Atskákmót Skákklúbbs Icelandair 2013 - Sveitakeppni

Þá er komið að því, hið skemmtilega og spennandi Atskákmót Icelandair 2013 verður haldið á Reykjavík Natura, 28.-29. desember. Þetta mót verður með svipuðu sniði og undanfarin tvö ár en fjöldi þátttakenda hefur einhver áhrif á keppnisfyrirkomlagið.

Mörg merkileg skákmót hafa verið haldin á gamla á Hótel Loftleiðum í gegnum tíðina og hafa margir heimsþekktir skákmenn teflt þar ásamt okkar stórmeisturum og því má búast við að þessi staður rifji upp gamlar minningar hjá mörgum og skapi skemmtilegt andrúmsloft.

Þetta er opin sveitakeppni með fjögurra manna liði en leyfilegt er að hafa 3 varamenn. Þó að þetta sé opin sveitakeppni eru fyrirtæki, stofnanir, klúbbar, eða önnur félög hvött til að senda lið til keppni. Markmiðið er að hafa jafna og skemmtilega keppni og því er sá hátturinn hafður á að hver sveit má ekki hafa fleiri en 8.500 skákstig í hverri umferð.

Vissulega er hægt að setja saman allskonar sveitir sem væru innan við 8.500 stig en það væri gaman ef að sveitir væru skipaðar bæði stigaháum annars vegar og stigalægri hins vegar, "Gens Una Sumus" - "Við Erum Ein fjölskylda"

Miðað er við alþjóðleg stig en ef alþjóðleg stig eru ekki til staðar er miðað við íslensk stig og stigalausir reiknast með 1.500 stig.

• Reykjavík Natura, áður Hótel Loftleiðir
• 28.-29. desember, byrjað klukkan 13:00 báða dagana
• 4 í liði, leyfilegt að hafa 3 varamenn
• Þátttökufjöldi 14-28 sveitir, en það verður hægt að setja lið á biðlista.
• 8.500 stig á sveitina í hverri umferð.
• Stigalausir og þeir sem hafa færri en 1.500 stig verða skráðir með 1.500 stig
• Miðað er við desember lista FIDE og einnig íslenska listans.
• 15 mínútur á mann, þátttökufjöldi gæti haft áhrif á tímatakmörkin.
• 9-14 umferðir, en umferðafjöldi ræðst af fjölda liða.
• Miðað er við að teflt verði á milli kl. 13:00-18:00 báða dagana.
• Keppnisfyrirkomulagið er svissneskt kerfi.
• Flestir vinningar gilda.
• Þátttökugjald: 18.000 á sveit og greiðist á skákstað. Kaffi og djús innifalið.
• Þátttakendur eru hvattir til að skrá sig tímanlega þar sem að þátttökufjöldinn er takmarkaður.
  

Verðlaun:*

Sveitakeppni:

• 1. sæti: 4x farmiðar fyrir tvo til Evrópu með Icelandair
• 2. sæti: 4x gjafabréf fyrir tvo á veitingastaðnum Satt .
• 3. sæti: 4x gjafabréf fyrir tvo í Fontana

Borðaverðlaun.

Borðaverðlaunin eru farmiðar innanlands fyrir tvo í boði Flugfélags Íslands og Icelandair Saga Club og gisting í 2 nætur fyrir tvo á Icelandair Hótelum ásamt morgunverðarhlaðborði. Hægt verður að velja um gistingu á Hótel Akureyri eða á Hótel Héraði.

Óvæntasti sigurinn
Sá aðili sem vinnur óvæntasta sigurinn mun fá gjafabréf fyrir tvo á veitingastaðnum Satt . Miðað er við stigamun.

Útdráttarverðlaun - einvígi, teflt á meðan er verið að taka saman lokaúrslit.
Einnig eru glæsileg útdráttarverðlaun en þau eru 25.000

Tveir verða dregnir út til að tefla hraðskák um þessi verðlaun. 10 mínútum verða skipt á milli skákmannanna í öfugu hlutfalli við stigin sem skákmennirnir hafa til að gefa þeim stigalægri meiri möguleika og auka spennuna.

Sá sem er dreginn fyrr fær hvítt og verður að vinna, svörtum nægir jafntefli.

Sá sem tapar fær gjafabréf á veitingastaðnum Satt fyrir tvo.

* ATH. Sami aðili getur ekki unnið til fleiri en einna ferðavinninga, ef slíkt kemur upp mun viðkomandi aðili velja hvaða vinning hann vill, útfærist nánar á skákstað!
- Greiða þarf flugvallarskatta af öllum flugmiðum.

