Áskell fyrsti fjórðungur ársins

Í dag laust eyfirsku skákköppum saman á fyrsta fjórðungsmóti ársins - en þar hafa menn til umráða fjórðung stundar til umhugsunar í hverri skák. Nýta menn þann tíma misvel. Í þetta sinn gerðu ellefu kappar tilkall til sigursins og fengu til þess sjö skákir hver. Þrátt fyrir tap í síðustu umferð fyrir fjandvini sínum Sveinbirni, tókst Áskatli Erni að innbyrða sigur í mótinu, enda tapaði helsti keppinautur hans, sem ber viðurnefnið Ziggi A, líka sinni skák, fyrir "Kortsnoj norðursins" Karli Agli. Annars var lokaniðurstaðan þessi:

Áskell Örn Kárason   5,5

Sigurðar Arnar- og Eiríkssynir 5

Karl Egill Steingrímsson     4,5

Einar Garðar Hjaltason, Andri Freyr Björgvinsson,

Ari Friðfinnsson og Hjörleifur Halldórsson 3,5

Sveinbjörn Sigurðsson     3

Símon Þórhallsson og Hrenn Hrafnsson  2,5

Næst verður teflt nk. fimmtudag þegar TM-mótaröðin hefst.

Hjörvar með sigur í lokaumferðinni - Guðmundur með jafntefli við stórmeistara

Alþjóðlegi meistarinn Hjörvar Steinn Grétarsson (2516) vann Wales-verjann Francis Rayner (2166) í 10. og síðustu umferð Hastings Chess Congress sem fram fór í dag. Guðmundur Kjartansson (2404) gerði jafntefli við spænska stórmeistarann Daniel Alsina Leal (2511).

Hjörvar fékk 7 vinninga og endaði í 2.-9. sæti. Guðmundur fékk 6 vinninga og endaði í 16.-23. sæti. Frammistaða Hjörvars samsvaraði 2497 skákstigum og stendur hann í stað stigalega fyrir hana. Frammistaða Guðmundar samsvaraði 2500 skákstigum og hækkar hann um 14 stig fyrir hana. Guðmundur heldur því áfram að hækka á stigum en hann hefur hækkað jafnt og þétt á stigum síðustu misseri.

Báðir halda þeir áfram að tefla. Hjövar teflir í Tata Steel mótinu sem hefst í Wijk aan Zee 12. janúar nk. en Guðmundur teflir á alþjóðlegu móti í Sevilla á Spáni sem hefst 11. janúar nk. 

Enski stórmeistarinn, Gawain Jones (2644), sem verður meðal keppenda á N1 Reykjavíkurskákmótinu vann mótið en hann hlaut 7,5 vinning.

92 keppendur tóku þátt og þar af 13 stórmeistarar. Hjörvar var nr. 10 í stigaröð keppenda en Guðmundur var nr. 19.

• Heimasíða mótsins
• Beinar útsendingar (hefjast kl. 14:15)

Skákþáttur Morgunblaðsins: Skákárið 2012

Skákárið 2012 hófst fyrir alvöru hér á landi með lokaumferðum Íslandsmóts taflfélaga og hið árlega Reykjavíkurskákmót hlaut glæsilegan vettvang í Hörpunni. Skákþing Íslands fór síðan fram í Stúkunni á Kópavogsvelli og þar bar helst til tíðinda að Þröstur Þórhallsson, sem teflt hafði sleitulaust í landsliðsflokki síðan 1985, varð Íslandsmeistari í fyrsta sinn eftir æsispennandi einvígi við Braga Þorfinnsson. Kornungir skákmenn vöktu mikla athygli: Hilmir Freyr Heimisson, Vignir Vatnar Stefánsson og Nancy Davíðsson unnu góð afrek á árinu og hinn 14 ára gamli Oliver Aron Jóhannesson var næstum því orðinn heimsmeistari áhugamanna þegar hann fékk ferð á mótið í fermingargjöf. Kvennaliðið stóð sig betur en oft áður á ÓL í Istanbul og karlaliðið var á pari.

