Óskar og Sigurður tefldu í Pardubice

Óskar Haraldsson (1766) og Sigurður Ingason (1842) tóku báðir þátt í Czech Open sem lauk í Pardubice í Tékklandi í gær. Óskar hlaut 3½ vinning en Sigurður fékk vinningi minna. Þeir tefldu í b-flokki. Óskar hækkar um 18 stig en Sigurður lækkar um 19. 

Það var tékkneski stórmeistarinn Viktor Laznicka (2657) sem sigraði á mótinu. Annar varð Armeninn Sergei Movsesian (2653). Þeir munu báðir tefla á EM landsliða sem fram í Höllinni í nóvember nk. Báðir væntanlega á öðru borði með sínum þjóðum en sveitirnar munu leiða þeir Levon Aronian og David Navara.

Heimasíða mótsins

Skákkeppni unglingalandsmótsins

18. unglingalandsmót UMFÍ stendur nú yfir hér á Akureyri. Í gær var keppt í skák og að sjálfsögðu fór keppnin fram í Skákheimilinu í umsjón Skákfélags Akureyrar. Stór hópur var skráður í keppnisgreinina skák, en forföll urðu allmikil þegar á hólminn var komið, líklega helst vegna þess að sumir voru skráðir í fleiri en eina grein samtímis.Keppt var í tveimur aldursflokkum, 11-14 ára og 15-18 ára.

Úrslit í yngri flokki:

1. Birkir Ísak Jóhannsson, UMSK    6,5 

2. Óliver Ísak Ólason, UFA         5,5

3. Sverrir Hákonarson, UMSK        5,5

Kristján Davíð Jónsson HSÞ og Gabríel Freyr Björnsson ÍBA 4,5

Sunna Þórhallsdóttir UFA, Friðbjörn Árni Sigurðarson UÍA, Aðlabjörn Leifsson UFA og Elvar Ingi Þorsteinsson ÍBR 4

Aron Birkir Guðmundsson HSK, Gunnar Breki Gíslason ÍBA og Ragnheiður Jónsdóttir HSK 3,5

Auðunn Elfar Þórarinsson ÍBA, Bjarni Ísak Tryggvason UMSE og Karen Ósk Kjartansdóttir 3

Þorfinnur Freyr Þórarinsson HSK og Benjamín Jón Stefánsson HSÞ 2

Eva María Ólafsdóttir Kolbeins USVS 0.

Úrslit í eldri flokki:

Jón Kristinn Þorgeirsson UFA 7

Gauti Páll Jónsson (TR)      6

Atli Geir Sverrisson UÍA     5

Guðmar Magni Óskarsson USAH  4

Bjarney Birta Atladóttir USVS, Þór Wium Elíasson ÍBA og Baldur Bergsveinsson (Draupnir) 2

Þórhlidur Lilja Þórarinsdóttir HSK 0

Í báðum flokkum voru telfdar 7 umferðir með 10 mínútna umhugsunartíma.

Skákþáttur Morgunblaðsins: Pólverjar minnast Miguel Najdorfs

Nokkrir af bestu virku skákmönnum okkar hafa verið að tefla talsvert undanfarið. Íslandsmeistarinn Héðinn Steingrímsson tók á dögunum þátt í Opna New York-mótinu en þar tefldu 70 keppendur níu umferðir. Eftir sex umferðir var Héðinn í fararbroddi með 4½ vinning en á lokasprettinum gaf hann eftir og endaði að lokum í 10.-15. sæti með 5½ vinning. Gata Kamsky sigraði, hlaut 7 vinninga.

Hannes Hlífar Stefánsson hóf í gær taflmennsku á skákhátíðinni í Pardubice í Tékklandi og Guðmundur Kjartansson í sterku lokuðu móti í Pétursborg, hlaut þar 4 vinninga af níu mögulegum og hafnaði í 7.-8. sæti af tíu keppendum. Þá ber að geta frábærs árangurs Páls Agnars Þórarinssonar sem varð í 2.-5. sæti á opna skoska meistaramótinu sem lauk á dögunum en þar voru keppendur 102 talsins. Páll hlaut 7 vinninga af níu mögulegum en sigurvegari var Oleg Korneev frá Rússlandi sem hlaut 7½ vinning.

