Skákdagurinn: Fórnir á Laugarvatni

Bréf frá Baldri Garðarssyni Menntaskólanum á Laugarvatni

Góðan dag.

Meðfylgjandi mynd er tekin í morgun í ML og sýnir undirritaðan koma inn úr kuldanum eftir að hafa gengið frá Héraðsskólanum að ML í algjörlega snarvitlausu veðri með 5 skáksett í pokum, en til stendur að halda skákmót hér í ML í dag til heiðurs F.Ó.

Það er m.ö.o. mikið á sig lagt fyrir skákgyðjuna, leiðin sem farin var með skákdótið er ca 400 m., en vegna veðurs þurfti undirritaður að stoppa í skjóli við bíl á miðri leið í ca 10 mínútur uns rofaði örlítið til.

Sendi ykkur þetta til gamans,

kveðja, Baldur Garðarsson

kennari ML

Gunnar sigraði á Toyota-skákmótinu

Æsir skákfélag eldri borgara í Reykjavík héldu sitt árlega Toyota-skákmót í dag á Íslenska skákdeginum þar sem allir tefldu til heiðurs fyrsta stórmeistara Íslands Friðriki Ólafssyni sem á afmæli í dag.

Friðrik sýndi öldungunum þann heiður að mæta á skákstað og leika fyrsta leikinn í skák Björns Þorsteinssonar og Jóns Steinþórssonar.

Björn Þorsteinsson vann mótið á síðasta ári , hann vann einnig fyrsta Toyota-skákmótið,sem var haldið 2008. Jóhann Örn Sigurjónsson vann bikarinn 2009 og 2011 vann Sigurður Herlufsen

Þetta var í fjórða sinn sem mótið er haldið í söludeild Toyota við frábærar aðstæður.

Forstjóri Toyota Úlfar Steindórsson setti mótið og bauð menn velkomna til leiks.

Úlfar lýsti yfir ánægju sinni yfir að fá skáköldunga til leiks einu sinni á ári, og sagðist vona að framhald  verði á þvi.

Tuttugu og sex heldri skákmenn mættu til leiks í dag og var hart barist á öllum borðum,Þarna voru mættir margir gamlir meistarar,minnsta kosti þrír fyrrverandi Íslandsmeistarar

Í mótslok stóð Gunnar Gunnarsson  uppi sem sigurvegari með 7.5 vinning af níu mögulegum Jóhann Örn Sigurjónsson hreppti annað sætið með 7 vinninga.

Jafnir í 3-5 sæti  með 6 vinninga urðu Sæbjörn Guðfinnsson,Þór Valtýsson og Gísli Gunnlaugsson. Sæbjörn reyndist efstur á stigum og fékk bronsverðlaunin.

Alls fengu sautján efstu menn peningaverðlaun sem öll eru gefin af Toyota

Úlfar forstjóri afhenti verðlaunin ásamt skákstjórum þeim Birgi Sigurðssyni og Finni Kr Finnssyni.

Þátttakendur voru flestir úr skákfélaginu Æsir og Riddaranum í Hafnarfirði.

Nánari úrslit:

• 1          Gunnar Gunnarsson                            7.5
• 2          Jóhann Örn Sigurjónsson                    7
• 3-5       Sæbjörn Guðfinnsson                         6
•             Þór Valtýsson                                      6
•             Gísli Gunnlaugsson                             6
• 6-9       Björn Þorsteinsson                              5.5
•             Stefán Þormar                                     5.5
•             Ingimar Jónsson                                  5.5
•             Páll G Jónsson                                     5.5
• 10        Gísli Árnason                                      5
• 11-15   Össur Kristinsson                                4.5
•             Magnús V Pétursson                           4.5
•             Björn V Þórðarson                              4.5
•             Egill Sigurðsson                                  4.5
•             Halldór Skaftason                               4.5
• 16-21   Ásgeir Sigurðsson                               4
•             Þorsteinn Guðlaugsson                       4
•             Jón Víglundsson                                 4
•             Eiríkur Viggósson                               4
•             Jón Steinþórsson                                 4
•             Einar S Einarsson                                4

