Barna- og unglingaæfingar Hellis hefjast í dag eftir sumarfrí

Barna- og unglingaæfingar Hellis hefjast aftur eftir sumarfrí mánudaginn 2. september 2013. Taflið byrjar kl. 17:15 og fyrirkomulagið verður það sama og síðasta vetur.  Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á sumum æfingum. Engin þátttökugjöld.

Æfingarnar verða haldnar í félagsheimili Hellis í Álfabakka 14a, Mjódd. Inngangur er við hliðina á Subway en salur félagsins er á þriðju hæð hússins. Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til. Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Umsjón með æfingunum hefur Vigfús Ó. Vigfússon.

Skákþáttur Morgunblaðsins: Sterkar taugar og skylmingahæfni í hraðskákum

Nokkrum skákmönnum á heimsbikarmótinu sem nú stendur yfir í Tromsö í Noregi fylgdu góðar óskir, sérstaklega þeim sem teflt hafa á síðustu Reykjavíkurskákmótum. Þrátt fyrir góða spretti í byrjun hafa þessir vinir okkar helst úr lestinni einn af öðrum. Kínverski pilturinn Yi Wei féll úr leik eftir tvær at-skákir við Azerann Mamedyarov og Cori systkinin frá Perú, Deysi og Jorge féllu úr leik í fyrstu umferð, Pavel Eljanov beið lægri hlut fyrir landa sínum Karjakin í 3. umferð, Alexei Dreev tapaði fyrir Rússanum Andreikin í hraðskákhluta þriðju umferðar en sigurvegarinn frá Reykjavíkurmótinu 2012, Fabiano Caruana, hefur hinsvegar haldið sínu striki og er kominn áfram í 5. umferð ásamt sjö öðrum skákmönnum. Svona útsláttarkeppnir snúast um sterkar taugar og skylmingahæfni í hraðskákum. Gata Kamsky er einn þeirra sem alltaf standa sig; eftir sigur í fyrri kappskákinni gegn Rússanum Shimanov féll hann fyrir kóngsbragði í 2. umferð en vann þá báðar at-skákirnar. Magnús Carlsen „tísti" um góða frammistöðu landa síns Jon Ludwig Hammer sem tapaði þó fyrir Kamsky í 3. umferð sem síðan lagði Azerann Mamedyarov í 4. umferð. Kamsky er bestur í þungri stöðubaráttu en eins og skákin sem hér fer á eftir sýnir glöggt, þá er sú deild líka vel starfandi sem fæst við harðar atlögur að kóngsstöðu andstæðingsins:

Heimbikarmótið í Tromsö 4. umferð:

Gata Kamsky - Shakhriyar Mamedyarov

Sikileyjarvörn

1. e4 c5 2. Rf3 e6 3. d4 cxd4 4. Rxd4 Rc6 5. Rc3 Dc7 6. f4 d6 7. Be3 Rf6 8. Df3 a6 9. Bd3

Skarpara er 9. O-O-O en Kamsky vill hafa vaðið fyrir neðan sig.

9. ... Be7 10. O-O O-O 11. Kh1 Bd7 12. Hae1 b5 13. a3 Hab8 14. Rxc6 Bxc6 15. Dh3 Hfd8 16. Bd2 d5?!

Hvítur hefur ýmsar hótanir í frammi, einkum 17. e5. Þessi leikur dregur þó lítið úr sóknarmætti hvíts.

17. e5 Re4 18. f5!

Mannsfórnin er fullkomlega rökrétt hafi Kamsky séð fyrir 21. og 22. leikinn sem telja verður öruggt.

18. ... Rxd2 19. fxe6 Re4 20. exf7+ Kh8 21. Rxd5! Bxd5 22. Hxe4! g6

Alls ekki 22. ... Bxe4 23. Bxe4 g6 24. Bxg6 og mátar.