Eitt sterkasta opna mót sumarsins fór svo fram í Varsjá í byrjun júlí og þar tefldu Ingvar Þ. Jóhannsson og Sigurbjörn Björnsson. Mótið var haldið til minningar um Miguel Najdorf en um hann hefur verið sagt að skákin hafi bjargað lífi hans. Najdorf sat að tafli fyrir Pólverja á Ólympíuskákmótinu í Buenos Aires hinn 1. september 1939 þegar Þjóðverjar réðust á Pólland og seinni heimsstyrjöldin hófst. Þrátt fyrir ítrekaðar tilraunir tókst honum ekki að ná sambandi við fjölskyldu sína og í hildarleiknum sem á eftir fór missti hann konu sína og barn og stórfjölskylduna alla. Í Argentínu stofnaði hann tryggingafyrirtæki og efnaðist vel, setti mikinn svip á skáklíf þar í landi og á alþjóðvettvangi. Hann tefldi á Reykjavíkurskákmótinu árið 1976.

Á minningarmótinu í Varsjá hlaut Ingvar 5 vinninga og varð í 24.-35. sæti af 83 keppendum en Sigurbjörn hlaut 3 vinninga og varð í 70.-77. sæti. Sigurvegari varð Rússinn Igor Kovalenko, hlaut 8 vinninga af níu mögulegum. Í hverri einustu umferð mættu Ingvar og Sigurbjörn verðugum andstæðingum. Í 2. umferð tefldi Sigurbjörn við Búlgarann Cheparinov, stigahæsta mann mótsins. Sá hefur afar beittan skákstíl og lokaflétta hans í þessari skák var lagleg:

Varsjá 2015; 2. umferð:

Ivan Cheparinov – Sigurbjörn Björnsson

Slavnesk vörn

1. d4 d5 2. c4 c6 3. Rf3 e6 4. Dc2 Rf6 5. Rbd2 Be7 6. g3

Með því að snúa taflinu yfir í afbrigði katalónskrar byrjunar tekst Cheparinov að ná betri stöðu án þess að hafa mikið fyrir hlutunum.

6. ... 0-0 7. Bg2 b6 8. 0-0 Bb7 9. e4 c5?

Sigurbjörn bregst hart við að venju en betra var sennilega að bíða átekta og leika 9. ... Ra6. Uppskipti á e4 koma einnig til greina en vandinn er að losa um sig.

10. cxd5 exd5 11. e5 Re4 12. dxc5 Rxd2 13. Bxd2 bxc5 14. Had1 Ra6 15. Hfe1 Rc7 16. Ba5!

Hangandi peðin eru ekki burðug eftir þennan leik.

16. ... Dd7 17. Bxc7 Dxc7 18. Rd4 Hac8 19. Rf5 Hfd8 20. e6 fxe6 21. Hxe6 Bf8 22. De2 Hd7 23. He1

Yfirburðir hvíts eru augljósir en þó ekkert rakið fyrr en eftir næsta leik svarts.

23. ... d4 24. He8! Bxg2 25. De6+ Kh8

26. Rh6!

Slagkraftur mikill. Hótunin er 27. Dg8 mát og 26. ... gxh6 strandar á 27. Df6+ og mátar.

26. ... Bd5 27. Df5! Bf7 28. Hxc8 Dxc8 29. Rxf7 Kg8 30. De6!

Enn er mát á g8 yfirvofandi og leppun hróksins gerir útslagið. Svartur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 25. júlí 2015

Skákþættir Morgunblaðsins

Þorsteinn Þorsteinsson á vit Hugins

Fidemeistarinn öflugi, viðskiptafræðingurinn og hvalfangarinn, Þorsteinn Þorsteinsson, er genginn í skákfélagið Hugin. Þorsteinn er sannkallaður hvalreki fyrir félagið enda bæði snjall skákmaður og ötull félagsmálamaður. Þannig mun Þorsteinn jöfnum höndum tefla fyrir hönd Hugins, annast liðsstjórn og taka sæti í öldungaráði félagsins.

Þorsteinn  hóf feril sinn í TR á Grensáveginum árið 1971, þá 11 ára. Hann tilheyrir þeirri kynslóð ungra skákmanna sem stigu sín fyrstu skref í TR eftir heimsmeistareinvígi Fischersog Spassky. Þar má m.a. nefna Margeir Pétursson, Jón L. Árnason, Jóhann Hjartarson,Karl Þorsteins, Sævar Bjarnason, Ómar Jónsson, Elvar Guðmundsson, Benedikt Jónasson, Gísla Hjaltason, Ásgeir Þ. Árnason, Ögmund Kristinsson, Kristján Guðmundsson, Róbert Lagermann, Guðna Sigurbjarnarson, Jón. S. Halldórsson og Þröst Bergmann en þrír hinir síðastnefndu eru látnir.

