Dagur endaði með 3,5 vinning

Alþjóðlegi meistarinn Dagur Arngrímsson (2385) endaði í 8.-9. sæti af 10 keppendum í alþjóðlegu móti í Búdapest í sem lauk í dag. Dagur hlaut 3,5 vinning.

Sigurvegari mótsins voru Ungverjarnir Imre Hera (2567) og Oliver Mihok (2451) en þeir hlutu 6 vinninga.

Frammistaða Dags samsvaraði 2327 skákstigum og lækkar hann um 6 stig fyrir hana.

• Heimasíða mótsins
• Chess-Results 

Skákþáttur Morgunblaðsins: Haltu opnu fyrir því óvænta

Wang Hao - Alexey Dreev

Svartur leikur og vinnur.

Staðan hér að ofan kom upp í 2. umferð heimsbikarmótsins í skák sem nú stendur yfir í Tromsö í Noregi. Staðan sem Alexei Dreev sat frammi fyrir minnir okkur á það að stundum þarf að brjóta hlekki hugar til að finna besta leikinn; að halda opnum huga gagnvart óvæntum möguleikum - það er vandinn. Ekki veit ég hvað braust um í huga Dreev en fyrsta spurning þessa öfluga stórmeistara hefði átt að vera: hverjir eru valkostirnir? Hann kaus að leika 46. ... Re1+, hafði vinningsmöguleika á ýmsum stigum en jafntefli varð þó niðurstaðan. Góður leikur var 46. ... Hc3, en sá albesti í stöðunni er af dýpri gerðinni: 46. ... f5!! Eftir 47. Hbxd3 He2+ verður hvítur mát, t.d. 48. Kf1 Hf2+ 49. Kg1 Hc1+ og mátar.

Þetta er annað stórmótið sem Norðmenn standa fyrir í ár og vitanlega má rekja þessa framkvæmdagleði til frammistöðu Magnúsar Carlsen; Norðmenn eru að safna sér saman fyrir heimsmeistaraeinvígið sem hann mun heyja við Anand í haust; á næsta ári halda þeir svo Ólympíumótið i skák. Ýmsir gestir okkar frá síðustu Reykjavíkurmótum hafa verið að gera góða hluti. Kínverjinn kornungi Wei hefur slegið út Nepomniachtchi og Shirov, Norðmaðurinn Hammer sló Movsesian úr keppni og sigurvegarinn frá síðasta Reykjavíkurmóti, Pavel Eljanov, er kominn áfram í 3. umferð. Meðal þeirra sem þurft hafa að snúa heim eru Judit Polgar og landi hennar Peter Leko, sem laut í lægra haldi fyrir Perúmanninum Granda Zuniga og Gata Kamsky. Upphaflega voru 128 skákmenn skráðir til leiks en um um helgina verða þeir orðnir 32.

Cori-systkinin frá Perú, Deysi og Jorge, unnu hugi og hjörtu manna á Reykjavíkurmótinu 2010. Jorge Cori var til alls vís er hann mætti Teimour Radjabov í 1. umferð. Kappskákunum lauk 1:1 en vegna tungumálaörðugleika kom upp misskilningur varðandi tímasetningu á hraðskákunum, Cori mætti of seint og var dæmdur úr leik. Hann átti betra skilið eins og eftirfarandi vinningsskák ber með sér. Lokahnykkurinn er bráðsnjall. Eitt það erfiðasta í skák er að bakka með vel staðsettan mann en þegar menn eru í stuði „koma svona leikir til manns", orðaði það einhver ágætur maður:

Jorge Cori - Teimour Radjabov

Kóngsindversk vörn

1. d4 Rf6 2. c4 g6 3. Rc3 Bg7 4. e4 d6 5. Rf3 O-O 6. Be2 e5 7. O-O Rc6 8. d5 Re7 9. b4 Rh5 10. He1

Ein vinsælasta leiðin enn í dag komin frá Ivan Sokolov. Radjabov gerþekkir þetta afbrigði.

