Heildarúrslit Íslandsmótsins í netskák

Íslandsmótið í netskák fór fram 30. desember sl. Hér að neðan má finna heildarúrslit mótsins:

1.   BoYzOnE,  Davíð Kjartansson                   2309         7.5  50.5
2.   AphexTwin,  Arnar Gunnarsson                 2403         7.0  51.5
3.   Xzibit,  Ingvar Þór Jóhannesson                 2331         7.0  49.5
4.   velryba,  Lenka Ptacnikova                         2248         6.5  46.5
5.   omariscoff ,  Omar Salama                          2240         6.0  49.0
6.   Keyzer,  Rúnar Sigurpálsson                       2180         6.0  48.0
7.   HaddiBje,  Halldór Brynjar Halldórsson     2205         6.0  39.5
8.   herfa47,  Guðmundur Gíslason                    2331         5.5  48.0
9.   uggi,  Jón Kristinsson                                  2290          5.5  47.0
10. Semtex,  Sigurður Ingason                          1794          5.5  44.0
11. SirJensen64,  Arnar Þorsteinsson                2171          5.5  43.5
12. Flameon,  Birgir Berndsen                          1887          5.5  42.5
13. MRBIG,  Róbert Lagerman                         2301          5.5  42.0
14. freyser,  Guðmundur Freyr Hansson           1984          5.5  41.0
15. Cyprus,  Ögmundur Kristinsson                  2032          5.0  53.0
16. Sonni,  Áskell Örn Kárason                         2223          5.0  47.5
17. Karrppov,  Gunnar Freyr Rúnarsson           1847          5.0  42.5
18. Troubleman, Árni Guðbjörnsson                 1708          5.0  41.0
19.  lelli1, Örn Leó Jóhannsson                         2009          5.0  30.5
20.  Kumli1, Sigurður Arnarson                        1977          4.5  47.5
21.  Vorkunn,  Hrannar Baldursson                   2136          4.5  42.0
22.  Placebo13,  Óskar Long Einarsson             1439          4.5  41.5
23.  Kaleb, Björgvin S. Guðmundsson              2015          4.5  39.0
24.  Vandradur,  Gunnar Björnsson                   2072          4.5  37.5
25.  RiskyMonster, Sigurgeir T. Höskuldsson        0           4.5  35.5
26.  sonursatans,  Páll Andrason                        1877          4.5  34.5
27.  Nappi,  Ingvar Örn Birgisson                      1786          4.5  34.5
28.  Sjonni88,  Sigurjón Þorkelsson                   1907          4.0  43.0
29.   isisis,  Erlingur Þorsteinsson                       2058         4.0  40.0
30.   Zimzz,  Símon Þórhallsson                         1318         4.0  37.5
31.   sun,  Sverrir Unnarsson                              1932          4.0  36.0
32.   Kolskeggur,  Vigfús Ó. Vigfússon             1941          3.5  41.0
33.   albo,  Albert Geirsson                                 1565          3.5  37.5
34.   KarlEgill,  Karl Steingrímsson                   1618          3.5  34.5
35.   skakari1,  Óskar Maggason                        1777          3.5  33.0
36.   qpr,  Kristján Halldórsson                           1767          3.5  32.5
37.   gmagnus,  Gunnar M. Nikulásson              1559          3.5  32.0
38.   Sigurdsson,  Birkir Karl Sigurðsson           1670          3.5  32.0
39.   Haust,  Sigurður Eiríksson                          1927          3.5  25.0
40.   BluePuffin,  Jón Gunnar Jónsson                1681          3.0  41.0
41.   Hilmir-Freyr,  Hilmir Freyr Heimisson       1593          3.0  35.0
42.   Icefox, ?                                                             ?          3.0  31.0
43.   MEISTARINN,  Mykhaylo Kravchuk        1065          2.5  29.5
44.   jonpetur888,  Jón Kristjánsson                         0           2.0  27.0
45.   blablabla,  Ingibjörg Edda Birgisdóttir        1624          1.0  21.5

Aukaverðlaun:

