Frábær árangur Hilmis í Øbro

Hilmir Freyr Heimisson (1947) stóð sig frábærlega á CXU-nýársmótinu í Øbro í Danmörku sem lauk í gær. Hilmir, sem tefldi við stigahærri andstæðinga í öllum umferðum, hlaut 5 vinninga í sjö umferðum og var taplaus. Hilmir endaði í 4.-8. sæti (5. á stigum). Árangur hans samsvaraði 2349(!!) skákstigum og hækkar hann um 141 skákstig fyrir frammistöðu sína. Hilmi var nr. 45 í stigaröð 65 keppenda.

Einstaklingsúrslit Hilmis (hægt að stækka með því því að tvíklikka):

Henriki Danielsen (2502) náði sér ekki á strik og hlaut 4,5 vinninga og endaði í 9.-17. sæti (9. sæti á stigum).

• Heimasíða mótsins
• Beinar útsendingar

Skákþing Reykjavíkur hefst á sunnudag

Skákþing Reykjavíkur hefst sunnudaginn 3. janúar kl. 14. Tefldar verða níu umferðir eftir svissnesku kerfi og eru tímamörk 1½ klst. á 40 leiki auk 30 sek. á leik. 15 mínútur bætast við eftir 40 leiki auk 30 sek. á leik. Umferðir fara fram tvisvar í viku, á miðvikudögum kl. 19.30 og á sunnudögum kl. 14. Teflt er í húsnæði Taflfélags Reykjavíkur að Faxafeni 12.

Boðið er upp á tvær yfirsetur (bye) í umferðum 2-6. Keppandi skal leggja inn skriflega beiðni um yfirsetu til skákstjóra í síðasta lagi við upphaf umferðarinnar á undan. Hálfur vinningur fæst fyrir yfirsetu.

Dagskrá:

1. umferð sunnudag 3. janúar kl. 14
2. umferð miðvikudag 6. janúar kl. 19.30
3. umferð sunnudag 10. janúar kl. 14.00
4. umferð miðvikudag 13. janúar kl. 19.30
5. umferð sunnudag 17. janúar kl. 14.00
6. umferð miðvikudag 20. janúar kl. 19.30
7. umferð sunnudag 24. janúar kl. 14
8. umferð miðvikudag 27. janúar kl. 19.30
9. umferð sunnudag 31. janúar kl. 14

Verðlaun:

• 1. sæti kr. 120.000
• 2. sæti kr. 60.000
• 3. sæti kr. 30.000

• Besti árangur undir 2000 skákstigum kr. 10.000
• Besti árangur undir 1800 skákstigum kr. 10.000
• Besti árangur undir 1600 skákstigum – bókaverðlaun
• Besti árangur undir 1400 skákstigum – bókaverðlaun
• Besti árangur undir 1200 skákstigum – bókaverðlaun
• Besti árangur stigalausra – bókaverðlaun

Fide stig gilda við úthlutun stigaverðlauna – annars íslensk stig.

Þátttökugjöld:

kr. 5.000 fyrir 16 ára og eldri
kr. 2.500 fyrir 15 ára og yngri

Skráningarform

Skráðir keppendur

Keppt er um titilinn “Skákmeistari Reykjavíkur 2016” og hlýtur sá keppandi sem verður efstur þeirra sem eiga lögheimili í Reykjavík, eða eru félagsmenn í reykvísku skákfélagi, titilinn og farandbikar til varðveislu í eitt ár. Núverandi Skákmeistari Reykjavíkur er alþjóðlegi meistarinn Jón Viktor Gunnarsson.

Verði keppendur jafnir að vinningum í þremur efstu sætunum, verður verðlaunum skipt (Hort útreikningur), en stigaútreikningur látinn skera úr um verðlaunasæti. Í aukaverðlaunaflokkum ganga verðlaun óskipt til þess, sem hefur flest stig eftir stigaútreikning.