Anand tókst með naumindum að verja heimsmeistaratitilinn í einvígi við Boris Gelfand í Moskvu sl. vor en Norðmaðurinn Magnús Carlsen átti sviðið og sló stigamet Kasparovs og er nú með 2861 elo-stig. Þess var minnst víða um heim og einnig hér á landi, að í sumar voru liðin 40 ár frá „einvígi aldarinnar". Í vor kom út bók undirritaðs um Fischer og fékk góðar viðtökur. Hjá uppboðshaldara í Kaupmannahöfn voru boðnir upp gripir tengdir einvíginu en um uppruna þeirra stóðu deilur milli Gunnars Finnlaugssonar búsetts í Svíþjóð og Páls G. Jónssonar. Stuttu síðar var stofnað skáksetur á Selfossi, steinsnar frá grafreit Fischers við Laugardælakirkju. Og einn góðan veðurdag í ágúst hvarf heimsmeistarinn frá ´72, Boris Spasski, frá heimili sínu í Frakklandi. Hann fékk heilablóðfall haustið 2010 og hefur verið bundinn við hjólstól. Frakkar þurftu svo sem ekki að velta þessu máli lengi fyrir sér og áttu ágætis orðatiltæki yfir uppákomuna: Leitið konunnar! Þegar Spasski kom fram nokkrum dögum síðar i Moskvu var hann furðu hress og þá kom auðvitað á daginn að rússnesk kona, Valentina Kuznetsova, hafði hjálpað honum við flóttann. Hann lagði ekki illt orð til nokkurs mann; hafði fundið fyrir „andnauð" á heimili sínu í Frakklandi og óskað sér þess oft að vera aftur nýr. James Bond kvikmyndirnar áttu 50 ára afmæli og skákunnendur hafa fengu tækifæri til að horfa á upphafsatriði „From Russia with love" þar sem skúrkurinn Kroonsteen lagði andstæðing sinn McAdams að velli en lokaatlagan var tekin nánast óbreytt upp úr glæsilegum sigri vinar okkar yfir Bronstein frá sovéska meistaramótinu 1960:

Boris Spasskí - David Bronstein Kóngsbragð

1. e4 e5 2. f4

Kóngsbragðið gafst Spasskí ótrúlega og Bronstein beitti því einnig með góðum árangri og vann m.a. frægan sigur yfir Tal árið 1969.

2. ... exf4 3. Rf3 d5

Í dag er talið best að leika 3. .... d6 veða 3. ... g5.

4. exd5 Bd6 5. Rc3 Re7 6. d4 O-O 7. Bd3 Rd7 8. O-O h6 9. Re4 Rxd5 10. c4 Re3 11. Bxe3 fxe3 12. c5! Be7 13. Bc2 He8

Bæði hér og í næsta leik þráaðist Bronstein við að leika 13. ... f5 sem á að tryggja jöfn færi.

14. Dd3 e2 15. Rd6!

Skilur hrókinn eftir en leikurinn sýnir hversu frumkvæðið er mikilvægt.

15. ... Rf8

16. Rxf7! exf1(D)+ 17. Hxf1 Bf5

Eða 17. .. Kxf7 18. Rg5 + Kg8 19. Bb3+ Kh8 20. Hxf8+ og mát í næsta leik.

18. Dxf5 Dd7 19. Df4 Bf6 20. R3e5 De7 21. Bb3 Bxe5 22. Rxe5 Kh7 23. De4+

- og Bronstein gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 30. desember 2012

Skákþættir Morgunblaðsins

[Event "USSR Championship"] [Site "Leningrad (RUS)"] [Date "1960.??.??"] [EventDate "1960.??.??"] [Round "?"] [Result "1-0"] [White "Boris Spassky"] [Black "David Bronstein"] [ECO "C36"] [WhiteElo "?"] [BlackElo "?"] [PlyCount "45"] 1. e4 e5 2. f4 exf4 3. Nf3 d5 4. exd5 Bd6 5. Nc3 Ne7 6. d4 O-O 7. Bd3 Nd7 8. O-O h6 9. Ne4 Nxd5 10. c4 Ne3 11. Bxe3 fxe3 12. c5 Be7 13. Bc2 Re8 14. Qd3 e2 15. Nd6 {One of the deepest sacrifices this side of The Evergreen Game -- Soltis} Nf8 16. Nxf7 exf1=Q+ 17. Rxf1 Bf5 18. Qxf5 Qd7 19. Qf4 Bf6 20. N3e5 Qe7 21. Bb3 Bxe5 22. Nxe5+ Kh7 23. Qe4+ 1-0