Þorsteinn ólst upp í Safamýrinni eins og Jóhann Hjartarson og fleiri sterkir skákmenn enda hrifsaði Álftamýrarskóli til sín svo til alla skólatitla á þessum árum. Mikil skákmenning blómstraði í hverfinu og nánast var teflt í hverju hús, enda nálægðin við TR á gullaldarárum félagsins til þess fallin. Árið 1977 varð Þorsteinn unglingameistari Íslands undir 20 ára en Jóhann Hjartarson og Karl Þorsteins höfnuðu í 2. 3 sæti. Þorsteinn tefldi lítið næstu árin þar á eftir en 10 árum síðar var Jóhann hins vegar orðinn einn af allra bestu skákmönnum heims.

Þorsteinn stundaði háskólanám í Svíþjóð á árunum 1991-1996 og lauk þar meistaragráðu í rekstrahagfræði. Þorsteinn tefldi mikið á þessu tímabili, bæði í sænsku deildarkeppninni, sænska meistaramótinu og á fjölmörgum mótum eins og Rilton Cup. Hann vann nokkur mót á þessum árum og var oftar en ekki í toppbaráttunni í öðrum.

Árið 1997 fluttist Þorsteinn aftur heim til Íslands. Hann tók þátt í landsliðsflokknum á Akureyri sama ár og hafnaði í miðjum hópi en Þorsteinn hefur alls teflt 5 sinnum í landsliðsflokki. Hann var í sigursveit TR í deildarkeppninni 1998-1999. Árið 2009 gekk Þorsteinn í raðir Taflfélags Vestmannaeyja (TV) þar sem hann tefldi með liðinu og var liðsstjóri. Sama ár vann félagið sig upp í efstu deild og síðan þá hefur félagið orðið í 2. eða 3. sæti ár hvert. Segja má að Þorsteinn hafði átt hvað mestan heiður af því að byggja upp það sterka lið sem TV varð á þessum árum.

Þorsteinn tefldi síðast á alþjóðlegu móti í Ortisei á Ítalíu árið 2012 og var þar hársbreidd frá því að ná áfanga að alþjóðlegum meistaratitli. Hann hefur síðan þá snúið sér í auknum mæli að bréfskák og er í dag með stigahæstu bréfskákmönnum landsins.

Hernámsminjar á Hvítanesi: „Það kostar“ útskýrir Þorsteinn – „menn vaða ekkert í vélarnar“

Þorsteinn segist kveðja TV með vissum trega en að allt hafi sitt upphaf og endi, minningarnar séu margar og góðar sem skipti mestu. Hann vill þakka öllum liðsmönnum félagsins fyrir skemmtilegan tíma þau ár sem hann stýrði liðinu. Þorsteinn segist hlakka til að byrja í Hugin. Það félag hafi orðið fyrir valinu þar sem skipulagið sé gott, liðsandinn til fyrirmyndar og glaðværð í öndvegi. Einnig hafi skipt máli að ákveðin virðing sé borin fyrir skákmönnum sem komnir eru til vits og ára.

Þorsteinn er þekktur fyrir smíðar á kostulegum orðatiltækjum sem tengjast skákinni. Hér má m.a. nefna; „skákin er harður skóli“, „menn vaða ekkert í vélarnar“, „stigin tefla ekki“, „það kostar“, „pósaþjappa“og síðast en ekki síst „smé“ en öll þessi orðatiltæki hafa náð ákveðinni fótfestu í tungutaki íslenskra skákmanna.

Stjórn Hugins býður Þorstein hjartanlega velkomin til félagsins og væntir mikils af atfylgi hans og skemmtilegum uppátækjum.

Heimasíða Hugins

MVL sigurvegari Biel-mótsins

Hinn mjög svo viðkunnanlegi franski stórmeistari Maxime Vachier-Lagrave (2731) sigraði á ofurmótinu í Biel sem lauk í gær. MVL hlaut 6½ vinning í 10 skákum. Það var frábær endasprettur sem skóp sigur Frakkans en hann þrjár síðustu skákirnar. Pólski stórmeistarinn Radoslaw Wojaszek (2733) varð annar með 6 vinninga og Englendingurinn Mickey Adams (2740) varð þriðji með 5½ vinning. Þeir munu allir tefla á fyrsta borði fyrir sín lönd á EM landsliða sem fram fer í Höllinni í nóvember nk.

