Daði og Þröstur efstir á Nóa Síríus-mótinu

Fimmta og næst síðasta umferð Nóa-Síríus mótsins var tefld í Stúkunni á þriðjudagskvöldið, 7. febrúar. Eins og endranær var skákgleðin við völd. Úti var kolvitlaust veður og myrkur, ekki hundi út sigandi. Inni var ljós, þar ríkti friður. Yfir vötnum sveif angurvær andi Caissu og umlukti þá undursamlegu uppvakninga sem annað hvort ráfuðu um salarkynnin þar, eða sátu eins og steinrunnir undir álagahjúpi þeirrar gyðju sem sumir menn telja öðrum gyðjum ljúfari, betri og fegurri. Já, hún verður að teljast einstök, þessi innri ró sem menn finna þar sem skákmenn koma saman og skynja að fegurðinni og ástríðunni er deilt með öðrum. 

Af A-flokki.

Daði Ómarsson tefldi vel með hvítu mönnunum gegn nýbökuðum Skákmeistara Reykjavíkur, Guðmundi Kjartanssyni og hafði sigur. Þröstur Þórhallsson sveið Benedikt Jónasson í drottningarendatafli eftir frumlega byrjun, þar sem Benni taldi að hann myndi halda jöfnu en Þröstur hafði séð lengra. Jóhann Hjartarson sigraði Vigni Vatnar Stefánsson í skák þar sem stórmeistarinn fékk snemma mun betra tafl og sleppti aldrei tökunum á ungstirninu. Höfðingjarnir, Jón L. Árnason og Björn Þorfinnsson, skildu jafnir þegar komið var út í hróksendatafl og ljóst að hvorugur komst lönd eða strönd. Þá vann Jón Viktor Gunnarsson góðan sigur á Guðmundi Gíslasyni í skák sem var bæði flókin og óljós langt fam eftir tafli. Helgi Áss Grétarsson tefldi eins og sá sem valdið hefur gegn Sigurbirni Björnssyni og vann. Þorsteinn Þorsteinsson var fyrstur að klára sína skák þegar hann sigraði hinn unga og efnilega Gauta Pál Jónsson nokkuð örugglega í snaggaralegri skák. Viðureign Dags Ragnarssonar og Friðriks Ólafssonar var frestað af óviðráðanlegum orsökum. Bolvíkingarnir Halldór Grétar Einarsson og Guðmundur Halldórsson háðu harða rimmu þar sem sá fyrrnefndi hrósaði happi eftir að Guðmundur virist fá betra út úr byrjuninni. Hrafn Loftsson og Sigurður Daði Sigfússon skildu jafnir þar sem mættust stálin stinn og Oliver Aron Jóhannesson hafði sigur á Kristjáni Eðvarðssyni með skæðri kóngssókn af gamla skólanum. Þá vann Bárður Örn Birkisson góðan sigur á Lenku Ptáchníkovu. 

Upplýsingar um önnur úrslit umferðarinnar má finna á Chess-Results. 

Þegar einungis ein umferð er ótefld, er staðan í A-flokki þessi: 

Daði Ómarsson og Þröstur Þórhallsson eru jafnir og efstir með fjóran og hálfan vinning í fimm skákum. Við erum ekki óvön slíku frá stórmeistaranum, Þresti Þórhallssyni, en Daði Ómarsson hefur komið á óvart og teflt manna best á mótinu. Nú er ljóst að þessir tveir munu heyja hreina úrslitaviðureign í sjöttu og síðustu umferð. Vinningi færra en þeir félagar, með þrjá og hálfan, hafa Guðmundur Kjartansson, Jóhann Hjartarson, Helgi Áss Grétarsson, Björgvin Jónsson og Jón Viktor Gunnarsson. Stöðuna í A-flokki má annars finna hér. 

