Ólympíufarinn: Hannes Hlífar Stefánsson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Hannes Hlífar Stefánsson sem teflir á fyrsta borði í opnum flokki.

Nafn?

Hannes Hlífar Stefánsson

Aldur?

44

Hlutverk?

Ég tefli víst.

Uppáhalds íþróttafélag?

KR

Hvernig er undirbúningi þínum fyrir mótið háttað?

Undirbuningur fyrir Ól er ekki öðruvisi en önnur mót. Maður reynir að fylgjast með hvað er að gerast í byrjunum.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Þetta er mitt fyrsta Ólympíuskákmót en vonandi ekki það síðasta.

Getur þú nefnt frægan skákmann fæddan í Bakú?

Frægur skákmaður er Kasparov

Minnisstæðasta atvik á Ólympíuskákmóti?

Það var í Elista skákhöllinn var ekki byggð þegar við mættum ég svaraði þessu ítarlega fyrir tveimur árum.

Er Kaspíahafið haf eða stöðuvatn?

Kaspiahaf er stöðuvatn.

Minnisstæða skák á Ólympíuskákmóti og af hverju?

Ég man það ekki  ég er orðinn of gamall.

Hverjar eru þínar væntingar/vonir um gengi íslensku liðanna?

Að standa sig betur en við erum rankaðir. Við gerum okkar besta.

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Það þarf engan Björn Þorfinnsson þegar trúðurinn Gunnar Björnsson er annars vegar!

Eitthvað að lokum?

Skákin er harður skóli!

Háspenna á Sigló: Halldór mætir Stefáni

Fjör hefur færst í leikinn á Siglufirði. Þrír menn koma rétt á eftir forystusauðnum Halldóri Brynjari. Sigurður Daði, Þröstur Árnason og Stefán Bergsson eru allir með 4.5 vinning. Halldór er með fimm af sex. Í lokaumferðinni sunnudagsmorgunn mætir Halldór Stefáni Bergssyni í úrslitaskák SÞN rétt eins og fyrir 17árum þegar Halldór tryggði sér titilinn aðeins 14ára gamall. Þröstur freistar þess að leggja Áskel að velli. Verður Halldór að teljast líklegur sigurvegari mótsins.

http://chess-results.com/tnr235894.aspx?lan=1&art=2&rd=7&wi=821

Skákþáttur Morgunblaðsins: Wesley So vann stórmótið í St. Louis

 

Filippseyingurinn Wesley So sem mun tefla fyrir Bandaríkin á Ólympíumótinu í Baku í Aserbaídsjan sem hefst 1. september nk. varð einn efstur á stórmótinu í St. Louis sem lauk um síðustu helgi. Mótshaldararnir, bandaríski auðmaðurinn Rex Sinquefield og kona hans, hafa byggt upp magnað skákstarf í St. Louis með sýningarhöll og safni þar sem t.d. má finna taflmennina sem notaðir voru í hinni frægu 3. einvígisskák Fischers og Spasskís frá 1972. Þarna er einnig afbragðs kennsluaðstaða og reglulega sækja staðinn margir af bestu skákmönnum heims. Kasparov var meðal gesta um síðustu helgi en hann tók þarna þátt í frægu hraðskákmóti í vor þar sem hann varð að láta minni pokann fyrir Filippseyingnum í fimm hraðskákum. Þetta er stærsti sigur Wesley So á skákferlinum:

1. So 5 ½ v. (af 9) 2. –5. Anand, Aronjan, Topalov og Caruana 5 v. 6.-7. Nakamura og Vachier-Lagrave 4 ½ v. 8. Liren Ding 4 v. 9. Svidler 3 ½ v. 10. Giri 3 v.

Mótstaflan ber með sér að allt var opið hvað varðaði efsta sætið fram á lokadag. Þá gat Topalov komist upp við hlið So en missti niður unnið hrósendatafl í jafntefli í skák sinni við Aronjan. Hinn tæplega fimmtugi fyrrverandi heimsmeistari Wisvanthan Anand var öryggið uppmálað og var einnig nálægt því að ná efsta sæti.

Hollendingar hafa um nokkurt skeið bundið miklar vonir við hinn unga Anish Giri en hann virðist vera algjörlega „vatnslaus“ um þessar mundir. Á þremur stórmótum á þessu ári hefur honum ekki tekist að vinna eina einustu skák.

