Jólapakkamót Hugins fer fram á sunnudaginn

Jólapakkaskákmót Hugins verður haldið sunnudaginn 17. desember nk. í Álfhólsskóla (Hjallaskóli Álfhólsvegi 120). Mótið hefst kl. 13 og er ókeypis á mótið. Mótið er fyrir börn og unglinga og fer nú fram í 20. skipti en það var fyrst haldið fyrir jólin 1996. Síðan hefur það verið haldið nánast á hverju ári og hefur alltaf verið eitt fjölmennasta skákmót ársins.

Keppt verður í allt að 6 flokkum:

• Flokki fæddra 2002-2004
• Flokki fæddra 2005-2006
• Flokki fæddra 2007-2008
• Flokki fæddra 2009-2010
• Flokki fæddra 2011 síðar
• Peðaskák fyrir þau yngstu

Tefldar verða 5 umferðir með 10 mínútna umhugsunartíma á mann. Jólapakkar eru í verðlaun fyrir 3 efstu sætin í hverjum aldursflokki fyrir sig fyrir bæði drengi og stúlkur. Auk þess verður happdrætti um 3 jólapakka í hverjum aldursflokki fyrir sig.

Skráning fer fram á Skák.is (guli kassinn efst).

Jólagjafir til barnanna í Kulusuk

Í dag fór leiðangur Hróksins og Kalak, vinafélags Íslands og Grænlands, í sína árlegu jólagjafaferð til Kulusuk á Grænlandi.  Fyrstur út úr flugvélinni stökk hinn rammíslenski og glaðbeitti Stekkjastaur með jólapakka og góðgæti í farteskinu. Með honum í för var Hrafn Jökulsson forseti Hróksins, upphafsmaður skáklandnámsins á Grænlandi 2003. 

Öll grunnskólabörnin í Kulusuk komu á flugvöllinn, ásamt kennurum og fjölmörgum foreldrum á flugvöllinn til þess að fagna íslensku gestunum. Justine Boassen skólastjóri var heiðruð sérstaklega og allir kennarar grunnskólans fengu ilmandi blóm að gjöf. 

Vinir okkar hjá Air Iceland Connect fluttu jólasveininn, Stefán Herbertsson og Hrafn Jökulsson til Kulusuk ásamt gnótt af gjöfum. 

Margir hjálpuðust að við undirbúning þessarar gleðifarar til bestu nágranna í heimi, Grænlendinga. Í pökkunum var jólaglaðningur frá prjónahópnum góða í Gerðubergi, og fjölmörgum einstaklingum öðrum, sem og ýmislegt fallegt frá BÓNUS, Góu, Sólarfilmu, IKEA og BROS. Það var Henný Nielsen jólagjafastjóri Hróksins sem stýrði innpökkun í Pakkhúsi Hróksins, Grænn markaður sendi afskorin blóm til þess að gleðja þá sem eldri eru og Mjólkursamsalan sendi jólaostaöskjur. 

Gjafirnar voru afhentar til þess að þakka fyrir þann vinahug sem á milli landanna tveggja ríkir. Hrafn Jökulsson sagði í stuttu ávarpi í Kulusuk í dag, að Íslendingar ættu bestu nágranna í heimi, og að grannþjóðirnar í norðrinu ættu að stórauka samskipti og samvinnu á sem flestum sviðum.

Nánar á heimasíðu Hróksins.

Caruana sigurvegari í London - Carlsen vann heildarpottinn

London Chess Classic-mótinu lauk fyrir skemmstu. Caruana og Neopmniatchtchi komu jafnir í mark með 6 vinninga. Teflt var til þrautar með styttri umhugsunartíma og þar hafði Caruana betur 2½-1½. Heimsmeistarinn Magnus Carlsen, sem vann Aronian í lokaumferðinn, Maxime Vachier-Lagrave og Wesley So urðu jafnir í 3.-5. sæti. 

Sigur Carlsens á Armeanum tryggði honum sigurinn á Grand Chess Tour en hann hlaut 41 stig. MVL varð annar með 38 stig. 