Skráning fer fram hér.

Hægt er að fylgjast með skráningum hér.

Á Facebook er hægt að skiptast á skoðunum og auglýsa sig eða eftir liðsmönnum

Skráningu lýkur aðfaranótt laugardagsins 14. desember.
Frekari upplýsingar er hægt að fá með því að senda póst á Óskar Long; [e-mail]

Ríkharður, Haraldur og Ögmundur efstir á Vetrarmóti öðlinga

Friðarpípur voru reyktar á efstu borðum fjórðu umferðar Vetrarmóts öðlinga sem fram fór í gærkveldi. Staðan á toppnum breyttist því ekkert. Ríkharður Sveinsson (2127), Haraldur Baldursson (1980) og Ögmundur Kristinsson (2006) eru sem fyrr efstir en þeir hafa 3½ vinning. Sjö skákmenn hafa 3 vinninga og búast má við hörðum áttökum í lokaumferðunum þremur.

Fimmta umferð fer fram nk. miðvikudagskvöld.

Mótstöflu má nálgast á Chess-Results.

• Heimasíða TR
• Chess-Results 
• Myndaalbúm (GB)

Örn Leó sigraði á hraðkvöldi

Örn Leó Jónsson sigraði öruggleg með 8,5v í níu skákum á hraðkvöldi GM Hellis sem fram fór 18. nóvember sl. Það var aðeins Páll Sigurðsson sem kom í veg fyrir að Örn Leó ynni allar skákirnar en þeir gerðu jafntefli í næst síðustu umferð. Í öðru sæti varð Páll sigurðsson með 6,5v og síðan varð Gauti Páll Jónsson í þriðja sæti með 5,5v og aðeins hærri en Vigfús á stigum. Örn Leó dró svo í lok hraðkvöldsins Jón Gunnar Jónsson í happdrættinu og fengu þeir báðir gjafamiða á Saffran.

Næsta skákkvöld hjá GM Helli í Álfabakka 14a í Mjóddinni verður mánudaginn 25. nóvember kl. 20 og þá verður einnig hraðkvöld.

Röð	Nafn	Vinn.	TB1	TB2	TB3
1	Örn Leó Jóhannsson	8,5	33,3	0	8
2	Páll Sigurðsson	6,5	25	0	5
3	Gauti Páll Jónsson	5,5	18,5	0	5
4	Vigfús Vigfússon	5,5	18,3	0	5
5	Gunnar Nikulásson	4,5	15,3	0	4
6	Jon Olav Fivelstad	4	16	0	3
7	Jón Gunnar Jónsson	4	13	0	4
8	Atli Johann Leósson	3,5	9,25	0	3
9	Ólafur Guðmarsson	3	8	0	3
10	Björgvin Kristbergsson	0	0	0	0

Áskell með jafntefli í áttundu umferð

Áskell Örn Kárason (2220) heldur áfram að ná góðum úrslitum á HM öldunga (60+) sem er í fullum gangi í Rijeka í Króatíu. Áskell hefur 5,5 vinning og er í 10.-27. sæti.

Gunnar Finnlaugsson (2082) gerði jafntefli í dag og hefur 3,5 vinning. 

Franski stórmeistarinn Anatoly Vaisser (2523) er efstur með 7 vinninga.

Á morgun teflir Áskell við rússneska alþjóðlega meistarann Vladimir I Karasev (2377).

Skák Áskels á morgun er sýnd beint og hefst kl. 15.

• Heimasíða mótsins
• Chess-Results
• Beinar útsendingar (hefjast flestar kl. 15)

 

Lærum að tefla - langþráð kennslubók um skák

Bókin er aðgengileg fyrir byrjendur í skák og hentar vel börnum. Hún skýrir mannganginn vel en fjallar einnig um algengar skákfléttur og hugsunarhátt sem gott er að tileinka sér þegar maður teflir. Bókin er skreytt líflegum myndum af taflmönnum og teikningum til skýringa og þótt verið sé að kenna tungumál skákarinnar þá er það gert á léttan og auðskilinn hátt.

Lærum að tefla er skemmtileg og aðgengileg handbók fyrir skákkennslu. Uppsetning er afar skýr þannig að þeir sem kunna að tefla geta notað bókina til kennslu og börn geta einnig skoðað hana sjálf og kennt þannig sjálfum sér. Hér og þar um bókina eru þrautir sem tengjast efninu og lausnirnar aftast.