Bandaríkjamenn hljóta að vænta mikils af ólympíuliði sínu og að því takist að vinna gullið í Baku með Nakamura, Caruana og So innanborðs. En þó að „járntjaldið“ sé fallið hefur reynst erfitt að sækja sigur í Austurveg og geta ýmsir þættir eins og heppni hreinlega ráðið úrslitum. Ólympíumótið fer fram í Kristalhöllinni í Baku – á sama stað og Eurovision-söngkeppnin árið 2012.

En Nakamura er beittur þess dagana:

Sinquefield cup 2016; 9. umferð:

Hikaru Nakamura – Liren Ding

Slavnesk vörn

1. d4 d5 2. c4 c6 3. Rf3 Rf6 4. Rc3 e6 5. Bg5 h6 6. Bh4 dxc4 7. e4 g5 8. Bg3 b5 9. Be2 Bb7 10. h4 g4 11. Re5 Rbd7 12. Rxd7 Dxd7 13. Be5 De7 14. b3 cxb3 15. axb3 a6 16. Dc1!?

Allt saman sést áður fram að þessum leik sem er nýr af nálinni.

16. ... Hg8 17. O-O Rh5 18. d5!?

Ræðst strax til atlögu. Ein einföld hugmynd er 18. ... cxd5 19. Rxb5! o.s.frv.

18. ... Dxh4?

Þetta hefði hann betur látið ógert, 18. ... f6 eða 18. ... exd5 var betra.

19. g3 Dg5? 20. dxc6! Dxe5

Eða 20. ... Dxc1 21. cxb7! og vinnur.

21. cxb7 Hb8

22. Rd5!

Drottningin ryðst inn eftir c-línunni og svartur er varnarlaus.

22. ... exd5 23. Dc8+ Ke7 24. Hxa6 Rxg3 25. Bxb5 Re2+ 26. Bxe2 f6 27. He6+! Dxe6 28. Dxb8

- og Liren Ding gafst upp. 

 

 

 

Lenka Íslandsmeistari kvenna í áttunda sinn

 

Lenka Ptacnikova varð Íslandsmeistari kvenna um síðustu helgi en hún vann þá Veroniku Steinunni Magnúsdóttur í lokaumferð mótsins og vann mótið með fullu húsi. Þetta er í áttunda sinn sem hún verður Íslandsmeistari í skák. Lokaniðurstaðan varð þessi: 1. Lenka Ptacnikova 5 v. (af 5) 2. – 3. Hallgerður Helga Þorsteinsdóttir og Guðlaug Þorsteinsdóttir 3 v. 4. Veronika Steinunn Magnúsdóttir 2 v. 5. Hrund Hauksdóttir 1 ½ v. 6. Tinna Kristín Finnbogadóttir ½

Helgi Ólafsson [e-mail]

Grein þessi birtist í Morgunblaðinu 20. ágúst 2016

Skákþættir Morgunblaðsins

[Event "Sinquefield Cup"] [Site "Saint Louis USA"] [Date "2016.08.14"] [EventDate "2016.08.04"] [Round "9"] [Result "1-0"] [White "Hikaru Nakamura"] [Black "Ding Liren"] [ECO "D44"] [WhiteElo "2791"] [BlackElo "2755"] [PlyCount "55"] 1. d4 d5 2. c4 c6 3. Nf3 Nf6 4. Nc3 e6 5. Bg5 h6 6. Bh4 dxc4 7. e4 g5 8. Bg3 b5 9. Be2 Bb7 10. h4 g4 11. Ne5 Nbd7 12. Nxd7 Qxd7 13. Be5 Qe7 14. b3 cxb3 15. axb3 a6 16. Qc1 Rg8 17. O-O Nh5 18. d5 Qxh4 19. g3 Qg5 20. dxc6 Qxe5 21. cxb7 Rb8 22. Nd5 exd5 23. Qc8+ Ke7 24. Rxa6 Nxg3 25. Bxb5 Ne2+ 26. Bxe2 f6 27. Re6+ Qxe6 28. Qxb8 1-0

Halldór efstur á Sigló

Halldór Brynjar Halldórsson er efstur á Skákþingi Norðlendinga sem fer fram á Siglufirði. Í fyrri kappskák dagsins sýndi hann Braga Halldórssyni litla miskunn. Bragi náði ekki að hrókfæra og vatt kóngnum fram á borðið. Það sætti Halldór sig illa við og náði óstöðvandi sókn á kóng Braga. Á efsta borðinu slíðruðu æskufélagarnir Þröstur Árnason og Sigurður Daði snemma sverðin og sömdu stutt jafntefli. Þröstur stýrir hvítu mönnunum gegn Halldóri í sjöttu umgerð sem tefld verður síðar í dag. Sigurður Daði hefur svart gegn nafna sínum Arnarsyni. 

http://chess-results.com/tnr235894.aspx?lan=1&art=2&rd=6&wi=821

Ólympíufarinn: Björn Ívar Karlsson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Björn Ívar Karlsson liðsstjóra kvennaliðsins. 

