Skákþing Garðabæjar hefst í kvöld

Skákþing Garðabæjar hefst mánudaginn 26. október 2015.   Tefldar verða 7 umferðir og verður mótið reiknað til íslenskra og alþjóðlegra stiga. 

Mótsstaður: Garðatorg 1. (gamla Betrunarhúsið). 2. hæð. Inngangur til hægri við verslunina Víði. 

Umferðatafla:

• 1. umf. Mánudag, 26. okt.  kl. 19.30. (B flokkur kl. 18:00)
• 2. umf. Mánudag, 2. nóv.  kl. 19.30  (B flokkur kl. 18:00)
• 3. umf. Fimmtudag, 5. nóv. kl. 19.30  (B flokkur kl. 18:00)
• 4. umf. Mánudag, 9. nóv. kl. 19.30  (B flokkur kl. 18:00)
• 5. umf. Mánudag, 23. nóv. kl. 19.30  (B flokkur kl. 18:00)
• 6. umf. Mánudag, 30. nóv. kl. 19.30  (B flokkur kl. 18:00)
• 7. umf. Mánudag, 7. des.  kl. 19.30  (B flokkur kl. 18:00)

Verðlaunaafhending og Hraðskákmót Garðabæjar 14. Desember kl 19:30.

Keppnisfyrirkomulag er svissneskt kerfi. Skákstjóri er Páll Sigurðsson. Sími 860 3120.

Tímamörk eru 90 mínútur og 30 sek sem bætist við hvern leik. Mótið er opið öllum og geta því stigalágir valið milli flokka.

B flokkur bara fyrir skákmenn með 1499 stig eða minna. Umhugsunartími  er 45 mín + 30 sek. á leik. 

Leyfilegt er í mótinu í umferðum 1-5 að taka hjásetu gegn hálfum vinning. Ekki er hægt að taka hjásetu eftir að pörun í umferð liggur fyrir.

Verðlaun auk verðlaunagripa:

Heildarverðlaun uþb. 60% af aðgangseyri skipt eftir Hort Kerfinu. Amk. 3 verðlaun í hvorum flokki.

Verðlaun skiptast (50/30/20). Lágmarks-heildarverðlaun í A flokki eru 20.000 og 10.000 í B flokki.  

Mótið er um leið skákþing Taflfélags Garðabæjar. (keppt er um titilinn ef jafnt).

Aukaverðlaun verða fyrir þann skákmann sem nær flestum samanlögðum vinningum úr bæði Skákþingi Garðabæjar og U2000 móti Taflfélags Reykjavíkur. (samanlögð Buchholz stig ráða ef jafnt á vinningum) Kr. 10.000.-

Sæmdartitilinn Skákmeistari Garðabæjar geta aðeins fengið félagsmenn taflfélags í Garðabæ eða skákmaður með lögheimili í Garðabæ.

Þátttökugjöld:

• Félagsmenn. Fullorðnir 3000 kr. 17 ára og yngri ókeypis.
• Utanfélagsmenn. Fullorðnir 4000 kr. Unglingar 17 ára og yngri 2000 kr 

Skráning í mótið fer fram á heimasíðu TG. www.tgchessclub.com

Skákmeistari Garðabæjar 2014 er Guðlaug Þorsteinsdóttir.

Hraðkvöld hjá Hugin í kvöld

Hraðkvöld Hugins verður mánudaginn 26. október nk.  og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hugins í Álfabakka 14a í Mjóddinni. Í vetur verða svo hraðkvöldin fyrsta og síðasta mánudag í hverjum mánuði að því undanskildu þegar mánudag ber upp á stórhátíð eða aðrir viðburðir eru til staðar..

Sigurvegarinn á hraðkvöldinu fær í verðlaun máltíð fyrir einn á Saffran eða pizzu frá Dominos Einnig verður dreginn út af handahófi annar keppandi sem einnig fær sama val. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

HM ungmenna; 5½ vinningur í 17 skákum í hús í fyrstu umferð

Heimsmeistaramót ungmenna hófst í dag í Porto Carras í Grikklandi. Dagur Ragnarsson (u18), Jón Kristinn Þorgeirsson (u16), Hilmir Freyr Heimisson (u14), Vignir Vatnar Stefánsson (u12) og Óskar Víkingur Davíðsson (u12) unnu sínar skákir. Bárður Örn Birkisson (u16) gerði jafntefli við sterkan aserskan skákmann (2338)

Björn Ívar Karlsson, einn fararstjóri krakkanna, mun öðru hverju vera með pistla frá mótinu. Önnur umferð hefst kl. 13 á morgun. Möguglega verður Dagur í beinni útsendingu.

