Jóhann, Héðinn og Hjörvar unnu í fyrstu umferð - Hannes slapp með jafntefli gegn Sigurði Daða

Íslandsmótið í skák hófst í dag í Háuloftum í Hörpu. Óvænt úrslit þegar Hannes Hlífar Stefánsson, tólffaldur Íslandsmeistari og stigahæsti keppandi mótsins, mátti þakka fyrir jafntefli gegn Sigurði Daða Sigfússyni. Stórmeistararnir, Jóhann Hjartarson, Hjörvar Steinn Grétarsson og Héðinn Steingrímsson, sem eru næstir í stigaröð keppenda unnu allir sínar skákir. 

Úrslit dagsins:

Björgólfur Jóhannsson, forstjóri Icelandair Group, setti mótið og lék fyrsta leikinn fyrir Jóhann Hjartarson gegn Lenku Ptácníková. Icelandair er einn af aðalbakhjörlum skákhreyfingarinnar. 

Vel fer um áhorfendur í Háuloftum. Þar er skákunum varpað upp á tvo skjái og heitt á könnunni.

Í umferð morgundagsins, sem hefst kl. 17, mætast meðal annars Hjörvar og Jóhann. Þeir hafa aldrei áður mæst í kappskák! Það er ekki eina stórmeistarauppgjör dagsins því Hannes Hlífar og Jón L. mætast. 

Bent er á að hægt er að spá fyrir um röð efstu manna mótsins hér á Skák.is (guli kassinn efst). Lokað verður getraunin rétt fyrir umferð morgundagsins kl. 17.

• Heimasíða mótsins
• Chess-Results
• Beinar útsendingar (tölvuskýringar)

Sterkasta Íslandsmót skáksögunnar hefst í dag í Hörpu kl. 14 - Fjölmennum!

Sterkasta Íslandsmót skáksögunnar hefst í dag í Háuloftum í Hörpu. Sex stórmeistarar taka þar þátt, þeirra á meðal Jóhann Hjartarson og Jón L. Árnason sem hafa ekki verið meðal keppenda síðan á síðustu öld! Keppt er um vegleg verðlaun og nafnbótina Skákmeistari Íslands. 

Setning mótsins hefst kl. 13:45. Björgólfur Jóhannsson, forstjóri Icelandair Group  , ætlar að taka sér smá hlé frá samningastússi en hann er einnig formaður Samtaka atvinnulífsins, setja mótið og leika fyrsta þess. Icelandair hefur lengi stutt vel við skákina og verður einn af aðalbakhjörlum Evrópumóts landsliða í nóvember. 

Sex keppendur hafa hampað Íslandsmeistaratitlinum. Alþjóðlegi meistarinn Guðmundur Kjartansson hefur titil að verja og Hannes Hlífar Stefánsson hefur tækifærið til að slá eigið met – vinni hann þrettánda Íslandsmeistaratitilinn! 

Meðal annarra keppenda má nefna Héðin Steingrímsson sem er yngsti Íslandsmeistari sögunnar en hann vann mótið 1990 á Höfn í Hornafirði, þá aðeins 15 ára. Met sem verður seint slegið. Hjörvar Steinn Grétarsson er eini stórmeistarinn sem tekur þátt sem ekki hefur hlotið nafnbótina eftirsóttu. Henrik Danielsen varð Íslandsmeistari í Bolungarvík árið 2009. 

Keppendalistinn lítur út sem hér segir: 

1. GM Hannes Hlífar Stefánsson (2590)
2. GM Jóhann Hjartarson (2566)
3. GM Hjörvar Steinn Grétarsson (2561)
4. GM Héðinn Steingrímsson (2532)
5. GM Henrik Danielsen (2520)
6. GM Jón L. Árnason (2499)
7. IM Guðmundur Kjartansson (2474)
8. IM Bragi Þorfinnsson (2416)
9. IM Björn Þorfinnsson (2407)
10. FM Einar Hjalti Jensson (2359)
11. FM Sigurður Daði Sigfússon (2319)
12. WGM Lenka Ptácníková (2284) 

Í fyrstu umferð mætast:

• Henrik - Guðmundur
• Sigurður Daði - Hannes
• Jón L. - Björn
• Héðinn - Bragi
• Einar Hjalti - Hjörvar
• Jóhann - Lenka

Teflt verður daglega 14.-24. maí. Skákum verður varpað upp á skjái, heitt kaffi á könnunni og áhorfendur velkomnir. Frábær aðstaða fyrir áhorfendur. 

Bent er á að hægt er að spá fyrir um röð efstu manna mótsins hér á Skák.is (guli kassinn efst). Lokað verður fyrir spánna við upphaf annarrar umferðar, kl. 17 á morgun.

