Róbert útnefndur IO (alþjóðlegur mótshaldari)

Róbert Lagerman hefur verið tilnefndur sem alþjóðlegur mótshaldari (IO-International Organizer) af FIDE. Hann tók próf samhliða EM ungmenna í haust í Budva í Svartfjallalandi.

Róbert er aðeins þriðji Íslendingarinn sem fær IO-gráðuna. Jafnframt fékk IA-áfanga á EM landsliða nú í Varsjá og þarf aðeins eitt mót til viðbótar til að verða útnefndur IA-dómari (er nú FA-dómari).

 

Friðriksmót Landsbankans og Atskákmót Icelandair í desember

Tveir af stærri skákviðburðum hvers skákárs fara fram í desember ár hvert.  Laugardaginn, 14. desember nk., fer fram Friðriksmót Landsbankans - Íslandsmótið í hraðskák. Það fer fram með hefðbundnu sviði sbr. mótstilkynningu frá í fyrra.

Atskákmót Icelandair fer fram 28. og 29. desember í Hótel Natura. Mótið fer fram samskonar fyrirkomulagi og í fyrra. Sjá mótstilkynningu frá í fyrra.

 

Jólaskákmót TR og SFS 2013

 

Nú fer að líða að hinu árlega jólaskákmóti Taflfélags Reykjavíkur og Skóla- og frístundasviðs Reykjavíkurborgar.

 

Þátttakendum hefur verið að fjölga síðast liðin ár og því verður fyrirkomulagi keppninnar breytt og í yngri flokki verður keppt í tveimur riðlum sunnudaginn  1. desember.

Suður riðill hefur keppni kl. 10.30 . Norður riðill hefur keppni kl. 14.00 (sjá skiptingu hér að neðan) Tvær efstu sveitir í hvorum riðli munu keppa til úrslita við sveitirnar úr hinum riðlinum um þrjú efstu sætin mánudaginn 2. desember kl. 17:00.

Keppni í eldri flokki verður mánudaginn 2. desember kl. 17:00.

Upplýsingar:

Yngri flokkur (1. - 7. bekkur)

Keppnisstaður:  Taflfélag Reykjavíkur, Faxafeni 12

Keppt verður í stúlkna og drengja flokkum (opnum flokkum). Heimilt er að senda  A, B, C o.s.frv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Í yngri flokki verður keppt í tveimur riðlum sunnudaginn  1. desember.

Suður riðill hefur keppni kl. 10.30 (sjá skóla hér að neðan)

Norður riðill hefur keppni kl. 14.00 (sjá skóla hér að neðan)

Tefldar verða 6 umferðir (hraðmót) eftir Monrad kerfi.

Umhugsunartími: 10 mín. á skák.  Þátttökurétt hafa börn úr grunnskólum Reykjavíkur í  1.-7. bekk.  Mikilvægt er að liðsstjóri fylgi liðum hvers skóla.  Verðlaunaafhending verður að lokinni keppni.

Tvær efstu sveitir í hvorum riðli munu keppa til úrslita við sveitirnar úr hinum riðlinum um þrjú efstu sætin mánudaginn 2. desember kl. 17:00.

Eldri flokkur (8. - 10. bekkur).

Keppnisstaður:  Taflfélag Reykjavíkur, Faxafeni 12.

Keppt verður í stúlkna og drengja flokkum (opnum flokkum). Heimilt er að senda  A, B, C o.sfrv. stúlknasveitir og A, B, C o.s.frv. drengjasveitir.  Í hverri sveit eru 4 keppendur og 0-2 til vara.

Keppni í eldri flokki verður mánudaginn 2. desember kl. 17:00.

Tefldar verða 6 umferðir (hraðmót) eftir Monrad kerfi.

Umhugsunartími: 15. mín. á skák.  Þátttökurétt hafa unglingar úr grunnskólum Reykjavíkur í 8.-10. bekk. Verðlaunaafhending verður að lokinni keppni.

Þátttaka í báða flokka tilkynnist til skrifstofu Skóla- og frístundasviðs Reykjavíkur eigi síðar en föstudaginn 29. nóvember.  Ekki verður hægt að skrá lið á mótsstað.

Skráning sendist á netfang: [e-mail]

Skipting í riðla yngri flokks

Yngri flokkur - Suður riðill (kl. 10.30):

Árbæjarskóli, Ártúnsskóli,  Breiðagerðisskóli, Breiðholtsskóli, Brúarskóli, Fellaskóli, Fossvogsskóli, Grandaskóli, Hagaskóli, Háaleitisskóli, Hlíðaskóli, Hólabrekkuskóli, Hraunkot, Hvassaleitisskóli, Klettaskóli, Klébergsskóli, Melaskóli, Norðlingaskóli, Réttarholtsskóli, Selásskóli, Seljaskóli,   Suðurhlíðarskóli og Ölduselsskóli.

