Háteigsskóli, Rimaskóli og Ölduselsskóli Reykjavíkurmeistarar grunnskóla

Reykjavíkurmót grunnskólasveita fór fram mánudagana 12. febrúar og 19. febrúar í húsnæði Taflfélags Reykjavíkur sem heldur mótið í samstarfi við Skóla- og frístundasvið Reykjavíkurborgar. Mótið var nú með nýju fyrirkomulagi þar sem skipt var í þrjá flokka; 1.-3. bekk, 4.-7. bekk og 8.-10. bekk. Sigurvegarar í flokki 1.-3. bekkja var Háteigsskóli, í flokki 4.-7. bekkja sigraði Rimaskóli og í flokki 8.-10. bekkja hreppti Ölduselsskóli gullið.

Það var fríður flokkur barna sem reið á vaðið í yngsta aldurhópnum fyrri keppnisdaginn en alls mættu 15 sveitir til leiks. Flestar voru sveitirnar frá Ingunnarskóla eða fimm talsins en Landakotsskóli mætti með fjórar sveitir. Keppnin var jöfn og spennandi en Háteigsskóli náði snemma forystunni og hélt henni allt mótið þó svo að sveit Rimaskóla hafi aldrei verið langt undan. Töluverð spenna var síðan um þriðja sætið og réðust úrslit ekki fyrr en á lokametrunum.

Að loknum umferðunum sjö höfðu liðsmenn Háteigsskóla halað inn flestum vinningunum eða 22 alls, þremur meira en sveit Rimaskóla sem hlaut annað sætið með 19 vinninga. Þriðja sætið féll svo í skaut Árbæjarskóla sem nældi í 17 vinninga. Aðeins munaði 1 vinningi á þriðja sætinu og áttunda sætinu. Efst stúlknasveita var sveit Rimaskóla sem lauk keppni í 5. sæti með 16,5 vinning.

Viku síðar var svo komið að næstu tveimur aldursflokkum og hóf sá fyrri leikinn nánast á slaginu 16.30 eins og auglýst hafði verið. Munaði þar miklu um stundvíslega mætingu liðsstjóra og keppenda. Að þessu sinni voru 16 sveitir mættar til leiks og því ljóst að skottu gömlu yrði sparkað úr mótinu sem er alltaf ánægjulegt. Tvær stúlknasveitir voru skráðar en Rimaskóli sendi flestar sveitirnar til leiks, eða fimm, þar af eina stúlknasveit.

Rimaskóli hafði allnokkra yfirburði í mótinu enda firnasterk sveit þar á ferð með hinn reynslumikla Joshua Davíðsson á efsta borði. Fór svo að Rimaskóli varð langefstur með 25 vinninga af 28. Baráttan um næstu sæti var harðari en þegar yfir lauk kom sveit Háteigsskóla önnur í mark með 19,5 vinning, hálfum vinningi meira en B-sveit Rimaskóla sem varð þriðja með 19 vinninga. Efsta stúlknasveitin kom einnig úr Rimaskóla en hún hlaut 13 vinninga og hafnaði í 10. sæti. Sérstaklega góð frammistaða hjá Rimaskóla í þessum aldursflokki.

Eins og áætlað var lauk mótinu kl. 19 og eftir verðlaunaafhendingu hófst strax á eftir keppni í elsta aldursflokknum þar sem fimm sveitir mættu til leiks, þar af ein stúlknasveit sem kom úr hinum mikla skákskóla, Rimaskóla. Ákveðið var að tefla fimm umferðir allir við alla þar sem ein sveit sat yfir í hverri umferð. Fljótlega kom í ljós að sveit Ölduselsskóla hafði nokkra yfirburði og að sveit Laugalækjarskóla væri líklegust til að veita henni keppni. 3-1 sigur reynslumikilla liðsmanna Ölduselsskóla á Laugalækjarskóla strax í annarri umferð lagði línurnar fyrir framhaldið og svo fór að hinir fyrrnefndu stóðu uppi sem sigurvegarar með 14 vinninga af 16 en þeir síðarnefndu höfnuðu í öðru sæti með 11 vinninga. Breiðholtsskóli nældi svo í þriðja sætið með 5,5 vinning og sem eina stúlknasveitin í mótinu hlaut sveit Rimaskóla stúlknaverðlaunin.

