Jón efstur á atskákmóti Sauðárkróks

Atskákmót Sauðárkróks 2012 hófst í kvöld á skákdaginn og voru telfdar fyrstu þrjár umferðirnar. Jón Arnljótsson er einn efstur með fullt hús, en nokkrir keppendur koma skammt undan. Alls taka 9 keppendur þátt í mótinu og verða næstu umferðir tefldar næstkomandi þriðjudag.

Heimasíða Skákfélags Sauðárkróks

Peðaskákfjöltefli við stórmeistara í Laufásborg

Af heimasíðu Leikskólans Laufásborgar:

Í tilefni af skákdeginum til heiðurs Friðrik Ólafssyni héldu þau Lenka og Omar skákmeistarar og skákkennarar fjöltefli þar sem gesturinn var Þröstur Þórhallsson stórmeistari. Það voru stóru hóparnir sem tóku þátt í þessari peðskák og gekk alveg glimrandi vel og fengu jafntefli við stórmeistarann ;)) Lenka skákkennari hér og mikil afrekskona í skák tefli líka fjöltefli. Hún er flott fyrirmynd stúlkna og drengja :)

Þau höfðu gaman af og við líka, þetta var bara eins og að ganga inn á alvöru skákmót svo flott voru þau. Við erum alltaf svo rífandi stolt af börnunum það vantar ekki.

Frábært framtak hjá Omari og Lenku. Takk fyrir kæra vinkona og kæri vinur þið eruð frábær!

 

Bein útsending frá lokaumferð KORNAX mótsins hefst kl. 19:30

Það er mikil spenna fyrir lokaumferð KORNAX mótsins - Skákþings Reykjavíkur sem fram fer í kvöld og hefst kl. 19:30.  Bein útsending verður frá lokaumferðinni.  Sex keppendur geta sigrað á mótinu.  Ingvar Þór Jóhannesson (2337) er efstur með 7 vinninga, Guðmundur Kjartansson (2326) er annar með 6,5 vinning og og bræðurnir Björn (2406) og Bragi Þorfinnssynir (2426), Hjörvar Steinn Grétarsson (2470) og Einar Hjalti Jensson (2241) eru í 3.-6. sæti með 6 vinninga.

Beina útsendingu frá lokaumferðinni má nálgast hér (tengill virkur rétt fyrir umferð)

Stöðu mótsins má finna hér.

Í lokaumferðinni mætast meðal annars:

• Ingvar Þór (7) - Bragi Þ. (6)
• Guðmundur K. (6,5) - Hjörvar Steinn (6)
• Einar Hjalti (6) -  Björn Þ. (6)
• Stefán B. (5,5) - Þór Már (5,5)
• Sverrir Örn (5,5) - Mikael Jóhann (5,5)

Pörun lokaumferðinnar má nálgast hér.

Mjög góð þátttaka er á mótinu eða 73 skákmenn. Mótið er sterkt en fimm alþjóðlegir meistarar eru meðal þátttakenda.  Teflt er á sunnudögum (kl. 14) og á mánu- og miðvikudögum (kl. 19:30).

• Heimasíða mótsins
• Chess-Results
• Myndaalbúm (GB, HÁ, SRF og JHR)

Einar Hjalti, Björgvin og Þröstur efstir á Gestamóti Goðans

Þriðja umferð á Gestamót Goðans var tefld í gærkvöld á Íslenska skákdeginum. Einar Hjalti Jensson og Björgvin Jónsson gerðu jafntefli og Þröstur Þórhallsson vann Björn Þorfinnsson. Einar, Björgvin og Þröstur eru efstir á mótinu með 2,5 vinninga.

Jón Þorvaldsson tapaði fyrir Kristjáni Eðvarðssyni í gærkvöld. Fram að skákinni í gærkvöld hafði Jón verið ósigraður í síðustu 18 kappskákum, en Jón tapaði síðast kappskák seint á síðustu öld!

Öll úrslit 3. umferðar má finna hér og stöðu mótsins má finna hér.

Tveimur skákum var frestað til mánudagskvölds og pörun í 4. umferð verður því ekki ljós fyrr en að þem loknum.

• Heimasíða Goðans
• Chess-Results
• Myndaalbúm (GB)

Fjöltefli í Leikskólanum í Marbakka

Skákgleði var á leikskólanum Marbakka í Kópavogi. Skákgleði og söngvar meðal elstu leikskólabarna stjórnað var af stórmeistara kvenna Lenku Ptáčníková.

Allmargar myndir frá gleðinni má finna í myndaalbúmi Skákdagsins.

Árni H. Kristjánsson með bréfskák ársins 2011

Vinningsskák Árna H. Kristjánssonar gegn alþjóðlega bréfskákmeistaranum Tomas Learte Pastor varð hlutskörpust í kjörinu um bréfskák ársins 2011. Skákin var tefld í landskeppni Íslands og Spánar.

Árni er gríðarlega öflugur í bréfskákinni um þessar mundir og er jafnframt í hópi okkar reyndustu og virkustu bréfskákmanna. Fyrir utan mjög góðan árangur í landskeppnum, þá er hann efstur á Íslandsmótinu í bréfskák, sem er tileinkað minningu Sverris Norðfjörð. Mótið er langt komið. Hann er einnig meðal efstu manna í Evrópukeppni landsliða þar sem hann teflir á þriðja borði. Þá tekur hann þátt í undanúrslitum heimsmeistaramótsins þar sem hann fer ágætlega af stað.

Skákina sjálfa má skoða á Skákhorninu.

Hraðskákmót Reykjavíkur fer fram á sunnudag

Hraðskákmót Reykjavíkur verður haldið í félagsheimili Taflfélags Reykjavíkur Faxafeni 12, sunnudaginn 29. janúar kl. 14.

Tefldar verða 2x7 umferðir eftir Sviss-Perfect kerfi. Umhugsunartími verður 5 mínútur á skák.

Þátttökugjald er kr. 500 fyrir 16 ára og eldri en frítt fyrir 15 ára og yngri.

Þrenn verðlaun í boði.

Eftir Hraðskákmótið fer fram verðlaunaafhending fyrir  KORNAX mótið 2012 - Skákþing Reykjavíkur.

Núverandi hraðskákmeistari er Hjörvar Steinn Grétarsson.

Skákboð á Bessastöðum

 

Ólafur forseti, Friðrik og fulltrúar Íslands á NM í skólaskák

 

Mikið var mannvalið á Bessastöðum hinn snjóþunga morgun Skákdagsins. Afmælisbarnið, Friðrik Ólafsson, var aðeins of seint á staðinn og í ræðu sinni hafði Gunnar Björnsson á orði að Friðrik væri einmitt þekktur fyrir tímahrak, en þá kom Friðrik með dobbl á það útspil Gunnars; „En ég féll nú samt aldrei" - og vakti mikla kátínu viðstaddra.

 

 

Vignir og Nansý skemmtu sér vel á Bessastöðum

 

Ólafur Ragnar flutti ræðu þar sem hann bar mikið lof á Friðrik, afrek hans og mikilvægi þeirra fyrir íslenska þjóð. Þegar Friðrik braust fram á sjónarsviðið á 6. áratugnum efldi hann sjálfsmynd og sjálfstraust lýðveldis sem var rétt að skríða á unglingsaldur, komst forsetinn að orði. Sýndi og sannaði Friðrik að fulltrúar Íslands gætu staðið sig í samkeppni á vettvangi þjóðanna.

 

 

Eggert frá HB Granda og Jóhann Hjartarson

Að lokinni ræðu Ólafs tók Friðrik til máls, þakkaði hann þann heiður og virðingu sem honum var sýnd og rifjaði upp skemmtilegar sögur af sínum ferli.

 

 

Karitas og Thelma frá Hörpu mættu til Bessastaða

Dró Ólafur Ragnar svo fram taflið sem íslensk skákbörn gáfu honum á Íslandsmóti barna. Stakk Ólafur upp á því að Nansý Davíðsdóttir og Friðrik myndu vígja taflið í sýningarskák. Friðrik vann peð í 15. leik en af sinni alkunnu séntilmennsku bauð hann Nansý jafntefli sem hún þáði.

 

 

Friðrik og Nansý

 

Meðal gesta á Bessastöðum voru flestir fulltrúar Íslands á NM í skólaskák sem fram fer í Finnlandi um miðjan febrúar.

Skemmtileg samkoma að Bessastöðum og við hæfi að forseti landsins heiðri hina miklu lýðveldishetju Friðrik Ólafsson.

Fjöltefli í Snælandsskóla

Frá Lenku Ptácníková:

Í tilefni dagsins fór fram kl. 10.00 í dag fjöltefli Omars Salama í Snælandsskóla í Kópavogi. Ágætt stemning var á staðnum. Allt tefldu 22 nemendur skólans en fjöldi áhorfenda fylgði með fjölteflinu. Stór barátta endadi 21-1 fyrir Omar.

Miklu fleiri áttu áhuga að tefla og vonum að bráðum verðum aftur með tafli í skólanum.

Óskum Friðriki Ólafssyni til hamingju með daginn! :)

Helgi Ólafs á Hyrnutorgi

Skólastjóri Skákskólans Helgi Ólafsson þekkir vel til í Borgarfirði enda sinnt þar skákkennslu um árabil. Helgi setti í gírinn á  Skákdaginn og brunaði í Borgarfjörð, rakleiðis á Hyrnutorg þar sem ellefu skákmenn biðu hans í fjöltefli. Helgi lagði níu þeirra að velli en tapaði fyrir fyrrum nemendum sínum þeim Tinnu Kristínu Finnbogadóttur og Jóhanni Óla Eiðssyni.

Í Borgarnesi var einnig vígt skáksett, og því eiga þeir fjölmörgu ferðalangar sem eiga leið um Borgarnes kost á því að slaka á í sundlaug staðarins og taka eina bröndótta um leið.