið Íslands skipa

1. SM Héðinn Steingrímsson (2576)
2. SM Hjörvar Steinn Grétarsson (2567)
3. SM Hannes Hlífar Stefánsson (2508)
4. AM Guðmundur Kjartansson (2456)

Liðsstjóri er Ingvar Þór Jóhannesson. 

Öll Norðurlöndunin taka þátt að Svíum undanskyldum. Íslendingar eru næststerkastir Norðurlandanna á pappírnum á eftir Norðmönnum. Í kvennaflokki taka aðeins Norðmenn og Finnar þátt af Norðurlöndunum. 

Flestir sterkustu skákmenn Evrópu taka þátt en þó vantar meðal annars; Magnús Carlsen, Kramnik, Karjakin og MVL.

Rússar eru með sterkasta liðið á pappírnum þrátt fyrir að marga lykilmenn vanti. Nóg úrvalið þar. Næstir eru Aserar og þriðju er Úkraínumenn. 

Ungverjar, Armenar eða Pólverjar eru líklegir andstæðingar Íslands í fyrstu umferð. 

• Heimasíða mótsins
• Chess-Results

 

Norðurljósamótið hefst 10. nóvember

Norðurljósamótið (Northern Lights Open) hefst 10. nóvember. Skáksamband Íslands stendur sérstaklega fyrir þessu móti til að koma til móts við íslenska titilveiðara og þess vegna er mótið aðeins opið fyrir skákmenn með meira en 2100 skákstig.

Nú eru 27 keppendur skráðir til leiks en enn vantar töluvert skráningu íslenskra titilveiðara. Þátttökugjaldið er 39.000 kr. en ákveðið hefur verið að gefa 4.000 kr. afslátt skrái menn sig fyrir vikulokin, þ.e. eigi síðar en 27. október nk.

Einstakt tækifæri til að ná áfanga og tefla við sterka skákmenn í hverri umferð! Íslenskir skákmenn með 2100 og meira eru hvattir til að skrá sig fyrir vikulokin og fá afslátt!

Um 20% keppenda má vera undir 2100. Þeim sem ekki ná 2100 skákstigum en vilja vera með er hvattir til að senda póst á mótsstjóra í netfangið [e-mail]. Tekin verður afstaða til umsókna í byrjun næstu viku. 

Keppendalistann má finna hér.

Heimasíða mótsins