Jóla "Stuð" Mót Gallerý Skákar - Róbert yfirburðasigurvegari

Þó nokkrir hátíðisdagar séu liðnir í aldanna skaut og árið líka síðan JólaStuðMót Gallerý Skákar var haldið milli jóla og nýárs er kannski vert að gera því örlítil  skil með smápistli áður en nýtt leikár hefst með Nýársmótinu þann 3. janúar 2013 í skákmusterinu í Bolholti.
 
20 staffírugir og skákgírugir keppendur á öllum aldri voru mættir til tafls í vikunni sem leið. Þó var ekki alveg laust við að það nokkur flóttasvipur væri á sumum þeirra rétt eins og þeir hefðu stolist að heiman í miðri jólagleðinni vegna bráðaskákóþols eða óróa.  Flestir reyndust líka vera í miklu óstuði,  með hugann við eitthvað annað þegar fínar stöður tóku að fjúka út um gluggann og glæstir vinningar að ganga þeim úr greipum rétt eins og hendi væri veifað.    Svo yfirskriftin „verði stuð“  gekk ekki eftir í þetta sinn.  Vonandi ná menn vopnum sínum á nýju ári. 

Snemma varð ljóst að einn góður gestur kunni meira fyrir sér eftir því sem hann lét minna yfir sér. Það var eins og Róbert Harðarson væri bara  í „class of his own“  líkt og stundum var sagt um nafna hans Bobby Fischer heitinn meðan hann best var og hét. Friðgeir Hólm náði þó að næla í hálfan vinning gegn honum í fyrstu umferð en síðan ekki söguna meir.  Herr Lagerman, forseti Hróksins,  vann mótið með fádæma yfirburðum enda í  allt öðrum styrkleikaflokki en hinir eins og dæmin sanna af þátttöku hans í (hrað) skákmótum hér heima, í Slóveníu og víðar um lönd.  Synd að hann skuli ekki vera orðinn alþjóðlegur meistari fyrir löngu. 

Aðrir keppendur máttu sætta sig við að reita einn og einn vinning hver af öðrum rétt eins og fyrri daginn og þar sannaðist að sumir eru slóttugri bragða- og klækjarefir en aðrir þegar þeir eru komnir með koltapaðar stöður og væri sæmst að gefast upp.   Annars urðu úrslit mótsins mjög skringileg að þessu sinni og hinir mætustu menn urðu fyrir ótrúlegustu skakkaföllum þrátt sín háu skákstig eða fyrirfram mat veðbanka og matsfyrirtækja.  Samræður milli manna  tóku fljótt að snúast um hvað þeir væru komnir með marga niður, rétt eins og það væri aðalkeppikeflið eða þá að menn væru þegar byrjaðir að telja niður árið

Friðgeir K. Hólm tefldi þó einna skást sem dugði honum til 2. sætis, engu að síður með þrjá og hálfan vinning niður og  Þór Valtýsson alræmd aflakló að Norðan líka með „aðeins“  fjóra niður.  Aðrir valinkunnir kappar eins og Kópavogsstórveldið og  Staðarhaldarinn voru með enn fleiri vinninga niður og trúðu vart sínum eigin „fingrum“,  hvað þá þeir sem dugði að telja vinninga sína á fingrum annarrar handar og voru með meira en 50% niður.  Sumir urðu bara einna fegnastir þegar mótinu lauk því þá var boðið upp á glæsilegt vinningahappdrætti með   betri „vinnings“möguleikum en á 64 reitum.  

Verðlaun voru dýrindis súkkulaði „kærleikstré“ og nammipakkar frá aðalstuðningsaðila mótsins, KÓLUS – Sambó sælgæti ehf, sem tryggði að enginn fór tómhentur heim hvað sem öðru leið.  Yngispilturinn snjalli Vignir Vatnar fékk að draga út vinningsnúmerin og fór létt með að draga út nafn föður síns sem fékk annan aðalvinninginn og gaf honum. Sigurður E. Kristjánsson hinn drjúgi líka og svo fékk sigurvegarinn stóra sín sigurlaun silfurfati. 

Nánari úrslit má sjá hér að neðan og myndasafn fylgir einnig. 