B-flokkur:

Í B-flokki er ekki síður hart barist. Á topp borði varð efsti maður mótsins, Hörður Aron Hauksson, loks að láta í minni pokann þegar geysi sterkur Jón Trausti Harðarson sýndi klærnar. Oliver Alexander Mai gerði sér lítð fyrir og sigraði Agnar Tómas Möller nokkuð óvænt. Þá sigraði Stephan Briem, Óskar Víking Davíðsson sem verður að teljast til tíðinda. Hrund Hauksdótitr tapaði fyrir Ólafi Evert Úlfssyni, Róbert Luu sigraði Birki Ísak Jóhannsson og Jón Eggert Hallsson sigraði Svövu Þorsteindsóttur. 

Önnur úrslit umferðarinnar má sjá ef meðfylgjandi krækju er fylgt. 

Staðan í B-flokki er þessi: Efstir og jafnir, með fjóra vinninga í fimm skákum, eru: Hörður Aron Hauksson, Alexander Oliver Mai og Jón Trausti Harðarson. Á hæla þeim með þrjá og hálfan vinning eru Stephan Briem, Ólafur Evert Úlfsson og Róbert Luu. Þar á eftir koma svo Ástralíufarinn, Birkir Karl Sigurðsson, Agnar Tómas Möller, Óskar Víkingur Davíðsson, Jón Eggert Hallsson, Gunnar Erik Guðmundsson, Örn Alexandersson og Halldór Atli Kristjánsson, allir með þrjá vinninga. 

Það er deginum ljósara að hart verður barist í síðustu umferð sem tefld verður í Stúkunni við Kópavogsvöll á þriðjudaginn næsta. Allir skákáhugamenn eru hvattir til þess að líta við, taka skákpúlsinn margfræga, bergja á bleksvörtu kaffi í hvítri Stúku og finna þessa innri ró sem við skákmenn og -konur ein getum fundið. Komið fagnandi.

Skákhuginn.

 

Laugalækjarskóli er Reykjavíkurmeistari grunnskóla 2017 - Rimaskóli hlutskarpastur í stúlknaflokki

Húsfyllir var á Reykjavíkurmóti grunnskólasveita sem haldið var í félagsheimili Taflfélags Reykjavíkur síðastliðinn mánudag. 130 börn mættu galvösk til leiks eftir langan skóladag og settust að tafli í 28 skáksveitum. Það var með nokkrum ólíkindum að fylgjast með börnunum sitja einbeitt við skákborð í þrjár klukkustundir eftir langan skóladag, og það á kvöldmatartíma. Svöng og þreytt framleiddu börnin margar listilega vel útfærðar kóngssóknir, lögðu lævísar gildrur og fórnuðu mönnum á flestum reitum skákborðsins til þess að veita kóngi andstæðingsins banahöggið.

Það lá ljóst fyrir strax í upphafi að Reykjavíkurmeistararnir frá 2016, Laugalækjarskóli, voru mættir til leiks rammir að afli. Þrír af fjórum liðsmönnum þessarar ógnarsterku skáksveitar voru að tefla á sínu síðasta Reykjavíkurmóti grunnskóla og þeir ætluðu greinilega að kveðja með stæl. Laugalækjarskóli vann allar viðureignir sínar og hlaut 26,5 vinning í skákunum 28. Sannarlega frækin framganga þessara efnilegu pilta.

Rimaskóli mætti í skáksalinn með hvorki fleiri né færri en sex skáksveitir. Þrjár þeirra komust á verðlaunapall. A-sveit Rimaskóla hlaut silfurverðlaun með 19,5 vinning, tveimur vinningum fyrir ofan B-sveit sína sem hreppti þriðja sætið. Í 4.-5.sæti lentu skáksveitir Hagaskóla og Háteigsskóla. Sveit Hagaskóla var leidd áfram af Ólympíufaranum Svövu Þorsteinsdóttur sem lék á alls oddi á 1.borði. Sveitin var í toppbaráttunni allt mótið en fataðist flugið í síðustu tveimur umferðunum gegn sterkum skáksveitum Laugalækjarskóla og Ölduselsskóla. Háteigsskóli sem var ekki með sitt sterkasta lið að þessu sinni sýndi þó klærnar gegn ofursveit Laugalækjarskóla og var eini skólinn sem vann skák gegn Reykjavíkurmeisturunum. Þar var að verki Adam Omarsson sem gerði sér lítið fyrir og vann allar skákir sínar í mótinu, sjö að tölu.

