Héðinn fékk 4 vinninga í 6 skákum í bandarísku háskólakeppninni

Stórmeistarinn Héðinn Steingrímsson (2560) tók þátt í bandarísku háskólakeppninni á milli jóla og nýárs sem fram fór í Princeton í New Jersey. Þar tefldi hann á fyrsta borði fyrir háskólann Texas Tech þar sem hann stundar MBA-nám.

Héðinn hlaut 4 vinning í 6 skákum. Áður hefur komið fram hér á Skák.is hvernig honum gekk í fyrstu fjórum umferðum. Í 5. umferð vann hann  Haizhou Zu (2370) en í sjöttu og síðustu umferð gerði hann jafntefli við stórmeistarann Margvelashvili (2607).

Sveit Héðins varð í sjöunda sæti af 44 sveitum.

• Heimasíða mótsins
• Beinar útsendingar

Öruggur sigur Hadda Bé

Í dag fór fram jólahraðskákmót Skákfélags Akureyrar og mættu 13 skákmenn til leiks þrátt fyrir hvimleitt veður.  Halldór Brynjar Halldórsson fór á kostum og sigraði nokkuð örugglega.  Hann og lagði alla andstæðinga sína í dag nema Sigurð Arnarson sem lenti í öðru sæti tveimur vinningum á eftir Hadda Bé. Jón Kristinn Þorgeirsson og Sigurður Eiríksson urðu jafnir í 3.-4. sæti og Smári Ólafsson í því fimmta. Þessir keppendur skáru sig nokkuð úr í vinningafjölda.

Lokastaðan varð eftirfarandi:

• Halldór Brynjar 11 vinningar af 12
• Ziggi A (Eins og Spice Girls nefndu hann forðum) 9 vinningar
• Jón Kristinn og Sigurður E 8,5 vinningar
• Smári Ólafs   8 vinningar
• Símon og Einar G 5,5 vinningar
• Haki og Sveinbjörn 5 vinningar
• Andri Freyr 4 vinningar
• Eymundur og Logi 3 vinninga
• Aðalsteinn 2 vinningar

Frásögn tekin af heimasíðu Skákfélags Akureyrar.

Skákþáttur Morgunblaðsins: Friðrik og Uhlmann tryggðu sigur "Handanna"

Í keppni sem vakti talsverða athygli hér á landi og fram fór í Poderbrady í Tékklandi milli „Gamalla handa" og „Snjóflygsna" áttu sér stað mögnuð umskipti í seinni hálfleik. Lengst af benti flest til þess að þarna myndi enn eitt karlavígið falla. „Snjóflygsurnar", þ.e. rússnesku skákkonurnar Valentina Gunina og Alina Kashlinskaya, tékkneska skákkonan Kristína Havlikova og indverska skákdrottning Tania Sachdev, tefldu af miklum styrk, einkum þó hin undurfagra Tania sem náði besta vinningshlutfalli keppenda, sex vinningum úr átta skákum og árangri upp á 2643 elo-stig.

Wolfgang Uhlmann og Friðrik Ólafsson, sem tefldu fyrir „Hendurnar" ásamt Vlastimil Hort og Oleg Romanishin, byrjuðu báðir illa og um tíma virtist mega afskrifa gamla Austur-Þjóðverjann. Einhvers staðar úr blámóðu fjarskans heyrðist þó hvíslað að gamlir gæðingar færu stundum hægt af stað. Í hálfleik var staðan 10:6 „Snjóflygsunum" vil og allt eins líklegt að þær ykju forskotið í seinni helmingi keppninnar. En viti menn: „Hendurnar" unnu næstu viðureignir og söxuðu á forskotið. Fyrir lokaumferðina var svo jafnt, 14:14. „Snjóflygsurnar" stóðu þó betur að vígi því þær höfðu hvítt í öllum skákum lokaumferðarinnar. Hafi það það verið taktík þeirra að semja jafntefli gegn Hort og Romanisin og reyna síðan að vinna Friðrik og/eða Uhlmann þá mistókst það hrapallega: Friðrik og Uhlmann unnu báðir og tryggðu sigur „Handanna" eða góðborgaranna eins og einhver vildi kalla liðið, lokaniðurstaðan 17:15. Hort og Romanishin fengu 4 ½ v. af átta en Friðrik og Uhlmann 4 vinninga hvor. Félagar Friðriks í liðinu hafa allir teflt á Íslandi, Uhlmann á Fiske-mótinu 1968, Hort á Reykjavíkurskákmótinu 1972 og oft eftir það en Romanishin var með á Reykjavíkurmótinu árið 2004.