KORNAX-mótið: Engin óvænt úrslit í fyrstu umferð

 

Öll úrslit 1. umferðar KORNAX-mótsins Skákþings Reykjavíkur voru eftir bókinni svokölluðu. Hinir stigahærri unnu í öllum tilfellum hina stiglægri. Nú liggur fyrir pörun í 2. umferð sem fram fer á miðvikudagskvöld. Þá verður styrkleikamunur mun minni.

 

Í 2. umferð verða eftirtaldar skákir sýndar beint:

• Davíð Kjartansson - Atli Antonsson
• Dagur Ragnarsson - Einar Hjalti Jensson
• Lenka Ptácníková - Jón Úlfljótsson
• Jón Trausti Harðarson - Omar Salama
• Daði Ómarsson - Atli Jóhann Leósson
• Hilmar Þorsteinsson - Júlíus Friðjónsson

• Heimasíða TR (beinar útsendingar)
  
• Myndaablúm (GB)
• Chess-Results

KORNAX-mótið - Skákþing Reykjavíkur er hafið - beinar útsendingar

 

KORNAX-mótið - Skákþing Reykjavíkur hófst í dag í húsakynnum TR. Jafnmargir keppendur og reitir skákborðsins, það eru 64 talsins, taka þátt á þessu í fjölmennasta félagsmóti hvers árs. Meðal keppenda er 1 alþjóðlegur meistari, 1 stórmeistari kvenna og 2 FIDE-meistarar.

 

Sigurlaug R. Friðþjófsdóttir, formaður TR, setti mótið og bauð keppendur sem og fulltrúa KORNAX velkominn, Kjartan Már Másson. Kjartan lék svo fyrsta leikinn í skák Vignis Vatnars Stefánssonar gegn FIDE-meistaranum og stigahæsta keppenda mótsins, Davíð Kjartanssyni.

Ritstjóri tók all margar myndir frá fyrstu umferðinni.

• Heimasíða TR
• Myndaablúm (GB)
• Beinar útsendingar frá fyrstu umferð
• Chess-Results

Íslandsmót barna fer fram laugardaginn 12. janúar í Rimaskóla

Íslandsmót barna í skák fer fram í Rimaskóla laugardaginn 12. janúar og hefst klukkan 12. Þátttökurétt hafa börn í 1. til 5. bekk (fædd 2002 og síðar) og sigurvegarinn fær sæmdarheitið Íslandsmeistari barna 2013 og keppnisrétt á Norðurlandamótið í skólaskák sem haldið er að Bifröst í febrúar 2013.
 
Alls verða tefldar 9 umferðir með 10 mínútna umhugsunartíma. Eftir 5 umferðir verður keppendum fækkað þannig að þeir sem hafa 3 vinninga eða fleiri halda áfram keppninni um Íslandsmeistaratitilinn en þeir sem hafa færri en 3 vinninga hafa lokið þátttöku.

Þetta er í 20. sinn sem keppt er um Íslandsmeistaratitil barna. Sigurður Páll Steindórsson sigraði á fyrsta mótinu árið 1994, en meðal annarra meistara má nefna titilhafana Dag Arngrímsson, Guðmund Kjartansson og Hjörvar Stein Grétarsson. Núverandi Íslandsmeistari barna er Nansý Davíðsdóttir. Hún er eina stúlkan sem hefur hampað titlinum.
 
Skáksamband Íslands og Skákakademían annast framkvæmd mótsins. Keppendur eru hvattir til að skrá sig sem fyrst á Skák.is (skráning opnar hér í dag). Þátttökugjald er 1.000 kr (1.500 að hámarki á systkini) og greiðist á mótsstað fyrir upphaf umferðar. Hægt er að fylgjast með skráningu hér.

Veitt eru sérstök verðlaun fyrir bestan árangur í hverjum árgangi.