Skákþingið er reiknað til alþjóðlegra skákstiga.

Vinsamlegast mætið tímanlega á skákstað til að staðfesta skráningu og greiða þátttökugjald. Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Vignir Vatnar jólahraðskákmeistari TR

Það var rífandi stemming í Skákhöllinni þegar 35 stríðalin jólabörn mættu til leiks á Jólahraðskákmót Taflfélags Reykjavíkur í gærkvöldi. Tefldar voru 2×7 umferðir með 5 mínútur á klukkunni.

Sigurvegari síðasta árs Oliver Aron Jóhannesson var mættur til að verja titilinn en einnig margar aðrar þekktar klukkubarningsvélar eins og Ólafur B. Þórsson, Gunnar F. Rúnarsson og Billiardsbars-bræðurnir Jóhann Ingvason og Kristján Örn Elíasson.

Yngsta kynslóðin lét sig heldur ekki vanta enda ávallt í góðu formi fyrir hraðskákirnar.  Þannig var Adam Omarsson mættur ásamt móður sinni Lenku og Freyja Birkisdóttir ásamt bræðrum sínum Birni og Bárði.  Það var einnig Vignir Vatnar nokkur Stefánsson sem sýndi strax að frábær árangur hans á Atskákmóti Icelandair var enginn tilviljun og byrjaði strax að véla andstæðinga sína niður eftir öllum kúnstarinnar reglum.

Eftir átta umferðir var Vignir einn efstur með 7 1/2 vinning og hafði þá m.a. lagt að velli Örn Leo Jóhannsson 2-0 og FM Grafarvogsvélina Dag Ragnarsson 1 1/2 -1/2.  Fast á hæla honum vinning á eftir var Ólafur B. Þórsson og þeir tveir mættust í næstu viðureign.  Þar hafði Óli sigur 2-0 í hörkuskákum.  Vignir lét það þó ekki hafa áhrif á sig og sigraði síðustu fjórar skákir sínar í mótinu og kom í mark með 11 1/2 vinning. Ólafur B. þurfti 1 vinning úr lokaskákunum tveimur en fékk það erfiða hlutskipti að þurfa að sækja hann gegn sigurvegara síðasta árs Oliver Aron.  Það tókst ekki því Oliver sigraði viðureignina 1 1/2 – 1/2 eftir mikinn klukkubarning og því varð Óli að gera sér annað sætið að góðu með 11 vinninga.  Oliver varð svo þriðji með 10 1/2 vinning.

Taflfélag Reykjavíkur þakkar öllum þeim sem lögðu leið sína í Fenið í gærkvöldi og tóku þátt.  Skákþing Reykjavíkur sem haldið hefur verið samfleytt í 85 ár og er elsta mót landsins hefst svo á sunnudaginn.  Við vonumst til að sjá sem flesta á því stórskemmtilega móti.  Gleðilega hátíð!

Úrslit og lokastaðan í Jólahraðskákmóti TR 2015 hér.

Nánar á heimasíðu TR.

Björgvin Smári jólahraðskákmeistari SSON

Jólahraðskákmót SSON var haldið sl. þriðjudag og mættu sex höfðingjar til leiks. 
Æfingaleysi virtist hrjá menn á köflum en úr varð hið skemmtilegasta mót. 
Fyrrverandi formaður félagsins Björgvin Smári var í miklum ham og vann mótið með fullu húsi. 

Í verðlaun var hin ágæta bók Garðars Sverrissonar um Fischer. 
Tefld var tvöföld umferð og umhugsunartími 5 mín. Mótið fór fram í Fischersetri. 

Úrslit:

1. Björgvin Smári         10 v. 
2. Sverrir Unnarsson      6. v. 
3.-4. Ingimundur og 
      Úlfhéðinn Sigurmds. 4.5 v.
5. Magnús Garðarsson      3.5 v. 
6. Þorvaldur Siggason     1.5 v. 

