Suðurlandsmótið í skák fer fram á morgun

Suðurlandsmótið í skák fer fram í Selinu á Selfossi á morgun.  Tefldar verða atskákir, 7 umferðir.  Mótið er öllum opið en einungis þeir sem lögheimili hafa í Suðurkjördæmi geta orðið Suðurlandsmeistarar.  Mótið hefst kl 10:00 og ætla má að því ljúki um kl 17:00

Veitt verða peningaverðlaun og verðlaunagripir fyrir 3 efstu sætin auk verðlauna í flokki skákmanna undir 1600 sem og verðlaun fyrir bestan árangur miðað við skákstig (rating performance)

Verðlaun:

• 1. sæti 10.000.-kr
• 2. sæti 7.500.-kr
• 3.sæti 5.000.-kr
• U 1600 skákstig 5.000.-kr
• Besti árangur miðað við stig 5.000.-kr

Þátttökugjald: 1.500.- kr. (kaffi, gos og léttar veitingar innifalið)

Nánari upplýsingar: http://sudurskak.blog.is/blog/sudurskak/

Æsispennandi kynslóðakeppni í Kópavogi

Í gær fór fram æsispennandi kynslóðakeppni í Stúkunni á Kópavogsvelli.  Keppnin var á milli skákmanna úr hinum sáluga Taflfélagi Kópavogs gegn ungum og upprennandi skákmönnum úr Kópavogi.   Fljótlega virtust sem hinir "öldnu" ætlaðu að hafa auðveldan sigur, enda mjög vanir hraðskákmenn en hinir ungu meira fyrir lengri skákir.   Hinir eldri leiddu með 6 vinningum í hálfleik. 

En þegar leið á viðureignina fóru hinir yngri heldur betur í gang.  Unnu hverja viðureignina á fætur annarri og þegar upp var staðið fóru leikar þannig að hinir eldri unnu sigur með minnsta mun 36,5-35,5.  Einum úr eldri liðinu var að orði:  "Þessi keppni hefði ekki mátt fara mikið síðar fram"

Hlíðar Þór Hreinsson var bestur eldri skákmannanna en hann hlaut 9 vinninga í 12 skákum, Haraldur Baldursson fékk 8 vinninga og Hafliði Þórsson 7 vinninga.  Atli Aðalsteinsson, Sigurður E. Kristjánsson og Sigurjón Haraldsson voru einnig í liði TK.

Hjá hinum yngri fékk Vignir Vatnar Stefánsson flesta vinninga eða 9.  Birkir Karl Sigurðsson fékk 8 vinninga og Hilmir Freyr Heimisson 7 vinninga.  Dawid Kolka, Felix Steinþórsson og Hildur Berglind Jóhannsdóttir voru einnig í yngra liðinu.

Að lokinni viðureign fengu allir keppendur Tímaritið Skák að gjöf frá Skáksamband Íslands og var vel klappað fyrir liðunum.  Það er ljóst að framtíð Kópavogs er björt á skáksviðinu.

Myndaablúm (ÁHS)

Sundlaugarmótið í Breiðholtslaug - á Sumardaginn fyrsta

Margt er um að vera og sér til gamans gert til að fagna sumri. Sjá mátti dæmi þess um alla borg á sumardaginn fyrsta þar sem fólk kom saman til að viðra sig og sjá aðra.  Sumir spruttu úr spori í víðavangshlaupi en aðrir létu sér nægja að taka þátt í skrúðgöngum eða fengu sér ís í góða veðrinu, enda dagur barna á öllum aldri.

Í Breiðholtslaug var annað upp í teningnum. Skákakademína Reykjavíkur með Stefán Bergsson, framkvæmdastjóra í broddi fylkingar ásamt Hrafni Jökulssyni, hirðljósmyndara, var mætt á vatnasvæði laugarinnar færandi hendi ásamt vaskri sveit skákgarpa af eldri kynslóðinni.