Nánar á Chess.com.

Sverrir Gestsson hraðskákmeistari Austurlands

Hraðskákmeistaramót Austurlands var teflt á Reyðarfirði 11. desember sl. Sverrir Gestsson varð hraðskákmeistari Austurlands 2017 með 12,5 vinninga af 14 mögulegum. Síðan urðu 3 jafnir í 2.-4. sæti og varð að skera úr um röð með útreikningi stiga. Í öðru sæti varð Viðar Jónsson með 8,5 vinninga og Albert Ómar Geirsson í þriðja sæti einnig með 8,5 vinninga, en Rúnar Bernburg í 4. sæti með sömu vinningatölu.

Jólahraðskákmót TR fer fram 28. desember

ólahraðskákmót Taflfélags Reykjavíkur verður haldið fimmtudaginn 28. desember og hefst taflið klukkan 19:30. Tefldar verða 9 umferðir og verður umhugsunartíminn 4 mínútur á skák auk þess sem 2 sekúndur bætast við eftir hvern leik (4+2). Teflt verður í húsnæði TR að Faxafeni 12. Mótið verður reiknað til alþjóðlegra hraðskákstiga.

Þátttökugjald er 1.000kr (greiðist með reiðufé á staðnum). Frítt er fyrir félagsmenn TR sem eru 17 ára eða yngri. Verðlaun verða veitt fyrir þrjú efstu sætin.

Skráningarform

Skráðir keppendur

Jólahraðskákmeistarar síðustu ára:

2016: Páll Agnar Þórarinsson 2015: Vignir Vatnar Stefánsson 2014: Oliver Aron Jóhannesson 2013: Jóhann Ingvason 2012: Oliver Aron Jóhannesson 2011: Daði Ómarsson 2010: Jóhann Ingvason 2009: Sigurður Daði Sigfússon 2008:Gunnar Freyr Rúnarsson 2007: Davíð Kjartansson 2006: Stefán Kristjánsson 2005: Hrannar Baldursson 2004: Björn Þorfinnsson 2003: Arnar E. Gunnarsson 2002: Jón Viktor Gunnarsson 2001: Helgi Áss Grétarsson.

Friðriksmót Landsbankans - Íslandsmótið í hraðskák fer fram á laugardag

Friðriksmót Landsbankans - Íslandsmótið í hraðskák - fer fram í útibúi Landsbankans við Austurstræti 11 laugardaginn 16. desember nk. Mótið hefst kl. 13 og stendur til kl. 16:30-17:00. 

Gera má ráð fyrir að flestir sterkustu skákmenn landsins taki þátt og efsti keppandi mótsins fær titilinn Íslandsmeistari í hraðskák. Tímamörkin eru 3+2 og tefldar eru þrettán umferðir.  Meðal skráðra keppenda eru stórmeistararnir Hjörvar Steinn Grétarsson, sem er 27. sæti á alþjóðlega hraðskákstiglistanum, Jóhann Hjartarson, sem hefur titil að verja, og Þröstur Þórhallsson, hraðskákmeistari Íslands árið 2015. 

Skráning fer fram á Skák.is (guli kassinn efst). Þegar eru skráðir 100 keppendur og er því mótið fullt eins og er. Hægt er hins vegar að skrá sig á biðlista. 

Keppendalistinn

Þetta er fjórtánda árið í röð sem Landsbankinn og Skáksamband Íslands standa fyrir Friðriksmótinu í skák, en mótið er haldið til heiðurs Friðriki Ólafssyni, fyrsta stórmeistara Íslendinga. Margir af sterkustu stórmeisturum landsins hafa undanfarin ár teflt til heiðurs Friðriki. 

Verðlaun fyrir efstu sæti eru eftirfarandi: 

1. 100.000 kr.
2.  60.000 kr.
3.  50.000 kr.
4.  30.000 kr.
5.  20.000 kr. 

Séu tveir eða fleiri jafnir í efsta sætinu verður stigaútreikningur látinn ráða Íslandsmeistaratitlinum. Verðlaunafé skiptist eftir Hort-kerfinu. 