Hin sigursæla a-sveit Ölduselsskóla varð að gera sér 6.sætið að góðu. Sveitin er skipuð efnilegum og reynslumiklum piltum og endaði sveitin í 2.sæti mótsins í fyrra. Stríðsgæfan var þeim hins vegar ekki hliðholl að þessu sinni. Piltarnir eru annálaðir keppnismenn og munu vafalítið beisla stríðsgæfuna sér í vil fyrir næsta skólamót. Í 7.-8.sæti, í humátt á eftir Ölduselsskóla lentu B-sveit Hagaskóla og stúlknasveit Rimaskóla með 16 vinninga.

Stúlknasveit Rimaskóla skartaði Nansý Davíðsdóttur á 1.borði, líkt og í fyrra er sveitin reyndist hlutskörpust stúlknasveita. Nansý býr yfir slíkum skákstyrk að hún hefði hæglega getað leitt A-sveit skólans. Með Nansý í broddi fylkingar var sveitin í efri hluta mótsins og lauk keppni í 8.sæti með 16 vinninga. Reyndist það besta frammistaða stúlknasveita þetta árið. Næsta stúlknasveit hlaut 13,5 vinning og voru þar á ferð hinar ungu og áhugasömu stúlkur úr Háteigsskóla. Þriðja besta stúlknasveitin að þessu sinni var sveit Foldaskóla með 12 vinninga.

Það gekk á ýmsu á þeim þremur klukkutímum sem börnin glímdu við skákborðin. Skákstjórar þurftu að leysa úr fjölbreyttum uppákomum og gat flækjustigið stundum verið mikið. Oft stóðu kóngar í skák í marga leiki án þess að keppendur tækju eftir því og mátti þá gjarnan greina angistarsvip hjá foreldrum sem biðu spenntir á kantinum. Einn keppandi var óvænt í miðri skák með tvo hvítreitabiskupa á borðinu og verður þá taflstaðan afar skrýtin, í það minnsta í huga reyndari skákmanna. Einnig er nokkuð algengt að minna reyndir keppendur drepi sína eigin menn. Þá tilraun framkvæmdi einmitt einn ungur piltur sem varð fyrir því óláni að verða mát uppi í borði. Sá dó ekki ráðalaus heldur steindrap sitt eigið peð á h2 -sigri hrósandi- og forðaði þar með kóngi sínum frá banatilræði andstæðingsins, allt þar til skákstjóri kom að borðinu og fór eldsnöggt yfir helstu leikreglur. Á einu af neðri borðunum hvarf kóngur eins keppanda af borðinu og við nánari eftirgrennslan kom í ljós að slík ógn steðjaði að kóngnum að eigandanum þótti vissara að skjóta skjólshúsi yfir hann með því að geyma hann undir stól. Er þá ótalið barnið sem vissi ekki hvar það átti að vera í skáksalnum í tiltekinni umferð og reyndi ítrekað að segja skákstjóra nafn andstæðinganna. Eftir nokkur „ha?“, „hvað segirðu?“, og „segðu mér nafnið aftur“ lánaðist barninu loks að koma nafninu frá sér skýrt og skilmerkilega: „Ég á að tefla við Öldubrekkuskóla“. Er þessi orð eru rituð er ekki enn ljóst í hvaða sæti Öldubrekkuskóli endaði.

