Úrslit á Páskaeggjamóti Víkingaklúbbsins

Páskaeggjamót Víkingaklúbbsins fór fram miðvikudaginn 23 mars, en 39 keppendur tóku þátt í þrem flokkum. Krakkar fæddir 2008 og yngri teldu í yngsta flokknum, en þeir sem fæddir voru 2006 og 2007 kepptu í sér flokki, en í elsta flokknum kepptu krakkar fæddir 2005 og eldri. Tefldar voru 6. umferðir með 5. mínútna umhugsunartíma.

Í yngsta flokknum sigraði Bjartur Þórisson, en þau leiðu mistök urðu að skákstjórar tóku ekki eftir því. Næstur kom Jökull Bjarki, Anna Katarína og Einar Dagur. Í flokki krakka sem fædd eru 2006 og 2007 sigraði Benedikt Þórisson, Adam Omarsson varð annar og Batel varð þriðja.  Í elsta flokki sigraði Stephan Briem, Daníel varð annar og Arnór þriðji.   Efst stúlkna varð Batel.  Anna Katarína varð önnur og Iðunn þriðja.  Efstur Víkinga varð Jón Hreiðar, Guðmann Brimarvarð annar og Jökull þriðji. Nánari úrslit sjá töflu.

Skákstjórar á mótinu voru Stefán Bergsson, Gunnar Fr. Rúnarsson og Sigurður Ingason.  Allir krakkarnir fengu svo páskaegg að lokum, en Nói-Sírus styrkti mótið af miklum myndarskap.

Vignir Vatnar sigraði á hraðkvöldi Hugins

Eftir að hafa sigraði á Páskaeggjamóti Hugins skellti Vignir Vatnar Stefánsson sér á hraðkvöld Hugins. Þar fór allt á sömu leið. Sigurinn féll honum í skaut með 6,5v af 7 mögulegum. Í þetta sinn var það Vigfús Ó. Vigfússon sem náði jafntefli gegn Vigni Vatnari eða var það kannski öfugt. Annar var Andri Grétarsson með 6v og Vigfús var þriðji með 5,5v. Vignir Vatnar dró í happdrættinu og sýndi það að hann kann líka að draga því hann hann dró skákstjórann eins og ekkert væri sjálfsagðara. Vignir Vatnar valdi pizzu frá Dominos en Vigfús tók miða frá Saffran. Vigfús sá um skákstjórn en eins og oft áður naut hann aðstoðar Harðar Jónassonar við færslu úrslita.

Næsta skákkvöld verður svo hraðkvöldi mánudaginn 25. apríl nk.

Lokastaðan á hraðkvöldinu:

1. Vignir Vatnar Stefánsson, 6,5v/7
2. Andri Grétarsson, 6v
3. Vigfús Ó. Vigfússon, 5,5v
4. Hjálmar Sigurvaldason, 4v
5. Sigurður Freyr Jónatansson, 3v
6. Hörður Jónasson, 2v
7. Björgvin Kristbergsson, 1v

Vignir Vatnar sigraði á páskaeggjamóti Hugins

Páskaeggjamót Hugins í Mjódd fór fram síðastliðinn mánudag 21. mars. Það var 41 keppandi sem mætti nú til leiks, tefldu 7 umferðir með 7 mínútna umhugsunartíma og var glatt á hjalla allan tímann, þótt nokkurn tíma tæki að hefja mótið vegan tæknilegra vandamála. Úrslitin voru afgerandi í þetta sinn en Vignir Vatnar Stefánsson sigraði örugglega á móinu með 6,5v. Vignir Vatnar er ekki alveg ókunnugur efst sætinu á páskaeggjamótinu en hann vann einnig mótin 2012 og 2013. Alexander Oliver Mai sýndi að árangurinn á Reykjavíkurskákmótinu var engin tilviljun og sá til þess að Vignir Vatnar gekk ekki frá borði með fullt húsi. Alexander bætti svo um betur og tók 2. sætið með 5,5v eins og Aron Þór Maí en stigin hjá Alexander voru hærri.