U-2100:

1. Sigurður Ingason, Semtex, (1794) 5,5 v.
2. Birgir Berndsen, Veigar, (1887) 5,5 v.

U-1800:

1. Sigurður Ingason, Semtex, (1794) 5,5 v.
2. Árni Guðbjörnsson, Trobleman, (1708) 5 v.

Stigalausir:

1. Sigurgeir Trausti Höskuldsson,  RiskyMonster  4,5 v.
2. Jón Kristjánsson,  jonpetur888  2,0 v.

Unglingaverðlaun:

1. Símon Þórhallsson,  Zimzz, 4 v.
2. Hilmir Freyr Heimisson,  Hilmir-Freyr,  3 v.

Kvennaverðlaun:

1. Lenka Ptácníková, velryba, 6v.
2. Ingibjörg Edda Birgisdóttir, blablabla,

Öldungaverðlaun (50+):

1. Jón Kristinsson, uggi, 5,5 v. 
2. Róbert Lagerman, MRBIG, 5,5 v.

Það var Taflfélagið Hellir sem hélt mótið og mótsstjóri var Omar Salama.

Hjörvar með jafntefli við GM Jones - Guðmundur vann

Alþjóðlegi meistarinn Hjörvar Steinn Grétarsson (2516) gerði jafntefli við enska stórmeistarann Gawain Jones (2644) í 8. umferð Hastings Chess Congress sem fram fór í dag. Guðmundur Kjartansson (2406) vann Frakkann Mathieu Ternault (2147). Hjörvar hefur 5,5 vinning og er í 5.-14. sæti en Guðmundur hefur 5 vinninga og er í 15.-24. sæti.

Jones er efstur með 6 vinninga ásamt litháíska stórmeistaranum Sarunas Sulkis (2550), spænska stórmeistaranum Daniel Alsina Leal (2511) og kínverski alþjóðlegi meistarinn Rui Gao (2450).

Í 9. og næstsíðustu umferð, sem fram fer á morgun, teflir Hjörvar við kínversku skákkonuna Gu Xiaobing (2209), sem er stórmeistari kvenna, en Guðmundur teflir við enska stórmeistarann Glenn Freyr (2481).

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Skákæfingar fyrir ungmenni mánudögum í Stúkunni

Skákdeild Breiðabliks er með æfingatíma fyrir ungmenni 16-25 ára í Stúkunni við Kópavogsvöll á mánudögum kl 17-19 í vetur.

Þetta verður skákæfingar fyrir ungmenni og stjórnað af ungmennum.

Þetta er einn flottasti skáksalur á landinu og þarna er tækifæri fyrir unga skákmenn til að koma saman tefla, stúdera, fá fyrirlesara, fjöltefli eða bara hvað sem er tengt skák.

Páll Andrason ætlar að stjórna æfingunum og svo hjálpast þáttakendur við að hafa þetta skemmtilegt.
Kjarninn verður ungir skákmenn úr Kópavogi, en utanbæjarmenn eru líka velkomnir!

Fyrsti tíminn verður mánudaginn 7.janúar.

Skákdeild Breiðabliks

KORNAX-mótið hefst á sunnudag

KORNAX mótið 2013 - Skákþing Reykjavíkur hefst sunnudaginn 6. janúar kl. 14. Tefldar verða níu umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14. Teflt er í húsnæði Taflfélags Reykjavíkur að Faxafeni 12.

Dagskrá:

• 1. umferð sunnudag 6. janúar kl. 14
• 2. umferð miðvikudag 9. janúar kl. 19.30
• 3. umferð föstudag 11. janúar kl. 19.30
• 4. umferð sunnudag 13. janúar kl. 14
• 5. umferð miðvikudag 16. janúar kl. 19.30
• 6. umferð föstudag 18. janúar kl. 19.30
• 7. umferð sunnudag 20. janúar kl. 14
• 8. umferð miðvikudag 23. janúar kl. 19.30
• 9. umferð föstudag 25. janúar kl. 19.30

 

Verðlaun:

• 1. sæti kr. 100.000
• 2. sæti kr. 50.000
• 3. sæti kr. 25.000

• Besti árangur undir 2000 skákstigum kr. 10.000 (íslensk stig gilda)
• Besti árangur undir 1800 skákstigum kr. 10.000 (íslensk stig gilda)
• Besti árangur undir 1600 skákstigum - bókaverðlaun (íslensk stig gilda)
• Besti árangur undir stigalausra - bókaverðlaun

Þátttökugjöld:

• kr. 4.000 fyrir 16 ára og eldri
• kr. 2.000 fyrir 15 ára og yngri

 

Teflt er um titilinn "Skákmeistari Reykjavíkur 2013" og hlýtur sá keppandi titilinn og farandbikar til varðveislu í eitt ár, sem verður efstur þeirra sem eiga lögheimili í Reykjavík, eða eru félagsmenn í reykvísku taflfélagi. Núverandi Skákmeistari Reykjavíkur er Björn Þorfinnsson.

Verði fleiri en einn keppandi jafnir að vinningum í þremur efstu sætunum, verður verðlaunum skipt, en stigaútreikningur látinn skera úr um verðlaunasæti.  Í aukaverðlaunaflokkum ganga verðlaun óskipt til þess, sem hefur flest stig eftir stigaútreikning.

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur.  Hægt er að fylgjast með skráningu hér.

Vinsamlegast komið tímanlega á skákstað til að staðfesta skráningu og greiða þátttökugjald. Athugið að skráningu lýkur 15 mínútum fyrir auglýst upphaf móts, þ.e. kl. 13.45.

FASTUS-mótið - Gestamót Goðans-Máta hófst í gær

FASTUS mótið - Gestamót Goðans-Máta hófst 3. janúar. Mótið er gríðarlega sterkt og eru meðalstig keppenda um 2200. Þrír stórmeistarar taka þátt í mótinu, Þröstur Þórhallsson, Stefán Kristjánsson og Lenka Ptacnikova stórmeistari kvenna. Þá eru þrír alþjóðlegir meistarar og 10 Fide-meistarar meðal keppenda auk þess sem Ólympíulandsliði Íslands í kvennaflokki var boðið sérstaklega til leiks. Alls leiða 30 keppendur saman hesta sína á mótinu.

.FASTUS mótið 2013 fer fram í húsakynnum Skáksambands Íslands í Faxafeni 12 í Reykjavík með góðfúslegu leyfi Skákskóla Íslands sem hefur aðstöðuna til umráða. Teflt er á fimmtudagskvöldum og hefst rimma snillinganna við skákborðið kl. 19:30.

Eins og venja er var sitthvað um óvænt úrslit. Þau helstu voru að Jóhanna Björg Jóhannsdóttir (1872) vann Benedikt Jónasson (2246) og Hrafn Loftsson (2193) vann alþjóðlega meistarann Jón Viktor Gunnarsson (2413). 

Tveimur skákum var frestað vegna veikinda en engu að síður er búið að raða í 2. umferð sem fram fer á fimmtudagskvöldið.

Pörun og úrslit má nálgast á Chess-Results.

Goðar-Mátar eru sem fyrr duglegir að draga lítt virka skákmenn að skáborðinu. Karl Þorsteins (2464) er nú að tefla á sína fyrsta kappskákmóti síðan 1993 en meðal annarra fátíðra keppenda á lengri mótum má nefna Andra Áss Grétarsson (2327) og Þröst Árnason (2291).

 

• Heimasíða Goðans-Máta
• Chess-Results

Skákárið 2012 - skemmtilegt skákár!

 

 

Ritstjóri hefur verið gjarn á að búa til samantektir um helstu viðburði liðins ár. Árið 2012 var fínt skákár. Fjölmennasta Reykjavíkurskákmótið að þessu sinni, kennt við N1, stal senunni. Koma Fabiano Caruana, sem nú er fimmti stigahæsti skákmaður heims, og Hou Yifan skiptu þar mestu máli, sem og frábær skákstaður í Hörpu ásamt glæsilegri umgjörð á mótinu. Árið var ár Þrastar Þórhallssonar sem varð Íslandsmeistari í skák, sama ár og hann sagði sig af launum sem stórmeistari í skák.