Minnstu munaði að Lúðrasveit verkalýðsins væri mætt og blési í herlúðra, slíkur var fögnuðurinn, en það verður að bíða 1. maí. 

Vígsla sjálffljótandi sundlaugarskáksetts var í uppsiglingu en  sams konar afþreygingarbúnaður hafði áður verið settur upp í Laugardalslaug, Grafarvogslaug  og víðar, nú nýlega í  Salalaug í Kópavogi og meira segja út í  Grímsey. Jafnframt stóð fyrir dyrum að halda áskorendamót í skák þar sem Bjarni Hjartarson, Breiðhyltingur, hafði skorað á Magnús V. Pétursson, milliríkjadómara, Fremristekk, í einvígi í sundlaugardskák, að dæmi  þeirra Bobby Fischers og Larry Evans, sællar minningar í Laugardalslaug 1972.

Þegar menn höfðu hreiðrað um sig í heita pottinum var ekki til seturnar boðið.  Einar S. Einarsson (IA) fenginn til þess að leika fyrsta leikinn eftir að hafa látið keppendurdraga um liti í tveimur þrepum, svo ekki vaknaði grunur um samráð eða brot á samkeppnislögum.  Allmargir sundlaugargestir höfðu safnast að ásamt sundlaugarvörðum, sem fögnuðu þessari tilbreytni og menningarauka mjög.

Að velheppnuðum fyrsta leik loknum klöppuðu laugargestir Skákakademíunni lof í lófa.  Leikar fóru svo að Bjarni hafði sigur í báðum einvígisskákunum, þrátt fyrir glæsileg tilburði Magnúsar, sem teldi fyrir áhorfendur og til að hafa gaman af.  Var Maggi Pé að vonum hálfsvekktur yfir útkomunni, hafði ekki fyllilega áttað sig á að Bjarni kynni svo mikið fyrir sér í skák, eins og kom á daginn. Keppendur skildust þó sáttir að kalla, hugsuðu báðir gott til glóðarinnar að hittast aftur fljótlega og taka fleiri rimmur í heitapotti Breiðholtslaugarinnar enda fastagestir þar og skáksetið komið til að vera. 

Í framhaldi af þessu upphófst kappaslagur af vestfirskum sið, þar sem sigurvegarinn situr kyrr og hefur svart.   Synti þá fyrstur fram til tafls Sæbjörn Larsen, sem borið hafði sigur úr bítum fyrr í vikunni í hópi Æsa í Ásgarði. Brutust þá út mikil átök á skákbrettinu með stórum ágjöfum og skvettum. Mátti lengi vart milli sjá hvor stæði betur eða verr, ekki fyrr "sjóriðu" varð vart í liði Bjarna á drottningarvæng, sem Sæsi nýtti sér til sigurs um síðir.

 Var þá komið að "Viðeyjarundrinu" hinum sigursæla KR-ingi og fyrrum hárprúða riddara Guðfinni R. Kjartanssyni að etja kappi gegn Sæbirni Bolvíkingakappa.  Öllum til undrunar og mest honum sjálfum missté Gussi sig illilega í byrjuninni svo biskup hrökk fyrir borð í atganginum.  Að hætti sannra bardagakappa lét hann sér fátt um finnast og kvaðst hvergi láta sér bregða - hvorki við sár né bana og blés í þess stað til sóknaraðgerða með fléttuívafi og blandaðri tækni.   Fór svo að hann að lokum að  vann skákina óvænt og með nokkrum tilþrifum er  enduruppvakin drottning hans fór á stjá og þrengdi óþrymilega að kóngi andstæðingsins, sem hann mátti sig vart hræra öðruvísi en að verða mát.  Gaf Sæsi þá skákina með þungum ekka.

Að lokum tefldu þeir Einar Ess og Maggi Pé eina skák fyrir áhorfendur um áskorunaréttinn á næsta fórnarlamb, þar sem Einar bar glæstan sigur úr bítum.  Hann tefldi síðan við “ókunna skákmanninn” í heita pottinum og slapp með skrekkinn með jafntefli, eftir að hafa verið pattaður.