Ummæli um bókina

„Afar vönduð bók og ég fagna útgáfu hennar." Stefán Bergsson, framkvæmdastjóri Skákakademíunnar."

„Ég get mælt með þessari vönduðu skákbók fyrir alla byrjendur." Gunnar Björnsson, forseti Skáksambands Íslands."

Guðmundur Kjartansson í viðtali við Árbæjarblaðið

Nýlega birtist viðtal við alþjóðlega meistarann og Árbæinginn Guðmund Kjartansson í Árbæjarblaðinu.

Vefútgáfa blaðsins er nú aðgengileg. Hana má nálgast hér; http://issuu.com/skrautas/docs/ab-2013-10.

Viðtalið er á blaðsíðu 20.

Pistill frá TR um Íslandsmót unglingasveita

TR hirti öll gullin nema eitt

Taflfélag Reykjavíkur endurheimti Íslandsmeistaratitil í flokki unglingasveita eftir nokkra bið, en A-lið félagsins vann sanngjarnan sigur á Íslandsmótinu sem fram fór í Garðabænum í gær.  Ekki nóg með það, heldur átti TR bestu B-, D-, E- og F-sveitina; einungis gullverðlaun C-sveita gengu félaginu úr greipum.

 

Taflfélag Reykjavíkur mætti með stærri hóp en nokkru sinni fyrr, en 28 krakkar tóku þátt fyrir hönd félagsins, sem er tvöfalt fleiri en í fyrra og fjórum krökkum meira en árið 2011, en þá mætti félagið til leiks með 5 sveitir og var það met þá.  Nú stillti TR upp sex sveitum sem stóðu sig allar vel.

 

Sérstaklega var gaman að sjá hvað þáttur stúlkna mikill, en 9 stúlkur tefldu fyrir félagið, eða um 1/3 hópsins.  Er þetta stærra hlutfall, heldur en hlutfall stúlkna meðal iðkenda almennt í skákinni og gefur vonandi fyrirheit um fjölgun stúlkna í skákinni.  TR sendi jafnframt sérstaka stúlknasveit til leiks - og var raunar eina félagið sem gerði það - og voru liðskonur allar á aldrinum 6 til 7 ára.

 

Til viðbótar má nefna að á sama tíma og mótið fór fram laugardagsæfing í Taflfélagi Reykjavíkur, þar sem 26 krakkar tóku þátt.  Þannig að allt í allt voru 54 krakkar að tefla fyrir hönd félagsins eða á vegum þess, sem ber markvissri uppbyggingu unglingastarfs TR fagurt vitni.

 

A-sveit TR vann sanngjarnan sigur.  Hún hlaut 23,5 vinning af 28 mögulegum og varð 2,5 og 3 vinningum á undan helstu keppinautum sínum; GM Helli-A og Fjölni-A. Sveitin vann allar viðureignir sínar utan að hún gerði jafntefli við Fjölni-A.

Vignir Vatnar Stefánsson leiddi A-sveitina og vann allar sínar skákir, utan eina, en hann mætti ofjarli sínum í Oliver Aron Jóhannssyni, 1.borðsmanni Fjölni-A.  Að öðru leyti tefldi Vignir Vatnar af miklu öryggi og undirritaður var sérstaklega ánægður með sannfærandi sigurskák hans gegn hinum efnilega 1.borðsmanni GM-Helli-A, Hilmi Frey Heimissyni.

"Ísmaðurinn með stáltaugarnar," Gauti Páll Jónsson, var afar sannfærandi á 2. borði og hefði fengið fullt hús, ef hann hefði fundið réttu leiðina í peðsendatafli gegn Dawid Kolka hjá GM-Helli-A, en skákin endaði í jafntefli.  Að öðru leyti var frammistaða Gauta til fyrirmyndar og gaman að sjá hvað hann tefldi af verðskulduðu sjálfsöryggi.

Veronika Steinunn Magnúsdóttir komst ekki almennilega í gang á 3. borði fyrr en eftir hléið, en þá tókst henni að ná sér í morgunverð.  Eftir það tefldi hún af miklu sjálfsöryggi, en það er skoðun undirritaðs að Veronika sé betri skákmaður en hún geri sér sjálf grein fyrir og hún þurfi kannski bara að leyfa sér að hafa trú á því.  Sérstaklega var eftirtektarvert hvernig Veronika vann sannfærandi sigur á Felix Steinþórssyni í GM-Helli-A, en þar tefldi Veronika miðtaflið af hugvitssemi og sjálfsöryggi.  Fyrr í mótinu hafði Veronika tapað 2 skákum, fyrst og fremst vegna tímahraks, en þessa skák hóf hún 5 mínútum of seint!

