Nýr sigurvegari í Ásgarði - Ari Stefánsson vann

Það mættu tuttugu og sex heldri skákmenn til leiks í Ásgarði í gær. Ari Stefánsson sem er nýfarinn að tefla með Ásum varð efstur ásamt Stefáni Þormar, báðir með 7½ vinning.

Ari tefldi allar níu umferðirnar á efsta borði sem er met þarna að sögn kunnugra.  Hann tapaði engri skák en gerði þrjú jafntefli.

Ari er gamalreyndur í skákinni, uppalinn á Hólmavík þar sem mikið skáklíf var þegar hann var að alast upp þar.

Jafnir í þriðja til fjórða sæti með 6 vinninga urðu Gunnar Finnsson og Sæbjörn Larsen.

Nánari úrslit:

• 1-2    Ari Stefánsson                         7.5
•           Stefán Þormar                         7.5
• 3-4    Gunnar Finnsson                     6
•           Sæbjörn Larsen                       6
• 5-6    Valdimar Ásmundsson            5.5
•           Trausti Pétursson                    5.5
• 7-11  Þorsteinn Guðlaugsson           5
•           Jón Steinþórsson                     5
•           Haraldur Axel                         5
•           Kristján Guðmundsson           5
•           Bragi G Bjarnarson                 5
• 12-18 Ásgeir Sigurðsson                             4.5
•           Birgir Ólafsson                        4.5
•           Gísli Sigurhansson                            4.5
•           Gísli Árnason                          4.5
•           Jón Víglundsson                      4.5
•           Birgir Sigurðsson                    4.5
•           Baldur Garðarsson                           4.5

Næstu átta skákmenn létu sér nægja aðeins færri vinninga í þetta sinn.

Lenka efst í áskorendaflokki

Lenka Ptácníková (2289), stórmeistari kvenna, er efst í áskorendaflokki með fullt hús að lokinni fjórðu umferð áskorendaflokks sem fram fór í kvöld eftir sigur á Haraldi Baldurssyni (1991).   Guðmundur Kjartansson (2357), Einar Hjalti Jensson (2245), sem gerðu jafntefli, og Magnús Magnússon (1982) eru í 2.-4. sæti með 3,5 vinning.

Úrslit fjórðu umferðar má finna hér. Stöðu mótsins má finna hér.  

Fimmta umferð fer fram á morgun og hefst kl. 18.  Pörun hennar má finna hér.

Eftirfarandi fjórar skákir verða sýndar beint á morgun. 

• Lenka - Guðmundur
• Einar Hjalti - Magnús
• Grímur Björn Kristinsson - Páll Sigurðsson
• Árni Guðbjörnsson - Haraldur Baldursson

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS)

 

Teflt í afskekktasta þorpi norðurslóða

Arnar Valgeirsson, Stefán Bergsson, Jón Birgir Einarsson og Hrafn Jökulsson eru þessa dagana í mikilli heimsókn í Ittoqqortoormiit í Grænlandi sem er afskekktasta þorp á Norðurslóðum.  Í gær var viðtal við Hrafn í Síðdegisúvarpi Rásar 2 þar sem hann lýsir skemmtilegri upplifun þeirra félaga og afar jákvæðum viðbrögðum við heimsókn þeirra.   

Viðtalið við Hrafn

Fimm skákmenn efstir og jafnir í áskorendaflokki

Fimm skákmenn eru efstir og jafnir í áskorendaflokki með fullt hús eftir þriðju umferð sem fram fór í dag.  Það eru Lenka Ptácníková (2289), Guðmundur Kjartansson (2357), Einar Hjalti Jensson (2245), Haraldur Baldursson (1991) og Patrekur Maron Magnússon (1974).  Úrslit þriðju umferðar má finna hér.

Stöðu mótsins má finna hér.  

Fjórða umferð fer fram á mánudag og hefst kl. 18.  Pörun hennar má finna hér.

Eftirfarandi fjórar skákir verða sýndar beint á morgun. 

• Guðmundur - Einar Hjalti
• Haraldur - Lenka
• Patrekur - Magnús Magnússon
• Páll Sigurðsson - Einar Valdimarsson

Góð þátttaka er á mótinu en 54 skákmenn taka þátt.  Meðal keppenda eru alþjóðlegi meistarinn Guðmundur Kjartansson, Lenka Ptácníková, stórmeistari kvenna og Einar Hjalti Jensson, sem eins og kunnugt er náði áfanga að alþjóðlegum meistaratitli á N1 Reykjavíkurskákmótinu.  Tvö efstu sætin á mótinu nú gefa sæti í landsliðsflokki 2012 eða 2013. 