Þrjár sigurskákir Friðriks í þessari keppni voru vel tefldar. Í lokaumferðinni virtist staðan í jafnvægi þegar andstæðingi hans varð á meinleg yfirsjón og Friðrik lét ekki tækifærið sér úr greipum ganga:

Kristina Havlikova - Friðrik Ólafsson

Sikileyjarvörn - Alapin

1. e4 g6 2. d4 Bg7 3. c3 d5 4. e5 c5 5. h3 Rc6 6. Rf3 Bf5 7. Be2 cxd4 8. cxd4 Bxb1!?

Óvæntur leikur. Friðrik lætur biskupaparið af hendi og reynir að byggja upp trausta stöðu fyrir riddarana.

9. Hxb1 e6

Alls ekki 9. .... Da5+ 10. b4! Dxa2 11. Hb2 og drottningin hefur ratað í mikil vandræði.

10. h4 h5 11. O-O

Hér var upplagt að leika 11. b4 ásamt b5 við tækifæri og koma biskupnum fyrir á a3.

11. ... Rh6 12. Bd3 O-O 13. Bg5 Db6 14. Dd2 Rg4 15. Be2 Hac8 16. Hbc1 Hfe8

Taflmennska hvíts hefur verið alltof bitlaus og Friðrik hefur náð að jafna taflið.

17. Hc3 Ra5 18. Hfc1 Hxc3 19. Dc3 Rc6 20. Bf4 a6 21. Bd3 Bh6 22. Bxh6 Rxh6 23. a3 a5 24. Dd2 Rg4 25. Bb1 Kg7 26. Hc3 He7 27. b3 Hc7 28. Re1??

Hér er kominn tapleikurinn. Tékkneska skákkonan lagði þá spurningu fyrir Friðrik hvort peðið á d4 væri „eitrað" eður ei. Eftir dálitla umhugsun komst Friðrik að réttri niðurstöðu.

28. ... Rxd4! 29. Hxc7 Dxc7 30. f3

Nú rann upp fyrir henni ljós að 30. Dxd4 er svarað með 30. ... Dc1! og vinnur manninn til baka. Þessi leikur breytir engu.

30. ... Rxb3! 31. Dc2 Dxe5!

Þar féll þriðja peðið og fleiri eru á leiðinni. Hvítur gafst upp.

Helgi Ólafsson

[e-mail]

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 23. desember 2012

Skákþættir Morgunblaðsins

Guðmundur Gíslason er jólasveinn Hellis

Guðmundur Gíslason sigraði á jólabikarmóti Hellis sem fram fór 28. desember sl. Guðmundur fékk 12,5v í 15 skákum og missti aðeins 2v niður. Þessir vinningar fóru í fyrri hluta mótsins. fyrst með tapi fyrir Hallgerði í 2. umferð og svo með jafnteflum í 5. og 6. umferð gegn Erni Leó og Lenku. Eftir það var Guðmundur alveg óstöðvandi og náði forystunni eftir 9. umferð af Stefáni Bergssyni sem sigraði á mótinu á síðasta ári. Að lokum stóðu bara Guðmundur og Lenka Ptácniková eftir en stað Guðmundar var betri með eitt tap og tvö jafntefli en Lenka með 3 töp og tvö jafntefli. Þetta gaf Guðmundi færi á því að afgreiða málin strax sem hann gerði með því að vinna Lenku í lokaskák mótsins. Á meðan tefldu Páll Andrason og Örn Leó Jóhannsson úrslitaskák um þriðja sætið og hefði þar Páll betur. 