Björn Hólm Birkisson var eini nýi A-liðsmaðurinn, en "nýliðinn" leysti hlutverk sitt vel af hendi og hlaut 6 vinninga úr 7 skákum.   Skák hans við Hilmi Hrafnsson í Fjölni-A var áhugaverð og lærdómsrík.  Fyrst vann Björn mann sem gaf Hilmi kost á að komast í sókn, síðan gerði Björn mistök þegar hann reyndi að næla sér í peð í viðbót í stað þess að einfalda taflið og vinna verðskuldaðan sigur og missti manninn til baka.  Við tók jafnteflislegt endatafl, en Björn reyndist sterkari á klukkunni í miklu tímahraki beggja.  Reyndist þetta mjög mikilvægur sigur fyrir liðið, sem hefði ella tapað einu viðureign sinni.

Þar sem undirritaður var liðsstjóri A-liðsins, gat hann ekki fylgst jafn vel með öðrum liðum, en þar sem hann sá til sá hann að krakkarnir voru að tefla af mikilli einbeitingu og áhuga.  Leifur Þorsteinsson leiddi B-liðið, en hann hefur lítið teflt síðastliðin tvö ár.  Hann sýndi þó að hann hefur engu gleymt og tapaði einungis fyrir sterkustu mönnum mótsins, þeim Oliver Aron og Vigni Vatnari.  Svava, systir Leifs, var einnig að tefla á sínu fyrsta móti í langan tíma og stóð sig jafnframt með prýði, en hún hlaut 3,5 vinning af 7 á 4. borði í D-liðinu, sem hlaut einmitt gullverðlaun sem besta D-liðið.  Ekki er hægt að sleppa því að minnast á þátt Sólrúnar Elínar Freygarðsdóttur, sem tefldi á 1. borði fyrir E-liðið og hlaut 4,5 vinning úr 5 skákum og missti í raun niður unna skák í jafntefli með því að patta.

Þrátt fyrir að þessi sigurganga TR-liðanna sé vissulega ánægjuleg og hvetjandi, bæði fyrir krakkana og okkur, aðstandendur barna- og unglingastarfsins, vill undirritaður samt koma á framfæri þeirri skoðun sinni að mót þetta er fyrst og fremst góð æfing.  Nokkrir krakkanna hlutu hér mikla reynslu í mótataflmennsku, eins og liðsmenn F-liðsins, sem voru allt stúlkur á aldrinum 6 til 7 ára.  Upprennandi skákprinssessur þar á ferðinni og afsprengi hinna velheppnuðu stúlknaæfinga á laugardögum sem Sigurlaug Regína Friðþjófsdóttir hefur haldið utan um af sinni alkunnu alúð.  Liðsmenn E-liðsins og sumir liðsmanna D-liðsins voru sömuleiðis að safna mikilvægum augnablikum í reynslubankann, en á þessu móti er teflt með umhugsunartímanum 15 mínútur á skák, sem er ný reynsla fyrir mörgum þeirra.

Eftir verðlaunaafhendingu mótshaldara var haldinn sérstakt TR-lokahóf og við það tilefni fengu Veronika Steinunn Magnúsdóttir og Leifur Þorsteinsson viðurkenningu, en þau eru orðin 15 ára og verða ekki gjaldgeng í þetta mót á næsta ári.  TR þakkar þeim fyrir glæsilegt framlag í gegnum árin og leitin af arftökum þeirra er í fullum gangi á hverjum laugardegi í Faxafeni.

Eftirfarandi glæsilegu fulltrúar tefldu fyrir hönd Taflfélags Reykjavíkur

TR-A Íslandsmeistarar 23,5v

1. Vignir Vatnar Stefánsson 6v af 7
2. Gauti Páll Jónsson 6,5 af 7
3. Veronika Steinunn Magnúsdóttir 5 af 7
4. Björn Hólm Birkisson 6 af 7

