Keppendur í H&H

 Þá liggur fyrir keppandalistinn á Íslandsmótinu í heilinn og höndin sem fer fram á Lækjartorgi á laugardag. Heilinn og höndin er skemmtilegt form skákar sem hefur verið vinsælt upp á síðkastið. Reglurnar eru einfaldar: tveir og tveir eru saman í liði og er annar heilinn og hinn höndin. Heilinn segir taflmann og höndin ákveður hvaða taflmann og hvert honum skal leikið. Því ríður á að samherjar hafi líkan skákstíl að í það minnsta skilning á skákstíl samherjans. Núverandi Íslandsmeistarar eru Jón Viktor Gunnarsson og Ingi Tandri Traustason.

 

 Tíu fersk lið eru skráð til leiks. Í liðunum má finna fyrrum ólympíumeistara, margfalda Íslandsmeistara með Rimaskóla, landsliðsmenn og landsliðskonur og svo auðvitað hjón!

Sigurvegararnir hljóta hvor um sig gjafabréf á sportbarnum Hvíta riddaranum í Mosfellsbæ að verðmæti 5.000 kr.

Keppendur:

Jón Viktor Gunnarsson/Bergsteinn Einarsson

Dagur Ragnarsson/Oliver Aron Jóhannesson

Sigurbjörn Björnsson/Róbert Lagerman

Einar Hjalti Jensson/Jóhanna Björg Jóhannsdóttir

Hjörvar Steinn Grétarsson/Hallgerður Helga Þorsteinsdóttir

Guðmundur Kristinn Lee/ Birkir Karl Sigurðsson

Jóhann H. Ragnarsson/Sigurlaug Regína Friðþjófsdóttir

Björn Þorfinnsson/Gunnar Freyr Rúnarsson

Einar K. Einarsson/Harpa Ingólfsdóttir

Magnús Örn Úlfarsson/Rúnar Berg

Íslandsmótið hefst 16:00 að loknu hraðskákeinvígi Jóhanns Hjartarsonar og Hjörvars Steins Grétarssonar. Fer það fram á Lækjartorgi eins og öll Skákhátíðin á Menningarnótt. Tefldar verða sex umferðir með 5.03 umhugsunartíma, fimm mínutum og þremur sekúndum í viðbótartíma.

Stórmeistaramót TR fer fram 1.-8. október

Frá 1. til 8. október næstkomandi mun alþjóðlegt lokað 10 manna stórmót verða haldið í skákhöll Taflfélags Reykjavíkur.  Þá fer fram í fyrsta sinn Stórmeistaramót Taflfélags Reykjavíkur sem stefnt er að, að verði árviss viðburður í framtíðinni.

Mótið verður geysiöflugt og meðal þátttakenda eru þrír stórmeistarar og fimm alþjóðlegir meistarar. Aðstæður verða eins og best verður á kosið, bæði fyrir keppendur og áhorfendur.  Allar skákir mótsins verða sýndar beint á netinu, en auk þess verður hægt að fylgjast með þeim á stóru tjaldi á keppnisstað.  Reiknað er með að skákskýringar verði á mótsstað í hverri umferð, og svo síðast en ekki síst verða hinar rómuðu veitingar í boði sem ætíð fylgja mótum félagsins.

Mótið er nú fullbókað og eftirtaldir meistarar munu leiða saman hesta sína á reitunum 64:

1. Úkraínski ofurstórmeistarann Sergey Fedorchuk (2667)

Fedorchuck varð evrópumeistari unglinga undir 14 ára árið 1995, en meðal annara afreka hans má nefna efsta sætið á Cappelle la Grande Open árið 2008, ásamt TR-ingunum Vugar Gashimov (2737), Erwin L'Ami (2640), nýbökuðum skákmeistara Úkraínu, Yuriy Kryvoruchko (2678) og fleirum. Einnig sigraði hann á Dubai Open 2006 ásamt Armenunum Sargissian og Petrosian.  Fedorchuk gekk nýverið í Taflfélag Reykjavíkur og verður spennandi að sjá hvort hann muni einnig tefla fyrir félagið í Íslandsmóti skákfélaga.