• Heimasíða mótsins
• Beinar útsendingar
• Chess-Results
• Myndaalbúm (OS)

 

Logi Rúnar Jónsson Akureyrarmeistari

Skákþing Akureyrar í barna- og unglingaflokkum fór fram laugardaginn 31. mars og voru keppendur 14.  Úrslit urðu þessi:

Logi Rúnar Jónsson	6
Símon Þórhallsson	5,5
Jón Kristinn Þorgeirsson	5,5
Hjörtur Snær Jónsson	4,5
Andri Freyr Björgvinsson	4,5
Friðrik Jóhann Baldvinsson	4
Óliver Ísak Ólason	3
Hermann Helgi Rúnarsson	3
Tinna Ósk Rúnarsdóttir	3
Arnar Logi Kristjánsson	3
Gunnar Aðalgeir Arason	3
Júlíus Þór Björnsson Waage	2
Þorgeir Sólveigar Gunnarsson	1,5
Anton Heiðar Erlingsson	0,5

Stigahæstu keppendunum, Jóni Kristni og Andra Frey, gekk brösuglega í upphafi móts og töpuðu báðir í 2. umferð; Jón fyrir Loga og Andri fyrir Símoni. Logi vann hinsvegar fjórar fyrstu skákir sínar og komst taplaus í gegnum mótið. Það stóð þó tæpt í síðustu umferð þegar hann var með tapaða stöðu gegn Andra Frey, en tókst með harðfylgi að ná jafntefli. Góður árangur hjá Loga, sem hefur verið iðinn við kolann í vetur.

Þessir urðu skákmeistarar í einstökum flokkum:

Í barnaflokki: Oliver Ísak Ólason

Í piltaflokki: Símon Þórhallsson

Í stúlknaflokki: Tinna Rún Ómarsdóttir

Í drengjaflokki: Logi Rúnar Jónsson

Heimasíða SA

Lokamót í Bikarsyrpu OB.LA.DI. OB.LA.DA.

Í kvöld verður lokamótið, svo verða úrslitin útkljáð um páskadagana, auglýst sérstaklega síðar. Rétt er að benda á að vinningarnir í kvöld gilda þrefalt, það er enn  möguleiki fyrir þá sem hafa mætt illa eða aldrei.

Úrslitariðlarnir verða tveir þ.e. Elítugrúppan og svo Heiðursmannagrúppan, sex skákmenn í hvorum riðli, valið verður í riðla eftir sérstöku OB.LA.DI.  OB.LA.DA. kerfi. Forgjafakerfið fræga verður notað í kvöld, teflt verður í höfuðstöðvum OB.LA.DI.  OB.LA.DA. að Frakkastíg 28, taflmennska hefst kl.19.00.

Góð verðlaun eru í hverju móti fyrir sig, svo eru enn glæsilegri verðlaun í úrslitariðlunum. Þátttaka er ókeypis. Stöðuna eftir sex mót má sjá hér...  http://www.facebook.com/pages/Obladi-Oblada/139540706057159 Mótstjóri er Róbert Harðarson sími 6969658.

Breska deildakeppnin: Bragi vann - Hjörvar jafntefli

Ekki gekk alveg jafn vel hjá okkar mönnum í Jutes of Kent í 8. umferð bresku deildakeppninnar og í þeirri sjöundu í gær.  Bragi Þorfinnsson (2421) vann engu að síður alþjóðlega meistarann Jose Fernando Cuenca Jimenez (2472) og Hjörvar Steinn Grétarsson (2460) gerði jafntefli við stórmeistarann David Smerdon (2512).   Jutes of Kent tapaði viðureigninni 2-6 þannig að þeir tveir fengu bróðurbartinn að vinningunum!

Björn Þorfinnsson (2416) og Ingvar Þór Jóhannesson (2331) töpuðu hins vegar.  Björn fyrir stórmeistaranum Alexander Cherniaev (2488) og Ingvar fyrir stórmeistaranum Anthony Kosten (2492).

Bragi stóð sig best strákanna, hlaut 2 vinninga, Hjörvar fékk 1,5 vinning, Ingvar 1 vinning og Björn 0,5 vinning.  