Frammistaða Richard Rapport (2671) vakti athygli en hann tapaði fimm síðustu skákunum og hlaut 2 vinninga. Rapport hefur engan veginn náð sér á strik í síðustu mótum. Hinn hvassi skákstíll hans virðist ekki henta vel á ofurmótum.

Vandaða umfjöllun um mótið má finna á Chess24.

Heimasíða mótsins

Fundargerð fyrsta fundar

Fyrsti stjórnarfundur nýrrar stjórnar SÍ var haldinn 2. júlí sl. Fundagerð fundarins er sem hér segir:

Fyrsti stjórnarfundur SÍ starfsárið 2015-2016 var haldinn 2.júlí 2015, kl.17:15.

Mættir: Gunnar Björnsson, Stefán Bergsson, Óskar Long Einarsson, Omar Salama og Kjartan Maack.

1. Skipting embætta. Forseti SÍ, Gunnar Björnsson, gerði tillögu að skiptingu embætta fyrir starfsárið 2015-2016 sem var samþykkt. Tillagan var svohljóðandi:
   1. Varaforseti: Kjartan Maack.
   2. Gjaldkeri: Óskar Long Einarsson.
   3. Ritari: Róbert Lagerman.
   4. Vararitari: Ingibjörg Edda Birgisdóttir.
   5. Æskulýðsfulltrúi: Stefán Bergsson.
   6. Meðstjórnandi: Steinþór Baldursson.
2. Ákveðið var að skipa aðeins formann hverrar nefndar að svo stöddu og þeim falið að velja aðra nefndarmenn. Formönnum gert að skila inn nefndarskipan eigi síðar en 1.september næstkomandi. Einnig óskað eftir því að formenn nefnda skili inn stuttri en greinargóðri lýsingu á verkefnum viðkomandi nefndar og skili henni eigi síðar en 1.september. SÍ gerir tillögu að formönnum í eftirfarandi nefndir:
   1. Skákmótanefnd: Gunnar Björnsson.
   2. Æskulýðsnefnd: Stefán Bergsson.
   3. Skákstiganefnd: Ríkharður Sveinsson.
   4. Skákminjanefnd: Stefán Bergsson.
   5. Landsliðs- og afreksnefnd: Jón Gunnar Jónsson.
   6. Kvennaskáknefnd: Lenka Ptacnikova.
   7. Landsbyggðarnefnd: Hermann Aðalsteinsson.
   8. Styrkjanefnd: Gunnar Björnsson.
   9. Öðlinganefnd: Einar S. Einarsson.
   10. Fjárhagsnefnd: Óskar Long Einarsson.
   11. Laganefnd: Tómas Veigar Sigurðarson.
   12. Framtíðarnefnd: Kjartan Maack.
   13. Dómaranefnd: Omar Salama.
   14. Þjálfaranefnd: Helgi Ólafsson.
   15. Nefnd um framtíðarskipulag Íslandsmóts skákfélaga: Halldór Grétar Einarsson.
3. Mótaáætlun: Gunnar kynnti mótaáætlun SÍ fyrir komandi starfsár. Vakin var sérstök athygli á því að Unglingameistaramót Íslands er sett örfáum dögum eftir að EM landsliða lýkur. Stefán benti á að með því að vinna nauðsynlega undirbúningsvinnu fyrir UMÍ með góðum fyrirvara þá eigi þessi knappi tími ekki að skapa vandræði. Íslandsmót skákfélaga verður teflt á tveimur helgum líkt og áður. Rætt var um að innleiða 30 leikja regluna í efstu deild, en ekki öðrum deildum. Athygli var vakin á því að reglugerð um Íslandsmót barnaskólasveita þarfnast endurskoðunar. Gunnar ætlar jafnframt að gera tillögu að breyttri reglugerð vegna Íslandsmóts skákfélaga.
4. Norðurlandamót: Gunnar sagði frá tillögu þess efnis að næsta Reykjavíkurskákmót verði jafnframt Norðurlandamót. Fundarmenn tóku almennt vel í þá tillögu.
5. HM ungmenna 2015: Samkvæmt reglugerð SÍ um HM ungmenna skal miða við íslensk skákstig þegar valið er á mótið. Ákveðið var á fundinum að horfa jafnframt til FIDE stiga, enda þykir ljóst að reglugerð verði breytt á næstunni og FIDE stig verði látin gilda í framtíðinni. Rætt var um að uppfæra reglugerðina fyrir 1.janúar 2016. Þessi ákvörðun opnar leið fyrir fleiri ungmenni til þess að taka þátt í mótinu. Þau sem koma inn á FIDE stigum fá þó ekki fullan styrk til þátttöku.
6. Dregið um töfluröð fyrir Íslandsmót skákfélaga 2015-2016: Dregið var um töfluröð efstu deildar með hliðsjón af þeirri ákvörðun að A og B lið sama félags skuli mætast í 2.umferð. Niðurstaðan varð svohljóðandi:
   1. Taflfélag Reykjavíkur A.
   2. Taflfélag Reykjavíkur B.
   3. Skákfélag Akureyrar A.
   4. Skákfélagið Huginn B.
   5. Skákdeild Fjölnis.
   6. Víkingaklúbburinn.
   7. Taflfélag Bolungarvíkur.
   8. Skákfélagið Huginn A.
   9. Skákfélag Akureyrar B.
   10. Skákdeild KR