Vel heppnuðu Reykjavíkurmóti grunnskólasveita er því lokið þetta árið og ljóst má vera að allar líkur eru á því að sama fyrirkomulag verði haft að ári. Við óskum sigurvegurunum til hamingju og hlökkum til mótsins 2019!

• Hér má sjá úrslit úr öllum þremur mótunum
• Meistarar fyrri ára

Hraðskákmót Reykjavíkur fer fram i kvöld

Hraðskákmót Reykjavíkur, sem fresta þurfti síðastliðinn sunnudag vegna veðurs, verður haldið í húsnæði Taflfélags Reykjavíkur að Faxafeni 12 miðvikudaginn 21.febrúar og hefst taflið kl.19:30.

Tefldar verða 9 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.19:20. Skákstjórar verða Ríkharður Sveinsson og Ólafur Ásgrímsson.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

Undanrásir Víkingaklúbbsins fyrir Barna Blitz fara fram í dag

Undankeppni fyrir Reykjavík Barna Blitz verður miðvikudaginn 21. febrúar kl. 17.15 í Víkingsheimilinu. Tefldar verða sex umferðir með sjö mínútna umhugsunartíma. Þrír efstu komast í úrslitin sem verða tefld verða samhliða Reykjarvíkurskákmótinu í Hörpu, sem fram fer 6.-14 mars.  Það mót verðu nánar auglýst síðar.

 

Til mikils er að vinna því einungis átta keppendur fá þátttökurétt á sjáfri úrslitakeppninni, þar af eru tveir frá móti Víkingaklúbbsins. Hin félögin í Reykjavík sem halda undanrásir eru  Skákdeild Fjölnis, Skákfélagið Huginn og Taflfélag Reykjavíkur.

Friðrikskóngurinn 2018: Örn Leó stoltur siguvegari

Úrslitin í hinni árlegu mótaröð og kapptefli um Taflkóng Friðriks Ólafssonar réðust í 4.  mótinu og lokaumferðinni í gærkvöldi vestur í KR.

Þegar upp var staðið eftir langa, tvísýna og harða  baráttu voru þeir Örn Leó Jóhannsson og Gunnar Freyr Rúnarsson efstir og jafnir miðað við þrjú bestu mót þeirra - hlutu báðir 28 GrandPrix stig.

Því réðu vinningar úrslitum. Örn Leó hlaut alls 22.5 v. í mótunum þremur sem töldu en Gunnar Freyr 21.5 v, sem þýddi að sá fyrrnefndi fær nafn sitt skráð gullnu letri á Friðrikskónginn fyrir árið 2018. Hann vann einnig innbyrðis viðureign þeirra sem gerði gæfumuninn. Rétt áður en yfir lauk stóð Örn reyndar afar tæpt í skák sinni gegn Halldóri Pálssyni, en náði að snúa vörn í sókn og stóð svo uppi sem stoltur sigurvegari.

Nöfn fyrrv. sigurvegara mótaraðarinnar, þeirra Gunnars Skarphéðinssonar 2012;  Gunnars I. Birgissonar 2013;  Gunnars Kr. Gunnarssonar 2014;  Gunnars Freys Rúnarssonar 2015;  Ólafs B. Þórssonar 2016;  Björgvins Víglundssonar 2017,  og nú Arnars Leós Jóhannssonar 2018 prýða hinn sögufræga grip.  

Íslandsmót barnaskólasveita, 1.-3. bekkur, fer fram á laugardaginn

Íslandsmót barnaskólasveita 1.-3. bekk 2018 fer fram í Rimaskóla, laugardaginn 24. febrúar nk.  

Tefldar verða sjö umferðir eftir svissneska kerfinu. Umhugsunartími 8+2 á hvern keppenda. Mótið hefst kl. 11 og áætlað er að því ljúki með verðlaunaafhendingu um kl. 14. Stutt hlé verður tekið um 12:30 til að keppendur geti fengið sér næringu.  

Hver skóli getur sent fleiri en eina sveit - en hver sveit er skipuð fjórum nemendum 1.-3. bekkjar (auk allt að fjögurra varamanna). 

Þátttökugjöld kr. 7.500.- á sveit. Þó ekki hærri en kr. 15.000.- fyrir hvern skóla. 