Keppninni verður framhaldið 5.-7. maí

Breska deildakeppnin

Skákþáttur Morgunblaðsins: Hannes og Héðinn í eldlínunni á EM í Plovdiv

Hannes Hlífar Stefánsson og Héðinn Steingrímsson stóðu sig báðir vel á fyrstu mótum skákvertíðarinnar hérlendis sem hófst með lokakeppni Íslandsmóts taflfélaga á Selfossi og Reykjavíkurskákmótið. Héðinn hafði vinninginn ef eitthvað var en á Evrópumeistaramóti einstaklinga sem hófst í Plovdiv í Búlgaríu þriðjudaginn hefur dæmið snúist við að þessu leyti: eftir þrjár umferðir af ellefu hefur Hannes hefur hlotið 2½ vinning og er í en Héðinn er með 1½ vinning. Ellefu skákmenn höfðu unnið allar skákir sínar eftir fyrstu þrjár umferðirnar. Þetta öfluga mót dregur til sín 344 keppendur þar af 176 stórmeistara, 23 efstu komast áfram í heimsbikarkeppni FIDE.

Meðal nýjunga sem evrópska skáksambandið hefur innleitt á þessu móti er regla, náskyld Sofiu-reglunni sem bannar jafnteflisboð, að ekki má bjóða jafntefli fyrir 40. leik. Leiki grunur á því að keppendur hafi samið jafntefli fyrirfram getur skákstjóri dæmt tap á báða. Aðrar reglur umdeildar þegar þær voru teknar en hafa reynst býsna vel eru áfram í gildi: sitji skákmaður ekki við borðið við upphaf umferðar tapast viðureignin strax, hringing farsíma jafngildir tapi. Þær reglur sem mesta athygli hafa vakið varða konurnar en nú er blátt bann lagt við eggjandi klæðaburði, ekki má heldur sjást í brjóstaskoruna og þar fram eftir götunum. þess má geta að Íslendingar eiga sinn fulltrúa í Plovdiv sem áreiðanlega mun standa sig vel í því að framfylgja öllum þessum nýju reglum á mótinu. Gunnar Björnsson, forseti SÍ, er meðal skákdómara á staðnum. Það er eitthvað sem segir manni að Hannes Hlífar muni eiga gott mót. Hann hefur unnið skákir sínar án þess að hafa mikið fyrir því sem oftast veit á gott.

Hannes Hlífar Stefánsson - Bojan Vuckovic

Grünfelds vörn

1. d4 Rf6 2. Rf3 g6 3. g3 Bg7 4. Bg2 0-0 5. c4 d5 6. cxd5 Rxd5 7. 0-0 Rb6 8. Rc3 Rc6 9. e3 He8 10. d5 Ra5 11. Rd4 Bd7 12. b3 Hc8

Kasparov lék 12.... c5 í skák við Ljubojevic endur fyrir löngu. Því má svara með 13. Rde2 og riddarinn svarti á a5 stendur illa.

13. Bb2 c6 14. e4 cxd5 15. exd5 Rbc4!?

Óvæntur leikur sem byggist á hugmyndinni 16. bxc4 Db6! t.d. 17. Rb3 Rxc4 o.s.frv. Hvítur leikur betur með 17. Re6 sem leiðir til afar flókinnar baráttu. En Hannes velur öruggasta leikinn.

16. Bc1! Rd6 17. Rce2 Bf5 18. Rf4 Be4 19. Bh3 Rf5 20. Rxf5 Bxf5?

Betra var 20.... gxf5 en eftir 21. Be3 Bxa1 22. Dxa1 hefur hvítur góðar bætur fyrir skiptamun.

21. Bxf5 Bxa1

Og hér var betra að leika 21.... gxf5 þó hvíta staðan sé vænlega eftir 22. Hb1 t.d. 22.... e5 23. Rh5 o.s.frv.

22. Bxc8 Dxc8 23. Bd2! Bc3 24. d6!

Snjall leikur sem seur svartan í mikinn vanda ar sem ekki gengur 24.... exd5 vegna 25. Rd5! bxd2 26. Dxd2 og vinnur.

24.... Bxd2

- stöðumynd -

25. Rd5!

Bráðsnjall millileikur. Hörfi biskupinn t,.d. 25.... Bg5 kemur 26. d7! og þar sem 25.... Dxd7 strandar á 26. Rf6+! og drottningin felur tapar svartur hróknum á e8.

25.... Rc6 26. Dxd2 Re5?

Serbinn átti um tvær 2 mínútur eftir á klukkunni og fann ekki einu vörnina, 26.... Dd8 27. cxd6 Dd6! og enn er hægt að verjast þó hvítur eigi góðar sigurlíkur efir 28. He1 eða 28. Hd1.

27. De3 exd6 28. Rf6+

- og svartur gafst upp. Eftir 28.... Kg7 29. Rxe8+ Dxe8 30. f4 tapast maður til viðbótar.