 

 

Vonandi verður hið nýja ár gjöfult fyrir og gott fyrir íslenska skákmenn og skákhreyfinguna.  SkákGallerýið stendur öllum skákþyrstum ástríðuskákmönnum opið öll fimmtudagskvöld fram á vor. Skákárið þar byrjar strax annað kvöld (3. Janúar) kl. 18 með NÝÁRSMÓTINU þar sem sitthvað verður um dýrðir.  Tefldar verða 11 umferðir með 10 mín. uht. eins og jafnan.   Lagt í púkk fyrir matföngum, kaffi og kruðeríi.   Kappteflið um FRIÐRIKSKÓNGINN II. hefst svo 24. janúar í tengslum við Íslenska skákdaginn.  Þar er um að ræða 4 kvölda mótaröð þar sem 3 bestu mót hvers keppanda telja til vinningsstiga.  Gleðilegt Nýár.

 

ESE- Skákþankar 2.1.2013

Guðmundur í miklu stuði í Hastings - stórmeistari lagður í dag

Alþjóðlegi meistarinn Guðmundur Kjartansson (2404) er í miklu stuði á Hastings Chess Congress. Í sjöttu umferð, sem fram fór í dag, vann hann úkraínska stórmeistarann Andrey Vovk (2567). Guðmundur hefur hlotið 4 vinninga og er í 2.-7. sæti.

Hjörvar Steinn Grétarsson (2516) gerði jafntefli við enska alþjóðlega meistarann Jack Rudd (2288). Hjörvar hefur 3,5 vinning og er í 8.-19. sæti. 

Ítalski stórmeistarinn Daniel Vocaturo (2521) er efstur með 4,5 vinning.

Í 6. umferð, sem fram fer á morgun, teflir Guðmundur við litháíska stórmeistarann Sarunas Sulkis (2550) en Hjörvar við indónesísku skákkonuna Chelsea Monica Sihite (2277) sem er alþjóðlegur meistari kvenna.

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Jón Kristinn vann Nýársmót SA

Í dag fór fram hið árlega nýársmót Skákfélags Akureyrar.  9 keppendur mættu til leiks og tefldu tvær umferðir, allir við alla, með 5 mín. umhugsunartíma.  Skemmst er frá því að segja að Jón Kristinn Þorgeirsson sigraði með glæsibrag og hlaut 14 vinninga af 16. Næstir urðu þeir nafnar Sigurður Eiríksson og Arnarson með 12 vinninga hvor. Fjórði var Sveinbjörn Sigurðsson með 8,5 vinning en aðrir hlutu færri vinninga.

80 ára afmælismót Magga Pé og kappinn sleginn til riddara

Magnús V. Pétursson, forstjóri, milliríkjadómari og ástríðuskákmaður varð áttræður á gamlársdag. Af því tilefni var efnt til sérstaks „leyniboðsmóts" og afmælisfagnaðar honum til heiðurs í húsakynnum Jóa Útherja í gær. Hann vissi ekkert um hvað til stóð og hvers var von. Þátttakendur voru 12 talsins úr hans vinahópi. Úrslit þess urðu þau að Bragi Þorfinnson, hraðskákmeistari Íslands, sigraði með 6.5 vinningi af sjö og stórmeistararnir Jón L. Árnason og Jóhann Hjartarsson urðu í 2. og 3. sæti. Mótstöflu og myndir af vettvangi má sjá á síðunni og í myndalbúmi.

Maggi Pé er sem kunnugt er víðfrægur og virtur milliríkjadómari í knattspyrnu og handbolta og hefur dæmt fjölda félagsliða og  landsleikja erlendis og fleiri leiki í efstu deild hér á landi en nokkur annar.  Hann varð fyrstur til að gefa gult spjald á Melavellinum 1951  (sem Helgi Daníelsson, markvörður fékk fyrri kjaftbrúk) og einnig fyrstur til að gefa mönnum rauða spjaldið hér á landi og senda menn af velli. (þegar hann rak Ellert Scram og Baldur Árnason ÍA af velli árið 1955 fyrir áflog).

