Skák.is

Bloggfærslur mánaðarins, maí 2014

6.5.2014 | 23:20

Álfhólsskóli Kópavogsmeistari í 3.-4. bekk

Nú er lokið sveitakeppni Kópavogs í 3.-4. bekk. Mótið var haldið í Salaskóla, þriðjudaginn 6. maí. Mótsstjórar voru Tómas Rasmus og Lenka Ptacnikova. Keppendur komu frá Álfhólsskóla, Hörðuvallaskóla, Salaskóla, Smáraskóla og Snælandsskóla. Alls voru 14 lið mætt til keppni. Sigurvegarar voru krakkarnir úr Álfhólsskóla með 20,5 vinninga af 24 mögulegum.

Í öðru sæti voru einnig krakkar úr Álfhólsskóla (b lið) með 19 vinninga. Og þriðja sætið hlutu krakkarnir úr Salaskóla með 15,5 vinninga.

Salaskóla vann síðan í keppni c og e liða. En Álfhólsskóli var með langbesta a liðið og besta b liðið ásamt besta d liðinu.

Bestum árangri á einstökum borðum hlutu:

borð Róbert Luu og Fannar Árni Hafsteinsson úr Álfhólsskóla.
borð Alexander Már Bjarnþórsson úr Álfhólsskóla
borð Ísak Orri Karlsson úr Álfhólsskóla
borð Daníel Sveinsson úr Álfhólsskóla.

Krakkarnir úr Álfhólsskóla í banastuði.

Heildarúrslit eru fylgja síðan hér á eftir:

1 Álfhólsskóli a 20,5
2 Álfhólsskóli b 19
3 Salaskóli a 15,5
4 Salaskóli c 14
5 Álfhólsskóli c 12,5
6 Salaskóli b 12,5
7 Snælandsskoli a 12
8 Hörðuvallaskóli a 10,5
9 Smáraskóli a 10,5
10 Álfhólsskóli d 10,5
11 Smáraskóli b 10
12 Salaskóli d 9,5
13 Salaskóli e 6
14 Smáraskóli c 5

Þann 9. maí 2014 verður síðan keppni miðstigs og unglingastigs í Blikastúkunni. Unglingarnir kl 8:50 og miðstig kl 13:00

Spil og leikir | Breytt s.d. kl. 23:21 | Slóð | Facebook | Athugasemdir (0)

6.5.2014 | 22:59

Sævar sigurvegari minningarmóts um Þorstein Guðlaugsson

Æsir í Ásgarði tefldu í dag til minningar um Þorstein K Guðlaugsson sem lést í mars í vetur. 31 skákmaður mætti til leiks sumir þeirra firna sterkir. Heiðursgestur á mótinu var Guðlaug dóttir Þorsteins heitins en hún er margfaldur íslandsmeistari kvenna. Garðar Guðmundsson formaður setti mótið og bað skákmenn að heiðra minningu Þorsteins með því að rísa úr sætum í þögn.

Guðlaug lék síðan fyrsta leiknum hjá Friðrik Sófussyni elsta þátttakandanum í skák hans við Hlyn Þórðarson. Friðrik verður 87 ára í júní nk. og lætur sig aldrei vanta á skákdaga hjá Ásum og Riddurum. Tefldar voru níu umferðir með 10 mínútna umhugsun.

Það var hart barist um toppsætin, sú barátta endaði með því að Sævar Bjarnason alþjóðlegur meistari varð einn efstur með 7½ vinning . Sævar tapaði einni skák en það var fyrir baráttujaxlinum Páli G. Jónssyni. Sævar og Guðlaug gerðu jafntefli í síðustu umferð. Þau Björgvin Víglundsson, Gunnar Gunnarsson og Guðlaug Þorsteinsdóttir urðu jöfn í 2.-4. sæti öll með 7 vinninga. Björgvin var stigahæstur og fékk silfrið og Gunnar bronsið. Guðlaug var sú eina sem fór taplaus í gegnum mótið, hún vann fimm skákir og gerði fjögur jafntefli.