Aukaverðlaun 

• Efsti maður með 2001-2200 skákstig 10.000 kr.
• Efsti maður með 2000 stig og minna: 10.000 kr.
• Efsta konan: 10.000 kr.
• Efsti strákur 16 ára og yngri (2001 eða síðar): 10.000 kr.
• Efsta stúlka 16 ára og yngri (2001 eða síðar): 10.000 kr.
• Efsti eldri skákmaður (1957 eða fyrr): 10.000 kr.
• Útdreginn heppinn keppandi: 10.000 kr.

Aukaverðlaun eru miðað við alþjóðleg hraðskákstig 1. desember sl.(alþjóðleg og íslensk skákstig til vara hafi menn ekki alþjóðleg hraðskákstig). Stigaútreikningur ræður séu menn jafnir og efstir. 

Hver keppandi getur aðeins unnin ein aukaverðlaun og eru aukaverðlaunin valin í þeirri röð sem fram kemur að ofan.

Mótið er reiknað til alþjóðlegra hraðskákstiga.

Fyrri sigurvegarar 

• 2016 - Jóhann Hjartarson
• 2015 - Þröstur Þórhallsson
• 2014 - Héðinn Steingrímsson
• 2013 - Helgi Ólafsson
• 2012 - Bragi Þorfinnsson, Hjörvar Steinn Grétarsson og Jón Viktor Gunnarsson
• 2011 - Henrik Danielsen
• 2010 - Jón Viktor Gunnarsson og Þröstur Þórhallsson
• 2009 - Héðinn Steingrímsson
• 2008 - Helgi Ólafsson
• 2007 - Héðinn Steingrímsson
• 2006 - Helgi Áss Grétarsson
• 2005 - Jón Viktor Gunnarsson og Arnar E. Gunnarsson
• 2004 - Jóhann Hjartarson og Stefán Kristjánsson

Jólamót Víkingaklúbbsins fer fram á morgun

Jólamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 13. desember. Tefldar verða 5 umferðir með 7 mínútna umhugsunartíma á mann. Mótið hefst mótið kl. 17.15. Allir krakkar/unglingar á grunnskólaaldri eru velkomnir og þátttaka er ókeypis. Veitt verða verðlaun fyrir 3. efstu sætin, auk þess sem þrjár efstu stúlkur fá verðlaun. Einnig eru verðlaun fyrir þrjá efstu félagsmenn í stúlku og drengjaflokki, auk þess sem efsti einstaklingur í hverjum árgangi fær medalíu. 

Barna og unglingaæfingar voru vikulega í vetur, en næsta æfing eftir jólafríð verður miðvikudaginn 11. janúar og verða æfingar vikulega fram á vor. 

Skráning á mótið fer m.a fram á netfangið: vikingaklubburinn(hjá)gmail.com og á skak.is (guli kassinn). Upplýsingar um þegar skráða keppendur má finna hér. 

Nánari upplýsingar veitir Gunnar (gsm:  8629744).

• Úrslit mótsins 2016 hér:
• Úrslit mótsins 2015 hér:
• Úrslit 2014 hér: 
• Úrslit 2013 hér: 
• Úrslit 2012 hér:

Háteigsskóli, Rimaskóli og Ölduselsskóli sigurvegarar á Jólaskákmóti grunnskóla Reykjavíkur

Jólaskákmót grunnskóla Reykjavíkurborgar var haldið sunnudaginn 3.desember í húsnæði Taflfélags Reykjavíkur. Sem fyrr var mótið samstarfsverkefni Skóla- og frístundasviðs Reykjavíkurborgar og Taflfélags Reykjavíkur. Alls tefldu 39 skáksveitir í mótinu sem var þrískipt að þessu sinni; 1-3.bekkur, 4-7.bekkur og 8-10.bekkur. Í öllum keppnisflokkum voru tefldar 6 umferðir með umhugsunartímanum 5 mínútur fyrir hvern keppanda auk þess sem 3 sekúndur bættust við eftir hvern leik (5+3).