Veitt voru verðlaun í þremur flokkum. Tveimur aldursflokkum þar sem Vignir Vatnar, Alexander Oliver og  Aron Þór.voru efstir í eldri flokki. Yngri flokki þar sem Ísak Orri Karlsson, Stefán Orri Davíðsson og Óskar Víkingur Davíðsson voru allir með 5v og hlutu þeir sæti í þessari röð eftir stigaútreikning.

Stúlknaverðlaun fengu Ylfa Ýr Welding Hákonardóttir, Eydís Magnea Friðriksdótir og Elín Edda Jóhannsdótttir. Næstu stelpur komu stutt á eftir þeim.

Auk þess fékk efsti keppandi í hverjum aldursflokki páskaegg í verðlaun. Ef sá efsti hafði unnið páskaegg í aðalverðlaun fékk sá næsti í aldursflokknum páskaeggið.

Í lokin voru tvö páskaegg dregin út og duttu þar Elfar Þorsteinsson og Vilhjálmur Bjarni Gíslason í lukkupottinn. Þau sem ekki hlutu verðlaun á mótinu voru svo leyst út með litlu gulleggi þannig að allir fóru ánægðir heim. Mótsstjórar voru Erla Hlín Hjálmarsdóttir og Vigfús Ó. Vigfússon.

Eftirtaldir hlutu verðlaun á páskaeggjamótinu:

Eldri flokkur:

1. Vignir Vatnar Stefánsson , 6,5v
2. Alexander Oliver Mai, 5,5v
3. Aron Þór Mai, 5,5v

Yngri flokkur:

1. Ísak Orri Karlsson, 5v
2. Stefán Orri Davíðsson, 5v
3. Óskar Víkingur Davíðsson, 5v

Stúlkur:

1. Ylfa Ýr Welding Hákonardótttir, 4v
2. Eydís Magnea Friðriksdótttir, 4v
3. Elín Edda Jóhannsdóttir, 3v

Árgangaverðlaun:

• Árgangur 2011:  Jósef Omarsson
• Árgangur 2009:  Bjartur Þórisson
• Árgangur 2008:  Anna Katarina Thoroddsen
• Árgangur 2007:  Gunnar Erik Guðmundsson
• Árgangur 2006:  Benedikt Briem (Stefán Orri Davíðsson)
• Árgangur 2005:  Örn Alexandersson (Ísak Orri Karlsson)
• Árgangur 2003:  Stephan Briem (Vignir Vatnar Stefánsson)
• Árgangur 2002:  Jökull Freyr Davíðsson
• Árgangur 2001:  Jón Þór Lemery (Aron Þór Maí)
• Árgangur 2000:  Dawid Kolka

Myndskreytta frásögn má finna á heimasíðu Hugins.

Caruana og Karjakin efstir á áskorendamótinu

Tvö stórmót eru í gangi þessa dagana. Annars vegar áskorendaflokkur Íslandsmótsins í skák í Stúkunni í Kópavogi þar sem keppt er um tvo sæti í landsliðsflokki sem fram fer í Seltjarnarnesi í maí-júní og hins vegar áskorendamótið í Moskvu þar sem keppt er um réttinn til að mæta Magnúsi í heimsmeistaraeinvígi í nóvember í New York.

Á meðan allt er óljóst í Kópavogi þá virðist mega að ganga að tvennu vísu í Moskvu. Annars vegar að Karjakin sé í skiptu fyrsta sæti eftir hverja umferð - en yfirleitt með nýjum forystusauði og hins vegar að Giri geri jafntefli. 