TR-B

1. Leifur Þorsteinsson
2. Bárður Örn Birkisson
3. Mykhaylo Kravchuk
4. Jakob Alexander Petersen

vm Guðmundur Agnar Bragason

TR-C

1. Þorsteinn Magnússon
2. Þorsteinn Freygarðsson
3. Robert Luu
4. Davíð Dimitry Indriðason

vm Sævar Halldórsson

TR-D

1. Mateusz Jakubek
2. Ólafur Örn Olafsson
3. Sagita Rosanty
4. Svava Þorsteinsdóttir

TR-E

1. Sólrún Elín Freygarðsdóttir
2. Páll Ísak Ægisson
3. Alexander Björnsson
4. Mir Salah

vm Hubert Jakubek

TR-F

1. Freyja Birkisdóttir
2. Vigdís Lilja Kristjánsdóttir
3. Vigdís Tinna Hákonardóttir
4. Karítas Ólöf Ísfeld Hafsteinsdóttir

vm Marsibil Þóra Ísfeld Hafsteinsdóttir

• Myndir
• Chess-Results

Pistill: Torfi Leósson

Myndir: Sigurlaug R. Friðþjófsdóttir

Taflfélag Reykjavíkur Íslandsmeistari unglingasveita

 

Taflfélag Garðabæjar hélt Íslandsmót Unglingasveita í Garðalundi í Garðabæ síðasta laugardag. Alls tóku 16 lið þátt frá 5 taflfélögum þátt. Eingöngu lið frá höfuðborgarsvæðinu voru með að þessu sinni en vitað var td. að Akureyringar eiga mjög sterkt lið sem gæti átt mörguleika á verðlaunasætum. Hvorki KR ingar né Víkingaklúbburinn náðu að manna lið.

 

Taflfélag Reykjavíkur eiginlega kom, sá og sigraði í mótinu þar sem þeir komu með alls 6 lið þar sem 5 af þessum 6 liðum lentu efst í sínum flokki, auk þess að verða íslandsmeistarar 2013. sem er fyrsti titill TR eftir nokkurt hlé því þeir áttu góðu gengi að fagna á fyrstu árum keppninnar.

Fjölnismenn voru reyndar í báráttunni alveg fram að síðustu umferðum mótsins þegar lið GM Hellis skaust hálfan vinning upp fyrir. 

Lið Íslandsmeistara TR A var skipað þeim Vignir Vatnar Stefánssyni 6 af 7, Gauta Páli Jónssyni 6,5 af 7, Veroniku Magnúsdóttur 5 af 7 og Birni Hólm Birkissyni 6 af 7 eða alls 23,5 vinningur. sem er glæsilegur árangur. 

Lið GM Helllis A sem endaði í 2. sæti var skipað Hilmi Frey Heimissyni, Dawid Kolka, Felix Steinþórssyni og Heimi Páli Ragnarssyni. 

Lið Fjölnis A sem voru meistarar í fyrra með fullu húsi var skipað þeim Óliver Aron Jóhannessyni sem var besti maður mótsins og vann allar skákirnar á fyrsta borði. Nansý Davíðsdóttir, Jóhanni Arnari Finnssyni og Hilmi Hrafnssyni.  Lið Fjölnis missti 2 gríðarsterka skákmenn vegna aldurs upp úr liðinu og náðu þeir ekki að fylgja frábærum árangri síðan í fyrra eftir.

B lið TR var svo mjög gott líka en þar á eftir komu lið GM Hellis B, TG A og Hauka og Fjölnis B öll með svipaðan árangur. GM Hellir B varð sjónarmun á undan TG á 2 stigaútreikningi 

Lokastaða

Rank	Team	Gam.	+	=	-	Pts.	MP
1	TR A	7	6	1	0	23½	13
2	GM Hellir A	7	4	1	2	21	9
3	Fjölnir A	7	5	2	0	20½	12
4	TR B	7	4	2	1	19½	10
5	GM Hellir B	7	3	1	3	15½	7
6	Taflfélag Garðabæjar A	7	3	1	3	15½	7
7	Haukar	7	4	0	3	15	8
8	Fjölnir B	7	3	1	3	15	7
9	GM Hellir C	7	3	1	3	13	7
10	TR D	7	3	0	4	12½	6
11	TR C	7	3	0	4	11½	6
12	Fjölnir C	7	3	0	4	11½	6
13	GM Hellir D	7	3	0	4	11	6
14	TR E	7	2	1	4	9½	5
15	Taflfélag Garðabæjar B	7	1	1	5	6½	3
16	TR F	7	0	0	7	3	0

TR A varð því Íslandsmeistari.

TR B vann keppni B liða.

 

 

 

 

 

 

GM Hellir C vann keppni C liða.