Richard Rapport teflir á Reykjavíkurskákmótinu

Richard Rapport (2715) verður meðal keppenda á Reykjavíkurskákmótinu sem fram fer 8.-16. mars nk. Rapport þykir einn skemmtilegasti og frumlegasti skákmaður heims. Rapport tefldi á öðru borði með sveit Ungverja á EM landsliða og náði þar bestum árangri allra. Það gerði einnig kærasta hans, hin serbneska Jovana Vojinovic (2352), en hún stóð sig best allra annað borðs kvenna.

Jovana verður framarlega í afar sterkum hópi skákkvenna sem sækja mun mótið að ári.

Rappport er eins og er stigahæstur keppenda á Reykjavíkurskákmótinu en ekki útilokað að það komi til með að breytast. 

Nánari upplýsingar um þátttöku Rappport má finna á heimasíðu mótsins.

Alls eru 137 skákmenn skráðir til leiks á Reykjavíkurskákmótið og stefnir í afar gott og skemmtilegt mót en fljótlega eftir áramót munu allmargir sterkir og skemmtilegir skákmenn bætast við hópinn.

Keppendalistinn.

Jólamót Víkingaklúbbsins fer fram í kvöld

Jólamót Víkingaklúbbsins verður haldið miðvikudaginn 30. des í húsnæði Skáksambands Íslands og hefst það kl 19.30. Teflt verður bæði skák og Víkingaskák. Fyrst 7. umferða skákmót með 5 mínútna umhugsunartíma, en eftir það verða 7. umferðir í Víkingaskák, þs 7 umferðir 7. mínútur.  Verðlaun í boði fyrir þrjú efstu sæti og ókeypis veitingar, m.a Víkingamjöður.  Ekki er nauðsynlegt að taka þátt í báðum mótunum og þeir sem ætla að tefla einungis Vîkingaskák mæta ekki seinna en kl 21.30.  Víkingaskákmótið er jafnframt Ìslandsmótið í Víkingahraðskák.  Einnig eru veitt sérstök verðlaun fyrir besta árangur í báðum mótunum, en sá sem er með besta árangurinn úr báðum mótunum er jafnframt Íslandsmeistari í tvískák.

Sérstök aukaverðlaun fyrir Víkingaskák:  1. sæti:  8000, 2. sæti 6000, 3. sæti 4000, 1. sæti kvenna:  4000,  1. sæti unglinga 4000.

Skráning á mótið fer m.a fram á netfangið: vikingaklubburinn(hjá)gmail.com

Mótið 2014 hér:
Mótið 2013 hér:
Mótið 2012 hér:
Mótið 2011 hér: 
Mótið 2010 hér:
Mótið 2009 hér:

Magnus Carlsen sigurvegari Katar-mótsins

Magnus Carlsen (2834) sigraði á Qutar Masters Open sem lauk rétt í þessu í Doha í Katar. Heimsmeistarinn hlaut 7 vinninga, eftir stutt jafntefli við Vladimir Kramnik (2796) í lokaumferðinni og kom jafn í mark og kínverski stórmeistarinn Yu Yangyi (2736). Þeir tefldu tveggja skáka einvígi til úrslita með styttri umhugsunartíma og þar vann Magnús auðveldan 2-0 sigur. Heimsmeistarinn greinilega enn bestur í spilinu þrátt fyrir smá hikst á EM.

Kramnik (2796), Sergei Karjakin (2766), Sanan Sjugirov (2646), Ni Hua (2693) og Vassily Ivanchuk (2710) urðu í 3.-7. sæti með 6½ vinning.

Kramnik hefur heldur betur verið að sækja í sig veðrið síðustu misseri og er nú kominn í annað sæti stigalistans.

