HM ungmenna: Átta vinningar í hús í dag

Átta vinningar komu í hús í dag í fjórðu umferð HM ungmenna í Porto Carras. Yngri skákmennirnir voru fremstir í flokki í dag en ver gekk hjá elstu. Sigurvgarar dagsins voru þau Símon Þórhallsson (u16), Björn Hólm Birkisson (u16), Hilmir Freyr Heimisson (u14), Óskar Víkingur Davíðsson (u10), Stefán Orri Davíðsson (u10), Veronika Steinunn Magnúsdóttir (u18) og Freyja Birkisdóttir (u8).

Úrslit krakkanna má finna hér (hægt að stækka með því að tvíklikka á mynd)

Nánar á Chess-Results

Óskar Víkingur (u10) er efstur íslensku fulltrúanna með 3 vinninga. Jón Kristinn Þorgeirsson (u16), Símon (u16), Björn Hólm (u16), Hilmir Freyr (u14), Vignir Vatnar (u12) hafa allir 2½ vinning. 

Sautján fulltúar taka þátt fyrir hönds Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 3. pistill

3. umferð fór fram í gær hér á HM ungmenna. Gærdagurinn var heitasti dagurinn til þessa og einnig besti dagurinn okkar, ef miðað er við vinningafjölda. Jón Trausti og Oliver unnu báðir nokkuð örugglega. Jón Kristinn stal senunni þegar hann vann IM Razvan Preotu (2463) glæsilega, með hvítu mönnunum. Reyndar lék Jokkó af sér peði í byrjuninni en fékk sem betur fer góðar bætur fyrir það. Preotu fataðist flugið í vörninni og stuttu seinna var Jokkó kominn með yfirburðarstöðu sem hann kláraði með glæsilegri riddarafórn sem leiddi til máts. Símon vann líka af miklu öryggi. Hann fékk þægilegra tafl út úr byrjuninni og nýtti sér mistök andstæðingsins í miðtaflinu og fór í stórsókn sem endaðimeð máti í 22 leikjum.

Dawid Kolka vann sinn andstæðing, stigalausan strák frá Japan, án vandræða. Mikilvægur sigur fyrir Dawid, sem er þá kominn á blað og á vonandi eftir að halda áfram á beinu brautinni. Óskar Víkingur sigraði Aleks Jersic (1398) glæsilega, með svörtu. Jersic óð beint út í byrjunarleið sem Óskar hafði undirbúið og tapaði sannfærandi peði. Óskar tefldi framhaldið eins og sá sem valdið hefur og þrengdi mjög að hvítum sem lenti í vandræðum með kóngstöðuna og lék sig svo í mát. Freyja mætti stigalausri stúlku frá Namibíu, Lure Horn, með hvítu mönnunum. Freyja hafði tapað báðum skákunum sínum til þessa en lét það ekkert trufla sig og sigraði auðveldlega í skoska leiknum. Góður sigur og mikilvægur fyrir framhaldið hjá henni.

Dagur gerði jafntefli í erfiðri skák ásamt bræðrunum Birni Hólm og Bárði Erni. Einnig gerðu Adam, Veronika og Hilmir Freyr jafntefli. Adam og Hilmir Freyr voru báðir með mjög vænlegar stöður og voru óheppnir að vinna ekki. Veronika varðist vel, og hélt jafntefli, í erfiðu riddaraendatafli og kom síðust heim á hótel þegar klukkan var að verða 21:00, sex klukkustundum eftir upphaf umferðar. Veronika hefur lagt hart að sér í undirbúningi fyrir skákirnar, eins og allir hinir krakkarnir, og á að mínu mati mikið inni.

Heimir Páll, Vignir, Róbert og Stefán töpuðu allir í erfiðum skákum. Mér fannst Vignir eiga meira skilið úr sinni skák. Hann hélt FM Abdusattorov (2432) vel í skefjum framan af skák en gerði örlítil mistök í kringum 50. leik, sem andstæðingurinn nýtti sér óaðfinnanlega.

Að öðru leyti gengur allt sinn vanagang hér. Dagsrútínan er alltaf svipuð sem er gott. Bræðurnir Óskar Víkingur og Stefán Orri komu með athyglisverða kvörtun í morgun. Vegna þess hve þröngt er um keppendur í þeirra keppnissal þurfa þeir alltaf að smokra sér framhjá stelpunum í u8 flokknum. Þær virðast ekki kunna að meta þetta og hvæsa ítrekað á bræðurna þegar þeir troða sér framhjá. Ég man ekki eftir að hafa heyrt um 8 ára hvæsandi stúlkur á skákstað áður.