 

 

Caruana vann N1 Reykjavíkurmótið en Hou Yifan varð að sætta við annað sæti, reyndar í góðum félagsskap Ivan Sokolov, Henrik Danielsen og fleiri. Af ungu ljónunum stal Hilmir Freyr Heimisson senunni með frábærri frammistöðu.

 

 

Ekkert nýtt gerðist á Íslandsmóti skákfélaga tímabilið, 2011-12. Bolvíkingar unnu og Kuzubov og Baklan létu sig ekki vanta. Tímabilið sem nú er í gangi er hins vegar allt galopið og fjögur lið sem geta hampað dollunni en mótið fer fram í vor í Hörpu.

 

 

Ýmislegt gekk á í landsliðsmálum eins og undanfarin ár. Breytingar voru gerðar á Ólympíuliðinu hálfum degi fyrir brottför þegar Dagur Arngrímsson tók sæti Héðins Steingrímssonar en upp kom ósættanlegur ágreiningur á milli liðsmanna sem olli þessari breytingu. Það gekk ekki vel hjá liðinu til að byrja með en góður endasprettur, sigur í þremur síðustu umferðunum, tryggði liðinu ásættanlegu sæti. Kvennaliðið náði hins vegar þeim einstæða árangri að vera efst Norræna kvennasveita.

 

 

Þátttaka var góð á skákmótum hérlendis. Íslenskir skákmenn hafa oft teflt meira á erlendri grundu. Taflmennska Henrik Danielsen, Dags Arngrímssonar, Guðmundar Kjartanssonar og Hjörvars Steins Grétarssonar erlendis var þó ánægjuleg undantekning.

 

 

Árið 2013 er spennandi. Það stefnir í skemmtilegt Reykjavíkurskákmót. Og sjálfur Nigel Short kemur aftur sem og fleiri sterkir skákmenn. Og Kínverjarnir koma en nánar verður fjallað um þá komu í næsta fréttabréfi SÍ.

 

 

Eins og venjulega hefur ritstjóri valið hina og þessa viðburði ársins. Sjálfsagt gleymist eitthvað í upptalningunni og biðst ég fyrirfram afsökunar á því. Upptalningin er á léttu nótunum og bak við hana liggja engin geimvísindi og enginn á að verða móðgaður!

Óvæntasta frétt ársins

Breyting á Ólympíuliðinu sem tilkynntar voru degi fyrir brottför.

 

 

Skák ársins

Kosning á skák ársins fer nú fram á Skákhorninu. Að mínu mati er engin vafi á hver er skák ársins. Það er skák Þrastar Þórhallssonar gegn Tyrkjanum Muhammed Dastan á Ólympíuskákmótinu sem hægt er að nálgast hér.

 

 

Einfaldlega klassísk skák, nánast fullkominn með glæsilegri drottningarfórn og tefld á einu merkilegasta skákmóti ársins.

Hún verður birt með skýringum Þrastar í næsta Tímariti Skákar.

Dómsmál ársins

Héðinn Steingrímsson fór með liðsval Ólympíuskákmótsins fyrir Dómstól SÍ og hafði þar sigur en í dómsúrskurði sagði meðal annars:

Það er niðurstaða dómstóls Skáksambands Íslands að hvort tveggja hafi skort, form- og efnisskilyrði til brottvikningar kæranda úr ólympíusveit Íslands 2012.

Í yfirlýsingu stjórnar SÍ kom fram viðurkenning á því að formskilyrði hafi ekki verið uppfyllt og var þar vísað til stutts tímafrests en varðandi efnisskilyrðin hafi landsliðsnefnd og landsliðsþjálfari ákveðið að hafa heildarhagsmuni liðsins í fyrirrúmi.