2. Úkraínski stórmeistarinn Mikhailo Oleksienko (2596)

Oleksienko sem er 27 ára, varð sextán ára alþjóðlegur meistari og þremur árum síðar stórmeistari.  Fyrr í sumar sigraði hann Czech Open þar sem hann vann 6 skákir í röð eftir rólega byrjun.  Nú í ágúst varð hann síðan í 1.-3. sæti á ZMDI Open í Dresden.  Hann er því til alls líklegur á mótinu, og hefur verið á hraðri uppleið á stigalista Fide.  Oleksienko er íslenskum skákmönnum að góðu kunnur, enda hefur hann verið fastamaður í liði Taflfélags Reykjavíkur á Íslandsmóti skákfélaga undanfarin ár.

3. Stórmeistarinn Henrik Danielsen (2500)

Henrik þarf vart að kynna, enda verið einn af okkar sterkustu og virkustu skákmönnum um árabil.  Hann er fæddur í Nyköbing í Danmörku en hefur síðan 2006 teflt fyrir íslands hönd.  Sex sinnum hefur hann teflt á Ólympíuskákmótinu, þar af þrisvar (2006, 2008 og 2012) fyrir Ísland.  Henrik varð Íslandsmeistari í skák árið 2009, þar sem hann sigraði með nokkrum yfirburðum. Henrik Danielsen er liðsmaður Taflfélags Vestmannaeyja.

4. Færeyski alþjóðlegi meistarinn Helgi Dam Ziska (2468)

Þessi mikli Íslandsvinur og liðsmaður T.R. náði nýverið sínum fyrsta áfanga að stórmeistaratitli á opnu móti í Riga Lettlandi.  Þar sýndi hann úr hverju hann er gerður, var með árangur upp á 2600 stig og mun hækka mikið á næsta stigalista Fide. Helgi er 23 ára, og varð alþjóðlegur meistari sautján ára.  Á XXII Reykjavíkurskákmótinu 2006, sigraði Ziska (þá sextán ára)  hollenska stórmeistarann Jan Timman í frægri skák.  Stórmeistarinn þekkti gafst þá upp í tuttugusta leik með unna stöðu!   Helgi mun örugglega sækja stíft annan áfanga sinn að stórmeistaratitli á mótinu, og verður spennandi að fylgjast með þessum geðþekka frænda vor.

5. Danski alþjóðlegi meistarinn Simon Bekker-Jensen (2414)

Simon hefur margoft teflt á Íslandi, bæði með Taflfélagi Reykjavíkur á Íslandsmóti Skákfélaga, og eins á Reykjavíkurskákmótinu.  Hann varð norðurlandameistari drengja (U16), alþjóðlegur meistari 18 ára, og 9 ár í röð varð hann danskur meistari með liði sínu Helsinge Chess Club.  Hann stefnir á sinn fyrsta áfanga að stórmeistaratitli á mótinu, og verður án efa erfiður viðureignar.  Simon kemur inn í mótið í stað Jakob Vang Glud (2520) sem nýverið náði sínum öðrum áfanga að stórmeistartitli á Politiken Cup.  Glud sá Stórmeistaramót Taflfélagsins sem kjörið tækifæri til að ná lokaáfanganum, en vegna anna við nám, þurfti hann að hætta við þátttöku.

6. Alþjóðlegi meistarinn Arnar Erwin Gunnarsson (2441)

Arnar er án efa einn hæfileikaríkasti skákmaður landsins. Snemma kom í ljós hversu mikið efni væri hér á ferð, enda varð pilturinn hvorki meira né minna en áttfaldur Norðurlandameistari í skák.  Arnar hefur unnið sigur allavegana einu sinni á öllum stærstu mótum landsins, að undanskildum landsliðsflokknum. Fjórum sinnum hefur hann orðið atskákmeistari Íslands, og er einnig þekktur sem einn snjallasti hraðskákmaður landsins. Eflaust munu nú margir bíða spenntir eftir að sjá meistarann taka þátt í stórmóti í kappskák eftir þó nokkuð hlé. Arnar hefur allan sinn skákferil verið liðsmaður Taflfélags Reykjavíkur.