Yngri flokkur - Norður riðill (kl. 14:00):

Austurbæjarskóli, Dalsskóli, Foldaskóli, Háaleitisskóli, Hamraskóli, Háteigsskóli, Húsaskóli, Ingunnarskóli , Ísaksskóli, Kelduskóli, Landakotsskóli, Langholtsskóli, Laugalækjaskóli, Laugarnesskóli, Rimaskóli, Sæmundarskóli, Vættaskóli, Vesturbæjarskóli og Vogaskóli.

Taflfélag Reykjavíkur og Skóla- og frístundasvið Reykjavíkurborgar vonast til að sem flestir þessara skóla sjái sér fært að senda sveitir til leiks á eitt af skemmtilegustu mótum vetrarins!

Björn Jónsson

Formaður Taflfélags Reykjavíkur

HM einvígið: Jafntefli í áttundu skákinni - Magnús leiðir 5-3

Jafntefli varð í áttundu skák heimsmeistaraeinvígis Magnusar Carlsen (2870) og Vishy Anand (2775). Enn var tefld Berlínarvörn en að þessu sinni hafði Carlsen hvítt. Staðan er nú 5-3 fyrir Magnúsi.

Frídagur er á morgun. Níunda skákin fer fram á miðvikudag og hefst kl. 9:30. Alls tefla þeir 12 skákir.

• Bein útsending á vefsíðu mótsins
• Verdens Gang
• Chessbomb

Áskell stendur sig frábærlega á EM öldunga

Áskell Örn Kárason (2220) hefur staðið sig afar vel á EM öldunga (60+)sem nú er í gangi í Rijeka í Króatíu Eftir sex umferðir er Áskell aðeins hálfum vinningi á eftir efstu mönnum. Áskell hefur hlotið 4½ vinning og er í 8.-18. sæti af 201 keppenda. Gunnar Finnlaugsson er einnig meðal keppenda og hefur hlotið 2½ vinning.

Áskell hefur teflt við þrjá titilhafa á morgun og hefur fengið 2 vinninga í þeim skákum. í dag mætir hann rússneska alþjóðlega meistaranum Anatoli Svedchikov (2363).

Meðal þeirra sem eru efstir með 5 vinninga eru gamlar Reykjavíkurmótshetjur þeir Viktor Kupreichik (2454) og Evgeni Vasiukov (2457).

Skák Áskels í dag er sýnd beint og hefst kl. 15. Fín upphitun fyrir landsleikinn gegn Króötum!

• Heimasíða mótsins
• Chess-Results
• Beinar útsendingar (hefjast flestar kl. 15)

 

Vel heppnað afmælismót Þór Valtýssonar

Skákfélag Akureyrar hélt í gær afmælismót Þórs Valtýssonar sem varð sjötugur fyrr á þessu ári. Sextán keppendur af öllum aldri mættu og heiðruðu kappann. Tefld var hraðskák með 5 mínútna umhugsunartíma, allir við alla. Er það mál manna að vel hafi tekist til. Enginn tefldi betur en Ólafur Kristjánsson og sigraði hann með 14 vinninga af 15 mögulegum. Hann fór taplaus í gegnum mótið en leyfði 2 jafntefli.

Afmælisbarnið stóð sig vel eins og vænta mátti og fékk 11,5 vinninga. Það dugði honum í 3. sætið. Á milli þeirra öðlinga tókst ungstirninu Jóni Kr. Þorgeirssyni að stinga sér með 12,5 vinninga.

Úrslit urðu sem hér segir

Ólafur Kristjánsson 14 vinningar af 15 mögulegum

Jón Kristinn Þorgeirsson 12,5 vinningar

Þór Valtýsson 11.5 vinningar

Ingimar Jónsson 11 vinningar

Sigurður Eiríksson 10,5 vinningar

Smári Ólafsson 10 vinningar

Sveinbjörn Sigurðsson og Andri Freyr Björgvinsson 8,5 vinningar, þar af jafntefli gegn sjálfum sigurvegaranum.

Karl Steingrímsson 7,5 vinningar

Haki Jóhannesson og Tómas Veigar Sigurðarson 6,5 vinningar

Jón Magnússon 4 vinningar

Logi Jónsson og Atli Benediktsson 3 vinningar

Ari Friðfinnsson og Bragi Pálmason 2 vinningar

 

Jón Þorvaldsson sigraði á Grænlandsmótinu í Vin

Jón Þorvaldsson og Magnús Magnússon urðu efstir og jafnir á Grænlandsmótinu, sem Vinaskákfélagið og Hrókurinn efndu til í dag. Þeir hlutu 5 vinninga af 6 mögulegum, en Jón var lítið eitt hærri á stigum og hreppti því efsta sætið. Gunnar Freyr Rúnarsson hreppti bronsið með 4,5 vinning. Keppendur á þessu bráðskemmtilega skákmóti voru alls 16.

Hrafn Jökulsson bauð keppendur og gesti velkomna, en heiðursgestur mótsins var Vigdís Hauksdóttir formaður fjárlaganefndar Alþingis og meðlimur í Vest-norræna þingmannaráðinu. Hrafn sagði frá starfinu í Vin, landnámi Hróksins á Grænlandi og því blómlega starfi sem unnið er meðal barna og ungmenna á vegum Skákakademíunnar, taflfélaganna og Skáksambandsins.