1.-3.bekkur

Klukkan hafði varla slegið níu að morgni þegar í skáksalinn streymdu ung börn og forráðamenn þeirra. Börnin sem öll voru í 1.-3.bekk mynduðu 10 skáksveitir frá sex grunnskólum höfuðborgarinnar, þar af voru tvær stúlknasveitir. Fljótlega varð ljóst að tvær skáksveitir skáru sig úr hópnum hvað styrkleika varðar, sveitir Háteigsskóla og Langholtsskóla. Næstu sex skáksveitir voru nokkuð jafnar að styrkleika og reyttu vinninga hver af annarri.

Að loknum umferðunum sex stóð sveit Háteigsskóla uppi sem sigurvegari með 20 vinninga af 24 mögulegum. Langholtsskóli varð í 2.sæti með 19 vinninga, aðeins einum vinningi á eftir sigurvegurunum. Rimaskóli tryggði sér bronsverðlaun með 13,5 vinning. Stúlknasveit Rimaskóla fékk einnig 13,5 vinning og varð því fremst stúlknasveita. Rimaskóli og Langholtsskóli fá sérstakt hrós fyrir að senda stúlknasveitir til leiks og eru aðrir skólar hvattir til þess að fylgja fordæmi þeirra að ári.

4.-7.bekkur

Í humátt á eftir yngsta hópnum komu börnin í 4.-7.bekk. Alls mættu 22 skáksveitir til leiks, þar af voru þrjár stúlknasveitir. Í þessum keppnisflokki hafði Rimaskóli töluverða yfirburði. A-sveit skólans vann mótið næsta örugglega með 20 vinninga af 24 mögulegum. Stúlknasveit Rimaskóla lenti í 2.sæti með 16 vinninga, en sveitin sú er ein sterkasta stúlknasveit sem keppt hefur í mótinu um langt skeið. Einkar eftirtektarverð framganga hjá Grafarvogsstúlkum.

B-sveit Rimaskóla hreppti bronsverðlaun með 15,5 vinning eftir 2-2 jafntefli gegn A-sveit sama skóla í lokaumferðinni þar sem jafntefli var samið á öllum borðum eftir örstutta taflmennsku. Það nægði B-sveitinni til hálfs vinnings forskots á Háteigsskóla sem varð að gera sér 4.sætið að góðu með 15 vinninga.

8.-10.bekkur

Skákmeistarar á efsta stigi grunnskóla luku þessum mikla skák-sunnudegi með glæsibrag. Sex skáksveitir frá fimm grunnskólum öttu kappi og tefldu þær allar innbyrðis. Ölduselsskóli sýndi mátt sinn í þessum elsta aldursflokki með öflugri taflmennsku auk þess sem skólinn átti tvær skáksveitir af sex. A-sveit skólans vann mótið örugglega með 19 vinninga af 20 mögulegum, aðeins Laugalækjarskóli náði að vinna skák gegn þeim. Laugalækjarskóli varð í 2.sæti með 13,5 vinning og í 3.sæti varð B-sveit Ölduselsskóla með 9 vinninga.

Það vakti athygli að Ölduselsskóli skyldi tefla fram tveimur liðum í elsta flokki því brottfall elstu nemenda grunnskóla er mikið líkt og sést glögglega þegar fjöldi skáksveita keppnisflokkanna þriggja er skoðaður. Með þessum tveimur sterku skáksveitum hefur Ölduselsskóli tekið sér stöðu sem virkasti skák-skólinn í Reykjavík á efsta stigi grunnskóla.

Lokaorð

Jólamót grunnskóla Reykjavíkurborgar heppnaðist afar vel þetta árið og mæltist breytt fyrirkomulag mótsins vel fyrir. Liðsstjórar liðanna stóðu vaktina með miklum sóma og var afar ánægjulegt hve vel þeim gekk að sinna sínu hlutverki, bæði gagnvart sínum liðum og gagnvart mótsstjórn. Úrslit voru nær undantekningarlaust tilkynnt mjög fljótt að loknum viðureignum og börnin fundu sætin sín hratt og örugglega eftir að pörun umferða var birt. Þetta gerði það að verkum að framkvæmd mótsins hélt tímaáætlun að mestu leyti, þrátt fyrir mikinn fjölda barna og fullorðinna í skáksalnum.