Sautján íslenskir skákmenn taka þátt. Fulltrúar landsins hafa aldrei verið fleiri.

• Heimasíða mótsins
• Chess-Results
• Beinar útsendingar

Aron Þór unglingameistari TR - Svava stúlknameistari TR

Barna- og unglingameistaramót TR og stúlknameistaramót TR fór fram mitt í sannkölluðu vetrarfríi, en fyrsti snjórinn vitjaði Reykjavíkur í nótt.

Þrátt fyrir skólafrí, þátttöku 17 íslenskra ungmenna á HM í Grikklandi og stíft mótahald undanfarið var þátttaka ágæt í mótinu, en 15 tóku þátt í Barna- og unglingameistaramótinu en 8 í stúlknameistaramótinu.

Tefldar voru 15 mín. skákir og gaman var að sjá hvað krakkarnir nýttu tímann vel, en það voru gjarnan nokkrar skákir sem vörðu í heilan hálftíma.

Aron Þór Mai varð unglingameistari TR 2015. Sigur hans var sanngjarn og sannfærandi. Aron hlaut 6 vinninga og varð einum og hálfum vinningi á undan næsta manni. Aron sýndi mikla keppnishörku og stóð sjaldan tæpt, en tók yfirvegaða áhættu.

Í 2.-5.sæti með 4,5 vinninga urðu Mykhaylo Kravchuk, Þorsteinn Magnússon, Alexander Oliver Mai og Hjörtur Kristjánsson og urðu Mykhaylo og Þorsteinn í 2. og 3. sæti á stigum. Mykhaylo hlaut jafnframt verðlaun fyrir bestan árangur 11-12 ára.

Sérstök verðlaun voru veitt í fjórum aldursflokkum, 8 ára og yngri, 9-10 ára , 11-12 ára og 13-15 ára.

Bestum árangri 8 ára og yngri náði Gunnar Erik Guðmundsson. Framtíðardrengur þar sem hlaut 2 vinninga og dýrmæta reynslu.

Bestum árangri 9-10 ára náði Kristján Dagur Jónsson, sem átti frábært mót. Kristján hlaut 4 vinninga og náði góðum árangri á móti sterkum andstæðingum.  Kristján er í mikilli framför og með leikgleðina að vopni er hann öllum skeinuhættur andstæðingur.

Í flokki 11-12 ára varð Mykhaylo Kravchuk efstur eftir sigur á Daníel Erni Njarðarsyni í lokaumferðinni.  Efstur í flokki 13-15 ára varð sigurvegari mótsins Aron Þór Mai.

Ylfa Ýr Welding Hákonardóttir sigraði glæsilega í stúlknameistaramótinu, en hún hlaut 6,5 vinninga, gerði einungis jafntefli við Svövu en vann aðrar. Ylfa hlaut jafnframt verðlaun í flokki 9-10 ára og það er ljóst að hér er mikið efni á ferð.

Í 2.sæti varð Valgerður Jóhannesdóttir með 6 vinninga og náði jafnframt bestum árangri 13-15 ára.

Stúlknameistari TR varð hinsvegar Svava Þorsteinsdóttir sem hlaut 5,5 vinninga og lenti í 3.sæti í mótinu.

 

Bestum árangri 8 ára og yngri náði svo hin stórefnilega Elsa Kristín Arnaldardóttir, sem hlaut 3,5 vinninga.

Taflfélag Reykjavíkur þakkar þátttakendum í mótinu kærlega fyrir skemmtilega og drengilega keppni og óskar sigurvegurunum innilega til hamingju með árangurinn.

