Skák.is

Bloggfærslur mánaðarins, september 2012

8.9.2012 | 11:25

Sigur á B sveit Svía

Álfhólsskóli vann B sveit Svía í morgun 2.5 - 1.5 og hefur því unnið allar viðureignir sínar í mótinu. Liðid er í 2. sæti á eftir A sveit Svía sem reyndar virðist vera að stinga af á mótinu.

Í þetta sinn var röðin komin að Róbert að gera slæm og óþörf mistök en í gær tóku Dawid og Felix sinn hvorn óþarfa skellinn. (Í þessu sambandi verður reyndar að segjast að það hjálpar ekkert að þurfa að hefja leik kl 7 að morgni að íslenkum tíma). Felix og Agnar unnu sannfærandi en Dawid gerdi jafntefli.

Síðar í dag mætir sveitin hinum knáu köppum Noregs en okkar drengir hyggjast þar sýna frændum okkar í verki að ekki sé skynsamlegt að vera með ágreining við Íslendinga hvort það sem er í skák eða í makríl deilunni :-)

Upplýsingar um framgang mótsins og PGN skrár er að finna á http://www.rockaden.com/skollag-nm-2012-mellanstadiet/

Spil og leikir | Slóð | Facebook | Athugasemdir (0)

8.9.2012 | 11:23

Víkingar lögðu Helli

Undanúrslitin í hraðskákkeppni taflfélaga fóru fram í fyrrakvöld í Betrunarhúsinu í Garðabæ sem er félagsheimili TG. Þar mættust annars vegar TG og Goðinn og hins vegar Hellir og Víkingaklúbburinn. Goðinn vann TG eins og fjallað hefur verið um á skáksíðunni. Í hinni viðureigninni bitu Víkingar í skjaldarrendur strax í upphafi viðureignar en létu hins vegar ógert að öskra ógurlega, kannski af tillitsemi við hina viðureignina sem hófst nokkru fyrr.

Hvað um það þeir sölluðu samt inn vinningum frá upphafi og leiddu í hálfleik með 25,5 v. gegn 10,5 v. Seinni hálfleikur fór eins fram nema að Hellismenn náðu loks að vinna lokaumferðina og laga stöðuna aðeins en viðureignina sjálfa vann Víkingaklúbburinn með 51 v. gegn 21 v. Hellismanna.

Í hraðskákkeppni eins og þessari er það þannig að það getur oft gengið á ýmsu þannig að sumir fá fleiri vinninga en stöðurnar gefa tilefni til en aðrir færri en í það heila jafnast þetta yfirleitt út. Björn, Ólafur, Magnús og Stefán voru bestir Víkinga. Hjá Hellismönnum voru Andri og Sigurbjörn bestir.

Fyrir Víkingaklúbbinn tefldu:

Björn Þorfinnsson 11v af 12
Ólafur B. Þórsson 9v/11
Magnús Örn Úlfarsson 8v/12
Stefán Kristjánsson 7v/8
Stefán Sigurjónsson 4,5v/8
Gunnar Freyr Rúnarsson 4v/6
Þorvarður Ólafsson 3,5v/8
Haraldur Baldursson 2v/3
Lárus Knútsson 1v/2
Jónas Jónasson 1v/2

Fyrir Helli tefldu:

Sigurbjörn Björnsson 5,5v/12
Andri Grétarsson 6/12
Bragi Halldórsson 3v/12
Rúnar Berg 2,5v/8
Baldur A. Kristinsson 2v/11
Helgi Brynjarsson 1,5v/5
Hilmir Freyr Heimisson 0v/5
Ögmundur Kristinsson 0v/7

Spil og leikir | Slóð | Facebook | Athugasemdir (0)

8.9.2012 | 11:12

Rimaskóli heldur áfram sigurgöngunni - finnsku meistararnir lagðir í 3. umferð

Norðurlandamói grunnskólasveita var haldið áfram í borginni Tampere í Finnlandi með 3. umferð á laugardagsmorgni. Skáksveit Rimaskóla mætti sveit Finnlandsmeistaranna frá Espoo. Nansý Davíðsdóttir kom inn í sveitina en 1. borðs maðurinn Dagur Ragnarsson hvíldi. Það var því Oliver Aron sem tefldi á 1. borði og ólíkt honum var taflmennskan ómarkviss og hann lenti í öngstræri með kónginn sinn. Nokkuð óvænt tap staðreynd. Á hinum borðunum vannst örugur sigur og úrslitn því 3 - 1 fyrir Rimaskóla. Norðmenn og Svíar áttust við, liðin sem eru í 2. og 3. sæti. Viðureigninni er ólokið en ekki ólíklegt að hún endi jafnt. Skáksveit Rimaskóla er því áfram með góða forustu á NM grunnskóla og mætir sveit Noregs í 4. umferði en Norðmenn eru í 2. sæti. Það verður ábyggilega ekkert gefið eftir í þeirri viðureign.

Spil og leikir | Slóð | Facebook | Athugasemdir (0)

8.9.2012 | 06:10

NM grunnskólasveita: Finnar sáu aldrei til sólar gegn sveit Rimaskóla

Það tók sigurreifa Rimaskólakrakka frá 1. umferð aðeins tæpa klukkustund að leggja í 2. umferð Finnland II 4 - 0. Finnsku krakkarnir sáu aldrei til sólar í sínum skákum. Enda rignir hjá okkur í Tampere bæði dropum og vinningum. Skáksveit Rimaskóla þau, Dagur, Oliver Aron, Jón Trausti og Hrund, hefur því byrjað glæsilega á NM 2012 og hefur fullt hús vinninga eða átta talsins.

Skákirnar gegn Finnunum voru aldrei flóknar eða í hættu svo mikill virtist getumunurinn á liðunum tveimur. Þegar þetta er ritað eru önnur úrslit úr 2. umferð ekki ljós en líklegt að Noregur verði í 2. sæti að umferðinni lokinni. Rimaskólasveitin teflir við Finnland I í þriðju umferð og alveg ljóst að Nansý kemur inn í sveitina í þeirri umferð. Aðstæður á skákstað eru þröngar og bjóða upp á takmarkaða aðstöðu en vel fer um Íslendingana á Hótel Cumulus í miðri Tampere borg sem er 200.000 manna bær um 200 km frá Helsinki.

Heimasíða mótsins

Spil og leikir | Slóð | Facebook | Athugasemdir (0)

8.9.2012 | 06:06

NM barnaskólasveita: Sigur gegn Dönum

Álfhólsskóli vann Dani 2.5 - 1.5 á Norðurlandamóti barnaskólasveita í gær. Strákarnir eru því komnir með 5 vinninga og eru í 2. sæti eftir fyrsta keppnisdag.

Agnar og Róbert unnu sína andstæðinga en Felix tapaði eftir slæm mistök í Slavneskri vörn. Dawid gerði svo jafntefli eftir æsispennandi hróksendatafl þar sem Dawid var 1 peði undir en náði að jafna leikinn eftir slæm mistök Danans. Virkilega flott hja Dawid enda andstæðingurinn umtalsvert stigahærri (1940).

Í næstu umferð tefla strákarnir svo við B sveit Svía þar sem ekkert annað en sigur kemur til greina.

A sveit Svía er efst eftir 2 umferðir með fullt hús.

Hægt er að fylgjast með stöðu mála á http://www.rockaden.com/resultat/Skollag_NM_2012_mellanstadiet/skol_nm_mellanstadiet_2012.xls

Spil og leikir | Slóð | Facebook | Athugasemdir (0)

8.9.2012 | 06:04

Sigurbjörn í TV

Fidemeistarinn Sigurbjörn Björnsson er genginn til liðs við Taflfélag Vestmannaeyja. Hann hefur undanfarin 10 ár teflt fyrir Helli og þar á undan fyrir SH. Sigurbjörn státar af allmörgum sigrum á skákferli sínum og má þar m.a. nefna að hann varð Skákmeistari Reykjavíkur árið 2007 auk þess sem hefur þrívegis deilt efsta sætinu á sama móti. Sigurbjörn hefur tvívegis unnið Haustmót TR og þrívegis hefur hann hampað sigri á Meistararmóti Hellis. Auk þess varð hann nokkrum sinnum Skákmeistari Hafnarfjarðar. Sigurbjörn náði sínum fyrsta alþjóðlega áfanga fyrir ári síðan á EM Taflfélaga í Slóveníu og fór svo yfir 2400 elóstig í seinni hluta Íslandsmóts Skákfélaga í mars síðastliðnum. Sigurbjörn mun án efa styrkja þétt lið Vestmannaeyinga í komandi deildarkeppni.

Spil og leikir | Slóð | Facebook | Athugasemdir (0)

8.9.2012 | 06:00

Skákæfingar TR hefjast í dag

Áratuga löng hefð er fyrir Laugardagsæfingum Taflfélags Reykjavíkur. Þær hefjast aftur eftir sumarfrí laugardaginn 8. september. Að venju fara æfingarnar fram í húsnæði félagsins að Faxafeni 12.

Á æfingunum eru æfingaskákmót, skákkennsla, skákþrautir ásamt ýmsum öðrum uppákomum. Þá er boðið upp á léttar veitingar um miðbik æfinganna, en sá partur er orðinn órjúfanlegur hluti af æfingunum hjá börnunum. Haldið er utan um mætingu og árangur barnanna og hverri æfingu er gerð góð skil í ítarlegum pistlum.

Á laugardögum kl. 11.30 - 13.30 verður boðið upp á sérstakar skákæfingar fyrir stelpur á öllum aldri. Þessar skákæfingar eru aðallega hugsaðar fyrir byrjendur. Allar stelpur, 5 ára og eldri, eru velkomnar. Allar mömmur, ömmur, frænkur og vinkonur eru sérstaklega velkomnar að taka þátt í skákæfingunum! Skákþjálfari verður Sigurlaug Regína Friðþjófsdóttir, formaður T.R. Við byrjum núna á laugardaginn 8. september!

Á laugardögum kl. 14 -16 verða skákæfingar fyrir börn og unglinga (stelpur og stráka) fædd 1997 og síðar. A-flokkurinn verður eingöngu opinn fyrir þau sem eru félagsmenn í T.R. og er fyrir alla unglinga fædd 1997-1999, svo og yngri börn sem eru lengra komin í skáklistinni. B-flokkurinn er opinn fyrir öll börn sem eru fædd 2000 og síðar.

Flokkarnir munu þó stundum vera saman í einum hópi. Fyrirkomulagið munu skákþjálfarar kynna betur á æfingunum. Skákþjálfarar á Laugardagsæfingunum verða eins og í fyrra Torfi Leósson og Daði Ómarsson, skákmenn í T.R.

Þátttaka á skákæfingunum er ókeypis.

Verið velkomin!

Fyrirspurnir sendist á taflfelag@taflfelag.is

Spil og leikir | Breytt 4.9.2012 kl. 11:13 | Slóð | Facebook | Athugasemdir (0)

7.9.2012 | 19:47

Stórsigrar gegn Lúxemborg og Egyptalandi

Það unnust tveir stórsigrar í 10. og næstsíðustu umferð ólympíuskákmótsins sem fram fór í dag. Liðið í opnum flokki vann 4-0 sigur á Lúxemborg. Hannes Hlífar Stefánsson, Henrik Danielsen, Hjörvar Steinn Grétarsson og Þröstur Þórhallsson unnu. Kvennaliðið vann sveit Úrugvæ 3-1. Lenka Ptácníkóva og Jóhanna Björg Jóhannsdóttir unnu en Hallgerður Helga Þorsteinsdóttir og Tinna Kristín Finnbogadóttir gerðu jafntefli.

Liðið í opnum flokki er opnum flokki er í 55. sæti með 11 stig. Kínverjar, Armenar og Rússar eru efstir með 17 stig.

Kvennaliðið er í 63. sæti með 10 stig. Kínverjar og Rússar eru efstir með 17 stig.

Nánar verður fjallað um stöðu mála á morgun.

156 lið taka þátt í opnum flokki er í íslenska liðið (Ø-2490) talið það 51. sterkasta miðað við meðalstig. Í kvennaflokki eru þátttökuþjóðirnar 125 og er Ísland (Ø-1989) talið það 62. sterkasta.

Spil og leikir | Breytt 8.9.2012 kl. 09:10 | Slóð | Facebook | Athugasemdir (1)

7.9.2012 | 12:07

Beinar útsendingar: Lúxemborg og Egyptaland

Strákarnir tefla í dag við sveit Lúxemborgar. Stelpurnar tefla við sveit frá Egyptalandi. Í báðum tilfellum erum við með sterkari sveit á pappírnum, sérstaklega í opnum flokki. Varamennirnir Dagur Arngrímsson og Elsa María Kristínardóttir hvíla í dag.

Við höfum sex sinnum mætti Lúxemborg og hafa þessar viðureignir unnist fimm sinnum og einu sinni hefur orðið jafntefli. Síðast tefldum við þá við 1980 og vannst sú viðureign 3,5-0,5.

Stelpurnar hafa einni sinni áður mætt Egyptalandi. Það var árið 1982. Þá vannst sigur með fullu húsi, 3-0.

Kínverjar, Rússar, Armenar og Bandaríkjamenn eru efstir 15 stig af 18 mögulegum. Kínverjar eru hæstir á stigum og standa því best að vígi eins og er. Búast má við gífurlega spennandi baráttu í lokaumferðunum. Tíunda og næstsíðasta umferð fer fram í dag og hefst kl. 12. Þá mætast Kínverjar og Bandaríkjamenn. Rússar mæta Argentínumönnum, sem hafa komið mjög á óvart, og Armenar mæta Hollendingum, sem hafa verið á miklu flugi eftir mjög lélega byrjun.

Íslenska liðið í opnum flokki mætir sveit Lúxemborgar en kvennaliðið mætir sveit Egyptalands. Frídagur er á morgun. Lokaumferðin fer fram á sunnudag og hefst klukkan átta.

Kínverjar eru í vænlegri stöðu í kvennaflokki eftir öruggan sigur á Frökkum í gær. Rússar eru í öðru sæti, einu stigi á eftir Kínverjum.

Íslenska liðið hefur níu stig og er í 69. sæti, í fjórða sæti Norðurlandaþjóðanna. Danir eru efstir með 13 stig og í 13. sæti en þeir hafa reyndar verið mjög heppnir með andstæðinga og aðeins mætt veikari andstæðingum. Það breytist í dag þegar þeir mæta Ungverjum, sem hafa á að skipa fjórða sterkasta liðinu miðað við skákstig.

Liðið í kvennaflokki hefur átta stig og er í 76. sæti og er einnig í fjórða sæti Norðurlandaþjóða.

Beinar útsendingar:

Lúxemborg (opinn flokkur)
Egpytaland (kvennaflokkkur)

Spil og leikir | Slóð | Facebook | Athugasemdir (0)

7.9.2012 | 12:05

Fljúgandi start Rimaskóla í Tampere

Liðsmenn Rimaskóla, þau Dagur, Oliver Aron, Jón Trausti og Hrund byrjuðu með trukki á Norðurlandamóti grunnskóla sem hófst í borginni Tampere í Finnlandi í morgun. Líkt og svo oft drógst Rimaskóli á móti sænska meistaraskólanum í 1. umferð en að þessu sinni virðast þessir tveir skólar sterkastir á pappírnum.

Eftir þriggja tíma yfirlegu og óljósar stöður tóku vopnin að snúast Rimaskólakrökkum í hag og á stuttum tíma höfðu þau unnið sigur yfir Svíunum á öllum borðum. Jón Trausti var fyrstur til að ná vinningsstöðu en á sama tíma virtust Oliver Aron og Hrund í óþarfa tímahraki. Dagur var með óhagstæðan skiptamun gegn stigahæsta manni mótsins Egor Norlin (2143) lengst af en vann sigur í lokin og hefndi þar harma sinna frá því á Norræna skólaskákmótinu í Finnlandi í vetur. Fljúgandi start, Rimaskólasveitin hefur tekið forystu og nú er bara að fylgja sigrinum vel eftir. (HÁ)