Helgi Ólafsson til liðs við Hugin!

Hinn kunni stórmeistari og skákfræðimaður, Helgi Ólafsson, er genginn til liðs við Skákfélagið Hugin. Ljóst er að félaginu er gríðarlegur styrkur að komu Helga enda um að ræða einn allra öflugasta og reyndasta skákmann þjóðarinnar.

Ferill Helga er einkar glæsilegur. Árið 1970 varð hann unglingameistari Íslands með 100% árangri. Næstu ár varð Helgi tvívegis skákmeistari Vestmannaeyja  og leiktíðina 1973 -´74 vann hann flest skákmót sem hann tók þátt í. Á alþjóðavettvangi tefldi hann fyrst 1973 þegar sveit Menntaskólans við Hamarhlíð varð fyrst íslenskra skólasveita til að verða Norðurlandameistari.

Helgi varð alþjóðlegur meistari eftir góða frammistöðu á alþjóðlegu móti í New York sumarið 1976 og Lone Pine 1978. Í ársbyrjun 1984 gerðist hann atvinnumaður í skák og varð fljótlega stórmeistari eftir sigur á alþjóðalega  Reykjavíkurmótinu 1984 og sigur á alþjóðega  mótinu í Neskaupsstað sama ár en lokaáfanginn kom í Kaupmannahöfn 1985 þegar hann varð í 2. – 4. sæti ásamt Bent Larsen og Curt Hansen á afmælismóti Bronshoj skákkúbbsins. Helgi varð efstur ásamt Simen Agdestein og Jóhanni Hjartarsyni á Skákþingi Norðurlanda 1985.

Helgi tefldi á árunum 1975 – 1996 12 sinnum í landsliðsfokki á Skákþingi  Íslands. Hann varð á þessum tíma skákmeistari Íslands sex sinnum og í 2. sæti fimm sinnum. Helgi hefur orðið Íslandsmeistari í atskák oftar en nokkur annar eða fjórum sinnum og hraðskákmeistari Íslands sex sinnum. Helgi sigraði á 23 helgarmótum tímaritsins Skákar á árunum 1980  – 1997. Auk þess hefur hann unnið aragrúa annarra innlendra móta.

Eins og áður sagði varð Helgi hlutskarpastur á Reykjavíkurmótinu 1984, ásamt Jóhanni Hjartarsyni og Samuel Reshevsky, og varð efstur með níu öðrum á Reykjavíkumótinu 1990. Hann tefldi síðast á Reykjavíkurskákmótinu 2014 og varð í 2. – 5. sæti, hlaut 8 vinninga af 10 mögulegum. Hann varð í 2. sæti með öðrum á einu sterkasta opna móti ársins í New York 1986 og náði sama árangri aftur í sama móti 1989 og 1990. Um þetta leyti var Helgi í kringum 30. sæti á heimslista FIDE. Helgi sigraði á alþjóðlegu móti tímaritins Skákar við Djúp sumarið 1988 og nokkrum vikum síðar fór hann hann taplaus í gegnum 13 umferða minningarmót um Tschigorin í Sochi við Svartahaf.  Ekki er þekkt dæmi um annan Vesturlandabúa sem komist hefur taplaus í gegnum slíkt mót í gömlu Sovétríkjunum.

Helgi hefur teflt 16 sinnum fyrir hönd þjóðar sinnar á Ólympíumótum, oftar en nokkur annar Íslendingur. Hann tefldi  á 1. borði í Saloniki 1984, Dubai 1986 og Novi Sad 1990 og flestar skákirnar á Möltu 1980. Helgi var þjálfari og liðsstjóri íslenska Ólymíuliðsins 2010 og 2012 og einnig liðsstjóri og þjálfari íslenska liðsins á Evrópumótum landsliða 2011, og 2013. Í  fyrra skipti í Porto Carras tók hann sæti í liðinu vegna forfalla, hlaut 4 ½ vinning af 5 mögulegum og fékk silfurverðlaun fyrir frammistöðu sína. Helgi hyggur á þátttöku í gullaldarliði Íslands sem teflir á EM í Reykjavík í haust.