Hið lofsverða framtak Skákakademíunnar að  gefa fljótandi skáksett í hverja sundlaugina á fætur annarri er mikill fengur fyrir skákunnendur og í raun alla sundlaugagesti  – jafnt innlenda sem útlenda, sem sést hafa taka sundskák undir beru lofti í mögnuðu ylvolgu umhverfi.

Mynddalbúm (HJ og ESE)

Héraðsmót HSÞ fer fram í dag

Hérðasmót HSÞ í skák verður haldið föstudagskvöldið 20. apríl í Litlulaugaskóla í Reykjadal og hefst það kl 20:00.  Tefldar verða 7 umferðir eftir monrad-kerfi og verða tímamörkin 10 mín á mann, auk 5 sek viðbótartíma fyrir hvern leik.  Verðlaun verða veitt fyrir þrjá efstu auk farandbikars fyrir sigurvegarann.

Keppnisgjald er 500 krónur 

Skráning í mótið er hjá formanni í síma 4643187  8213187 eða á [e-mail]

Hart barist á Íslandsmótinu: Þröstur fylgir Henrik eins og skugginn

Henrik Danielsen er sem fyrr efstur á Íslandsmótinu í skák.  Í sjöundu umferð, sem fram fór í Stúkunni á Kópavogsvelli í kvöld, vann hann Sigurbjörn Björnsson. 

Ekki eitt einasta jafntefli var samið í sjöundu umferðinni, og er það til marks um þá keppnishörku, fjör og óvæntu úrslit sem einkenna Íslandsmótið.

 Helsti keppinautur Henriks um Íslandsmeistaratitilinn, Þröstur Þórhallsson sigraði Einar Hjalta Jensson í lengstu skák umferðarinnar, og fylgir Henrik eins og skugginn.

Bragi Þorfinnsson er nú kominn í 3. sæti, eftir sigur á Hannesi H. Stefánssyni, sem verið hefur heillum horfinn á mótinu.

Dagur Arngrímsson vann Stefán Kristjánsson í skák umferðarinnar sem var skoðuð fram og aftur í skákskýringarsalnum af meisturum eins og Helga Ólafssyni, Hjörvari Steini Grétarssyni og Jóhanni Hjartarsyni og var það mat manna að Dagur hafa teflt skákina nánast óaðfinnanlega.  

Dagur er nú í 4. sæti og gæti blandað sér í baráttuna um Íslandsmeistaratitilinn á lokasprettinum.

Átökin verða án efa hörð í þeim fjórum umferðum sem eftir eru.  

Úrslit 7. umferðar:

• Sigurbjörn Björnsson (3,5) - Henrik Danielsen (4,5) 0-1
• Þröstur Þórhallsson (4,0) - Einar Hjalti Jensson (2,0) 1-0
• Dagur Arngrímsson (3,0) - Stefán Kristjánsson (3,5) 1-0
• Hannes Hlífar Stefánsson (2,5) - Bragi Þorfinnsson (3,5) 0-1
• Davíð Kjartansson (2,5) - Björn Þorfinnsson (2,5) 1-0
• Guðmundur Kjartansson (2,0) - Guðmundur Gíslason (2,5) 1-0

Staðan:

• 1. SM Henrik Danielsen (2504) 5,5 v.
• 2. SM Þröstur Þórhallsson (2398) 5 v.
• 3. AM Bragi Þorfinnsson (2421) 4,5 v.
• 4. AM Dagur Arngrímsson (2361) 4 v.
• 5.-7. FM Sigurbjörn Björnsson (2393), SM Stefán Kristjánsson (2500) og FM Davíð Kjartansson (2305) 3,5 v.
• 8. AM Guðmundur Kjartansson (2357) 3 v.
• 9.-11. SM Hannes Hlífar Stefánsson (2531), Guðmundur Gíslason (2346) og Björn Þorfinnsson (2416) 2,5 v.
• 12. Einar Hjalti Jensson (2245) 2 v.

