Hraðskákkeppni taflfélaga hefst í byrjun ágúst

Hraðskákkeppni taflfélaga, hefst eftir verslunarmannahelgi.  Þetta er í sautjánda sinn sem keppnin fer fram en Taflfélagið Hellir er núverandi meistari.  Í fyrra var metþátttaka en þá tóku 16 lið þátt og er stefnt að því að bæta það met í ár!

Taflfélög eru hvött til að skrá sig sem sig sem fyrst til leiks.  Reglur keppninnar eru hér að neðan. 
Teflt er eftir útsláttarfyrirkomulagi.     

Dagskrá mótsins er sem hér segir

1. umferð (16 liða úrslit): Skuli vera lokið 15. ágúst (hugsanleg forkeppni ef meira en 16 lið taka þátt)
2. umferð (8 liða úrslit): Skuli vera lokið 25. ágúst
3. umferð (undanúrslit): Skuli vera lokið 5. september
4. umferð (úrslit): Um 15. september (líklegt að keppnin verði sett á helgina 9.-11. september eða 16.-18. september).

Umsjónaraðili getur heimilað seinkanir við sérstakar aðstæður.     

Skráning til þátttöku rennur út 5. ágúst nk.   Forráðamenn taflfélaga eru vinsamlegast beðnir um að hafa samband við Gunnar Björnsson í netfangið [e-mail] eða í síma 820 6533.
Tilkynna þarf eftirfarandi:

Lið
Liðsstjóri
Símanúmer liðsstjóra
Netfang liðsstjóra

Reglur keppninnar:

1.  Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.

2.  Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar.

3.  Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.

4.  Ætlast er til þess að þeir sem tefli séu fullgildir meðlimir síns félags. Aðeins má tefla með einu taflfélagi í keppninni.

5.  Liðsstjórar koma sér saman um hvenær er teflt og innan tímaáætlunar.  Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.

6.  Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást.

7.  Heimalið bjóði upp á léttar veitingar, t.d. kaffi, gos, kökur eða kex.

8.  Viðureignirnar skulu fara fram innan 100 km. radíus (max 1-1,5 klst. ferðalag) frá Reykjavík nema að félög komi sér saman um annað.  

9.  Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.

10. Úrslit keppninnar verða ávallt aðgengileg á heimasíðu Hellis, www.hellir.blog.is , sem er heimasíða keppninnar, og á www.skak.is.

11. Mótshaldið er í höndum Taflfélagsins Hellis sem sér um framkvæmd mótsins.

Skák út um allt!

Skákakademía Reykjavíkur í samstarfi við Skáksamband Íslands hefur hrundið af stað átakinu Skák út um allt. Með átakinu er ætlað að skákvæða sem flesta almenningsstaði í borginni. Er þá sérstaklega litið til sundlauga, kaffihúsa, þjónustumiðstöðva og íþrótta- og dvalarheimila. Hverjum stað verður gefið eitt tafl og við afhendinguna mun aðili frá Skákakademíunni taka skák við einhvern frá þeim sem þiggja taflið.

Átakið hófst í vikunni þegar Stefán Bergsson fastagestur Sundlaugar Vesturbæjar og framkvæmdastjóri Skákakademíunnar gerði sér ferð í laugina en í þetta skiptið ekki til potta- og gufulegu. Hraðskák skyldi tefld við Dag Arngrímsson sundlaugarvörð og alþjóðlegan meistara. Skákin var tefld á bakka laugarinnar og stýrði Dagur hvítu mönnunum. Stefán lenti snemma í mikilli beyglu en tókst um síðir að snúa á Dag sem varð svo mikið um að hann lék sig í mát í einum. 

Að taflmennsku lokinni var Sundlauginni færð taflsettið að gjöf sem verður haft í anddyrinu svo gestir og starfsmenn geti gripið í tafl þegar færi gefst. 

Átakið heldur áfram á næstu vikum og mánuðum en stefnt er að því að heimsækja 50 staði fyrir áramót. Þeir skákmenn sem vinna á almenningsstöðum eru beðnir um að hafa samband við Stefán Bergsson: [e-mail] 

Myndaalbúm (HJ)

Czech Open: Hannes og Guðmundur Kja unnu í fyrstu umferð

Aðalmót skákhátíðinnar í Czech Open hófst í dag.  Þrír íslenskir skákmenn tefla í a-flokki mótsins, stórmeistarinn Hannes Hlífar Stefánsson (2547), alþjóðlegi meistarinn Guðmundur Kjartansson (2310) og nafni hans Gíslason (2322).  Hannes og Kjartansson (2310) unnu báðir stigalægri andstæðinga í fyrstu umferð en Gíslason tapaði fyrir stigalægri andstæðing.  Skák Hannesar gegn þýska alþjóðlega meistaranum Ruediger Seger (2390) í 2. umferð verður sýnd beint á netinu á morgun og hefst útsending kl. 13.

Einnig hófst í dag b-flokkur þar sem Sigurður Eiríksson (1951) og Jakob Sævar Sigurðsson (1789) tefla.  Þeir töpuðu báðir fyrir stigahærri andstæðingum.

Í a-flokki tefla 279 skákmenn.  Þar af eru 50 stórmeistarar og 58 alþjóðlegir meistarar.  Hannes er nr. 17 í stigaröð keppenda, Gíslason nr. 132 og Kjartansson nr. 140.

• Heimasíða mótsins
• Chess-Results
• Beinar útsendingar frá 15 efstu borðunum (hefjast kl. 13)

 

 

Stefnir í sterkasta Norðurlandamót öldunga í skák sem fram hefur farið

Mótið haldið hér á landi í fyrsta sinn í haust • Búist er við metþátttöku

Sjöunda Norðurlandamót öldunga í skák verður haldið í fyrsta skiptið á Íslandi í september næstkomandi. Stórmeistarinn Friðrik Ólafsson hefur skráð sig til leiks ásamt fleiri stórmeisturum í skák eins og Yrjo Rantanen og Heikki Westerinen. Nú þegar hafa 33 skákmenn [45 þann 22. júlí] skráð sig til leiks og bendir allt til þess að met verði slegið sem sett var í Fredrikstad árið 2001, er 46 skákmenn tóku þátt.

Fyrsta Norðurlandamót öldunga var haldið í Karlstad í Svíþjóð árið 1999 en síðan hefur mótið verið haldið annað hvert ár. Íslendingar hafa aldrei fjölmennt á mótin og hafa mest 1-2 keppendur frá Íslandi tekið þátt að sögn Gunnars Björnssonar, formanns Skáksambands Íslands. „Það hefur orðið kippur í öldungastarfi í skák á Íslandi og það eru nokkur virk félög öldunga í skák, bæði í Reykjavík og Hafnarfirði, en hlutfallið er mjög óhagstætt konum þar sem aðeins karlmenn hafa skráð sig í mótið sem haldið verður eftir um tvo mánuði," segir Gunnar.

Friðrik að öllum líkindum stigahæstur

„Það eru óvenjulega sterkir skákmenn sem ætla að taka þátt núna og miklu fleiri góðir en oft hefur verið," segir Gunnar. „Íslendingar hafa hingað til ekki komist í efstu röð á þessum Norðurlandamótum. Þetta er kjörið tækifæri fyrir menn að tefla við kollega sína frá Norðurlöndunum," segir Gunnar.

„Ég skráði mig en það er spurning hvort tíminn passi, ég geri samt ráð fyrir því," segir Friðrik Ólafsson, stórmeistari í skák, 76 ára að aldri. Hann segist hafa skráð sig því skorað hafi verið á hann og einnig vegna þess að þetta er í fyrsta skiptið sem mótið er haldið á Íslandi og því meiri möguleikar að hann geti verið með. „Ég virðist vera stigahæstur af þessum þátttakendum," segir Friðrik.

Friðrik hefur undanfarin ár sinnt áhugamálum sínum, eins og ferðalögum, tónlist, gönguferðum og fleira. Hefur hann ferðast mikið með skemmtiferðaskipum sem hann telur vera mjög þægilegan ferðamáta. Einnig hefur hann unnið að því að skrásetja 50 ára skákferil sinn og býst við að gefa verkið út þegar því hefur verið lokið. „Já, ég er spenntur fyrir að taka þátt, það er alltaf gaman að tefla þó maður sé nú orðinn frekar latur við það en ég hef aðeins fylgst með. Maður þarf mikinn kraft í að tefla, eldmóð og einbeitni. Maður er nú ekki lengur tvítugur," segir Friðrik en hann hefur lítið teflt á undarförnum árum. „Ég reikna með því að ég rifji aðeins upp mannganginn og skoði það sem hefur verið að gerast til að þjálfa upp hugsunina, það er ákveðinn rútína að koma heilafrumunum í gang. Maður gleymir því nú aldrei sem gert hefur verið sæmilega," segir Friðrik að endingu.

Ofangreind grein birtist í Morgunblaðinu 15. júlí sl. og er hér birt með leyfi þess og blaðamanns (María Elísabet Pallé).

Kramik byrjar vel í Dortmund

Það er ekki algengt að þrjú toppskákmót séu í gangi í einu.  Í dag hófst Dortmund Sparkassen-mótið en meðal keppenda eru Kramnik (2781), Nakamura (2770) og Giri (2701).  Auk Dortmund-mótsins er mótið í Biel sem og HM landsliða í gangi.  Á morgun hefst svo Czech Open sem er nú reyndar ekki í sama styrkleika!

Kramnik vann Ponomariov (2764) en öðrum skákum lauk með jafntefli.  Rétt eins og í Biel taka 6 skákmenn þátt og tefld er tvöföld umferð.

Úrslit 1. umferðar:

Georg Meier	½-½	Le Quang Liem
Vladimir Kramnik	1-0	Ruslan Ponomariov
Anish Giri	½-½	Hikaru Nakamura

• Heimasíða mótsins
• Beinar útsendingar (hefjast kl. 13:30 (notuð er hálftíma seinkun))

 

Guðmundi Kja gekk vel á atskákmóti í Pardubice

Alþjóðlega meistaranum Guðmundi Kjartanssyni (2310) gekk vel á atskákmóti sem fram fór í gær og í dag í Pardubice í Tékklandi.  Mótið var hluti af Czech Open-skákhátíðinni.  Guðmundur hlaut 6 vinninga í 9 skákum og varð í 11.-23. sæti af 132 skákmönnum.  Guðmundur Gíslason tók einnig þátt og hlaut 4,5 vinning og varð í 60.-78. sæti.

Árangur Kjartanssonar samsvaraði 2477 skákstigum en árangur Gíslasonar samsvaraði 2169 skákstigum.   Þeir taka báðir þátt í aðalmótinu sem hefst á morgun.  Þar teflir einnig stórmeistarinn Hannes Hlífar Stefánsson (2546).

Sigurvegar mótsins voru tékkneski stórmeistarinn David Navara (2722) og úkranínski alþjóðlegi meistarinn Andrey Baryshpolets (2474) en þeir hlutu 7,5 vinning.  29 stórmeistarar tóku þátt í þessa sterka atskákmóti.

• Heimasíða Czech Open
• Chess-Results

Armenar efstir á HM landsliða

Armenar eru efstir á HM landsliða þegar 5 umferðum af 9 er lokið.   Armenar hafa 8 stig af 10 mögulegum, hafa gert jafntefli við Rússa og Bandaríkjamenn.  Nýr liðsmaður Armena, Movsesian (2700), hefur reynst drjúgur og hefur hlotið 3½ vinning á öðru borði.  Rússar og Ungverjar koma næstir með 7 stig.  Rússar töpuðu óvænt fyrir Aserum, 1-3.  Mótið fer fram í Ningbo í Kína.  Frídagur er á morgun en mótinu verður framhaldið á föstudag og lýkur svo á aðfaranótt þriðjudags.   

10 af sterkustu landsliðum heims taka þátt og tefla allir við alla. Rússar hafa sterkasta liðið á pappírnum (meðalstig 2752) en næstir koma Aserar (2737), Úkraínumenn (2722) og Armenar (2709). 

Staðan:

 

Rk.	Team	TB1	TB2
1	Armenia	8	13,5
2	Russia	7	12
3	Hungary	7	11,5
4	Ukraine	6	10,5
5	China	5	11
6	Azerbaijan	5	11
7	USA	5	10
8	Israel	4	8
9	India	3	8
10	Egypt	0	4,5

• Heimasíða mótsins 
• Chess-Results
• Beinar útsendingar (hefjast kl. 7 á morgnana - nema lokaumferðin hefst kl. 2 um nótt)

 

Björn Ívar og Donika sigurvegarar á sumarskákmóti Akademíunnar

Mikið er um að vera þessa vikuna í skáklífi Reykjavíkur. Á mánudag var sett þátttökumet á Skákmóti í Vin og í hádeginu í gær mætti vel á þriðja tug keppenda í Skákakademíuna þar sem fór fram annað Sumarskákmót Skákakademíunnar. Seinni partinn í dag stendur svo Taflfélag Reykjavíkur fyrir skák á Klambratúni.

Mótið í gær var vel mannað og um 10 keppendur yfir 2000 stigum. Fyrirfram mátti búast við öruggum sigri Hjörvars Steins en Mátinn Arnar Þorsteinsson lagði Hjörvar að velli í næst síðustu umferð. Fór svo að þeir tveir urðu efstir og jafnir með fimm vinninga af sex ásamt hreindýrabananum Birni Ívari Karlssyni. Björn hafði áður unnið Arnar en tapað fyrir Hjörvari.

Donika Kolica varð hlutskörpust af yngri kynslóðinni en fast á hæla hennar komu Guðmundur Agnar Bragason og Gauti Páll Jónsson.

Í dag verður svo opið hús í Skákakademíunni frá morgni og fram eftir degi. Upp á síðkastið hefur mikið bæst í Skákbókakost Skákakademíunnar sem nýtur velvilja Ingvars Þórs Jóhannessonar, en Ingvar geymir hluta sinna fjölmörgu skákbóka í Tjarnargötunni. Skákmenn geta því litið við á morgun; gripið í tafl og jafnvel litið í bók.

Það er því nóg um að vera í dagí skáklífi Reykjavíkur, í Tjarnargötunni og á Klambratúni.

Myndaalbúm (HJ)

Íslenskt efni á ChessCafe.com

Það eru margar áhugaverðar skákfréttasíður á boðstólum, fyrir utan www.skak.is, en þegar öllu er á botninn hvolft er ChessCafe.com sennilega sú besta og fjölbreyttasta.  Eins konar safnsíða með helstu skákfréttum alls staðar að, sem birst hafa á öðrum skáksíðum undir "Daily Chess New Links" , svo sem Chessbase News; The Week In Chess;  ChessVipes; Chessdom; og vefsíðum dagblaða hvaðanæva að úr heiminum.   Á ChessCafe.com er þvi  hægt að nálgast  nánast allt sem skiptir máli á einum stað fyrir sem vilja fylgjast vel með skákfréttum og mótum og sjá það helsta sem skrifað er um skák og skákmál. 

Þess utan eru á ChessCafe sérstakir mjög fróðlegir þættir,  svo sem:  Ritdómar um skákbækur; Skoðanahornið; Skjalasafnið og Video-kastljósið ofl. fyrir utan  greina fastra dálkahöfunda,sem skrifa um aðskiljanleg efni tengdum skák.   Þar á meðal eftir einn af aðstandendum síðunnar Daða Jónsson, kerfisfræðing og skákdálkahöfund, undir yfirskriftinni ChessOK Cafe, sem skrifar færðilegar ritgerðir um Chess Assistant hugbúnað og rannsóknarforrit.

Ný grein eftir Daða birtist fyrir nokkrum dögum um "Aquarium 2011 directory structure".  Þá  trónir nú íslenska skákmyndbandið Chess Fury (SkákOfsi) í video-horninu, sem sýnir ákafaskákmenn í KR í ham og í nærmynd, sem láta sér ekki muna um að tefla 13 umferða hraðskákmót á mánudögum allan ársins hring.  

ChessCafe.com er frábær síða sem hægt er að mæla með og sjá allt það helsta um skák og það er gerast á skáksviðinu  í hnotskurn.  Á forsíðunni er að finna leiðbeiningar og góðar ráðleggingar um hvernig best er að nota og nálgast efni síðunnar.  -

Texti frá Einari S. Einarssyni.

http://www.chesscafe.com/video/video.htm

Teflt á Klambratúni!

Dótakassinn á Klambratúni í samvinnu við Taflfélag Reykjavíkur býður borgarbúum upp á þann möguleika að koma og tefla á Klambratúni í sólinni fimmtudaginn 21. júlí, þeim að endurgjaldslausu.

Hugmyndin kemur úr Central Park þar sem boðið er upp á steypt borð þar sem fólk getur komið með sína taflmenn og nýtt blíðviðrið í góða hugarleikfimi. Á morgun milli fjögur og sjö verður því hægt að tefla ásamt því að nýta leikföngin og spilin sem Dótakassinn hefur til umráða.

Kíkið á Klambratún á fimmtudaginn milli kl 16.00-19.00!

Dótakassinn á Klambratúni, ÍTR - Frístundamiðstöðin Kampur