Hér var vindur í morgun og hálfkalt sem voru vonbrigði eftir gærdaginn. Nú hefur lægt og hlýnað og ég sit úti á svölum, á 6. hæð, þegar þessar línur er ritaðar og horfi á sólina nálgast sjóndeildarhringinn. Ég vildi að ég gæti yljað ykkur heima á Íslandi með þessu útsýni sem ég hef!

Bestu kveðjur frá Porto Carras,

Björn Ívar Karlsson

Íslandsmót eldri skákmanna 65 og ára og eldri - Strandbergsmótið í skák

Íslandsmót eldri skákmanna 65+ (fædda 1950 eða fyrr) verður haldið laugardaginn 7. nóvember nk. í Strandbergi, safnaðarheimili Hafnarfjarðarkirkju í umsjá  RIDDARANS - skákklúbbs öldunga,  sem þar hefur aðsetur sitt. 

Þetta er í annað sinn sem slíkt mót með atskákarsniði fer fram í þessum aldursflokki. Tefldar verða 9 umferðir með 10 mínútna umhugsunartíma plús 3 sekúndur á leik. Fjórar umferðir fyrir hádegi en lokaumferðirnar fimm eftir hádegisverðarhlé. 

Mótið hefst kl. 10 árdegis og lýkur um kl. 16 með verðlaunaafhendingu og kaffisamsæti.  Teflt verður í hátíðarsalnum við kjöraðstæður. Boðið verður upp á kaffi, svaladrykki og snarl meðan á móti stendur.  Góð verðlaun og aldursflokkaviðurkenningar.

 

Verðlaun

• 1. 10.000 kr.
• 2.  6.000 kr.
• 3.  4.000 kr.

Sértök verðlaun fyrir 70+, 75+ og 80+. Jói Útherji gefur aukaverðlaunin.

Þátttökugjald er kr. 2.500.

Skráing fer fram á Skák.is. Upplýsingar um þegar skráða keppendur má finna hér. 

U-2000 mót TR hefst í kvöld

Taflfélag Reykjavíkur fer nú aftur af stað með hið vinsæla U-2000 mót sem síðast var haldið fyrir sléttum áratug. Undanfarin ár hefur sífellt bæst í flóru viðburða hjá félaginu og er hugmyndin með endurvakningu U-2000 mótanna sú að koma til móts við þá skákmenn sem ekki hafa náð 2000 Elo-stigum og vilja gjarnan spreyta sig í opnu móti þar sem stigamunur á milli keppenda er minni en ella.

Þátttökurétt hafa allir þeir sem hafa minna en 2000 Elo-stig og er þá almennt miðað við alþjóðleg Fide-stig. Tefldar eru sjö umferðir eftir svissneska kerfinu og er umhugsunartími 90 mínútur fyrir alla skákina auk 30 sekúndna sem bætast við eftir hvern leik. Leyfðar eru tvær yfirsetur í umferðum 2-5 sem skal tilkynna fyrir lok umferðarinnar á undan en 1/2 vinningur fæst fyrir yfirsetu. Teflt er einu sinni í viku, á miðvikudagskvöldum kl. 19.30, í Skákhöll félagsins að Faxafeni 12.

Dagskrá
1. umferð: 28. október kl. 19.30
2. umferð: 4. nóvember kl. 19.30
3. umferð: 11. nóvember kl. 19.30
4. umferð: 18. nóvember kl.19.30
5. umferð: 25. nóvember kl. 19.30
6. umferð: 2. desember kl. 19.30
7. umferð: 9. desember kl. 19.30

Tvær yfirsetur leyfðar í umferðum 1-5.  Hægt er að tilkynna um yfirsetu í 1. umferð í síma 899 9268 (Björn) eða 867 3109 (Þórir).

Tímamörk
90 mín + 30 sek viðbót eftir hvern leik

Verðlaun
1. sæti kr. 30.000 og sæti í B-flokki Wow-air Vormóts TR 2016
2. sæti kr. 20.000
3. sæti kr. 10.000

Aukaverðlaun kr. 10.000 verða fyrir þann skákmann sem nær flestum samanlögðum vinningum úr bæði U-2000 mótinu og Skákþingi Garðabæjar (samanlögð Buchholz stig ráða ef jafnt á vinningum).

