Oliver Aron skákmeistari Rimaskóla

Það voru 67 öflugir skákkrakkar í Rimaskóla sem mættu til leiks á Skákmót Rimaskóla 2012. Nýtt nafn var skráð á bikarinn því það var hinn efnilegi ungmennalandsliðsmaður Oliver Aron Jóhannesson 8-ILK sem sigraði með 6,5 vinninga af 7 mögulegum. Oliver Aron vann félaga sinn í ungmennalandsliði Íslands, Dag Ragnarsson, í hreinni úrslitaskák í lokaumferð mótsins. Oliver Aron var sá eini sem komst taplaus frá mótinu

Keppnin var gífurlega jöfn og hörð einkum um 20 efstu sætin sem gáfu í verðlaun pítsu eða bíómiða eftir vali. Á svona gríðarsterku skólamóti vakti framganga stúlknanna mikla athygli og þrjár þeirra lentu í sex efstu sætunum. Svandís Rós varð stúlknameistari Rimaskóla og átti gríðarlega gott mót og vann alla nema Hrund.

Í sjö efstu sætunum urðu Íslandsmeistarar skólans í barna-og grunnskólaflokki og eru þessir krakkar allir að skáka hver öðrum í getu þrátt fyrir talsverðan aldursmun.Enginn skóli virðist hafa átt slíka breidd skákmeistara fyrr nema ef vera skyldi MH á árum áður.

Skákmótið var eins og aðrir viðburðir fimmtudagsins 26. jan haldið á Skákdegi Íslands. Framundan eru skólaskákmótin og alveg ljóst að Rimaskóli mun senda til leiks sigurstranglegar skáksveitir. Á þetta rynir í byrjun febrúar þegar óárennileg stúlknasveit skólans ver Íslandsmeistaratitil grunnskóla í stúlknaflokki.

Efstu 20 sætin á Skákmóti Rimaskóla urðu þessi:

Oliver Aron Jóhannesson        6,5 vinninga   

Dagur Ragnarsson                 6     

Svandís Rós Ríkharðsdóttir     

Jón Trausti Harðarson 

Hrund Hauksdóttir                  5,5

Nansý Davíðsdóttir                 5

Kristófer Jóel Jóhannesson     

Axel Hreinn Hilmisson

Tristan Ingi Ragnarsson

Joshua Davíðsson

Heiðrún Anna Hauksdóttir

Kristófer Halldór Kjartansson

Mikolaf Oskar

Hafþór Andri Helgason            4,5

Theodór I.R.Rocka

Áslaug Ingileif Halldórsdóttir

Tinna Sif Aðalsteinsdóttir

Jóhann Þór Finnsson              4

Davíð Thor Morgan

 

Héðinn mátaði Máta á Skákdaginn

Mátar létu ekki sitt eftir liggja á skákdaginn og tefldu í Garðabænum í húsakynnum Rauða krossins við Garðatorg. Nokkur eftirvænting var meðal Máta um margboðaðan leynigest. Sá reyndist á endanum enginn annar en Héðinn Steingrímsson Íslandsmeistari í skák. Eftir stutta kynningu var Héðni boðið að vera með í hraðskákmóti sem hann þáði og sýndi Mátum hvar Davíð keypti ölið. Hann vann allar skákirnar. Næstir komu Arnar Þorsteinsson og Þórleifur Karlsson.

Eftir hraðskákina sýndi Héðinn Mátum hvernig Þjóðverjar urðu Evrópumeistarar á síðasta ári með því að beita franskri vörn. Með þessu sporðrenndu viðstaddir franskri súkkulaðiköku með rjóma.

Þá var skákdagurinn á enda og Mátar stigu sáttir út í svarthvíta nóttina.

Mynd:Þórleifur Karlsson, Arngrímur Gunnhallsson, Tómas Hermannsson, Jón Árni Jónsson, Daði Guðmundsson, Arnar Þorsteinsson og Héðinn Steingrímsson.

Gallerý Skák: Kappteflið um Friðrikskónginn

Fyrsta umferð í nýrri 4 kvölda Grand Prix mótaröð um „Taflkóng Friðriks" á vegum Gallerý Skákar var teflt í gær, á Skákdeginum, afmælisdegi meistarans, 26. janúar. Friðrik Ólafsson stórmeistari kom í heimsókn, heilsaði á keppendur og löggilti hinn sögulega farandgrip, með áritun sinni.

Sautján keppendur á aldrinum 8 ára til 77 ára voru mættir til tafls en þó flestir vel komnir til ára sinna án þess þó að geta talist aldurhnignir.  Enda sýndi það sig að taflmennskan var einkar góð og vönduð með listrænu ívafi eins og hæfir gamalreyndum kempum og listasmiðjunni, vettvangi mótsins.

Staðarhaldarinn Guðfinnur R. Kjartansson, hristi flesta snilldartakta fram úr erminni og vann mótið með 9 vinningum af 11 mögulegum, sumsé nokkuð örugglega.  Hinir eitilhörðu skákmenn, þeir Bjarni Hjartarson og Gunnar Skarphéðinsson urðu jafnir í 2.-3. sæti með 7.5 v., með þrjá og hálfan niður. Síðan komu tveir Kristnar með 7 vinninga en eftir það munaði aðeins 1/2 vinningi á 6. -17. manni, sem sýnir hvað keppnin var hörð og engan vinning hægt að bóka fyrirfram frekar en fyrri daginn.

Efsta sætið gaf 10 Grand Prix stig í keppninni og það næst 8, síðan 6 o.s.frv. sem menn taka með sér í næstu umferð að viku liðinni.   

Sjá meðf. mótstöflu og nánar á www.galleryskak.net.

Myndaalbúm (ESE)

 

 

Hjörvar fór illa með þjóðina

Skák Hjörvars við þjóðina fór vel af stað og 15-20 fulltrúar þjóðarinnar greiddu að jafnaði atkvæði um hvern þeirra þriggja leikja sem voru í boði á korters fresti.  Hjörvar beitti enska leiknum og til að byrja með fylgdi skákin hefðbundnum leiðum. En í 9. og 10. leik lék þjóðin tveim slæmum leikjum og notfærði Hjörvar sér það til að fá unna stöðu.

Eftirfarandi póstur kom frá einum þjóðar-liðanum á þeim tímapunkti:  "Hvaða vitleysingjar eru að leika e4??" "Nenni þessu ekki lengur, hvítur kominn með mun betra"

Í 22.leik þegar Hjörvar var orðinn heilum manni yfir, bauð hann þjóðinni kurteisisjafntefli. Sjö samþykktu boðið, tveir neituðu og fjórir vildu gefast upp.  Skákinni lauk því með jafntefli.

Skákina má sjá á: http://live.chess.is/2012/skakdagurinn/tfd.htm

Róbert efstur á Haítí

Methúsalem vert á Cafe Haítí hefur fagnað mjög þeirri skákvæðingu sem hefur átt sér stað á staðnum undanfarnar vikur. Skákakademía Reykjavíkur færði staðnum töfl og klukkur og fara þar nú fram einkatímar ungmenna jafnt sem skákmót fyrir sókndjarfa kaffihúsakákmenn.

Einn slíkur, Róbert Lagerman, fór með sigur úr býtum á Skákmóti Haítí sem fór fram á Skákdaginn. Þrettán keppendur mættu til leiks og eftir stigaútreikning úrskurðaði Róbert sjálfan sig sigurvegara mótsins en hann var jafnframt skákstjóri. Í næstu sætum voru Björn Ívar Karlsson og Tómas Björnsson en alls tefldu 13 vaskir piltar á mótinu.

Aronian efstur þrátt fyrir tap gegn Navara - Carlsen vann Topalov í ótrúlegri skák

Það gekk á miklu í 11. umferð Tata Steel-mótsins sem fram fór í Wijk aan Zee í dag.  Efsti maður mótsins Aronian (2805) tapaði fyrir þeim neðsta, Navara (2712) en er efstur engu að síður.  Radjabov (2773) og Carlsen (2835) eru hálfum vinningi á eftir þeim armenska.  Carlsen (2835) vann Topalov (2770) eftir að hafa haft koltapað tafl um tíma.  Caruana (2736) og Ivanchuk (2766) eru í 4.-5. sæti hálfum vinningi þar á eftir.  

Í 12. og næstsíðustu umferð, sem fram fer á morgun, mætast m.a.: Carlsen-Kamsky, Gelfand-Aronian og Reykjavíkurmótsmennirnir Navara-Caruana.

• Heimasíða mótsins
• Beinar útsendingar (hefjast kl. 12:30 nema lokumaferðin kl. 11 - frídagar (18., 23. og 26. janúar)
  
• ChessBomb

Bergsteinn skákmeistari Landsbankans

Í gær, á Skákdaginn, fór fram Skákmeistari Landsbankans.  Teflt var í höfuðstöðvum bankans og tóku 9 skákmenn þátt í mót.  Hart var barist um sigurinn en svo fór að lokum að Bergsteinn Ólafur Einarsson sigraði á mótinu með fullu húsi.  Það fór vel á því enda á Bergsteinn afmæli 26. janúar, á skákdaginn sjálfan, rétt eins og Friðrik Ólafsson sjálfur.   

Gunnar Björnsson varð annar, Ólafur Kjartansson þriðji, Ingimundur Sigurmundsson fjórði og Friðrik Helgason fimmti.  

Þrír efstu keppendur fengu bók hjá Sigurbirni bóksala í verðlaun.  Einnig voru tveir heppnir keppendur dregnir út og voru það Friðrik og Stefán H. Jónsson.

Stefán Bergsson, framkvæmdastjóri Skákakademíu Reykjavíkur heiðraði samkomuna og lék fyrsta leik mótsins fyrir afmælisbarnið í skák hans gegn Ingimundi. 

 

Teflt á Vinnumálastofnun á Skákdaginn

Frá Árna Steinari Stefánssyni á Vinnumálastofnun:

Í tilefni Skákdagsins, sem er haldinn hátíðlegur um allt land í gær, hefur Skákakademía Reykjavíkur gefið stofnuninni taflsett að gjöf. Gissur og Sverrir vígðu settið nú rétt áðan og lauk rimmunni með jafntefli. Sverrir kom forstjóranum algjörlega í opna skjöldu í byrjun með því að beita Scheveningen-afbrigði Sileyjarvarnarinnar, en Gissur lét það þó ekki slá sig út af laginu og náði jafntefli með því að siga Averbakh-afbrigðinu á Sverri undir það síðasta.

Guðmundur vann í dag og í gær

Guðmundur Gíslason (2332) vann sínar skákir í 3. og 4. umferð Gíbraltar mótsins sem fram fóru í gær og í dag.  Í gær vann hann Ítalann Salvatore Marano (1967) og í dag lagði hann Spánverjann Francois Weber (2155).  Guðmundur hefur 2 vinninga.  Í fimmtu umferð, sem fram fer á morgun, teflir hann við Svisslendinginn Camille De Seroux (2076).

Alls taka 256 skákmenn þátt í þessa sterka móti frá 58 löndum.  Þar af eru 56 stórmeistarar og 11 þeirra með með meira en 2700 skákstig.

• Heimasíða mótsins
• Chess-Restults
• Beinar útsendingar (12 efstu borðin)

 

 

Íslenski Skákdagurinn haldinn hátíðlegur hjá Goðanum

Í gærkvöld var skákfélagið Goðinn með opið hús í tilefni af Íslenska skákdeginum sem haldinn var hátíðlegur um allt land í gær. Opna húsið hófst kl 20.30 og lögðu þó nokkrir gestir leið sýna í félagsaðstöðu Goðans í Framsýnarsalnum á Húsavík. Goðinn bauð upp á myndasýningu af starfi félagsins undanfarin á og vor meðal annars sýndar myndir frá því þegar Boris Spassky heimsótti Húsavík árið 1978 og tefldi fjöltefli í troðfullum salnum á Hótel Húsavík.

3. umferð Gestamóts Goðans var svo tefld í suð-vestur goðorði Goðans á sama tíma.

 
Svavar Pálsson sýslumaður Þingeyinga og Sigurgeir Stefánsson sýndu fína takta.

Einnig gátu gestir á íslenska skákdeginu teflt við félagsmenn Goðans og nýttu margir sé það. Goðinn bauð uppá kaffi, djús og kanilsnúða sem formaður hafði bakað í tilefni dagsins.

 
Jóhanna Kristjánsdóttir formaður HSÞ tefldi við Heimi Bessason í gærkvöld.

Trausti Aðalsteinsson bæjarfulltrúi (VG) Norðurþings að tafli við Heimi Bessa