Helgi hefur verið atkvæðamikill skákpistlahöfndur og blaðamaður á ýmsum miðlum og hefur ritað reglulega skákpistla í Morgunblaðið frá árinu 2006. Helgi hefur einnig skrifað ótal greinar í blöð og tímarit hér á landi og erlendis. Hann hefur ritað og þýtt nokkrar bækur þ. á m. bókina Benóný með Braga Halldórssyni og Jóni Torfasyni, bókina „Bobby Fischer comes home“ sem kom út í Hollandi vorið 2012 og skrifað fyrra bindið af tveimur um Reykjavíkurskákmót í 50 ár. Þá hefur hann m.a. snarað kennslubókinni Skák og mát sem Hrókurinn dreifði í grunnskóla landsins í um 25 þús. eintökum og einnig þýtt FIDE-kennslubókina Skákþjálfun sem FIDE gaf út. Helgi gerðist skólastjóri  Skákskóla Íslands árið 1996 og dró þá mjög úr taflmennsku en hefur þó alltaf haldið sér við með þátttöku í kappskákmótum eftir því sem tími hefur unnist til.

Helgi Ólafsson, stórmeistari:   

Ég hef notið þess að keppa fyrir hönd Taflfélags Vestmannaeyja um árabil og þakka félögum mínum þar góð kynni. Nú geng ég til liðs við annað skemmtilegt og vel mannað félag. Sérstaklega líst mér vel á áherslu Huginsmanna á skákmenningu og metnað þeirra til þess að félagsmenn eflist að styrk samhliða vexti og viðgangi félagsins. Þar er auðvitað lykilatriði að líta svo á að allir skákmenn geti bætt sig fram eftir öllum aldri.

Hermann Aðalsteinsson, formaður Hugins:

Þetta eru stór tíðindi. Við Huginsmenn erum auðvitað stoltir af því að þessi öflugi stórmeistari laðist að okkar félagi. Ljóst er að með Helga er nýrri og sterkri stoð rennt undir framtíð Hugins meðal fremstu skákfélaga landsins. Við hlökkum til að njóta visku hans og atfylgis og gerumst nú enn upplitsfjarfi fyrir komandi leiktíð. Þar er eitt af markmiðum okkar að verja Íslandsmeistaratilil félagsins.

Heimasíða Hugins

Skákþáttur Morgunblaðsins: Magnús Carlsen teflir á EM í Reykjavík

Þá liggur það fyrir að heimsmeistarinn Magnús Carlsen mun tefla fyrir Noreg á Evrópumóti landsliða sem fram fer í Reykjavík í nóvember nk. Aðrir í norska liðinu eru Ludwig Hammer, Simen Agdestein, Aryan Tari og Frode Urkedahl. Þetta verður í fyrsta sinn síðan 1988, er Garrí Kasparov tók þátt í heimsbikarmóti Stöðvar 2, sem ótvíræður heimsmeistari teflir hér á landi. Búast má við að 30-40 lið tefli í opna flokki mótsins og 25-30 lið í kvennaflokknum. Ljóst er að Íslendingar munu tefla fram tveimur liðum í opna flokknum en aðallið Íslands hefur enn ekki verið tilkynnt, en fyrstu menn inn þar verða Hannes Hlífar Stefánsson, Héðinn Steingrímsson og Hjörvar Stefánsson. Hið svonefna gullaldarlið Íslands verður skipað Friðriki Ólafssyni, Jóhanni Hjartarsyni, Jóni L. Árnasyni, Margeiri Péturssyni og undirrituðum. Ekkert liggur fyrir um það hvernig íslenska kvennaliðið verður skipað en Lenka Ptacnikova mun án efa tefla á 1. borði. Mótið fer fram í Laugardalshöll.

Eitt sigurstranglegasta lið þessarar keppni hlýtur að vera lið Armena sem teflir fram Levon Aronjan á fyrsta borði. Aserbaídsjan hefur unnið keppnina tvisvar og þá koma Rússar alltaf sterklega til greina sem sigurvegarar þó frammistaða þeirra eftir að Kasparov hætti hafi verið allt annað en viðunandi frá sögulegum sjónarhóli séð. Vladimir Kramnik mun samkvæmt áreiðanlegum heimildum leiða sveit þeirra að þessu sinni. Þá má nefna Úkraínumenn með Vasilí Ivantsjúk fremstan í flokki. Af þekktum keppendum má nefna Anish Giri sem teflir á 1. borði fyrir Hollendinga og Michael Adams sem teflir á 1. borði fyrir Englendinga.