Caruana (2794) vann Anand (2762) í gær en öðrum skákum lauk með jafntefli. Þar með fór Caruana upp fyrir Anand og er efstur ásamt Karjakin (2760). Forystumennirnir hafa 6 vinninga eftir 10 umferðir. Anand (2762) er í 3.-4. sæti ásamt Aronian (2786) með 5,5 vinninga. Giri (2793) er fimmti með 5 vinninga en hann er hefur gert jafntefli í öllum sínum skákum og virðist jafnvel vera orðinn meiri jafnteflisvél en Peter Leko þegar hann var upp á sitt besta.

Ellefta umferð af fjórtán hefst nú kl. 12. Þá tefla Anand-Karjakin, Topalov-Caruana, Aronian-Svidler og Giri-Nakamura. 

Staðan:

 

• Heimasíða mótsins
• Chess 24 (beinar útsendingar)

Fimm efstir í áskorendaflokki

 

Það er fjörlega teflt í áskorendaflokki í Stúkunni og hart barist um sætin tvö í landsliðsflokki sem í boði eru. Í annarri umferð sem fram fór í gær unnu hinir stigalægri á tveimur efstu borðunum. Björgvin Víglundsson (2164) vann Dag Ragnarsson (2243) á því fyrsta og Jón Trausti Harðarson (2058) Vigni Vatnar Stefánsson (2228)á því öðru. 

Úrslit 2. umferðar má finna hér.

Jón Trausti, Björgvin eru efstir með tvo vinninga ásamt Þorvarði F. Ólafssyni (2195), Oliver Aroni Jóhannessyni (2177) og Jóhanni Ingvasyni (2171).

Það stefnir í hörkuumferð í dag. Björgvin teflir við Þorvarð og Jón Trausti við Jóhann. Á þriðja borði gæti stefnt í hörkuviðureign Davíðs Kjartanssonar (2348), sem mátti teljast ljónheppinn að vinna Halldór Pálsson (2004) í gær og Lenku Ptácníková (2192)

Umferð dagsins hefst kl. 14. Pörun umferðinnar má finna hér.

Áhorfendur eru velkomnir í Stúkuna. Þar eru mjög góðar aðstæðar fyrir skákáhugamenn. Meðal annars hefur Birnukaffi flutt sig tímabundið um set og hægt að kaupa ljúffengur vöfflur í Stúkunni.

Fyrir þá sem heima sitja verður hægt að fylgjast með skák Björgvins og Þorvarðs í beinni hér.

Skákþáttur Morgunblaðsins: Indverjinn Gupta með vinningsforskot fyrir lokaumferðina í dag

Indverski stórmeistarinn Abhiteet Gupta vann Svíann Nils Grandelius í 9. umferð Reykjavíkurskákmótsins í Hörpu í gær. Indverjinn náði þar með vinnings forskoti á næstu menn, hefur átta vinninga af níu mögulegum. Í 2.-6. sæti eru Búlgarinn Cheparinov, Aserinn Mamedyarov, Ítalinn Rambaldi, Rússinn Andreikin og Englendingurinn Gawain Jones, allir með sjö vinninga.

Guðmundur Kjartansson er efstur Íslendinga en hann vann ítalska stórmeistarann Dvirnyy í gær og er með 6½ vinning, jafn indversku skákdrottningunni Töniu Sadchev sem er taplaus þótt hún hafi teflt við marga stigahæstu skákmenn mótsins. Hefur frammistaða hennar vakið mikla athygli.

Hvað varðar aðra íslensku þátttakendurna hafa margir af ungu skákmönnunum staðið sig vel og ef mið er tekið af stigahækkunum eingöngu slá þeir Alec Elías Sigurðarson og Alexander Thor Mai öllum við með meira en 100 elo-stiga hækkun.