Magnús er Þróttari og var einn af stofnendum Skákdeildar Þróttar á sínum tíma og starfaði þá náið með Halldóri Sigurðssyni fisksala stofnanda félagsins. Á síðari árum hefur Magnús ekki aðeins verið drjúgur við að tefla sjálfum sér til ánægju og yndisauka einkum í hópi eldri borgara með góðum árangri  heldur hefur hann og hans ágæta fyrirtæki áður Hoffell nú Jói Útherji, verið iðið við að styðja  skákklúbba myndarlega til mótahalds um árabil. Má þar nefna sérstaklega skákklúbba eldri borgara, Æsi og Riddarann, sem og  KR og fleiri, en Magnús hefur gefið bikara og aðra verðlaunagripi til móta á þeirra vegum.   

Magnús hefur unnið sér margt til frægðar á skáksviðinu m.a. að gera jafntefli við Mikhail Tal, fyrrv. heimsmeistara í skák árið 1957 í Moskvu, sem líkti skákstil Magnúsar við Paul Morphy, eins mesta skáksnillings sem uppi hefur verið.  Þess má og minnast að  M. Pétursson tefldi víðfræga tapskák við Bent Larsen í klukkufjöltefli árið 1989, á loftinu hjá Gunna Gunn í Ísafold,  sem að var vikið nýlega í pistli um Larsen, sem endaði með tvöföldu biskupsmáti. 

Á hátíðarfundi í Gallerý Skák fyrir tveimur árum var Magnús útnefndur skáköðlingur ársins og veitt sérstök "Skákorða" af  Skákefli vf (vinafélagi), sem stendur að því, fyrir framlag sitt til íslenskra skákmála yfir 60 ára skeið.  Fór hún í safn 11 gullmerkja, sem honum hefur áður hlotnast frá íþróttahreyfingunni.

Að þessu sinni í tilefni af áttræðisafmælinu var hann heiðraður enn frekar af RIDDARANUM í virðingar- og þakklætisskyni fyrir ómetanlegan stuðning hans við klúbbinn og skákmót á hans vegum (Æskuna og Ellina) og ekki hvað síst fyrir lofsvert framlag hans til skákhreyfingarinnar á Íslandi um margra áratugaskeið. 

Við sérstaka athöfn í mótslok var Magnús sleginn til heiðursstórriddara klúbbsins og reitaða borðsins með táknrænum hætti og lostinn 4 sverðshöggum af virðingu og þökk fyrir 1) Tryggð hans við skákgyðjuna; 2) Höfðingskap hans og háttvísi; 3) Djörfung hans, dómgæslu og drengskap;  og 4) Fyrir einbeittan sigurvilja á skákborðinu. Þessu til staðfestu var honum síðan afhentur heiðurskjöldur með ágreyptu nafni hans og mynd ásamt viðurkenningarskjali. Þá var honum og hans fólki  færðar innilegar hamingjuóskir og óskað velfarnaðar í bráð og lengd.

Þá mætti Raggi Bjarna (78) á staðinn og gestir sungu afmælissönginn og fleiri létt lög Magnúsi Pé til dýrðar áður en þeir héldu til síns heima til að fagna nýju ár og kveðja það gamla  Einhverjir flugeldar munu einnig hafa farið á loft tileinkaðir honum að venju.   

Gleðilegt nýár!

ESE- 01.01.2013

Einar Kr. sigraði á Volcano-mótinu

Fjórtán galvaskir taflmenn mættu á hið árlega Volcano skákmót í Vestmannaeyjum á gamlársdag.  Tefldar voru 13 umferðir hraðskák, allir við alla.  Veitingahúsið Volcano gaf verðlaunin, sem voru af veglegri gerðinni.  Veitt voru verðlaun fyrir efstu menn og einnig fyrir grunnskólanemendur.

Einar K. Einarsson og Sigurjón Þorkelsson voru í banastuði og í mótinu í heild stóðu þeir efstir og jafnir með 11 vinninga og tefldu bráðabana um efsta sætið og vann Einar einvígið 1,5-0,5.  Í næstu sætum voru svo feðgarnir Nökkvi og Sverrir og voru aðeins 1/2 vinningi á eftir.

Í yngri flokki sigraði Kristófer Gautason með 8 vinninga, en Sigurður og Jörgen komu næstir með 2,5 vinninga.  Jörgen stóð sig vel og lagði sér kunnari kappa, en gekk ekki eins vel á móti sínum jafnöldrum.

Sjá nánar á heimasíðu TV (mótstafla).