Þátttökugjöld
18 ára og eldri kr. 5.000, kr. 3.000 fyrir félagsmenn í TR
17 ára og yngri kr. 2.000, kr. 1.000 fyrir félagsmenn í TR

Skráningarform

Skráðir keppendur

Gott gengi í þriðju umferð - glæsilegur sigur Jóns Kristins

Vel gekk í þriðju umferð HM ungmenna sem fram fór í Porto Carras í Grikklandi í dag. Alls komu 10 vinningar í hús í 17 skákum. Oliver Aron Jóhansson (u18), Jón Trausti Harðarson (u18), Jón Kristinn Þorgeirsson (u16), Símon þórhallsson (u16), Dawid Kolka (u16), Óskar Víkingur Davíðsson (u10), og Freyja Birkisdóttir (u10) unnu sínar skákir. Sex krakkanna gerðu jafntefli og aðeins fjórar skákir töpuðust.

Úrslit krakkanna má finna hér (hægt að stækka með því að tvíklikka)

Nánar á Chess-Results

Sigur Jóns Kristins gegn kanadíska alþjóðlega meistaranum Razvan Preotu (2464) vakti mikla athygli en lok skákainnar voru einkar lagleg.

Hvítur á leik

29. Rf6+!! og svartur gafst upp. Framhaldið gæti hafa orðið 29...Hxf6 30. Hd8+ Rf8 31. Hxf8+! Kxf8 32. Dd8+ og svartur er óverjandi mát.

Jón Kristinn er efstur íslensku krakkanna með 2½ vinning. Vignir Vatnar (u12) og Óskar Víkingur hafa 2 vinninga.

Jón Kristinn verður í beinni útsendingu á morgun en þá teflir hann við úkraínska FIDE-meistarann Evgeny Shtembuliak (2416). Útsendingin hefst kl. 13:30.

Sautján fulltúar taka þátt fyrir hönds Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: 2. pistill

2. umferð á HM ungmenna fór fram í gær hér í Porto Carras í Grikklandi.
Oliver og Jón Trausti mættust innbyrðis sem var frekar óheppileg pörun fyrir okkar menn. Þeir fengu þó hrós frá okkur þjálfurunum fyrir að tefla skákina í botn í stað þess að semja snemma um jafntefli. Fljótlega eftir miðtaflið skiptist upp á mönnum og þegar það stefndi í jafnteflislegt endatafl með mislitum biskupum voru friðarsamningar undirritaðir. Akureyringarnir, Jón Kristinn og Símon, lentu báðir í vandræðum eftir byrjunina með svörtu. Þeir fengu mjög erfiðar stöður en með mikilli norðanseiglu tókst þeim báðum að rétta úr kútnum og halda jafntefli.

Björn Hólm og Heimir Páll unnu stigahærri andstæðinga, með svörtu, í góðum skákum. Heimir fórnaði manni í miðtaflinu fyrir tvö peð og einhverjar bætur gegn Beliotis (1905) frá Grikklandi. Ég held að Beliotis hafi skynjað að Heimir var ekkert smeykur við hann, þrátt fyrir að vera tæpum 300 stigum lægri, því honum fataðist flugið í vörninni og Heimir uppskar fleiri peð fyrir manninn. Heimir vann svo manninn til baka og fékk auðunnið endatafl sem hann kláraði af öryggi. Vignir Vatnar sýndi það að hann er kominn með mikla reynslu og sveið bandarískan andstæðing sinn í jafnteflislegu hróksendatafli. Hann mætir stigahæsta keppanda síns flokks í dag, Abdusattorov (2432) frá Úsbekistan, sem komst í fréttirnar í fyrra þegar hann vann GM Zhigalko (2600). Stefán Orri lenti í hálfgerðri klemmu eftir miðtaflið en varðist vel og snéri dæminu sér í vil um leið og andstæðingurinn gerði smá mistök. Endataflið tefldi hann svo eins og herforingi og sigldi sigrinum í höfn.