Deila ársins

Mikið var deilt um röðun í lokaumferð N1 Reykjavíkurmótsins þar sem Bragi Þorfinnsson fékk ekki nægjanlegan sterkan keppenda í lokaumferðinni til að eiga möguleika á stórmeistaraáfanga. Mörg stór orð féllu, flest sögð í hita leiksins, en FIDE-reglur leyfa ekki sveigjanlega í röðun þótt dæmi séu um að mótshaldarar hafi brotið þá reglu.

 

 

Mótsnefnd N1 Reykjavíkurmótsins í ár hefur þegar gefið út að pörun verði ekki aðlöguð á mótinu í ár, hvorki fyrir áfangaveiðara né aðra. Eins og einhver orðaði hlutina í á Horninu. „Computer says no!"

Hornskeyti ársins

Menn fóru mikinn á köflum á Skákhorninu. Hornskeyti ársins átti Jón Þorvaldsson þegar honum ofbauð beyging á orðinu Æsir á Skák.is.

 

 

Hvaða andsk. aumingjaskapur og lágkúra er þetta að verða?

Það er lágmarkskrafa að menn tali rétt mál á þessum síðum.Ég krefst þess þó að ekki væri nema í nafni þeirra látnu snillinga íslenskrar skákmenningar sem töluðu og rituðu afburðagott mál.

Snjallt tungutak er samofið íslenskri skáksögu enda hafa viti bornir menn fram að þessu skynjað nauðsyn þess að standa vörð um þetta höfuðvígi íslenskrar menningar.

Eignarfall fleirtölu af orðinu Ás er Ása og ekkert annað!!!
Ég skora hvern þann mann á hólm sem vogar sér að halda öðru fram.

Látum aldrei undan síga fyrir lágkúru!

Þráðinn í heild sinni má finna hér.

Mér vitanlega hefur engin hólmganga farið enn fram!

Lið ársins:

Hér kemur íslenska kvennalandsliðið til greina, sveit Íslandsmeistara Bolvíkinga og svo sveit Berserkja á Atskákmóti Skákklúbbs Icelandair en verðlaunin renna að sjálfsögðu til skáksveitar TR í fyrri hluta Íslandsmóts skákfélaga. Það var einkar ánægjulegt að sjá lítt virka skákmenn eins og Karl Þorsteins, Margeir Pétursson og Friðrik Ólafsson tefla í sömu sveit!

 

 

Símhringing ársins

Þegar síminn hringdi hjá Margeiri Péturssyni í skák hans gegn Magnúsi Teitssyni á Íslandsmóti skákfélaga. Haraldur Baldursson átti skemmtileg ummæli um skákina á Horninu þegar þar var rætt um möguleika TR á titlinum: Ef við gefum okkur að Margeir hefði unnið sem er að vísu ekki öruggt.

Þjófnaður ársins

Þegar Boris Spassky var „rænt" frá Frakklandi og hann fluttur til Rússlands. Misterían í kringum þá félaga frá einvígi aldarinnar 1972 heldur áfram.

 

 

Búð ársins

Blómabúðin á Selfossi - engin spurning!

 

Skammstöfun ársins

 

GM fyrir Goðinn-Mátar.

 

 

Félagaskipti ársins

Félagaskiptamarkaður hreinlega logaði í ár með komu Goðans (síðar Goðans-Máta) og Víkingaklúbbsins í efstu deild. Sérstaklega fór sá síðarnefndi mikinn í liðssöfnun. Eyjamenn fengu einnig sterka skákmenn til sín.

 

 

Félagaskipti ársins hljóta að teljast félagaskipti sigursælasta skákmanns hérlendis frá upphafi, Hannesar Hlífars Stefánssonar, úr Helli yfir í Víkingaklúbbinn.

Efnilegasti skákmaður ársins

Margir ungir og efnilegir skákmenn stóðu sig vel á árinu. Vignir Vatnar Stefánsson átti gott heimsmeistaramót og vann alþjóðlegt mót á Ítalíu, Hilmir Freyr Heimisson sló í gegn á N1 Reykjavíkurmótinu, Nansý Davíðsdóttir varð Íslandsmeistari barna og vann alþjóðlegt mót í Svíþjóð, Svandís Rós Ríkharðsdóttir varð stúlknameistari Íslands, Dawid Kolka stóð sig frábærlega á Atskákmóti Skákklúbbs Icelandair og var með bestan árangur yngstu kynslóðarinnar á fjórða borði. Rimskælingar héldu áfram að gera frábæra hluti og þaðan kemur efnilegasti skákmaður ársins að mati ritstjóra.