Heimasíða mótsins

Breiðholtsmótið í skák 2015 - Birnubikarinn - Ölduselsskóli vann

Breiðholtsmótið í skák 2015 - Birnubikarinn fór fram á sal Hólabrekkuskóla sl. miðvikudag. Sex skáksveitir frá fjórum grunnskólum voru mættar til leiks. Skák er kennd í öllum þessum skólum, á stundatöflu, sem valfag í unglingadeild eða í skákklúbbi eftir skólatíma. Það er því mikil skákvirkni í grunnskólum Breiðholts um þessar mundir og ekki skemmir fyrir að hafa höfuðstöðvar Íslandsmeistaranna í Mjódd en skákfélagið Huginn heldur þar úti öflugri skákstarfsemi, m.a. eru barna- og unglingaæfingar alla mánudaga.

Birnubikarinn er haldinn til heiðurs Birnu Halldórsdóttur fyrrum skólaliða við Hólabrekkuskóla. Þegar Birna starfaði í Hólabrekkuskóla stýrði hún skákstarfinu af miklum myndarbrag. Hún hvatti nemendur til að mæta í skáktíma, útvegaði skólanum skákkennara og sá um kennslu byrjenda. Minnisstætt er þegar Birna stóð fyrir kökubasar og nýtti allan ágóðann til að fjárfesta í skákklukkum fyrir skólann en Hólabrekkuskóli er afar vel búinn af skákbúnaði.

Baráttan um Birnubikarinn stóð milli heimamanna í Hólabrekku og sterkrar skáksveitar Ölduselsskóla. Að lokum hafði sveit Ölduselsskóla sigur sem kemur ekki á óvart enda ein sterkasta skólasveitin í skák á landsvísu. Fellaskóli hafði þriðja sætið en sveit skólans samanstendur af krökkum úr áttunda bekk sem mæta í skákval einu sinni í viku. Auk þessara sveita mætti sveit frá Breiðholtsskóla og ungir nemendur Hólabrekkuskóla skipuðu svo b og c sveit skólans.

Heildarúrslit:

1. Ölduselsskóli 18.5v af 20 mögulegum
2. Hólabrekkuskóli a-sveit 16.v
3. Fellaskóli 10.5v
4. Breiðholtsskóli 9.v
5. Hólabrekkuskóli b-sveit 3.5v
6. Hólabrekkuskóli c-sveit 2.5v

Veitt voru verðlaun fyrir bestan árangur á hverju borði. Þau hlutu Heimir Páll Ragnarsson Hólabrekkuskóla, Mykael Kravchuk Ölduselsskóla, Alex Sigurðarson Ölduselsskóla og Stefán Orri Davíðsson Ölduselsskóla.

          

Skákakademían og Hólabrekkuskóli sáu um framkvæmd mótsins og nutu einnig góðrar aðstoðar foreldra og annarra velunnara skákstarfs í grunnskólum Breiðholts. Stefnt er að áframhaldandi samstarfi og keppnum milli grunnskólanna í hverfinu enda þótti mótið heppnast afar vel.

Guðfinnur og Jóhann Örn efstir Ása

Í gær var 27. skákdagur Ása í Ásgarði á þessum  vetri. Þá eru mót ekki talin með þar sem verðlaun eru í boði. 

Næsta þriðjudag verður síðasti hefðbundni skákdagurinn. Þann 26. maí er svo síðasti dagurinn á þessari skákvertíð þá verður haldið vorhraðskákmót. Fyrsta september byrjar síðan næsta vetrardagskrá.

Riddarar í Hafnarfirði hafa engin sumarfrí en þangað fara þeir sem það geta á miðvikudögum í sumar vona ég.

Næsta laugardag fer hópur skákvíkinga norður í Vatnsdal til móts við Akureyringa 60+. Þar verður barist í tvo daga og vonandi margir menn drepnir. Ég held að þetta sé sjöunda skiptið, sem þessir hópar hittast í veiðihúsinu í Vatnsdal. Garðar Guðmundsson formaður Ása verður fararstjóri. Í gær mættu 10 af þeim sem ætla í þá ferð svo ég vona að menn séu vel undir bardaga búnir.

Guðfinnur R Kjartansson sá hógværi en eitilharði skákmaður varð hrókur dagsins með 9 vinninga en jafn honum að vinningum varð Jóhann Örn en aðeins lægri á stigum

Eins og sést á keppenda listanum voru mættir mjög margir sterkir skákmenn í gær. Björgvin Víglundsson varð í þriðja sæti með 7 ½ vinning og Bragi Halldórsson í fjórða með 7 vinninga. Síðan komu fimm sterkir skákmenn með 6 vinninga.

Eins og ég hef sagt áður þá þurfa menn að að vera í góðu formi til þess að ná 50 % í þessum klúbbi.