Háteigsskóli, Rimaskóli og Ölduselsskóli voru öðrum skólum fremri að þessu sinni og unnu hver sinn flokk. Einnig er vert að minnast á að tveir skólar mættu til leiks í liðsbúningum -Landakotsskóli og Ölduselsskóli- og setti það skemmtilegan svip á mótið. Eru skólar hvattir til þess að leika það eftir á næsta skólamóti.

Skóla- og frístundasvið Reykjavíkurborgar eru færðar bestu þakkir fyrir ánægjulegt samstarf. Grunnskólar borgarinnar fá jafnframt þakkir fyrir þátttökuna. Við hjá Taflfélagi Reykjavíkur viljum þakka börnunum sérstaklega fyrir einstaklega notalegt andrúmsloft sem þau sköpuðu með nærveru sinni. Þessi skemmtilega blanda af gleði og keppnisskapi á sér enga líka og á stærstan þátt í að gera Jólaskákmót SFS og TR að einu skemmtilegasta skákmóti ársins. Sjáumst að ári! 

Upplýsingar um einstök úrslit og lokastöðu má nálgast á Chess-Results.

Nánar á heimasíðu TR

Skákþáttur Morgunblaðsins: Fyrsti sigur Vignis á stórmeistara

Guðmundur Kjartansson stóð sig best þeirra ellefu íslensku skákmanna sem tóku þátt í opna mótinu í Rúnavík í Færeyjum sem lauk um síðustu helgi. Mótið var hluti af skákhátíð sem hófst með landskeppni Færeyinga og Íslendinga. Guðmundur, sem vann mótið í fyrra, átti góða möguleika á því að endurtaka afrek sitt eftir sigra á stórmeisturunum Vadim Malakhatko og Vladimir Hamitevici í fimmtu og sjöttu umferð en slæmur kafli kostaði sitt, töp í sjöundu og áttundu umferð og að lokum hlaut hann sex vinninga og varð í 7.-10. sæti af 59 keppendum. Sigurvegari varð Hvítrússinn Nikita Maiorov með 7½ vinning en á eftir komu fimm skákmenn með 6½ vinning.

Af öðrum þátttakendum okkar stóð hinn 14 ára gamli Vignir Vatnar Stefánsson sig vel, hlaut 5½ vinning og varð í 11.-19. sæti. Á hæla hans kom Einar Hjalti Jensson með 5 vinninga í 20.-25. sæti. Jón Kristinn Þorgeirsson, Gauti Páll Jónsson, Símon Þórhallsson, Áskell Örn Kárason og Haraldur Haraldsson hlutu allir 4½ vinning og enduðu í 26.-34. sæti.

Vignir Vatnar Stefánsson mætti rússneska stórmeistaranum Mikhai Ulibyn í áttundu umferð og er óhætt að segja að fáar viðureignir vöktu meiri athygli í Rúnavík. Vignir tefldi sannfærandi og vann í aðeins 32 leikjum og var þetta fyrsti sigur hans yfir stórmeistara í kappskák. Hannes Hlífar Stefánsson var einnig 14 ára gamall er hann vann Jón L. Árnason á Íslandsmótinu í Grundarfirði haustið 1986 og var nokkrum mánuðum yngri en Vignir. Í svipinn man greinarhöfundur ekki eftir því að yngri skákmenn hafi náð þessum áfanga:

Rúnavík 2017; 8. umferð:

Vignir Vatnar Stefánsson – Mikhail Ulibyn

Hollensk vörn

1. d4 e6 2. c4 f5 3. g3 Rf6 4. Bg2 d5 5. Rh3

Það er engin skylda að fara með þennan riddara til f3! Staðsetning hans á h3 býður upp á ýmsa möguleika.

