KR-mótin: Guðfinnur sigursæll og þó ekki

Þegar vorar í vesturbænum þarf stundum að flytja skákkvöldin í KR til svo fótamenntin fái notið sín til fulls þegar gestalið koma í heimsókn. Þannig stendur á núna - teflt verður annað kvöld þar vestur frá.

Guðfinnur R. Kjartansson hefur verið sigursæll að undanförnu annað hvort efstur eða með efstu mönnum.  Vann mótið síðast en Birgir Berndsen sló öllum við vikuna þar á undan eins og sjá má á meðf. mótstöflum.

 

 

 

 

Guðfinnur varð þó fyrir alvarlegri skákáfallastreyturöskun þegar hann mætti hinum aldna meistara Birni Víkingi Þórðarsyni daginn eftir hina glæsulegu sigurgöngu sína í KR og góða frammistöðu í Æsum sama dag, hafandi fengið 18 vinninga í 23 skákum þann daginn.   Þegar minnst varði varð hann skyndilega heimaskítsmát í 8 leik, þegar seiðkraftur galdramannsins svipti hann sjóninni.  Atburðarásina  má sjá nánar á meðf. myndi sem birt er með samþykki beggja þessara vopnabræðra.

 

 

Skákmenn athugi að teflt verður í KR annað kvöld - þriðjudagskvöld - og síðan áfram í allt sumar á mánudögum eða þriðjudegum þegar KR á heimaleik í göngu sinni að Íslandsmeistararatitlinum.

 

Skákkeppni Landsmóts UMFÍ 50+ fer fram laugardaginn 8. júní

Helgina 7. - 9. júní verður 3. Landsmót UMFÍ 50 + haldið í Vík í Mýrdal. Allir geta tekið þátt í mótinu óháð félagsaðild að ungmennafélagi. 

Mótið er íþrótta - og heilsuhátíð með fjölbreyttri dagskrá. Auk keppni í hinum ýmsu íþróttagreinum verður boðið upp á  ýmsa  afþreyingu fyrir keppendur og gesti. Einnig verður boðið upp á fræðslu um hollustu og heilbrigðan lífsstíl ásamt fjölda annarra viðburða. 

Fyrirhugaðar keppnisgreinar í Keppnisgreinar á mótinu eru: Utanvegarhlaup, boccia, bridds, golf, frjálsar, íþróttir, hestaíþróttir, hringdansar, línudans, pútt, ringó, skák, pönnukökubakstur, búfjárdómar, kjötsúpugerð, ljósmyndamaraþon, dráttavélaakstur, sund, sýningar,  þríþraut og hjólreiðar. Allir á aldrinum 50 ára og eldri geta tekið þátt í keppnisgreinum mótsins. Þátttakendur greiða eitt mótsgjald og öðlast með því þátttökurétt í öllum keppnisgreinum. Mótsgjald er 3500 krónur óháð greinafjölda. Frítt verður á tjaldstæði mótshelgina í Vík í Mýrdal. Skráning fer fram á heimasíðu mótsins  www.landsmotumfi50.is.

Skákkeppnin fer fram laugardaginn 8. júní og er um að ræða einstaklingakeppni. Teflt er á milli 13 og 17. Tefldar verða 9 umferðir með 10 mínútna umhugsunartíma.

Sjáumst á Landsmóti UMFÍ 50 + í Vík í Mýrdal 7. - 9. júní 2013 kát og hress.

Hraðkvöld hjá Helli í kvöld

Taflfélagið Hellir heldur hraðkvöld mánudaginn 27. maí nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Nökkvi Sverrisson vann Meistaramót Skákskólans 2013

 

 

Eyjamaðurinn Nökkvi Sverrisson bar sigur úr býtum á Meistaramót Skákskóla Íslands 2013 sem lauk um 7 leytið á sunnudagskvöldið. Helstu keppinautar Nökkva í baráttunni, Mikael Jóhann Karlsson og Dagur Andri Friðgeirsson gerðu jafntefli eftir hörku skák þar sem Dagur Andri, sem er nýfluttur aftur til lands eftir nokkurra ára dvöl í Noregi,  var nær sigri. Áður hafði Nökkvi unnið Jón Trausta Harðarson í spennandi skák í hinu hvassa Dreka-afbrigði sikileyjarvarnar.

 

 

Þátttakendur voru alls 33 og var keppt var til verðlauna í ýmsum flokkum en ekki var hægt á fá verðlaun nema í einum flokki.  Verðlaunahafar á mótinu voru þessir:   

Sigurvegarar mótsins:

1. Nökkvi Sverrisson 6 v. (af 7).

2. - 3. Mikael Jóhann Karlsson og Dagur Andri Friðgeirsson  5 1/2 v.