Þó að Evrópumótin séu aðeins styttri en Ólympíumótin, níu umferðir á móti ellefu, eru þau að sumu leyti erfiðari þar sem flestar sveitirnar eru þéttar fyrir. Stig eru látin ráða en ekki vinningar, 2 ½ vinningur gefur jafn mörg stig og fjórir vinningar og ákveðin taktík ræður stundum ferðinni í innbyrðis viðureignum. Íslendingar hafa oft náð góðum árangri á Evrópumótinu, 13. sæti í Debrecen 1992 er besta lokaniðurstaðan og þar fékk Jóhann Hjartarson silfurverðlaun fyrir bestan árangur á 1. borði. Þá náðist góður árangur í Heraklion í Grikklandi 2007.

Evrópumót landsliða fór fyrst fram í Vín í Austurríki árið 1957 og þá var teflt á tíu borðum. Meðal liðsmanna sigursveitar Sovétmanna var Mikhael Tal sem þá var að hefja einhverja mögnuðustu sigurgöngu sem skáksagan kann frá að greina. Leiftrandi leikfléttustíll hans skein skært á þessu móti.

Evrópumót landsliða í Vín 1957:

Mikhael Tal – Rudolph Teschner (V-Þýskaland )

Spænskur leikur

1. e4 e5 2. Rf3 Rc6 3. Bb5 a6 4. Ba4 Rf6 5. O-O d6 6. c3 Be7 7. d4 b5 8. Bb3 Bg4 9. h3 Bxf3 10. Dxf3!?

Fyrsta fórnin, hvítur fær gott spil fyrir peðið.

10. ... exd4 11. Dg3 g6 12. Bd5 Dd7 13. Bh6!

Almenn óþægindi fylgja þessum langa biskupsleik, svartur getur ekki komið kónginum í skjól.

13. ... Hb8 14. f4 Rd8 15. Rd2 c6 16. Bb3 dxc3 17. Dxc3 Da7 18. Kh1 Dc5 19. Dd3 Rd7 20. e5!

Gegnumbrot sem hefur það að markmiði að rýma e4-reitinn fyrir riddarann.

20. ... d5 21. f5 gxf5 22. Dxf5 Rf8

Reynir að verja veikleikana. 

23. Re4! dxe4 24. Hac1 Db6 25. Hcd1!

- Við hótuninni 26. Bxf7+ er engin haldgóð vörn og svartur gafst upp.

Helgi Ólafsson [e-mail]

Skákþættir Morgunblaðsins eru birtir á Skák.is viku síðar en í sjálfu 

Grein þessi birtist í Morgunblaðinu 18. júlí 2015

Skákþættir Morgunblaðsins

Henrik Danielsen genginn í T.R.

Stórmeistarinn Henrik Danielsen (2510) er genginn í Taflfélag Reykjavíkur. Henrik þarf vart að kynna, en hann hefur verið einn sterkasti og virkasti meistari landsins í mörg ár. Árið 1991 varð hann alþjóðlegur meistari og stórmeistari fimm árum síðar 1996.

Henrik hefur í fjölmörg skipti keppt fyrir Íslands hönd síðan hann varð íslenskur ríkisborgari árið 2005 og árið 2009 varð hann íslandsmeistari í skák, en mótið var þá haldið í Bolungarvík. Henrik keppti einnig þrisvar sinnum á ólympíumótum fyrir hönd Danmerkur, eða árin 1992, 1994 og 1996.

Henrik hefur ritað mikið um skák, og er þar þekktastur fyrir “Ísbjarnar-kerfið” í Birds byrjuninni sem hann hefur oft beitt með góðum árangri.

Henrik mun styrkja starf Taflfélags Reykjavíkur mikið og bjóðum við hann hjartanlega velkominn í félagið!

Heimasíða TR

Kóngurinn David Navara fer á kostum í Biel

Tékkinn David Navara (2724) er efstur á ofurmótinu í Biel. Hann hefur hlotið 3 vinninga í 4 skákum. Skák hans gegn Radoslaw Wojtaszek (2733) frá í gær hefur vakið gríðarlega athygli um skákheim allan. Kóngur Tékkans fór á ferðlag þvert yfir borðið frá g1-h8.

Ítarlega og góða umfjöllun um skákina í gær má finna á Chess.com. Sjón er sögu ríkari og eru skákáhugamenn hvattir til að skoða snilldina. 

Nigel Short tístaði um skákina að henni lokinni:

I have no idea what David Navara is smoking, but I would like some too. #crazykingmarch

— Nigel Short (@nigelshortchess) July 23, 2015

Pavel Eljanov, einn keppenda mótsins, lék hafa eftir sér eftir skákina:

It was just incredible, probably one of the most amazing games I've ever seen.