Hann benti viðstöddum á að Vigdís kynni margt fyrir sér í skáklistinni, enda gamall skólameistari og hefði auk þess fyrir fáum misserum lagt Flovin Þór Næs og Jón Viktor Gunnarsson að velli í fjöltefli.

Vigdís þakkaði það tækifæri að fá að heimsækja Vin, og lýsti  mikilli hrifningu á því starfi sem unnið er meðal barna og ungmenna í íslensku skáklífi. Skákkunnátta hefði mjög jákvæð áhrif á námsárangur, og væri auk þess gagnleg í daglegu lífi, ekki síst stjórnmálamanna, sem stundum þyrftu að hugsa marga  leiki fram í tímann!

Þá sagði Vigdís að hún hefði nýlega komið til Grænlands í fyrsta skipti og heillast algjörlega af þessu stórbrotna landi. Áður en Vigdís lék fyrsta leikinn fyrir Bjarna Hjartarson tók hún við skákkverinu góða á grænlensku sem Siguringi Sigurjónsson stendur að, póstkortum af starfi Hróksins frá Grænlandi og ægifögrum grænlenskum steini.

Efstu menn fengu allir bækur um norðurslóðir frá Bókinni, Klapparstíg, húfur frá Flugfélagi Íslands síðast en ekki og eðalsteina frá Grænlandi, en þar er elsta berg í heimi, um fjögurra milljarða ára. Hörður Jónasson, hinn knái liðsmaður Vinaskákfélagsins, annaðist verðlaunaafhendingu og skákstjóri var Stefán Bergsson.

Í mótslok var Siguringi Sigurjónsson heiðraður, en grænlenska skákkverinu hans hefur þegar verið dreift í þúsund eintökum á Grænlandi!

Myndaalbúm frá Grænlandsmótinu í Vin 

Úrslit Grænlandsmótsins í Vin 

 

HM-einvígið: Jafntefli í sjöundu skák - Magnús leiðir 4½-2½

Vishy Anand (2775) og Magnus Carlsen (2870) gerðu jafntefli í sjöundu skák heimsmeistaraeinvígis þeirra. Anand hafði hvítt en komst lítt áleiðis gegn Berlínar-vörn Magnúsar. Jafntefli var samið eftir 32 leiki. 

Staðan er nú 4½-2½ fyrir Magnúsi. Áttunda skákin fer fram á norgun og hefst kl. 9:30. Alls tefla þeir 12 skákir.

• Bein útsending á vefsíðu mótsins
• Verdens Gang
• Chessbomb

Hraðkvöld hjá GM Helli í kvöld

Skákfélagið GM Hellir heldur hraðkvöld mánudaginn 18. nóvember nk. og hefst taflið kl. 20:00. Tefldar verða 7 umferðir með sjö mínútna umhugsunartíma. Teflt er í félagsheimili GM Hellis í Álfabakka 14a í Mjóddinni.

Sigurvegarinn á hraðkvöldinu fær í verðlaun máltíð fyrir einn á Saffran. Einnig verður dreginn út af handahófi annar keppandi sem einnig fær máltíð fyrir einn á Saffran. Þar eiga allir jafna möguleika, án tillits til árangurs á mótinu.

Þátttökugjöld eru kr. 300 fyrir félagsmenn (kr. 200 fyrir 15 ára og yngri) og kr. 500 fyrir aðra (kr. 300 fyrir 15 ára og yngri).

Grænlandsmótið í Vin, mánudag klukkan 13

Vinaskákfélagið og Hrókurinn bjóða öllum skákunnendum, háum sem lágum, til skákmóts í Vin, Hverfsgötu 47 á mánudaginn klukkan 13. Mótið er tileinkað skáklandnáminu á Grænlandi, og verðlaun eru  bækur um Grænland frá stórvinum skákarinnar í Bókinni við Klapparstíg.

 

Verðlaunabikarinn er heldur ekki af verri endanum: Dásemdarinnar steinn frá elsta landi í heimi.

Tefldar verða sex umferðir með sjö mínútna umhugsunartíma. Í verðlaun eru djásn frá Grænlandi og auk þess bækur frá undralandinu í vestri, sem vinir okkar í Bókinni leggja til. Þá mun Flugfélag Íslands, sem sinnir samfélagslegri ábyrgð á Grænlandi af mikilli alúð, leysa vinningshafa út gjöfum.

 Heiðursgestur mótsins er Grænlandsvinurinn Vigdís Hauksdóttir alþingismaður, formaður fjárlaganefndar og meðlimur í Íslandsdeild Vestnorræna ráðsins.

Hróksliðar eru nýkomnir frá Nuuk, höfuðborg Grænlands, þar sem Flugfélagshátíðin 2013 var haldin með glæsibrag. Hátíðin markaði upphafið að 11. starfsári Hróksins á Grænlandi, en alls eru ferðirnar orðnar um 30. Innan tíðar munu liðsmenn Hróksins svo halda til Upernavik, 1200 bæjar á 72. breiddargráðu á vesturströnd Grænlands.