Ný alþjóðleg skákstig

Ný alþjóðleg skákstig komu út í dag, 1. janúar 2013. Litlar breytingar eru frá desember-listanum. Jóhann Hjartarson (2592) er stigahæstur. Birkir Karl Sigurðsson og Jón Birgir Einarsson hækka mest frá desember-listanum eða um 28 skákstig. Oliver Aron Jóhannesson hækkaði mest á árinu 2012 eða um heil 299 skákstig.

Í úttektinni nú var teknar saman hækkanir síðasta árið auk þess sem ritstjóri tók saman fjölda reiknaðra skáká á árinu á þeim sem hafa meira en 2400 skákstig en því miður er ekki hægt að taka saman fjölda skáka hvers skákmanns nema með töluverðri handavinnu.

Henrik Danielsen var virkastur þessara skákmanna með 158 skákir en í næstum sætum eru Guðmundur Kjartansson (134), Hjörvar Steinn Grétarsson (75) og Hannes Hlífar Stefánsson (75). Sex þessara skákmanna tefldu aðeins í Íslandsmóti skákfélaga.

Topp 20:

Nr.	Nafn	Tit	Stig	Fj.	Br.	Br. 2012	Fj. 2012
1	Hjartarson, Johann	GM	2592	0	0	7	6
2	Steingrimsson, Hedinn	GM	2560	0	0	4	36
3	Olafsson, Helgi	GM	2547	0	0	1	10
4	Petursson, Margeir	GM	2532	0	0	-8	3
5	Gretarsson, Hjorvar Steinn	IM	2516	0	0	46	75
6	Stefansson, Hannes	GM	2512	0	0	-22	75
7	Danielsen, Henrik	GM	2507	0	0	-29	158
8	Arnason, Jon L	GM	2498	0	0	-5	5
9	Kristjansson, Stefan	GM	2486	0	0	-14	27
10	Thorfinnsson, Bragi	IM	2484	0	0	58	68
11	Gretarsson, Helgi Ass	GM	2464	0	0	2	1
12	Thorsteins, Karl	IM	2464	0	0	-1	7
13	Thorhallsson, Throstur	GM	2441	0	0	41	55
14	Gunnarsson, Arnar	IM	2440	0	0	-1	4
15	Olafsson, Fridrik	GM	2416	8	-3	-15	24
16	Gunnarsson, Jon Viktor	IM	2413	0	0	-11	28
17	Kjartansson, Gudmundur	IM	2408	22	4	82	134
18	Bjornsson, Sigurbjorn	FM	2391	0	0	12
19	Ulfarsson, Magnus Orn	FM	2386	0	0	0
20	Thorfinnsson, Bjorn	IM	2386	0	0	-20

 

Listann í heild sinni má finna í PDF-viðhengi sem fylgir fréttinni.

Mestu hækkanir frá desember-listanum

Birkir Karl Sigurðsson og Jón Birgir Einarsson hækkuð mest frá desember-listanum eða 28 stig. Einar Hjalti Jensson var þriðji með 17 stiga hækkun.

Nr.	Nafn	Tit	Stig	Fj.	Br.	Br. 2012
1	Sigurdsson, Birkir Karl		1753	9	28	59
2	Einarsson, Jon Birgir		1747	4	28	35
3	Jensson, Einar Hjalti	FM	2301	5	17	60
4	Palsson, Halldor		2074	6	16	74
6	Thorarensen, Adalsteinn		1705	7	15	-21
7	Bjornsson, Sverrir Orn		2154	7	14	2
8	Bjarnason, Saevar	IM	2141	5	10	23
9	Sigurjonsson, Siguringi		1959	5	10	15
10	Maack, Kjartan		2136	6	8	3

 

Mestu hækkanir á árinu 2012

Oliver Aron Jóhannesson hækkaði mest allra á árinu 2012 eða um 299 skákstig. Næstur er félagi hans úr Rimaskóla, Jón Trausti Harðarson með hækkun upp á 172 stig. Þriðji er svo Vignir Vatnar Stefánsson með hækkun upp á 166 skákstig. Ungir og efnilegir skákmenn setja mark sitt á listann en „gömlu mennirnir" Guðmundur Kjartansson og Þorvarður F. Ólafsson ná þó inn á topp 10.

