Skákæfingar TR hefjast á laugardaginn

Skákæfingar Taflfélags Reykjavíkur hefjast á ný laugardaginn 3.september. Æfingarnar eru fjölbreyttar sem fyrr og hannaðar til þess að mæta þörfum sem flestra áhugasamra skákbarna. Á æfingum félagsins munu börnin fá markvissa kennslu og persónulega leiðsögn sem mun nýtast þeim sem grunnur að framförum í skáklistinni.

Æfingagjöldum fyrir haustmisseri hefur verið stillt í hóf og eru þau 8.000kr fyrir þá æfingahópa sem eru einu sinni í viku. Fyrir þá sem æfa tvisvar í viku eru æfingagjöldin 14.000kr fyrir haustmisserið. Veittur verður systkinaafsláttur í formi 50% afsláttar. Öllum er frjálst að koma í prufutíma án endurgjalds.

Börn geta sem fyrr tekið þátt í Laugardagsæfingunni (kl.14-16) án endurgjalds. Laugardagsæfingarnar, sem hafa verið flaggskip TR um áratugaskeið, verða með örlítið breyttu sniði frá því sem verið hefur, því til stendur að tefla eingöngu á æfingunni. 

Taflfélag Reykjavíkur býður upp á sex mismunandi skákæfingar veturinn 2016-2017: 

Byrjendaæfing I: Lau kl.10:40-11:00 (frítt)

Á þessari æfingu verður eingöngu manngangurinn kenndur. Þessi æfing er því kjörin fyrir þau börn af báðum kynjum sem vilja læra mannganginn frá grunni eða vilja læra tiltekna þætti manngangsins betur. Umsjón með æfingunum hefur Torfi Leósson. 

Byrjendaæfing II: Lau kl.11:15-12:15 (8.000kr)

Þessi æfing er hugsuð fyrir börn af báðum kynjum sem kunna allan mannganginn og eru þyrst í að læra meira og ná betri tökum á skáklistinni. Umsjón með æfingunum hefur Torfi Leósson.

Stúlknaæfing: Lau kl.12:30-13:45 (8.000kr)

Þessi æfing hefur fest sig í sessi sem ein fjölmennasta skákæfing TR. Fyrirkomulag æfingarinnar er óbreytt frá því sem verið hefur síðustu misseri og eru allar stúlkur á grunnskólaaldri velkomnar að slást í hópinn. Umsjón með æfingunum hefur Sigurlaug R. Friðþjófsdóttir. 

Laugardagsæfing: Lau kl.14:00-15:55 (frítt)

Laugardagsæfingarnar verða með eilítið breyttu sniði þetta starfsárið. Til stendur að tefla allan tímann og verður blásið til Stigakeppni sem verður með keimlíku sniði og stigakeppnin sem sló svo eftirminnilega í gegn á síðasta vormisseri. Æfingin er fyrir bæði stráka og stelpur og er án endurgjalds. Umsjón með æfingunum hefur Veronika Steinunn Magnúsdóttir.

Afreksæfing A: Lau kl.16:05-17:35 & Fim kl.16:00-17:30 (14.000kr)

Afreksæfing A verður með hefðbundnu sniði frá því sem verið hefur og er æfingin hugsuð fyrir sterkustu skákbörn og unglinga TR af báðum kynjum. Æft verður tvisvar í viku, á fimmtudögum og laugardögum. Umsjón með æfingunum hefur Daði Ómarsson. 

Afreksæfing B: Sun kl.10:45-12:15 (8.000kr)

Afreksæfing B er ný af nálinni og er henni ætlað að koma til móts við þau skákbörn TR, af báðum kynjum, sem hafa mikinn áhuga á að taka framförum í skáklistinni. Þessar æfingar eru hugsaðar fyrir þau sem vilja ná langt í skák en eru komin styttra á veg en þau sem eru í Afrekshópi A. Umsjón með æfingunum hefur Kjartan Maack.

 

Afmælismót TV fer fram 10. og 11. september

Helgina 10.-11. september 2016 fer fram atskákmót í Eyjum í tilefni af  90 ára  afmæli Taflfélags Vestmannaeyja.