10. ... f5 11. Rg5 Rf4 12. Bxf4 exf4 13. Hc1 h6 14. Re6 Bxe6 15. dxe6 Bxc3 16. Hxc3 fxe4 17. Bf1 e3 18. fxe3 fxe3 19. Hcxe3 a5 20. b5 c6 21. bxc6 bxc6 22. Hd3 Db6 23. Kh1 d5 24. cxd5 cxd5 25. Hxd5!?

Vegna hins ógnandi frípeðs á e6 tekur hvítur ekki mikla áhættu þó hann láti skiptamun af hendi.

25. ... Rxd5 26. Dxd5 Had8 27. De4 Hf6?

Eðlilegur leikur en samt meinleg ónákvæmni. Best var 27. ... Hf5.

28. e7! He8 29. Dd5+

Lítur vel út en 29. a4! var mun sterkara. Við hótuninni 30. Bb5 er þá lítið að gera.

29. ... Kg7 30. De5 Df2?

Hér var eina vonin fólgin í því að draga í land og leika 30. ...Db8! með hugmyndinni 31. Dxb8 Hxf1+ 32. Hxf1 Hxb8, e7 peðið fellur og svartur á jafnteflisvon.

31. Bb5! Kh7

32. Da1!

- Radjabov gafst upp.

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 18. ágúst 2013

Skákþættir Morgunblaðsins

Mögnuð Menningarnótt

Heldur var vott í veðri þegar Skákhátíð Skákakademíunnar hófst á hádegi í gær, á Menningarnótt. Hin besta stemning hafði þó ríkt á Lækjartorgi um morguninn og hressir hlauparar á hverju horni. Við undirbúning og uppsetningu skáktjaldsins urðu skipuleggjendur skákhátíðarinnar dolfallnir yfir krafti Kára Steins maraþonshlaupara sem hreinlega spretti í mark og fór hálf maraþonið á rétt rúmum klukkutíma sem er ótrúlegur tími. Sannkölluð stjarna hann Kári Steinn.

Skákdagskráin hófst á því að ungmennalandslið Íslands bauð gestum og gangandi að tefla við sig. Fjölmargir gestir hátíðarinnar tefldu við krakkana í ungmennalandsliðinu og tóku margir hverjir nokkrar skákir og þar á meðal tveir ungir skákmenn frá Spáni. Ungmennalandsliðið var með framtaki sínu að safna styrkjum og áheitum fyrir för sína á EM í Svartfjallalandi sem hefst eftir nokkrar vikur. Svona viðburður eflir einnig tengsl og einingu meðal liðsmanna sem skiptir miklu máli þegar haldið er í skákvíking. Tefldu krakkarnir í um sex klukkutíma og sýndu mikinn dugnað og eiga hrós skilið.

Ingvar Þór hraðastur

Leifturskákin dró að sé mikinn fjölda áhorfenda enda mikil læti og fjör. Tefldar voru níu umferðir, allir við alla, tvær skákir milli andstæðinga í hverri umferð, alls átján skákir í heildina. Keppendur lögðu sig alla fram og oft á tíðum var gríðarlegt tímahrak í gangi með tilheyrandi fljúgandi taflmönnum og stöku blótsyrði. Þónokkur þrætuefni komu upp meðal keppenda en var það þó leyst að lokum í mesta bróðerni enda Leifturskákmótið fyrst og fremst til gamans fyrir keppendur og áhorfendur. Ingvar Þór hafði að lokum sigur og það nokkuð öruggan. Lokastöðuna má sjá á Chess-Results.