5.... c6 6. Rd2 Bd6 7. 0-0 0-0 8. Rf3 Re4 9. Rf4 De7 10. c5!?

Vignir hafði fengið svipaða stöðu á HM ungmenna í Porto Carras í Grikklandi fyrir tveim árum og þessi framrás c-peðsins reyndist honum erfið. Hann hyggst nýta sér fengna reynslu.

10.... Bc7 11. Rd3 b6 12. b4 Ba6 13. Rfe5?!

Gengur beint til verks en meiri aðgæslu var þörf. 13. a4 var nákvæmara.

13.... Hc8?

Missir af tækifæri til hagfelldra uppskipta, 13.... bxc5 14. Bxc5 Bxe5! Og nú er 15. Rxe5 svarað með 15. ... Rc3 og e2-peðið fellur. Eftir 15. Dxe5 Rd7 stendur c5-peðið tæpt og svarta staðan er síst lakari.

14. Dc2 Rd7 15. Bf4 Rxe5 16. Rxe5 Bxe5 17. Bxe5 Bc4 18. Hfe1!

Undirbýr framrás e4-peðsins sem gæti hafist með f2-f3 o.s.frv.

18. ... Rg5 19. Bf4 Rf7 20. e4!

Staðsetning biskupsins á c4 gerir þessa framrás mögulega. Svarta staðan er afar erfið þar sem opnun e-línunnar blasir við.

20.... Df6 21. exf5 exf5 22. Be5 Rxe5 23. Hxe5 f4 24. Hae1 Hf8 25. He6 Dg5?

Skárra var 25.... Df7, þar sem drottningin hrekst nú á enn verri reit.

26. H1e5! Dd8

Vitaskuld ekki 26.... Dgh4 27. f3 og drottningin fellur.

27. Hh5!

Beinir skeytum sínum að kóngsvængnum. Svartur er varnarlaus.

27.... Hf6

27.... h6 er svarað með 28. Hexh6! og 27.... g6 strandar á 28. Hxg6+! o. s.frv.

28. Dxh7+ Kf8 29. Hxf6+ gxf6 30. Dh8+ Kf7 31. Hh7+ Kg6 32. Dg7+

– og svartur gafst upp.

Helgi Ólafsson (helol@simne

 

Helgi Ólafsson [e-mail]

Skákþættir Morgunblaðsins eftir Helga Ólafsson birtast u.þ.b. viku síðar á Skák.is.

Grein þessi birtist í Morgunblaðinu 2. desember 2017.

Skákþættir Morgunblaðsins

Íslandsmót unglingasveita fer fram á morgun

Íslandsmót Unglingasveita 2017 verður haldið þann 10. desember næstkomandi í Garðalundi í Garðabæ. (Garðaskóli)

Mótið hefst kl. 13 og stendur líklega fram til 17. Umhugsunartími eru 10 mínútur + 5 sek á mann.

Mótið er liðakeppni taflfélaga og eru 4 í hverju liði auk varamanna.

Reglugerð mótsins má finna á vefnum skaksamband.is http://www.skaksamband.is/?c=webpage&id=249

Þátttökurétt hafa öll taflfélög sem og/eða íþrótta/héraðssambönd svo framarlega að ekki er taflfélag á sama svæði.

Skráning fer fram í tölvupósti til félagsins [e-mail]

Benda ber sérstaklega á

• að sameinuð lið geta ekki orðið Íslandsmeistarar
• hverju liði skal fylgja liðsstjóri sem sér um liðið og að fylla út öll úrslit í mótinu. Hver liðsstjóri skal ekki stýra meira en 2 liðum
• Þátttökugjöld eru 4000 kr. á hvert lið. (2000 fyrir aukalið.)
• Mótið verður reiknað til alþjóðlegra atskákstiga. Fæðingardagar þeirra keppenda sem eru ekki á skákstigalista þurfa fylgja með skráningu.

Íslandsmeistarar 2016 voru Taflfélag Reykjavíkur.