7. Alþjóðlegi meistarinn Guðmundur Kjartansson (2434)

Guðmundur er án efa virkasti íslenski skákmeistarinn í dag. Hann hefur á árinu þegar teflt vel yfir 100 kappskákir og geri aðrir betur! Guðmundur varð Norðulandameistari U-20 og síðan alþjóðlegur meistari árið 2009. Fyrsti áfanginn að stórmeistaratitli kom sama ár á skoska meistaramótinu.  Í fyrra tefldi Guðmundur mikið í suður Ameríku og varð m.a. í 1.-3. sæti á alþjóðlegu móti í Bogotá, Kólumbíu. Fyrr í sumar sigraði hann stigahæsta keppenda Stórmeistaramótsins, Sergey Fedorchuk í glæsilegri skák á Evrópumeistaramóti einstaklinga. Guðmundur er því í góðri þjálfun, getur unnið hvern sem er á góðum degi og stefnir án efa á annan stórmeistaraáfanga sinn.  Guðmundur er uppalinn hjá Taflfélagi Reykjavíkur og hefur allan sinn feril teflt fyrir félagið.

8.  Alþjóðlegi meistarinn Bragi Þorfinnsson  (2493)

Bragi varð alþjóðlegur meistari árið 2003.  Árið 2012 var hann á meðal sigurvegara á Opna skoska meistaramótinu með 7 v. af níu.  Fyrsta áfanginn að stórmeistaratitli kom í hús í ár í bresku deildakeppninni.  Þar tefldi hann fantavel og gerði m.a. jafntefli við stórmeistarann þekkta Nigel Short.  Bragi hefur margsinnis teflt fyrir hönd Íslands og varð Ólympíumeistari með sveit Íslands, á Ólympíumóti unglingalandsliða í Las Palmas, Kanaríeyjum, árið 1995. Auk þess tefldi hann með landsliðinu á Ólympíumótinu 2004 og 2010 sem og í þremur Evrópukeppnum landsliða 2001, 2003 og 2010.  Nokkuð ljóst má vera að Bragi er hvað líklegastur til afreka á mótinu, og gæti hæglega nælt sér í sinn annan áfanga að stórmeistaratitli.  Bragi er liðsmaður Taflfélags Bolungarvíkur.

9.  Fide meistarinn Sigurbjörn Björnsson (2395)

Sigurbjörn hefur einn áfanga til alþjóðlegs meistaratitils og hefur sannarlega styrk til að sækja annan á Stórmeistaramóti Taflfélags Reykjavíkur.  Sigurbjörn hefur unnið fjölmörg mót innanlands og besti árangur hans á erlendri grundu er 4-13. sæti á Politiken Cup árið 2004 og 2.-12 sæti á Politiken Cup árið 2005, í bæði skiptin með sjö og hálfan vinning af tíu.  Það verður gaman að fylgjast með kappanum, enda einn af þeim líklegri til að ná "normi" á mótinu.  Sigurbjörn er liðsmaður Taflfélags Vestmannaeyja.

10.  Þorvarður Fannar Ólafsson (2266)

Þorvarður er nýjasti liðsmaður Taflfélags Reykjavíkur og það er okkur mikil ánægja að hann skuli nú taka þátt í fyrsta Stórmeistaramóti félagsins.  Fáir hafa verið duglegri að sækja mót félagsins en Þorvarður og hann hefur stórbætt sig undanfarið eitt og hálft ár.  Hann sigraði á Skákþingi Reykjavíkur 2009 og hefur sigrað á Öðlingamóti T.R. undanfarin tvö ár.  Þorvarður varð skákmeistari Hafnarfjarðar þrjú ár í röð 2003-2005.  Það skildi enginn afskrifa "Varða" þótt hann sé stigalægstur keppenda.  Stigin telja nefnilega ekkert á reitunum sextíu og fjórum og Þorvarður gæti hæglega sett strik í reikning gegn mun stigahærri keppendum á þessu móti. 

Taflfélag Reykjavíkur vill með þessu móti gefa nokkrum af efnilegustu skákmönnum landsins kost á að tefla hér á landi á öflugu lokuðu móti sem sérsniðið er til áfangaveiða.  Má segja að þar með hafi félagið svarað kalli íslenskra afreksskákmanna um slíkt mótahald, og það er von okkar í stjórn Taflfélagsins að þetta mót verði nú sem og næstu ár sú vítamínsprauta inn í íslenskt afreksskáklíf sem vantað hefur. Það er einnig von okkar í T.R. að það muni hvetja önnur félög til slíks mótahalds í framtíðinni, hvort sem er upp á eigin spýtur eða í samvinnu sín á milli.