Nafn?

Björn Ívar Karlsson

Aldur?

31

Hlutverk?

Landsliðsþjálfari kvennaliðsins

Uppáhalds íþróttafélag?

ÍBV fram í rauðan…

Hvernig er undirbúningi þínum fyrir mótið háttað?

Æfingar, þjálfun og annar almennur undirbúningur sem viðkemur ferðinni.

Hvenær tókstu fyrst þátt á Ólympíuskákmóti og hversu oft hefur þú tekið þátt?

Þetta er mitt fyrsta Ólympíuskákmót en vonandi ekki það síðasta.

Getur þú nefnt frægan skákmann fæddan í Bakú?

Kasparov er augljósi kosturinn og sá fyrsti sem kemur upp í hugann. Óvæntasti skákmaðurinn sem ég get nefnt er væntanlega Emil Sutovsky.

Minnisstæðasta atvik á Ólympíuskákmóti?

Þar sem ég hef aldrei áður tekið þátt þá verð ég að eftirláta mér reyndari liðsmönnum að koma með góðar sögur af gömlum Ólympíumótum.

Er Kaspíahafið haf eða stöðuvatn?

Rökhugsun mín segir mér að Kaspíahafið héti eitthvað annað væri það stöðuvatn. Samkvæmt því er það haf.

Minnisstæða skák á Ólympíuskákmóti og af hverju?

Jesus Nogueiras – Helgi Ólafsson úr viðureign Kúbu og Íslands á Ólympíumótinu í Dubai 1986. Skákin er lærdómsríkt meistaraverk í stöðulegri taflmennsku og ekki skemmir fyrir að í umfjöllun um skákina sagði Helgi að "í áætlunarbílnum á leið á skákstað ákvað ég að beita Grunfelds-vörn í fyrsta skipti á ævinni."

Hverjar eru þínar væntingar/vonir um gengi íslensku liðanna?

Ég geri kröfu um að liðsmenn gefi allt sitt í verkefnið. Ef það tekst þá verð ég sáttur. Vonir mínar eru einnig að mótið verði lærdómsríkt fyrir allt okkar fólk og verði jafnframt reynsla sem hægt verður að byggja ofan á í framtíðaráformum landsliðanna

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Ég hef nokkra grunaða um að gera heiðarlega tilraun að því að taka þetta hlutverk að sér. Það er samt ljóst að það kemst enginn með tærnar þar sem Björn hefur hælana, svo það má búast við því að þetta verði hálf trúðalaus ferð.

Eitthvað að lokum?

Ég er spenntur að sjá umgjörðina í kringum mótið í Bakú. Mér skilst að Azerarnir ætli að setja rúmlega 2 milljarða króna í mótið og það má því gera ráð fyrir góðum aðstæðum fyrir keppendur og fylgdarlið. Annars bara áfram Ísland!

Þrír efstir á Sigló eftir atskákina

Skákþing Norðlendinga hófst í gær á Siglufirði. Góð þátttaka er á mótinu en 24 skákmenn taka þátt. Fjórar atskákir voru tefldar í gær. Nokkuð var um óvænt úrslit og m.a. lagði Guðmundur Lee Braga Halldórsson og Stefán Bergsson í fyrstu tveimur umferðunum. Sigurður Daði, Halldór Brynjar og Þröstur Árnason eru efstir og jafnir með 3.5 vinning. Sigurður Daði og Þröstur mætast í fyrri kappskák dagsins en Halldór freistar þess að leggja Braga að velli. Alls eru tefldar sjö umferðir á mótinu. Teflt er í safnaðarheimilinu við góðar aðstæður.

http://chess-results.com/tnr235894.aspx?lan=1&art=9&fed=ISL&wi=821&snr=17

Íslandsmót 65 ára og eldri fer fram 10. september

Íslandsmót öldunga  65 ára og eldri  verður haldið laugardaginn 10. september  nk. í Ásgarði, félagsheimili  FEB að Stangarhyl.  Að þessu sinni standa báðir skákklúbbar eldri borgara á Höfuðborgarsvæðinu, RIDDARINN og ÆSIR, sameiginlega að mótinu, sem áður hefur farið fram á vegum hins fyrrnefnda í Hafnarfirði.