Veitt verða verðlaun fyrir efstu þrjár sveitirnar og einnig efstu b-e sveitir. Einnig borðaverðlaun fyrir bestan árangur á 1.-4. borði. 

Núverandi Íslandsmeistari barnaskólasveita (1.-3. bekkur) er Vatnsendaskóli. Nánar um mótið í fyrra hér.

Skráning fer fram á Skák.is (guli kassinn efst). Skráningu lýkur á hádegi (12:00), föstudaginn 23. febrúar.

Upplýsingar um þegar skráðar sveitir má finna hér.

Hraðskákmót Reykjavíkur fer fram á morgun

Hraðskákmót Reykjavíkur, sem fresta þurfti síðastliðinn sunnudag vegna veðurs, verður haldið í húsnæði Taflfélags Reykjavíkur að Faxafeni 12 miðvikudaginn 21.febrúar og hefst taflið kl.19:30.

Tefldar verða 9 umferðir með tímamörkunum 4+2 (4 mínútur auk 2 sekúndna viðbótartíma eftir hvern leik). Mótið verður reiknað til hraðskákstiga og er opið öllum.

Þátttökugjald er 1.000kr. Frítt er í mótið fyrir félagsmenn TR sem eru 17 ára eða yngri. Skráning fer fram á skákstað og lýkur henni kl.19:20. Skákstjórar verða Ríkharður Sveinsson og Ólafur Ásgrímsson.

Eftir Hraðskákmótið fer fram verðlaunaafhending fyrir Skákþing Reykjavíkur.

Veitt verða verðlaun fyrir þrjú efstu sætin auk þess sem krýndur verður Hraðskákmeistari Reykjavíkur. Verði keppendur jafnir að vinningum verður skorið úr um sætaröð með stigaútreikningi (tie-break). Röð stigaútreiknings: 1.Innbyrðis úrslit 2.Bucholz (-1) 3.Bucholz (median) 4.Sonneborn-Berger.

Ríkjandi hraðskákmeistari Reykjavíkur er Dagur Ragnarsson. Sigurvegari mótsins í fyrra varð hins vegar Vestfjarðarvíkingurinn Guðmundur Gíslason sem vann það þrekvirki að vinna með fullu húsi! Undanfarin 11 ár hafa sex skákmeistarar borið titilinn Hraðskákmeistari Reykjavíkur, þar af einn stórmeistari og fjórir FIDE-meistarar:

2017: Dagur Ragnarsson 2016: Róbert Lagerman 2015: Dagur Ragnarsson 2014: Róbert Lagerman 2013: Oliver Aron Jóhannesson 2012: Davíð Kjartansson 2011: Hjörvar Steinn Grétarsson 2010: Torfi Leósson 2009: Hjörvar Steinn Grétarsson 2008: Davíð Kjartansson 2007: Davíð Kjartansson.

Undanrásir fyrir Reykjavik Open Barna-Blitz

Undanrásir fyrir Reykjavik Open Barna-Blitz fara senn að hefjast. Úrslitin fara fram í Hörpu sunnudaginn 11. mars. Þar munu tefla í útsláttarkeppni þau átta sem komast áfram í undanrásum félaganna en tvö komast áfram úr hverri undanrás. Keppnin er ætluð börnum fæddum 2005 og síðar. Undanrásirnar fara fram hjá Huginn, Víkingaklúbbnum, Fjölni og Taflfélagi Reykjavíkur.

Fyrstu undanrásirnar eru hjá Víkingaklúbbnum miðvikudaginn 21. febrúar sjá nánar hér; http://vikingaklubburinn.blogspot.is/2018/02/undanrasir-fyrir-reykjavik-barna-blitz.html

Undanrásirnar hjá Huginn fara fram mánudaginn 26. febrúar klukkan 17:00 í Mjóddinni.

Undanrásir Fjölnis og TR verða auglýstar í sér frétt.

Frumvarp til laga um launasjóð skákmanna

Á Samráðsgáttinni má finna frumvarp til laga um launasjóða skákmanna. Drög að frumvarpinu fylgir með viðhengi.

Vakin er athygli á að opið er fyrir innsendingu umsagna til 23. febrúar nk. Umsagnir eru birtar jafnóðum og þær berast. 