Taflfélag Reykjavíkur vill koma á framfæri þökkum til allra þeirra tæplega 130 barna sem tóku þátt í þessari árlegu veislu sem Reykjavíkurmót grunnskólanna er. Einnig færum við liðsstjórum og foreldrum þakkir fyrir komuna og fyrir að aðstoða mótshaldið með hjálparhöndum, ábendingum og prúðmennsku. Samstarf Taflfélags Reykjavíkur og Skóla- og frístundasviðs Reykjavíkurborgar við framkvæmd þessa skákmóts hefur verið afar gott og þökkum við Reykjavíkurborg heilshugar fyrir að veita börnunum þetta tækifæri til þess að njóta sín við taflborðin. Sjáumst að ári liðnu! 

Nánari upplýsingar um mótið má nálgast á chess-results.

Fullt af myndum má nálgast á heimasíðu TR.

Skákmót öðlinga hefst miðvikudaginn 22. febrúar

Skákmót öðlinga 40 ára og eldri hefst miðvikudaginn 22. febrúar kl. 19.30 í félagsheimili T.R. að Faxafeni 12. Tefldar verða 7 umferðir eftir svissneska-kerfinu og er umhugsunartíminn 90 mínútur á alla skákina  auk 30 sekúndna viðbótartími á hvern leik.
Mótið verður nú haldið í 26. sinn en núverandi Skákmeistari öðlinga er Stefán Arnalds.

Dagskrá:
1. umferð miðvikudag 22. febrúar kl. 19.30
2. umferð miðvikudag 1. mars kl. 19.30
3. umferð miðvikudag 8. mars kl. 19.30
4. umferð miðvikudag 15. mars kl. 19.30
5. umferð miðvikudag 22. mars kl. 19.30
6. umferð miðvikudag 29. mars kl. 19.30
7. umferð miðvikudag 5. apríl kl. 19.30

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu. Láta skal skákstjóra vita um yfirsetu fyrir lok umferðarinnar á undan.

Mótinu lýkur miðvikudaginn 12. apríl kl. 19:30 með hraðskákmóti og verðlaunaafhendingu. Keppt er um veglegan farandbikar, en auk hans eru verðlaun fyrir þrjú efstu sætin, bæði í aðalmótinu og hraðskákmótinu.

Tímamörk
90 mín + 30 sek viðbót eftir hvern leik

Verðlaun
1. sæti kr. 40.000
2. sæti kr. 20.000
3. sæti kr. 10.000

Þátttökugjald (greiðist með reiðufé við upphaf móts)

kr. 5.000 – Innifalið er frítt kaffi allt mótið ásamt rjómavöfflum og öðru góðgæti á lokakvöldi

Skákstjórn

Þórir Benediktsson; [e-mail], s. 867 3109

Skráningarform

Skráðir keppendur

Skákkeppni vinnustaða fer fram fimmtudaginn 16. febrúar

Taflfélag Reykjavíkur býður öllum vinnustöðum að taka þátt í Skákkeppni vinnustaða 2017 sem fram fer í félagsheimili TR að Faxafeni 12, fimmtudaginn 16.febrúar. Taflið hefst klukkan 19:30. Mótið er kjörið fyrir hinn almenna skákáhugamann þar sem vinnufélagar geta teflt saman í einu liði og spreytt sig gegn skákmönnum annarra vinnustaða.

Tefldar verða 7 umferðir með umhugsunartímanum 8 mínútur á hverja skák auk þess sem 2 sekúndur bætast við umhugsunartímann eftir hvern leik (8+2). Teflt er í þriggja manna liðum og er hverju liði heimilt að hafa eins marga varamenn og þeim hugnast. Ekkert takmark er á fjölda liða hvers vinnustaðar.

Veitt verða verðlaun fyrir þrjár efstu sveitirnar.

Þátttökugjald er 15.000kr fyrir hverja sveit. Skráning fer fram í gegnum sérstakt skráningarform sem finna má á vef TR (einnig aðgengilegt á www.skak.is). Nánari upplýsingar um mótið veitir Kjartan Maack í síma 8620099.