Sigurður bróðir Guðlaugar var einnig mættur á staðinn og Garðar Guðmundsson formaður afhenti þeim báðum gullpening með mynd af föður þeirra. Það var okkur mikill heiður að Guðlaug skyldi geta tekið þátt í mótinu og gott að Sigurður mætti einnig á mótsstað.

Þetta var hörku skemmtilegt og vel mannað skákmót.

Finnur Kr Finnsson sá um skákstjórn eins og oft áður.

Sjá nánar töflu og myndir frá ESE.

2014 ÆSIR MINNINGARMÓT ÞKG ÚRSLIT 6.5.2014 21 42 036

Spil og leikir | Slóð | Facebook | Athugasemdir (0)

6.5.2014 | 12:44

Hjörvar með 1½ vinnings forskot á Wow air Vormóti TR

Stórmeistarinn Hjörvar Steinn Grétarsson (2511) heldur áfram sigurgöngu sinni á Wow air Vormóti TR. Í gær vann hann Dag Arngrímsson (2382) og hefur fullt hús eftir fimm umferðir. Guðmundur Kjartansson (2441) sem vann Sævar Bjarnason (2101) er annar með 3½ vinning.

Önnur helstu úrslit gærdagsins voru að stórmeistararnir Þröstur Þórhallsson (2435) og Hannes Hlífar Stefánsson (2541) gerðu jafntefli. Það gerðu Ingvar Þór Jóhannesson (2377) og Stefán Kristjánsson (2503) og Sigurbjörn Björnsson (2360) og Friðrik Ólafsson (2406).

Dagur Ragnarsson (2105), Hannes, Dagur Arngrímsson, Stefán, Ingvar Þór og Þröstur eru í 3.-8. sæti með 3 vinninga.

Mótstöflu mótsins má finna á Chess-Results.

Í sjöttu og næstsíðustu umferð, sem fram fer nk. mánudagskvöld, mætast meðal annars: Guðmundur-Hjörvar, Hannes-Dagur A., Stefán-Dagur R., Þröstur-Ingvar Þór og Friðrik-Guðmundur Gíslason.

Magnús Pálmi Örnólfsson (2156) er í miklu stuði í b-flokki og leiðir þar með 4½ vinning. Í öðru sæti er Kjartan Maack (2121) með 3½ vinning. Fimm skákmenn hafa svo 3 vinninga og þar á meðal ungstirnið Vignir Vatnar Stefánsson (1844) sem er enn taplaus á mótinu.

Mótstöflu mótsins má finna á Chess-Results.

Meðfylgjandi eru skákir umferðarinnar innslegnar af Kjartani Maack.

Veljið skák (17 alls):

Spil og leikir | Breytt s.d. kl. 15:09 | Slóð | Facebook | Athugasemdir (0)

6.5.2014 | 11:40

Salaskóli Kópavogsmeistari í 1.-2. bekk

Nú er lokið sveitakeppni Kópavogs í 1-.2 bekk. Mótið var haldið í Salaskóla mánudaginn 5. maí sl. Mótsstjórar voru Tómas Rasmus og Lenka Ptacnikova.Keppendur komu frá Álfhólsskóla, Hörðuvallaskóla, Salaskóla, Smáraskóla og Snælandsskóla. Alls voru 13 lið mætt til keppni. Sigurvegarar voru krakkarnir úr Salaskóla með 18 vinninga af 20 mögulegum.

Í öðru sæti voru krakkarnir úr Hörðuvallaskóla með 13 vinniga. Og þriðja sætið hlutu krakkarnir úr Álfhólsskóla með 12 vinninga. Salaskóla vann síðan í keppni b-, c-, d- og e-liða.

Bestum árangri á einstökum borðum hlutu:

borð Óttar Örn Bergmann Sigfússon úr Snælandsskóla og Gabríel Sær Bjarnþórsson úr Álfhólsskóla.
borð Þórdís Agla Jóhannsdóttir úr Salaskóla
borð Ottó Andrés Jónsson úr Salaskóla
borð Hjálmar Helgi Jónsson úr Salaskóla.

