Skák.is

Bloggfærslur mánaðarins, október 2017

28.10.2017 | 20:00

Skákþáttur Morgunblaðsins: Lombardy, aðstoðarmaður Fischers í einvígi aldarinnar, fallinn frá

"Þú hellir ekki steypu í helgan brunn." Í kvikmyndinni Pawn Sacrifice eru þessi orð lögð í munn kaþólska prestinum William Lombardy þegar einhver stingur upp á því að aðalsöguhetjan, Bobby Fischer, sé settur á lyf. Þarna er brugðið upp mynd af geðþekkum og skilningsríkum manni sem er vakinn og sofinn yfir velferð skjólstæðings síns. Og það verður ekki tekið frá „séra Lombardy“, eins og hann var gjarnan nefndur hér á landi, að hann reyndist Bobby Fischer vel við ýmis tækifæri og milli þeirra var einhvers konar bræðrasamband sem hélst allt frá þeirra fyrstu kynnum á heimili Jack Collins og í helstu skákklúbbunum á Manhattan snemma á sjötta áratug síðustu aldar.

Lombardy sem lést 13. október sl. var sex árum eldri, fæddur 4. desember árið 1937. Hann varð heimsmeistari unglinga í Toronto í Kanada með fullu húsi vinninga í árið 1957 en það afrek féll í skugga þeirra tíðinda er Bobby Fischer varð Bandaríkjameistari nokkrum mánuðum síðar aðeins 14 ára gamall. Upp frá því beindist athyglin að Fischer sem hafði til að bera eindreginn ásetning til að verða heimsmeistari. Lombardy vann ýmis góð afrek á næstu árum, stóð sig vel á ólympíumótum og tefldi á 1. borði fyrir Bandaríkin sem sigruðu á heimsmeistaramóti stúdenta árið 1960. Mótið fór fram í Leníngrad og í úrslitaviðureigninni við sveit Sovétríkjanna lagði Lombardy Spasskí að velli. Hann hafði unnið sér þátttökurétt á millisvæðamótinu í Stokkhólmi árið 1962 en gaf sætið frá sér og helgaði kaþólsku kirkjunni starfskrafta sína næstu árin; tók vígslu sem prestur árið 1967. Þegar hann kom hingað til lands sem aðstoðarmaður Fischers í heimsmeistaraeinvíginu 1972 skartaði hann yfirleitt prestkraganum, yfirgaf þó kirkjuna nokkrum árum síðar og sonur hans, Raymond Lombardy, taldi í viðtali á dögunum að helsta ástæða þess hefði verið óánægja Lombardys með auðsöfnun kirkjunnar. Lombardy kom hingað í fyrsta sinn á heimsmeistaramót stúdenta árið 1957 og næst 15 árum síðar; hlutverk hans hans sem aðstoðarmaður Fischers í „einvígi aldarinnar“ var ekki alltaf auðvelt en hann átti sinn þátt í því að áskorandinn yfirgaf ekki landið eins og útlit var fyrir þegar í miklu stappi stóð vegna aðbúnaðar á sviði Laugardalshallar.

Aftur var Lombardy mættur til leiks sem aðaldómari á svæðamóti á Hótel Esju árið 1975 og tefldi á Reykjavíkurmótinu árið 1978 og fjölmörgum mótum tímaritsins Skákar á landsbyggðinni um miðjan níunda áratuginn. Hann hafði uppi áform um að setjast hér að en ekkert varð úr. Sá var kannski helsti ljóður á ráði hans hversu ósveigjanlegur hann var þegar upp kom jafnvel lítilfjörlegur ágreiningur. Margir minnast hans með þakklæti, t.d. þegar hann starfaði fyrir „Collins-börnin“ sem áttu í afar vel heppnuðum samskiptum við Taflfélag Reykjavíkur fyrir u.þ.b. 40 árum. Lombardy ól allan sinn aldur í New York en kjör hans þar hin síðari ár voru bágborin og heilsufarið ekki gott. Stórblaðið „The New York Times“ birti grein í fyrra um aðstæður hans þegar nýr eigandi snarhækkaði leigu á húsnæði því sem hafði verið heimili hans í 40 ár. Lyktir urðu þær að Lombardy var borinn út en vinur hans frá Martinez, litlum bæ í grennd við San Francisco, skaut yfir hann skjólhúsi og þar bjó hann undir það síðasta.