Heimasíða mótsins

Frábær byrjun Hilmis í Øbro

Hilmir Freyr Heimisson (1947) byrjar frábærlega á CXU-nýársmótinu í Øbro í Danmörku sem nú er í gangi. Eftir 4 umferðir er Hilmir í 1.-6. sæti með 3½ vinning og það þrátt fyrir að hafa teflt upp fyrir sig í öllum umferðum og vera aðeins nr. 44 í stigaröð 65 keppenda. Í morgun vann hann Danann Brian Jörgen Jörgensen (2275). Hvort að sá sé eitthvað skyldur Jörundi hundadagakonungi skal ósagt látið. Henrik Danielsen (2502), sem einnig tekur þátt, hefur 3 vinninga og er í 7.-14. sæti.

Fimmta umferð hefst kl. 18. Þá teflir Hilmir við Danann Jan Nordenbæk Pedersen (2213) en Henrik við Jens Albert Ramsdal (2182). Báðir verða þeir í beinni.

• Heimasíða mótsins
• Beinar útsendingar

 

 

 

Davíð Kjartansson Íslandsmeistari í netskák í sjötta sinn!

 

Fidemeistarinn Davíð Kjartansson(Icehot1) sigraði á 20. Íslandsmótinu í netskák sem fram fór í kvöld, en hann hlaut 10 vinninga í 11 umferðum; hann tapaði aðeins einni skák, fyrir Arnaldi Loftssyni (Sonofair) og vann allar hinar tíu! Davíð er lang sigursælasti netskákmaður landsins, enda hefur hann nú unnið titilinn sex sinnum, eða lang oftast allra!

Stórmeistarinn Stefán Kristjánsson (Champbuster) varð í öðru sæti með 9.5 vinninga og Fidemeistarinn Róbert Lagerman (DONSANTA) þriðji með 8 vinninga.

Stórmeistari kvenna Lenka Ptácníková (velybra) sigraði örugglega í kvennaflokki með 6 vinninga, en þvi miður var ekki fleiri keppendu til að dreifa í þeim flokki.

Öldungurinn grjótharði, Jón Kristinsson (uggi) sigraði afar örugglega í öldungaflokki með 6,5 vinninga og Ögmundur Kristinsson (Cyprus) varð í öðru sæti með 5 vinninga, steinsnar á undan Sigurði Eiríkssyni (Haust) eftir stigaútreikning.

Tvíburarnir og TR’ingarnir efnilegu Björn– (broskall) og Bárður (Bardur) Birkissynir sigruðu í flokki 15 ára og yngri, báðir með 6 vinninga en Björn var heppnari með andstæðinga og því sæti ofar í heildarmyndinni.

Norðlendingurinn Tómas Veigar Sigurðarson (Eggid) varð efstur í undir 2100 stiga flokki með 6.5 vinninga og DavíðsbaninnArnaldur Loftsson (Sonofair) varð í öðru sæti með 6 vinninga.

TR’ingurinn Gauti Páll Jónsson (ryksuguskyr) hreppti efsta sætið í undir 1800 stiga flokki með 5 vinninga og Ingvar Örn Birgisson, sem einnig hlaut 5 vinninga en var með heldur lakari andstæðinga, varð í öðru sæti.

Huginn óskar sigurvegurunum til hamingju og þakkar öllum fyrir þátttökuna og hlakkar til að halda 21. Íslandsmótið í netskák árið 2016!

• Lokastaðan á ICC

Jólahraðskákmót TR fer fram í kvöld

Jólahraðskákmót Taflfélags Reykjavíkur verður haldið þriðjudaginn 29. desember kl. 19.30. Tefldar verða 2×7 umferðir með 5 mínútna umhugsunartíma. Mótið fer fram í húsnæði T.R. að Faxafeni 12. Þátttökugjald er kr. 500 en frítt fyrir 15 ára og yngri. Verðlaun fyrir þrjú efstu sætin. Sigurvegari síðasta árs var Oliver Aron Jóhannesson.

Hlökkum til að sjá ykkur!