Heildarúrslit eru fylgja síðan hér á eftir:

1 Salaskóli a 18
2 Hörðuvallaskóli a 13
3 Álfhólsskóli a 12
4 Salaskóli d 12
5 Salaskóli b 11
6 Salaskóli c 10,5
7 Álfhólsskóli c 10,5
8 Smáraskóli a 10
9 Snælandsskóli a 9,5
10 Hörðuvallaskóli b 9,5
11 Smáraskóli b 8,5
12 Álfhólsskóli b 8,5
13 Salaskóli e 7
14 Skottulið 0

Þann 6. mái 2014 verður síðan keppni 3.-4 bekkjar á sama stað.

Spil og leikir | Breytt s.d. kl. 11:43 | Slóð | Facebook | Athugasemdir (0)

6.5.2014 | 09:23

Internet skákmót milli Patreksskóla í Vesturbyggð og Lankow í Schwerin

GM Henrik Danielsen stóð fyrir mótinu sem var haldið í Patreksskóla og fimm valdir nemendur í 6. - 7. og 8. bekk tóku þátt. Það voru Halldór Jökull, Halldór Örn, Goncalo, Eggert og Ottó sem kepptu sem lið Patreksskóla á móti fimm nemenda liði Lankow grunnskólans í Schwerin í Þýskalandi. Mótið var afar vel heppnað og hófst á kynningu milli keppenda sem og skólastjórar beggja grunnskólanna heilsuðust og spjölluðu.

Þýska liðið hafði yfirhöndina framan af enda er mikil skákhefð í skólanum og nemendur góðir skákmenn. En vestfirsku strákarnir vildu ekki gefast upp og fundu gott mótspil sem varð til þess að þeir náðu jafntefli gegn sterku liðið Lankow. Sem sagt mjög vel gert hjá liði Patreksskóla !

Hér má svo sjá endastöðuna, Lankow Schwerin hvítt - Patreksskóli Vesturbyggð svart. Tæknilega er staðan jöfn. Kh5 og Rc3 hjá hvítum geta ekki fundið vinningsleið. Frípeð svarts á a3 tryggir jafnteflið.

Allir skemmtu sér konunglega!

Spil og leikir | Slóð | Facebook | Athugasemdir (0)

5.5.2014 | 18:37

Skákstjóranámskeið á fimmtu- og föstudag - skákáhugamenn velkomnir

Skáksamband Íslands býður upp á námskeið fyrir íslenska skákstjóra og fyrir þá sem vilja kynna sér betur skákstjórn. Námskeiðið er opið öllum áhugasömum.

Námskeiðið verður haldið fimmtudaginn 8. maí og verður framhaldið föstudaginn 9. maí. Tilvalið fyrir utanbæjarfólk sem gæti þá mögulega tengt námskeiðið við aðalfund SÍ sem fram fer 10. maí. Kennarar verða Omar Salama, Páll Sigurðsson, Gunnar Björnsson og jafnvel fleiri.

Hlé verður um 19:30 báða dagana og verður boðið upp á léttar veitingar.

Skráning fer fram í netfangið gunnar@skaksamband.is.

Námskeiðið

Fimmtudagurinn, 8. maí

18:00-19:30: Hlutverk skákstjóra (Gunnar Björnsson)

19:30-21:00: Swiss Manager (Chess-Result) og svissneska kerfið (Páll Sigurðsson)

Föstudagurinn, 9. maí

18:00-21:00: Skákklukkan, skáklögin, reglur um alþjóðlega skákstig og áfangareglur.

Spil og leikir | Slóð | Facebook | Athugasemdir (0)

5.5.2014 | 16:12

Vesturbæjarbiskupinn fer fram á föstudaginn

Vesturbæjarbiskupinn fer fram í Hagaskóla á föstudaginn kemur. Mótið hefst 14:00 og er mæting 13:45 til að staðfesta skráningu sem fer fram á Skák.is. Við skráningu þarf að koma fram nafn, fæðingarár og skóli. Ekki er hægt að skrá sig á staðnum og þarf að skrá sig fyrir fimmtudag.

Teflt verður í þremur flokkum: 1.-3. bekkur, 4.-7. bekkur og 8.-10. bekkur.