Stigahæstu íslensku skákmennirnir, þeir Hannes Hlífar Stefánssonar og Hjörvar Steinn Grétarsson, hafa ekkert sýnt að þessu sinni en á hinn bóginn hafa Guðmundur Kjartansson og Björn Þorfinnsson teflt frísklega. Það var að vísu súrt í broti fyrir Björn að tapa fyrir Aryan Tari í 9. umferð í gær en þar lét Björn drottninguna af hendi fyrir meira en lítið óljósar bætur. Hann á eina glæsilegustu leikfléttu mótsins er hann mætti Norðmanninum Kvamme í 7. umferð:

Reykjavíkurskákmótið 2016:

Björn Þorfinnsson – John A. Kvamme

Trompowsky-byrjun

1. Rf3 g6 2. d4 Rf6 3. Bg5 Bg7 4. e3 c5 5. c3 b6 6. Rbd2 Bb7 7. Bd3 d6 8. Dc2 0-9. h4 cxd4 10. exd4 Rc6 11. h5 Hc8

11.... Rxh5 kom til greina en bauð heim skiptamunarfórn á h5.

12. hxg6 hxg6 13. Bc4 Ra5 14. Be2 Dd7 15. Hh4 b5 16. b4 Rc4 17. Bxc4 bxc4 18. 0-0-0 Bc6? 19. Hdh1 Ba4?

Missir tök á e4-reitnum. Langbest var að hefja gagnsókn með 19.... a5.

20. Bxf6! Bxf6

Vitaskuld ekki 20.... Bxc2 21. Hh8+ og mátar.

21. De4 d5

22. Hh8+!

Þrumuleikur sem Norðmaðurinn hafði ekki tekið með í reikninginn.

22.... Bxh8 23. Dh4 Kg7 24. g4!

Slær tvær flugur í einu höggi, hótar 25. g5 og tekur f5-reitinn af drottningunni.

24.... Hg8 25. Re5! De8 26. Rdf3! Kf8 27. Rg5

Svartur fær ekkert við riddarana ráðið.

27.... Db5 28. Dh7 Bg7 29. Rxg6+! Ke8 30. Dxg8+ Kd7 31. Dxg7 fxg6 32. He1 He8 33. Re6 Kc8 34. Rc5 Db8 35. He5 Bc6 36. Dxg6

– og svartur gafst upp. 

Armeninn slapp naumlega

Annar íslenskur skákmaður sem hefur átt gott mót er Stefán Kristjánsson. Hann tefldi langa og erfiða skák við Armenann Hrant Melkumnjan í 7. umferð og eftir þunga stöðubaráttu í miðtaflinu náði hann upp vinningsstöðu. Tímamörkin reyndust honum erfið; þó að 30 sekúndur bætist sjálfkrafa við tímann eftir hvern leik getur mikil uppsöfnuð spenna leitt af sér rangar ákvarðanir. 

Sjá stöðumynd

Stefán – Melkumjan

65. Ke4??

Frípeðunum á að ýta! Eftir 65. g6 vinnur hvítur, t.d. 65.... Hh3+ 66. Kg4 Hh1 67. f5 a1(D) 68. Hxa1 Hxa1 69. f6 og hvítur kemur sér upp drottningu.

65.... Hh1 66. g6 a1(D) 67. Hxa1 Hxa1 68. f5 Hg1 69. Ke5 Kc4 70. Kf6

Ekki dugar 70. f6 vegna 70.... Hg5+! með jafnteflisstöðu.

70.... Kd5 71. Kg7 Ke5 72. f6 Kf5 73. f7 Hxg6+ 74. Kh7 Hf6 75. Kg7 Hxf7+ 76. Kxf7

Jafntefli.

Síðasta umferð mótsins hefst kl. 11 í dag.

Grein þessi birtist í Morgunblaðinu 16. mars

Skákþættir Morgunblaðsins

Áskorendaflokkur Íslandsmótsins í skák hófst í gær

Áskorendaflokkur Íslandsmótsins í skák hófst í gær í Stúkunni við Kópavogsvöll. Flokkurinn er vel skipaður en 12 skákmenn hafa meira en 2000 skákstig. Án efa verður hart barist um sætin tvo í landsliðsflokki sem í boði eru.