Helgi Ólafsson helol@simnet.is

------------------

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 21. október 2017

Skákþættir Morgunblaðsins

Spil og leikir | Breytt 22.10.2017 kl. 12:50 | Slóð | Facebook | Athugasemdir (0)

28.10.2017 | 18:06

Tap gegn Ungverjum - Hannes og Guðmundur með jafntefli

Íslenska liðið í opnum flokki tapaði 1-3 fyrir Ungverjum á EM landsliða sem fram fór í dag. Hannes Hlífar Stefánsson (2508) gerði jafntefli við Zoltan Almasi (2707) á þriðja borði og Guðmundur Kjartansson (2456) náði sömu úrslitum á fjórða borði á móti Ferenc Berkes (2661). Héðinn Steingrímsson (2576) og Hjörvar Steinn Grétarsson (2567) töpuðu á fyrsta og öðru fyrir Viktor Erdos(2624) og Richard Rapport (2686). Miðað við stigamuninn á villa liðanna teljast þetta nokkuð eðlileg úrslit en þess má geta að Ungverjar enduðu í þriðja sæti á EM landsliða í Reykjavík í hitteðfyrra.

Skákir dagsins má nálgast hér.

Úrslit dagsins

Ingvar Þór Jóhannesson, liðsstjóri liðsins, mun fara nánar yfir gang mála í pistli í kvöld.

Ekki liggur fyrir pörun morgudagsins. Umferðin á morgun hefst kl. 13.

Spil og leikir | Slóð | Facebook | Athugasemdir (0)

28.10.2017 | 17:51

Skákir 2. deildar Íslandsmóts skákfélaga

Skákir annarrar deildar fyrri hluta Íslandsmóts skákfélaga eru nú aðgengilegur. Það var Daði Ómarsson sem sló þær inn. Þær má nálgast sem viðhengi með þessari færslu.

Veljið skák (96 alls):

Spil og leikir | Slóð | Facebook | Athugasemdir (0)

28.10.2017 | 10:20

EM landsliða: Umferð dagins - Ungverjar hvíla Leko

Fyrsta umferð Evrópumóts landsliða hefst núna kl. 12 í dag. Andstæðingar dagsins eru ekkert slor en það eru Ungverjar sem hafa á skipa sjöundu sterkstu sveit mótsins með meðalstigin 2683 skákstig. Til samanburðar eru meðalstig íslenska liðsins 2527 skákstig og íslenska liðinu raðað nr. 27. Ungverjar hvíla fyrsta borðs manninn Peter Leko (2679) sem í sjálfu sér þarf ekki að koma á óvart.

Rússarnir (sjá mynd) hafa titil að verja í báðum flokkum.

Viðureign dagsins

Ísland hefur einu sinni áður mætt Ungverjalandi á þessu móti. Það var árið 2007 þegar keppnin fór fram á sama stað. Þá tapaðist viðureignin afar naumlega 1½-2½. Hannnes Hlífar, Héðinn og Henrik Danielsen gerðu jafntefli en Stefán Kristjánsson tapaði. Hannes gerði jafntefli við Almasi á fyrsta borði en þeir mætast nú á þriðja borði. Berkes var þá varamaður en þeir tveir eru þeir einu sem enn eru í ungverska liðinu.

Umferðin hefst núna kl. 12. Frá og morgundeginum hefjast umferðir kl. 13.

Spil og leikir | Slóð | Facebook | Athugasemdir (0)

28.10.2017 | 10:00

Símon og Andri Freyr töpuðu í gær

Í gær hófst alþjóðlegt unglingamót í Uppsölum í Svíþjóð. Ísland á þá tvo fulltrúa, Akureyringana Símon Þórhallsson (2027) og Andra Freyr Björgvinsson (1937). Báðir töpuðu þeir í gær fyrir stigahærri andstæðingum.

Tvær umferðir eru tefldar í dag og er sú fyrri í gangi núna.

Spil og leikir | Breytt s.d. kl. 10:01 | Slóð | Facebook | Athugasemdir (0)

27.10.2017 | 23:19

EM landsliða hefst á morgun - Ungverjar í fyrstu umferð

EM landsliða var sett í dag á grísku eyjunni Krít. Íslenska liðið hélt snemma af stað (rúta kl. 4:30 frá BSÍ) og stefnan tekin á Brussel með Icelandair. Þaðan var svo flogið til Krítar og lenti íslenski hópurinn um 19:30 á staðartíma á Krít. Héðinn ferðaðist ekki með hópnum í dag. Hann kom á skákstað í fyrradag.