Helgi Ólafsson [e-mail]

-------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 25. mars 2012

Skákþættir Morgunblaðsins

[Event "13th European Individual Championship"] [Site "Plovdiv BUL"] [Date "2012.03.21"] [EventDate "2012.03.20"] [Round "2"] [Result "1-0"] [White "Hannes Stefansson"] [Black "Bojan Vuckovic"] [ECO "D76"] [WhiteElo "?"] [BlackElo "?"] [PlyCount "56"] 1. d4 Nf6 2. Nf3 g6 3. g3 Bg7 4. Bg2 O-O 5. c4 d5 6. cxd5 Nxd5 7. O-O Nb6 8. Nc3 Nc6 9. e3 Re8 10. d5 Na5 11. Nd4 Bd7 12. b3 Rc8 13. Bb2 c6 14. e4 cxd5 15. exd5 Nbc4 16. Bc1 Nd6 17. Nce2 Bf5 18. Nf4 Be4 19. Bh3 Nf5 20. Nxf5 Bxf5 21. Bxf5 Bxa1 22. Bxc8 Qxc8 23. Bd2 Bc3 24. d6 Bxd2 25. Nd5 Nc6 26. Qxd2 Ne5 27. Qe3 exd6 28. Nf6+ 1-0

Ballið er byrjað í ísbjarnarbænum: Meira en 40 keppendur fyrsta daginn!

Leikgleðin var í aðalhlutverki þegar leiðangursmenn Hróksins og Kalak blésu til fyrsta stórmótsins í Ittoqqortoormiit, einangraðsta þorpi norðurslóða. Þar með hófst páskaskákhátíðin, fimmta árið í röð og er óhætt að segja að skákin hafi slegið ærlega í gegn í þessum 470 bæ, þar sem ísbirnir eru einatt á vappi.

Keppt var í nokkrum aldursflokkum og í flokki 9 til 12 ára urðu Ivan, Niels og Didu í efstu sætum eftir jafna og skemmtilega baráttu.

Í flokki 13 til 16 ára var keppendur skipt í tvo riðla vegna mikillar þátttöku. Í A-flokki tefldu bræðurnir Sikkersooq og Aannquaq til úrslita, og þar sigraði sá fyrrnefndi eftir æsispennandi skák sem vakti mikla athygli. Næst komu Seth og Janu.

Í hinum flokkum urðu systurnar Sara og Sikkerninnguaq efastar og jafnar, og deildu gullverðlaunum.

Flokkur 17 ára og eldri var vel skipaður en táningurinn Emil Arge gaf engin grið og sigraði í öllum skákum sínum.

Helstu hjálparhellur við mótshaldið voru Knud Eliasson kennari og heiðursfélagi Hróksins, auk þess sem við nutum dyggrar aðstoðar hinnar ungu Sikkerninnguaq, sem er uppvaxandi skipuleggjandi ekki síður en skákdrottning.

Frábær byrjun á 70. breiddargráðu.

Í fyrramálið förum við í heimsókn í skólann, og allt skólalíf verður lagt undir skáklistina. Seinnipartinn munu svo Hrafn Jökulsson og Stefán Bergsson tefla fjöltefli við börn og fullorðna og má búast við glens og gamni.

Bæjarbúar hafa tekið okkur tveimur höndum, enda er þetta fimmta árið í röð sem leið Hróksins og Kalak liggur til Ittoqqortoormiit. Heimsóknin núna markar jafnframt upphafið að tíunda starfsári Hróksins á Grænlandi.

Það er líka gaman að finna hve Grænlendingar hafa Íslendinga í miklum hávegum og líta á þá sem nánustu vini sína og samherja í heiminum.

Og við getum með sanni sagt að það eru forréttindi að eiga slíka nágranna, því ekkert land í heiminum jafnast á við Grænland og fólkið hér er einstaklega velviljað, hjálpsamt og elskulegt.

Áfram Grænland!

Myndaalbúm frá fyrsta mótinu 2012!

 Fleiri frétt og myndir af skáklandnámi á Grænlandi

Aprílgöbb á Skák.is

Smá púki greip ritstjórann og tvö aprílgöbb komu í dag á Skák.is.  Annað tengt Íslandsmótinu í hraðskák og hitt tengt EM einstaklinga á Íslandi 2013.   Ritstjóri ætlaði að senda pósta á þá sem höfðu skráð sig á Íslandsmótið í dag en það fórst fyrir vegna vandræða sem hann lenti í París við millilendingu þar frá Plovdid.  Ritstjóri biður alla þá sem mættu í Faxafenið í dag innilegrar afsökunar.