Þetta er í þriðja sinn sem slíkt Íslandsmót með atskákarsniði fer fram í þessum aldursflokki.

Tefldar verða 9 umferðir með 10 mínútna umhugsunartíma auk  3 sekúndna viðbótartíma á leik. Fjórar umferðir verða tefldar fyrir hádegi en lokaumferðirnar fimm eftir hádegisverðarhlé.

Mótið hefst kl. 10 árdegis og lýkur um kl. 16.30  með verðlaunaafhendingu. 

Þátttökugjald er kr. 1000 og innifelur kaffi, svaladrykki og snarl meðan á móti stendur. Björgvin Víglundsson er núverandi Íslandsmeistari og  hefur unnið mótið í bæði skiptin sem það hefur verið haldið.  

Aðalverðlaun mótsins er kr. 50.000 ferðastyrkur á Norðurlandamótið í skák í Sastamala, Finnlandi, 22. -30. október nk.  Auk verðlaunagripa sem gefnir eru af Sportvöruverzluninni JÓA ÚTHERJA, verða veitt vegleg bókaverðlaun og aldursflokkaviðurkenningar (65-70; 71-75; 76-80; 81 og eldri). Vænst er góðrar þátttöku sem víðast hvar að af landinu.  

Mótsnefndina skipa fulltrúar "Öðlinganefndar SÍ" þeir: Einar S. Einarsson, formaður; Finnur Kr. Finnsson; Guðfinnur R. Kjartansson; Sigurður E. Kristjánsson og Össur Kristinsson.

Skráning fer fram á Skák.is (guli kassinn efst). Upplýsingar um þegar skráða keppendur má finna hér. 

 

Meistaramót Hugins hefst á miðvikudagskvöldið

Meistaramót Hugins (suðursvæði) 2016 hefst miðvikudaginn 31. ágúst klukkan 19:30. Mótið er 7 umferða opið kappskákmót sem lýkur 19. september. Leyft verður að taka 2 yfirsetur í 1.-5. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra og íslenskra skákstiga. Skráning í mótið fer fljótlega af stað á skák.is en einnig er hægt að skrá sig með því að hringja í skákstjóra s-866-0116 (Vigfús).

Skákdagar eru mánudagar, miðvikudagar og fimmtudagar en aldrei eru meira en tvær umferðir í viku.

• Skráningarform

Aðalverðlaun:

1. 50.000
2. 40.000
3. 30.000

Aukaverðlaun (miðað er við alþjóðleg skákstig)

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá skákbóksölunni að verðmæti kr. 5.000.
• Besti árangur undir 1800 skákstigum:  Skákbók hjá skákbóksölunni að verðmæti kr. 5.000.
• Besti árangur undir 1600 skákstigum: Skákbók hjá skákbóksölunni að verðmæti kr. 5.000.
• Besti árangur stigalausra: Skákbók hjá skákbóksölunni að verðmæti kr. 5.000.
• Unglingaverðlaun (15 ára og yngri), skákbækur hjá skákbóksölunni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.000; Aðrir 3.000.
Allir titilhafar fá frítt í mótið

Umferðartafla:

• 1. umferð, miðvikudaginn, 31. ágúst, kl. 19:30
• 2. umferð, fimmtudaginn, 1. september, kl. 19:30
• 3. umferð, mánudaginn, 5. september, kl. 19:30
• 4. umferð, miðvikudaginn, 7. september, kl. 19:30
• 5. umferð, mánudaginn, 12. september, kl. 19:30
• 6. umferð, fimmtudaginn, 15. september, kl. 19:30
• 7. umferð, mánudaginn, 19. september, kl. 19:30

Ólympíufarinn: Guðmundur Kjartansson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Guðmund Kjartansson sem teflir á sínu öðru Ólympíuskákmóti. 

Nafn?

Guðmundur Kjartansson

Aldur?

28 ára

Hlutverk?

4.borði í karlaliðinu

Uppáhalds íþróttafélag?

Fylkir

Hvernig er undirbúningi þínum fyrir mótið háttað?