Við erum ekki þarna til þess að ná okkur í skákstig, það er skemmtunin og góður félagsskapur sem er aðalatriðið. Ég vona að allir séu mér sammála með það. Keppnisskapið verður auðvitað að vera með að vissu marki. 

Sjá nánari úrslit í töflu og myndir frá ESE.

 

 

Sterkasta Íslandsmótið hefst á morgun í Hörpu!

Sterkasta Íslandsmót sögunnar í skák hefst á morgun í Háuloftum í Hörpu. Sex stórmeistarar taka þar þátt,  þeirra á meðal Jóhann Hjartarson og Jón L. Árnason sem hafa ekki verið meðal keppenda síðan á síðustu öld! Keppt er um vegleg verðlaun og nafnbótina Skákmeistari Íslands. 

Sex keppendur hafa hampað Íslandsmeistaratitlinum. Alþjóðlegi meistarinn Guðmundur Kjartansson hefur titil að verja og Hannes Hlífar Stefánsson hefur tækifærið til að slá eigið met – vinni hann þrettánda Íslandsmeistaratitilinn! 

Meðal annarra keppenda má nefna Héðin Steingrímsson sem er yngsti Íslandsmeistari sögunnar en hann vann mótið 1990 á Höfn í Hornafirði, þá aðeins 15 ára. Met sem verður seint slegið. Hjörvar Steinn Grétarsson er eini stórmeistarinn sem tekur þátt sem ekki hefur hlotið nafnbótina eftirsóttu. Henrik Danielsen varð Íslandsmeistari í Bolungarvík árið 2009. 

Keppendalistinn lítur út sem hér segir: 

1. GM Hannes Hlífar Stefánsson (2590)
2. GM Jóhann Hjartarson (2566)
3. GM Hjörvar Steinn Grétarsson (2561)
4. GM Héðinn Steingrímsson (2532)
5. GM Henrik Danielsen (2520)
6. GM Jón L. Árnason (2499)
7. IM Guðmundur Kjartansson (2474)
8. IM Bragi Þorfinnsson (2416)
9. IM Björn Þorfinnsson (2407)
10. FM Einar Hjalti Jensson (2359)
11. FM Sigurður Daði Sigfússon (2319)
12. WGM Lenka Ptácníková (2284) 

Teflt verður daglega 14.-24. maí. Fyrsta umferð hefst á morgun (uppstigningardag) kl. 14. Skákum verður varpað upp á skjái, heitt kaffi á könnunni og áhorfendur velkomnir.

Bent er á að hægt er að spá fyrir um röð efstu manna mótsins hér á Skák.is (guli kassinn efst).

Heimasíða mótsins

Einar Hjalti teflir í landsliðsflokki

FIDE-meistarinn Einar Hjalti Jensson (2359) tekur sæti í landsliðsflokki sem hefst á fimmtudaginn. Hann tekur sæti Stefán Kristjánssonar (2485) sem dró sig út úr mótinu af persónulegum ástæðum. 

Keppendalistinn:

1. GM Hannes Hlífar Stefánsson (2590)
2. GM Jóhann Hjartarson (2566)
3. GM Hjörvar Steinn Grétarsson (2561)
4. GM Héðinn Steingrímsson (2532)
5. GM Henrik Danielsen (2520)
6. GM Jón L. Árnason (2499)
7. IM Guðmundur Kjartansson (2474)
8. IM Bragi Þorfinnsson (2416)
9. IM Björn Þorfinnsson (2407)
10. IM Einar Hjalti Jensson (2359)
11. FM Sigurður Daði Sigfússon (2319)
12. WGM Lenka Ptácníková (2284)

Heimasíða mótsins

Spáðu fyrir úrslitin á Íslandsmótinu í skák!

Opnað hefur verið getraun fyrir Íslandsmótið í skák. Þar geta áhugasamir spáð fyrir um röð sex efstu keppenda mótsins.

Veitt eru 6 stig fyrir rétt efsta sæti, 5 stig fyrir rétt annað sæti og svo koll af kolli. Séu menn jafnir í sætum að vinningum (t.d. 2.-3. sæti) er nægjanlegt að giska á annað hvort hjá viðkomandi.

Ýmiss verðlaun verða í boði. Meðal annars 15.000 kr. úttekt á Hereford-steikhúsi. Auk þess verða geisladiska- og bókaverðlaun.

Lokað verður fyrir getraunina við upphaf annarrar umferðar, þ.e. kl. 17 föstudaginn 15. maí.

Athugið að aðeins verður tekið eitt svar gilt frá hverri ip-tölu. 

Getraunina má nálgast hér á Skák.is (guli kassinn efst).

Hannes sigraði á Wow air Vormóti TR

Stórmeistarinn Hannes Hlífar Stefánsson (2560) sigraði á Wow air Vormóti TR sem lauk í kvöld í húsnæði TR. Hannes gerði jafntefli við Einar Hjalta Jensson (2390) í lokaumferðinni. Davíð Kjartansson (2364) og Sigurður Daði Sigfússon (2319) urðu jafnir í 2.-3. sæti.