Næstu fimm skákmenn fengu örlítið færri vinninga              

Myndaalbúm mótsins

Teflt á Blönduósi á Skákdaginn

Það er mikið fagnaðarefni að segja frá því að teflt var á Blönduósi á Skákdaginn. Skáklíf hefur legið í dvala á Blönduósi um nokkurt skeið en greinilegt er að skákarfur staðarins lifir góðu lífi enda Skáksamband Íslands stofnað á Blönduósi árið 1925. Nú er lag fyrir bæjarbúa að fylgja eftir glæsilegum Skákdegi á staðnum en 22 nemendur á miðstigi tefldu á móti sem haldið var í Blönduskóla.

Myndirnar tók Óli Ben kennari í Blönduskóla.

Skákdagurinn á Héraði

Ritstjóra barst eftirfarandi póstur frá Sverri Gestssyni skólastjóra Fellaskóla á Héraði:

Þá er skákdegi lokið hér fyrir austan.

Í Fellaskóla var þátttakan mjög góð og tóku 75 nemendur skólans þátt í taflmennsku dagsins (tvær myndir) undir stjórn undirritaðs.

Þá afhenti ég Hreini Halldórssyni, forstöðumanni Íþróttamistöðvarinnar "sundtaflið" frá ykkur (sjá mynd). Ég var búinn að skora á hann að taka við mig skák í heita pottinum og hann tók áskoruninni með því skilyrði að ef hann tapaði, þá færum við í sjómann! Við tókum skák í heita pottinum (sjá mynd við upphaf skákar). Það er skemmst frá því að segja að Hreinn vann örugglega þótt sigurinn virtist koma honum nokkuð á óvart ef marka má myndina. Ég slapp samt við sjómann við "Strandamanninn sterka"!

Læt þetta duga!

Sverrir Gestsson

Jóhann tefldi fjöltefli við Alþingismenn

Stórmeistarinn Jóhann Hjartarson lagði sitt af mörkum á Skákdaginn. Um morguninn fór hann fyrir heimsókn nemenda í Ölduselsskóla sem heimsóttu leikskólann Seljaborg. Mikil skákiðkun er á Seljaborg en nemendur þaðan fara í Ölduselsskóla og því heimsóknin afar sniðugt tiltæki. Heimsóknin var sérstaklega vel mönnuð en Bolvíkingurinn geðþekki Guðmundur Daðason slóst í lið með Jóhanni.

Í hádeginu þáði Jóhann svo boð Ólafs Ragnar að Bessastöðum.

Um eittleytið var Jóhann mættur í þinghúsið. Erindið var fjöltefli við þingmenn úr öllum flokkum. Atkvæðagreiðsla var á næsta leyti svo umhugsunartími var stilltur í samræmi við það. Jóhann hafði því einungis 15 mínútur gegn 5 þingmönnum; Gunnari Braga Sveinssyni og Vigdísi Hauksdóttur, Framsóknarflokki, Guðlaugi Þór Þórðarsyni Sjálfstæðisflokki, Sigmundi Erni Rúnarssyni Samfylkingu og Guðfríði Lilju Grétarsdóttur VG.

„Skákin er engin mömmuleikur" sagði Jóhann við þingmenn þegar hann hafði mátað þá alla á nokkuð stuttum tíma og uppskar mikinn hlátur þingmannanna. Skemmtileg stemning og rokna hlátur einkenndi fjölteflið og sannaðist það enn að skákin sameinar fólk enda eru kjörorðin jú;

VIÐ ERUM EIN FJÖLSKYLDA

Myndir teknar af Malínu Brand.

Stefán Kristjánsson vann maraþoneinvígíð

Stefán Kristjánsson vann maraþoneinvígið gegn Braga Þorfinnssyni í Kringlunni í dag.  Lokatölur eru 35,5-30,5.  Bragi byrjaði betur og leiddi lengi vel en Stefán seig yfir þegar á leið.   Drengirnir voru vel þreyttir að 66 skákum loknum.  En upphafalega var markið sett á 100 skákir.   Sjálfsagt verða teknar 100 skákir á næsta skákdegi.   

Vel að verki staðið hjá félögunum og skemmtu áhorfendur sem kíktu á meistarana sér vel.

 

Skákdagurinn í fullum gangi

Það er mikið um vera á Skákdaginn.  Í morgun tefldi Björn Þorfinnsson fjöltefli í Laugardagslaug og eins og áður hefur komið fram tefla Bragi Þorfinnsson og Stefán Kristjánsson maraþoneinvígi í Kringlunni.  Þar leiddi Bragi 10,5-9,5 þegar síðast var vitað.  Forseti Íslands hélt mótttöku á Bessastöðum þar sem heiðursgesturinn var Friðrik Ólafsson og keppendur á NM skólaskák.  Friðrik tefldi við Nansý og gerðu þau jafntefli.

Núna klukkan 13 tefldi Jóhann Hjartarson fjöltefli við Alþingismenn.  Minningarskákmót um Björn Sigurjónsson hófst í Vin og Toyota-skákmótið heldri skákmanna hófst í höfuðstöðvum Toyota.  

Myndaalbúm Skákdagsins (myndir væntanlegar)

Maraþonhraðskákeinvígi Stefáns og Braga hafið

Maraþonhraðskákeinvígi Stefáns Kristjánssonar og Braga Þorfinnssonar hófst kl. 10 í Kringlunni.  Þegar þetta hefur verið ritað er tveimur skákum lokið.  Stefán vann fyrstu skákina en Bragi jafnaði metin.  Hægt er að fylgjast með taflmennskunni á Skák.is en útsendingin er eitthvað skrykkjótt þar sem hratt er teflt!

Skákáhugamenn eru hvattir til að koma í Kringlu og horfa á meistarana tefla.

Um skáklistina og Friðrik okkar Ólafsson

Grein Guðna sem var aðgengileg hér í gær hefur verið tekin úr birtingu.  Hún verður endurbirt, lítið breytt, í Tímaritinu Skák í marsbyrjun.

Skákdagur Íslands - teflum okkur til ánægju í dag!

Skákdagur Íslands er haldinn í fyrsta sinn í dag.  Það er engin tilviljun að 26. janúar er fyrir valinu þar sem þetta er afmælisdagur Friðriks Ólafssonar, okkar sigursælasta skákmeistara.  Mannsins sem lagði fjóra heimsmeistara að velli, þá Fischer, Karpov, Tal og Petrosian.

Í tilefni dagsins eru Íslendingar hvattir til að taka upp taflið sem víðast.  Flest taflfélög landsins, alls staðar um landið, ætla að hafa starfsemi þennan dag.  Margir skólar verða með skákmót og fjöltefli.  Íslandsmót í ofurhraðskák fer fram á netinu.  Alþjóðlegi meistarinn Björn Þorfinnsson teflir fjöltefli í Laugardagslaug.  Öldungar tefla, unglingar tefla, mót verður í Vin, athvarfi fólks með geðraskanir.  Stórmeistarinn Stefán Kristjánsson og alþjóðlegi meistarinn Bragi Þorfinnsson tefla hraðskákeinvígi í Kringlunni og landsliðsmaðurinn Hjörvar Steinn Grétarsson teflir við þjóðina í gegnum netið.  Þar geta allir tekið þátt!  Teflt er ýmsum fyrirtækjum þennan dag. 

Skák göfgar hugann og rannsóknir hafa sýnt að skák eflir rökhugsun og námsárangur barna. 

Skákhreyfingin hvetur skákáhugamenn um allt land að taka upp taflið og tefla við fjölskyldumeðlimi , vinnufélaga, vini eða kunningja!

Og ef menn vilja taka þátt í opinberum skákviðburðum eða fylgjast með því sem er í gangi er hægt að nálgast allar upplýsingar hér á Skák.is. 

Teflum okkur til ánægju í dag - skák er skemmtileg!

Gunnar Björnsson

Höfundur er forseti Skáksambands Íslands