Keppendur verða úr Eyjum og á fastalandinu. Reiknað er með flestir keppendur ofan af landi komi með Herjólfi laugardaginn 10. september. frá Landeyjahöfn kl. 09.45 og til Eyja um kl. 10.30.  Akstur frá Reykjavík til Landeyjahafnar tekur tæplega  2 klst. og þurfa farþegar og ökutæki að vera mætt 30 mín. fyrir brottför Herjólfs frá Landeyjahöfn.  Algengt er  að farþegar geymi ökutæki sín á bílastæðum í Landeyjahöfn meðan á dvöl þeirra í Eyjum stendur.

Næsta  ferð til Landeyjahafnar frá Eyjum að loknu skákmótinu  er kl. 18.30  sunnudaginn 11. sept og nú síðasta þann dag  kl. 21.00 um kvöldið. Mæting um borð  30 mín. fyrir brottför.

Tefldar verða níu umferðir, umhugsun 20 mín.  á  skák  auk 5 sek. á hvern leik.  Reiknað er með að umferðin taki um 60 mín. Skákstjóri verður  Stefán Bergsson.

Laugardagur 10. sept. 2016

Kl. 12.00 – 17.00  Tefldar verða fimm umferðir fyrri daginn.

Kl. 17.00 – 18.00   Skoðunarferð með rútu um Heimaey.

Sunnudagur 11. sept. 2016

Kl. 12.00 - 16.00   Tefldar verða fjórar umferðir seinni daginn.

Kl. 16.30 – 17.00   Mótsslit og verðlaunahending.

Ekkert þátttökugjald á  atskákmótið og í  skoðunarferðina.

Fyrstu verðlaun  verða 75 þús. kr., önnur verðlaun  kr. 50 þús. kr. og þriðju verðlaun  kr. 25 þús. kr. Landsbankinn er helsti stuðningsaðili mótsins.

Nánari upplýsingar um ferðir til  og frá Eyjum á  herjolfur.is og gistingu í Eyjum  á visitvestmannaeyjar.is   

Skráning þátttakenda á 90 ára afmælismótið  fer fram á Skák.is.

Upplýsingar um þegar skráða keppendur má finna hér. 

Afmælisnefnd Taflfélags Vestmannaeyja.

Guðmundur endaði með 4 vinninga í Abu Dhabi

Alþjóðlegi meistarinn Guðmundur Kjartansson (2442) endaði með 4 vinninga á alþjóðlegu móti sem lauk í Abu Dhabi í Sameinuðu arabísku furstadæmunum í dag. Guðmundur endaði í 78.-94. sæti (88. sæti á stigum) af 130 keppendum. Mótið var afar sterkt en meðal keppenda voru 40 stórmeistarar. 

Íslandsvinurinn Dmitry Andreikin (2733) sigraði á mótinu en hann hlaut 7½ vinning.

Guðmundur heldur á morgun til Bakú þar sem hann teflir með landsliði Íslands á Ólympíuskákmótinu sem sett verður 1. september nk.

• Heimasíða mótsins
• Beinar útsendingar
• Chess-Results

Huginn-a í undanúrslit Hraðskákkeppni taflfélaga

Huginn A-sveit bar sigurorð af sveit Selfyssinga í húsakynnum Skáksambands Íslands sl. sunnudag. Mikill styrkleikamunur var á sveitunum og snemma ljóst í hvað stefndi. Þrír voru atkvæðamestir í sveit Hugins með fullt hús vinninga þeir Hannes Hlífar Stefánsson, Einar Hjalti Jensson og Ingvar Þór Jóhannesson. Nökkvi Sverrisson var atkvæðamestur Selfyssinga með 3½ vinning af 12.

Í kvöld fara fram tvær viðureignir í húsakynnum Taflfélags Reykjavíkur. Annars vegar viðureign TR og Taflfélags Garðabæjar og hins vegar viðureign TRuxvi (unglingasveit TR) og Skákfélags Akureyrar.

Átta liðum úrslitum líkur á morgun með viðureign b-sveitar Hugins og Skákgengisins. Að henni lokinni verður dregið í undanúrslit sem fram 18. september nk.