Teflt er á hótelinu Crete Maris. Sami skákstaður og sama mót fór fram á árið 2007. Þá gekk íslenska liðinu framúrskarandi vel en íslenska liðið lenti þá í 20 sæti - ellefu sætum ofan en liðinu var raðað fyrirfram með um 50% vinningshlutfall þrátt fyrir að hafa teflt við sterkari sveitir í 8 umferðum af 9.

Setning mótsins var flott hjá mótshöldurum. Í kjölfar hans fór liðsstjórafundur. Hann var fjörugur en átök voru um hvort að liðsstjórar mættu yfirgefa mótsstað eftir að umferð hæfist. Bent var á liðsstjórar hefðu litlu hlutverki að gegna í upphafi umferðar - en ekki má semja um jafntefli fyrr eftir 30 leiki. Byrjun umferðar væri stundum eini tíminn fyrir þá til að endurhlaða batteríin - en margir liðsstjóraanna eru jafnframt þjálfarar liðanna. Eftir smá japl, jamm og fuður var það niðurstaðan að liðsstjórar hefðu frjálsar hendur til 17 (umferðin hefst kl. 15). Eftir þann tíma geta þeir ekki komið og farið af skákstað.

Andstæðingar morgundagsins verða Ungverjar eins og við höfðum reynt eiginlega reiknað út. Borðaröð þeirra kemur nokkuð á óvart. Stigalægsti maðurinn (Viktor Erdos) er á öðru borði og sá stigahæsti (Zoltan Almasi) settur á 4. borð.

Hvern þeir hvíla er erfitt að spá í. Við Ingvar hittum í kvöld Richard Rapport. Ég spurði auðvitað "Will you play tomorrow?". Hann horfði á mig mjög undrandi í 2-3 sekúndur áður en hann fattaði tilgang spurningarinnar. Labbaði svo í burtu skellihlæjandi án þess að svara henni.

Umferð morgundagsins hefst kl. 12 að íslenskum tíma. Liðsskipan liðanna liggur fyrir um kl. 7. Aðfaranótt sunnudeginum er tekinn upp vetrartími í Grikklandi. Frá og með annarri umferð hefjast umferðir kl. 13 að íslenskum tíma.

Við Ingvar verðum með reglulega pistla héðan. Fiona Steil-Antoni er einn starfsmanna mótsins og verður með viðtöl sem hægt verður á finna á heimasíðu mótsins.

Nóg í bili

Gunnar Björnsson

Spil og leikir | Slóð | Facebook | Athugasemdir (0)

27.10.2017 | 22:35

Fjölmenn Bikarsyrpa hafin

Þriðja mót Bikarsyrpu TR, og hið síðasta á líðandi ári, hófst í dag þegar flautað var til leiks í Skákhöll TR. Við tók rafmögnuð spenna þegar hin efnilegu ungmenni hófu baráttur sínar á borðunum köflóttu, en alls tekur á fjórða tug keppenda þátt í móti helgarinnar sem er mesta þátttaka um allnokkurt skeið. Bikarsyrpan hefur undafarin ár skipað sér fastan sess í skáklífinu og er langstærstur hluti hinna ungu skákdrengja- og stúlkna orðinn margreyndur sem gerir það að verkum að allt mótahald rennur ljúflega í gegn yfir skemmtilegar og viðburðaríkar helgar.

Strax í fyrstu umferð mátti sjá margar spennandi viðureignir þrátt fyrir að styrkleikamunur keppenda í milli sé nokkur í upphafi móts. Almennt fór þó svo að hinn stigahærri lagði þann stigalægri en þó má nefna að Ásthildur Helgadóttir gerði jafntefli við Árna Ólafsson (1273) eftir að hafa pattað andstæðing sinn með gjörunna stöðu á borðinu. Ásthildur hefur ekki langt að sækja skákhæfileikana en faðir hennar er stórmeistarinn Helgi Áss Grétarsson.

Hún var löng og dramatísk baráttan á milli Óttars og Bjarts sem sitja hér að tafli með allan TR salinn fyrir sig. Benedikt fylgist spenntur með.