Jóhann með tak á Hjörvari

Að loknu Leifturskákmótinu var dregið í töfluröð á Íslandsmóti skákfélaga í fyrstu og aðra deild. Töfluröðin hef þegar birst á skak.is og eru nokkrar athyglisverðar viðureignir í fyrstu umferð í báðum deildum. Hápunktur hátíðarinnar var hraðskákeinvígi Jóhanns Hjartarsonar og Hjörvars Steins Grétarssonar. Jóhann vann fyrstu skákina eftir krappa vörn í marga leiki. Hjörvar hafði teygt sig of langt. Í annarri skákinni hafði Jóhann haft betra tafl en lék af sér drottningu og gafst upp. Í þriðju skákinni hafði Hjörvar betra með hvítu en skipti að lokum í upp í endatafl þar sem hann lék af sér. Fjórðu skákina vann Jóhann nokkuð laglega og þar með einvígið 3-1. Er þetta því í þriðja skiptið sem Jóhann leggur Hjörvar í fjögurra skáka hraðskákeinvígi og sýnir þvi enn styrk sinn sem besti skákmaður landsins.

Sigurbjörn og Róbert Íslandsmeistarar

Síðasti viðburður dagsins var Íslandsmótið í heilinn og höndin. Keppendalistinn var nokkuð sterkur eins og sjá má þegar mótstaflan er skoðuð. Nokkrir voru að tefla heilinn og höndin í fyrsta skiptið og virtust hafa gaman af enda er þetta form skákar skemmtilegt og óhefðbundið. Jón Viktor og Bergsteinn Einarsson fóru vel af stað og fyrir lokaumferðina voru þeir efstir með aðeins hálfan vinning niður. Í sjöttu og síðustu umferð tefldu þeir gegn Magnúsi Erni Úlfarssyni og Rúnari Berg. Úr var gríðarlega spennandi skák. Rétt fyrir utan skáktjaldið fylgdist Róbert Lagerman með skákinni gegnum glugga og það með miklum tilþrifum og svipbrigðum. Ástæðan var sú að ef Jón Viktor og Bergsteinn myndu tapa yrðu Róbert og félagi hans Sigurbjörn Björnsson Íslandsmeistarar. Rúnar og Magnús reyndust örlagavaldar og tryggðu Sigurbirni og Róberti titilinn. Lokastöðu mótsins má finna á Chess-Results.

Þrátt fyrir blautt veður tókst hátíðin vel. Fjöldi gesta kíkti við í skáktjaldinu, tefldi við ungmennalandsliðið eða fylgist með viðburðunum. Dúndrandi salsa-tónlist hliðina tjaldinu gaf þessu svo öllu saman skemmtilegan og sérstakan blæ. Skákhátíð Skákakademíunnar á Menningarnótt var nú haldin þriðja árið í röð og hefur fest sig í sessi.

Hrafn Jökulsson tók frábærar myndir sem finna má í myndaalbúmi Menningarnætur.

Meistaramót Hellis hefst á morgun

Meistaramót Hellis 2013 hefst mánudaginn 26. ágúst klukkan 19:30. Mótið er 7 umferða opið kappskákmót sem lýkur 9. september.   Vegleg og fjölbreytt verðlaun eru í boði.  Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga.  Skráning í mótið er hér á heimasíðu Hellis og hér á Skák.is.  

Teflt er á mánudögum, þriðjudögum og miðvikudögum.

Aðalverðlaun:

1. 40.000
2. 30.000
3. 20.000

Aukaverðlaun:

• Skákmeistari Hellis: Houdini 3 Aquarium Pro
• Besti árangur undir 2200 skákstigum: Houdini 3 Aquarium Standard
• Besti árangur undir 1800 skákstigum:ChessOK Aquarium 2012

• Besti árangur undir 1600 skákstigum: CT-ART 4.0 (taktískar æfingar)

• Besti árangur stigalausra: Skákbók hjá Sigurbirni að verðmæti kr.5.000.
• Unglingaverðlaun (15 ára og yngri), skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.
• Kvennaverðlaun, skákbækur hjá Sigurbirni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