Sigurvegarar á Íslandsmóti barna frá upphafi:
 

• 1994 Sigurður Páll Steindórsson
• 1995 Hlynur Hafliðason
• 1996 Guðjón H. Valgarðsson
• 1997 Dagur Arngrímsson
• 1998 Guðmundur Kjartansson
• 1999 Víðir Smári Petersen
• 2000 Viðar Berndsen
• 2001 Jón Heiðar Sigurðsson
• 2002 Sverrir Þorgeirsson
• 2003 Hjörvar Steinn Grétarsson
• 2004 Svanberg Már Pálsson
• 2005 Nökkvi Sverrisson
• 2006 Dagur Andri Friðgeirsson
• 2007 Kristófer Gautason
• 2008 Kristófer Gautason
• 2009 Jón Kristinn Þorgeirsson
• 2010 Jón Kristinn Þorgeirsson
• 2011 Dawid Kolka
• 2012 Nansý Davíðsdóttir

KORNAX-mótið hefst í dag

KORNAX mótið 2013 - Skákþing Reykjavíkur hefst sunnudaginn 6. janúar kl. 14. Tefldar verða níu umferðir eftir svissnesku kerfi og eru tímamörk 1½ klst. á alla skákina auk 30 sek. á leik. Umferðir fara fram á miðvikudögum og föstudögum kl. 19.30 og á sunnudögum kl. 14. Teflt er í húsnæði Taflfélags Reykjavíkur að Faxafeni 12.

Dagskrá:

• 1. umferð sunnudag 6. janúar kl. 14
• 2. umferð miðvikudag 9. janúar kl. 19.30
• 3. umferð föstudag 11. janúar kl. 19.30
• 4. umferð sunnudag 13. janúar kl. 14
• 5. umferð miðvikudag 16. janúar kl. 19.30
• 6. umferð föstudag 18. janúar kl. 19.30
• 7. umferð sunnudag 20. janúar kl. 14
• 8. umferð miðvikudag 23. janúar kl. 19.30
• 9. umferð föstudag 25. janúar kl. 19.30

 

Verðlaun:

• 1. sæti kr. 100.000
• 2. sæti kr. 50.000
• 3. sæti kr. 25.000

• Besti árangur undir 2000 skákstigum kr. 10.000 (íslensk stig gilda)
• Besti árangur undir 1800 skákstigum kr. 10.000 (íslensk stig gilda)
• Besti árangur undir 1600 skákstigum - bókaverðlaun (íslensk stig gilda)
• Besti árangur undir stigalausra - bókaverðlaun

Þátttökugjöld:

• kr. 4.000 fyrir 16 ára og eldri
• kr. 2.000 fyrir 15 ára og yngri

 

Teflt er um titilinn "Skákmeistari Reykjavíkur 2013" og hlýtur sá keppandi titilinn og farandbikar til varðveislu í eitt ár, sem verður efstur þeirra sem eiga lögheimili í Reykjavík, eða eru félagsmenn í reykvísku taflfélagi. Núverandi Skákmeistari Reykjavíkur er Björn Þorfinnsson.

Verði fleiri en einn keppandi jafnir að vinningum í þremur efstu sætunum, verður verðlaunum skipt, en stigaútreikningur látinn skera úr um verðlaunasæti.  Í aukaverðlaunaflokkum ganga verðlaun óskipt til þess, sem hefur flest stig eftir stigaútreikning.

Skákþingið er reiknað til alþjóðlegra skákstiga.

Skráning fer fram á heimasíðu Taflfélags Reykjavíkur.  Hægt er að fylgjast með skráningu hér.

Vinsamlegast komið tímanlega á skákstað til að staðfesta skráningu og greiða þátttökugjald. Athugið að skráningu lýkur 15 mínútum fyrir auglýst upphaf móts, þ.e. kl. 13.45.

15 mínútna mót hjá SA í dag

Skákdagskráin er nú komin á fulla ferð og fyrsta fjórðungsmót ársins verður háð sunnudaginn 6. janúar og hefst kl. 13.00. Allir velkomnir sem endranær.