Mótið er haldið af Skákakademíu Reykjavíkur og Þjónustumiðstöð Vesturbæjar með stuðningi frá Melabúðinni og Hagaskóla. Hjörvar Steinn Grétarsson stórmeistari mun afhenda verðlaunin.

Skráning fer fram hér. Upplýsingar um þegar skráða keppendur má finna hér.

Spil og leikir | Breytt 6.5.2014 kl. 14:52 | Slóð | Facebook | Athugasemdir (0)

5.5.2014 | 14:59

Minningarmót um Þorstein K Guðlaugsson

Á morgun þriðjudaginn 6. maí þá tefla Æsir í Stangarhyl 4 til minningar um Þorstein K Guðlaugsson en hann lést 15 mars sl.

Mótið hefst Kl. 13.00 og tefldar verða 9 umferðir með 10 mínútna umhugsunartíma.

Allir heldri skákmenn velkomnir meðan pláss leyfir, karlar 60+ og konur 50+.

Teflt verður um sérsmíðaðan verðlaunagrip sem einn skákfélagi okkar gefur til minningar um Þorstein

Spil og leikir | Slóð | Facebook | Athugasemdir (0)

5.5.2014 | 08:57

Fimmta umferð Wow air Vormóts TR fer fram í kvöld

Fimmta umferð Wow air Vormóts TR fer fram í kvöld og hefst kl. 19:30. Stórmeistarinn, Hjörvar Steinn Grétarsson (2511) er efstur með fullt hús og hefur vinningsforskot á alþjóðlega meistarann Dag Arngrímsson (2382).

Sjö skákmenn hafa 2½ vinning. Það eru stórmeistararnir Hannes Hlífar Stefánsson (2541), Stefán Kristjánsson (2503) og Þröstur Þórhallsson (2435), alþjóðlegu meistararnir Sævar Bjarnason (2101) og Guðmundur Kjartansson (2441), FIDE-meistarinn Ingvar Þór Jóhannesson (2377) og svo hinn titillausi Dagur Ragnarsson (2105).

Það eru margar spennandi skákir í kvöld. Hjörvar teflir við Dag, stórmeistaraslagur verður á öðru borði þar sem Íslandsmeistarar tveggja síðustu ára, Þröstur og Hannes, mætast. Friðrik Ólafsson (2406) teflir svo við Sigurbjörn Björnsson (2360)

Eftirtaldar skákir verða sýndar beint í kvöld:

Hjörvar (4) - Dagur (3)
Þröstur (2½) - Hannes (2½)
Ingvar Þór (2½) - Stefán (2½)
Guðmundur (2½) - Sævar (2½)
Sigurbjörn (2) - Friðrik (2)
Sigurður Páll (2) - Guðmundur H. (2)

Tengill á beina útsendinga verður birtur á heimasíðu TR rétt fyrir umferð.

Spil og leikir | Slóð | Facebook | Athugasemdir (0)

4.5.2014 | 20:00

Skákþáttur Morgunblaðsins: Fyrsta tapskák heimsmeistarans

Magnús Carlsen hefur ekki teflt ýkjamikið síðan hann varð heimsmeistari í fyrra; minningarmótið um Azerann Vugar Gashimov, sem fram fer þessa dagana í borginni Shamkir í Aserbadsjan, er annað mótið sem hann tekur þátt eftir einvígið við Anand. Gashimov var í framvarðarsveit Azera og m.a. í sigurliði þeirra á Evrópumóti landsliða í Novi Sad 2009. Hann var kornungur greindur með heilaæxli og féll frá 10. janúar sl., aðeins 28 ára gamall. Árangur hans á skáksviðinu var magnaður í ljósi veikinda hans en um tíma var hann níundi stigahæsti skákmaður heims. Hans var minnst af mikilli virðingu og hlýju enda var maðurinn hvers manns hugljúfi.