Ekkert varð um óvænt úrslit þar sem allir hinir stigahægri unnu hina stigalægri. Sumir þurftu þó að hafa mjög mikið fyrir hlutunum og má þar nefna Jón Trausta Harðarson (2058) sem var ljónheppinn að vinna Alec Sigurarðarson (1365). 

Úrslit fyrstu umferðar má finna hér.

Önnur umferð fer fram og hefst kl. 18. Þá mætast meðal annars: 

• Dagur Ragnarsson (2243) - Björgvin Víglundsson (2164)
• Jón Hrausti Harðarson (2058) - Vignir Vatnar Stefánsson (2228)
• Þorvarður F. Ólafsson (2195) - Stefán Arnalds (2007)

Röðun 2. umferðar má finna hér.

Áhorfendur eru velkomnir í Stúkuna. Þar eru mjög góðar aðstæðar fyrir skákáhugamenn. Meðal annars hefur Birnukaffi flutt sig tímabundið um set og hægt að kaupa ljúffengur vöfflur í Stúkunni

Páskaeggjamót Víkingaklúbbsins fer fram í dag

Páskaeggjamót Víkingaklúbbsins fyrir börn og unglinga verður haldið í Víkinni Víkingsheimilinu miðvikudaginn 23. mars. Tefldar verða 6. umferðir með 7 mínútna umhugsunartíma á mann og hefst mótið kl. 17.15. Allir krakkar eru velkomnir og þátttaka er ókeypis. Keppt verður þrem flokkum: Flokki fæddra 2000-2005, flokki fæddra 2006-7 og flokki fæddra 2008 og yngri (flokkaskipting er í vinnslu).

Allir fá páskaegg fyrir framistöðu sína og  þátttaka í mótinu er ókeypis.  Barna og unglingaæfingar Víkingaklúbbsins verða vikulega á miðvikudögum fram á sumar.

ATH:  Nauðsynlegt er að skrá sig (nafn og fæðingarár) til að tryggja þátttöku.

Skráning á mótið fer fram á Skák.is (guli kassinn efst)

Heimilisfang hér:

Knattspyrnufélagið Víkingur
Traðarlandi 1, 108 Reykjavík

Salaskóli Íslandsmeistari barnaskólasveita í 1.-3. bekk

22 sveitir mættu til keppni á Íslandsmóti barnaskólasveita 1.-3.bekk sem haldið var í fyrsta skipti í ár. Áður hafði einungis verið keppt í flokki 7.bekkinga og yngri, en þá áttu þeir sem voru í yngstu bekkjunum við ofurefli að etja.

Aðalhvatamaðurinn að þessu nýja og velheppnaða fyrirkomulagi var Lenka Ptachnikova skákkennari Álfhólsskóla.

Mótið var haldið í Stúkunni við Kópavogsvöll og teflt á tveim hæðum. Á efri hæðinni tefldu A liðin og á jarðhæðinni tefldu B-E liðin. Skákdeild Breiðabliks sá um mótshaldið. 

Stúlknalið frá Grunnskólanum í Grindavík byrjaði mjög vel og var í efsta sætinu eftir fyrri hlutann með 10 vinninga af 12 mögulegum. Í næstu umferðum fóru sterkustu sveitirnar að mætast og jafnaðist þá leikurinn til muna. Segja má að minnsta kosti fimm sveitir hafi átt góðan möguleika á titlinum þegar tvær umferðir voru eftir. Salaskóli nýtti sínar lokaviðureignir best og stóð að lokum uppi sem verðskuldaður sigurvegari.

Sveitin var skipuð þeim Gunnari Erik Guðmundssyni, Brynjari Emil Kristjánssyni, Kjartani Sigurjónssyni og Daða Fannari Hlífarssyni. 