• Félagsmenn kr. 3.000; aðrir 4.000-
• Unglingar 15 ára og yngri: Félagsmenn: 2.000; Aðrir 3.000.
• Allir titilhafar fá frítt í mótið

Umferðartafla: 

• 1. umferð, mánudaginn, 26. ágúst, kl. 19:30
• 2. umferð, þriðjudaginn, 27. ágúst, kl. 19:30
• 3. umferð, miðvikudaginn, 28. ágúst, kl. 19:30
• 4. umferð, mánudaginn, 2. september, kl. 19:30
• 5. umferð, þriðjudaginn, 3. september, ágúst, kl. 19:30
• 6. umferð, miðvikudaginn, 4. september, kl. 19:30
• 7. umferð, mánudagur, 9. september, kl. 19:30

Grandelius tekur ekki þátt í HM ungmenna

Sænski stórmeistarinn og félagsmaður Taflfélags Vestmannaeyja Nils Grandelius tekur ekki á HM ungmenna sem fram fer í Antakya í Tyrklandi dagana 13.-26. september nk. Antakyna liggur upp að landamærum Sýrlands. Yfirvöld í Svíþjóð mæla á móti ferðalögum á þetta svæði vegna ástandsins þar.

Þetta er fremur súrt þar sem fyrir liggur að Nils væri einn sigurstranglegasti keppandinn.

Sjá nánar á vefsíðu Lars Grahn.

Harpa í TR

Skákdrottningin Harpa Ingólfsdóttir Gígja er gengin til liðs við Taflfélag Reykjavíkur.  Harpa varð Íslandsmeistari stúlkna árið 1995 og sama ár Íslandsmeistari með sveit Árbæjarskóla í sveitakeppni stúlkna.  Hún hefur tekið þátt í heimsmeistaramótum ungmenna, þremur ólympíumótum, norðurlandamótum og evrópumeistaramótum.  Harpa hefur tvisvar orðið Íslandsmeistari kvenna, árið 2000 og 2004.  

Þá hefur hún hefur setið í stjórn Skáksambands Íslands, í stjórn Hellis, og verið varaformaður Taflfélags Reykjavíkur.  Harpa er skráð til leiks á Norðurlandamót kvenna sem haldið verður 17. til 23. september í Norræna húsinu, og verður gaman að sjá hana kljást þar við stöllur sínar af hinum norðurlöndunum.

Taflfélag Reykjavíkur býður Hörpu hjartanlega velkomna heim!

Íslandsmót skákfélaga - töfluröð í 1. og 2. deild

Dregið var í fyrstu og aðra deild Íslandsmóts skákfélaga sem fram fer í október nk. Töfluröðin er sem hér segir:

 

1	Víkingaklúbburinn A
2	Taflfélag Reykjavíkur A
3	Hellir A
4	Goðinn-Mátar A
5	Taflfélag Vestmannaeyja A
6	Skákdeild Fjölnis A
7	Goðinn-Mátar B
8	Taflfélag Bolungarvíkur A
9	Taflfélag Reykjavíkur B
10	Skákfélag Akureyrar A

 

Töfluröð í 2. deild er sem hér segir:

 

Rk.	Team
1	Taflfélag Akraness
2	Skákdeild Hauka
3	Vinaskákfélagið A
4	Skákfélag Reykjanesbæjar A
5	Taflfélag Bolungarvíkur B
6	Taflfélaga Vestmannaeyja B
7	Víkingaklúbburinn B
8	Taflfélag Garðabæjar A

 

 

Skákdagskrá Menningarnætur

Í dag fer fram Skáhátíð Skákakademíunnar á Menningarnótt. Hátíðin fer fram á Lækjartorgi, í hvítu tjaldi og hefst um 12:00 þegar ungmennalandslið Íslands hefur maraþon sitt. Krakkarnir munu tefla í sex tíma við gesti og gangandi sem geta keypt skákir af þeim. Öll innkoma af maraþoninu rennur í ferðasjóð vegna farar á EM ungmenna í Svartfjallalandi eftir nokkrar vikur.