Fyrirhyggjusömum skákáhugamönnum er svo bent á krækju á mótáætlun sem finna má hér hægra megin á síðunni.

Hastings: Hjörvar og Guðmundur með jafntefli í dag

Alþjóðlegu meistararnir Hjörvar Steinn Grétarsson (2516) og Guðmundur Kjartansson (2404) gerðu báðir jafntefli í 9. og næstsíðustu umferð Hastings Chess Congress sem fram fór í dag. Hjörvar við  kínversku skákkonuna Gu Xiaobing (2209), sem er stórmeistari kvenna, en Guðmundur við enska stórmeistarann Glenn Flear (2481).  Hjörvar hefur 6 vinninga og erí 7.-13. sæti en Guðmundur hefur 5,5 vinning og er í 14.-25. sæti.

Í 10. og síðustu umferð, sem fram fer á morgun, teflir Hjörvar við Wales-verjann Francis Rayner (2166) en Guðmundur við spænska stórmeistarann Daniel Alsina Leal (2511).

Enski stórmeistarinn, Gawain Jones (2644) er efstur á mótinu með 7 vinninga.

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Vignir Vatnar efstur í stigkeppninni á Hellisæfingunum - æfingar hefjast aftur á mánudaginn

Vignir Vatnar Stefánsson er efstur í stigakeppni Hellisæfinganna með 29 stig. Annar er Dawid Kolka með 24 stig og þriðji Hilmir Freyr Heimisson með 16 stig. Það hefur verið mætt vel á æfingarnar á haustmisseri en það hafa 18 þátttakendur mætt á 12 eða fleiri æfingar af 17 mögulegum. Þar af hafa þrír mætt á þær allar en það eru Alec Sigurðarson, Óskar Víkingur Davíðsson og Sindri Snær Kristófersson. Næsta æfing verður svo á nýju ári 7. janúar 2013 og hefst kl. 17.15. Æfingarnar eru í Álfabakka 14a í Mjóddinni. Inngangur milli Fröken Júlíu og Subway og salurinn er á 3 hæð.

Í lok vetrar verða veitt bókaverðlaun handa þeim sem mætt hafa best yfir veturinn og til þeirr sem sýnt hafa verulegar framfarir yfir veturinn. Staðan í stigakeppninni og listi yfir þá sem hafa mætt best er hér fyrir neðan.

Með besta mætingu eru:

Alec Elías Sigurðarson              17 mætingar

Óskar Víkingur Davíðsson          17 ----"-----

Sindri Snær Kristófersson          17 ----"------

Birgir Ívarsson                          16 ----"------

Brynjar Haraldsson                   16 ----"------

Dawid Kolka                              16 ----"------

Felix Steinþórsson                    16 ----"------

Halldór Atli Kristjánsson           16 ----"------

Heimir Páll Ragnarsson            16 ----"------

Oddur Þór Unnsteinsson          16 ----"------

Stefán Karl Stefánsson            15 ----"------

Vignir Vatnar Stefánsson         14 ----"------

Bárður Örn Birkisson                13 ----"------

Björn Hólm Birkisson                13 ----"------

Egill Úlfarsson                          12 ----"------

Ívar Andri Hannesson              12 ----"------

Mikhael Kravchuk                     12 ----"------

Sigurður Kjartansson               12 ----"------

Efstir í stigakeppninni:

1. Vignir Vatnar Stefánsson                 29 stig

2. Dawid Kolka                                     24   -

3. Hilmir Freyr Heimisson                     16  -

4. Felix Steinþórsson                           10  -

5. Mikhael Kravchuk                             7  -

Barna- og unglingaæfingar Hellis hefjast aftur eftir jólafrí mánudaginn 7. janúar 2013. Taflið byrjar kl. 17:15 og fyrirkomulagið verður það sama og fyrir áramót.  Æfingarnar eru opnar öllum 15 ára og yngri. Engin þátttökugjöld.

Æfingarnar verða haldnar í félagsheimili Hellis í Álfabakka 14a, Mjódd. Inngangur er við hliðina á Subway en salur félagsins er á þriðju hæð hússins. Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til. Umsjón með æfingunum hefur Vigfús Ó. Vigfússon.