Þrír efstir og jafnir á Siglufirði - Sigurður Arnarson skákmeistari Norðlendinga

Skákþingi Norðlendinga lauk í gær á Siglurfirði. Sigurður Daði Sigfússon (2254), Þröstur Árnason (2255) og Halldór Brynjar Halldórsson (2247) komu jafnir í mark með 5½ vinning í 7 skákum. Sigurður Daði fékk efsta sætið eftir stigaútreikning.

Sigurður Arnason (2013) og Stefán Bergsson (1993) urðu jafnir í 4.-5. sæti með 5 vinninga. Sigurður varð skákmeistari Norðlendinga í fyrsta sinn þar sem hann var efstur þeirra sem eiga lögheimili norðan heiða. 

Röð efstu manna:

Sjá nánar á Chess-Results.

Sigurður Daði sigraði á Hraðskákmóti Norðlendinga sem fram fór á sunnudeginum. Stefán varð annar og varð þar hraðskákmeistari Norðlendinga. 

Sjá nánar á Chess-Results.

Vel var staðið að mótinu að hálfu heimamanna en Sigurður Ægisson ræður þar ríkjum. Skákstjóri var Ingibjörg Edda Birgisdóttir.

Kári Sólmundarson allur

Kári heitinn Sólmundarson er minnistæður mörgum, fæddur 4. apríl 1926 í Borgarnesi . Hann lést hinn 7. ágúst sl. og útför hans hefur farið fram í kyrrþey. Ég minntist 90 ára afmælis hans með nokkrum orðum í vetur leið á Facebook undir Gallerý skák og vitnaði þá m.a.  í  ítarlega afmælisgrein um hann áttræðan í Morgunblaðinu,  eftir Þorsteinn Skúlason, skákfélaga á árum áður.  Vert er að minnast hins fallna eftirminnilega höfðingja með því að vitna í hana á ný, nú þegar hann er fallinn frá.  Kári tefldi í ellinni af og til með í skákklúbbi eldri borgara Æsum í Ásgarði, Stangarhyl, þar sem hann var jafnan með efstu mönnum. 

"Kári var einn af fremstu skákmeisturum þjóðarinnar um árabil. Hann tefldi í landsliðsflokki með góðum árangri mörg ár í röð á síðari hluta sjötta áratugarins og var valinn til að keppa í landsliðinu fyrir Íslands hönd á Ólympíumótinu í Leipzig 1960. Til dæmis um það hve harður í horn að taka Kári var á þessum árum má nefna að í landsliðskeppninni 1956 vann hann skák sína við Baldur Möller sem þá var margfaldur Íslandsmeistari og tvöfaldur Norðurlandameistari. Ég kynntist Kára fyrst fyrir hálfri öld í sambandi við skákina og hefur okkar kunningsskapur haldist síðan. Þær eru orðnar margar hraðskákirnar og atskákirnar sem við höfum teflt í gegnum tíðina og alltaf er gott að tefla við Kára sem tekur sigri sem ósigri með jafnaðargeði"    .........
    

"Kári var einnig einn af fremstu íþróttamönnum þjóðarinnar á gullaldartímabili frjálsíþróttanna um miðja síðustu öld. Hann var mjög fjölhæfur íþróttamaður svo sem fram kom á mörgum íþróttamótum í Borgarfirði og víðar en þrístökk varð hans aðalgrein og hann var annar af tveimur sem kepptu fyrir Ísland í þeirri grein í þriggja landa keppninni frægu sumarið 1951 þegar landslið Íslands, með íþróttagarpa eins og Clausenbræður, Gunnar Huseby, Torfa Bryngeirsson og Hörð Haraldsson, bar sigurorð af bæði Dönum og Norðmönnum í Oslo. Kári átti góðan þátt í þessum sigri með því að ná öðru sæti af sex í þrístökkinu eftir harða baráttu við fræknustu þrístökkvara þessara þjóða. Hann setti persónulegt met í keppninni, stökk vel á fimmtánda metra sem þótti afburðagott á þessum árum."

Hér má lesa afmælisgreinina um Kára áttræðan 2006 í heild sinni: http://www.mbl.is/greinasafn/grein/1075494/

ESE.

 

Ólympíufarinn: Kristján Örn Elíasson

Ólympíuskákmótið fer fram 2.-13. september nk. í Bakú í Aserbaísjan. Nítján manns verða í sendinefnd Íslands. Fram að móti verða Ólympíufararnir kynntir - einn á dag.

Í dag kynnum við til leiks Kristján Örn Elíasson, einn fimm íslenskra skákstjóra á mótinu.

Nafn?

Kristján Örn Elíasson

Aldur?

57

Hlutverk?

Skákdómari

Uppáhalds íþróttafélag?

Valur og Skákfélag Íslands að sjálfsögðu

Hvernig er undirbúningi þínum fyrir mótið háttað?

Lesa skáklögin og annar týpískur undirbúningur

Hvenær tókstu fyrst þátt á Ólympíuskákmóti og hversu oft hefur þú tekið þátt?

Þetta er fyrsta Ólympíuskákmótið mitt!

Getur þú nefnt frægan skákmann fæddan í Bakú?

Garry Kasparov

Minnisstæðasta atvik á Ólympíuskákmóti?

Á eftir að upplifa það!

Er Kaspíahafið haf eða stöðuvatn?

Stöðuvatn.

Minnisstæða skák á Ólympíuskákmóti og af hverju?

Verður líklega tefld í Baku!

Hverjar eru þínar væntingar/vonir um gengi íslensku liðanna?

Að hver og einn fari fram úr eigin væntingum. Óska öllum góðs gengis

Í ljósi þess að Björn Þorfinnsson er ekki í Bakú-hópnum – hver verður aðaltrúður ferðarinnar?

Við öll verðum í trúðahlutverki, en annars: Hvert er planið?

Eitthvað að lokum?

Djöfull er gaman að þessu!

Meistaramót Hugins hefst á miðvikudagskvöldið

Meistaramót Hugins (suðursvæði) 2016 hefst miðvikudaginn 31. ágúst klukkan 19:30. Mótið er 7 umferða opið kappskákmót sem lýkur 19. september. Leyft verður að taka 2 yfirsetur í 1.-5. umferð sem tilkynna þarf um fyrir lok næstu umferðar á undan. Vegleg og fjölbreytt verðlaun eru í boði. Umhugsunartíminn verður 1½ klst. á skákina auk hálfrar mínútu á hvern leik.

Mótið er öllum opið og er reiknað til alþjóðlegra og íslenskra skákstiga. Skráning í mótið fer fljótlega af stað á skák.is en einnig er hægt að skrá sig með því að hringja í skákstjóra s-866-0116 (Vigfús).

Skákdagar eru mánudagar, miðvikudagar og fimmtudagar en aldrei eru meira en tvær umferðir í viku.

• Skráningarform

Aðalverðlaun:

1. 50.000
2. 40.000
3. 30.000

Aukaverðlaun (miðað er við alþjóðleg skákstig)

• Skákmeistari Hugins (suðursvæði): Kr. 10.000.
• Besti árangur undir  2000 skákstigum:  Skákbók hjá skákbóksölunni að verðmæti kr. 5.000.
• Besti árangur undir 1800 skákstigum:  Skákbók hjá skákbóksölunni að verðmæti kr. 5.000.
• Besti árangur undir 1600 skákstigum: Skákbók hjá skákbóksölunni að verðmæti kr. 5.000.
• Besti árangur stigalausra: Skákbók hjá skákbóksölunni að verðmæti kr. 5.000.
• Unglingaverðlaun (15 ára og yngri), skákbækur hjá skákbóksölunni að verðmæti: 1.vl. kr. 5.000, 2. og 3.vl. kr. 4000.

Þátttökugjöld:

Félagsmenn kr. 3.500; aðrir 4.500-
Unglingar 15 ára og yngri: Félagsmenn: 2.000; Aðrir 3.000.
Allir titilhafar fá frítt í mótið

Umferðartafla:

• 1. umferð, miðvikudaginn, 31. ágúst, kl. 19:30
• 2. umferð, fimmtudaginn, 1. september, kl. 19:30
• 3. umferð, mánudaginn, 5. september, kl. 19:30
• 4. umferð, miðvikudaginn, 7. september, kl. 19:30
• 5. umferð, mánudaginn, 12. september, kl. 19:30
• 6. umferð, fimmtudaginn, 15. september, kl. 19:30
• 7. umferð, mánudaginn, 19. september, kl. 19:30

Afreksæfingar Breiðabliks byrja í dag

Viltu æfa skák oft í viku og stefna á afreksmörk Skáksambands Íslands ?