Það gengur á ýmsu á skákborðunum í mótum Bikarsyrpunnar og eftir góðan nætursvefn mætum við fersk á laugardagsmorgun kl. 10 þegar önnur umferð hefst. Við hvetjum áhorfendur til að mæta og upplifa spennuna beint í æð, og svo er ekki verra að fá sér ilmandi nýtt TR-kaffi með.

Nánar á heimasíðu TR.

Úrslit, staða og pörun

Spil og leikir | Slóð | Facebook | Athugasemdir (0)

27.10.2017 | 09:00

Haukur Sveinsson fallinn frá

Einn af öðrum falla þeir í valinn hinir eldri skákmenn og valinkunnu meistarar fyrri tíðar. Minnisstæðir karlar og ástríðuskákmenn sem teflt hafa sér til ánægju, yndisauka og ekki hvað síst til afþreyingar langt fram á efri ár.

Haukur var einn af stofnendum Riddararans, skákklúbbs eldri borgara fyrir 20 árum og heiðursriddari í okkar hópi. Síðan þá eru 13 félagar horfnir á braut yfir móðuna miklu sem sár eftirsjón er af. Þó yngri öldungar hafi fyllt hin stóru skörð er söknuðurinn og andi þeirra ávallt til staðar. Haukur afar virkur, öflugur og litríkur skákmeistari á 6. og 7. áratug liðinnar aldar. Hafnarfjarðarmeistari. Tefldi í landsliðsflokki á Skákþingi Íslands 1959-61 og fjölmörgum Meistaramótum TR á sínum tíma.

Hann var af mikilli skákætt og hóf ungir að tefla fyrir vestan. Sveinn faðir hans var kunnur skákdæmahöfundur og synir hans hafa einnig getið sér gott orð í skákinni. Sveinn Rúnar Íslandsmeistari unglinga árið 1962 og Óttar Felix sigurvegari í opnum flokki á Skákþingi Íslands 1979, síðar formaður TR og varaforseti SÍ.

Póstfulltrúi að ævistarfi og tefldi fyrir Póststofuna í Reykjavík á fyrstu árum Stofnanakeppninnar. Kom að stimplun frímerkjaumslaga af mikilli natni og vandvirkni þá er „Einvígi aldarinnar“ milli Bobby Fischers og Boris Spasskys var háð í Laugardalshöll.Við skákfélagarnir í Riddaranum, Gallerý Skák og KR minnumst hins glaðlynda og háttprúða hæglætismanns, skákmeistara í fremstu röð á sinni tíð, af virðingu og þökk fyrir átaldar ánægjustundir á hvítum reitum og svörtum um langt árabil.

Útför Hauks Sveinssonar fer fram í dag frá Hafnarfjarðarkirkju og hefst kl. 15

Einar S. Einarsson

Spil og leikir | Breytt s.d. kl. 11:59 | Slóð | Facebook | Athugasemdir (0)

27.10.2017 | 07:00

Bikarsyrpa TR hefst í dag

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað fjórða árið í röð. Líkt og síðastliðinn vetur verða mót syrpunnar fimm talsins og verða tefldar sjö umferðir í hverju móti. Mótin fara fram í Skákhöll TR að Faxafeni 12.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2002 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Þriðja mót Bikarsyrpunnar hefst föstudaginn 27. október og stendur til sunnudagsins 29. október. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Dagskrá:

1. umferð: 27. október kl. 17.30 (fös)
2. umferð: 28. október kl. 10.00 (lau)
3. umferð: 28. október kl. 13.00 (lau)
4. umferð: 28. október kl. 16.00 (lau)
5. umferð: 29. október kl. 10.00 (sun)
6. umferð: 29. október kl. 13.00 (sun)
7. umferð: 29. október kl. 16.00 (sun)

Verðlaunaafhending fer fram strax að lokinni 7. umferð.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Tilkynna þarf skákstjóra um yfirsetu fyrir lok umferðarinnar á undan.

Sjálfkrafa tap dæmist á keppanda sem mætir á skákstað meira en 15 mínútum eftir að viðkomandi umferð hefst.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari mótsins hlýtur að launum bikar og þá hlýtur einnig efsta stúlkan í hverju móti bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir besta samanlagðan árangur, þar sem mest fjögur mót gilda; taflsett, skákklukka, 5.000kr bókainneign ásamt veglegum farandbikar. Þá verða veitt sérstök verðlaun fyrir besta samanlagðan árangur, þar sem mest fjögur mót gilda, fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Skráning fer fram í gegnum skráningarform hér að neðan. Hlökkum til að sjá ykkur!