Magnús hóf keppnina af miklum krafti, vann Shakriyar Mamedyarov og Hikaru Nakamura í tveim fyrstu skákum, var síðan nálægt því að leggja Sergei Karjakin með svörtu í þriðju umferð en í fjórðu umferð tapaði hann sinni fyrstu skák sem heimsmeistari. Berlínarvörnin sem hefur dugað hefur honum svo vel m.a. í einvíginu við Anand hrundi til grunna í 25. leik er hann missti peð og eftirleikurinn reyndist hinum tæknilega sterka ítalska stórmeistara auðveldur:

Fabiano Caruana - Magnús Carlsen

Spænskur leikur

1. e4 e5 2. Rf3 Rc6 3. Bb5 Rf6 4. O-O Rxe4 5. d4 Rd6 6. Bxc6 dxc6 7. dxe5 Rf5 8. Dxd8 Kxd8 9. h3 h6 10. Hd1 Ke8 11. Rc3 Bd7 12. Bf4 Hd8 13. Re4 Be7 14. g4 Rh4 15. Rxh4 Bxh4 16. Kg2 Be6 17. f3 b6 18. b3 c5 19. c4 Hd7 20. Bg3 Be7 21. Hxd7 Bxd7 22. Rc3

Rétti staðurinn fyrir riddarann sem stefnir á d5 reitinn, svartur má varla leika 22. ... c6 vegna veikingarinnar á d6-reitnum.

22. ... Kd8 23. Rd5 He8 24. Hd1! Kc8?

Hvítur hefur uppi mikinn þrýsting á stöðu svarts en svo virðist sem Magnús hafi alveg verið lokaður fyrir svarleik Caruana, a.m.k. gjörsamlega frábitinn þeirri hugmynd að leika peði til c6 sem er þó best úr því sem komið er. ) viðfangs.

25. Rxc7!

Með hugmyndinni 25. ... Kxc7 26. e6+ og vinnur, t.d. 26. ... Kc6 27. Hxd7 fxe6 28. Hc7 mát!

25. ... Hd8 26. Rd5 He8 27. Be1 Bd8 28. Bc3 g6 29. Kg3 b5

Svartur reynir allt sem hann getur til að skapa sér mótspil jafnvel þó ýmsir veikleikar skapist í leiðinni.

30. cxb5 Bxb5 31. Re3 He6 32. f4 Ha6 33. Hd2 h5 34. gxh5 gxh5 35. Rf5 Hg6+ 36. Kh2 Bc6 37. Rd6 Kb8 38. f5 Hg8 39. f6 Bb6 40. Rc4 He8 41. Rd6 Hg8 42. Rxf7

Caruana gat gert þetta í 40. leik en þá var lítill tími aflögu en eftir að hafa náð tímamörkunum gat hann reiknað dæmið betur.

42. ... c4 43. h4 Hg4 44. e6 Be3 45. Be5+ Ka8 46. Hd8+ Kb7 47. Bg3 c3 48. Hb8+ Ka6 49. Hc8 Bd5 50. Hxc3 Bd4 51. Hd3 He4 52. Hd2 Hxe6 53. Rg5

- betra en 53. Hxd4 He2+ 54. Kg1 (en ekki 54. Kh3 Be6+ og mátar) sem vinnur einnig. En hér stöðvaði Magnús klukkuna og gafst upp. Fyrsta tapskák hans í tíu kappskákum sem heimsmeistari.

Sex af fremstu stórmeisturum heims tefla tvöfalda umferð. Staðan eftir fjórar umferðir: 1. - 2. Magnús Carlsen og Caruana 2 ½ v. 3. - 5. Karjakin, Radjabov og Nakamura 2 v. 6. Mamedyarov 1 v.

B-flokkur minningarmótsins er ekki síður vel skipaður en þar tefla tíu keppendur einfalda umferð. Eftir fjórar umferðir var Frakkinn Etienne Bacrot efstur með 3 vinninga en í 2.-3. sæti voru Úkraínumaðurinn Pavel Eljanov og Pólverjinn Radoslaw Wojtaszek en þeir voru báðir með 2 ½ vinning.

Helgi Ólafsson helol@simnet.is

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.

Grein þessi birtist í Sunnudagsmogganum, 27. apríl 2014

Skákþættir Morgunblaðsins

Skrár tengdar þessari bloggfærslu: