EM einstaklinga á Íslandi 2013 - sameinað Reykjavíkurskákmótinu

EM einstaklinga 2013 verður á Íslandi.   Þetta var ákveðið á fundi stjórnar Skákambands Evrópu í gær en Pólverjar sem áttu að halda mótið báðust undan því að halda mótið þar sem þeir væru með EM landsliða á sinni könnu og þetta tvennt væri að sliga þá.

Silvio Danaliov, forseti ECU, og Sava Stoisavljevic, framkvæmdastjóri ECU, óskuðu eftir fundi með undirrituðum á frídaginn um málið og vildu athuga möguleika þess að mótið yrði haldið í Reykjavík en góð framkvæmd og fréttaflutningur frá N1 Reykjavíkurmótsins vakti athygli þeirra á Reykjavík sem mögulegum mótsstað.  Mér var gefin skammur tími og sagt að þetta mál þyrfti að klára fyrir mótslok, annars myndi mótið vera haldið aftur í Búlgaríu í ljósi þess að skammur tími er til stefnu.  

Eftir allmörg símtöl og tölvupósta taldi ég þá viðbótarfjármögnun brúaða til að hægt væri að halda mótið.  Mótið verður jafnframt Reykjavíkurskákmót og fékkst undanþága fyrir því að skákmenn utan Evrópu fengju að taka þátt.  Mótið verður haldið 5.-16. mars.  

Nánari frétt um málið verður birt á næstum dögum.  

Gunnar Björnsson

Íslandsmótið í hraðskák fer fram í dag

Íslandsmótið í hraðskák fer fram í dag sunnudag í húsnæði Taflfélags Reykjavíkur, Faxafeni 12.  Gera má ráð fyrir að margir af sterkustu skákmönnum landsins taki þátt og ætlar Hannes Hlífar Stefánsson að flýta sínu flugi frá Plovdid í Búlgaríu til að komast á skákstað í tæka tíð. 

Skráning fer fram hér á Skák.is og er þátttaka takmörkuð við aðeins 50 keppendur svo mikilvægt er að skrá sig sem fyrst til leiks.  Nauðsynlegt er að gefa upp netfang þar sem þátttakan verður staðfest með tölvupósti.  

Tefldar verða 11 umferðir með 7 mínútna umhugsunartíma á mann og er reiknað með að mótið standi á milli 13 og 16:30.

Verðlaun eru sem hér segir:

• 1) 100.000 kr.
• 2)   60.000 kr.
• 3)   50.000 kr.
• 4)   30.000 kr.
• 5)   20.000 kr.

Aðalverðlaun skiptast séu menn jafnir að vinningum.  

Aukaverðlaun:

• Efsti unglingurinn 16 ára og yngri: 10.000 kr.
• Efsta konan: 10.000 kr.
• Efsti maður með 2200 stig og minna: 10.000 kr.
• Efsti maður með 2000 stig og minna: 10.000 kr.

Aukaverðlaun eru miðað við nýjustu útgefin íslensk skákstig.   Reiknuð eru stig séu menn jafnir og efstir. 

Efsti keppandi mótsins verður Íslandsmeistari í hraðskák.   Verði tveir eða fleiri efstir ræður stigaútreikningur. 

 

,,Vi spiller skak!" hrópa börnin í ísbjarnarbænum á 70. breiddargráðu

,,Vi spiller skak!" hrópuðu börnin í Ittoqqortoormiit, þegar skáktrúboðar Hróksins og Kalak birtust á sólríkum laugardegi, þar sem hin mikla móðir lífsins stráði geislum sínum yfir ísbreiðuna.

Börnin í afskekktasta þorpi heims hafa hlakkað í allan vetur til heimsóknar íslensku skákmannanna: Framundan er hátíð á 70. breiddargráðu.

Hér eru húsin, flest hver, á kafi í snjó. Hlekkjaðir sleðahundar flytja aríur um það hlutskipti að vera ólaðir niður meðan víðernin kalla.
 
Börnin, þessi dásamlegu grænlensku börn, hoppa og skoppa í frostinu; kjá framan í skrýtnu Íslendingana sem eru bæði með skáklistina í farteskinu, og öll páskaeggin og gjafirnar frá íslenskum vinum.

Það eru forréttindi að fá að eyða páskavikunni 800 kílómetra frá næsta byggða bóli, í bænum þar sem ísbirnir eru næsta daglegir gestir, í þorpinu þar sem börnin fá að kynnast lífinu á hinum einu sönnu norðurslóðum.
 
,,Vi spiller skak!" hrópa þau, glaðbeitt, og á morgun byrjar hátíðin mikla í Ittoqqortoormiit -- þorpi hinna stóru húsa einsog það heitir á grænlensku -- þorpinu sem við Íslendingarnir höfum bundist ástfóstri við.

Hátíðin er rétt að byrja: Fylgist með á www.godurgranni.blog.is.

Breska deildakeppnin: Góð frammistaða íslensku keppendanna

Ákaflega vel gekk hjá íslensku skákmönnunum sem tefldu fyrir Jutes of Kent í sjöundu umferð Bresku deildakeppninnar sem fram fór í dag.  Hjörvar Steinn Grétarsson (2460), Bragi Þorfinnsson (2421) og Ingvar Þór Jóhannesson (2355) unnu allir sínar skákir en Björn Þorfinnsson (2416) gerði jafntefli.   Jutes of Kent, sem þeir kumpánar tefldu fyrir, unnu viðureignina 5,5-2,5.  

Hjörvar vann alþjóðlega meistarann Jonathan Hawkins (2480), Bragi vann stórmeistarann Enrique Rodriguez Guerrero (2454) og Ingvar vann alþjóðlega meistarann Robert Bellin (2355).  Björn gerði jafntefli við stórmeistarann Keith Arkell (2414).  

Á morgun teflir Jutes of Kent sína síðari viðureign um helgina.  Því miður verður hún ekki sýnd beint.

Breska deildakeppnin

Tíu skákmenn efstir og jafnir í áskorendaflokki

Tíu skákmenn eru efstir og jafnir með fullt hús eftir aðra umferð áskorendaflokks Íslandsmótsins í skák sem fram fór í dag.   Þar á meðal eru Oliver Aron Jóhannesson (1677) sem vann Nökkva Sverrisson (1928) og hinn ungi og efnilegi Hilmir Freyr Heimsson (1602) sem sigraði Viktor Svavarsson (1848).  Úrslit 2. umferðar má finna hér.   

Stöðu mótsins má finna hér.  

Frídagur er á morgun.  Þriðja umferð fer fram á mánudag og hefst kl. 18.  Pörun hennar má finna hér.

Eftirfarandi fjórar skákir verða sýndar beint á netinu á mánudag:

• Dagur Ragnarsson - Guðmundur Kjartansson
• Lenka Ptácníková - Grímur Björn Kristinsson
• Jón Úlfljótsson - Einar Hjalti Jensson
• Oliver Aron Jóhannesson - Haraldur Baldursson

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS)

 

Dmitry Jakovenko Evrópumeistari

 

 

Rússinn Dmitry Jakovenko (2729) er Evrópumeistari í skák.  Nokkuð óvæntur sigur enda aldrei í forystusæti fyrr en akkúrat á réttum tíma, það er í lok móts!  Hann vann síðustu 3 skákirnar og hlaut 8,5 vinning.  13 skákmenn hlutu 8 vinninga og meðal þeirra eru Íslandsvinirnir Malakhov (2705), Bologan (2687), Kryvoruchko (2666), sem vann Caruana (2767), stigahæsta keppendann í lokaumferðinni, og Smeets (2610).

22 skákmenn hlutu 7,5 vinning og komast 9 þeirra áfram.  Þar á meðal Jones (2635) og Dreev (2698) en meðal þeirra 13 sem sitja eftir er Sokolov (2653). 

Lokapistill um mótið kemur í kvöld eða á morgun.

• Heimasíða mótsins
• Beinar útsendingar
• Chessbomb
• Myndaalbúm (GB)
• Myndaalbúm (opinbert)

EM: Hannes og Héðinn unnu

Íslensku stórmeistararnir Hannes Hlífar Stefánsson (2531) og Héðinn Steingrímsson (2556) unnu báðir í 11. og síðustu umferð EM einstaklinga í Plovdid í Búlgaríu.  Fyrsta skipti síðan í fyrstu umferð aðslíkt gerðist!  Hannes vann svissneska alþjóðlega meistarann Beat Zueger (2425) en Héðinn vann hollenska FIDE-meistarann David Klein (2418), sem hafði átt gott mót og náð áfanga að stórmeistaratitli.

Góðar skákir hjá báðum.  Hannes sagði þetta sína bestu skák, en hann fórnaði skiptamun á mjög skemmtilegan hátt, og Héðinn vann öruggan sigur í aðeins 25 leikjum.   

Hannes hlaut 6 vinninga en Héðinn hlaut 5,5 vinning.

Frammistaða Hannesar samsvaraði 2504 skákstigum og Héðins 2465 skákstigum.  Báðir lækka þeir á stigum.  Hannes lækkar um 2 stig en Héðinn um 13 stig. 

Flest stefnir í það að Rússinn Dmitry Jakovenko (2729) verði Evrópumeistari en hann lagði forystusauðinn Frakkann Fressinet (2693) í dag.  Jakovenko vann sínar þrjár síðustu skákir.  Það er þó ekki alveg útséð um það þar sem sigurvegarinn í skák Rússans Inarkiev (2695) og Spánverjans Vallejo Pons (2693) getur náð honum að vinningum.  Þar hefur Rússinn heldur betra. 

Jones (2635) kemst væntanlega áfram eftir sigur á Ernst (2578).   Flestir bendir hins vegar til þess að Sokolov (2653) sitji hins vegar eftir með sárt ennið en hann situr enn að tafli.  

• Heimasíða mótsins
• Beinar útsendingar
• Chessbomb
• Myndaalbúm (GB)
• Myndaalbúm (opinbert)

Fjölmennt á páskaæfingu Fjölnis. Fimmtán fengu verðlaun

 

Skákdeild Fjölnis hélt sína síðustu skákæfingu fyrir páska og reyndist hún afar fjölmenn. Efnt var til páskaeggjamóts með þátttöku 34 krakka á barnaskólaaldri. Tefldar voru fimm umferðir. Hart var því barist um efstu sætin og urðu úrslit þau að jafnir og efstir í mark komu þeir Vignir Vatnar Stefánsson og Kristófer Jóel Jóhannesson með 4,5 vinninga af 5 mögulegum. Þeir gerðu innbyrðis jafntefli í 4. umferð.

 

Bekkjarbræðurnir úr Rimaskóla þeir Jóhann Arnar Finnsson og Mikolaj Oskar komu næstir með 4 vinninga. Vegna hinnar miklu þátttöku var ákveðið að fjölga páskaeggjavinningum úr sex í fimmtán og sendill sendur í Bónus til að kaupa fleiri páskaegg.

Aðrir í verðlaunasætum urðu þau Hilmir Hrafnsson, Nansý Davíðsdóttir,Róbert Orri Árnason, Tristan Ingi Ragnarsson, Joshua Davíðsson, Þorsteinn Magnússon, Svandís Rós Ríkharðsdóttir,Alísa Svansdóttir, Viktor Andri Hafþórsson, Alexandra Kjærnested og Tinna Sif Aðalsteinsdóttir.

Allir þátttakendur fengu lítið páskaegg afhent fyrir góða frammistöðu og fóru allir þakklátir og ánægðir heim að loknu velheppnuðu skákmóti. Það vakti lukku að vígð voru glæný marglita skáksett sem skákdeild Fjölnis keypti af Smára Rafni Teitssyni og þótti það sport að fá að tefla með rauðum, bleikum og fjólubláum taflmönnum.

Nýkrýndur Íslandsmeistari og Norðurlandameistari með Rimaskóla, Oliver Aron Jóhannesson var á hliðarlínunni og leiðbeindi ungum skákmönnum á milli umferða og reyndist það gífurlega eftirsótt að setjast við taflborð með honum eða að fylgjast með Oliver útskýra góða leiki.

Í einu orði sagt skemmtileg æfing, áhugasamir krakkar og margir foreldrar að fylgjast með og hjálpa til.

Hjörvar, Bragi, Björn og Ingvar í beinni frá Bretlandi

Hjörvar Steinn Grétarsson (2460), Bragi (2421) og Björn (2416) Þorfinnssynir og Ingvar Þór Jóhannesson (2355) tefla allir í dag í Bresku deildakeppninni sem að þessu sinni fer fram í Leicestershire.  Þeir tefla fyrir klúbbinn Jutes of Kent.  

Hjörvar teflir við alþjóðlega meistarann Jonathan Hawkins (2480), Bragi við stórmeistarann Enrique Rodriguez (2454), Björn við stórmeistarann Keith Arkell (2414) og Ingvar við alþjóðlega meistarann Robert Bellin (2355).

Umferðin hófst kl. 13.

• Breska deildakeppnin 
• Beinar útsendingar

Smári Páskameistari Goðans

Smári Sigurðsson vann sigur á páskákmóti Goðans í skák sem fram fór í gærkvöld. Smári leyfði jafntefli gegn Jakob bróður sínum en vann allar aðrar skákir. Smári vann því öruggan sigur með 6,5 vinninga af 7 mögulegum. Rúnar ísleifsson varð í öðru sæti og Jakob Sævar í þriðja. Snorri Hallgrímsson vann sigur í yngri flokki.

Lokastaðan: 

                      

  1   Smári Sigurðsson,                  1665 6.5      
 2-3  Rúnar Ísleifsson,                  1695 5      
      Jakob Sævar Sigurðsson,            1683 5       
  4   Hermann Aðalsteinsson,             1336 4.5      
 5-6  Snorri Hallgrímsson,               1323 4        
      Sigurjón Benediktsson,             1520 4       
  7   Ármann Olgeirsson,                 1413 3.5   
 8-9  Sigurbjörn Ásmundsson,             1201 3        
      Hlynur Snær Viðarsson,             1096 3        
 10   Árni Garðar Helgason,                   1.5      
11-12 Sighvatur Karlsson,                1318 1        
      Valur Heiðar Einarsson,            1127 1