Áttunda umferð fer fram á morgun og hefst kl. 16.  Þá mætast:

• Henrik Danielsen (5,5) - Guðmundur Kjartansson (3,0)
• Davíð Kjartansson (3,5) - Þröstur Þórhallsson (5,0)
• Björn Þorfinnsson (2,5) - Bragi Þorfinnsson (4,5)
• Guðmundur Gíslason (2,5) - Dagur Arngrímsson (4,0)
• Stefán Kristjánsson (3,5) - Hannes Hlífar Stefánsson (2,5)
• Einar Hjalti Jensson (2,0) - Sigurbjörn Björnsson (3,5)

Beinar útsendingar úr 8. umferð má nálgast hér. 

Góð aðstaða er fyrir áhorfendur, en teflt er í Stúkunni á Breiðabliksvellinum í Kópavogi. Jafnframt Íslandsmótinu stendur yfir mikil skákveisla í Kópvogi.

• Heimasíða mótsins
• Chess-Results
• Beinar útsendingar
• Myndir úr 6. umferð (HJ)

Oliver vann í fimmtu umferð og er í 5.-16. sæti

Oliver Aron Jóhannesson (1677) vann Grikkjann Savvas Manelidis (1915) í 5. umferð HM áhugamanna sem fram fer í Porto Carras í Grikklandi.   Oliver er í 5.-16. sæti með 4 vinninga. 

Í sjöttu umferð, sem fram fer í fyrramálið, teflir Oliver við Grikkjann Ioannis Minas (1930).

Úrslit Olivers má nálgast hér.  

Mótið er einungis opið fyrir skákmenn með 2000 skákstig eða minna.  Oliver er nr. 82 í stigaröð keppenda.

• Heimasíða mótsins
• Chess-Results

Íslandsmótið í skák: Sjöunda umferð hefst kl. 16 - Hjörvar með skákskýringar

Sjöunda umferð Íslandsmótsins í skák hefst kl. 16 í Stúkunni á Kópavogsvelli.   Henrik Danielsen, sem er efstur með 4,5 vinning, teflir við Sigurbjörn Björnsson, sem er í 3.-5. sæti með 3,5 vinning.  Þröstur Þórhallsson sem er annar með 4 vinninga mætir Einar Hjalta Jenssyni.   Stefán Kristjánsson og Bragi Þorfinnsson, sem hafa 3,5 vinning, mæta Degi Arngrímssyni og Hannesi Hlífar Stefánssyni.   Hjörvar Steinn Grétarsson hefur boðað koma sína á skákstað og verður með skákskýringar um kl. 18.  

Viðureignir dagsins:

• Sigurbjörn Björnsson (3,5) - Henrik Danielsen (4,5)
• Þröstur Þórhallsson (4,0) - Einar Hjalti Jensson (2,0)
• Dagur Arngrímsson (3,0) - Stefán Kristjánsson (3,5)
• Hannes Hlífar Stefánsson (2,5) - Bragi Þorfinnsson (3,5)
• Davíð Kjartansson (2,5) - Björn Þorfinnsson (2,5)
• Guðmundur Kjartansson (2,0) - Guðmundur Gíslason (2,5)

Beinar útsendingar úr 7. umferð má nálgast hér.

• Heimasíða mótsins
• Chess-Results
• Beinar útsendingar
• Myndaalbúm mótsins (HJ)

Kópavogskeppni kynslóðanna fer fram í kvöld í Stúkunni

Í kvöld fer fram keppni á milli "eldri skákmanna" úr Taflfélagi Kópavogs og ungra og efnilegra skákmanna úr Kópavogi.  Teflt verður á 4-6 borðum, allir við alla.  Í liði TK verða kempur eins og Haraldur Baldursson, Hlíðar Þór Hreinsson og Sigurður E. Kristjánsson en í liði ungra Kópavogsbúa verða ungir og efnilegir úr t.d. skólasveitum Sala- og Álfhólfsskóla og má þar nefna Vigni Vatnar, Hilmi Frey og Dawid Kolka.   Viðureignin hefst kl. 20.  Tilvalið fyrir skákáhugamenn að mæta á landsliðsflokk og horfa svo á kynslóðakeppnina í kjölfarið!

 

 

 

Ný fundargerð stjórnar SÍ

Fundargerðir stjórnar SÍ eru aðgengilegar á vef sambandsins, http://skaksamband.is/?c=webpage&id=185&lid=294&option=links.

Fundargerð stjórnarinnar frá 3. apríl er nú aðgengileg.  Þar var m.a. rætt um N1 Reykjavíkurskákmótið, Íslandsmótið í skák, sölu á munum úr einvígi aldarinnar, Landsmótið í skólaskák, styrkjamál, Tímaritið Skák, aðalfund SÍ og erindi Arnalds Loftssonar varðandi Íslandmót barnaskólasveita.

Fundargerðina sjálfa má nálgast hér:  http://skaksamband.is/assets/12y.stjornarfundur3april2012.doc (word-skjal opnast)

 

Aðalfundur SÍ fer fram 19. maí - fundarboð

Til aðildarfélaga Skáksambands Íslands

 

Reykjavík, 18. apríl 2012     

 

FUNDARBOÐ

 

Stjórn Skáksambands Íslands boðar hér með til aðalfundar Skáksambandsins í samræmi við 8. gr. laga S.Í.

Fundurinn verður haldinn laugardaginn 19. maí nk. kl. 10.00 fyrir hádegi í Faxafeni 12, Reykjavík.

Dagskrá:  Venjuleg aðalfundarstörf.

Stjórn Skáksambandsins sendir ennfremur með fundarboðinu gögn varðandi skrá yfir fullgilda félagsmenn aðildarfélaga S.Í.  Stjórnir aðildarfélaganna eru vinsamlegast beðnar að útfylla skrár þessar vandlega og senda þær Skáksambandi Íslands í pósth. 8354, 128 Reykjavík eða á netfang [e-mail] fyrir 5. maí  2012.

Bréf þetta er sent ásamt gögnum í samræmi við 9. gr. laga S.Í., en sú grein hljóðar svo:

Við atkvæðagreiðslu á aðalfundi á hvert félag eitt atkvæði enda hafi það a.m.k. 10 félagsmenn með lögheimili á Íslandi í Keppendaskrá Skáksambandsins tveim vikum fyrir aðalfund.  Eitt atkvæði bætist við hjá félagi fyrir hverja sveit sem það sendir í Íslandsmót skákfélaga það árið. Við atkvæðagreiðslu um kjörbréf í upphafi fundar skal gilda sú regla, að hvert félag fari ekki með fleiri atkvæði en það hafði á aðalfundi árið áður.  Enginn fulltrúi getur farið með meira en eitt atkvæði á fundinum.  Við atkvæðagreiðslur á aðalfundi ræður einfaldur meirihluti atkvæða, nema um þau mál sem sérstaklega eru tilgreind í þessum lögum.

Einnig skal bent á 6. grein:

Standi aðildarfélag í gjaldfallinni skuld við sambandið hefur það ekki rétt til að eiga fulltrúa á aðalfundi.  Skákdeildir í félögum geta átt aðild að sambandinu, enda hafi þá minnst 10 menn bundist slíkum samtökum.  Heimilt er tveimur eða fleiri aðildarfélögum í sama landshluta að stofna með sér svæðissamband.

Taflfélögunum gefst kostur á að birta stutta skýrslu um starfsemi sína á síðasta starfsári í árrsskýrslu Skáksambands Íslands.  Hafi félögin áhuga á þessu þarf efni að hafa borist skrifstofu S.Í. í síðasta lagi 5. maí nk.

Hjálagt:  Lagabreytingatillögur.

 

                                                                        Virðingarfyllst,

                                                                        SKÁKSAMBAND ÍSLANDS

Skrár tengdar þessari bloggfærslu:

• lagabreytingatillogur_fry_halldori_gretari_einarssyni.docx