Skákdeild Breiðabliks í samstarfi við Skákakademía Kópavogs og Skákskóla Íslands býður í vetur upp á öfluga skákþjálfun með það að markmiði.

Boðið er upp á æfingatíma í stúkunni við Kópavogsvöll mánudaga til föstudaga frá 16:00 – 17:30.
Þjálfari er Birkir Karl Sigurðsson FIDE National Instructor

Æfingarnar henta skákkrökkum sem hafa náð grunnfærni í skák, hafa mikinn áhuga og vilja æfa skák oft í viku að stefna að því að verða í fremstu röð á Íslandi og að standa sig með sóma á alþjóðlegum barna- og unglingaskákmótum.

Hver iðkandi velur sér þrjár æfingar í viku, en frjálst verður að hafa þær fleiri eða færri. Einnig verður hægt að velja um að mæta seinna og fara fyrr ef tíminn t.d. rekst á aðrar tómstundir. Við búumst við að geta myndað tvo kjarna, eldri og reyndari krakkar og svo hóp af ungum og efnilegum. Í athugun er að vera með hóp c.a. 10 ára og yngri í efri byggðum Kópavogs ef næg þátttaka fæst.

Iðkendur utan Kópavogs og í hvaða taflfélagi sem er eru velkomnir. Allir geta mætt í nokkur skipti til að prófa án æfingagjalds.

Fyrsta æfing verður mánudaginn 29.ágúst
Síðasta æfing fyrir jólafrí verður föstudaginn 9.desember.
Fyrsta æfing eftir áramót verður mánudaginn 2.janúar
Páskafrí mánudag 10.apríl – mánudags 17.apríl.
Síðasta æfing fyrir sumarfrí verður föstudaginn 12.mai
Frí er á æfingum alla hátíðisdaga. (fim 20.apríl: Sumardagurinn fyrsti, mán 1.mai: Verkalýðsdagurinn)

Æfingagjöld veturinn 2016-17: (eru styrkhæf sem tómstundastyrkur hjá Kópavogsbæ og Reykjavíkurborg):
Þrisvar sinnum eða oftar í viku: 30.000kr
Tvisvar sinnum í viku: 20.000kr
Einu sinni í viku: 10.000kr
Skráning í Íbúagátt Kópavogsbæjar 

Æfingarnar eru á jarðhæð í stúkunni við Kópavogsvöll og vonandi einnig í efri byggðum Kópavogs. Gengið inn á jarðhæð í gegnum hlið eins og verið sé að fara á fótboltaleik og þaðan inn í glerbygginguna. 

Nánari upplýsingar hjá Halldóri Grétari. 

Afreksmörk SÍ.

Barna- og unglingaæfingar Hugins í Mjóddinni hefjast í dag

Barna- og unglingaæfingar Skákfélagsins Hugins í Mjóddinni hefjast aftur eftir sumarfrí mánudaginn 29. ágúst 2016. 

 

Æfingarnar byrja kl. 17:15 og þeim lýkur yfirleitt rétt fyrir kl. 19.

 

Æfingarnar eru opnar öllum 15 ára og yngri en skipt verður í tvo flokka eftir aldri og styrkleika á flestum æfingum.

 

Engin þátttökugjöld.

 

Æfingarnar verða haldnar í félagsheimili Hugins í Álfabakka 14a, Mjódd. Inngangur er milli Fröken Júlíu og Subway en salur félagsins er á þriðju hæð hússins.

 

Á æfingunum verða 5 eða 6 umferðir með umhugsunartíma 10 eða 7 mínútur. Einnig verður farið í dæmi og endatöfl eins og tíma vinnst til.

 

Þegar starfsemin verður komin vel af stað verður unnið í litlum verkefnahópum á einni æfingu í mánuði og þannig stuðlað að því að efla einingu og samstöðu innan hópsins.  Þær æfingar verða eingöngu fyrir félagsmenn og verða kynntar síðar. Jafnframt verður þegar tímabilið er komið vel af stað í boði kennsla fyrir félagsmenn utan hefðbundins æfingatíma.

 

Umsjón með æfingunum hefur Vigfús Ó. Vigfússon