23. Hef4

- Sjá stöðumynd -

Hvíta staðan er ógnandi en samt á Mamedyarov þrjá frambærilega varnarleiki: a: 23. ... Dxe3 t.d. 24,. Bxg6 Dg7. Svartur nær að verjast og staðan er í jafnvægi, b: 23. ... Dc8 sem hindrar framrás e5-peðsins og c: 23. .. Db6.

23. ... Kg7? 24. e6!

Erfiður leikur sem hótar 25. f8(D)+ Hxf8 26. Hf7+ og mátar.

24. ... Hf8 25. De3 Bc5 26. De1 Bd6?

Mamedyarov varð að bregðast við hótuninni 27. Dc3+ en varð jafnframt að valda h4-reitinn.

27. Hh4! Be7 28. De3!

Glæsilega teflt, 28. ... Bxh4 strandar á 29. Dd4+ o.s.frv.

28. ... h5 29. Dd4+ Kh6 30. Hxh5+!

- og svartur gafst upp, 30. ... gxh5 er svarað með 31. Hf6+ o.s.frv. og eftir 30. .. Kxh5 vinnur31. Dxd5+ eða jafnvel 31. Dg7.

Dularfull skákþraut

Þessi skákþraut á sér dálitla sögu. Hvítur hefur leikið kóngspeðinu fram um tvo reiti. Dæmið má kalla skilyrt hjálparmát í 5. leik, lokaleikurinn verður að vera riddari drepur hrók mát, fyrsti leikur meðtalinn. Hvernig ganga leikir fyrir sig?

Sagt er að ýmsir frægir menn, t.a.m. Kasparov, Karpov og gamli heimsmeistarinn Botvinnik, hafi ekki fundið lausnina sem mun birtast í þessum dálki í fyllingu tímans.

----------------------------------------------

Skákþættir Morgunblaðsins eru birtir á Skák.is viku síðar en í sjálfu Morgunblaðinu.  

Grein þessi birtist í Sunnudagsmogganum, 25, ágúst 2013.

Skákþættir Morgunblaðsins

[Event "World Cup"] [Site "Tromso NOR"] [Date "2013.08.20"] [EventDate "2013.08.11"] [Round "27.8"] [Result "1-0"] [White "Gata Kamsky"] [Black "Shakhriyar Mamedyarov"] [ECO "B47"] [WhiteElo "?"] [BlackElo "?"] [PlyCount "59"] 1. e4 c5 2. Nf3 e6 3. d4 cxd4 4. Nxd4 Nc6 5. Nc3 Qc7 6. f4 d6 7. Be3 Nf6 8. Qf3 a6 9. Bd3 Be7 10. O-O O-O 11. Kh1 Bd7 12. Rae1 b5 13. a3 Rab8 14. Nxc6 Bxc6 15. Qh3 Rfd8 16. Bd2 d5 17. e5 Ne4 18. f5 Nxd2 19. fxe6 Ne4 20. exf7+ Kh8 21. Nxd5 Bxd5 22. Rxe4 g6 23. Ref4 Kg7 24. e6 Rf8 25. Qe3 Bc5 26. Qe1 Bd6 27. Rh4 Be7 28. Qe3 h5 29. Qd4+ Kh6 30. Rxh5+ 1-0

Guðmundur endaði með tveimur sigrum.

Alþjóðlegi meistarinn Guðmundur Kjartansson (2434) endaði vel á alþjóðlegu móti í Barcelona. Hann vann skákirnar í lokaumferðum tveimur. Hann hlaut 7 vinninga í 10 skákum og endaði í 14.-23. sæti.

Sigurvegari mótsins var indverski stórmeistarinn B. Adhiban (2567) með 8,5 vinning. Þýski stórmeistarinn og félagsmaðurinn í TV Jan Gustafsson (2619) var meðal 4 keppenda sem fengu 8 vinninga.

Frammistaða Guðmundar samsvaraði 2406 skákstigum og lækkar hann um 1 stig fyrir hana. 