Við hvetjum alla vinnustaði til þátttöku. Byrjendur jafnt sem lengra komnir eru velkomnir.

Metaðsókn á æfingu Fjölnis eftir grunnskólamótið í skák

Það mættu 40 grunnskólakrakkar úr Grafarvogi á miðvikudagsskákæfingu Fjölnis eftir Reykjavíkurmót grunnskóla í skák tveimur dögum fyrr. Alls tóku níu skáksveitir úr grunnskólum  Grafarvogs þátt í grunnskólamótinu og frammistaða skáksveitanna virkilega góð. Rimaskóli hefur á að skipa mikilli breidd skákkrakka um þessar mundir, bæði drengir og stúlkur, og vann skólinn til gull, silfurs og bronsverðlauna á Reykjavíkurmótinu.

 

 

Björn Ívar Karlsson frá Skákakademíu Reykjavíkur er að vinna afar árangursríka vinnu í þremur grunnskólum Grafarvogs, Foldaskóla, Kelduskóla og Rimaskóla. Þessir skólar eru allir að senda sterkar sveitir á grunnskólaskákmótin. Skákæfingin í dag miðvikudag var nokkurs konar uppskeruhátíð í lok Reykjavíkurmótsins og verðlaunað var með SAMbíómiðum til níu skákmanna. Á æfingunni var teflt í tveimur aldursflokkum. Í eldri flokk varð Sæmundur Árnason Foldaskóla, efstur. Næstir í röðinni komu strákarnir í 6. bekk Rimaskóla; Arnór, Hilmir, Joshua, Kjartan Karl, Anton Breki og Ríkharð Skorri. Í yngri flokk voru það tvær af skákdrottningum Rimaskóla sem urðu efstar og jafnar, þær Eva Björg og Sara sem unnu alla sína andstæðinga og enduðu á innbyrðisjafntefli í lokaumferð. Næstir komu tveir efnilegir sjö ára skákmenn, þeir Eiríkur í Húsaskóla og Sindri Snær í Rimaskóla.

Í skákhléi var boðið upp á bakkelsi frá Bakarameistaranum. Þeir Helgi Árnason og Jóhann Arnar Finnsson stjórna Fjölnisæfingunum í vetur á miðvikudögum kl. 16:30 – 18:00.  

Vefsíða Vinaskákfélagsins

Vinaskákfélagið hefur sett upp nýja og glæsilega vefsíðu fyrir félagið. Vefsíðuna má nálgast undir tenglum á vinstri hluta Skák.is.

Vefsíða Vinaskfélagsins

Fjórða mót Bikarsyrpunnar ásamt Bikarmóti stúlkna fer fram næstu helgi

Bikarsyrpa Taflfélags Reykjavíkur hefur fest sig í sessi undanfarin misseri og fer nú af stað þriðja árið í röð. Mót syrpunnar í vetur verða fimm talsins og hefur umferðum hvers móts verið fjölgað í sjö.

Fjórða mót Bikarsyrpunnar hefst föstudaginn 10. febrúar og stendur til sunnudagsins 12. febrúar. Tefldar eru 7 umferðir eftir svissnesku kerfi. Tímamörk eru 30 mínútur + 30 sekúndur á hvern leik og geta skákirnar því varað í allt að tvær klukkustundir. Þó svo mikilvægt sé að börnin vandi sig og noti tímann vel, þá má gera ráð fyrir að margar skákir taki mun styttri tíma.

Við endurtökum leikinn og höldum að auki meðfram Bikarsyrpunni Bikarmót stúlkna sem mæltist vel fyrir á síðastliðnum mótum. Með því gefst stelpum sem vilja prófa form Bikarsyrpunnar aukið tækifæri á að spreyta sig áður en þær taka þátt í sjálfri Bikarsyrpunni. Tefldar verða fimm umferðir í stúlknamótinu, ein á föstudag og tvær hvorn daginn laugardag og sunnudag, en að öðru leyti verður fyrirkomulag hið sama og í Bikarsyrpunni. Nánari dagskrá má sjá hér að neðan.