Lokastaðan

• 1.    Guðmundur Gíslason                    12,5v/15
• 2.    Lenka Ptácniková                         10v/15
• 3.    Páll Andrason                                 9,5v/15
• 4.    Örn Leó Jóhannsson                      8,5v/15
• 5.    Oliver Aron Jóhannesson               7,5v/13
• 6.    Jón Trausti Harðarson                    7,5v/13
• 7.    Stefán Bergsson                            7v/12
• 8.    Vignir Vatnar Stefánsson               6,5v/12
• 9.    Stefán Már Pétursson                    6,5v/12
• 10.  Hallgerður Helga Þorsteinsdóttir    5,5v/11
• 11.  Vigfús Ó. Vigfússon                        5,5v/11
• 12.  Hjálmar Sigurvaldason                   5v/10
• 13.  Elsa María Kristínardóttir                4,5v/10
• 14.  Birkir Karl Sigurðsson                      4v/9
• 15.  Kristófer Jóel Jóhannesson             4v/9
• 16.  Eggert Ísólfsson                              4v/9
• 17.  Andri Steinn Hilmarsson                  3v/8
• 18.  Jóhanna Björg Jóhannsdóttir          2v/7
• 19.  Björgvin Kristbergsson                    2v/7
• 20.  Hörður Jónasson                             2v/7
• 21.  Arnar Ingi Pálsson                           1v/7

Guðmundur og Hjörvar unnu í 2. umferð - Guðmundur vann sterkan stórmeistara

Alþjóðlegu meistararnir Hjörvar Steinn Grétarsson (2516) og Guðmundur Kjartansson (2404) unnu báðir í annarri umferð Hastings Chess Congress sem fram fór í dag. Guðmundur vann úkraínska stórmeistarann Andrey Sumets (2638), sem er næststigahæstur keppenda en Hjörvar vann enska FIDE-meistarann Adam Ashton (2366). Þeir hafa báðir fullt hús og eru efstir ásamt fjórum öðrum.

Í 3. umferð, sem fram fer á morgun, teflir Guðmundur við enska stórmeistarann Keith Arkell (2470) en Hjörvar við enska alþjóðlega meistarann Jonathan Hawkins (2507).

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Mikill Þungi á Atskákmóti Skákklúbbs Icelandair

Skáksveitin "Þunginn" er efst á Atskákmóti Skákklúbbs Icelandair að loknum fyrri degi mótsins sem fram fór í Hótel Natura (Loftleiðum) sem fram fór í dag. Berserkir koma í öðru sæti og Ísland er í 3. sæti. Mikil spenna er á mótinu en segja má að a.m.k. átta sveitir geti blandað sér í toppbaráttuna.

Mótinu verður framhaldið með umferðum 10-17 á morgun.

 

Rk.	Team	TB1	TB2
1	Þunginn	27	15
2	Berserkir	25,5	15
3	Ísland	24,5	14
4	Computer says no	23,5	12
5	Nansý og strákarnir	23	13
6	Lagerman og lærisveinarnir	22	12
7	Vegheflar réttlætisins	22	10
8	Nemandinn og kennararnir þrír	22	8
9	Felix og sveinar hans	20,5	12
10	Lightweight	19,5	10
11	Díonýsus	18,5	9
12	Bolvíkingar	15,5	9
13	Kvennalið	15	8
14	Zugzwang	13,5	5
15	Icelandair	12	5
16	KR sveitin	10,5	3
17	Bjartasta Vonin	6	2
18	Unglingasveitin	3,5	0

• Heimasíða mótsins (Facebook)
• Chess-Results

Davíð Kjartansson og Sveinn Ingi Sveinsson jólavíkingar Víkingaklúbbsins 2012

Davíð Kjartansson sigraði á Jólaskákmóti Víkingaklúbbsins sem fram fór í Billiard-barnum í gær. Tómas Björnsson og Páll Agnar Þórarinsson urðu í 2.-3. sæti. Sveinn Ingi Sveinsson vann svo Jólamótið í Víkingaskákinni.

Jólamót Víkingaklúbbsins

Place Name                 Feder Rtg Loc Score M-Buch. Buch. Progr.

  1   Davíð Kjartansson                  7.5      31.0  37.5   39.0
 2-3  Tómas Björnsson                    6.5      31.0  38.5   34.0
      Páll Thórarainsson                 6.5      31.0  38.5   33.5
  4   Gunnar Rúnarsson                   6        31.5  39.0   30.0
  5   Ólafur Thorsson                    5.5      32.0  39.5   25.5
  6   Róbert Lagerman                    5        32.5  40.0   22.0
  7   Stefán Sigurjónsson                4        33.5  41.0   20.0
 8-9  Jón Árni Halldórsson               2        35.5  43.0   12.0
      Sturla Thórðarsson                 2        35.5  43.0    9.0
 10   Lárus Knútsson                     0        35.5  45.0    0.0

Jólamótið í Víkingaskák

 

Place Name                 Feder Rtg Loc Score M-Buch. Buch. Progr.