Nr.	Nafn	Tit	Stig	Fj.	Br.	Br. 2012	Fj. 2012
1	Johannesson, Oliver		1998	0	0	299
2	Hardarson, Jon Trausti		1843	0	0	172
3	Stefansson, Vignir Vatnar		1627	0	0	166
4	Ragnarsson, Dagur		1954	0	0	128
5	Kolka, Dawid		1635	0	0	111
6	Sigurdarson, Emil		1844	0	0	108
7	Kjartansson, Dagur		1623	0	0	95
8	Karlsson, Mikael Johann		1960	0	0	93
9	Kjartansson, Gudmundur	IM	2408	22	4	82	134
10	Olafsson, Thorvardur		2221	6	-4	79

 

Stigahæstu konur landsins

16 skákkonur á eru listanum. Lenka Ptácníková (2281) er langstigahæst. Í næstum sætum er Guðlaug Þorsteinsdóttir (2041) og Guðfríður Lilja Grétarsdóttir (1984).

Nr.	Nafn	Tit	Stig	Fj.	Br.	Br. 2012
1	Ptacnikova, Lenka	WGM	2281	0	0	-8
2	Thorsteinsdottir, Gudlaug	WF	2041	0	0	-44
3	Gretarsdottir, Lilja	WIM	1984	0	0	-1
4	Thorsteinsdottir, Hallgerdur		1960	0	0	-9
5	Johannsdottir, Johanna Bjorg		1872	0	0	-2
6	Finnbogadottir, Tinna Kristin		1871	0	0	66
7	Birgisdottir, Ingibjorg		1783	0	0	1783
8	Helgadottir, Sigridur Bjorg		1754	0	0	31
9	Kristinardottir, Elsa Maria		1747	0	0	18
10	Fridthjofsdottir, Sigurl. Regina		1714	4	6	-17

 

Stigahæstu ungmenni

44 ungmenni, fædd 1993 eru á listanum. Hjörvar Steinn Grétarsson (2516) er langstigahæstur en Patrekur Maron Magnússon (2003) og Oliver Aron Jóhannesson (1998) eru næstir. 9 af 10 á topp 10 hækkuðu á stigum á árinu 2012.

Nr.	Nafn	Tit	Stig	Fj.	B-day	Br.	Br. 2012
1	Gretarsson, Hjorvar Steinn	IM	2516	0	1993	0	46
2	Magnusson, Patrekur Maron		2003	0	1993	0	29
3	Johannesson, Oliver		1998	0	1998	0	299
4	Sverrisson, Nokkvi		1990	0	1994	0	60
5	Karlsson, Mikael Johann		1960	0	1995	0	93
6	Johannsson, Orn Leo		1956	0	1994	0	15
7	Ragnarsson, Dagur		1954	0	1997	0	128
8	Johannsdottir, Johanna Bjorg		1872	0	1993	0	-2
9	Sigurdarson, Emil		1844	0	1996	0	108
10	Hardarson, Jon Trausti		1843	0	1997	0	172

 

Stighæstu öðlingar

37 öðlingar, fæddir 1953 og fyrr eru á listanum. Friðrik Ólafsson (2416) er langstigahæstur en í næstum næstu sætum eru Jónas Þorvaldsson (2286) og Áskell Örn Kárason (2235). Sá síðarnefndi er „nýliði" á lista yfir öðlinga.

Nr.	Nafn	Tit	Stig	Fj.	B-day	Br.	Br. 2012
1	Olafsson, Fridrik	GM	2416	8	1935	-3	-15
2	Thorvaldsson, Jonas		2286	0	1941	0	-3
3	Karason, Askell O		2235	0	1953	0	-21
4	Thorsteinsson, Bjorn		2209	0	1940	0	8
5	Viglundsson, Bjorgvin		2200	0	1946	0	-10
6	Fridjonsson, Julius		2185	7	1950	-1	-8
7	Halldorsson, Bragi		2180	0	1949	0	2
8	Gunnarsson, Gunnar K		2168	0	1933	0	-15
9	Georgsson, Harvey		2163	0	1943	0	-25
10	Thorvaldsson, Jon		2152	0	1949	0	2152

Reiknuð íslensk skákmót

• Skákþing Garðabæjar
• Vetrarmót öðlinga

 

Stigahæstu skákmenn heims

Magnus Carlsen (2861) er stigahæsti skákmaður heims og reyndar stigahæsti skákmaður allra tíma. Í næstum sætum eru Vladimir Kramnik (2810) og Levon Aronian (2802).