Úrslit í opnum flokki

Úrslit í stúlknaflokki

Myndskreytta frásögn má finna á heimasíðu TR

Áskell vann öruggan sigur á Framsýnarmótinu

Áskell Örn Kárason vann öruggan sigur á Framsýnarmótinu í skák sem lauk í dag. Áskell vann allar sínar skákir sex að tölu. Haraldur Haraldsson varð í öðru sæti með 5 vinnnga og Elsa María Kristínardóttir varð í þriðja sæti með 3,5 vinninga eins og Hermann Aðalsteinsson, en Elsa varð ofar á stigum.

Elsa María varð efst Huginsmanna, Hermann annar og Sigurður G Daníelsson þriðji með 3 vinninga. Sveinbjörn Sigurðsson varð í þriðja sæti af gestum mótins með þrjá vinninga, á eftir Áskeli og Haraldi.

• Skákhuginn
• Chess-Results

Daði Örn Jónsson Evrópumeistari!

Daði Örn Jónsson var að tryggja sér sigur í 68. Evrópumeistaramóti einstaklinga í bréfskák. Mótinu, sem hófst 15 desember 2013, er ekki lokið en nú er ljóst að enginn af andstæðingum hans getur náð honum að vinningum (sjá mótstöflu). Þessi glæsilega frammistaða Daða er langbesti árangur sem íslenskur bréfskákmaður hefur náð og jafnframt einn besti árangur sem íslenskur skákmaður hefur náð fyrir og síðar.

Mótstafla (hægt að stækka með því að tvíklikka á mynd)

HM ungmenna hefst í dag í Porto Carras - 17 íslenskir fulltrúar!

HM ungmenna hefst í dag í Porto Carras í Grikklandi. Sautján íslenskir fulltrúar taka þátt og hafa aldrei verið fleiri. Það eru eftirtaldir:

Dagur Ragnarsson, Oliver Aron Jóhannesson og Jón Trausti Harðarson tefla í flokki 18 ára og yngri.

Veronika Steinunn Magnúsdóttir teflir í flokki stúlkna 18 ára og yngri.

Jón Kristinn Þorgeirsson, Símon Þórhallsson, Bárður Örn Birkisson, Dawid Kolka, og Björn Hólm Birkisson tefla í flokki 16 ára og yngri.

Hilmir Freyr Heimisson og Heimir Páll Ragnarsson tefla í flokki 14 ára og yngri.

Vignir Vatnar Stefánsson teflir í flokki 12 ára og yngri

Óskar Víkingur Davíðsson, Róbert Luu og Stefán Orri Davíðsson tefla í flokki 10 ára og yngri.

Freyja Birkisdóttir teflir í flokki stúlkna 10 ára og yngri. 

Adam Omarsson teflir í flokki 8 ára og yngri.

Fararstjórar íslenska hópsins eru Helgi Ólafsson, Lenka Ptácníková og Björn Ívar Karlsson.

Ritstjóra sýnist að þrír íslenskir skákmenn verði í beinni útsendingu í fyrstu umferð mótsins í dag. Oliver Aron teflir á fyrsta borði við indverska stórmeistarann Suri Vaibhav (2561). Auk hans verða væntanlega Freyja og Róbert í beinni útsendingu. 

Umferðin hefst kl. 13.

• Heimasíða mótsins
• Chess-Results
• Beinar útsendingar

Barna- og unglingameistaramót TR fer fram í dag

Barna- og unglingameistaramót sem og Stúlknameistaramót Taflfélags Reykjavíkur fer fram sunnudaginn 25. október í félagsheimili T.R. Faxafeni 12. Taflið hefst kl.14.

Tefldar verða 7 umferðir eftir Monrad-kerfi með umhugsunartímanum 15 mín. á skák.

Teflt verður í tveimur flokkum: opnum flokki og stúlknaflokki. Verðlaun verða veitt fyrir þrjú efstu sætin í opna flokknum og þar fyrir utan hlýtur efsti T.R.-ingurinn titilinn Unglingameistari T.R. 2015.

Þá verða veitt verðlaun fyrir þrjú efstu sætin í stúlknaflokknum og þar fyrir utan hlýtur efsta stúlkan úr T.R. titilinn Stúlknameistari T.R. 2015.

Til viðbótar verða veitt verðlaun fyrir efsta sætið í aldursflokknum 13-15 ára (f. 2000-2002), 11-12 ára (f. 2003-2004), 9-10 ára (f. 2005-2006) sem og 8 ára og yngri (f. 2007 og síðar)í báðum flokkum (opna flokknum og stúlknaflokknum).