En Taflfélagið mun einnig nýta komu erlendu meistaranna til að gefa þeim fjölmörgu börnum og unglingum sem sækja æfingar félagsins tækifæri á að kynnast þeim og tefla við þá.  Boðið verður t.d. upp á fjöltefli við einn af meisturunum og fleira skemmtilegt verður á dagskránni.

Meira um fyrirkomulag mótsins, töfluröðun, tímasetningar umferða og fleira, mun verða tilkynnt fljótlega.

Gelfand og Karjakin úr leik

Teflt var til þrautar með styttri tímamörkum 16 manna úrslitum Heimsbikarmótsins í skák í dag. Peter Svidler, Dmitry Andreikin, Maxime Vachier-Lagrave og Evgeny Tomashevsky komust áfram á kostnað Le Quang Liem, Sergey Karjakin, Boris Gelfand og Alexander Morozevich. Einvígi Tomashevsky og Morozevich var afar spennandi og skemmtilegt og fór ein skákin upp í 169 leiki.

Fimmta umferð (átta manna úrslit) hefst á morgun. Þá mætast  Kamsky - Tomashevsky, Svidler - Andreikin, Caruana - Vachier-Lagrave and Kramnik - Korobov.

Úrslit og pörun má nálgast á aðgengilegan hátt á Chessvibes.

• Heimasíða mótsins 
• Beinar útsendingar (hefjast kl. 13)

Þátttakendur í Leiftrinu

Þriðja Alheimsmótið í Leifturskák fer fram á Menningarnótt, en núverandi meistari er Hjörvar Steinn Grétarsson. Hann verður þó ekki með í ár vegna hraðskákeinvígis við Jóhann Hjartarson síðar um daginn. Margir af hörðustu klukkuberjurum landsins eru skráðir til leiks.

Fyrstan skal nefna Jón Gunnar Jónsson FRAM-ara sem gefur lítil sem engin grið og er þekktur fyrir að fagna vel eftir góðan sigur. Þá skal nefna Kristján Örn Elíasson formann Skákfélags Íslands. Kristján er mikill hraðskákmaður og þekktur fyrir löng gamni-hraðskákeinvígi við ýmsa menn. Einn af sigurstranglegri keppendunum er Ingvar Þór Jóhannesson sem er einna hraðastur í tímahraki á Íslandi. Hinn grjótharði Loftur Baldvinsson mætir til leiks og mun sýna að sigur hans gegn Braga Þorfinnssyni á Íslandsmótinu var enginn tilviljun. Formaður TR-inga hefur haft stór orð uppi um árangur sinn á mótinu og verður fróðlegt að sjá hvort það muni reynast orðin tóm, en Björn Jónsson er afar harður á klukkuna þegar hann tekur sig til. Hallgerður Helga er ein sterkasta hraðskákkona landsins og með afar gott skor á ýmsan karlpeninginn. Kraftlyftingarmenn og Víkingar eiga sinn fulltrúa, hinn grjótharði Gunnar Freyr Rúnarsson hyggst berja hvern einasta mann niður á tíma.

Enn eiga fáeinir skákmenn eftir að bætast á listann, en tefldar verða einnar mínútu skákir svo það má búast við fljúgandi taflmönnum um gjörvalt Ingólfstorg.

Nakamura úr leik á Heimsbikarmótinu - Kramnik og Caruana komnir áfram

Fjórir skákmenn hafa þegar tryggt sér þátttöku í fjórðu umferð, það er 8 manna úrslitum, Heimsbikarmótsins í skák. Óvæntastur þeirra er Úkraínumaðurinn Anton Korobov sem lagði Nakamura að velli. Hinir þrír eru Kramnik, sem vann Ivanchuk, Caruana sem lagði Perúmanninn Granda Zuniga örugglega og Gata Kamsky sem þurfti að hafa mikið fyrir sigri á Mamedyarov. Fjögur einvígi fara í bráðabana og verður teflt til þrautar á morgun með styttri umhugsunartíma.

Í skákskýringum á Chessvibes segir m.a. um skák Kamsky og Mamedyarov.