  1   Sveinsson, Sveinn                  4.5       7.0  10.5   12.5

  2   Björnsson, Tómas                   3.5       7.0  11.5   10.5

  3   Sigurjónsson, Stefán               3         7.5  12.0    8.0

 4-5  Rúnarsson, Gunnar                  2         8.5  13.0    7.0

      Thórsson, Ólafur                   2         8.5  13.0    7.0

  6   Halldórsson, Jón                   0         8.5  15.0    0.0

 

Héðinn teflir í bandarísku háskólakeppninni

Stórmeistarinn Héðinn Steingrímsson (2560) teflir um helgina í bandarískri háskólakeppni sem fram fer um helgina í Princeton í New Jersey. Eftir 4 skákir hefur Héðinn hlotið 2,5 vinning.

Í 1. og 2. umferð vann hann Paul Brooks (2222) og Aura Cris Salazar (2225). Í 3. umferð gerði hann jafntefli við Priyadh Kannappan (2497) en í fjórðu umferð tapaði hann fyrir stórmeistaranum Wesley So (2711).

Tvær umferðir eru eftir á mótinu. Önnur fer fram í kvöld og hefst kl. 22 en sú síðari fer fram á morgun og hefst kl. 14 á morgun. Hægt er að fylgjast með skákum Héðins beint.

Héðinn teflir á fyrsta borði fyrir Texas Tech-háskólann. Sveitin er ein fjögurra sveit sem hafði fullt hús eftir 3 umferðir en alls taka 44 sveitir þátt.

• Heimasíða mótsins
• Beinar útsendingar

Hastings: Hjörvar og Guðmundur unnu í fyrstu umferð

Alþjóðlegu meistararnir Hjörvar Steinn Grétarsson (2516) og Guðmundur Kjartansson (2404) unnu báðir í fyrstu umferð Hastings Chess Congress sem fram fór í gær. Hjörvar vann rússneska FIDE-meistarann Boris Furman (2237) en Guðmundur vann Íslandsvinkonuna Fiona Steil-Antoni (2169), sem er alþjóðlegur meistari kvenna frá Lúxemborg.

Í 2. umferð, sem fram fer í dag, teflir Hjörvar við enska FIDE-meistarann Adam Ashton (2366) en Guðmundur við úkraínska stórmeistarann Andrey Sumets (2638), sem er næststigahæstur keppenda. Skákir beggja verða sýndar beint en umferðin hefst kl. 14:15.

92 keppendur taka þátt og þar af 13 stórmeistarar. Hjörvar er nr. 10 í stigaröð keppenda en Guðmundur er nr. 19.

• Heimasíða mótsins
• Beinar útsendingar (hefjast kl. 14:15)

Smári hraðskákmeistari Goðans-Máta

Smári Sigurðsson varð í kvöld hraðskákmeistari Goðans-Máta með öruggum hætti þegar hann vann alla sína andstæðinga 8 að tölu. Jakob Sævar Sigurðsson varð annar með 7 vinninga og Heimir Bessason varð í þriðja sæti með 5 vinninga. Hlynur Snær Viðarsson vann sigur í yngri flokki með 5 vinninga, Jón Aðalsteinn Hermannsson varð í öðru sæti með 2 vinninga og Bjarni Jón Kristjánsson, sem einnig fékk tvo vinninga, varð í þriðja sæti örlítið lægri á stigum en Jón.

Lokastaðan:

1.    Smári Sigurðsson                    8  af 8
2.    Jakob Sævar Sigurðsson          7
3-4. Heimir Bessason                     5
3-4. Hlynur Snær Viðarsson            5
5.    Hermann Aðalsteinsson           3
6-8. Ævar Ákason                           2
6-8. Jón Aðalsteinn Hermannsson  2
6-8. Bjarni Jón Kristjánsson            2
9.    Sighvatur Karlsson                  1         

Heimasíða Goðans-Máta