Fyrir börn sem vilja taka framförum í skák þá er gott að byrja sem fyrst að tefla í kappskákmótum, en hingað til hefur þeim börnum sem vilja tefla á “alvöru mótum” einkum staðið til boða að taka þátt í opnum mótum. Þar er styrkleikamunur oft mikill og mótin taka langan tíma, auk þess sem mörgum börnum óar við tilhugsuninni um að tefla við fullorðna á sínum fyrstu kappskákmótum. Bikarsyrpan er svarið við því. Þessi mótaröð TR er ekki síður sniðin að þörfum þeirra barna sem dreymir um að næla sér í sín fyrstu skákstig.

Einungis börn á grunnskólaaldri (fædd árið 2001 eða síðar) sem ekki hafa náð 1600 alþjóðlegum skákstigum geta tekið þátt í mótum Bikarsyrpunnar. Þannig er styrkleikamunurinn minni en ella og börnin njóta þess betur að tefla. Tímamörkin eru jafnframt styttri, og henta börnum betur en langar 90 mínútna skákir sem tíðkast á hefðbundnum kappskákmótum fullorðinna. Mótin uppfylla öll skilyrði Alþjóða skáksambandsins FIDE og eru reiknuð til alþjóðlegra skákstiga.

Dagskrá Bikarsyrpu IV:

1. umferð: 10. febrúar kl. 17.30 (fös)
2. umferð: 11. febrúar kl. 10.00 (lau)
3. umferð: 11. febrúar kl. 13.00 (lau)
4. umferð: 11. febrúar kl. 16.00 (lau)
5. umferð: 12. febrúar kl. 10.00 (sun)
6. umferð: 12. febrúar kl. 13.00 (sun)
7. umferð: 12. febrúar kl. 16.00 (sun)

Dagskrá Bikarmóts stúlkna:

1. umferð: 10. febrúar kl. 17.30 (fös)
2. umferð: 11. febrúar kl. 10.00 (lau)
3. umferð: 11. febrúar kl. 13.00 (lau)
4. umferð: 12. febrúar kl. 10.00 (sun)
5. umferð: 12. febrúar kl. 13.00 (sun)

Verðlaunaafhending fer fram strax að lokinni síðustu umferð hvors móts fyrir sig.

Tvær yfirsetur (bye) eru leyfðar í umferðum 1-5 og fæst 1/2 vinningur fyrir hvora yfirsetu (í stúlknamótinu er ein yfirseta leyfð í umferðum 1-3). Tilkynna þarf skákstjóra um yfirsetu fyrir lok umferðarinnar á undan.

Þátttökugjald í mótið er 1.500kr. Börn sem eru félagar í TR greiða ekki þátttökugjald.

Sigurvegari hvors móts hlýtur að launum bikar. Verðlaunapeningur eru veittur fyrir 2. sæti og 3. sæti. Sérstök verðlaun verða veitt næsta vor fyrir samanlagðan árangur í mótunum fimm, þar á meðal er veglegur farandbikar. Þá verða veitt sérstök verðlaun fyrir samanlagðan árangur fyrir börn sem eru félagar í TR, en það eru einkatímar hjá einhverjum af sterkustu skákmönnum félagsins; 1. sæti gefur 5 einkatíma, 2. sæti gefur 3 einkatíma og 3. sæti gefur 2 einkatíma.

Vinsamlegast skráið þátttakendur sem fyrst, það hjálpar til við undirbúning mótsins. Hlökkum til að sjá ykkur!