Here Kamsky "couldn't remember what to do." 7. Bxc4 c5 8. d5 b5 9. Bxb5 Nxe4 10. Nxe4 Qa5+11. Nc3 Bxc3+ 12. bxc3 Qxb5 13. h5 Ba6 Thorfinnsson,B (2478) -Gislason,G (2321)/Reykjavik 2013

Nakamura tístaði eftir tapskák dagsins:

Inexplicably overestimating my chances instead of taking a draw with 18...Nxe5. Oh well, life goes on.  

Úrslit og pörun má nálgast á aðgengilegan hátt á Chessvibes.

• Heimasíða mótsins 
• Beinar útsendingar (hefjast kl. 13)

Haustmót Taflfélags Reykjavíkur 2013 hefst 15. september

Haustmót Taflfélags Reykjavíkur 2013 hefst sunnudaginn 15. september kl.14. Mótið er eitt af aðalmótum vetrarins í reykvísku skáklífi og jafnframt meistaramót T.R. Það er áratuga gömul hefð fyrir hinu vinsæla Haustmóti og er það flokkaskipt.  Mótið er öllum opið. 

Mótið fer fram í félagsheimili Taflfélags Reykjavíkur, skákhöllinni að Faxafeni 12. Sú nýbreytni verður að teflt er tvisvar í viku.  Alls eru níu umferðir í hverjum flokki. Lokuðu flokkarnir eru skipaðir tíu keppendum hver þar sem allir tefla við alla, en í opna flokknum er teflt eftir svissnesku kerfi.

Skráning fer fram á heimasíðu Taflfélags Reykjavíkur.

Hægt er að fylgjast með skráningu hér..

Skráningu í alla lokaða flokka lýkur laugardaginn 14. september kl. 18.

Lokaumferð fer fram föstudaginn 18. október en mótinu lýkur með verðlaunaafhendingu sunnudaginn 20. október ásamt Hraðskákmóti T.R.

Núverandi skákmeistari Taflfélags Reykjavíkur er Daði Ómarsson.

Dagskrá:

1. umferð: Sunnudag 15. september kl.14.00 
2. umferð: Miðvikudag 18. september kl.19.30

3. umferð: Sunnudag 22. september kl.14.00 
4. umferð: Miðvikudag 25. september kl.19.30

5. umferð: Sunnudag 29. september kl.14.00

6. umferð: Miðvikudag 2. október kl.19.30 
7. umferð: Sunnudag 6. október kl.14.00

---Hlé vegna Islandsmóts skákfélaga---
8. umferð: Miðvikudag 16. október kl. 19.30 
9. umferð: Föstudag 18. október. kl.19.30 

Verðlaun í A-flokki: 
1. sæti kr. 100.000 
2. sæti kr. 50.000 
3. sæti kr. 25.000 
4. og 5. sæti ókeypis í Skákþing Reykjavíkur 2014

Verðlaun í B-flokki: 
1. sæti kr. 20.000
2.-3. sæti ókeypis í Skákþing Reykjavíkur 2014

Verðlaun í C-flokki: 
1. sæti kr. 15.000 
2. og 3. sæti ókeypis í Skákþing Reykjavíkur 2014

Verðlaun í opnum flokki:

1. sæti kr. 10.000 
2. og 3. sæti ókeypis í Skákþing Reykjavíkur 2014

Ef fjöldi lokaðra flokka eykst, verða verðlaun í þeim þau sömu og í C-flokki.

Að auki ávinnur sigurvegari hvers flokks sér þátttökurétt í næsta styrkleikaflokki að ári liðnu.

Verði keppendur jafnir í efstu sætum verður peningaverðlaunum skipt en stigaútreikningur látinn ráða lokaröð keppenda.

Tímamörk:

1 klst. og 30 mín. + 30 sek. á leik. 

Þátttökugjöld:

3.500 kr. fyrir félagsmenn T.R. 16 ára og eldri (5.000 kr. fyrir aðra). 
1.500 kr. fyrir félagsmenn T.R. 15 ára og yngri (2.500 kr. fyrir aðra).

Viltu styrkja íslensku skákkrakkanna sem fara á EM ungmenna?

Átta íslenskir skákmenn munu takta þátt á EM ungmenna sem fram fer í Budva í Svartfjallalandi 27. september - 8. október nk. Ekki hafa verið jafn margir fulltrúir frá Íslandi síðan fyrir hrun.