Fundi slitið kl.18:55. Fundarritari var Kjartan Maack.

Fundargerðir SÍ má nálgast hér.

Sumarsyrpa Breiðabliks fer fram 7.-9. ágúst

Sumarsyrpa Breiðabliks er með samskonar fyrirkomulagi og hin vinsæla Bikarsyrpa TR.
Tvö mót verða haldin í sumar. Það seinna fer fram helgina 7.-9.ágúst. Mótin eru ætluð börnum á grunnskólaaldri (fæddum 1999 og síðar) sem ekki hafa náð 1600 skákstigum. Þau eru reiknuð til íslenskra og alþjóðlegra skákstiga.

Tefldar eru 5 umferðir eftir svissneska kerfinu. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Það margborgar sig að vanda sig og nota tímann, en samt má búast við því að margar skákir klárist á styttri tíma.

Dagskrá:

1. umferð kl 17:30 á föstudegi
2. umferð kl 10:30 á laugardegi
3. umferð kl 14:00 á laugardegi
4. umferð kl 10:30 á sunnudegi
5. umferð kl 14:00 á sunnudegi

Teflt er í Glersalnum í Stúkunni við Kópavogsvöll.

Verðlaun:

• 1. sæti: fyrsta val
• efstur 10 ára og yngri: annað val
• 2. sæti: þriðja val
• 3.sæti: fjórða val
• nr 2 10 ára og yngri: fimmta val
• nr 3 10 ára og yngri: sjötta val

Verðlaunapakkar: Pizza frá Íslensku Flatbökunni Bæjarlind, Stór bragðarrefur frá Vesturbæjarís, 4 bíómiðar í boði Vitakletts og Sambíóanna, 2 bíómiðar (3 pör af þeim).

Skráning í mótið  7.-9.ágúst: https://docs.google.com/forms/d/1rsyp1VnMmVd2Xx2C1UqPVpGvY6p7sngkJOjawyGihZA/viewform?usp=send_form

Skráðir keppendur: https://docs.google.com/spreadsheets/d/1baghnMaXs2DH85jja-DwZ_b9eSeL2uLd6orNtrIAwsI/edit#gid=975323026

Úrslit mótsins 3.-5.júlí: http://chess-results.com/tnr179648.aspx?lan=1

Heimasíða Skákdeildar Breiðabliks: http://www.breidablik.is/skak

Alþjóðlegt skákmót í Köge í Danaveldi í október

Opið alþjóðlegt mót, Xtraton Grand Master, fer fram í Köge (rétt fyrir utan við Kaupmannahöfn) dagana 12.-18. október. Óhætt er að mæla með mótahaldi í Köge en mót þar eru afar fagmannalaga haldin af skákklúbbnum þar undir forystu Finn Sthur. Klúbburinn hélt meðal ananrs Norðurlandamótið í skák 2013 og þótti takast vel upp.

Meðal keppenda í ár verður Henrik Danielsen.

Nánari upplýsingar má nálgast í meðfylgjandi PDF-viðhengi.

 

Skrár tengdar þessari bloggfærslu:

• Xtraton skákmótið 2015

Hraðskákkeppni taflfélaga - skráningarfrestur rennur út um mánaðarmótin

Hraðskákkeppni taflfélaga, hefst venju samkvæmt nú eftir verslunarmannahelgi. Þetta er í 21. skipti sem keppnin fer fram en Taflfélag Reykjavíkur er núverandi meistari. Í fyrra tóku 16 lið þátt keppninni. Nú þegar eru 11 lið skráð til leiks en skráð lið má finna hér. 