Ég ákveð hvaða byrjanir ég ætla að tefla, tefli hraðskákir á netinu, leysi mikið af þrautum, skoða endatöfl og fylgist með þeim mótum sem eru í gangi. Ég tek þátt í sterku móti í Abu Dhabi sem verður góð æfing rétt fyrir Ólympíumótið. Svo kíki ég í fótbolta, fer í göngutúra eða syndi til að halda mér í líkamlegu formi og reyni almennt að líða vel og vera með rétt hugarfar 

Hvenær tókstu fyrst þátt á Ólympíuskákmóti og hversu oft hefur þú tekið þátt?

Ég tók fyrst þátt í Tromsö 2014 svo þetta verður í annað skipti

Getur þú nefnt frægan skákmann fæddan í Bakú?

Rauf Mamedov

Minnisstæðasta atvik á Ólympíuskákmóti?

Það var alltaf gaman að spila fótbolta með hinum og þessum stórstjörnum, ég man þegar næst stigahæsti skákmaður heims, MVL, var í marki og gerði tilraun til þess að kasta boltanum út en dreif því miður ekki nema svona einn metra þannig að einn af andstæðingunum okkar náði boltanum og skoraði frekar auðveldlega.

Er Kaspíahafið haf eða stöðuvatn?

Væntanlega stöðuhaf

Minnisstæða skák á Ólympíuskákmóti og af hverju?

Þegar ég mætti Andrew Greet og tefldi kóngsindverjann. Ég var með tapað tafl en tókst að búa til svaka flækjur og að lokum verjast vel.

Hverjar eru þínar væntingar/vonir um gengi íslensku liðanna?

Við ætlum að pakka öllum saman!

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Við erum allir trúðar! ... en líklega Gunnar Björnsson

Eitthvað að lokum?

Ég hef aldrei komið til Bakú áður og svo er líka mjög sérstök stemmning á svona mótum svo að ég er að sjálfsögðu spenntur fyrir ferðinni og ekki skemmir fyrir að það er mjög góður 20 manna hópur að fara frá Íslandi. Við erum allir góðir vinir í liðinu og það verður gaman að tefla í sama liði og Jói í fyrsta skipti. 

Hannes og Hallgerður efst á sterku skákmóti Hróksins á Stofunni

Stórmeistarinn Hannes Hlífar Stefánsson varð efstur á mjög sterku skákmóti sem Hrókurinn og Stofan Café efndu til á fimmtudagskvöldið, í tilefni af Ólympíuskákmótinu sem hefst í Bakú í Aserbaídsjan í næstu viku. Hallgerður Helga Þorsteinsdóttir sigraði í kvennaflokki. Keppendur voru 32 og var mótið æsispennandi og bráðskemmtilegt frá upphafi til enda. 

Helgi Hrafn Gunnarsson þingmaður lék fyrsta leikinn á mótinu fyrir Hannes Hlífar gegn Jon Olav Fivelstad.  Hannes hefur orðið Íslandsmeistari tólf sinnum, oftar en nokkur annar, og hann tefldi af miklu öryggi á mótinu. Goðsögnin Jóhann Hjartarson veitti honum harða keppni framan af, sem og stórmeistarinn Helgi Áss Grétarsson, en Hannes gaf engan höggstað á sér. 

Helgi Áss varð í 2. sæti í karlaflokki og hinn ungi og bráðefnilegi Dagur Ragnarsson náði bronsinu. 

Keppni var mjög tvísýn í kvennaflokki, enda allar landsliðskonurnar fimm meðal keppenda, sem og Sigurlaug Regína Friðþjófsdóttir, fv. Íslandsmeistari. Leikar fóru svo að Hallgerður Helga hreppti gullið, Lenka Ptacnikova silfrið og Guðlaug Unnur Þorsteinsdóttir bronsið. Þær skipa íslenska kvenna liðið á Ólympíumótinu í Bakú, ásamt Hrund Hauksdóttur og Veróniku Steinunni Magnúsdóttur. 

Í mótslok afhenti Kristjana Guðmundsdóttir Motzfeldt, heiðursforseti Hróksins á Grænlandi, verðlaun frá Stofunni og óskaði íslenska landsliðsfólkinu gæfu og gengis á Ólympíumótinu í Bakú. 

Liðsmenn Hróksins hafa undanfarin misseri staðið fyrir mörgum viðburðum á Stofunni, Vesturgötu 3, og þar er góð aðstaða til skákiðkunar.