Mótið er opið öllum krökkum 15 ára og yngri (fædd 2000 og síðar).

Aðgangur á mótið er ókeypis.

Skráningarform

Skráðir keppendur

Æskan og Ellin 2015 Kynslóðabilið brúað!

Í dag fór fram í húsnæði Taflfélags Reykjavíkur hið mikla kynslóðabrúarskákmót, Æskan og Ellin, sem fór nú fram í tólfta sinn. Mótið er samstarfsverkefni Riddarans, skákklúbbs eldri borgara, Taflfélags Reykjavíkur og OLÍS sem jafnframt er stærsti bakhjarl mótsins. Að auki veita mótahaldinu góðan stuðning POINT á Íslandi, Urður bókaútgáfa Jóns Þ. Þórs og Litla Kaffistofan í forsvari Stefáns Þormars.

Verðlaunasjóður var glæsilegur; peningaverðlaun,  flugmiðar til Evrópu með Icelandair, eldsneytisúttektir, verðlaunabikarar- og peningar, skákbækur og veitingaúttektir.  Meðal vinninga var m.a. nýútkomin og glæsileg bók eftir Jón Þ. Þór “Meistarar skáksögunnar”.

Mótinu er ætlað að brúa kynslóðabil skákmanna en það er opið skákmönnum 15 ára og yngri sem og 60 ára og eldri en fyrirkomulagið skapar sérlega skemmtilega stemningu þar sem kátínan skín úr andlitum ungra sem roskna. Skák er svo sannarlega fyrir alla og á sér engin aldursmörk. Þannig var 75 ára aldursmunur á yngsta og elsta keppendanum!

Fimmtíu og fimm vaskir skákmenn voru mættir til leiks að þessu sinni sem er heldur minn en undanfarin ár og er skýringanna fyrst og fremst að leita til þess að nú er vetrarfrí í skólum en einnig eru margir öflugir skákkrakkar á leið á heimsmeistaramótið í Grikklandi sem án efa hefðu annars tekið þátt.

Hinn magnaði skákfrömuður Einar S. Einarsson bauð gesti velkomna og fór yfir sögu mótsins.  Því næst steig stórmeistarinn Hjörvar Steinn Grétarsson í pontu og hélt stutta tölu.  Hjörvar tók margoft þátt í þessu móti á sínum yngri árum með glæstum árangri.  Að því loknu lék hann fyrsta leiknum í skák Braga Halldórssonar sem margsinnis hefur unnið mótið og Einars S. Einarssonar.

Spennan var mikil strax í byrjun og mörg óvænt úrslit þar sem ungir liðsmenn æskunnar létu hina eldri og reyndari finna vel fyrir kunnáttu sinni við skákborðið.  Mátti oft ráða í úrslit skáka úr fjarlægð þegar þeir stuttu tóku á sprett frá skákborðinu til skákstjóra brosandi út að eyrum til að tilkynna úrslit.

Það voru þó fulltrúar ellinnar sem tóku snemma forystu á mótinu.  Sævar Bjarnason og Júlíus Friðjónsson virtust í einkar góðu formi og sigruðu alla andstæðinga sína í fyrstu fjórum umferðunum.  Þeir mættust svo í mikilli rimmu í fimmtu umferð og lauk henni með þrátefli.  Reyndist það eina skákin sem Sævar vann ekki og hann kom í mark langefstur með 8 1/2 vinning af níu mögulegum.  Júlíusi fataðist hins vegar flugið í lok móts, sem gaf tveimur skákmönnum möguleika á að skjótast upp fyrir hann.  Þór Valtýsson átti góðan endasprett og kom annar í mark með 7 vinninga.  Sama má segja um Guðfinn Kjartansson sem var annar fyrir lokaumferðina en beið þá lægri hlut fyrir Sævari.  Vaskleg framganga hans dugði þó í þriðja sætið með 6 

Annars lagið gerðu fulltrúar æskunnar atlögu að ellinni og brutu sér leið upp á pallinn.  Var þeim þó ýtt þaðan jafnharðan.  Fengu þeir þó þar dýrmæta reynslu og nasasjón af því hve kalt getur verið á toppnum.  Halldór Atli Kristjánsson stoppaði þar tvær umferðir eftir að hafa náð fræknu jafntefli við Þór Valtýsson og Aron Þór Mai fékk gullið tækifæri í lokaumferðinni til enda í einu af toppsætunum er hann mætti Júlíusi í lokaumferðinni en tapaði í hörkuskák.