Skákstjórn: Þórir Benediktsson (867 3109) og Sigurlaug R. Friðþjófsdóttir (862 6290)

Skráningarform

Skráðir keppendur

Friðrik lék fyrsta leikinn hjá Hjallastefnunni

F

Laufásborg hefur haldið upp á skákdaginn síðan árið 2012 með skemmtilegum atburðum eins og fjöltefli við stórmeistara, blindskák og skákmót fyrir börnin. Skákdagurinn er 26. janúar sem er afmælisdagur Friðriks Ólafssonar, fyrsta stórameistara íslands, og fyrrverandi forseta alþjóðlega skáksambandsins. Í ár heiðraði Friðrik Ólafsson okkur með nærveru sinni, heilsaði hverju barni, gaf okkur fallega gjöf og tefldi fyrsta leikinn. Ótrúlega gaman.

 

Dagurinn byrjaði snemma hjá okkur. Klukkan 10:00 lagið hópur 5 ára stúlkna af stað og fór í Þorrasel til að tefla við eldri borgara þar.

Myndir

Vel heppnað skáknámskeið í Eyjum

Þennan vetur hefur verið regluleg skákkennsla í Grunnskóla Vestmannaeyja. Sæfinna Ásbjörnsdóttir kennari við skólann hefur tekið þátt í verkefni Skáksambandsins Skák eflir skóla – kennari verður skákkennari. Í hverri viku kennir Sæfinna öllum nemendum fjórða bekkjar skák. Í framhaldi af þeirri kennslu ákvað Taflfélag Vestmannaeyja að bjóða börnum og unglingum á helgarnámskeið í skák. Nokkrir úr fjórða bekk sóttu námskeiðið en alls litu yfir tuttugu krakkar inn í húsnæði Taflfélagsins um helgina. Um tíu drengir mættu alla dagana og fengu því níu klukkustundir af skákkennslu. Samhliða kennslu var haldið mót þar sem nemandi í sjöunda bekk, Daníel Franz Davíðsson, vann allar sínar skákir. Að launum fékk Daníel veglegt taflborð úr gleri. Þeir þátttakendur sem kláruðu námskeiðið voru leystir út með súkkulaði og miklu hrósi fyrir að hafa staðið sig vel. Stefán Bergsson kenndi á námskeiðinu en hann hefur starfað með Sæfinnu og grunnskólanum í vetur og komið í nokkrar heimsóknir til Eyja.

Skákkennslan í fjórða bekk mun halda áfram út veturinn og eru uppi hugmyndir um að bæta enn í skákkennslu fyrir börn og unglinga í Vestmannaeyjum. Rétt er að minnast á vefinn skakkennsla.is sem Eyjamaðurinn Björn Ívar Karlsson á mestan heiðurinn af.

Skákkeppni vinnustaða fer fram fimmtudaginn 16. febrúar

Taflfélag Reykjavíkur býður öllum vinnustöðum að taka þátt í Skákkeppni vinnustaða 2017 sem fram fer í félagsheimili TR að Faxafeni 12, fimmtudaginn 16.febrúar. Taflið hefst klukkan 19:30. Mótið er kjörið fyrir hinn almenna skákáhugamann þar sem vinnufélagar geta teflt saman í einu liði og spreytt sig gegn skákmönnum annarra vinnustaða.

Tefldar verða 7 umferðir með umhugsunartímanum 8 mínútur á hverja skák auk þess sem 2 sekúndur bætast við umhugsunartímann eftir hvern leik (8+2). Teflt er í þriggja manna liðum og er hverju liði heimilt að hafa eins marga varamenn og þeim hugnast. Ekkert takmark er á fjölda liða hvers vinnustaðar.

Veitt verða verðlaun fyrir þrjár efstu sveitirnar.

Þátttökugjald er 15.000kr fyrir hverja sveit. Skráning fer fram í gegnum sérstakt skráningarform sem finna má á vef TR (einnig aðgengilegt á www.skak.is). Nánari upplýsingar um mótið veitir Kjartan Maack í síma 8620099.

Við hvetjum alla vinnustaði til þátttöku. Byrjendur jafnt sem lengra komnir eru velkomnir.