Lokastöðuna má finna á Chess-Results.

B-flokkur

Sverrir Örn Björnsson (2097) hafði sigur í b-flokki. Hinn ungi og efnilegi skákmaður, Vignir Vatnar Stefánsson (1909), átti mjög gott mót og varð annar. Þriðji varð Halldór Pálsson (2021). 

Sverrir Örn hefur unnið sér réttindi til að tefla í a-flokki að ári.

Lokastöðuna má nálgast á Chess-Results.

Heimasíða mótsins.

EM landsliða: Heimasíða mótsins komin í loftið!

Heimasíða Evrópumóts landsliða var sett í loftið í dag þegar ríflega hálft ár í mótið. Allar grundvallarupplýsingar um mótið má þar finna en allt efni síðunnar er á ensku.

Greint verður jafnóðum frá þegar nýjar þjóðir skrá sig til leiks.

Heimasíða EM landsliða.

Meistaramót Skákskóla Íslands 2015 fer fram í tveim flokkum

Meistaramót  Skákskóla Íslands fyrir starfsárið 2014/2015 hefst föstudaginn 29. maí og lýkur 31. maí. Mótið fer fram í tveim styrkleikaflokkum og verður reiknað til alþjóðlegra og íslenskra stiga í báðum flokkunum.  Tímamörk eru þó mismunandi í flokknum.

Tefldar verða sex umferðir eftir svissneska kerfinu í báðum flokkum. 

Aðalstyrktaraðili mótsins að þessu sinni er GAMMA. 

Þátttökurétt hafa nemendur skólans og allir þeir sem tekið hafa þátt í námskeiðum á vegum skólans eða hlotið þjálfun á vegum skólans.    

Að öðru leyti áskilur skólastjóri/mótsnefnd sér rétt til að bjóða völdum einstaklingum til þátttöku. 

Núverandi meistari  Skákskóla Íslands er Dagur Ragnarsson.   

Dagskrá mótsins verður með eftirfarandi hætti: 

Flokkur 1600 alþjóðleg elo – stig og ofar: 

1. umferð: Föstudagurinn 29. maí kl. 16-20
2. umferð: Föstudagurinn 29. maí kl. 20-00 

3. umferð. Laugardagur 30. maí kl. 10-14
4. umferð: Laugardagurinn 30. maí 15–19 

5. umferð: Sunnudagurinn 31. maí kl.10-14
6. umferð: Sunnudagurinn 31. maí kl.15-19 

Tímamörk í öllum umferðunum 90 30. 

Keppendur geta tekið ½ vinnings yfirsetu í fyrstu fjórum umferðunum en verða að tilkynna um yfirsetuna fyrir umferðina og áður en raðað er í næstu umferð.

Skákmenn sem eru með minna en 1600 elo- stig geta óskað eftir því að tefla í flokki stigahærri keppenda og mun mótsnefnd taka afstöðu til þess og skila niðurstöðu með góðum fyrirvara.   

Flokkur undir 1600– elo-stigum og stigalausir: 

1. umferð: Föstudagurinn 29. maí kl. 18-20
2. umferð: Föstudagurinn 29. maí kl. 20-22 

3. umferð. Laugardagur 30. maí kl. 10-12
4. umferð: Laugardagurinn 30. maí 15–17 

5. umferð: Sunnudagurinn 31. maí kl. 10-12
6. umferð: Sunnudagurinn 31. maí kl. 15-17

Tímamörk í öllum umferðunum 30 30.

Keppendur geta tekið ½ vinning yfirsetu í fyrstu fjórum umferðunum en tilkynna verður um yfirsetuna fyrir umferð og áður en raðað er í þá næstu.  

Verðlaun í flokki 1600 elo + 

1. verðlaun: farmiði að verðmæti kr. 50 þús + uppihaldskostnaður á kr. 35 þús.
2. verðlaun: Farmiði að verðmæti kr. 40 þús. 
3. – 5. sæti Vandaðar skákbækur.

Auk þess verða veitt stigaflokkaverðlaun í mótinu:

 

1800 – 2000 elo:

Farmiði að verðmæti kr. 40 þús.

 

1600-1800 elo:

Farmiði að verðmæti kr. 40 þús. 

Mótsstig úrskurða verði keppendur jafnir að vinningum nema í keppni um 1.  sæti. Þá skal teflt um titilinn Meistari Skákskóla Íslands 2015. 

Verðlaun í flokki 1600 elo og minna  og stigalausra: 

1. verðlaun: farmiði að verðmæti kr. 40 þús:
2. – 3. verðlaun: vandaðar skákbækur að eigin vali.