Rank	Name	Title	Country	Rating	Games	B-Year
1	Carlsen, Magnus	g	NOR	2861	8	1990
2	Kramnik, Vladimir	g	RUS	2810	8	1975
3	Aronian, Levon	g	ARM	2802	8	1982
4	Radjabov, Teimour	g	AZE	2793	0	1987
5	Caruana, Fabiano	g	ITA	2781	11	1992
6	Karjakin, Sergey	g	RUS	2780	11	1990
7	Anand, Viswanathan	g	IND	2772	8	1969
8	Topalov, Veselin	g	BUL	2771	0	1975
9	Nakamura, Hikaru	g	USA	2769	8	1987
10	Mamedyarov, Shakhriyar	g	AZE	2766	11	1985

 

 

Skrár tengdar þessari bloggfærslu:

• Skákstig 1. janúar 2013

Hastings: Guðmundur með jafntefli við Pert

Alþjóðlegi meistarinn Guðmundur Kjartansson (2404) gerði jafntefli við enska stórmeistarann Nicholas Pert (2557) í 4. umferð Hastings Chess Congress sem fram fór í gær. Hjörvar Steinn Grétarsson (2516) sat yfir í gær vegna magapestar sem herjaði á hann. Hjörvar fékk hálfan vinning fyrir yfirsetuna. Báðir hafa þeir 3 vinninga og eru í 5.-17. sæti.

Í 5. umferð, sem fram fer í dag, teflir við Guðmundur við úkraínska stórmeistarann Andrey Vovk (2567) en Hjörvar við enska alþjóðlega meistarann Jack Rudd (2288). 

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Berserkir í banastuði á Atskákmóti Icelandair

Berserkir stóðu undir nafni og sigruðu af talsverðu öryggi á skemmtilegu og vel heppnuðu Atskákmóti Icelandair, sem fram fór um helgina. Berserkir fengu 49,5 vinning af 68 mögulegum. Sveit Íslands varð í 2. sæti með 47 vinninga og Computer Says No hreppti silfrið með 45 vinningum.

Sveit Berserkja var afar harðsnúin, skipuð Jóni Viktori Gunnarssyni, Davíð Kjartanssyni, Þorsteini Þorsteinssyni og Jóni G. Friðþjófssyni. Sigurlaunin voru ekki af verri endanum: Allir fengu farmiða fyrir tvo til Evrópu með Icelandair.

Silfursveit Íslands var skipuð Þresti Þórhallssyni, Daða Ómarssyni, Stefáni Bergssyni, Vigni Vatnari Stefánssyni og Gylfa Þórhallssyni. Þeir fengu allir gjafabréf á veitingastaðinn Satt.

Sveit Computer Says No náði 3. sætinu eftir harða keppni. Liðsmenn sveitarinnar voru Bragi Þorfinnsson, Björn Þorfinnsson, Gunnar Björnsson og Gunnar I. Birgisson. Í verðlaun fengu þeir gjafabréf fyrir tvo í Fontana.

Glæsilegan borðaverðlaun

Glæsileg verðlaun voru einnig í boði fyrir þá sem náðu bestum árangri á hverju borði: Farmiðar fyrir tvo innanlands í boði Flugfélags Íslands og Saga Club Icelandair, gisting í 2 nætur fyrir tvo á Icelandair Hótelum ásamt morgunverðarhlaðborði. Hægt verður að velja um gistingu á Hótel Akureyri eða á Hótel Héraði. Verðlaunin hlutu:

1. borð: Þröstur Þórhallsson 14,5 vinning af 17.

2. borð: Arnar Gunnarsson 14,5 vinninga af 17.

3. borð: Björn Ívar Karlsson 13 vinninga af 17.

4. Jón Trausti Harðarson 14 vinninga af 17.

Atli vann óvæntasta sigurinn

Atli Jóhann Leósson (1766) fékk verðlaun fyrir óvæntasta sigurinn, en hann skellti alþjóðameistaranum Arnari Gunnarssyni (2440) og fékk fyrir afrekið gjafabréf fyrir tvo á veitingastaðinn Satt.