Í texta um frumvarpið segir: 

Með þessu frumvarpi er gert ráð fyrir að gildandi lög um launasjóð stórmeistara, nr. 58/1990, verði lögð af og að nýtt fyrirkomulag um laun til afreksskákmanna verði tekið upp. Leitast er við að koma á fót sjóði sem styður stórmeistara og aðra skilgreinda afreksskákmenn í að ná hámarksárangri. Verði frumvarpið að lögum verður það kerfi sem núverandi lög kveða á um lagt niður, þ.á.m. störf stórmeistara, og þess í stað tekið upp nýtt kerfi sem gerir ráð fyrir að afreksskákmenn geti sótt um starfslaun og styrki og fari um þá líkt og um verktaka eða sjálfstætt starfandi einstaklinga. Þá verður breikkaður sá hópur sem getur sótt um frá því sem er í núgildandi lögum.

Sjá nánar hér.

Skrár tengdar þessari bloggfærslu:

• Frumvarp til laga um launasjóð skákmanna

Gunnar Erik sigraði á fjórða móti Bikarsyrpunnar

Blikapilturinn öflugi, Gunnar Erik Guðmundsson (1491), varð efstur keppenda á Bikarsyrpumóti helgarinnar en hann hlaut 6,5 vinning í skákunum sjö. Kristján Dagur Jónsson (1284) og Batel Goitom Haile (1421) komu jöfn í mark í 2.-3. sæti með 5,5 vinning en Kristján hlaut annað sætið eftir stigaútreikning. Batel hlaut að auki stúlknaverðlaun. Gestur Andri Brodman (0) og Adam Omarsson (1068) komu næstir með 5 vinninga en Gestur kom skemmtilega á óvart með góðri frammistöðu í sínu fyrsta Bikarsyrpumóti.

Sigur Gunnars var nokkuð öruggur en þetta var þriðja mótið í röð þar sem hann stendur uppi sem sigurvegari og ljóst er að ekki líður á löngu þar til hann fer yfir 1600 Elo-stig og kveður þar með Bikarsyrpuna eftir gott gengi í mótaröðinni.

Mótahald gekk afar vel og stóðu allir 29 keppendurnir sig með miklum sóma, hvort heldur sem er við skákborðin eða utan þeirra, og til marks um það má nefna að í langflestum tilfellum voru allir sestir við sín borð vel fyrir upphaf hverrar umferðar.

Undanfarin mót hafa falið í sér skemmtilega blöndu af börnum sem lengra eru komin í skáklistinni og þeim sem eru komin styttra á veg. Hugmyndin með Bikarsyrpu TR er einmitt ekki síst sú að börn, sem komin eru með fyrstu reynslu af skákkennslu- og þjálfun ásamt þátttöku í skólamótum og öðrum styttri mótum, fái að spreyta sig í kappskákmóti þar sem tímamörk eru lengri og skrifa þarf niður leikina í skákunum.

Hér má sjá öll úrslitin úr mótinu en fimmta og síðasta mót vetrarins fer fram helgina 6.-8. apríl. Við þökkum ykkur fyrir þátttökuna og hlökkum til að hitta ykkur aftur í apríl!

Lokastaðan á Chess-Results.

Nánar á heimasíðu TR.

Tómas Veigar sprúðlandi sigurvegari Skákþings Hugins (N) 2018

Skákþingi Hugins (N) lauk um helgina með sprúðlandi sigri Tómasar Veigars.

Mótið fór þannig fram að fyrst var teflt í tveimur riðlum, flippsturluðum austur og flippflennifínum vestur, og mættust riðlarnir svo í úrslitakeppni þar sem röð manna úr riðlakeppninni réði því um hvaða sæti þeir tefldu. Tómas Veigar var efstur í vesturriðli og Smári Sigurðsson í austurriðli og tefldu þeir því um meistaratitilinn.

Sigurður Daníelsson og Rúnar Ísleifsson tefldu um 3. sætið og lauk þeirri rimmu með sigri þess fyrrnefnda.

• Sprúðlandi úrslitakeppni hjá Chess-Results
• Flippflennifínn vesturriðill hjá Chess-Results
• Flippsturlaður austurriðill hjá Chess-Results