Fulltrúar Íslands verða: U18: Mikael Jóhann Karlsson U16: Veronika Steinunn Magnúsdóttir U14: Jón Kristinn Þorgeirsson og Dawid Kolka U12: Hilmir Freyr Heimisson og Felix Steinþórsson U10: Vignir Vatnar Stefánsson U8: Óskar Víkingur Davíðsson. Fararstjórar og þjálfarar krakkanna eru Helgi Ólafsson og Hjörvar Steinn Grétarsson.

Ferðin á mótið er dýr og því leita landsliðsbörnin eftir stuðningi. Með þessari netsöfnun gefst aðilum tækifæri til að styrkja þau með annað hvort kaupum á völdum gæðavörum eða með beinum stuðningi. Börnin njóta framlagsins að jöfnu.

EM-krakkarnir munu tefla á skákhátíð á Menningarnótt þar sem þau safna áheitum til ferðarinnar.

Á næstum dögum og vikum verða keppendirnir sem fara á EM ungmenna nánar kynntir.

Netsöfnun á vegum SÍ sem rennur alfarið til EM-faranna

Hjörvar Steinn öruggur sigurvegari Hraðskákmóts Hellis

Hjörvar Steinn Grétarsson sigraði örugglega með 12,5 af 14 mögulegum á Hraðskákmóti Hellis sem fram fór mánudaginn 19. ágúst sl. Eftir að sigurinn var nánast í höfn gaf Hjörvar aðeins eftir á lokametrunum en það voru Jón Trausti sem gerði jafntefli við Hjörvar í 12 umferð og Andri sem vann Hjörvar í þeirri 13. Sá sigur dugdi Andra til að halda stöðu sinni meðal efstu manna. Jafnir í 3.-5. sæti á stigum voru Andri Grétarsson, Þorvarður  Fannar Ólafsson, Oliver Aron Jóhannesson og Pálmi Pétursson í þessari röð skv. stigum.

Þátttakan var góð á Hraðskákmóti Hellis en 35 keppendur tóku þátt. Skákstjórar voru Erla Hlín Hjálmarsdóttir, Andri Grétarsson og Vigfús Ó. Vigfússon.

 Lokastaðan:

Röð	Nafn	Vinningar	TB1	TB2	TB3
1	Gretarsson Hjorvar Steinn	12,5	118	102	103,8
2	Gretarsson Andri A	10	121	103	84
3	Olafsson Thorvardur	10	117	100	73
4	Johannesson Oliver	10	112	97	79,5
5	Petursson Palmi Ragnar	10	105	89,5	67,75
6	Loftsson Arnaldur	9,5	101	86,5	63,5
7	Ragnarsson Dagur	9	117	103	69,25
8	Kristinardottir Elsa Maria	9	113	101	66
9	Vigfusson Vigfus	9	113	95,5	64
10	Hardarson Jon Trausti	8,5	123	107	64,25
11	Johannsdottir Johanna Bjorg	8,5	111	94,5	52,25
12	Jonsson Gauti Pall	8,5	107	91	59,25
13	Omarsson Kristofer	8	96	82,5	46,5
14	Thorsteinsdottir Hallgerdur	7,5	118	103	59,25
15	Stefansson Vignir Vatnar	7,5	115	99	56,5
16	Halldorsson Kristjan	7,5	99	85	45,75
17	Valdimarsson Einar	7	111	92,5	44
18	Kolka Dawid	7	99	85	44
19	Steinthorsson Felix	7	91	79	32
20	Sigurvaldason Hjalmar	7	90	76	40,5
21	Jonatansson Sigurdur Freyr	6,5	85	72	32,25
22	Einarsson Oskar Long	6	105	90,5	30
23	Johannesson Kristofer Joel	6	104	87,5	31
24	Nikulasson Gunnar	6	94	79,5	32
25	Hrafnsson Hilmir	6	70	60	21,5
26	Ingibergsson Gunnar	5,5	91	78	22,25
27	Jonasson Hordur	5,5	86	74,5	26,75
28	Kristbergsson Bjorgvin	5,5	77	65	19,75
29	Arnaldarson Bjarki	5,5	70	57,5	20,25
30	Davidsson Oskar Vikingur	5	93	79	29,5
31	Unnsteinsson Oddur Thor	5	91	77,5	22
32	Kristjansson Halldor Atli	5	69	58	15
33	Johannesson Petur	4,5	86	74	19,25
34	Palmason Matthias Hildir	4	66	56,5	15
35	Kristofersson Sindri Snaer	3	80	66,5	8,5

Chess-Results

Heilinn og höndin á Menningarnótt

Íslandsmótið í heilinn og höndin fer fram á Menningarnótt. Mótið er nú haldið í annað sinn en var haldið í fyrsta sinn á Menningarnótt í fyrra. Fyrstu Íslandsmeistararnir eru Jón Viktor Gunnarsson og Ingi Tandri Traustason.