4. - 5. Oliver Aron Jóhannsson og Dagur Ragnarsson 

Sérstök stúlknaverðlaun:

Hrund Hauksdóttir 4 ½ v. 

Flokkur 14 ára og yngri:   

1. Vignir Vatnar Stefánsson 4 ½  v.

2. Guðmundur Anar Bragason 4 ½ v.

Flokkur 12 ára og yngri:

1. Hilmir Freyr Hafsteinsson  4 v.

2. Róbert Örn Vigfússon 4 v.

3. Heimir Páll Ragnarsson 4 v.

Stúlknaverðlaun:

1. Donika Kolica 4. v.

2. Tinna Þrastardóttir.

Mótstjóri og skákdómari var Helgi Ólafsson skólastjóri Skákskóla Íslands.

• Chess-Results
• Myndaalbúm (GB)

Davíð Kjartansson Suðurlandsmeistari í skák

Davíð Kjartansson varð í dag Suðurlandsmeistari í skák, mótið fór fram á Selfossi.

Davíð sigraði með yfirburðum vann alla andstæðinga sína.  Mótið var fámennt en vel mannað eigi að síður, hörkubarátta var um verðlaunasæti.  Það fór svo að Ingimundur Sigurmundsson náði öðru sæti, hann tapaði einungis einni skák. Vigfús Óðinn Vigfússon varð þriðji á mótinu og Björgvin Smári lenti í fjórða en tekur bronsið í baráttunni um Suðurlandið.

Þetta mun vera í fyrsta sinn sem Davíð hampar tiltlinum.  Óskum við honum innilega til hamingju með sigurinn !

 

Heimasíða SSON

Uppskeruhátíð SA fór fram í dag

Í dag var boðið upp á öflugt bakkelsi a la Mæja og var enginn svikinn af því. Þá voru afhent verðlaun fyrir mót vormisseris og að lokum teknar nokkrra léttar hugur-og-hönd skákir. Þar brilleraði Ari Friðfinnsson annað árið í röð og vann báðar sínar skákir í félagi við Símon Þórhallsson. 

Ungir afreksmenn

Allt fór þetta vel fram og menn fóru sáttir og saddir heim. Jón Kristinn Þorgeirsson fékk flest verðlaun viðstaddra, s.s. fyrir nýjársskákmótið, páskamótið. TM-mótaröðina og SÞA í yngri flokkum. Þá hlaut hann, ásamt Loga Rúnari Jónssyni, viðurkenningu fyrir besta ástundun á æfingum.

Heimasíða SA

Skákþáttur Morgunblaðsins: Það er engin bein leið

Glóðin sem brennur í augum hins 12 ára gamla Sergeis Karjakins" var hástemmdur titill á grein sem fjallaði um eitt mesta undrabarn Úkraínumanna, sem eins og margir landa hans er einnig handhafi rússnesks vegabréfs og hefur teflt fyrir Rússa undanfarin ár. Karjakin hefur að miklu leyti staðið undir þeim væntingum sem bundnar voru við hann en stendur þó í skugganum af skærustu stjörnu skákarinnar í dag, Magnúsi Carlssyni. Þeir eru á svipuðu reki. Kannski rennur upp sú stund að hann tefli um heimsmeistaratitilinn; frá sögulegum sjónarhóli séð má minnast þess að árum saman stóð Viktor Kortsnoj í skugganum af Tal, Spasskí og Petrosjan en öðlaðist magnað langlífi kannski vegna þess að hann náði aldrei efsta tindinum en þrátt fyrir allar bylturnar kleif hann alltaf aftur á brattann. Karjakin hefur undanfarin ár átt erfitt uppdráttar gegn Norðmanninum. Þrátt fyrir hárbeittan stíl, sem minnir á heimsmeistarann Anand, er hann á stundum fullfyrirsjáanlegur og skortir ákveðna dýpt í miðtaflinu. Stórmótið Norwegian chess, sem teflt er á ýmsum stöðum í Stavanger í Noregi og lýkur um helgina, var sennilega hugsað sem upphitun fyrir heimsmeistaraeinvígið í nóvember. Það hefur dregið til sín tíu stórmeistara sem tefla einfalda umferð. Auðvitað „á Magnús sviðið" en hann hikstaði í byrjun: fjögur jafntefli á móti fjórum sigrum Karjakins. Þeir mættust í fimmtu umferð og Karjakin með hvítt. Í skákinni sem hér fer á eftir er eins og maður sé minntur á að leiðin til sigurs er ekki bein, miklu frekar að hún hlykkist, menn geta þess vegna skroppið á kaffihús eitt öngstræti til hægri og komið þaðan út sigurvegarar:

Sergei Karjakin - Magnús Carlsen

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. 0-0 Be7 6. He1 b5 7. Bb3 d6 8. c3 0-0 9. h3 Rb8

Breyer-afbrigðið er alltaf vinsælt. Það virðist henta ágætlega rólegum stíl Magnúsar.