 

 

 

Það er Oliver Aron Jóhannesson. Hann varð næstum því heimsmeistari áhugamanna og hækkaði mest allra á árinu 2012 eða um 300 stig.

Skor ársins

Skákdeild Fjölnis á Íslandsmóti unglingasveita þegar sveitin fékk 28 vinninga af 28 mögulegum! Árangur Fjölnis í unglingastarfi hefur verið með ólíkindum síðustu ár og ástundum félaganna úr Fjölni ætti að vera öðrum ungum skákmönnum til fyrirmyndar. Helgi Árnason, formaður Fjölnis, hefur unnið sérlega gott starf.

 

 

Skákkona ársins

Tinna Kristín Finnbogadóttir átti feikigott Íslandsmót kvenna og var nærri sigri. Þar var hins vegar Lenka Ptácníková sem hafði sigur. Lenka er skákkona ársins. Hún leiddi ólympíulið Íslands með miklum sóma og er einfaldlega langsterkasta skákkona landsins og mikill fengur fyrir íslenskt skáklíf.

 

 

Skákmaður ársins

Þrír skákmenn standa upp úr í ár að mati ritstjóra. Það er þeir Hjörvar Steinn Grétarsson, Bragi Þorfinnsson og Þröstur Þórhallsson.

Hjörvar er að bæta sig jafnt og þétt sem skákmaður og er nú kominn í fimmta sæti stigalistans og upp fyrir flesta íslensku stórmeistarana á stigum.

Bragi Þorfinnsson hefur bætt sig jafnt og þétt. Hann var grátlega nærri áfanga á Reykjavíkurskákmótinu og sínum fyrsta Íslandsmeistaratitli. Hann vann svo sigur á Friðriksmóti Landsbankans og sló þar við mörgum stórmeistaranum.

 

Skákmaður ársins er hins vegar Þröstur Þórhallsson. Stóð sig afar vel á Ólympíuskákmótinu og hampaði sínum fyrsta Íslandsmeistaratitli í 25 tilraunum! Vann Braga í afar spennandi einvígi.

 

Og til að kóróna árið stóð Þröstur sig best allra á Atskákmóti Skákklúbbs Icelandair sem fram fór við frábærar aðstæður í Hótel Natura síðustu helgi ársins.

Endurkoma ársins

Friðrik Ólafsson var býsna duglegur að tefla á síðasta ári og átti margar góðar skákir á árinu.

Margeir Pétursson kom aftur á Íslandsmót skákfélaga eftir alltof langa fjarveru við skákborðið.

 

 

Endurkoma ársins er hins vegar Tímaritið Skák sem út kom undir ritstjórn Máta. Glæsilegt tímarit og Mátum mikill sómi að útgáfunni.

Viðburður ársins

Ýmsir skemmtilegir viðburðir voru haldnir í ár. Má þar nefna Afmælismót aldarinnar, Skákdaginn, Atskákmóti Icelandair og Friðriksmót Landsbankans.

 

Einn ánægjulegasti skákviðburður ársins var svo tvímælalaust þegar Skákakademían efndi til maraþons í þágu Barnaspítala Hringsins. Mörg efnilegustu börn og ungmenni landsins tóku þátt í þessari hátíð í Kringlunni og tefldu meðal annars við Skoppu og Skrítlu. Þau söfnuðu meira en milljón krónum í þágu málstaðarins. Þarna sýndi skákhreyfingin í verki kjörorðin: Við erum ein fjölskylda!

 

 

 

Viðburður ársins hlýtur að vera N1 Reykjavíkurskákmótið sem fram fór í Hörpu. Frábært mót í frábærum skáksal. Um mótið sjálft vísa ég í úttekt sem ég skrifaði að móti loknu á Skák.is

Skákstaður ársins

Harpa.