Verðlaun voru veitt í fjölmörgum flokkum í lokin, auk þess sem sumir voru heppnari en aðrir í skemmtilegu vinningahappadrætti.

Í flokki elstu skákmannanna; +80 ára varð hlutskarpastur Gunnar Gunnarsson með 6 vinninga, annar varð Sigurður Kristjánsson  með 5 1/2 vinning líkt og Björn Víkingur Þórðarson sem varð þriðji á stigum.

Í flokki +70 fengu verðlaun Jóhann Örn Sigurjónsson (6 1/2),  Gísli Gunnlaugsson (6) og Eiríkur Viggósson (6)

Í flokki +60 voru það Júlíus Friðjónsson (6 1/2), Sigurjón Sigurbjörnsson (6) og Bragi Halldórsson (6) sem kræktu sér í glæsilega vinninga.

Æskan fékk einnig fjölmörg verðlaun, en þar var keppt í þremur aldursflokkum, 9 ára og yngri 10-12 ára og 13-15 ára.  Einnig voru veitt stúlknaverðlaun og sérstök verðlaun til yngsta keppandans.

Í flokki 9 ára og yngri var baráttan hnífjöfn og spennandi allan tímann.  Þrír strákar komu þar hnífjafnir í mark með 4 vinninga og þurfti að grípa til stigaútreiknings.  Þar var Gabríel Sær Bjarnþórsson hlutskarpastur og hlaut í verðlaun meðal annars flug með Icelandair til eins af áfangastöðum félagsins í evrópu.  Annar á stigum varð Alexander Björnsson sjónarmun á undan Benedikt Þórissyni sem varð þriðji.

Í flokki 10-12 ára var baráttan ekki síður hörð.  Þar komu jafnir í mark með fimm vinninga þeir Halldór Atli Kristjánsson, Mikhaylo Kravchuk og Sverrir Hákonarson.  Halldór tók fyrsta sætið á stigum, Misha varð annar og Sverrir þriðji.  Hlutu þeir allir vegleg verðlaun og er Halldór flugmiða með Icelandair ríkari eftir glæsta frammistöðu.

Í flokki 13-15 ára sigraði Aron Þór Mai með 5 1/2 vinning líkt og Nansý Davíðsdóttir og Jóhann Arnar Finnsson en hærri á stigum.  Nansý tók annað sætið og Jóhann bronsið.  Líkt og í hinum æskuflokkunum mun Aron Þór fljúga á vit ævintýranna með Icelandair.

Nansý vann stúlknaverðlaunin, og Bjartur Þórisson sem einungis er 6 ára hlaut viðurkenningu sem yngsti keppandinn.  Hann stóð sig frábærlega, hlaut 3 vinninga og lagði  að velli t.a.m. engann annan en Pétur Jóhannesson í hörkuskák.  Elsti keppandi mótsins var einnig leystur út með verðlaunum en það var að þessu sinni Björn Víkingur Þórðarson.

Pétur var þó einn af þeim fjölmörgu og heppnu keppendum sem dregnir voru út í mótslok í vinningahappdrætti mótsins. Meðal annarra sem dregnir voru út voru Friðgeir Hólm, Alexander Mai og Óskar Hákonarson.

Myndskreytta frásögn má finna á heimasíðu TR.

Lokastaðan á Chess-Results.

Skákþáttur Morgunblaðsins: Magnús Carlsen og Alexander Grischuk sigruðu í Berlín

Á heimsmeistaramótunum í atskák og hraðskák sem fram fóru í Berlín dagana 10.-14. október sl. og drógu til sín nær alla sterkustu skákmenn heims var spurningin sem brann á vörnum manna sú hvort heimsmeistarinn Magnús Carlsen næði að verja báða titlana sem hann vann í fyrra í Dubai og var því í raun þrefaldur heimsmeistari. Hann svaraði þeirri spurningu fyrir sitt leyti í atskákhlutanum þar sem tímamörkin voru 15mín. +10sek. og umferðirnar 15 talsins. Á lokasprettinum minnti hann á kappakstursbíl sem gat leyft sér að hægja á ferðinni á leiðinni að marklínunni; öruggur sigur 11½ vinningur af 15 mögulegum en næstir komu í mark Jan Nepomniachtchi og Teimour Radjanov með 10½ vinning.