10. d4 Rbd7 11. Rbd2 Bb7 12. Bc2 He8 13. a4 Bf8 14. Bd3 c6 15. Dc2 Hc8 16. axb5 axb5 17. b4 Dc7 18. Bb2 Ha8 19. Had1 Rb6 20. c4 bxc4 21. Rxc4 Rxc4 22. Bxc4 h6 23. dxe5 dxe5 24. Bc3 Ba6 25. Bb3 c5 26. Db2 c4 27. Ba4 He6 28. Rxe5 Bb7 29. Bc2 Hae8 30. f4 Bd6

31. Kh2?

Staðan er ákveðinn prófsteinn á hæfni Karjakins í miðtöflum og hann fellur á prófinu. Leikur „Houdinis" 31. He3! hefði tryggt honum betri stöðu.

31.... Rh5! 32. g3 f6 33. Rg6 Rxf4!

Þessi þrumuleikur þurfti ekki að koma á óvart. Hvítur getur ekki þegið mannsfórnina, 34. gxf4 Bxf4+ 35. Kg2 f5!, og hrókurinn á e6 kemst í spilið.

34. Hxd6 Rxg6 35. Hxe6 Hxe6 36. Bd4 f5!

Skyndilega opnast fyrir biskupinn á b7 og hornalínuna h1-18.

37. e5 Rxe5!

Magnaður leikur.

38. Bxe5 Dc6 39. Hg1 Dd5 40. Bxf5 Hxe5 41. Bg4 h5!

Peð eru líka sóknarmenn!

42. Bd1

Annar möguleiki var 42. Hd1 sem má svara með 42.... Dxd1! 43. Bxd1 He1 sem hótar mát á h1, 44. g4 loftar út en þá kemur 44.... h4! og hvítur er fastur í mátneti.

Sjá stöðumynd

42.... c3! 43. Df2

Ekki 43. Db3 vegna 43.... He2+! og vinnur.

43.... Hf5 44. De3 Df7 45. g4 He5 46. Dd4 Dc7!

- og Karjakin gafst upp.

Staðan þegar tvær umferðir eru eftir: 1. Karjakin 5½ v. (af 7). 2. Carlsen 5 v. 3.-4. Anand og Aronjan 4 v. 5.-6. Nakamura og Svidler 3½ v. 7. Topalov 3 v. 8.-9. Wang Hao og Radjabov 2½ v. 10. Hammer 1½ v.

Helgi Ólafsson [e-mail]

 

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 19. maí 2013.

Skákþættir Morgunblaðsins

[Event "Norway Chess Tournament"] [Site "Sandnes NOR"] [Date "2013.05.13"] [EventDate "2013.05.07"] [Round "5"] [Result "0-1"] [White "Sergey Karjakin"] [Black "Magnus Carlsen"] [ECO "C95"] [WhiteElo "?"] [BlackElo "?"] [PlyCount "92"] 1.e4 e5 2.Nf3 Nc6 3.Bb5 a6 4.Ba4 Nf6 5.O-O Be7 6.Re1 b5 7.Bb3 d6 8.c3 O-O 9.h3 Nb8 10.d4 Nbd7 11.Nbd2 Bb7 12.Bc2 Re8 13.a4 Bf8 14.Bd3 c6 15.Qc2 Rc8 16.axb5 axb5 17.b4 Qc7 18.Bb2 Ra8 19.Rad1 Nb6 20.c4 bxc4 21.Nxc4 Nxc4 22.Bxc4 h6 23.dxe5 dxe5 24.Bc3 Ba6 25.Bb3 c5 26.Qb2 c4 27.Ba4 Re6 28.Nxe5 Bb7 29.Bc2 Rae8 30.f4 Bd6 31.Kh2 Nh5 32.g3 f6 33.Ng6 Nxf4 34.Rxd6 Nxg6 35.Rxe6 Rxe6 36.Bd4 f5 37.e5 Nxe5 38.Bxe5 Qc6 39.Rg1 Qd5 40.Bxf5 Rxe5 41.Bg4 h5 42.Bd1 c3 43.Qf2 Rf5 44.Qe3 Qf7 45.g4 Re5 46.Qd4 Qc7 0-1

Sextíu skákmenn skráðir til leiks á Opna Íslandsmótið í skák

Þeim fjölgar jafnt og þétt keppendunum á Opna Íslandsmótið í skák, sem jafnframt er Íslandsmót kvenna og hefst á föstudaginn í Turninum í Borgartúni. Nú þegar fimm dagar eru í mót eru ríflega sextíu skákmenn skráðir til leiks og meðal þeirra sem bæst hafa við síðustu daga er stigahæsti keppandi mótsins, Héðinn Steingrímsson (2558). Fleiri sterkir skákmenn munu bætast við á næstu dögum en enn er galopið fyrir skráningu í mótið og verður fram á fimmtudag. Í ár eru 100 ár síðan fyrsta Íslandsmótið í skák fór fram.