310 keppendur frá 39 löndum tóku þátt í mótinu. Þar af voru 23 stórmeistarar. Guðmundur var nr. 34 í stigaröð keppenda.

Guðmundur tekur þátt í öðru móti á Spáni sem hefst á morgun.

• Heimasíða mótsins
• Chess-Results
• Beinar útsendingar (hefjast almennt kl. 14:30)

Myndir frá minningarmóti Guðmundar Arnlaugssonar

Hrafn Jökulsson var með myndavélina á lofti í Menntaskólanum í Hamrahlíð í gær, þar sem vel skipað og bráðskemmtilegt minningarmót Guðmundar Arnlaugssonar fór fram. Keppendur á mótinu voru 70, sannkallaður þverskurður skákhreyfingarinnar: gamlar kempur, stórmeistarar, skákdrottningar og efnisbörn.

Myndaalbúm Hrafns má skoða hér. 

EM-keppandinn: Jón Kristinn Þorgeirsson

Átta fulltrúar frá Íslandi taka þátt í EM ungmenna sem fram fer í Budva í Svartfjalllandi dagana 28. september - 9. október. Fulltrúarnir átta standa þessa dagana í fjáröflun fyrir keppnina en stærsti kostnaðurinn lendir á þeim sjálfum. Keppendurnir eru kynntir þessa dagana hér á Skák.is

Að þessu sinni er það Akureyringurinn efnilegi Jón Kristinn Þorgeirsson.

Nafn

Jón Kristinn Þorgeirsson.

Fæðingardagur

9. september 1999.

Félag

Skákfélag Akureyrar

Hefurðu teflt áður á EM/HM ungmenna?

Já, tvisvar á EM. Á Ítalíu 2009 og Prag 2012. Svo hef ég farið á Norðurlandamót í skólaskák mörg ár í röð.

Helstu skákafrek

Margfaldur Íslandsmeistari barna og í skólaskák, Coca-cola meistari, Skákmeistari Skákfélags Akureyrar, og marga fleiri titla. Bikararnir eru orðnir ansi margir enda byrjaði ég ungur að vinna mót.

Skemmtilegasta skákferðin

EM á Ítalíu 2009 var skemmtilegasta ferðin.

Eftirminnilegasta skákin

Vann Björn Þorsteinsson í mjög skemmtilegri skák á Íslandsmóti skákfélaga.

Viltu styrkja ungmennin sem fara á EM?

Það er hægt með því að kaupa vörur á afar hagstæðu verði á Netsöfnun.is og styrkja um leið ungmennin átta.

Það er einnig hægt að styrkja við ungmennin með framlögum með greiðslukorti; 2.000 kr., 5.000 kr. og 10.000 kr.

Jóhann sigraði á minningarmóti Guðmundar Arnlaugssonar

Jóhann Hjartarson sigraði á minningarmóti Guðmundar Arnlaugssonar sem fram fór í Menntaskólanum við Hamrahlíð í dag. Jóhann sem er gamall nemandi Guðmundar í skólann sýndi enn og sannaði hversu megnugur hann er við skákborðið. Hjörvar Steinn Grétarsson varð annar og Jón Viktor Gunnarsson og Helgi Ólafsson urðu í 3.-4. sæti.

Veitt voru aukaverðlaun í fjórum flokkum. Bragi Halldórsson, gamall  samstarfsmaður Guðmundar úr MH, vann öðlingaverðlaunin (60+) örugglega en hann hlaut 7,5 vinning. Gunnar Kr. Gunnarsson, annar gamall samstarfsfélagi Guðmundar úr skákhreyfingunni varð annar í þessum flokki með 6,5 vinning.

Oliver Aron Jóhannesson tók unglingaverðlaunin en hann hlaut 6 vinninga. Vignir Vatnar Stefánsson og Gauti Páll Jónsson komu næstir með 5,5 vinning.

Lenka Ptácníková og Hallgerður Helga Þorsteinsdóttir komu efstar og jafnar í mark í kvennaflokki með 5,5 vinning en Lenka hlaut verðlaunin eftir stigaútreikning.