 

 

Skáksíða ársins

Skák.is

Skákmyndir ársins

Hér tilnefni ég tvær myndir eftir Hrafn Jökulsson, sem er afburðarmyndasmiður. Fyrsta myndin er af Caruana og Sokolov á N1 Reykjavíkurskákmótinu. Hrafn nær að fanga þarna frábært augnablik þar sem Bosníumaðurinn gnæfir yfir Ítalann.

 

 

Næsta mynd er Hou Yifan við gröf Fischer. Mynd sem fór víða í fjölmiðlum heimsins.

 

 

Taflfélag ársins

Töluverðar umræður áttu sér stað á Skákhorninu um starf taflfélaga sem Tómas Veigar Sigurðarson var upphafsmaður að. Tómas benti á ábyrgð félaganna sem kysu sum hver að leggja alla áherslu á Íslandsmót skákfélaga en svo minni á sjálft grunnstarfið. Þörf umræða sem fór um víðan völl. Sá sem þetta ritar kom með tillögu um gjald á erlenda stórmeistara upp á 25.000 kr, sem er aðeins lítið hlutfall þess sem það kostar að fá einn erlendan stórmeistara til landsins.

Gjaldið myndi svo renna til þess að styrkja við þátttöku unglinga á HM/EM en það er dýrt fyrir stjórn SÍ að senda fulltrúa á þau mót og aðeins einn keppandi tók þátt á HM ungmenna í ár.

Hugmyndin á bakvið þessa tillögu er að þau félög sem sannarlega standa vel, en eru sum hver ekki með unglingastarf, muni á þennan hátt styðja við æskulýðsstarfið. Tillagan féll í misjafnan jarðveg og var í þokkabót uppnefnd sem "skattur", sem þykir neikvætt orð.

Taflfélag ársins að mati ritstjóra er "gamaldags taflfélag" sem leggur áherslu á alla þætti starfseminnar; barna- og unglingastarf, almennt mótahald sem og þátttöku á Íslandsmóti skákfélaga. Slík félög mættu vera fleiri í dag!

Taflfélag Reykjavík, elsta félag landsins, er taflfélag ársins að mati ritstjóra í ár. Félag sem sinnir öllu og stillti svo upp langskemmtilegasta liðinu á Íslandsmóti skákfélaga!

 

 

 

Árið 2013

Árið 2013 er spennandi og margt um að vera. Undirbúningur við N1 Reykjavíkurskákmótið er á fullu gasi. NM í skólaskák fer fram í Bifröst í febrúar og Kínverjarnir koma einnig í febrúar.

Veislan er á leiðinni!

Gleðilegt nýtt ár og þakkir fyrir hið liðna.

Gunnar Björnsson

Hjörvar vann og mætir Gawain Jones á morgun

Hjörvar Steinn Grétarsson (2516) vann enska alþjóðlega meistarann Simon Knott (2325) í sjöundu umferð Hastings Chess Congress sem fram fór í dag. Guðmundur Kjartansson (2406) tapaði hins vegar fyrir Norðmanninum Johannes Kvisla (2148). Hjörvar hefur 5 vinninga og er í 4.-13. sæti en Guðmundur hefur 4 vinninga og er í 24.-36. sæti. 

Efstir með 5,5 vinning eru enski stórmeistarinn Gawain Jones (2644), litháíski stórmeistarinn Sarunas Sulkis (2550) og kínverski alþjóðlegi meistarinn Rui Gao (2450).

Hjörvar mætir Jones í áttundu umferð sem fram fer á morgun. Guðmundur mætir Frakkanum Mathieu Ternault (2147).