Skorað er á skákmenn að kaupa skák af krökkunum og styrkja þannig för þeirra!

Dagskrá dagsins:

12:00 Áheitamaraþon ungmennalandsliðs Íslands í skák hefst og stendur til 18:00

13:00 Þriðja Alheimsmótið í Leifturskák

14:30 Dregið í töfluröð á Íslandsmóti skákfélaga

14:45 Einvígi Jóhanns Hjartarsonar og Hjörvars Steins Grétarssonar.

16:00 Íslandsmótið í heilinn og höndin

Minnt er á að hinar ýmsu götur eru lokaðar á Menningarnótt. Gestir þurfa því að gefa sér rúman tíma til að komast niður á Lækjartorg.

Meistaramót Hellis hefst á mánudagskvöldið

Meistaramót Hellis 2013 hefst mánudaginn 26. ágúst klukkan 19:30. Mótið er 7 umferða opið kappskákmót sem lýkur 9. september.   Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra skákstiga. Skráning fer fram hér á Skák.is. Upplýsingar um þegar skráða keppendur má nálgast hér. Nú þegar eru 18 keppendur skráðir til leiks.

Teflt er á mánudögum, þriðjudögum og miðvikudögum.

Aðalverðlaun:

1. 40.000
2. 30.000
3. 20.000

• Upplýsingar um aukaverðlaun koma síðar.

Þátttökugjöld:

• Félagsmenn kr. 3.000; aðrir 4.000-
• Unglingar 15 ára og yngri: Félagsmenn: 2.000; Aðrir 3.000.
• Allir titilhafar fá frítt í mótið

Umferðartafla: 

• 1. umferð, mánudaginn, 26. ágúst, kl. 19:30
• 2. umferð, þriðjudaginn, 27. ágúst, kl. 19:30
• 3. umferð, miðvikudaginn, 28. ágúst, kl. 19:30
• 4. umferð, mánudaginn, 2. september, kl. 19:30
• 5. umferð, þriðjudaginn, 3. september, ágúst, kl. 19:30
• 6. umferð, miðvikudaginn, 4. september, kl. 19:30
• 7. umferð, mánudagur, 9. september, kl. 19:30

Jóhann og Hjörvar Steinn tefla einvígi á Menningarnótt

Helsti viðburður Skáhátíðar Skákakdemíunnar á Menningarnótt er án vafa hraðskákeinvígi Jóhanns Hjartarsonar og Hjörvars Steins Grétarssonar. Jóhann er stigahæstur Íslendinga og er sá skákmaður sem hefur lengst náð í baráttunni um heimsmeistaratitilinn. Hjörvar Steinn er efnilegasti skákmaður Íslands og þegar einn af þeim allra bestu. Þeir tefla nú hraðskákeinvígi í þriðja sinn. Á Menningarnótt í fyrra hafði Jóhann öruggan sigur í fjögurra skáka hraðskákeinvígi, 3.5 - 0.5. Í vetur tefldu þeir sýningareinvígi fyrir starfsfólk Eimskipa, og aftur hafði Jóhann sigur en þá með minni mun. Spurningin er því þessi: Nær Jóhann Hjartarson að leggja Hjörvar Stein í einvígi í þriðja skiptið í röð, eða stöðvar Hjörvar sigurgöngu Jóhanns?

Einvígið hefst um 14:45 eða strax að loknum töfludrætti í fyrstu og aðra deild á Íslandsmóti skákfélaga komandi vetur. Tefldar verða fjórar skákir með umhugsunartíma 5.03, fimm mínútum og þremur viðbótar sekúndum eftir hvern leik. Einvígið fer fram á Lækjartorgi eins og öll Skákhátíðin.

Verðlaun í einvíginu koma frá Hereford-steikhúsi og Hvíta riddaranum.