Í 21 umferðar hraðskákmótinu þar sem teflt var eftir tímamörkunum 3mín. +2sek. virtist allt ætla að fara á sömu leið. Eftir tíu umferðir hafði Magnús 9 vinninga af 10 mögulegum en tapaði þá fyrir Karjakin og það reyndist ekki gott veganesti fyrir lokasprettinn. Norsku sjónvarpsmennina frá NRK sem voru með 5-6 klst. beinar útsendingar alla keppnisdagana rak í rogastans þegar Magnús byrjaði með einum vinningi af fyrstu fjórum. En hann náði vopnum sínum og þegar tvær umferðir voru eftir var hann aðeins ½ vinningi á eftir efstu mönnum. En í 20. umferð tapaði hann fyrir Vasilí Ivantsjúk og þá var draumurinn úti. Í mótslok stóð Rússinn Alexander Grischuk uppi sem heimsmeistari í hraðskák, hlaut 15 ½ vinning, en næstir komu Vladimir Kramnik og Vachier Lagrave með 15 vinninga. Magnús varð einn í sjötta sæti með 14 vinninga.

Fjórir íslenskir skákmenn tóku þátt í mótunum í Berlín. Þá tók Friðrik Ólafsson sæti áfrýjunarnefnd mótsins. Jóhann Hjartarson náði bestum árangri í atskákunum, hlaut 7½ vinning eða 50% og greinarhöfundur hlaut 7 vinninga, Hannes Hlífar hlaut 6 vinninga og Margeir Pétursson 4½ vinninga. Í hraðskákunum fengu Jóhann og Hannes Hlífar 10 vinninga en greinarhöfundur og Margeir Pétursson 8½ vinning. Keppnisformið er sennilega það sem koma skal í skákinni en hægt var að fylgjast með öllum skákunum í beinum útsendingum á Chess24, Chessbomb og ICC.

Engir auðveldir mótherjar en mótin drógu til sín í kringum 200 skákmenn. Til marks um mannvalið má nefna að í lokaumferð atskákarinnar mætti Jóhann Hjartarson einu af stóru nöfnum skákarinnar sl. 20 ár, Alexander Morozevich. Hann er mikill sérfræðingur í skoska leiknum en það er Jóhann raunar líka. „Skylmingar“ þeirra voru stórskemmtilegar:

Alexander Morozevich - Jóhann Hjartarson

Skoskur leikur

1. e4 e5 2. Rf3 Rc6 3. d4 exd4 4. Rxd4 Rf6 5. Rxc6 bxc6 6. e5 Rd5

Heppileg „gleymska“. Jóhann ætlaði að leika 6. ... De7.

7. Bd3 d6 8. De2 Be7 9. O-O O-O 10. Hd1 De8 11. He1 dxe5 12. Dxe5 Be6 13. De4 Rf6 14. Dh4 Dd8 15. Bg5 h6

Eini leikurinn og egnir „Moro“ jafnframt til að fórna.

16. Bxh6! gxh6 17. Dxh6 Dd4 18. He3 Hfd8

19. Rc3?

Frestunarárátta er þekkt í skákinni. Eftir 19. Hg3+ Rg4 20. Rc3 vinnur hvítur manninn til baka með vænlegri stöðu.

19. ... Rg4! 20. Hg3 Dxf2+ 21. Kh1 Hxd3!

Grípur tækifærið, 22. cxd3 er svarað með 22. ... Dxg3! og vinnur.

Hxg4+ Bxg4 23. cxd3 Dxb2! 24. Hc1 Hd8 25. h3 Hxd3 26. Re4

Hvítur á engan betri leik.

26. ... Hxh3+! 27. gxh3 Bf3+ 28. Kg1 Dg2 mát.

Helgi Ólafsson [e-mail]

Grein þessi birtist í Morgunblaðinu 17.október

Skákþættir Morgunblaðsins