Siguringi Sigurjónsson og Arnljótur Sigurðsson urðu efstir og jafnir í flokki skákmanna með minna en 2000 skákstig en Siguringi hlaut verðlaunin eftir stigaútreikning.

Lokastöðu mótsins má finna á Chess-Results.

Skáksamband Íslands stóð fyrir mótshaldinu í samvinnu við afkomendur Guðmundar, Menntaskólann við Hamrahlíð og Nýherja. Illugi Gunnarsson, menntamálaráðherra, setti mótið og lék fyrsta leikinn fyrir Jóhann Hjartarson gegn Sigurði Ingasyni.

Myndaalbúm (HJ)

Minningarmót um Guðmund Arnlaugsson fer fram á morgun í MH - allir keppendur fá bókagjöf

Minningarmót um Guðmund Arnlaugsson fer fram á morgun laugardag í Menntaskólanum við Hamrahlíð. Mótið hefst kl. 14 og stendur til kl. 17. Illugi Gunnarsson, menntamálaráðherra, setur mótið og leikur fyrsta leik mótsins fyrir Jóhann Hjartarson, stigahæsta íslenska skákmanninn og fyrrum nemenda Guðmundar í MH. Allir keppendur fá bókagjöf en um er að ræða hina frábæru bók, Skáldskapur við skákborðið eftir Guðmund sjálfan. Mótið er öllum opið og opið er fyrir skráningu fram til 13 á morgun. Skráning fer fram hér á Skák.is.

Mótið fer fram í tilefni aldarminningar Guðmundar Arnlaugssonar sem fæddist 1. september 1913. Á afmælisdaginn sjálfan (sunnudaginn) verður svo málþing í MH tileinkað Guðmundi þar sem Helgi Ólafsson verður fulltrúi skákhreyfingarinnar og fjallar um feril Guðmundar sem skákmanns, skákdómara og skákrithöfundar. Málþingið hefst kl. 14 en nánar má lesa um það hér.

Minningarmótið er öllum opið. Tefldar verða 11 umferðir, svissneska kerfið, með tímamörkunum 5+2 (5 mínútur + 2 viðbótarsekúndur á hvern leik).

Þátttökugjöld eru 1.000 kr. en 500 kr. fyrir unglinga (16 ára og yngri), öryrkja og aldraða (67+).

Minningarmótið sjálft er öllum opið. Tefldar verða 11 umferðir hraðskák (5+2).  Meðal keppenda eru stórmeistararnir Jóhann Hjartarson, Helgi Ólafsson og Jón L. Árnason sem allir voru nemendur við skólann þegar Guðmundur var þar rektor sem og landsliðsmaðurinn Hjörvar Steinn Grétarsson. Meðal annarra keppenda eru margir af yngri skákmönnum landsins og þar með talið flestir fulltrúa Íslands á EM ungmenna sem fram fer í haust í Svartfjallalandi.

Keppendalistann má finna á Chess-Results.

Heildarverðlaun mótsins eru 150.000 kr. Þau skiptast sem hér segir:

Verðlaun fyrir efstu sætin eru eftirfarandi

1. 60.000 kr.
2. 30.000 kr.
3. 20.000 kr.

Aðalverðlaunum verður skipt samkvæmt Hort-kerfinu séu menn jafnir.

Aukaverðlaun

• Efsti öldungurinn 60 ára og eldri (fæddir 1953 eða fyrr): 10.000 kr.
• Efsti unglingurinn 16 ára og yngri (fæddir 1997 eða síðar): 10.000 kr.
• Efsta konan: 10.000 kr.
• Efsti maður með minna en 2000 skákstig: 10.000 kr.

Aukaverðlaun eru miðað við nýjustu útgefin íslensk skákstig. Reiknuð eru stig séu menn jafnir og efstir. 