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Íslandsmót barna fer fram 12. janúar í Rimaskóla

Íslandsmót barna í skák fer fram í Rimaskóla laugardaginn 12.janúar og hefst klukkan 12. Þátttökurétt hafa börn í 1. til 5. bekk (fædd 2002 og síðar) og sigurvegarinn fær sæmdarheitið Íslandsmeistari barna 2013 og keppnisrétt á Norðurlandamótið í skólaskák sem haldið er að Bifröst í febrúar 2013.
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Þetta er í 20. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Nansý Davíðsdóttir. Hún er eina stúlkan sem hefur hampað titlinum.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst hér (skráning opnar svo á Skák.is þann 6. janúar). Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf móts. Hægt er að fylgjast með skráningu hér.

Veitt eru sérstök verðlaun fyrir bestan árangur í hverjum árgangi.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir

KORNAX mótið - Skákþing Reykjavíkur hefst á sunnudaginn

KORNAX mótið 2013 - Skákþing Reykjavíkur hefst sunnudaginn 6. janúar kl. 14. Tefldar verða níu umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14. Teflt er í húsnæði Taflfélags Reykjavíkur að Faxafeni 12.

Dagskrá:

• 1. umferð sunnudag 6. janúar kl. 14
• 2. umferð miðvikudag 9. janúar kl. 19.30
• 3. umferð föstudag 11. janúar kl. 19.30
• 4. umferð sunnudag 13. janúar kl. 14
• 5. umferð miðvikudag 16. janúar kl. 19.30
• 6. umferð föstudag 18. janúar kl. 19.30
• 7. umferð sunnudag 20. janúar kl. 14
• 8. umferð miðvikudag 23. janúar kl. 19.30
• 9. umferð föstudag 25. janúar kl. 19.30

 

Verðlaun:

• 1. sæti kr. 100.000
• 2. sæti kr. 50.000
• 3. sæti kr. 25.000

• Besti árangur undir 2000 skákstigum kr. 10.000 (íslensk stig gilda)
• Besti árangur undir 1800 skákstigum kr. 10.000 (íslensk stig gilda)
• Besti árangur undir 1600 skákstigum - bókaverðlaun (íslensk stig gilda)
• Besti árangur undir stigalausra - bókaverðlaun

Þátttökugjöld:

• kr. 4.000 fyrir 16 ára og eldri
• kr. 2.000 fyrir 15 ára og yngri

 

Teflt er um titilinn "Skákmeistari Reykjavíkur 2013" og hlýtur sá keppandi titilinn og farandbikar til varðveislu í eitt ár, sem verður efstur þeirra sem eiga lögheimili í Reykjavík, eða eru félagsmenn í reykvísku taflfélagi. Núverandi Skákmeistari Reykjavíkur er Björn Þorfinnsson.

Verði fleiri en einn keppandi jafnir að vinningum í þremur efstu sætunum, verður verðlaunum skipt, en stigaútreikningur látinn skera úr um verðlaunasæti.  Í aukaverðlaunaflokkum ganga verðlaun óskipt til þess, sem hefur flest stig eftir stigaútreikning.

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur.  Hægt er að fylgjast með skráningu hér.

Vinsamlegast komið tímanlega á skákstað til að staðfesta skráningu og greiða þátttökugjald. Athugið að skráningu lýkur 15 mínútum fyrir auglýst upphaf móts, þ.e. kl. 13.45.

Hastings: Hjörvar með jafntefli - Guðmundur tapaði

Hjörvar Steinn Grétarsson (2516) gerði jafntefli við indónesísku skákkonuna Chelsea Monica Sihite (2277) sem er alþjóðlegur meistari kvenna í sjöttu umferð Hastings Chess Congress sem fram fór í dag. Guðmundur Kjartansson (2406) tapaði hins vegar fyrir litháíska stórmeistarann Sarunas Sulkis (2550). Báðir hafa þeir 4 vinninga og eru í 9.-22. sæti.

Sulkis er efstur með 5 vinninga ásamt enska stórmeistaranum Gawain Jones (2644) og kínverska alþjóðlega meistaranum Rui Gao (2450).

Í 7. umferð, sem fram fer á morgun, teflir Hjörvar við enska alþjóðlega meistarann Simon Knott (2325) en Guðmundur við Norðmanninn Johannes Kvisla (2148).

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)