 

 

 

 

 

 

TR D vann keppni D liða

 

 

 

 

 

 

TR E vann keppni E liða 

 

 

 

 

 

 

og TR F sem jafnframt var eina hreina stúlknasveitin skipuð 6 og 7 ára stúlkum var besta F sveitin. 

 

 

 

 

 

Borðaverðlaun fengu eftirfarandi. (ath. vinningar á borðaspjöldum töldu)

 

 

1. borð. Oliver Aron Jóhannesson Fjölni.

2. borð. Gauti Páll Jónsson TR A og Dawid Kolka GM Helli A.

3. borð. Mykhaylo Kravchuk TR B 7 af 7. (reyndar tapaði hann einni skák en það var á 2. borði og varamaður hans sá um að innbyrða vinning á 3. borðinu á meðan)

4. borð. Björn Hólm Birkisson TR A og Ívar Birgisson GM Hellir B

Árangur okkar heimamanna (Taflfélags Garðabæjar) var eins og við var að búast. Við vorum með Sóley Lind Pálsdóttur á fyrsta borði sem er orðin þó nokkuð reynd og hefur teflt á Norðurlandamótum fyrir Íslands hönd. hún fékk 5 vinninga af 7 á fyrsta borði og var raunar með unnið á Oliver Aron en missti stöðuna niður. Hinn ungi Bjarki Arnaldarson skilaði 50% 3,5 af 7 á öðru borði og Kári Georgsson fékk 4 vinninga og vann meðal annarra Jóhann Arnar Finnsson sem er í A sveit Fjölnis. Kára gengur oft betur á móti sterkari mönnum einhverra hluta vegna. á 4. borði var svo nýliðinn 

Matthías Hildir Pálmason en þeir Bjarki eiga það sameiginlegt að eiga sterka skákmenn sem feður. Sem reyndar hvorugur teflir með félaginu. Matti fékk 3 vinninga af 7. sem er vel viðunandi. A liðið endaði í 5-6 sæti og telst því unglingaliðið 4 sterkasta félag landsins.

Félagið sendi enn óreyndari B sveit til leiks og lenti hún í 15 sæti. Fyrirfram var ekki búist við miklum árangri en liðið náði að vinna eina viðureign og gera eitt jafntefli og endaði með 6,5 vinning. og Þar að auki fengu allir í liðinu 1-2 punkta hver. Fyrir liðið tefldu á fyrsta borði Sigurður Gunnar Jónsson, Sólón Siguringason, Haukur Georgsson og Axel Örn Heimisson. 

Stöðu pörun og öll úrslit má finna á chess-results.com - http://chess-results.com/tnr116230.aspx?lan=1&art=0&wi=821

Einnig má finna fjölmargar myndir af mótinu á skak.is - http://skak.blog.is/album/slandsmot_unglingasveita_2013/

Jón Kristinn atskákmeistari Akureyrar

Í dag fór fram spennandi einvígi um titilinn atskákmeistari Akureyrar. Kapparnir Jón Kristinn og Benedikt Smári Ólafsson áttust við. Smári hafði hvítt í fyrstu skákinni og hafði sigur eftir harða baráttu. Í annarri skákinni hafði Jón Kristinn hvítt og jafnaði metin. Þurfti því að tefla hreina úrslitaskák um titilinn. Smári hafði hvítt í þeirri skák og svo fór að lokum að Jóni tókst að leggja Smára eftir mikinn barning. Því er hinn ungi Jokkó orðinn atskákmeistari félagsins. Er honum hér með óskað til hamingju með enn eina skrautfjöðrina.

MH öðlinga: Áskell með jafntefli í sjöundu umferð

Íslendingar töpuðu ekki sínum öllum viðureignum í Króatíu í dag. Áskell Örn Kárason (2220) og Gunnar Finnlaugsson (2082) gerðu báðir jafntefli. Áskell við rússneska alþjóðlega meistaranum Anatoli Svedchikov (2363) en Gunnar við stigalægri andstæðing (1943). Áskell hefur staðið sig afskaplega vel. Hann hefur 5 vinninga og er í 7.-20. sæti. Gunnar hefur 3 vinninga.

Stórmeistararnir Branko Rogulj (2420) og Krunoslav Hulak (2473), Króatíu, og Anatoly Vaisser (2523) eru efstir með 6 vinninga.

Á morgun teflir Áskell við austurríska FIDE-meistarann Adolf Herzog (2379).

Skák Áskels á morgun er sýnd beint og hefst kl. 15.

• Heimasíða mótsins
• Chess-Results
• Beinar útsendingar (hefjast flestar kl. 15)