Heilinn og höndin er ákveðið form skákar sem hefur verið vinsælt upp á síðkastið hér á landi. Heilinn segir taflmann og höndin þarf að ákveða hvaða taflmanni skal leika og hvert. Allt samráð milli parsins er bannað. Yfirleitt er teflt með umhugsunartímanum 5:03, enda viðbótartími nauðsynlegur.

Skráning fer fram á [e-mail] og mega samanlögð FIDE-stig parsins ekki vera hærri en 4700. Tíu pör munu taka þátt og gildir það að skrá sig sem fyrst!

Íslensk stig gilda ef skákmaður hefur ekki FIDE-stig. Tefldar verða sex umferðir með tímanum 5.03 og hefst mótið um fjögur eða um leið og einvígi Jóhanns Hjartarsonar og Hjörvars Steins lýkur.

Íslenskar skákkonur eru sérstaklega boðnar velkomnar og hafa þegar nokkrar núverandi og fyrrverandi landsliðskonur boðað komu sína.

Hellismenn sigruðu í skemmtilegri glímu við Vinaskákfélagið

Æsispennandi viðureignir framundan í 8 liða úrslitum. 

Hellismenn báru sigurorð af liðsmönnum Vinaskákfélagsins í Hraðskákkeppni taflfélaga í bráðskemmtilegri viðureign sem fram fór á heimavelli Hellis á þriðjudagskvöldið. Hjörvar Steinn Grétarsson leiddi sveit Hellis, sem skartaði alls fjórum landsliðsmönnum.

Hellir byrjaði með látum og sigraði í fyrstu umferð með 4,5 vinningi gegn 1,5 en Vinaskákfélagið beit hressilega frá sér í næstu umferðum. Róbert Lagerman forseti félagsins fór fyrir sínum mönnum og sigraði í skák eftir skák. Fleiri sýndu góða takta, en Hellismenn sigu jafnt og þétt fram úr og leiddu í hálfleik með 21,5 vinningi gegn 14,5.

Seinni hálfleikur þróaðist með svipuðum hætti og þegar upp var staðið höfðu Hellismenn sigur með  43,5 vinningi gegn 28,5.

Hjörvar Steinn sýndi afhverju hann er efnilegasti skákmaður Íslands og hlaut 9 vinninga af 9 mögulegum. Kempan Bragi Halldórsson fékk 8 af 12, Gunnar Björnsson 7 af 12, Hallgerður Helga Þorsteinsdóttir 5 af 10, og þær Jóhanna Björg Jóhannsdóttir og Elsa María Kristínardóttir fengu báðar 6 vinninga af 12. Hinn ungi og vaski Felix Steinþórsson fékk 1,5 vinning af 3 og Vigfús Vigfússon formaður Hellis 1 af 2.

Róbert fór mikinn og rakaði saman 9,5 vinningi í 11 skákum, Sævar Bjarnason fékk 4 af 10, Ingi Tandri Traustason 5,5 af 11, Arnljótur Sigurðsson 4 af 8, Hrannar Jónsson 2,5 af 11, Aron Ingi Óskarsson 1,5 af 8, Hrafn Jökulsson 1 af 2 og Hörður Jónasson 0,5 af 1, en þeir Jorge Fonseca og Hjálmar Sigurvaldason komust ekki á blað að þessu sinni. 

Viðureignin var í alla staði hin skemmtilegasta og öllum til sóma. Í leikslok tók Róbert að sér að draga í 8 liða úrslit keppninnar, og ljóst að spennandi viðureignir eru framundan:

 

 

Hellir -- Goðinn-Mátar

Skákfélag Íslands -- Víkingaklúbburinn

Skákfélag Akureyrar -- Briddsfjelagið

Bolungavík -- Taflfélag Vestmannaeyja 

Myndaalbúm (HJ)