Skáksamband Íslands stendur fyrir mótinu í samvinnu við afkomendur Guðmundar, Menntaskólann við Hamrahlíð og Nýherja.

Bolvíkingar og Goðinn-Mátar mætast í undanúrslitum

Dregið var fyrr í dag til undanúrslita Hraðskákkeppni taflfélaga. Stóra viðureignin undanúrslita er viðureign Bolvíkinga sem mörðu Eyjamenn í gær og Goðans-Máta, sem hafa farið illa með Reykjavíkurfélögin TR og Helli í fyrri umferðum.

Skákfélag Akureyrar mætir svo sigurvegaranum úr viðureign Víkingaklúbbsins og Skákfélags Íslands sem mætast á þriðjudaginn.

Það var Ríkharður Sveinsson sem dró miða úr Copa America-bikarnum sem íslenska ólympíuliðið vann á Ólympíuskákmótinu 1939 í Buenos Aires þar sem Guðmundur Arnlaugsson var meðal keppenda.

Það eru fastir leikdagar á undaúrslitum og úrslitum keppninnar. Undanúrslitin fara fram á fimmtudaginn 5. september kl. 20 og úrslitin sunnudaginn 8. september kl. 14.

Háspenna í Faxafeni þegar Bolar lögðu Eyjamenn 37-35

Bolvíkingar lögðu Eyjamenn í æsispennandi viðureign í 8-liða úrslitum hraðskákkeppni taflfélaga, sem fram fór í Faxafeni á fimmtudagskvöldið. Þetta var sannkallaður bikarleikur, þar sem úrslitin réðust í síðustu skákinni í síðustu umferðinni. Lokatölur urðu 37-35

 

Bæði lið voru afar vel skipuð. Meðalstig Bolvíkinga voru 2350 en í skáksveit Eyjamanna voru meðalstigin 2330. Bolarnir byrjuðu með látum og sigruðu 5-1 í fyrstu umferð, en Eyjamenn  bitu hressilega frá sér í næstu umferðum. Í hálfleik var staðan 19-17, Bolvíkingum í vil.

 

Bolvíkingar hófu svo seinni hálfleikinn með öruggum sigri, 4,5-1,5, og náðu þar með 5 vinninga forskoti. Eyjamenn börðust hinsvegar einsog ljón og voru búnir að minnka muninn niður í 1 vinning fyrir síðustu umferð.

 

Í lokaumferðinni höfðu Eyjamenn hvítt á öllum borðum. Staðan í umferðinni var jöfn, 2,5-2,5, þegar aðeins var ólokið skák Ingvars Þórs Jóhannessonar og Braga Þorfinnssonar. Með sigri hefði Ingvar getað knúið fram framlengingu, en hann varð að játa sig sigraðan eftir gríðarlegar sviptingar.

 

Eyjamaðurinn Helgi Ólafsson náði bestum árangri allra, hlaut 9,5 vinning af 12. Liðsfélagar hans, Ingvar og Björn Ívar Karlsson, stóðu sig einnig dável og lönduðu 7 vinningum hvor. Sérstaka athygli vakti frammistaða Björns Ívars gegn titilhöfum Bolvíkinga. Hann tapaði ekki einni einustu skák gegn stórmeisturunum og alþjóðlegu meisturunum og hlaut 3,5 vinning í 4 skákum gegn Jóhanni Hjartarsyni og Jóni L. Árnasyni.

 

Jóhann, Bragi og Jón Viktor Gunnarsson náðu bestum árangri fyrir sigurlið Bolvíkinga í skemmtilegri viðureign sem var öllum til sóma. Skákdómari var Rúnar Berg og leysti hann vandasamt hlutverk vel af hendi.