Róbert Luu mætti CM Benyahia (1260) frá Alsír og vann af öryggi. Ekki veit ég hvaða skilyrði menn þurfa að uppfylla í Alsír til þess að verða CM en hann hefur mögulega fengið titilinn með því að vinna eitthvað mót í heimalandinu. Veronika mætti Wu Min, stigahærri andstæðingi frá Austurríki, með svörtu. Wu eyddi góðum tíma í byrjuninni og virtist með því reyna að forðast undirbúning Veroniku í Sikileyjarvörn. Veronika fékk verra tafl út úr byrjuninni en náði að snúa taflinu sér í vil í miðtaflinu og hefði mögulega getað teflt lokastöðuna aðeins lengur, þegar þær sömdu um jafntefli. Dagur, Bárður Örn, Dawid Kolka, Hilmir Freyr, Óskar Víkingur, Adam og Freyja töpuðu.

Veðrið hefur verið frábært hér í dag og mér tókst að kíkja aðeins út um hádegisbil eftir að undirbúningnum var að mestu lokið. Ég rakst á GM Alekseenko, sem teflir í u18 flokknum, á ströndinni. Hann var að kanna hitastigið á sjónum og virtist ekki vera sáttur með það og rauk aftur inn á hótel. Ég var reyndar hæstánægður með hitastigið og náði nokkrum mínútum í sólinni áður en við héldum áfram að stúdera.

Mikil ös er í matsalnum, sérstaklega í hádeginu. GM Max Dlugy, frá Bandaríkjunum, vakti athygli mína í dag. Hann lét mannmergðina eitthvað fara í taugarnar á sér og ruddist fram úr röð barna sem voru að bíða eftir vatni og fyllti 2 glös áður en hann stormaði burt. Hann tapaði allri minni virðingu með þessu hátterni. Reyndar hafa Grikkirnir á hótelinu verið mjög duglegir að sinna þessum stóra hópi skákmanna og aðstæður eru, eins
og áður sagði, til fyrirmyndar. Þegar þessi orð eru skrifuð er klukkustund búin af 3. umferðinni. Mér finnst erfitt að komast ekkert inn í skáksalinn og sjá hvernig gengur hjá krökkunum. Það er þó lítið annað að gera en að bíða rólegur eftir að þau klári og taka á móti þeim uppi á hóteli. Við vonum það besta í dag.

Bestu kveðjur heim á klakann.

- Björn Ívar Karlsson

Viltu taka þátt í skákævintýrinu mikla og vera sjálfboðaliði á EM?

Bragi Halldórsson og Donika Kolica verða meðal sjálfboðaliða á EM. Hvað með þig?

Skáksamband Íslands mun í vetur ráðast í eitt stærsta verkefni íslenskrar skáksögu þegar Evrópumeistaramót landsliða verður haldið í Laugardalshöllinni dagana 12. – 22. nóvember. Framkvæmdin er gríðarlega umfangsmikil. Skáksambandið leitar um þessar mundir að sjálfboðaliðum til að starfa við mótið. Ýmis störf eru í boði og verður unnið á tveimur vöktum. Önnur vaktin er frá 14:00 – 18:00 og hin frá 18:00 – 21:00. Sjálfboðaliðarnir munu m.a. vinna við miðasölu, móttöku keppenda, veitingasölu, vörslu verðmæta,uppsetningu og frágang, upplýsingagjöf og öryggisgæslu.

Óskað er eftir 50-60 sjálfboðaliðum en nú þegar eru sjálfboðaliðar þegar orðnir um 40 talsins. 

Skáksambandið mun leggja mikla áherslu á góðan aðbúnað sjálfboðaliða. Þeir munu fá góða leiðsögn og þjálfun svo störfin verði sem auðveldust að vinna. Sérstakt herbergi í Höllinni verður tekið frá fyrir sjálfboðaliða þar sem þeir geta hvílst og notið veitinga. Þeir sjálfboðaliðar sem taka sjö vaktir eða fleiri fá boð á lokhóf mótsins, veglega gjöf frá Skáksambandinu að móti loknu og boð á uppskeruhátíð mótsins í desember þar sem landsliðsmenn munu koma í heimsókn og fara yfir þátttöku sína á mótinu. Allir sjálfboðaliðar fá gefins minjagrip mótsins.

Skáksambandið hvetur fólk á öllum aldri til að skrá sig sem sjálfboðaliða og taka þátt í því skákævintýri sem framundan er.

Bragi Halldórsson og Donika Kolica ætla bæði að vera sjálfboðaliðar á EM!  Viltu slást í hópinn?

Skráning hér.