Fjórir stórmeistarar eru skráðir til leiks. Auk Héðins eru það Hannes Hlífar Stefánsson (2507), sigursælasti skákmaður í sögu Íslandsmótanna í skák með 11 titla, Henrik Danielsen (2500) og Stefán Kristjánsson (2494). Alþjóðlegu meistararnir Bragi Þorfinnsson (2478), Guðmundur Kjartansson (2446), Björn Þorfinnsson (2377) og Sævar Bjarnason (2130) láta sig ekki vanta. Það gerir heldur ekki Lenka Ptácníková (2255) stórmeistari kvenna og FIDE-meistararnir Sigurbjörn Björnsson (2397), Ingvar Þór Jóhannesson (2357), Guðmundur Gíslason (2321) og Þorsteinn Þorsteinsson (2266). Nokkrir erlendir skákmeistarar taka þátt. Þeirra sterkastur er norski alþjóðlegi meistarinn og landsliðsmaðurinn Nicolai Getz (2355).

Af keppendunum eru aðeins þrír hafa orðið Íslandsmeistarar. Auk Hannesar eru það Héðinn (2) og Henrik Danielsen (1).

Mótið er jafnframt Íslandsmót kvenna. Nánast allar sterkustu skákkonur landsins taka þátt. Má þar nefna auk Lenku þær Tinnu Kristínu Finnbogadóttur (1922), Jóhönnu Björg Jóhannsdóttur (1890), Elsu Maríu Kristínardóttur (1785), Sigríði Björg Helgadóttur (1760), Hrund Hauksdóttur (1680) og Veroniku Steinunni Magnúsdóttur (1576).

Aðeins Lenka (4) og Elsa (1) hafa orðið Íslandsmeistarar kvenna af þeim sem eru skráðar.

Meðal helstu styrktaraðila mótsins má nefna Ölgerðina, Actavis, Olís, Icelandic og LS-Retail. Hamborgafabrikkan gefur mat fyrir tvo fyrir skák hverrar umferðar.

Aðstæður í Turninum, Borgartúni, eru einstakar en teflt er á 20. hæðinni þar sem finna má útsyni yfir alla Reykjavík.

Skráning fer fram hér á Skák.is

• Heimasíða mótsins
• Keppendalisti á Chess-Results

Skákkennsla í Borgarnesi

Á vorönn hefur verið boðið upp á skákennslu í Grunnskólanum í Borgarnesi fyrir nemendur í eldri deild. Hefur stórmeistarinn Helgi Ólafsson annast kennsluna með góðum árangri. Hafa nemendur verið áhugasamir og standa vonir til þess að skákkennsla sé komin til að vera í skólanum. Þeir sem luku tilskyldum árangri hlutu bronsmerki. Á myndunum er Helgi ásamt stórum hluta þeirra nemenda sem voru í skákvalinu.

Myndaalbúm

Suðurlandsmótið í skák hefst á Selfossi kl. 11

Næstkomandi sunnudag hinn 26.maí fer fram Suðurlandsmótið í skák, mótið hefst kl 11:00 og má áætla að því ljúki um kl 16:00.  Teflt verður í Selinu á Selfossi.

Mótið verður með sama sniði og síðasta ár þ.e. 7 atskákir með umhugsunartímanum 20 mín.

Mjög góð verðlaun sem og veitingar í boði, venju samkvæmt!

Öllum er opin þátttaka ein einungis þeir sem lögheimili eiga í Suðurkjördæmi geta orðið Suðurlandsmeistarar.

Þátttökugjald 1500.-kr.

Núverandi Skákmeistari Suðurlands er Ingvar Örn Birgisson.

Hægt er að skrá sig til leiks með athugasemd við samskonar færslu á heimasíðu SSON eða með því að hafa samband við formann SSON:[e-mail]

á myndinni má sjá yfir keppnissalinn á mótinu í fyrra en þá tóku 25 keppendur þátt.  Hér má sjá valinkunna snillinga s.s. Erling Jensson, Ingimund Sigurmundar fremsta, þar fyrir aftan glittir í Erling Atla að tafli við Kjartan Má Másson og Rimskælingurinn knái Jón Trausti er íbygginn meðan Sverrir Unnars er á spekingslegu rölti.

Heimasíða SSON