 

LIÐ BOLVÍKINGA 

 

GM Jóhann Hjartarson 2583 8,5 / 12

IM Bragi Þorfinnsson 2493 8,5 / 12

IM Jón Viktor Gunnarsson 2409 8 / 12 

GM Jón L. Árnason 2502 4,5 / 12

Magnús P. Örnólfsson 2169 3,5 / 9

FM Halldór G. Einarsson 2194 2 / 7

Guðni Pétursson 2105 2 / 8 

 

LIÐ EYJAMANNA 

 

GM Helgi Ólafsson 2544 9,5 / 12

FM Ingvar Þór Jóhannesson 2371 7 / 12

Björn Ívar Karlsson 2269 7 / 12

FM Sigurbjörn Björnsson 2395  4,5 / 12

FM Þorsteinn Þorsteinsson 2243 4 / 12

Björn Freyr Björnsson 2164  3 / 12

 

Myndaalbúm (HJ) 

EM-keppandinn: Hilmir Freyr Heimisson

Átta fulltrúar frá Íslandi taka þátt í EM ungmenna sem fram fer í Budva í Svartfjalllandi dagana 28. september - 9. október. Fulltrúarnir átta standa þessa dagana í fjáröflun fyrir keppnina en stærsti kostnaðurinn lendir á þeim sjálfum. Keppendurnir eru kynntir þessa dagana hér á Skák.is

Að þessu er það Hilmir Freyr Heimisson, sem teflir í flokki 12 ára og yngri, og náði nýlega eftirtektarverðum árangri á Politiken Cup.

Nafn

Hilmir Freyr Heimisson.

Fæðingardagur

4. ágúst 2001.

Félag

Taflfélagið Hellir

Hefurðu teflt áður á EM/HM ungmenna?

Já á Prag í Tékklandi árið 2012.

Helstu skákafrek

Íslandsmeistari í skólaskák 2013,

Stigaverðlaun á Politiken Cup 1501-1700 stig 2013

Barnablitzmeistari á Reykjavík Open 2012

Unglingameistari Hellis 2012

Afmælismót aldarinnar  5.- 6. Bekkur 1. sæti 2012

Unglingameistari TR 2011, MS jólaskákmótsmeistari 2011

Skákakademía Kópavogs 1.sæti 2011, 2012, 2013

Skákþing Garðabæjar B-flokkur 1.sæti 2011

Og fleira...

Skemmtilegasta skákferðin

Ferð á Politiken Cup sem ég fór á núna í júlí 2013 með mömmu og Henrik í Helsingør.

Eftirminnilegasta skákin

Á móti Hans Richard Thjomoe á Reykjavíkurskákmótinu 2012 Skákina má finna hér og svo fylgir hún með sem viðhengi.

Viltu styrkja ungmennin sem fara á EM?

Það er hægt með því að kaupa vörur á afar hagstæðu verði á Netsöfnun.is og styrkja um leið ungmennin átta.

Það er einnig hægt að styrkja við ungmennin með framlögum með greiðslukorti; 2.000 kr., 5.000 kr. og 10.000 kr.

[Event "Reykjavik Open"] [Site "Reykjavik ISL"] [Date "2012.03.12"] [EventDate "2012.03.06"] [Round "8.84"] [Result "0-1"] [White "Hans Richard Thjomoe"] [Black "Hilmir Freyr Heimisson"] [ECO "B23"] [WhiteElo "1926"] [BlackElo "1602"] [PlyCount "52"] 1. e4 c5 2. Nc3 Nc6 3. f4 g6 4. Nf3 Bg7 5. Bb5 Nd4 6. O-O a6 7. Be2 e6 8. Nb1 b5 9. d3 Bb7 10. c3 Nc6 11. Qe1 Nge7 12. Be3 d6 13. Nbd2 Rc8 14. Rc1 Ba8 15. Ng5 Qd7 16. f5 gxf5 17. exf5 exf5 18. Bh5 Nd8 19. Qg3 Rg8 20. Rce1 h6 21. Nxf7 Nxf7 22. Bxh6 Kf8 23. Bg5 Nxg5 24. Rxe7 Qxe7 25. Rxf5+ Bf6 26. Qf2 Nh3+ 0-1