Sigríður Björg besti varamaðurinn

Sigríður Björg Helgadóttir var besti varamaðurinn, fékk 8,5 vinning af 13, og hlaut gjafabréf fyrir tvo á veitingastaðinn VOX og ferðatafl í verðlaun.

Lightweight best undir 8000 stigum

Heildarstigatala liðsmanna á þessu skemmtilega móti mátti ekki fara yfir 8500 skákstig, og voru flestar efstu sveitirnar nálægt þeim mörkum. Sérstök verðlaun voru veitt þeirri skáksveit undir 8000 stigum sem bestum árangri náð. Þau komu í hlut Lightweight (Jóhann Ingvason, Örn Leó Jóhannson, Páll Andrason og Birkir Karl Sigurðsson) sem hlaut 29,5 v af 68 og 12. sæti af 18.

Jorge á leið til Bandaríkjanna

Tveir voru dregnir út til að tefla hraðskák þar sem mikið var í húfi: Ferð fyrir tvo til Bandaríkjanna með Icelandair. Skákina tefldu Jorge Fonseca (2009) og Omar Salama (2294) og hafði Jorge lítið eitt betri tíma til að vega upp stigamismuninn. Jorge tefldi feiknavel og tryggði sér sigurinn og ferð vestur um haf, en Omar fékk gjafabréf fyrir tvo á veitingastaðnum VOX.

Frábært mót

Atskákmót Icelandair 2012 fór framúrskarandi vel fram og er þegar orðið ómissandi hluti af skákmótaflórunni á Íslandi. Fyrirkomulagið reynir mjög á útsjónarsemi liðstjóra við að púsla saman liðum og svo mikið er víst að keppendur skemmtu sér hið besta. Óskar Long, skipulaggjandi mótsins á mikinn heiður skilið fyrir þá miklu vinnu sem að baki liggur!

Úrslit á Atskákmóti Icelandair (Chess Results)

Myndaalbúm (HJ og fleiri)

Fastir liðir eins og venjulega: Davíð Íslandsmeistari í netskák

FIDE-meistarinn Davíð Kjartansson varð í kvöld Íslandsmeistari í netskák þriðja árið í röð. Davíð hefur verið einkar sigursæll um helgina en hann var í liði Berserka sem sigraði á Atskákmóti Skákklúbbs Icelandair sem verður gerð betur skil hér á Skák.is síðar. Arnar E. Gunnarsson og Ingvar Þór Jóhannesson urðu í 2.-3. sæti. 45 skákmenn tóku þátt og þar af margir sem tefldu á Icelandair-mótinu.

Röð efstu manna:

• 1. Davíð Kjartansson 7,5 v. af 9
• 2.-3. Arnar E. Gunnarsson og Ingvar Þór Jóhannesson 7 v.
• 4. Lenka Ptácníková 6,5 v.
• 5.-7. Omar Salama, Rúnar Sigurpálsson og Halldór Brynjar Halldórsson 6 v.
• 8.-14. Guðmundur Gíslason, Jón Kristinsson, Sigurður Ingason, Arnar Þorsteinsson, Birgir Berndsen, Róbert Lagerman og Guðmundur Freyr Hansson 5,5 v.

Frekar úrslit verða birt síðar sem og upplýsingar um aukaverðlaunahafa.

Hjörvar og Guðmundur með jafntefli í Hastings - báðir í skiptu efsta sæti

Alþjóðlegu meistararnir Hjörvar Steinn Grétarsson (2516) og Guðmundur Kjartansson (2404) gerðu báðir jafntefli í 3. umferð Hastings Chess Congress sem fram fór í dag. Báðir eru þeir í efstir með 2,5 vinning en það hafa 11 aðrir skákmenn. Guðmundur gerði jafntefli við enska stórmeistarann Keith Arkell (2470) en Hjörvar við enska alþjóðlega meistarann Jonathan Hawkins (2507).

Í 4. umferð, sem fram fer á morgun gamlársdag teflir Guðmundur við enska stórmeistarann Nicholas Pert (2557) en Hjörvar við Englendinginn Rufus Duff (2114).

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)