Röð efstu sveita

• 1. Salaskóli  18 vinninga
• 2. Hörðuvallaskóli 16 vinninga
• 3.-4. Álfhólsskóli og Grunnskóli Grindavíkur 15 vinninga

Borðaverðlaun a-sveita

• Bestur árangur á 1.borði: Adam Omarsson Háteigsskóli 6 af 6
• Bestur árangur á 2.borði: Brynjar Emil Kristjánsson Salaskóla og Fannar Smári Jóhannsson Hörðuvallaskóla 5 af 6
• Bestur árangur á 3.borði: Kjartan Sigurjónsson Salaskóla 5 af 6
• Bestur árangur á 4.borði: Bjarki Steinn Guðlaugsson Hörðuvallaskóla 6 af 6

Bestu b-e liðin 

• Besta B-liðið: Salaskóli
• Besta C-liðið: Salaskóli
• Besta D-liðið: Salaskóli
• Besta E-liðið: Álfhólsskóli

Borðaverðlaun b-e liða 

• Bestur árangur á 1.borði B-E liða: Katrín María Jónsdóttir Salaskóla C-sveit 6 af 6
• Bestur árangur á 2.borði B-E liða: Gunnar Þór Guðmundsson Salaskóla B-sveit 5 af 6
• Bestur árangur á 3.borði B-E liða: Magnús Ingi Gunnarsson Salaskóla B-sveit og Vuk Alexander Dorovic Álfhólsskóla B-sveit 5 af 6
• Bestur árangur á 4.borði B-E liða: Ólafur Fannar Pétursson Salaskóla B-sveit 6 af 6

 

Til margra ára hefur mikið skáklíf verið í Salaskóla og ánægjulegt hve mikil breidd skákkrakka kemur þaðan. Heiðurinn af þessu mikla árangri á Tómas Rasmus. Það er nefnilega töff að tefla í Salaskóla !

Mótinu lauk með pizzuveislu og skólastjóri Skákskólans og stórmeistarinn Helgi Ólafsson kom og afhenti verðlaun. Það var vel við hæfi því hann hefur tekið við efnilegustu skólanemendunum í Kópavogi undanfarin ár og byggt þá upp í að verða gríðarlega sterka skákmenn. Þetta hefur gerst undir hatti Skákakademíu Kópavogs í stúkunni við Kópavogsvöll. 

Skákstjórar voru Halldór Grétar Einarsson og Stefán Bergsson

Nánari úrslit A lið: http://chess-results.com/tnr212993.aspx?lan=1&art=0&rd=6&wi=821

Nánari úrslit B-D lið: http://www.chess-results.com/tnr213381.aspx?lan=1&art=0&turdet=YES&wi=821

Skákmót öðlinga hefst 30. mars

Skákmót öðlinga 40 ára og eldri hefst miðvikudaginn 30. mars kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina + 30 sekúndna viðbótartími á hvern leik.
Skákmót öðlinga verður nú haldið í 25. sinn. Núverandi Skákmeistari öðlinga er Einar Valdimarsson.

Dagskrá:
1. umferð miðvikudag 30. mars kl. 19.30
2. umferð miðvikudag 6. apríl kl. 19.30
3. umferð miðvikudag 13. apríl kl. 19.30
4. umferð miðvikudag 20. apríl kl. 19.30
5. umferð miðvikudag 27. apríl kl. 19.30
6. umferð miðvikudag 4. maí kl. 19.30
7. umferð miðvikudag 11. maí kl. 19.30

Mótinu lýkur miðvikudaginn 18. maí kl. 19:30 með hraðskákmóti og verðlaunaafhendingu. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Þátttökugjald er kr. 5.000 fyrir aðalmótið og kr. 500 fyrir hraðskákmótið. Innifalið er frítt kaffi allt mótið ásamt rjómavöfflum og öðru góðgæti á lokakvöldi.

Skráningarform

Skráðir keppendur