Skráningarform

Skráðir keppendur

Mót Bikarsyrpunnar í vetur: 25.-27. ágúst, 29. sep-1. okt, 27.-29. okt, 16.-18. feb, 6.-8. apr

Spil og leikir | Breytt 22.10.2017 kl. 23:23 | Slóð | Facebook | Athugasemdir (0)

26.10.2017 | 12:17

Skákfélag Akureyrar með fjórar sveitir á Íslandsmóti skákfélaga

Fyrri hluti mótsins fór fram í Reykjavík um síðustu helgi, 19-22. október. Að þessu sinni tefldi Skákfélagið fram tveimur sveitum í fyrstu deild, a- og b-sveit. Árangur beggja sveita var í góðu meðallagi; a-sveitin er í 4-5. sæti eftir fimm umferðir af níu og á alla möguleika á að blanda sér í baráttuna um bronsverðlaunin. B-sveitin, sem margir spáðu falli, er í áttunda sæti af tíu. Sveitin er í fallbaráttu, en réttu megin við strikið eins og er og á eftir mikilvægar viðureignir við neðstu sveitirnar. Víkingaklúbburinn er langefstur eftir fyrri hlutann og virðist fátt geta komið í veg fyrir sigur þeirra.

Svona hefst pistill Áskels Arnar Kárasonar, formanns Skákfélags Akureyrar, um þátttöku Akureyringa á Íslandsmóti skákfélaga.

Pistilinn má nálgast í heild sinni á heimasíðu SA.

Spil og leikir | Slóð | Facebook | Athugasemdir (0)

« Fyrri síða | Næsta síða »

Síðan

Skák.is

Skák.is, skákfréttavefur Íslands. Gunnar Björnsson er ritsjóri vefsins.

RSS-straumar

Erlendar vefsíður

Helstu erlendu fréttasíðurnar

Chessdom

Augnablik - sæki gögn...

Chess24

Augnablik - sæki gögn...

FIDE

Augnablik - sæki gögn...

Nýjustu færslur

Tenglar

Mót í gangi

Mót sem eru í gangi hverju sinni

Íslandsmótið í skák - Icelandic Open Valsheimilið, 1.-9. júní
Altibox Norway Chess 27. maí - 8. júní: Carlsen og flestir sterkustu skákmenn heims

Lykilvefir

Skáksamband Íslands Heimasíða SÍ
Mótaáætlun SÍ
Vefsvæði Friðriks Ólafssonar Vefsíða tileinkuð Friðriki Ólafssyni
Skákskóli Íslands
Skáksögufélagið
F3-klúbburinn Vildarvinir skákíþróttarinnar á Íslandi
Tímaritið Skák
Fischersetur Selfoss
Skákbækur til sölu
Bobbý skáksverslun
Skákhornið Spjallþráður skákmanna
Skáklandið Stefán Bergsson bloggar
Skákmyndir

Kennsluvefir

Íslensk taflfélög

Ef þú vilt tefla á netinu!

Erlendir skákvefir

FIDE Alþjóðlega skáksambandið
ECU
The Week in Chess
ChessBase
Chess Vibes
Chessdom
Your Chess News Umsjón Jóhann H. Ragnarsson
Bergens Schakklub Besta norræna skákfréttasíðan
Færeyska skáksambandið
Bloggsíða Susan Polgar
ChessCafe Pistlar og greinar

Bloggfærslur mánaðarins, október 2017

RSS-straumar

Erlendar vefsíður

Tenglar

Mót í gangi

Lykilvefir

Kennsluvefir

Íslensk taflfélög

Erlendir skákvefir

Almanök

Teflt á netinu

Færsluflokkar

Heimsóknir

Flettingar

Annað

Efni

Leita í þessu bloggi

Skákmót

Mótaáætlun SA (Prufa)

Mótaskráning

Fréttabréf SÍ

Fischer-setur

Auglýsing

Myndaalbúm

Eldri færslur

2018

2017

2016

2015

2014

2013

2012

2011

2010

2009

2008

2007

Innskráning

Innskráning: