Stefán Bergsson Skáklistamaður án landamæra númer 1

Skákfélag Vinjar og Skákakademía Reykjavíkur sameinuðust um að halda fyrsta skákmótið í Læk, athvarfi Rauða kross Íslands fyrir fólk með geðraskanir. Lækur er staðsett við Hörðuvelli 1 í Hafnarfirði, við lækinn!

Haukamaðurinn Egill Þórðarson hefur kynnt skákina fyrir gestum athvarfsins  í sjálfboðnu starfi og nokkur spenna var fyrir mótinu en fáir sem voru til í að taka þátt í alvöru móti. Svo fór að sex þátttakendur tefldu, allir við alla, en þær Kristín og Hrönn sátu með og tefldu allan tímann undir handleiðslu Hrafns Jökulssonar sem kom í heimsókn. Þess má geta að Egill færði athvarfinu glæsilega skákklukku við upphaf móts og átti þar stórleik.

Fínasta aðstaða er til skákiðkunar og mótshalds í Læk og það er klárt að þetta var aldeilis ekki síðasta mótið sem þar verður haldið.

Lækjargengið bauð upp á dýrindis kaffiveitingar í hléi sem gaf Stefáni kraft til að klára verkefnið. Hann náði jafntefli gegn Agli en sigraði rest.

Stefán Bergsson var með 4 og hálfan af fimm, Egill Þórðarson með 4, Guðmundur Valdimar Guðmundsson með 3 en þeir Arnar Valgeirsson, Jón Gauti Magnússon og Jón Ólafsson nörtuðu í hælana.

Skáklist án landamæra númer 2 verður í Vin á mánudaginn næsta klukkan 13:00.

Myndaalbúm (HJ)

Þorvarður efstur á öðlingamóti með fullt hús

Þorvarður F. Ólafsson (2175) fer mikinn á skákmóti öðlinga sem fram fer þessa dagana í félagsheimili TR.  Í 4. umferð, sem fram fór í gærkvöldi, vann hann Sigurð Daða Sigfússon (2346) og er efstur með fullt hús.  Bjarni Hjartarson (2038), sem vann Vigni Bjarnason (1828) er annar með 3,5 vinning.  Jóhann H. Ragnarsson (2082), Halldór Pálsson (2000) og Siguringi Sigurjónsson (1944) koma næstir með 3 vinninga.  

Úrslit 4. umferðar má finna í heild sinni hér.   Stöðu mótsins má finna hér. 

Í fimmtu umferð, sem fram fer nk. miðvikudagskvöld mætast meðal annars: Bjarni-Þorvarður,  Siguringi-Jóhann og Magnús Pálmi-Halldór. 

• Heimasíða mótsins 
• Chess-Results

 

Róbert og Andrés sigurvegarar Bikarsyrpu OB.LA.DI. OB.LA.DA.

Hart var barist á úrslitakvöldinu í Bikarsyrpu OB.LA.DI. OB.LA.DA. síðastliðinn mánudag. Róbert Lagerman sigraði í Elítugrúppunni eftir öruggan sigur á Bjarna Hjartarsyni í úrslita-einvígi 3-0, Halldór Pálsson hlaut bronsið eftir 3-1 sigur á Kjartani Guðmundsyni. Gífurleg spenna var í Heiðursmannagrúppunni eða Rusl-grúppunni eins margir kölluðu hana, en á endanum hafði Andrés Kolbeinsson sigur, Jón Birgir Einarsson hlaut silfrið og Kjartan Ingvarsson hlaut bronsið.

Glæsileg verðlaun voru í boði staðarhaldarans Davíð Steingrímssonar.

Fyrirhuguð er Sumar-Skák-Syrpa síðar í sumar.

Oliver Aron byrjar mjög vel á HM áhugamanna

Oliver Aron Jóhannesson (1677) teflir þessa dagana á Heimsmeistaramóti áhugamanna sem fram fer í Porto Carras á Grikklandi.  Eftir 4 umferðir hefur Oliver hlotið 3 vinninga.  Hann hefur lagt að velli tvo mun stigahærri andstæðinga og er í 12.-26. sæti af 147 keppendum.

Úrslit Olivers má nálgast hér.  

Mótið er einungis opið fyrir skákmenn með 2000 skákstig eða minna.  Oliver er nr. 82 í stigaröð keppenda.

• Heimasíða mótsins
• Chess-Results

Skólaskákmót Akureyrar fer fram á laugardag

Skólaskákmót Akureyrar fer fram laugardaginn 21. apríl. Teflt er í tveimur flokkum, yngri flokki 1.-7. bekk og eldri flokki 8.-10. bekk. Hámarksfjöldi er 24 keppendur í hvorum flokki. Í skólum þar sem skólamót hafa farið fram eiga 2 efstu menn í hvorum flokki sjálkrafa keppnisrétt, en fulltrúar annarra skóla eru velkomnir, svo og aðrir áhugasamir keppendur þar til hámarksfjölda er náð.

Mótið hefst kl. 13.00 í skákheimilinu í Íþróttahöllinni. Þeir sem ekki eru þegar skráðir í mótið skulu gera vart við sig á skáksatð ekki síðar en 10 mínútum fyrir upphaf móts.

Umhugsunartími er 7 mínútur á skák og verða tefldar 7 umferðir í hvorum flokki, en fjöldi umferð getur þó ráðist af þátttöku.

Tveir efstu menn í hvorum flokki vinna sér keppnisrétt á kjördæmismóti og keppendur í 3-4. eru þar varamenn.

Suðurlandsmótið í skák fer fram á laugardag

Suðurlandsmótið í skák fer fram á Selfossi næstkomandi laugardag.  Tefldar verða atskákir, 7 umferðir.

Mótið er öllum opið ein einungis þeir sem lögheimili hafa í Suðurkjördæmi geta orðið Suðurlandsmeistarar.

Mótið hefst kl 10:00 og ætla má að því ljúki um kl 17:00

Veitt verða peningaverðlaun og verðlaunagripir fyrir 3 efstu sætin auk þess sem sérstök verðlaun verða í flokki skákmanna með minna 1600 skákstig

Verðlaun:
1. sæti 10.000.-kr
2. sæti 7.500.-kr
3.sæti 5.000.-kr

Besti árangur undir 1600 skákstig 5.000.-kr

Teflt verðu í Selinu á Selfossi.

Þátttökugjald: 1.500.- kr. (kaffi, svaladrykkir og léttar veitingar innifalið)

Sitjandi Suðurlandsmeistari er Björn Ívar Karlsson

Skráðir keppendur 17. apríl:

Páll Leó Jónsson	SSON	2043
Nökkvi Sverrisson	TV	1968
Sverrir Unnarsson	TV	1907
Emil Sigurðarson	SFÍ	1821
Ingimundur Sigurmundsson	SSON	1791
Úlfhéðinn Sigurmundsson	SSON	1770
Ingvar Örn Birgisson	SSON	1767
Erlingur Jensson	SSON	1750
Sigurður H.Jónsson	SR	1746
Grantas Grigoranas	SSON	1729
Kjartan Másson	SAUST	1715
Dagur Kjartansson	SFÍ	1652
Magnus Matthíasson	SSON	1616
Ingibjörg Edda Birgisdóttir	SSON	1564
Gauti Páll Jónsson	TR	1410
Erlingur Atli Pálmarsson	SSON	1405
Þorvaldur Siggason	SSON	1395
Arnar Erlingsson	SSON	0
Michael Starosta	TV	0

 

Heimasíða SSON

Til hamingju, Verzló: Klárasti skólinn í skákinni!

Verzlunarskóli Íslands er Íslandsmeistari framhaldsskóla í skák 2012. Hjörvar Steinn Grétarsson leiddi sveit Verzlunarskólans til sigurs á mjög spennandi Íslandsmóti, þar sem Menntaskólinn í Reykjavík varð í 2. sæti og Menntaskólinn við Hamrahlíð hreppti bronsið.

Aldrei á öldinni hafa fleiri skáksveitir tekið þátt í Íslandsmóti framhaldsskóla.

Sigursveit Verzlunarskólans skipuðu Hjörvar Steinn, Patrekur Maron Magnússon, Jökull Jóhannsson og Alexander Gautason.

Hjörvar Steinn er 19 ára landsliðsmaður í skák, kominn með tvo áfanga af þremur að stórmeistaratitli. Hann er hæfileikaríkasti og efnilegasti skákmaður Íslands, og frábær fyrirmynd sem skákmaður og leiðtogi.

Patrekur Maron hefur á undanförnum árum sýnt að hann er meðal sterkustu skákmanna ungu kynslóðarinnar. Jökull tók nú þátt í sínu fyrsta skákmóti í nokkur ár og sýndi frábæra takta. Hann var lengi virkur innan Fjölnis og óx upp í Rimaskóla. Alexander er margreyndur ungur meistari úr Eyjum og rakaði saman vinningum á 4. borði.

MR-ingar tefldu fram tveimur landsliðskonum í skák, en urðu að játa sig sigraða í æsispennandi kapphlaupi við Versló. Hallgerður Helga Þorsteinsdóttir leiddi sveitina og Mikael Jóhann Karlsson var á 2. borði.

Jóhanna Björg Jóhannsdóttir skipaði 3. borð, en hún á, að öðrum ólöstuðum, mestan þátt í því að Íslandsmót framhaldsskóla 2012 fór fram. Til stóð að fella mótið niður, þar sem ekki er lengur efnt til Norðurlandamóts framhaldsskóla, en Jóhanna Björg sannfærði forystumenn Skáksambandsins um gildi þess að Íslandsmótið yrði haldið áfram.

Guðmundur Kristinn Lee tefldi á 4. borði hjá MR og sópaði saman 7 vinningum í 7 skákum.

Menntaskólinn við Hamrahlíð hlaut 3. verðlaun, undir forystu Daða Ómarssonar.

Borðaverðlaun hlutu:

1. borð: Hjörvar Steinn Grétarsson Verzló 7 vinningar af 7

2. borð: Mikael Jóhann Karlsson MR 7/7

3. borð: Jökull Jóhannsson Verzló 6,5/7

4. borð: Alexander Gautason Verzló 7/7

Í mótslok var verðlaunaafhending. Vinninga og verðlaun gáfu Sena, 12 tónar, Merkt, Bíó Paradís, Uppheimar og Skáksamband Íslands.

Skákakademía Reykjavíkur skipulagði mótið, sem markar upphaf að markvissu starfi innan framhaldsskólanna. Þar er skáklíf víða mjög fjörugt, og framsæknir framhaldsskólar bjóða upp á skák sem valáfanga í námi.

Til hamingju Verzló!

http://chess-results.com/tnr70966.aspx?lan=1

Henrik heldur forystunni á æsispennandi Íslandsmóti í skák: Mikið um óvænt úrslit

Henrik Danielsen heldur forystunni á æsispennandi Íslandsmóti í skák, sem stendur nú sem hæst í Kópavogi. Þegar tefldar hafa verið 6 umferðir af 11 hefur Henrik 4,5 vinning en Þröstur Þórhallsson 4. Þrír meistari koma í humátt á eftir með 3,5 vinning.

Henrik gerði jafntefli gegn Þresti Þórhallssyni í aðeins 16 leikjum í 6. umferð. Þröstur hafði m.a. lagt stórmeistarana Stefán Kristjánsson og Hannes Hlífar Stefánsson, og Henrik vildi því ekki taka neina áhættu.

Stefán Kristjánsson hélt sér í toppbaráttunni með sigri á Guðmundi Kjartanssyni og sama gerði Sigurbjörn Björnsson sem lagði Guðmund Gíslason.

Þá bar til tíðinda þegar Björn Þorfinnsson sigraði Hannes H. Stefánsson, ellefufaldan Íslandsmeistara. Þetta er fyrsti sigur Björns gegn Hannesi í kappskák, en þeir hafa marga hildi háð gegnum tíðina. Þetta var þriðja tapskák Hannesar á mótinu og er hann nú í 7.-10. sæti.

Jafntefli gerðu Bragi og Dagur, og þeir Einar Hjalti og Davíð.

Henrik mætir Sigurbirni Björnssyni í 7. umferð á morgun og býst við ,,blóðugum bardaga" enda sé Sigurbjörn mikill víkingur við skákborðið.

Þröstur mætir Einari Hjalta á morgun og andstæðingar Þrastar í síðustu umferðunum eru flestir í neðri hluta mótsins. Hinn gamalreyndi stórmeistari á því raunhæfa möguleika á að verða Íslandsmeistari í fyrsta sinn.

Staðan:

1. Henrik Danielsen 4,5 vinningar

2. Þröstur Þórhallsson 4

3.-5. Stefán Kristjánsson, Bragi Þorfinnsson, Sigurbjörn Björnsson 3,5

6. Dagur Arngrímsson 3

7.-10. Davíð Kjartansson, Hannes H. Stefánsson, Guðmundur Gíslason og Björn Þorfinnsson 2,5

11.-12. Guðmundur Kjartansson og Einar Hjalti Jensson 2

Á morgun mætast:

Davíð og Björn

Þröstur og Einar Hjalti

Sigurbjörn og Henrik

Guðmundur K. og Guðmundur G.

Dagur og Stefán

Hannes og Bragi

Beinar útsendingar úr 6. umferð má nálgast hér. 

Góð aðstaða er fyrir áhorfendur, en teflt er í Stúkunni á Breiðabliksvellinum í Kópavogi. Jafnframt Íslandsmótinu stendur yfir mikil skákveisla í Kópvogi.

• Heimasíða mótsins
• Chess-Results
• Beinar útsendingar
• Myndir úr 6. umferð (HJ)

Henrik gerði jafntefli við Þröst: Boðar ,,blóðugan bardaga" við Sigurbjörn á morgun

,,Maður verður að spara kraftana," sagði Henrik Danielsen brosleitur í sólinni í Kópavogi eftir að hafa gert jafntefli í aðeins 16 leikjum við Þröst Þórhallsson. Með jafnteflinu heldur Henrik efsta sæti á Íslandsmótinu sem er nú rétt rúmlega hálfnað.

Mótið er æsispennandi og er óhætt að segja að jafntefli Henriks og Þrastar í dag sé fyrsta ,,stórmeistarajafnteflið" á mótinu.

Henrik er með 4,5 vinning eftir 6 umferðir. Hann hefur lagt að velli Guðmund Gíslason, Einar Hjalta Jensson og Björn Þorfinnsson, en gert jafntefli við Stefán Kristjánsson, Davíð Kjartansson og Þröst. Árangur Henriks til þessa jafngildir 2561 skákstigi.

Henrik mætir Sigurbirni Björnssyni í 7. umferð á morgun og býst við ,,blóðugum bardaga" enda sé Sigurbjörn mikill víkingur við skákborðið.

Þröstur hefur nú 4 vinninga af 6 og er taplaus. Hann sigraði stórmeistarana Stefán Kristjánsson og Hannes H. Stefánsson, en hefur gert jafntefli við Dag Arngrímsson, Guðmund Kjartansson, Braga Þorfinnsson og Henrik. Árangur hans jafngildir 2569 skákstigum.

Þröstur mætir Einar Hjalta á morgun og andstæðingar hans í síðustu umferðunum eru flestir í neðri hluta mótsins. Hinn gamalreyndi stórmeistari á því raunhæfa möguleika á að verða Íslandsmeistari í fyrsta sinn.

Enn er hart barist í öðrum skákum og nokkrar flugeldasýningar í boði hér í Stúkunni í Kópavogi.

Beinar útsendingar úr 6. umferð má nálgast hér.

• Heimasíða mótsins
• Chess-Results
• Beinar útsendingar
• Myndir úr 6. umferð (HJ)

Spenna á Íslandsmótinu: Hvað gerir Þröstur gegn Henrik?

Sjötta umferð Íslandsmótsins í skák hófst nú klukkan 16 í Stúkunni á Kópavogsvelli. Mjög spennandi skákir eru í uppsiglingu. Efstu menn glíma, og má búast má við að Þröstur Þórhallsson geri harða hríð að Henrik með svörtu. Þröstur teflir byrjun sem Henrik hefur skrifað heila bók um, svo hann hlýtur að luma á einhverju trompi.

Sigri Henrik í dag verður hann með a.m.k. vinningsforskot eftir 6 umferðir. Bragi Þorfinnsson og Dagur Arngrímsson tefla skák, sem gæti skorið úr um hvor kemst í baráttuna í efri hlutanum í seinni hluta mótsins.

Stórmeistararnir Stefán Kristjánsson og Hannes H. Stefánsson hafa ekki ennþá náð sér á strik. Hannes hefur svart gegn Birni Þorfinnssyni, en Stefán stýrir hvítu mönnunum gegn Guðmundi Kristjánssyni.

Þá má búast við mikilli baráttuskák hjá Guðmundi Gíslasyni og Sigurbirni Björnssyni, en báðir hafa 2,5 vinning. Einar Hjalti Jensson hefur svo hvítt gegn Davíð Kjartanssyni, en báðir hafa náð athyglisverðum úrslitum, þrátt fyrir að vera í neðri hluta mótsins eftir fyrri helming.

Kjöraðstæður eru hér í Stúkunni á Kópavogsvelli og líflegar umræður um stöðuna í skákunum. Flestum ber saman um að Íslandsmótið núna, sé meira spennandi en í áraraðir. Mikið hefur verið um óvænt úrslit og hart barist í hverri einustu skák.

Beinar útsendingar úr 6. umferð má nálgast hér.

• Heimasíða mótsins
• Chess-Results
• Beinar útsendingar
• Myndir úr 6. umferð (HJ)