 

HM ungmenna: 7½ vinningur í hús í annarri umferð

Önnur umferð HM ungmenna fór fram í dag í Porto Carras í Grikklandi. 7½ vinningur datt í hús í dag. Björn Hólm Birkisson (u16), Heimir Páll Ragnarsson (u14), Vignir Vatnar Stefánsson (u12), Róbert Luu (u10), Stefán Orri Davíðsson (u10) unnu í dag. Fimm gerðu jafntefli.

Vignir Vatnar er efstur íslensku krakkanna en hann er með fullt hús. Jón Kristinn hefur 1½ vinning.

Yfirlit yfir árangur íslensku krakkanna má finna hér.

Mynd má stækka með því að tvíklikka.

Þriðja umferð fer fram á morgun og hefst kl. 13. Vignir Vatnar og Jón Kristinn verða þá í beinni útsendingu. Vignir teflir við stigahæsta keppenda flokks sína sem er FIDE-meistari frá Úsbekistan (2432) og Jón Kristinn teflir við kanadískan alþjóðlegan meistara (2463). 

Sautján fulltúar taka þátt fyrir hönds Íslands á HM ungmenna og hafa aldrei verið fleiri.

 

• Heimasíða mótsins
• Chess-Results
• Beinar útsendingar

HM ungmenna: Pistill frá Birni Ívari

HM ungmenna í skák hófst hér í Porto Carras í gær. Íslensku keppendurnir eru 17 talsins að þessu sinni. Með hópnum eru, auk nokkurra foreldra og aðstandenda, Helgi Ólafsson og Lenka Ptacniková, ásamt undirrituðum Birni Ívari Karlssyni. Aðstæður hér á mótsstað eru til mikillar fyrirmyndar. 

Hótelið okkar, Meliton, er 5 stjörnu og herbergin rúmgóð og fín. Hitastigið á svæðinu er mjög passlegt, hitinn nær upp í 20 gráður upp úr hádegi en svo kólnar töluvert um leið og sólin sest. 1. umferðin fór fram í gær og var uppskeran úr henni 5,5 vinningur af 17 mögulegum. Ég held að stöðurnar hafi á tímabili bent til þess að við hefðum getað vænst fleiri vinninga en margir krakkanna voru að tefla talsvert upp fyrir sig. Dagur, Óskar, Vignir, Jón Kristinn og Hilmir Freyr unnu stigalægri andstæðinga en Bárður Örn gerði gott jafntefli við Asera með 2338 stig. Aðrir töpuðu. Andinn í hópnum er mjög góður og við leggjum mikið upp úr því að undirbúa okkur vel fyrir hverja skák. Allir krakkarnir eru vandvirkir í vinnubrögðum og við byrjum daginn snemma með morgunmat og förum svo beint í undirbúning fram yfir hádegi en þá gefst smá tími til þess að slaka á fyrir umferð. Umferðirnar byrja kl. 15:00 alla daga, nema þann síðasta, þannig að það er gott að vakna snemma og njóta sólarinnar því það fer að dimma hér um kl. fimm og komið myrkur þegar flestar skákir eru búnar. Þegar skákunum er lokið koma krakkarnir beint upp á hótel þar sem við förum saman yfir skákir dagsins og borðum svo saman kvöldmat. 

Teflt er á fjórum stöðum. U8-ára flokkurinn er á Sithonia hótelinu sem er í nokkurra mínútna fjarlægð, U10 ára flokkurinn er hér á hótelinu ásamt yngstu stúlkunum. Í Olympic Hall, sem er rétt við hótelið okkar, tefla svo U12, U14, U16 og U18, bæði í kvenna- og opnum flokki. Fjöldi skákmanna hér á hótelinu er svakalegur og það var talsverður troðningur við upphaf umferðar í Olympic Hall í gær. Þeir foreldrar sem mættir voru með myndavélina á lofti urðu þó fyrir miklum vonbrigðum þegar öllum var vísað út úr salnum á slaginu kl. 15:00, nema keppendum. Þeir eru strangir á þeim reglum að enginn komist inn í skáksalinn nema keppendur og yfirþjálfar. T.d. megum við Lenka ekki fara inn í skáksalinn en Helgi hefur leyfi til þess þar sem hann er skráður ,,Captain''. Sá titill fer Helga reyndar mjög vel! Ég held að þetta fyrirkomulag sé ágætt. Með þessu má forðast allt svindl og keppendurnir fá gott næði til þess að einbeita sér að skákunum. Í gær var hálf skondið að fylgjast með stressuðum foreldrum og þjálfurum fyrir utan afgirtan keppnissalinn, að bíða eftir einhverjum úrslitum eða fréttum. 