Þess má geta að Navarra, Wojtaszek, Nigel Short og væntanlega einnig Eljanov einnig munu allir tefla á EM landsliða í höllinni í haust.  

Staðan:

 Elo Points

1.	David Navara	2724	CZE	3
2.	Maxime Vachier-Lagrave	2731	FRA	2.5
3.	Radoslaw Wojtaszek	2733	POL	2
4.	Pavel Eljanov	2723	UKR	1.5
	Michael Adams	2740	ENG	1.5
	Richard Rapport	2671	HUN	1.5

 

Heimasíða mótsins

Íslandsmót skákmanna í golfi

Íslandsmót skákmanna í golfi 2015 verður haldið á Leirdalsvelli hjá GKG laugardaginn 8.ágúst nk.

Keppt verður í tvíkeppni þar sem árangur í golfi og skák er lagður saman.

Að þessu sinni teflum við á undan. Kl 10:00 byrjar 9 umferða hraðskákmót með tímamörkunum 4min + 2sek.

Við fáum rástíma á milli kl 13 og 14.

Skákdeild Breiðabliks sér um framkvæmd Íslandsmóts skákmanna í golfi.

Skráning er á https://docs.google.com/forms/d/13xSiNcQ7_siuY1eEuZ-HvitqRFe4lKRXVKHZHjflwCw/viewform 

Skráðir: https://docs.google.com/spreadsheets/d/1HLSblckSAkrmRVeMqsWjptgzblImBhld6-kne8x-LXc/edit - gid=1985622446 

Núverandi Íslandsmeistari er Helgi Ólafsson.

Íslands- og heimsmetið er 2391 stig og er í eigu Helga.

Upplýsingar um mótið í fyrra er hægt að nálgast á: http://chess.is/golf/chessgolf2014.htm. 

Keppt er í eftirfarandi flokkum:

Golf og skák, án forgjafar.

Sá sem nær bestum árangri í golfi og skák hlýtur nafnbótina Íslandsmeistari skákmanna í golfi 2015. Notuð er sérstök tafla sem umbreytir höggafjölda á Leirdalsvelli í skákstyrkleika (rating-performance). Skákstyrkleiki (rating-performance) í hraðskákmótinu er mældur og meðaltals árangur gildir.

Golf og skák, með forgjöf.

Árangur í golfinu er mældur í punktum á vanalegan hátt. Skákstyrkleiki umfram getur (rating-performance mínus eigin skákstig) er mældur í hraðskákmótinu. Að tefla á eigin getu, gefur mönnum 32 punkta. Hver 25 stig umfram getu gefur einn punkt. Sá sem nær flestum punktum að meðaltali hlýtur nafnbótina Punktameistari skákmanna í golfi 2015.

Dagskráin

09:00 : Mæting í Stúkunni við Kópavogsvöll .

09:30 - 12:00: 9 umferða hraðskákmót

12:00 - 13:00: Matur í golfskála GKG og/eða golfæfingar, mæting tímanlega á teig.

13:00 - 13:50: Rástímar á Leirdalsvelli

17:30 - 18:20: Golfleik líkur

18:30 - 18:45: Verðlaunaafhending

Þeir sem komast áfram í niðurskurðinum í Bylgjan Open halda áfram að spila golf á sunnudeginum.

Mótsgjaldið

Allir borga 5900kr mótsgjald í Bylgjan Open í golfskálanum.

Svo er það 2000kr sem fer í verðlaunapottinn og greiðist inn á 0345-26-1182 kt:0403665989 eða ahendist í byrjun móts.

Verðlaun

verðlaun í hvorum flokki og unglingaflokki: 25% af verðlaunapottinum
Ef keppandi vinnur til verðlauna án forgjafar þá fær hann ekki verðlaun í forgjafarflokknum!

Fæst pútt á hringnum (miðað er við pútt slegin inni á flötinni. Ekki þeir sem hljóta önnur verðlaun!) :12,5% af verðlaunapottinum

Mesta bæting (fyrir þá sem eru nú þegar með skráðan árangur. Ekki þeir sem hljóta önnur verðlaun!) :12,5% af verðlaunapottinum 

Aðalverðlaunin eru samt heiðurinn af árangrinum og skemmtilegur dagur á einum glæsilegasta golfvelli landsins í góðum félagsskap !

Ýmsar upplýsingar

Þátttökurétt eiga allir skákmenn sem spila golf og hafa íslensk skákstig eða eru í íslensku taflfélagi.