Teflt er eftir útsláttarfyrirkomulagi.

Dagskrá mótsins er sem hér segir:

1. umferð (16 liða úrslit): Skuli vera lokið eigi síðar en 15. ágúst
2. umferð (8 liða úrslit): Skuli vera lokið eigi síðar en 30. ágúst
3. umferð (undanúrslit): Skulu fara fram laugardaginn, 5. september
4. umferð (úrslit): Skulu fara fram fram laugardaginn, 12. september

Þátttökugjöld eru kr. 4.000 kr. á hverja sveit sem greiðist inn á reikning 327-26-6514, kt. 650214-0640.

Umsjónaraðili getur heimilað breytingar við sérstakar aðstæður. Breyta má dagsetningum á úrslitum og/eða undanúrslitum með samþykki allra viðkomandi taflfélaga.

Skráning til þátttöku rennur út 31. júlí nk. Skráning fer fram á www.skak.is (guli kassinn efst). Hægt er að skrá b-sveitir til leiks en a-sveitir njóta forgangs varðandi þátttöku komi til þess að fleiri en 16 lið skrái sig til leiks.

1. Sex manns eru í hvoru liði og tefld er tvöföld umferð, þ.e. allir í öðru liðinu tefla við alla í hinu liðinu. Samtals 12 umferðir, eða 72 skákir.
2. Heimalið sér um dómgæslu. Komi til deiluatriða er Ólafur S. Ásgrímsson yfirdómari keppninnar. Mótshaldari leggur fram dómara í undanúrslit og úrslit.
3. Undanúrslit og úrslit keppninnar verða reiknuð til alþjóðlegra hraðskákstiga.
4. Varamenn mega koma alls staðar inn. Þó skal gæta þess að menn tefli ekki oftar en tvívegis gegn sama andstæðingi og hafi ekki sama lit í báðum skákunum.
5. Ætlast er til þess að þeir sem tefli séu fullgildir meðlimir síns félags (á Keppendaskrá SÍ). Aðeins má tefla með einu taflfélagi í keppninni.
6. Liðsstjórar koma sér saman um hvenær er teflt og innan tímaáætlunar. Komi liðsstjórar sér ekki saman um dagsetningu innan tímaramma getur umsjónaraðili ákvarðað tímasetningu.
7. Verði jafnt verður tefldur bráðabani. Það er tefld er einföld umferð þar sem dregið er um liti á fyrsta borði og svo hvítt og svart til skiptist. Verði enn jafnt verður áfram teflt áfram með skiptum litum þar til úrslit fást. 
8. Heimalið bjóði upp á léttar veitingar, t.d. kaffi, gos, kökur. Mótshaldari sér um veitingar í undanúrslitum og úrslitum.
9. Meðlimir b-sveita skula ávallt vera stigalægri en meðlimir a-sveitar (FIDE-stig) sömu umferðar. Skákmaður sem hefur teflt með a-sveit getur ekki teflt með b-sveit síðar í keppninni.
10. Viðureignirnar skulu fara fram innan 100 km. radíus (max 1-1,5 klst.ferðalag) frá Reykjavík nema að félög komi sér saman um annað.
11. Úrslitum skal koma til umsjónarmann eins fljótt og auðið er í netfangið [e-mail] og eigi síðar en 12 klukkustundum eftir að keppni lýkur.
12. Úrslit keppninnar verða ávallt aðgengileg á heimasíðu Hugins, www.skakhuginn.is sem er heimasíða keppninnar, og á www.skak.is.
13. Mótshaldið er í höndum Skákfélagsins Hugins sem sér um framkvæmd mótsins og mun útvega verðlaunagripi.

Upplýsingar um þegar skráðar sveitir má finna hér. 

Heimasíða mótsins

Wojtaszek efstur í Biel

Pólski stórmeistarinn Radoslaw Wojtaszek (2733) er efstur með 4½ vinning að lokinni sjöundu umferð ofurmótsins í Biel í Sviss í dag. Michael Adams (2740) og David Navara (2724) koma næstir með 4 vinninga.

Sex skákmenn taka þátt í Biel og tefla tvöfalda umferð.

Heimasíða mótsins