Það er gaman að fylgjast með fólkinu hér frá öllum þessum ólíku löndum. Stórir hópar eru hér t.d. frá Þýskalandi og Rússlandi, ásamt Asíu-

löndunum. Margir hóparnir eru með öfluga þjálfara með sér (ekki bara við!) og hef ég t.d séð stórmeistarana Vladimir Chuchelov, Arthur Yussupow,  og Mikhail Kobalia hérna á vappinu með sínum nemendum. 

Það eina sem hægt er að kvarta yfir hérna á svæðinu er netsambandið en gríðarlegt álag er á því með allan þennan fjölda sem dvelur hérna. Ég hef þurft að flýja yfir á Hotel Sithonia til þess að komast í samband við umheiminn, en þar virðist netsambandið vera þolanlegt. Ég mun reyna að rölta þangað til þess að koma frá mér einhverjum fréttum næstu daga. Vona að það gangi. 

Bestu kveðjur frá Porto Carras, Grikklandi. 

- Björn Ívar Karlsson

Íslandsmót taflfélaga í Fischer Random á föstudagskvöld!

Annað skemmtikvöld starfsársins hjá TR fer fram næstkomandi föstudagskvöld.  Þá mun fara fram Íslandsmót taflfélaga í Fischer random hraðskák.  Þetta verður í annað sinn sem mótið fer fram en í fyrra sigraði A sveit Taflfélags Reykjavíkur.

Öll taflfélög eru hvött til að taka þátt og er frjálst að senda eins margar sveitir til leiks og þau kjósa. Samkvæmt venju verður gert hlé á taflmennskunni til hægt sé að bregða sér á Billjardbarinn og væta kverkarnar.

Fyrirkomulagið verður eftirfarandi:

1. Tímamörk eru 3 mínútur auk 2 sekúndna viðbótartíma á hvern keppanda.
2. Fjöldi skákmanna í hverri sveit eru fjórir og skal styrkleikaraðað eftir bestu samvisku. Sveitir skulu merktar A, B etc eftir styrkleika. Leyfilegt er að vera með tvo varamenn fyrir hverja sveit, sem koma þá inn á borð samkvæmt styrkleika.
3. Swiss, round robin eða double round robin eftir fjölda sveita. Stefnt að því að tefla allavegana 12 umferðir.
4. Leyfilegt er að fá einn lánsmann úr öðru félagi í sína sveit. Það hefur þó afleiðingar. Lán á stórmeistara kostar 3 vinninga, alþjóðlegur meistari kostar 2 vinninga, Fide meistari kostar 1 vinning og aðrir skákmenn kosta 1/2 vinning. Þessir vinningar verða dregnir frá í lok móts. Samþykki viðkomandi félags þarf að liggja fyrir til að lánið teljist löglegt.
5. Sú sveit sem hlítur flesta vinninga sigrar og fær nafnbótina Íslandsmeistari taflfélaga í Fischer Random. Séu tvær eða fleiri sveitir jafnar að vinningum ber sú sveit sigur úr býtum sem hefur flesta “matchpoints”. Séu sveitir enn jafnar verður gripið til stigaútreiknings.
6. Gerð verður hlé til Billjardbarsferðar meðan á mótinu stendur. Verðlaunaafhending mun fara fram á Billjardbarnum.
7. Verðlaun:
   1.sæti Bikar og 5000 króna úttekt á billjardbarnum í formi veitinga.
   2.sæti Bikar og 3000 króna úttekt á Billjardbarnum í formi veitinga.
   3.sæti Bikar og 2000 króna úttekt á Billiardbarnum í formi veitinga.
8. Þátttökugjald eru 2000 kr á A sveit.  B og C sveitir fá helmingsafslátt á þátttökugjaldi

Aldurstakmark er 20 ár og rétt er að geta þess að áfengisbann ríkir í húsakynnum Taflfélagsins.

Björn Jónsson tekur við skráningu í síma 8999268, [e-mail] eða í formi facebook skilaboða.  Ekki er hægt að senda fax.  Skráningarfrestur rennur út á miðnætti fyrir mót, fimmtudagskvöldið 29. október

Bjór á stórlækkuðu verði á Billanum allt kvöldið! Hlökkum til að sjá ykkur!