Bylgjan Open, upplýsingar á golf.is: http://www.golf.is/pages/motaskra/upplysingarummot/?idegaweb_event_classname=4110bc28-8ff7-4d67-8a03-6ea1ba209958&tournament_id=20778

Skákmótið

9 umferðir eftir svissneska kerfinu. Tímamörk 4 mínútur og svo 2 sek viðbótartími fyrir hvern leik.

24 þjóðir skráðar til leiks á EM landsliða

Skráningum á EM landsliða sem fram fer 12.-22. nóvember fjölgar jafnt og þétt. Nú eru 24 þjóðir skráðar til leiks í opnum flokki og litlu færri í kvennaflokki. Gera má ráð fyrir að þátttkan nú verði nálægt því sem hún var í Varsjá fyrir tveimur árum síðan en þá tefldu 38 lið í opnum flokki og 28 lið í kvennaflokki. 

Lista yfir skráðar þjóðir má finna á heimasíðu mótsins. Það er þegar staðfest að meðal teflenda á mótinu eru auk heimsmeistarans Magnusar Carlsen þeir Levon Aronian, Anish Giri, Mickey Adams, Baadur Jobava. 

Rússar og Úkraníumenn hafa ekki enn skráð til leiks en munu án efa gera það á næstu dögum eða vikum. Heimilidir ritstjóra herma að Vladimir Kramnik muni fara fyrir liði Rússa en heimsmeistarinn fyrrverandi hefur aldrei teflt hérlendis. 

 

 

 

Héðinn endaði í 10.-15. sæti í New York

Stórmeistarinn Héðinn Steingrímsson (2562) tók þátt í alþjóðlegu móti í New York (8th New York International) dagana 15.-19. júlí sl. Héðinn hlaut 5½ vinning í 9 skákum og endaði í 10.-15. sæti af 70 keppendum. Gata Kamsky (2572) sigraði á mótinu. Átta stórmeistarar tóku þátt. 

Takmarkaðar upplýsingar er að finna á heimasíðu mótsins og virðast t.a.m. skákir mótsins vera óaðgengilegar.

Heimasíða mótsins

 

Nilli Grand skákmeistari Svíþjóðar

Nils Grandelius (2623) varð skákmeistari Svíþjóðar en mótinu lauk í gær í Sunne í Svíþjóð. Grandelius og Emanuel Berg (2553) komu jafnir í mark með 6½ vinning í 9 umferðum eftir að Berg vann þá í innbyrðisskák í lokaumferðinni. Tefldu þeir til úrslita með styttri umhugsunartíma og þar hafði Grandelius betur 1½-½.

Mótið var vel skipað en 9 af 10 keppendum efsta flokksins hampa stórmeistaratitli.

Röð efstu manna:

1. Nils Grandelius (2623) 6½ v.
2. Emanuel Berg (2553) 6½ v.
3. Erik Blomqvist (2487) 5½ v.
4. Axel Smith (2449) 4½ v.
5. Jonny Hector (2485) 4½ v.
6. Pia Cramling (2512) 4½ v.

Íslendingurinn og alþjóðlegi skákdómarinn, G. Sverrir Þór, sem búsettur er í Svíþjóð var annar aðaldómara mótsins.

Heimasíða mótsins

 

 

 

Frábær frammistaða Páls í Skotlandi - endaði með jafntefli við stórmeistara

Páll Agnar Þórarinsson (2208) stóð sig frábærlega á opna skoska meistaramótinu sem lauk í Edinborg í gær. Í níundu og síðustu umferð slapp hollenski stórmeistarinn Erik Van den Doel (2564) naumlega með jafntefli gegn Páli.

Páll hlaut 7 vinninga og varð í 2.-5. sæti. Frammistaða hans samsvaraði 2394 skákstigum og hækkar hann um 41 skákstig fyrir hana!

Árangurinn er sérstaklega athyglisverður fyrir þá sök að Páll, sem er búsettur á Bretlandseyjum, hefur ekki mikið teflt síðustu misseri. 

Heimasíða mótsins

Guðmundur endaði með sigri í Sankti Pétursborg

Alþjóðlegi meistarinn Guðmundur Kjartansson (2452) vann rússneska alþjóðlega meistarann Maksim Chigaev (2527) í níundu og síðustu umferð Academia-mótsins í Santi Pétursborg. Guðmundur hlaut 4 vinninga og endaði í 7.-8. sæti.

• Heimasíða mótsins
• Chess-Results